“Lēsoni 8—Siosefa Sāmita—Hisitōlia 1:1–26: ‘Naʻá Ku Sio ki he Tangata ʻe Toko Ua, ʻa ia Ko Hona Ngingilá mo e Nāunaú ʻOku ʻIkai Faʻa Lava ke Mafakamatalaʻi,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Siosefa Sāmita—Hisitōlia 1:1–26,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 8: Siosefa Sāmita—Hisitōlia 1:1–26
Siosefa Sāmita—Hisitōlia 1:15–20
“Naʻá Ku Sio ki he Tangata ʻe Toko Ua, ʻa ia Ko Hona Ngingilá mo e Nāunaú ʻOku ʻIkai Faʻa Lava ke Mafakamatalaʻi”
ʻIkai ngata pē ʻi hono tali e fehuʻi ʻa Siosefa Sāmita fekauʻaki mo e siasi ʻoku totonu ke ne kau ki aí, ka ʻoku akoʻi mai ʻe he hā mai ʻa e Tamai Hēvaní mo Sīsū Kalaisí ha ngaahi moʻoni hangē ko e natula ʻo e Toluʻi ʻOtuá pea mo hotau vā fetuʻutaki mo Kinautolú. ʻE lava ke tokoni ʻa e lēsoni ko ʻení ke mahino ki he kau akó ʻa e ngaahi moʻoni mahuʻinga naʻe fakahā fekauʻaki mo e Tamai Hēvaní mo Sīsū Kalaisi mei he ʻUluaki Mata Meʻa-Hā-Mai ʻa Siosefá.
Ngaahi ʻEkitivitī Ako ʻOku Ala Fakahokó
Ngaahi lea naʻá ne liliu ʻa e māmaní
Fakakaukau ke hiki ʻi he palakipoé kimuʻa he kalasí ha foʻi lea ʻe valu mei he Siosefa Sāmita—Hisitōlia 1:15–20 ʻa ia naʻá ne liliu ʻa e māmaní kotoa. ʻI he hū mai ʻa e kau akó ki he lokí pea tatali ke kamata ʻa e lēsoní, fakaafeʻi kinautolu ke nau feinga ke ʻiloʻi ʻa e ngaahi foʻi lea mei he potufolofola ko ʻení ʻoku feʻunga mo e fakamatalá ni.
Naʻe akoʻi ʻe Palesiteni Lāsolo M. Nalesoni ha kulupu ʻo ha fānau “naʻe liliu ʻe he foʻi lea ʻe valú ʻa e māmaní kotoa” (ʻi he “Seven Words That Changed the World” [vitiō], ChurchofJesusChrist.org).
-
ʻOkú ke pehē ko e hā ʻa e ngaahi lea ko iá?
Naʻe ʻuhinga ʻa Palesiteni Nalesoni ki he ngaahi foʻi lea fakaʻosi ʻe valu ʻo e Siosefa Sāmita—Hisitōlia 1:17. Lau e foʻi lea ʻe valu ko iá pea fakakaukau ke lekooti ʻa e lea ʻa Palesiteni Nalesoní ʻi hoʻo folofolá ʻo ofi ki he fakaʻosinga ʻo e vēsí.
Ko e Siosefa Sāmita—Hisitōlia 1:15–20 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.
Fakaafeʻi ha tokotaha ʻe loto fiemālie ke ne talaange ki he kalasí ʻa e ngaahi foʻi lea ʻe valu ko ʻení, ko hai naʻá Ne ʻuhinga ki aí, pea ko hai naʻá Ne folofola ki aí.
Fakakaukau ke ʻoange ha taimi ki he kau akó ke nau fakakaukau moʻoni ki ai pea vahevahe ʻenau tali ki he ngaahi fehuʻi ko ʻení.
-
ʻOkú ke pehē ko e hā ha ngaahi founga naʻe liliu ai ʻa e māmaní ʻe he ngaahi foʻi lea ʻe valu ko iá? Kuo nau liliu fēfē hoʻo moʻuí?
Ngaahi moʻoni te tau lava ʻo ako mei he ʻUluaki Mata Meʻa-Hā-Maí
ʻE lava ke tokoni ʻa e konga ko ʻení ke ʻiloʻi mo mahino ki he kau akó ha ngaahi moʻoni lahi mei he fakamatala ʻo e ʻUluaki Mata Meʻa-Hā-Maí, tautautefito ki he ngaahi moʻoni fekauʻaki mo e Tamai Hēvaní, Sīsū Kalaisi, mo Hona Siasí.
Fakakaukau ke tā ha kiʻi fakatātā ʻe fā ʻi he palakipoé, ʻo takitaha ha foʻi fuopotopoto ʻoku ʻi ai ha taha ʻo e ngaahi fehuʻi ko ʻení. (Ongoʻi tauʻatāina ke fakaʻaongaʻi ha ngaahi fehuʻi kehekehe ʻoku ala maʻu ʻe he kau ako ʻi hoʻo kalasí fekauʻaki mo e ʻOtuá pe ko Hono Siasí.) Vahevahe ʻa e kau akó ki ha ngaahi kulupu, pea fekumi ʻa e kulupu takitaha ʻi he veesi 15–20 ki ha ngaahi tali ki ha taha ʻo e ngaahi fehuʻí. ʻAi ha fakafofonga mei he kulupu takitaha ke ne hiki ʻa e mataʻifika ʻo e veesi ne nau maʻu ʻoku tokoni ke tali ʻenau fehuʻí ʻi he tafaʻaki ʻo e foʻi fuopotopoto ʻi he palakipoé.
Lau ʻa e Siosefa Sāmita—Hisitōlia 1:15–20, ʻo kumi e founga te ke lava ai ʻo tali e ngaahi fehuʻi ko ʻeni ʻe ala maʻu ʻe ha tahá, ʻo fakaʻaongaʻi ʻa e talanoa ko ʻení:
-
ʻOku ʻafioʻi nai kitautolu ʻe he ʻOtuá?
-
ʻOku folofola nai ʻa e ʻOtuá ki he kakai ʻi hotau kuongá?
-
ʻOku mahuʻinga nai pe ko e siasi hā ʻoku tau kau ki aí? Ko e hā hono ʻuhingá?
-
ʻOku malava nai ke tau ʻiloʻi ʻa e meʻa ʻoku moʻoní? ʻO fēfē?
Fakaafeʻi ha ngaahi kulupu ke vahevahe mo e kalasí ʻa e ʻuhinga naʻa nau fili ai e ngaahi veesi ne nau fili ke tali ʻaki ʻenau fehuʻí.
Fakakaukau ke fai ha ngaahi fehuʻi vakaiʻi lolotonga e vahevahe ʻa e kau akó, hangē ko ʻení: “Ko e hā mo ha toe meʻa naʻá ke fakatokangaʻi ʻi he potufolofola ko ʻení ʻoku mahuʻinga ke mahino ki he kakai ʻo e ʻaho ní?” “Ko e hā mo ha toe maʻuhala angamaheni fekauʻaki mo e ʻOtuá ʻoku tokoni ʻa e ʻUluaki Mata Meʻa-Hā-Maí ke fakamahinoʻí?” “ʻOkú ke pehē ko e hā ka hā tonu mai ai ʻa e ʻOtua ko e Tamaí ke kamata ʻa hono Fakafoki Mai ʻo e ongoongoleleí?” “Ko e hā te tau lava ʻo ako mei he founga naʻe fakafeʻiloaki ai ʻe he Tamai Hēvaní ʻa Sīsū Kalaisi kia Siosefa ʻi he veesi 17?”
ʻE lava ke ke vahevahe ha ngaahi fakamatala mei he konga “Ngaahi Maʻuʻanga Tokoni Kehé” ke poupouʻi e ngaahi moʻoni ʻoku vahevahe ʻe he kau akó pe ke tokoni ke nau vakai ai ki he ngaahi moʻoni naʻe ʻikai ke nau ʻilo ʻiate kinautolu peé.
Ko e ngaahi talanoa ʻo e ʻUluaki Mata Meʻa-Hā-Maí
ʻOku hohaʻa ha kakai ʻe niʻihi ʻi heʻenau ʻilo naʻe vahevahe ʻe Siosefa Sāmita ha ngaahi fakaikiiki makehe ʻo e ʻUluaki Mata Meʻa-Hā-Maí ʻi ha ngaahi taimi kehekehe ʻi hono fakamatalaʻi ʻene aʻusiá. Tokoni ke mahino ki he kau akó ko ha tāpuaki ia ʻo ʻetau maʻu ha ngaahi fakamatala lahi ki he meʻa-hā-mai nāunauʻia ko ʻení. ʻE ala tokoni hono fakamatalaʻi ʻo e meʻa ʻi he palakalafi ko ʻení.
ʻOku ʻi ai foki mo ha fakakaukau ʻi he konga “Ngaahi ʻEkitivitī Fakalahi ki he Akó” ʻe ala tokoni.
Naʻe lekooti ʻe Siosefa Sāmita ʻa e talanoa ʻo e ʻUluaki Mata Meʻa-hā-maí ʻi he Siosefa Sāmita–Hisitōliá ʻi he 1838 ko ha konga ʻo e hisitōlia totonu ʻo e Siasí ke pulusi ki he māmaní. ʻOku tau monūʻia foki ke maʻu ha ngaahi fakamatala kehe ʻo e ʻUluaki Mata Meʻa-Hā-Maí—ʻa ia naʻe hiki pe tala-kae-tohi ʻe Siosefa ha fakamatala ai ʻe tolu. Naʻe teuteuʻi ʻa e fakamatala takitaha ʻi ha taimi kehekehe maʻa ha kakai kehekehe, ko ia, naʻe fakamamafaʻi ai ha ngaahi tafaʻaki kehekehe ʻo ʻene aʻusiá. Hangē ko ʻení, ʻoku tau ako ʻi he fakamatala ʻa Siosefa ʻi he 1835, naʻá ne mamata foki ki ha kau ʻāngelo, ka ʻi heʻene fakamatala ʻi he 1832, naʻá ne lea ʻaki ʻení ke fakamatalaʻi ʻa e tūkunga ʻo ʻene ʻi he ʻao ʻo e ʻOtuá: “Naʻe fonu hoku laumālié ʻi he ʻofa, pea ʻi ha ngaahi ʻaho lahi, ne u fiefia ai ʻi he nēkeneka lahi” (“Joseph Smith’s Accounts of the First Vision,” josephsmithpapers.org; vakai foki ki he Gospel Library app).
-
Ko e hā ʻoku akoʻi atu ʻe he ola ʻo e ʻaʻahi ʻa e Tamai Hēvaní mo Sīsū Kalaisi kia Siosefa Sāmitá fekauʻaki mo Kinauá?
ʻOku tāpuekina kitautolu ʻe he fakamatala takitaha ʻaki ha ngaahi fakaikiiki makehe, ka ʻoku taha kotoa ʻi he foʻi moʻoni mahuʻinga ko ia naʻe hanga ʻe Siosefa Sāmita ʻo fakaava ʻa e ngaahi langí kiate ia mo mamata ki ha kau talafekau fakalangi, ʻo kau ai ʻa e ʻOtua ko e Tamaí mo Sīsū Kalaisi.
ʻE lava ke faʻu ʻe he kau akó ha ngaahi kulupu, pea fekumi ʻa e tokotaha ako takitaha ʻi ha ngaahi fakamatala kehekehe ki ha ngaahi moʻoni lahi ange fekauʻaki mo e Tamai Hēvaní mo Sīsū Kalaisi.
ʻE lava foki ke kumi ʻe he kau akó ha ngaahi moʻoni kehe ʻi he foʻi vitiō “Kole ki he ʻOtuá: ʻUluaki Mata Meʻa-Hā-Mai ʻa Siosefa Sāmitá” (6:35), maʻu ʻi he ChurchofJesusChrist.org. ʻOku kau ʻi he vitiō ko ʻení ha fakaikiiki mei he ngaahi fakamatala takitaha ʻa Siosefa Sāmitá.
Tokanga taha pē ki he Tamai Hēvaní mo Sīsū Kalaisi: Ki ha ako lahi ange kau ki he ngaahi fehuʻi ʻokú ne fakaafeʻi e kau akó ke nau fakakaukau ki he meʻa ʻoku nau ako fekauʻaki mo e Tamai Hēvaní mo Sīsū Kalaisí, vakai ki he ako ʻoku ui ko e “Tokoniʻi e kau akó ke ʻilo e ʻofa, mālohi mo e ʻaloʻofa ʻa e ʻEikí heʻenau moʻuí,” ʻoku maʻu ʻi he Fakatupulaki ʻa e Ngaahi Taukei ʻa e Faiakó: Tokanga Taha kia Sīsū Kalaisi.
-
Ko e hā mo ha toe meʻa ʻoku akoʻi ʻe he ngaahi fakamatala ko ʻení fekauʻaki mo e Tamai Hēvaní, Sīsū Kalaisi, mo Hona Siasí ʻokú ke houngaʻia ke ʻiloʻí?
Fakakaukau ke fakaafeʻi e kau akó ke fakaʻosi ʻa e lēsoní ʻaki hono lekooti ʻi heʻenau tohinoa akó ha foʻi moʻoni ʻe taha ne nau ako mei he ʻUluaki Mata Meʻa-Hā-Mai ʻa Siosefa Sāmitá ʻa ia ʻoku mahuʻinga kiate kinautolu mo hono ʻuhingá. Fakaafeʻi ha niʻihi ʻe loto fiemālie ke vahevahe mo e kalasí ʻa e meʻa naʻa nau tohí.
Ako Ma‘uloto
Mahalo te ke fie tokoni ki he kau akó ke nau ako maʻuloto ʻa e potufolofola mo e kupuʻi lea folofola mahuʻinga ʻo e Siosefa Sāmita—Hisitōlia 1:15–20 pea fakamanatu ia ʻi he ngaahi lēsoni he kahaʻú. Ko e kupuʻi lea folofola mahuʻingá ʻa e “Naʻe sio ʻa Siosefa Sāmita ‘ki he Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi.’” Ko e ngaahi fakakaukau ki he ngaahi ʻekitivitī ako maʻulotó ʻoku maʻu ia ʻi he ngaahi naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”