Lesona 4: Mataupu Faavae ma Feagaiga 1

Mataupu Faavae ma Feagaiga 1

“Ua Oo le Siufofoga o le Alii i Tuluiga o le Lalolagi”

A o lei lolomiina le Tusi o Poloaiga, lea na avea mulimuli ane ma se vaega o le Mataupu Faavae ma Feagaiga, sa talosaga ai le Perofeta o Iosefa Samita i le Alii mo se faatomuaga i le tusi. I le tali mai, na faaali mai ai e le Alii le mea ua avea nei ma Mataupu Faavae ma Feagaiga vaega 1 o se faatomuaga o faaaliga i le lalolagi. O lenei lesona e mafai ona fesoasoani i tagata aooga ia malamalama pe aisea ua tuuina mai ai e le Alii ia lapataiga i le lalolagi.

Gaoioiga E Ono Mafai Ona Aoao Ai

“O le leo o le lapataiga”

Mafaufau e faaaoga le vaaiga faataitai lenei po o se mea e sili ona fetaui ma manaoga o au tagata aooga e fesoasoani e saunia ai i latou e mafaufau loloto pe aisea e ono lapataia ai e se tasi se isi tagata.

Vaai faalemafaufau i se uo o loo faia se faaiuga o le a taitai atu ai i taunuuga lē lelei.

Valaaulia tagata aooga e faasoa mai ni faataitaiga moni o le tulaga e mafai ona i ai lenei faaiuga. O nisi o faataitaiga atonu o le pepelo i matua, solia o le Upu o le Poto, kopi i le aoga, po o le tuua o le Ekalesia.

• Aisea o le a e manao ai e lapata’i lau uo e uiga i lenei faaiuga?

Ua tuuina mai foi e le Faaola se “leo o le lapataiga” (Mataupu Faavae ma Feagaiga 1:4). Mafaufau loloto i fesili nei:

• Aisea e ono lapataia ai i tatou e le Faaola? Aisea e ono lapataia patino ai oe e Ia? E faapefea?

• O le a se mea o aoao atu e lenei mea ia te oe e uiga ia te Ia?

A o e suesue i lenei lesona, vaavaai mo tali i fesili nei.

O le leo o le lapataiga a le Alii e mo tagata uma

O le faamatalaga lenei e mafai ona fesoasoani i tagata aooga ia malamalama i le talafaasolopito o le auala na maua ai le faatomuaga o le Mataupu Faavae ma Feagaiga.

E oo atu ia Novema 1831, ua silia ma le 60 faaaliga na faamaumauina e le Perofeta o Iosefa Samita mai le Alii. Peitai, e toaitiiti ni tagata o le Ekalesia sa i ai ni kopi o faaaliga. I lalo o le taitaiga a le Perofeta, sa tuufaatasia ai faaaliga i se voluma fou o tusitusiga paia na ta’ua o le Tusi o Poloaiga, lea na avea mulimuli ane ma se vaega o le Mataupu Faavae ma Feagaiga. A o tau lolomiina le tusi, sa aioi atu ai Iosefa i le Alii i le tatalo mo se faatomuaga i le tusi. I le tali mai, sa ia maua e ala i le faaaliga le vaega 1, lea na ta’ua e le Alii “o la’u faatomuaga” (Mataupu Faavae ma Feagaiga 1:6) i lenei tusi fou o tusitusiga paia.

Mafaufau e tusi ia fesili nei ma mau faasino i luga o le laupapa. E mafai ona maua e tagata aooga tali ta’itoatasi po o i ni vaega toalaiti. Afai e galulue i ni vaega toalaiti, atonu e mananao tagata aooga e otooto mea na latou maua i a latou vaega a o lei faasoa atu i le vasega.

Faaaoga au tusitusiga paia e tali ai fesili nei:

• O ai ua lapataia e le Faaola i aso nei? (tagai i le Mataupu Faavae ma Feagaiga 1:1–4, 34–36; atonu e fesoasoani le iloa o se “faailoga tagata” [fuaiupu 35] o se tasi e fiafia i le tasi tagata nai lo le isi).

• E faapefea ona tuuina mai e le Alii Lana savali? (tagai Mataupu Faavae ma Feagaiga 1:4–6).

A o mafaufau tagata aooga i a latou tali, atonu e fesoasoani le tusi o le faamatalaga lenei i luga o le laupapa: O le siufofoga o le lapataiga a le Faaola e mo tagata uma.

O le siufofoga o le lapataiga a le Alii o le faamaoniga lea o Lona alofa

I le Mataupu Faavae ma Feagaiga 1, ua faaali mai ai e le Faaola le tele o mafuaaga ua Ia tuuina mai ai lapataiga i le lalolagi. A o e suesue, mafaufau loloto pe faapefea ona avea nei mafuaaga ma faamaoniga o le faamanuiaina o i tatou e le Faaola.

Faitau le Mataupu Faavae ma Feagaiga 1:11–17, 21–28, ma vaavaai mo mafuaaga ua tuuina mai ai e le Alii ia i tatou lapataiga.

Mafaufau e vaelua afa le vasega. Tofi le tasi afa e faitau fuaiupu 11–17 ae faitau e le isi ia fuaiupu 21–28. Afai e manaomia e tagata aooga nisi faatonuga, e mafai ona e faia se siata e lua koluma. Faaaofia fuaiupu i le koluma muamua, ma faataga tagata aooga e tusi le mafuaaga mo le lapataiga i le koluma lona lua. Atonu e maua e tagata aooga ni tali e pei o nei:

• 1:12 e saunia ai i tatou mo mea o le a oo mai

• 1:15–17 e lapataia i tatou e uiga i luitau ma agasala o o tatou aso

• 1:21 e faateleina ai lo tatou faatuatua

• 1:22 ina ia mafai ona faavae le feagaiga tumau faavavau a le Alii

• 1:26 e faatonu ai i tatou

• 1:27 e aoa’i ma faasa’o ai i tatou pe a tatou agasala

• 1:27 e fesoasoani ia i tatou ia salamo

• 1:28 e tuuina mai ia i tatou le malamalama

Mafaufau e valaaulia ni nai tagata aooga e faasoa mai mea na latou aoaoina e ala i le faaaogaina o le fesili lenei.

Filifili se tasi o mafuaaga na e maua e fetalai mai ai le Alii ia i tatou, ma tali mai se tasi pe lua o fesili nei:

• E faapefea ona avea lenei mafuaaga ma faamaoniga o le alofa o le Faaola? E mafai faapefea ona avea lenei mafuaaga o se faamanuiaga?

• O anafea na e maua ai lenei faamanuiaga, pe aisea e te ono manao ai i lenei faamanuiaga i lou olaga?

• Aisea e manaomia ai e le lalolagi atoa lenei faamanuiaga?

E faapefea ona lapataia i tatou e le Faaola i o tatou aso?

E mafai ona fesoasoani mea nei i tagata aooga ia faasoa ai mea ua latou aoaoina. Atonu e te manao e tuuina atu se pepa pe fai i tagata aooga e faaaoga a latou api talaaga o suesuega. Uuna’i tagata aooga ina ia fatufatua’i i auala latou te faasoa atu ai a latou savali. E mafai ona e tuuina atu ni anomea e tusi ai ata pe a maua.

Mafaufau i lau lesona i le Aso Sa nei, ua valaaulia oe e lou faiaoga e faaaoga ni nai minute e faasoa mai ai pe aisea ua lapataia ai i tatou e le Alii i aso nei. Mafaufau pe faapefea ona e faasoa atu lenei feau i lau vasega i se auala aoga. Saunia se pepa e tufa atu, meme, pepa lautele o i ai se savali, po o se isi auala fatufatuai mo le faasoaina atu o lenei savali i lau vasega. Faamolemole ia faaaofia ai mea nei:

• O se fuaiupu mai le Mataupu Faavae ma Feagaiga 1 o loo faasoa mai ai ia le itiiti ifo ma le tasi se mafuaaga ua lapataia ai e le Alii tagata uma

• O se faataitaiga o le lapataiga a le Alii ia i tatou i o tatou aso (Afai e te filifilia e lapataia i tatou e le Alii e uiga i luitau faalelalolagi ma agasala [tagai Mataupu Faavae ma Feagaiga 1:15–17], e mafai ona e faasoa atu se fuaiupu mai tusitusiga paia po o upu a se perofeta o aso nei o lē ua lapataia i tatou e uiga i faaosoosoga faaonapo nei.)

• O ou mafaufauga ma lagona e uiga i le Alii o loo faasoa mai savali o lapataiga ia i tatou i aso nei. E mafai foi ona e faaaofia ai se aafiaga.

A o faasoa mai tagata aooga, vaavaai mo auala e faamalo atu ai ma faafetai atu ia i latou mo a latou taumafaiga faamaoni faapea foi ma le faamamafaina o le alofa o le Faaola e ala mai i savali Na te aumaia i aso nei.

Mo nisi aoaoga faaopoopo i le auala e fesoasoani ai i tagata aooga ia iloa e te faatauaina o latou manatu faaalia, tagai “Fesootai atu e te faatauaina tagata aoga a o lei tuuina mai o latou manatu faaalia pe a sii o latou lima i manatu faaalia.” O lenei aoaoga o loo maua i le Atinaega o Tomai Faafaiaoga: Alofa ia i Latou E te Aoaoina.

Punaoa Faaopoopo

O le a le Tusi o Poloaiga?

I nai tausaga muamua o le Ekalesia, na o nai nisi tagata lotu na mafai ona maua faaaliga a le Alii i le Perofeta o Iosefa Samita e ala i kopi tusilima i luga o laupepa na faasalalau i totonu o le Au Paia. I se faaaliga na maua e Iosefa i se konafesi i le 1831, sa faamaonia ai e le Alii le tuufaatasia o faaaliga ma a o lei lolomiina na faaalia ai se faatomuaga mo le tusi o le a oo mai. O le a i ai ni lomiga laiti i lalo ifo o le afa o faaaliga o loo i ai nei i le Mataupu Faavae ma Feagaiga. Na amata le lolomiga i le 1832 i se falelomitusi i Initipene, Misuri, ae sa taofia e se au faatupu faalavelave le taumafaiga. O nei faaaliga ma isi faaaliga na manuia le lolomiina i le 1835 o le Mataupu Faavae ma Feagaiga o le Ekalesia a le Au Paia o Aso e Gata Ai. Mo nisi faamatalaga, tagai i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 (2018), 141–43.

Aisea e faasoa mai ai e perofeta ma aposetolo i nisi taimi ni savali e le lauiloa?

Na aoao mai Peresitene Russell M. Nelson:

O nisi taimi e faitioina ai i tatou o ni taitai o le Ekalesia ona o le taofiofimamau i tulafono a le Atua, puipuia o le aoaoga faavae autu a le Faaola, ma le tetee atu i uunaiga faaleagafesootai o o tatou taimi. Ae o le poloaiga ia i matou o ni aposetolo faauuina o le “o atu i le lalolagi uma e folafola [Lana] talalelei i tagata uma” [Mataupu Faavae ma Feagaiga 18:28]. O lona uiga ua poloaiina i matou e aoao atu mea moni.

O le faia o lena mea, o nisi taimi e tuua’ia ai i matou i le faaleano a o matou aoao atu tulaga manaomia e le Tama mo le faaeaga i le malo selesitila. Ae pe le sili atu ea ona matou faaleano i le le tauina atu o le upumoni—le aoao atu o mea ua faaalia mai e le Atua?

O le mea moni ona e loloto lo matou amanaiaina o fanau uma a le Atua o lea matou te folafola atu ai Lana upumoni. Atonu tatou te le ta’uina atu i taimi uma i tagata mea latou te fia faalogo i ai. O perofeta e seāseā ona lauiloa. Ae o le a matou aoao atu e le aunoa le upumoni! (Russell M. Nelson, “O le Alofa ma Tulafono a le Atua” [faigalotu a le Iunivesite o Brigham Young Sept. 17, 2019], 3, speeches.byu.edu

Gaoioiga Faaopoopo e Aoao Ai

O se isi amataga

Valaaulia se tagata a’oga e moeiini ona mata pe fai se fusi mata ma savali lemu mai le pito i tua o le potu e tau i luma e aunoa ma le taia i soo se kesi po o ni nofoa. (Afai e te manao ai, e mafai ona e valaaulia tagata aooga e faame’i muamua a latou kesi po o nofoa e faatupu ai ni mea faalavefau a o tuua pea se auala i luma.) Ona fai lea i ni nai tagata aooga e lapatai le tagata aoga o loo fusi mata pe afai o le a lata ina taia o ia i se mea faalavefau i le ala. Fai atu i tagata aooga e fai mai ni faataitaiga o se taimi atonu latou te lapataia ai isi pe mananao foi e lapataia i latou lava.

O le lē amanaiaina o le siufofoga o le Alii e i ai taunuuga

E masani ona tauivi tagata aooga ma le malamalama i taunuuga o le lē amanaiaina o le siufofoga o le Alii. Ina ia faateleina lo latou malamalama, e mafai ona e valaaulia tagata aooga e faasino atu i lapataiga na talanoaina e le vasega i le amataga o le lesona. Fai atu i le vasega e faasoa faapuupuu mai taunuuga eseese mo le lē amanaiaina o lapataiga a le Faaola. Fesoasoani ia malamalama tagata aooga o le lē usiusitai i tulafono paia a le Faaola e aumaia ai taunuuga faaleagaga lē lelei ia i latou o e filifili e aua le salamo.

Faasino atu tagata aooga i le Mataupu Faavae ma Feagaiga 1:14, ma fai atu ia i latou e faailoa mai taunuuga o le lē faalogo i le siufofoga o le Alii po o Ana auauna. Atonu e fesoasoani le faamalamalama atu faapea o le “vavae ese” mai tagata o le Atua o le vavaeeseina lea mai e amiotonu. O le uiga foi o le“vavae ese” o le tuueseesea lea mai le mana o le Atua, puipuiga, aafiaga, faamanuiaga, ma, mulimuli ane, Lona afioaga.

E mafai ona aoga i le vasega le faitauina o le saunoaga lenei a Peresitene Russell M. Nelson:

Ou uso e ma tuafafine pele, o tulafono paia o meaalofa ia a le Atua i Ana fanau. E pei lava ona faatumauina e tulafono a lo matou aiga le saogalemu o le ma fanau a o latou tuputupu ae e avea ma ni tagata matutua, e pei lava o tulafono paia e pulea ai le fatu ma malaga i vaalele e faatumauina ai lou saogalemu i luga o se laulau o taotoga pe a o faimalaga, o le tumau ai i tulafono a le Atua o le a e saogalemu ai a o e agai atu i luma i le faaeaga. …

… O faamanuiaga silisili a le Atua ua faapolopoloina mo i latou o e usiusitai i Ana tulafono, e pei ona Ia faamalamalama mai: “Aua o i latou uma o e e fia maua se faamanuiaga i lo’u lima ia mau i le tulafono na tofia mo lena faamanuiaga” [Mataupu Faavae ma Feagaiga 132:5]. “O tulafono a le Atua e uunaia atoatoa lava e Lona alofa e lē uma mo i tatou ma Lona finagalo ia avea tatou uma ma tagata e mafai ona tatou avea ai. (Russell M. Nelson, “O le Alofa ma Tulafono a le Atua” [faigalotu a le Iunivesite o Brigham Young Sept. 17, 2019], 3, speeches.byu.edu) 

O le siufofoga o le Faaola e puipuia i tatou

Ina ia fesoasoani i tagata aooga e faia ni fesootaiga i le va o lo latou usiusitai i le siufofoga o le Alii ma Lana puipuiga paia, mafaufau e faaali le vitio “Mulimuli i le Perofeta” (4:16).