Lesona 9: Iosefa Samita—Talafaasolopito 1:1-26

Iosefa Samita—Talafaasolopito 1:21–26

“Sa Ou Vaai i se Faaaliga Vaaia … ma E Le Mafai Ona Ou Faafitia Lena Mea”

Ina ua uma ona faasoa atu lona aafiaga o le Uluai Faaaliga i se faifeau o le ekalesia i le lotoifale, sa vave ona avea Iosefa Samita e 14 tausaga le matua ma taulaiga o sauaga. Peitai, o lenei mea, sa lei tuuitiitia ai lona talitonuga maumaututu faapea na faaali atu le Tama Faalelagi ma Iesu Keriso ia te ia. O lenei lesona e mafai ona tuu atu ai i tagata aooga se avanoa e lagona ai le Agaga Paia o molimau atu ia i latou e faapea, na faaali mai le Tama Faalelagi ma Iesu Keriso i le Perofeta o Iosefa Samita.

Gaoioiga E Ono Mafai Ona Aoao Ai

O le a sou lagona i ai?

Mafaufau e amata le vasega i le valaaulia o tagata aooga e mafaufau loloto i a latou lava molimau e faapea, na valaauina e le Atua ia Iosefa Samita e avea ma Ana Perofeta. O le tala ma fesili nei e mafai ona fesoasoani e faataunuu ai lenei mea.

Na faasoa mai e Peresitene Thomas S. Monson (1927–2018) se tala o ni faifeautala’i se toalua o e sa faafetauia e uiga i a la molimau e faatatau ia Iosefa Samita.

Sa asiasi atu ni [faifeautalai] se toalua i le fale o le Susuga ia Elmer Pollard. … Sa la tuuina atu le la savali ma talosaga atu i ai pe mafai ona latou tatalo faatasi. Sa ia malie i ai, ma le tuutuuga o ia e faia le tatalo.

O le tatalo na ia faia sa faateia ai faifeautalai. Fai mai o ia, “Le Tama Faalelagi, ia e faamanuia nei faifeautalai e toalua le manuia, ua taitaiseseina, ina ia mafai ona la toe foi atu i o laua aiga, ae aua le faamaumauina o la taimi e ta’u mai ai i tagata o Kanata se savali maoae ae ua itiiti se mea ua la iloa e uiga i ai.”

A o latou tutu a’e i luga,, Sa talosaga atu le Susuga ia Pollard i faifeautalai e aua nei toe foi atu i lona fale. A o tuumuli ese, sa ia fai atu ma le faatauemu ia i laua, “E le taitai mafai ona oulua ta’uina mai ia te au e te lua talitonu moni lava o Iosefa Samita o se perofeta a le Atua!” ma ato ma le faitotoa. (Thomas S. Monson, “O Le Perofeta o Iosefa Samita: O Se Faiaoga e Ala i Faataitaiga,” Liahona, Nov. 2005, 69)

Valaaulia tagata aooga e tali fesili nei i a latou apitalaaga o su’esu’ega. E mafai ona e fai atu i volenitia e faasoa mai a latou tali i le fesili lona lua i le vasega.

• E mafai faapefea ona e molimau atu ma le mautinoa sa asia Iosefa e le Tama Faalelagi ma Iesu Keriso ma valaauina o se perofeta?

• E mafai faapefea e lou iloaina mo oe lava ia ona aafia ai lou olaga ma lou sootaga ma le Atua?

A o e suesueina lenei lesona, mafaufau po o le a le uiga o le Uluai Faaaliga ia te oe ma pe na faapefea ona suia pe mafai ona suia ai lou olaga. O le a e maua se avanoa i le faaiuga o le lesona e faamaumau ai ou manatunatuga i lau api talaaga mo suesuega.

O le tulaga moni o le Uluai Faaaliga a Iosefa Samita

Ina ua mavae le faaali mai o le Tama Faalelagi ma Iesu Keriso ia Iosefa Samita, sa ia faasoa atu le aafiaga i se failauga o se tasi o lotu i le lotoifale.

Faitau le Iosefa Samita—Talafaasolopito 1:21–23, ma vaavaai pe na faapefea ona tali atu se failauga ma le toatele o isi ina ua latou faalogo e uiga i le faaaliga a Iosefa.

• O le a se mea e tulaga ese ia te oe mai le faamatalaga a Iosefa o le mea na tupu i nei fuaiupu?

• O a ni auala na e aafia ai i ni tetee i mea ua e iloa e moni?

• Aisea e taua ai le i ai o sau lava molimau o le upumoni pe a masalosalo isi i mea e te fai atu ai?

Faitau le Iosefa Samita—Talafaasolopito 1:24–26 ma mafaufau e faailoga upu ma fasifuaitau ia e faamautu ai e Iosefa le moni o lana faaaliga.

• O a ni upumoni e mafai ona tatou aoao mai i nei fuaiupu?

  E ono faailoa mai e tagata aooga ni upumoni eseese. Faafetai atu ia i latou mo le faasoaina mai o mea na latou maua. Tusi i luga o le laupapa le upumoni lenei: O le mea moni na faaali mai le Tama Faalelagi ma Iesu Keriso, ia Iosefa Samita o se tali i lana tatalo.

  Atonu e aoga le lisi i talane o le upumoni i luga o le laupapa ia upu ma fasifuaitau na makaina e tagata aooga. I se isi itu, e mafai e tagata aooga ona tusi upu po o fasifuaitau i luga o pepa laiti ma faapipii i le laupapa.

• E tusa ai ma le fuaiupu 25, na faapefea ona fesoasoani le malamalama o Iosefa e uiga i le Atua e tu mausali ai i le mea sa ia iloa e moni?

Tuu atu i tagata aooga se avanoa e mafaufau loloto ai ma tusi i totonu o a latou api talaaga le uiga o le Uluai Faaaliga ia i latou. E mafai ona latou faaaluina le 10 i le 15 minute e fai ai lenei mea. O le tuuina atu i tagata aooga o se gaoioiga taiala e fesoasoani ai ia i latou e mafaufau loloto ma tusitusi, e pei o na o loo lisiina atu i lalo, e mafai ona fesoasoani ia i latou e lagona ai le Agaga Paia o molimau atu ia i latou e uiga i le Uluai Faaaliga. E mafai ona e faaali atu nei gaoioiga ma faataga tagata aooga e filifili mea latou te mananao e fai, pe e mafai foi ona e filifili mea o le a outou faia uma o se vasega. O gaoioiga muamua e lua atonu e lelei le faia o se vasega.

1. Usu faatasi o se vasega pe faitau upu o le viiga “O Le Talosaga Muamua a Iosefa Samita” (Viiga, nu. 14). O le usuina lenei e le Aufaipese a le Tapeneko i le Lotoa o le Malumalu o le viiga:

2. Matamata le vitio “A Choice Seer Will I Raise Up: Prophet of the Restoration” (4:42), o loo maua i le ChurchofJesusChrist.org.

3. Tusi upu a Iosefa Samita—Talafaasolopito 1:16–17 i lau api talaaga, ma manatunatu toto’a i upu. Pe afai e mafai, pu’e ma faalogo ia te oe lava o faitauina nei upu i luga o se masini tekinolosi.

4. Faitau se lauga na tuuina mai i le konafesi aoao e uiga i le Uluai Faaaliga. O nisi nei o filifiliga:

   1. O Fua o le Uluai Faaaliga”(Dieter F. Uchtdorf, Liahona, Me 2005, 36–38)

   2. “Joseph Smith Did See God” (Joseph F. Merrill, Ensign, Tes. 2015, 70–71)

Mafaufau e faasoa atu le vaega o totoe o le tala e uiga ia Pollard i le faaali atu o le vitio “O le Perofeta o Iosefa Samita:O se Faiaoga e Faataitai Ai” mai le faailo taimi 11:59 i le 14:09.

Tusi faamaumaui lau apitalaaga pe o le a le uiga o le Uluai Faaaliga ia te oe lava ia. Ia aofia i ou manatunatuga lau molimau po o ou lagona i le i ai o se molimau i le Uluai Faaaliga e mafai ona faamanuiaina ai lou olaga.

A mae’a tagata aooga, valaaulia i latou o e mananao e faasoa mai a latou molimau po o lagona e faatatau ia Iosefa Samita ma le Uluai Faaaliga. Mafaufau e faasoa atu pe na faapefea ona e iloa le moni o le asiasiga a le Tama Faalelagi ma Iesu Keriso ia Iosefa Samita.

Punaoa Faaopoopo

O a mea ua faasoa mai e taitai o le Ekalesia e uiga i le mauaina o a latou lava molimau e uiga i le Uluai Faaaliga?

Sa molimau mai Peresitene Lorenzo Snow (1814–1901):

Ou te iloa o Iosefa Samita o se perofeta moni a le Atua soifua. Ou te molimau atu sa ia vaai ma talanoa ma le Atua ma Lona Alo o Iesu Keriso. Sa tuuina mai e le Alii ia te au lenei molimau ola ma sa faapea ona mumu ai i totonu o lo’u loto talu mai le taimi na ou mauaina ai. O lea la ua ou tuuina atu i le lalolagi atoa. E le gata ou te molimau atu i tagata soifua uma o Iosefa Samita sa auina mai e le Atua ma o le galuega lea sa faatuina e ala mai ia te ia o le galuega a le Atua, ae, ia lapataia malo uma o le lalolagi e uiga i valoaga na faia e le Perofeta, ma molimau atu i le auala sili ona mamalu, ua ou iloa ua moni nei mea. (Aoaoga a Peresitene o le Ekalesia: Lorenzo Snow [2012], 274)

Sa molimau mai Peresitene Tavita O. MaKei (1873–1970):

O le faaali atu o le Tama ma le Alo ia Iosefa Samita o le faavae lea o lenei Ekalesia. O iina o loo taoto ai le mealilo o lona malosi ma le olaola. E moni lava lenei mea, ma ou te molimau atu i ai. O lena faaaliga e tasi ua taliina uma ai fesili faasaienisi e uiga i le Atua ma le paia o lona tagata. Tou te le o iloa ea le uiga o lena mea? O le tulaga o le Atua, ua taliina ai. O lona sootaga i lana fanau ua manino mai. O lona naunau mai i le aiga o tagata e ala i le pule ua faasafua mai i tagata e matuai iloga lava. Ua mautinoa le lumanai o le galuega. O nei upumoni ma le tele o isi upumoni matagofie ua faamanino mai i lena uluai faaaliga mamalu. (Aoaoga a Peresitene o le Ekalesia: Tavita O. MaKei [2003], 93)

Sa molimau mai Peresitene Ezra Taft Benson (1899–1994):

Sa tu faamaoni atu le taulealea e sefulufa tausaga le matua e tetee atu i le lalolagi. Na silafia e le Atua lona alo o [Iosefa Samita] i le taimi na filifilia ai o ia. Na Ia silafiaina o le a tuuto ma faamaoni o ia seia oo i le oti. (Aoaoga a Peresitene o le Ekalesia: Ezra Taft Benson [2014], 109)

Na molimau mai Peresitene Gordon B. Hinckley (1910–2008):

Sa ou i ai lata mai nei i Palemaira, Niu Ioka, [e lata i le mea na maua ai e Iosefa Samita le Uluai Faaaliga]. I mea na tutupu i lena nofoaga, e taitai atu ai se tasi e faapea: “A le o le mea na tupu pe leai. E le mafai ona i ai se itu e fetuunai ai, leai se auala e mafai ona sa’o ai ia manatu e lua.”

Ona musumusu mai lea o le leo o le faatuatua: “Na tupu uma lava. Sa tupu e pei lava ona sa ia fai atu ai na tupu.” (Aoaoga a Peresitene o le Ekalesia: Gordon B. Hinckley: [2016], 148)

Gaoioiga Faaopoopo e Aoao Ai

Vitio: “Origin”

Mafaufau e faaaoga le vitio “Origin” (4:57) e fesoasoani ai i tagata aooga ia malamalama pe mafai faapefea ona latou maua pe faalolotoina lo latou faatuatua faapea na faaali mai le Tama Faalelagi ma Iesu Keriso i le Perofeta o Iosefa Samita.

Vitio: “Sacred Grove Historic Site, Vaega 1: O Le Uluai Faaaliga”

Ina ia fesoasoani i tagata aooga ia lagona pe faape’i le i ai i le Togavao Paia ma tuu atu i le Agaga Paia se avanoa e molimau atu ai i tagata aooga e uiga i le mea na tupu iina, e mafai ona e faaali atu se vaega po o le vitio atoa lenei: “Sacred Grove Historic Site, Vaega 1: O Le Uluai Faaaliga” (10:57). Ina ia vaai i le vaega patino o le vitio o loo faamatala ai le Uluai Faaaliga, amata le vitio i le faailo taimi 4:55.

Iosefa Samita—Talafaasolopito 1:26

O le isi auala e talanoaina ai lenei fuaiupu o le tilotilo i ai o se faataitaiga o le faatinoina i le faatuatua. I le taimi lea i lona talafaasolopito, sa lei iloa e Iosefa pe o le a faapefea ona tatala mai le Toefuataiga. Sa ia iloa sa ia vaai i se faaaliga vaaia lea na faatonuina ai o ia e aua nei auai i soo se isi lotu, ma sa ia iloa e tatau ona ia faatalitali mo nisi faatonuga. Mafaufau e valaaulia tagata aooga e faatusatusa le Iosefa Samita— Talafaasolopito 1:26 ma le parakalafa 7 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023), ma vaavaai mo mea e tutusa ai. O lenei faamatalaga mai le saunoaga a Elder Neil L. Andersen “Manatuaga Musuia Faaleagaga” e mafai foi ona malamalama i ai.

I ona itula faigata, sa toe foi i tua manatuaga o Iosefa i le toeitiiti luasefulu tausaga i le mautinoa o le alofa o le Atua mo ia ma mea na tutupu ia na faaulufale mai ai le Toefuataiga ua loa ona valoia. I le toe manatunatu ai i lana malaga faaleagaga, na saunoa ai Iosefa: “Ou te le tuua’ia lava se tasi i le le talitonu i la’u talafaasolopito. Pe ana ou le vaai i le mea sa ou vaai i ai semanu ou te le talitonu foi a’u ia i ai.”

Ae na moni lava ia aafiaga, ma na te lei faagaloina lava pe faafitia, ma sa faamautuina lemu lana molimau a o agai atu o ia i Karefasi. “Ou te alu atu e pei o se tamai mamoe a fasia,” na ia saunoa ai, “ae ou te filemu e pei o le taeao i le tauvevela; o ia te au le loto fuatiaifo e mama i le Atua, ma tagata uma.” (Neil L. Andersen, “O Manatuaga Musuia Faaleagaga,” Liahona, Me 2020, 19)

Mauaina o se molimau ia Iosefa Samita ma le Uluai Faaaliga

Ina ia fesoasoani i tagata aooga ia maua se molimau o le Uluai Faaaliga, e mafai ona e tuu atu i tagata a’oga taitasi se kopi o lenei saunoaga a Elder Neil L. Andersen o le Korama a Aposetolo e Toasefululua. Valaaulia i latou e maka mea na latou oo i ai ma tusi se laina i autafa o le pepa lea e mafai ona latou tusia ai ni faamatalaga pupuu o o latou aafiaga.

E mafai ona eseese tulaga e oo mai ai ia i tatou taitoatasi se molimau i le Perofeta o Iosefa Samita. Atonu e oo mai a o e tootuli e tatalo, ole atu i le Atua ina ia faamaonia mai o ia o se perofeta moni. E ono oo mai a o e faitau i le tala a le Perofeta i le Uluai Faaaliga. E mafai ona totoina se molimau i lou agaga a o e faitauina pea lava pea le Tusi a Mamona. E mafai ona oo mai a o e tuuina atu lau lava molimau e uiga i le Perofeta pe a o e tu i le malumalu ma iloaina ua toefuatai mai i le lalolagi le mana o faamauga e ala mai ia Iosefa Samita. O le faatuatua ma le loto faamaoni, o le a faamalosia ai lau molimau i le Perofeta o Iosefa Samita. O le faifai pea o le taaalo i paluni vai i mea o loo e fiafia e fai atonu e te susu ai i nisi taimi, ae e matua le manaomia lava ona tapeina ai le musaesae o lou faatuatua. (Neil L. Andersen, “Iosefa Samita,” Liahona,, Nov. 2014, 30)

Ona mafai lea ona outou talanoaina fesili e pei o nei: O a ni auala eseese e mafai ona e maua pe faalolotoina ai lau molimau ia Iosefa Samita ma le Uluai Faaaliga? Na faapefea ona aafia lau molimau ia Iosefa Samita i soo se tasi o nei fautuaga?