“Siosefa Sāmita—Hisitōlia 1:1–14: ‘Kole ki he ʻOtuá,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Siosefa Sāmita—Hisitōlia 1:1–14,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Siosefa Sāmita—Hisitōlia 1:1–14
Siosefa Sāmita—Hisitōlia 1:1–14
“Kole ki he ʻOtuá”
ʻI he kei siʻi ʻa Siosefa Sāmitá, naʻá ne loto ke muimui ʻia Sīsū Kalaisi mo feinga ke ʻilo pe ko e fē ʻa e siasi ʻoku totonú pea mo ia ʻoku totonu ke ne kau ki aí. Ka neongo ia, naʻe lahi ha ngaahi siasi ne nau akoʻi ha ngaahi meʻa kehekehe, pea naʻe faingataʻa ki he talavou ko Siosefá ke ne ʻiloʻi ʻa e moʻoní. ʻE lava ke tokoniʻi ʻe he lēsoni ko ʻení ʻa e kau akó ke nau muimui ʻi he sīpinga ʻa Siosefa Sāmitá ʻi heʻenau feinga ke ako ʻa e moʻoní mei he ʻOtuá.
Ngaahi ʻEkitivitī Ako ʻOku Ala Fakahokó
Ko ha taimi puputuʻu
ʻI he lēsoni ko ʻení, ʻe ako ʻe he kau akó ʻa e Siosefa Sāmita—Hisitōlia 1:1–14 mo tokanga taha ki he ngaahi ngāue naʻe fakahoko ʻe Siosefa Sāmita ʻi heʻene feinga ke ʻiloʻi pe ko e fē ʻa e siasi ke kau ki aí. ʻI he lēsoni ko ʻení, “Siosefa Sāmita—Hisitōlia 1:15–20,” ʻe ako ʻe he kau akó ʻa e aʻusia ʻa Siosefa ʻi he Vaoʻakau Tapú. Te ke lava ʻo fakatahaʻi ʻa e ongo lēsoni ko ʻení ʻo fakatatau mo e taimi ʻoku maʻu ʻi he kalasí.
Fakaafeʻi e kau akó ke nau vahevahe ha ngaahi sīpinga ʻo ha ngaahi taimi naʻa nau maʻu ai ha fakamatala fakafepaki. Hangē ko ʻení, mahalo kuo nau mamata ha ngaahi lipooti mo ha ngaahi fakakaukau kehekehe fekauʻaki mo ha tefito ʻi he mītia fakasōsialé pe ʻi he ongoongó.
-
Ko e hā ʻoku faingataʻa ai he taimi ʻe niʻihi ke fakapapauʻi ha fakamatala falalaʻangá?
-
ʻE lava fēfē ʻe he ngaahi faingataʻa tatau ko iá ʻo fakafaingataʻaʻiaʻi hono maʻu ʻe ha taha ʻa e moʻoni fekauʻaki mo Sīsū Kalaisi mo ʻEne tokāteliné?
ʻI he ako ʻa e kau akó fekauʻaki mo e aʻusia ʻa Siosefa Sāmitá, fakaafeʻi kinautolu ke nau fakakaukau ki he founga ʻe lava ke tokoniʻi ai kinautolu ʻe heʻene sīpingá ʻi heʻenau fekumi ki he moʻoní.
ʻI he kei siʻi ʻa Siosefa Sāmitá, naʻá ne hohaʻa ki he lelei ʻa hono laumālié. Naʻe ʻi ai ha ngaahi fakakaukau kehekehe ʻi he koló, pea naʻa mo e fāmili Sāmitá, fekauʻaki mo e siasi ʻoku ʻi ai ʻa e ngaahi moʻoni ʻoku fiemaʻu ki he fakamoʻuí.
Fakakaukau ke vahevahe e ngaahi veesi ko ʻení ʻi he kau akó koeʻuhí ke lava ʻe he kalasí ʻo maʻu vave ʻa e ngaahi faingataʻa naʻe foua ʻe Siosefa ʻi hono ʻiloʻi ʻa e moʻoní.
Lau ʻa e Siosefa Sāmita—Hisitōlia 1:5–10, ʻo kumi e ʻuhinga naʻe faingataʻa ai kia Siosefa ke ne ʻiloʻi e moʻoni ʻa e ʻOtuá ʻi he lotolotonga ʻo e ngaahi tui fakalotu kehekehé.
-
Kuó ke aʻusia fēfē nai e faʻahinga puputuʻu tatau fekauʻaki mo e tui fakalotú ʻi he māmani ʻo e ʻaho ní?
-
ʻOkú ke pehē ko e hā ʻoku mahuʻinga ai ke tau fekumi ke ʻilo ʻa e moʻoní mei he ʻOtuá kae ʻikai tali ʻa e meʻa kotoa pē ʻoku akoʻí?
Ke tokoni ke fakafekauʻaki ʻe he kau akó ʻa e sīpinga ʻa Siosefá ki heʻenau moʻuí, fakakaukau ke hiki e saati ko ʻení ʻi he palakipoé pea fakafonu fakakalasi ia ʻi he lele ʻa e lēsoní.
Tā ʻa e saati ko ʻxzxení ʻi hoʻo tohinoa akó, pea fakahingoa ʻa e ngaahi kongá ʻo hangē ko hoʻo vakai ki ai ʻi laló:
|
Ngaahi Fehuʻi ʻa Siosefa maʻá e ʻOtuá |
Ko ʻeku ngaahi fehuʻi maʻá e ʻOtuá |
|
Meʻa naʻe fakahoko ʻe Siosefá |
Meʻa te u fakahokó |
Toe vakai ki he meʻa naʻá ke lau ʻi he Siosefa Sāmita—Hisitōlia 1:8, 10. Hiki e ngaahi fehuʻi mo e ngaahi ngāue ʻa Siosefá ʻi he konga totonú.
Mahalo ʻe ʻilo ʻe he kau akó mei he veesi 10 ko e ngaahi fehuʻi ʻa Siosefá ko e “Ko e hā ha meʻa ʻe fai?” mo e “Ko hai ʻi he ngaahi [siasi] ko ʻení kotoa pē ʻoku totonú?” Mahalo te nau fakatokangaʻi ʻi he veesi 8 naʻe kau ʻi he ngaahi meʻa ne fakahoko ʻe Siosefá ʻa ʻene fakakaukau mo ʻalu ki ha ngaahi fakatahaʻanga fakasiasi kehekehe.
Mahalo ʻe tokoni ke tataki e kau akó ki he palakalafi 3 ʻi he konga Ko Hono Maʻu ʻo e ʻIlo Fakalaumālié ʻi he Fakamatala ki he ʻElito ʻo e Fakataukei Fakatokāteliné (2023) ʻi hoʻomou aleaʻi e fehuʻi ko ʻení.
-
ʻOkú ke pehē ko e hā ʻe fiefia ai ʻa e Tamai Hēvaní naʻe fai ʻe Siosefa ʻa e ngaahi fehuʻi ko ʻení?
Ko e muimui ki he sīpinga ʻa Siosefa Sāmitá
ʻI heʻetau feinga ke ʻiloʻi ʻa e meʻa ʻoku moʻoní, ʻe ala tokoni ke muimui ki he fakaafe ko ʻeni meia Palesiteni Lāsolo M. Nalesoní:
Naʻe fokotuʻu ʻe he Palōfita ko Siosefa Sāmitá ha sīpinga maʻatautolu ke muimui ki ai ʻi hono tali ko ia ʻetau ngaahi fehuʻí. …
ʻI he founga tatau, ko e hā ʻe ʻomi ʻe hoʻo fekumí maʻau ʻi ha founga tatau? Ko e hā e poto ʻokú ke masiva aí? Ko e hā ʻokú ke ongoʻi ko ha meʻa mahuʻinga ʻoku fiemaʻu ke ke ʻilo pe mahino kiate koé? Muimui ki he tā sīpinga ʻa e Palōfita ko Siosefa Sāmitá. (Russell M. Nelson, “Fakahā maʻá e Siasí, Fakahā ki Heʻetau Moʻuí,” Liahona, Mē 2018, 95)
Ko e moʻoni ʻe taha te tau lava ʻo ako meia Palesiteni Nalesoní ko e te tau lava ʻo muimui ʻi he sīpinga ʻa Siosefa Sāmitá ke ako e moʻoni ʻa e ʻOtuá maʻatautolu. Fakakaukau ki he ngaahi fehuʻi naʻe fai ʻe Palesiteni Nalesoní. Te ke tali fēfē ʻa e ngaahi fehuʻi ko iá maʻaú? Fakalaulauloto ki ha ngaahi fehuʻi ʻokú ke maʻu pea hiki kinautolu ʻi hoʻo tohinoa akó ʻi he konga “Ko ʻeku ngaahi fehuʻi maʻá e ʻOtuá.”
Mahalo naʻe fili ʻe he kau akó ha fehuʻi ke tukutaha ki ai ʻenau tokangá ʻi he lēsoni “Ko Hono Maʻu ʻo e ʻIlo Fakalaumālié, Konga 1” pe “Ko Hono Maʻu ʻo e ʻIlo Fakalaumālié, Konga 2.” Mahalo ʻe tokoni ke fakamanatu kiate kinautolu ʻa e meʻá ni.
-
Ko e fē ʻi hoʻo ngaahi fehuʻí ʻokú ke ongoʻi ʻoku ueʻi koe ke ke fakamuʻomuʻa ʻi he taimi ko ʻeni ʻo hoʻo moʻuí? Ko e hā hono ʻuhingá?
ʻI he hokohoko atu hoʻo ako ʻa e Siosefa Sāmita—Hisitōliá ʻi he kotoa ʻo e lēsoní, hokohoko atu hono fakafonu ʻa e saati ʻi hoʻo tohinoa akó. Kumi ha ngaahi founga te ke lava ai ʻo muimui ki he sīpinga ʻa Siosefá ke maʻu ʻa e tali ki hoʻo ngaahi fehuʻí. ʻI he konga “Meʻa te u fakahokó,” tohiʻi ʻa e ngaahi ongo ʻokú ke maʻu ke ngāueʻí.
Hili hono lau ʻe he kau akó ʻa e potufolofola ko ʻení, fakaafeʻi kinautolu ke hokohoko atu hono fakafonu ʻa e konga “Meʻa Naʻe Fai ʻe Siosefá” ʻi he palakipoé.
Lau ʻa e Siosefa Sāmita—Hisitōlia 1:11–14, ʻo kumi ha ngaahi ngāue kehe naʻe fakahoko ʻe Siosefa ke ne ʻilo ai ʻa e moʻoni ʻo e ʻOtuá. Fakakaukau ke hiki ʻa e meʻa naʻá ke maʻú ʻi he konga “Meʻa naʻe fai ʻe Siosefá”.
Ke vakai ki ha toe ngaahi fehuʻi mo ha ngaahi ngāue naʻe fakahoko ʻe Siosefa ke maʻu ha ngaahi tali mei he ʻOtuá, te ke lava ʻo mamata ʻi he foʻi vitiō “Ko hono Fakafoki Mai ʻo e Ongoongoleleí,” ʻoku maʻu ʻi he ChurchofJesusChrist.org, mei he taimi 1:15 ki he 15:34.
Kapau te mou fili ke sio ʻi he foʻi vitiō “Ko hono Fakafoki Mai ʻo e Ongoongoleleí,” fakakaukau ke toutou taʻofi ia ʻi he taimi kotoa pē ʻoku ʻiloʻi ai ʻe he kau akó ha fehuʻi foʻou naʻe maʻu ʻe Siosefa pe ko ha meʻa naʻá ne fai. Kole ki ha tokotaha ako ke tānaki ia ki he ngaahi konga ʻi he palakipoé.
Ko ha ngaahi sīpinga ʻeni ʻo ha ngaahi ngāue ʻe ala fakatokangaʻi ʻe he kau akó ʻoku fakahoko ʻe Siosefa ʻi he vitioó: ʻeke ha ngaahi fehuʻi ki heʻene mātuʻá, talanoa mo e kau malangá, tuku ha taimi ke fakalaulauloto ai ki he meʻa naʻá ne akó, lau ha ngaahi potufolofola kehekehe mei he Tohi Tapú, pea ʻikai foʻi ʻi he taimi naʻe ʻikai maʻu vave ai e ngaahi talí.
-
Neongo naʻe ʻikai ʻilo ʻe Siosefa ʻa e siasi ke kau ki aí, ka ko e hā naʻá ne ʻilo fekauʻaki mo e ʻOtuá? (Vakai, “Ko Hono Maʻu ʻo e ʻIlo Fakalaumālié,” Fakamatala ki he ʻElito ʻo e Fakataukei Fakatokāteliné (2023), palakalafi 2–3.)
-
ʻOkú ke pehē ko e hā ʻoku finangalo lelei ai ʻa e ʻOtuá ke tokoni mai ke tau ʻiloʻi ʻa e moʻoní? (Vakai, Siosefa Sāmita—Hisitōlia 1:11.)
-
Ko e fē ʻi he ngaahi meʻa naʻe fakahoko ʻe Siosefá kuó ke ʻahiʻahiʻi ʻi hoʻo moʻuí? Ko e fē meʻa te ke loto ke ʻahiʻahi fakahokó?
Manatuʻi e fakaafe naʻe fai ʻe Palesiteni Nalesoni ke “muimui ki he sīpinga ʻa e Palōfita ko Siosefá.” Fekumi ki ha tokoni mei he Tamai Hēvaní ʻi hoʻo fakalaulauloto ki he meʻa te ke lava ʻo fai ke muimui ai ki he sīpinga ʻa Siosefá ʻi hoʻo fekumi ki he moʻoní.
Kapau ʻe fiemaʻu, te ke lava ʻo vahevahe ha ngaahi founga ʻe lava ke muimui ai ʻa e kau akó ki he sīpinga ʻa Siosefa Sāmitá, hangē ko ʻení:
-
Kumi ha potufolofola ʻoku ʻuhingamālie kiate koé. Faʻu ha palani ke toutou fakakaukau ki ai. Te ke lava ʻo faʻu ha pousitā pea tuku ia ʻi ha feituʻu te ke lava ai ʻo sio ki he potufolofolá ʻi he lolotonga ʻo e ʻahó. Pe te ke feinga ke ako maʻuloto ia pea lau maʻuloto ia ʻi he ʻaho kotoa pē ʻi ha uike ʻe taha.
-
Fakapapauʻi ke ke lotu leʻo lahi ki he ʻOtuá ʻi ha feituʻu fakataautaha. Faʻu ha fokotuʻutuʻu ʻo e meʻa te ke fie fakakau ʻi hoʻo lotú.
ʻI he konga ʻo e “Meʻa te u fakahokó” ʻi hoʻo tohinoa akó, hiki ha founga ʻe taha pe ua te ke muimui ai ki he sīpinga ʻa Siosefa Sāmitá. Fakakau ai ha ngaahi fakaikiiki pau ki he founga te ke fakahoko ʻaki e ngaahi ngāue ko ʻení ʻi hoʻo fekumi ki ha ngaahi tali mei he ʻOtuá. Mahalo te ke fie vahevahe hoʻo palaní mo ha kaungāmeʻa falalaʻanga pe mēmipa ʻo e fāmilí. ʻOku mahuʻinga ke manatuʻi naʻa mo e ngaahi palani lelei tahá, ʻe fiemaʻu ha taimi ke aʻusia ai ʻa e ngaahi ola ʻoku fiemaʻú. Toutou foki ki hoʻo tohinoa akó mo e Siosefa Sāmita—Hisitōliá ke vakaiʻi ʻa e tuʻunga ʻoku ʻi aí.
Tuku ke vahevahe ʻe he kau akó ʻenau fakamoʻoni ki he ngaahi ngāue faivelenga ʻe lava ke iku ki he fakahaá mo ha tali ki he ngaahi fehuʻi fakalaumālié. Fakamoʻoni ange ʻi heʻetau muimui ki he sīpinga ʻa Siosefa Sāmitá, ʻe tokoniʻi kitautolu ʻe he ʻOtuá ke tau ako ʻa e moʻoní ʻiate kitautolu pē.