Iosefa Samita—Talafaasolopito 1:1–26

Iosefa Samita—Talafaasolopito 1:1–26

Vaaiga Aoao

A o laitiiti, sa mana’o Iosefa Samita e mulimuli ia Iesu Keriso ma saili ia iloa po o le fea lotu e sa’o ma po o fea foi e tatau ona ia auai. O lana sailiga na taitai atu ai o ia i se togavao i talaane o lona fale e ole atu i le Atua. O le tali, na faaali mai ai le Tama Faalelagi ma Iesu Keriso ia Iosefa ma amata ai le Toefuataiga o le Ekalesia moni a le Atua i le fogaeleele. Ina ua uma ona faasoa atu lenei mea na tupu o le Uluai Faaaliga, sa avea ai Iosefa ma taula’iga o sauaga. Peitai, o lenei mea, sa lei faaitiitia ai lona talitonuga maumaututu faapea na faaali atu le Tama Faalelagi ma Iesu Keriso ia te ia.

Taula’i Atu i le Tama Faalelagi ma Iesu Keriso: O le iloa ma alofa i le Tama Faalelagi ma Iesu Keriso o le a fesoasoani i tamaiti aoga ia liua e mulimuli ia i Laua. A o e saunia ma aoao atu lesona, ia faaauau pea ona saili mo musumusuga i auala e taula’i ai aafiaga faalea’oa’oga i le Tama Faalelagi ma Iesu Keriso. Mo nisi faamatalaga i le auala e faia ai lenei mea, tagai i le vaega “Fesoasoani Tagata Aoao e O Mai ia Iesu Keriso” i le Aoao Atu i le Auala a le Faaola. E mafai foi ona e vaai i se faataitaiga o le auala e faia ai lenei mea i le lesona o lenei vaiaso ua faaautuina “Iosefa Samita—Talafaasolopito 1:15–20.”

Sauni e aoao atu

O le faamatalaga o mulimuli mai e saunia ai oe i manatu o mea atonu e te ono manaomia ona muai saunia ai mo lesona taitasi.

Iosefa Samita—Talafaasolopito 1:1–14

Faamoemoega o le lesona: O lenei lesona e mafai ona fesoasoani i tamaiti aoga e mulimuli ai i faataitaiga a Iosefa Samita i a latou taumafaiga e aoao le upumoni mai le Atua.

• Sauniuniga a le tamaitiiti aoga: Faamalamalama atu i tamaiti aoga o le aiga o Iosefa Samita e su’esu’e i taimi uma le Tusi Paia, tatalo, ma talanoaina faatasi i mea faalelotu. Valaaulia tamaiti aoga e toe manatunatu i aoaoga o le talalelei latou te oo i ai i o latou aiga. Ona mafai lea ona tuu atu i tamaiti aoga se taimi i le vasega e faasoa mai ai pe na faapefea ona tosinaina i latou i le aoaoina o le talalelei e faatotonugalemu i le aiga po o latou lagona e mafai ona faamanuiaina ai o latou aiga i le taimi nei ma i le lumanai.

• Vitio:“O le Toefuata’iga” (19:12; matamata mai le faailo taimi 1:15 seia oo i le 15:34)

Iosefa Samita—Talafaasolopito 1:15–20

Faamoemoega o le lesona: O lenei lesona e mafai ona fesoasoani i tamaiti aoga ia malamalama i upumoni taua na faaalia mai e uiga i le Tama Faalelagi ma Iesu Keriso mai le Uluai Faaaliga a Iosefa Samita.

• Sauniuniga a le tamaitiiti aoga: Mafaufau e valaaulia tamaiti aoga e tauloto vaega po o vaega uma o le Iosefa Samita—Talafaasolopito 1:15–20 a o lei amataina le vasega. O filifiliga e ono aofia ai le taulotoina na o le mau ma le fasifuaitau autu o mau; tauloto ia fuaiupu 16–17; po o le tauloto o le tele o fuaiupu 15–20 a o latou filifili. Uuna’ia i latou e tatalo a o lei taulotoina mo se molimau o le moni o le Uluai Faaaliga.

• Vitio: “Ole atu i le Atua: Uluai Faaaliga a Iosefa Samita” (6:35)

Iosefa Samita—Talafaasolopito 1:21–26

Faamoemoega o le lesona: O lenei lesona e mafai ona maua ai e tamaiti aoga se avanoa e lagona ai le Agaga Paia o molimau atu ia i latou na faaali mai le Tama Faalelagi ma Iesu Keriso ia Iosefa Samita.

• Sauniuniga a le tamaitiiti aoga: Valaaulia tamaiti aoga e fai le fautuaga a Elder Neil L. Andersen e pu’e i latou lava a o faitau le Iosefa Samita—Talafaasolopito 1:16–17. Ona mafai lea ona latou faalogo i le molimau a Iosefa Samita i o latou lava leo (tagai Neil L. Andersen, “Iosefa Samita,” Liahona, Nov. 2014, 30).

• Vitio: “O le Perofeta o Iosefa Samita: Faiaoga e Ala i Faataitaiga” (16:32; maimoa mai le faailo taimi 10:39 i le 11:59 ma mai le faailo taimi 11:59 i le 14:09); “O Le a Ou Faatu mai se Tagatavaai Filifilia: O Le Perofeta o le Toefuataiga” (4:42)

• Anomea mo tamaiti aoga: O ni nai kopi o lauga “O Fua o le Uluai Faaaliga” (Dieter F. Uchtdorf, Liahona, Me 2005, 36–38) ma le “Na Vaai Iosefa Samita i le Atua” (Joseph F. Merrill, Ensign, Tes. 2015, 70–71)