“Lesona 8—Iosefa Samita—Talafaasolopito 1:1–26: ’Sa Ou Vaaia ni Tagata e Toalua, o Lo Laua Pupula ma le Mamalu e Le Mafaamatalaina,’” Tusi Lesona a le Faiaoga Seminare o le Mataupu Faavae ma Feagaiga (2025)
“Iosefa Samita—Talafaasolopito 1:1–26,” Tusi Lesona a le Faiaoga Seminare o le Mataupu Faavae ma Feagaiga
Lesona 8: Iosefa Samita— Talafaasolopito 1:1-26
Iosefa Samita—Talafaasolopito 1:15–20
“Sa Ou Vaaia ni Tagata e Toalua, o Lo Laua Pupula ma le Mamalu e Le Mafaamatalaina”
E le gata i le taliina o le fesili a Iosefa Samita e uiga i le ekalesia e tatau ona ia auai, ae o le faaali mai o le Tama Faalelagi ma Iesu Keriso ua aoao mai ai ia i tatou upumoni e pei o le natura o le Aigaatua ma la tatou sootaga ma i Latou. O lenei lesona e mafai ona fesoasoani i tagata aooga ia malamalama i upumoni taua na faaalia mai e uiga i le Tama Faalelagi ma Iesu Keriso mai le Uluai Faaaliga a Iosefa.
Gaoioiga E Ono Mafai Ona Aoao Ai
Upu na suia ai le lalolagi
Mafaufau e tusi Upu e fitu mai le Iosefa Samita—Talafaasolopito 1:15–20 na suia ai le lalolagi atoa i luga o le laupapa a o lei amataina le vasega. A o ulufale mai tagata aooga i le potu ma o loo faatalitali mo le lesona e amata, valaaulia i latou e taumafai e faailoa mai upu mai lenei fuaitau e fetaui ma lenei faamatalaga.
Sa aoao mai e Peresitene Russell M. Nelson i se tasi taimi se vaega o tamaiti e faapea “o upu e fitu na suia ai le lalolagi atoa” (i le “Seven Words That Changed the World” [vitio], ChurchofJesusChrist.org).
-
E te manatu o a na upu?
Sa faasino atu Peresitene Nelson i upu mulimuli e fitu o le Iosefa Samita—Talafaasolopito 1:17. Faitau na upu e fitu ma mafaufau e tusi le saunoaga a Peresitene Nelson i au tusitusiga paia i autafa o le faaiuga o le fuaiupu.
O leIosefa Samita—Talafaasolopito 1:15–20 o se fuaitau o le atamai i aoaoga faavae. Mafaufau e valaaulia tagata aooga e faailoga ia fuaitau o le atamai i aoaoga faavae i se auala iloga ina ia mafai ona maua gofie.
Valaaulia se volenitia e faamatala i le vasega po o ai na fai maia nei upu e fitu, o ai sa Ia faasino i ai, ma po o ai foi sa Ia fetalai i ai.
Mafaufau e tuu atu i tagata aooga se taimi e mafaufau tonu ai ma faasoa mai a latou tali i fesili nei.
-
O a ni auala e te manatu na suia ai e na upu e fitu le lalolagi? E faapefea ona aafia ai lou olaga?
O upumoni e mafai ona tatou aoao mai le Uluai Faaaliga
O le vaega lenei e mafai ona fesoasoani i tagata aooga e faailoa ma malamalama i upumoni e tele mai le tala o le Uluai Faaaliga, aemaise lava upumoni e uiga i le Tama Faalelagi, Iesu Keriso, ma la Laua Ekalesia.
Mafaufau e tusi ni ata fasilaau se fa i luga o le laupapa, ia tofu ma se li’o o manatu o loo i ai se tasi o fesili nei. (Ia lagona le saoloto e faaaoga fesili eseese atonu o i ai a tagata aooga e uiga i le Atua po o Lana Ekalesia.) Vaevae tagata aooga i ni vaega, ma ia suesue e vaega taitasi fuaiupu 15–20 mo tali i se tasi o fesili. Tuu atu i se sui mai vaega taitasi e tusi numera o fuaiupu na latou maua e fesoasoani e tali ai a latou fesili i autafa o le lio o manatu i luga o le laupapa.
Faitau le Iosefa Samita—Talafaasolopito 1:15–20, ma vaavaai pe mafai faapefea ona e taliina fesili nei a se tasi atonu o i ai, e faaaoga ai le tala lenei:
-
O silafia i tatou e le Atua?
-
O fetalai mai ea le Atua i tagata i o tatou aso?
-
Pe afaina po o le a le ekalesia tatou te auai ai? Aisea?
-
Mata e mafai ona iloa po o le a le mea moni? E faapefea?
Valaaulia vaega e faasoa mai i le vasega pe aisea na latou filifilia ai fuaiupu na latou faia e tali ai a latou fesili.
Mafaufau e fai atu fesili tulitatao a o faasoa mai tagata aooga, e pei o nei: “O le a se isi mea na e matauina i lenei fuaitau e taua mo tagata i aso nei ona malamalama i ai?” “O a isi manatu sese masani e uiga i le Atua e fesoasoani le Uluai Faaaliga e faamanino?” “Aisea e te manatu ai o le a afio mai le Atua le Tama lava ia e amatalia le Toefuataiga o le talalelei?” “O le a se mea e mafai ona tatou aoao mai i le ala na faailoa muamua mai ai e le Tama Faalelagi ia Iesu Keriso ia Iosefa i le fuaiupu 17?”
E mafai ona e faasoa atu faamatalaga mai le vaega “Punaoa Faaopoopo e lagolago ai upumoni e faasoa mai e tagata aooga pe fesoasoani ia i latou ia iloa upumoni latou te lei iloaina na o i latou.
O tala e tele o le Uluai Faaaliga
O nisi tagata e popole ina ua latou iloa ni faamatalaga tulaga ese o le Uluai Faaaliga na faasoa e Iosefa Samita i taimi eseese pe a faamatalaina mea na tutupu ia te ia. Fesoasoani i tagata aooga ia malamalama o se faamanuiaga le tele o a tatou tala o lenei faaaliga mamalu. O le faamalamalamaina o le anotusi i totonu o le parakalafa lenei e ono fesoasoani.
O loo i ai foi se manatu i le vaega o “Gaoioiga Faaopoopo e Aoao Ai atonu e aoga.
Sa faamaumauina e Iosefa Samita le tala i le Uluai Faaaliga o loo maua i le Iosefa Samita—Talafaasolopito i le 1838 o se vaega o le talafaasolopito aloaia o le Ekalesia, o le a lomia faasalalau atu i le lalolagi. Ua faamanuiaina foi i tatou i le i ai o isi tala o le Uluai Faaaliga—o le tolu o ia tala na tusia pe na faalau mai e Iosefa. O tala taitasi sa saunia i taimi eseese mo tagata eseese ma, o lea, na faamamafaina ai vaega eseese o lona aafiaga. Mo se faataitaiga, i le tala a Iosefa i le 1835 ua tatou iloa ai sa ia vaai foi i agelu, a o i ai i lana tala i le 1832 sa ia saunoa ai e faamatala le mea e tupu i le i ai i le mea o loo afio ai le Atua: “Sa faatumulia lo’u agaga i le alofa, ma mo le tele o aso sa mafai ona ou fiafia ma le olioli tele” (“Tala o le Uluai Faaaliga a Iosefa Samita,” josephsmithpapers.org; tagai foi i le Gospel Library app).
-
O a aafiaga o le Laua asiasi mai ia Iosefa e aoao ai oe e uiga i le Tama Faalelagi ma Iesu Keriso?
O tala taitasi e faamanuiaina ai i tatou i ni auiliiliga tulaga ese, ae ua malilie uma i le upumoni taua o Iosefa Samita na tatala le lagi ia te ia ma ia vaaia avefeau faalelagi, e aofia ai le Atua le Tama ma Iesu Keriso.
Mafaufau e tuu atu i tagata aooga ni nai minute e suesue ai le vaega “Tala o le Uluai Faaaliga a Iosefa Samita” i le polokalama o le Gospel Library. E mafai ona latou mauaina e ala i le filifilia o le “Potutusi,” ona sosoo ai lea ma le “Talafaasolopito o le Ekalesia,” ona sosoo ai lea ma le “Ulua’i Faaaliga.” E mafai e tagata aooga ona fai ni vaega, faatasi ai ma tagata aoga taitasi o loo sailiili i tala eseese mo upumoni faaopoopo e uiga i le Tama Faalelagi ma Iesu Keriso.
E mafai foi e tagata aooga ona vaavaai mo upumoni faaopoopo i le vitio “Ole Atu ia i le Atua: Uluai Faaaliga a Iosefa Samita” (6:35), o loo i le ChurchofJesusChrist.org. O lenei vitio o loo aofia ai auiliiliga mai tala ta’itasi a Iosefa Samita.
Taulai Atu i le Tama Faalelagi ma Iesu Keriso: Mo nisi aoaoga i fesili e valaaulia ai tagata aooga e mafaufau i mea ua latou aoaoina e uiga i le Tama Faalelagi ma Iesu Keriso, tagai i le aoaoga ua faaulutalaina “Fesoasoani i tagata aoao ia iloa le alofa, mana, ma le alofa mutimutivale o le Alii i o latou olaga,” o loo maua i le Atinaega o Tomai Faafaiaoga: Taulai atu ia Iesu Keriso.
-
O a nisi mea o aoao mai e nei tala e uiga i le Tama Faalelagi, Iesu Keriso, ma le La Ekalesia e te faafetaia le iloaina?
Mafaufau e valaaulia tagata aooga e faaiu le lesona e ala i le tusifaamaumauina i a latou api talaaga o suesuega se upumoni se tasi na latou aoaoina mai le Uluai Faaaliga a Iosefa Samita lea e taua ia i latou ma pe aisea foi. Valaaulia ni volenitia e faasoa mai i le vasega mea sa latou tusia.
Tauloto
Atonu e te manao e fesoasoani i tagata aooga e tauloto le mau faasino ma le fasifuaitau autu o le mau o le Iosefa Samita—Talafaasolopito 1:15–20 ona toe faamanatu lea i lesona i le lumanai. O le fasifuaitau autu o le mau, o le “vaaia e Iosefa Samita ni Tagata se toalua, o lo laua pupula ma le mamalu e le mafaamatalaina.’” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”