Lēsoni 9: Siosefa Sāmita—Hisitōlia 1:1–26

Siosefa Sāmita—Hisitōlia 1:21–26

“Kuó u Mamata ki ha Meʻa-Hā-Mai … pea ʻe ʻIkai Te u Lava ʻo Fakaʻikaiʻi Ia”

Hili hono vahevahe ʻe he kiʻi tamasiʻi taʻu 14 ko ʻení ʻa e meʻa naʻá ne aʻusia ʻi he ʻUluaki Mata Meʻa-Hā-Maí mo ha faifekau ʻo ha siasi fakalotofonua, naʻe vave pē ʻene hoko koe taumuʻa ʻo e fakatangá. Ka neongo ia, naʻe ʻikai holoki ʻe he meʻá ni ʻene tui naʻe hā mai ʻa e Tamai Hēvaní mo Sīsū Kalaisi kiate iá. ʻE lava ke ʻoange ʻe he lēsoni ko ʻení ki he kau akó ha faingamālie ke nau ongoʻi hono fakamoʻoniʻi ange ʻe he Laumālie Māʻoniʻoní kiate kinautolu naʻe hā ʻa e Tamai Hēvaní mo Sīsū Kalaisi ki he Palōfita ko Siosefa Sāmitá.

Ngaahi ʻEkitivitī Ako ʻOku Ala Fakahokó

Te ke ongoʻi fēfē nai?

Fakakaukau ke kamata e kalasí ʻaki hano fakaafeʻi e kau akó ke fakalaulauloto ki heʻenau ngaahi fakamoʻoni naʻe ui ʻe he ʻOtuá ʻa Siosefa Sāmita ke hoko ko ʻEne Palōfita. ʻE lava ke tokoni ʻa e talanoa mo e ngaahi fehuʻi ko ʻení ke fakahoko ʻeni.

Naʻe vahevahe ʻe Palesiteni Tōmasi S. Monisoni (1927–2018) ha fakamatala ki ha ongo faifekau naʻe fakafepakiʻi fekauʻaki mo ʻena fakamoʻoni kia Siosefa Sāmitá.

Naʻe ʻaʻahi ha ongo [faifekau] ki he ʻapi ʻo Misa ʻElemā Pōlatí. … Naʻá na fakahoko ʻena pōpoakí mo kole ange ke kau ange ʻi he lotú. Naʻá ne loto fiemālie ki ai, ʻo kapau te ne fai ʻa e lotú.

Naʻe ofo ʻa e ongo faifekaú ʻi he lotu naʻá ne faí. Naʻá ne pehē, “Tamai Hēvani, tāpuakiʻi ʻa e ongo faifekau fakaʻofa mo taʻe ʻiló ni, ke na lava ʻo foki ki hona ʻapí pea ʻoua ʻe fakamoleki hona taimí ʻi hono fakamatalaʻi ki he kakai ʻo Kānatá ha pōpoaki fakaʻofoʻofa moʻoni ʻa ia ʻoku siʻi ʻena ʻilo ki aí.”

ʻI heʻenau tuʻu haké, naʻe kole ange ʻe Misa Pōlati ki he ongo faifekaú ke ʻoua naʻá na toe foki ange ki hono ʻapí. ʻI heʻena mavahé, naʻá ne manuki atu kiate kinaua ʻo pehē, “He ʻikai te mo lava ʻo talamai kiate au ʻokú mo tui moʻoni ko Siosefa Sāmitá ko ha palōfita ia ʻa e ʻOtuá!” peá ne haʻaki mai e matapaá. (Thomas S. Monson, “The Prophet Joseph Smith: Teacher by Example,” Liahona, Nov. 2005, 69)

Fakaafeʻi e kau akó ke nau tali e ongo fehuʻi ko ʻení ʻi heʻenau tohinoa akó. ʻE lava ke ke kole ki ha niʻihi ʻe loto fiemālie ke vahevahe ʻenau tali ki he fehuʻi hono uá mo e kalasí.

• ʻOku lahi fēfē hoʻo loto-falala te ke lava ʻo fakamoʻoni naʻe ʻaʻahi ʻa e Tamai Hēvaní mo Sīsū Kalaisi kia Siosefa pea uiuiʻi ia ko ha palōfitá?

• ʻE liliu fēfē hoʻo moʻuí mo ho vā fetuʻutaki mo e ʻOtuá ʻi hoʻo ʻiloʻi iá?

ʻI hoʻo ako ʻa e lēsoni ko ʻení, fakakaukau ki he ʻuhinga kiate koe ʻa e ʻUluaki Mata Meʻa-Hā-Maí mo e founga kuó ne liliu pe lava ke liliu ai hoʻo moʻuí. Te ke maʻu ha faingamālie ʻi he fakaʻosinga ʻo e lēsoní ke lekooti hoʻo ngaahi fakakaukaulotó ʻi hoʻo tohinoa akó.

Ko hono moʻoni ʻo e ʻUluaki Mata Meʻa-Hā-Mai ʻa Siosefa Sāmitá

Hili e hā ʻa e Tamai Hēvaní mo Sīsū Kalaisi kia Siosefa Sāmitá, naʻá ne vahevahe ʻa e aʻusiá mo ha tangata malanga ʻo ha taha ʻo e ngaahi siasi fakalotofonuá.

Lau ʻa e Siosefa Sāmita—Hisitōlia 1:21–23, ʻo kumi e tali ʻa ha tangata malanga mo ha niʻihi tokolahi kehe ʻi he taimi naʻa nau fanongo ai fekauʻaki mo e mata meʻa-hā-mai ʻa Siosefá.

• Ko e hā ʻoku makehe kiate koe ʻi he fakamatalaʻi ʻe Siosefa ʻa e meʻa naʻe hoko ʻi he ngaahi veesi ko ʻení?

• Ko e hā ha ngaahi founga kuó ke aʻusia ai ha fakafepaki ki he meʻa ʻokú ke ʻilo ʻoku moʻoní?

• Ko e hā ʻoku mahuʻinga ai ke ʻi ai haʻo fakamoʻoni ki he moʻoní ʻi he taimi ʻoku veiveiua ai e niʻihi kehé ki he meʻa ʻokú ke lea ʻakí?

Lau ʻa e Siosefa Sāmita—Hisitōlia 1:24–26 pea fakakaukau ke fakaʻilongaʻi ʻa e ngaahi foʻi lea mo e kupuʻi lea ʻoku fakapapauʻi ai ʻe Siosefa ʻa e moʻoni ʻo ʻene mata meʻa-hā-maí.

• Ko e hā ha ngaahi moʻoni ʻoku lava ke tau ako mei he ngaahi veesi ko ʻení?

  ʻE lava ke ʻoatu ʻe he kau akó ha ngaahi moʻoni kehekehe. Fakamālō ange ʻi hono vahevahe ʻa e meʻa ne nau maʻú. Hiki ʻi he palakipoé ʻa e moʻoni ko ʻení: Ko hono moʻoní, naʻe hā ʻa e Tamai Hēvaní mo Sīsū Kalaisi kia Siosefa Sāmita, ko e tali ki heʻene lotú.

  Mahalo ʻe tokoni ke lisi ʻi he tafaʻaki ʻo e foʻi moʻoni ʻi he palakipoé ʻa e ngaahi foʻi lea mo e ngaahi kupuʻi lea naʻe fakaʻilongaʻi ʻe he kau akó. Pe, ʻe lava ke hiki ʻe he kau akó ʻa e ngaahi foʻi leá pe kupuʻi leá ʻi ha fanga kiʻi laʻipepa iiki pea fakapipiki kinautolu ki he palakipoé.

• Fakatatau ki he veesi 25, naʻe tokoniʻi fēfē ʻe he mahino ne maʻu ʻe Siosefa Sāmita ki he ʻOtuá ke ne tuʻu maʻu ʻi he meʻa naʻá ne ʻiloʻi ʻoku moʻoní?

ʻOange ha faingamālie ki he kau akó ke nau fakalaulauloto ai mo tohi ʻi heʻenau tohinoá fekauʻaki mo e ʻuhinga ʻo e ʻUluaki Mata Meʻa-Hā-Maí kiate kinautolú. Te nau lava ʻo fakaʻaongaʻi ha miniti ʻe 10 ki he 15 ke fai ʻeni. ʻI hono ʻoange ki he kau akó ha ʻekitivitī fakahinohino ke tokoni ke nau fakalaulauloto mo tohi ai, hangē ko ia ʻoku hiki atu ʻi laló, ʻe lava ke tokoni ia ke nau ongoʻi hono fakamoʻoniʻi ʻe he Laumālie Māʻoniʻoní kiate kinautolu ʻa e ʻUluaki Mata Meʻa-Hā-Maí. ʻE lava ke ke fakaʻaliʻali e ngaahi ʻekitivitī ko ʻení pea tuku ke fili ʻe he kau akó ʻa e meʻa ʻoku nau fie fakahokó, pe te ke fili ʻa e meʻa te mou fakahoko kotoa ko ha kalasí. Mahalo naʻa lelei ke fakahoko ʻa e ongo ʻuluaki ʻekitivitií mo e kalasí.

1. Hivaʻi mo e kalasí pe lau ʻa e fakalea ʻo e himi “Ko e Fua Lotu ʻa Siosefá” (Ngaahi Himí, fika 14). Ko ha tatau ʻeni ʻo hono hivaʻi ʻe he Kuaea Tāpanekale ʻi Temipale Sikueá ʻa e foʻi himí:

2. ChurchofJesusChrist.org

3. Hiki e ngaahi lea ʻo e Siosefa Sāmita—Hisitōlia 1:16–17 ʻi hoʻo tohinoa akó, ʻo fakakaukau fakalelei ki he ngaahi leá. Pe kapau ʻe lava, lekooti pea fanongo ki hoʻo lau e ngaahi lea ko ʻení ʻi ha meʻangāue fakaʻilekitulōnika.

4. Lau ha lea naʻe fai ʻi he konifelenisi lahí fekauʻaki mo e ʻUluaki Mata Meʻa-Hā-Maí. Ko ha ngaahi meʻa ʻeni ʻe niʻihi ke fili mei ai:

   1. The Fruits of the First Vision” (Dieter F. Uchtdorf, Liahona, May 2005, 36–38)

Lekooti ʻi hoʻo tohinoá hoʻo mahino fekauʻaki mo e ʻUluaki Mata Meʻa-Hā-Maí. Fakakau ʻi hoʻo ngaahi fakakaukaulotó hoʻo fakamoʻoní pe ko e ongo ʻokú ke maʻu ʻi hoʻo maʻu ha fakamoʻoni ʻe lava ke tāpuekina ʻe he ʻUluaki Mata Meʻa-Hā-Maí hoʻo moʻuí.

ʻI he ʻosi ʻa e kau akó, fakaafeʻi ʻa kinautolu ʻoku loto ke vahevahe ʻenau ngaahi fakamoʻoní pe ngaahi ongo fekauʻaki mo Siosefa Sāmita mo e ʻUluaki Mata Meʻa-Hā-Maí. Fakakaukau ke vahevahe ʻa e founga kuó ke ʻilo ai ʻa e moʻoni ʻo e ʻaʻahi mai ʻa e Tamai Hēvaní mo Sīsū Kalaisi kia Siosefa Sāmitá.

Ngaahi Maʻuʻanga Tokoni Lahi Ange

Ko e hā kuo vahevahe ʻe he kau taki ʻo e Siasí fekauʻaki mo hono maʻu ha fakamoʻoni ʻanautolu pē ki he ʻUluaki Mata Meʻa-Hā-Maí?

Naʻe fakamoʻoni ʻa Palesiteni Lōlenisou Sinou (1814–1901) ʻo pehē:

ʻOku ou ʻilo ko Siosefa Sāmitá ko ha Palōfita moʻoni ia ʻa e ʻOtuá. ʻOku ou fakamoʻoni naʻá ne mamata mo fealeaʻaki mo e ʻOtuá pea mo Hono ʻAlo ko Sīsū Kalaisí. Naʻe foaki mai ‘e he ‘Eikí ‘a e fakamoʻoni moʻui ko ‘ení pea kuo vela māfana ia ‘i hoku lotó talu mei heʻeku maʻu iá. Kuó u foaki ‘eni ia ki he māmaní kotoa. ‘Oku ‘ikai ko haʻaku fakamoʻoniʻi pē ki he faʻahinga kotoa ‘o e tangatá naʻe fekauʻi mai ‘a Siosefa Sāmita ‘e he ‘Otuá pea ko e ngāue naʻe fokotuʻu ‘iate iá ko e ngāue ia ‘a e ‘Otuá, ka ‘oku ou fakatokanga ki he ngaahi puleʻanga kotoa pē ‘o e māmaní fekauʻaki mo e kikite naʻe fai ‘e he Palōfitá mo ne fakamoʻoniʻi ‘i he founga mālūʻia tahá, ‘oku ou ‘iloʻi ‘oku nau moʻoni. (Ngaahi Akonaki ʻa e Kau Palesiteni ʻo e Siasí: Lolenisou Sinou [2012], 306)

Naʻe fakamoʻoni ʻa Palesiteni Tēvita O. Makei (1873–1970) ʻo pehē:

Ko e hā ko ia ʻa e Tamaí mo e ʻAló kia Siosefa Sāmitá ko e fakavaʻe ia ʻo e Siasi ko ʻení. ʻOku toka ai ʻa e fakapulipuli ki hono mālohí mo ʻene longomoʻuí. ʻOku moʻoni ʻeni, pea ʻoku ou fakamoʻoni ki ai. ʻOku tali ʻe he foʻi fakahā pē ko iá ʻe taha hono kotoa ʻo e ngaahi tālafili ʻa e saienisí fekauʻaki mo e ʻOtuá pea mo hono anga fakalangí. ʻOku ʻikai ʻapē ke mou fakatokangaʻi hono ʻuhinga ʻo e meʻá ni? ʻOku tali heni pe ko e tangata fēfē ʻa e ʻOtuá. ʻOku mahino heni ʻene fetuʻutaki mo ʻene fānaú. ʻOku mahino heni ʻa ʻene tokanga ki he faʻahinga ʻo e tangatá ʻo foaki mai ai hono mafaí ki he tangatá. Naʻe fakapapauʻi heni ʻa e kahaʻu ʻo e ngāué. Naʻe fakamahinoʻi ʻe he ʻuluaki mata meʻa-hā-maí ʻa e meʻá ni pea mo ha ngaahi moʻoni nāunauʻia kehe. (Ngaahi Akonaki ʻa e Kau Palesiteni ʻo e Siasí: Tēvita O. Makei [2003], 113).

Naʻe fakamoʻoniʻi ʻe Palesiteni ʻEselā Tafu Penisoni (1899–1994) ‘o pehē:

Naʻe tuʻu maʻu ʻa e kiʻi tamasiʻi taʻu hongofulu mā faá ʻo fehangahangai mo māmani. Naʻe ʻafioʻi ʻe he ʻOtuá Hono fohá [Siosefa Sāmita] ʻi he taimi naʻe fili aí. Naʻá Ne ʻafioʻi ʻe faimateaki mo moʻoni ʻo aʻu ki he maté. (Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni [2014], 128)

Naʻe fakamoʻoni ʻa Palesiteni Kōtoni B. Hingikelī (1910–2008) ʻo pehē:

Naʻá ku ʻi Palemaila ʻi Niu ʻIoke kimuí ni [ofi ki he feituʻu naʻe maʻu ai ʻe Siosefa Sāmita ʻa e ʻUluaki Mata Meʻa-hā-maí]. Kuo pau ke pehē ʻe ha taha, ʻi he ngaahi meʻa naʻe hoko ʻi he feituʻu ko iá: “Naʻe hoko pē pe naʻe ʻikai hoko. He ʻikai lava ke toe ʻi ai ha fakaʻapē, ʻikai ha toe fakafilingaua.”

Pea toki fanafana ʻa e leʻo ʻo e tuí: “Naʻe hoko kātoa. Naʻe hoko ʻo tatau tofu mo ʻene pehē naʻe hokó.” (Ngaahi Akonaki ʻa e Kau Palesiteni ʻo e Siasí: Kōtoni B. Hingikelī: [2016], 162)

Ngaahi ʻEkitivitī Fakalahi ki he Akó

Vitiō: “Tupuʻangá”

Fakakaukau ke fakaʻaongaʻi e foʻi vitiō “Tupuʻangá” (4:57) ke tokoni ke mahino ki he kau akó ʻa e founga ʻe lava ke nau maʻu pe fakaloloto ai ʻenau tui naʻe hā ʻa e Tamai Hēvaní mo Sīsū Kalaisi ki he Palōfita Siosefa Sāmitá.

Siosefa Sāmita—Hisitōlia 1:26

Ko ha founga ʻe taha ke aleaʻi ai e veesi ko ʻení ko e vakai ki ai ko ha sīpinga ʻo e ngāue ʻi he tuí. ʻI he taimi ko ʻení ʻi he hisitōlia ʻo Siosefá, naʻe ʻikai ke ne ʻilo ʻa e founga ʻe hoko ai ʻa hono Fakafoki Mai ʻo e Ongoongoleleí. Naʻá ne ʻiloʻi kuó ne mamata ki ha meʻa-hā-mai naʻe fakahinohinoʻi ai ia ke ʻoua te ne kau ki ha taha ʻo e ngaahi siasi kehé, pea naʻá ne ʻiloʻi te ne tatali ki ha toe fakahinohino. Fakakaukau ke fakaafeʻi e kau akó ke nau fakafehoanaki ʻa e Siosefa Sāmita—Hisitōlia 1:26 mo e palakalafi 7 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023), ʻo kumi e ngaahi meʻa ʻoku faitataú. ʻE lava foki ke ʻaonga ʻa e konga ko ʻeni mei he lea ʻa ʻEletā Niila L. ʻEnitaseni “Ngaahi Manatu Melie Fakalaumālie Fakangalongataʻá.”

ʻI he ngaahi taimi faingataʻa ʻi he moʻui ʻa Siosefá, naʻá ne manatu ai ki ha taʻu nai ʻe uofulu kimuʻa, ki he ʻofa moʻoni ʻa e ʻOtuá ʻiate iá mo e ngaahi meʻa ne hoko naʻe talitali lelei ai hono Fakafoki Mai ʻo e Ongoongolelei ne fuoloa taʻu hono tomuʻa kikiteʻí. ʻI he fakakaukauloto ʻa Siosefa ki heʻene fononga fakalaumālié, naʻá ne pehē ai: “ʻOku ʻikai ke u tukuakiʻi ha taha ʻoku ʻikai ke tui ki hoku hisitōliá. Kapau naʻe ʻikai ke u aʻusia ia, naʻe ʻikai ke u mei tui mo au ki ai.”

Ka naʻe moʻoni ʻa e ngaahi aʻusiá, pea naʻe ʻikai teitei ngalo pe te ne fakaʻikaiʻi kinautolu, ʻo fakapapauʻi fakalongolongo ʻene fakamoʻoní ʻi heʻene fononga ki Kātesí. Naʻá ne pehē, “ʻOku ou ʻalu ʻo hangē ko e lami ke tāmateʻi; ka ʻoku nonga hoku lotó ʻo hangē ko e pongipongi malū ʻi he faʻahitaʻu māfaná; ʻoku ou maʻu ʻa e konisēnisi ʻoku ʻataʻatā mei he fai hala ki he ʻOtuá pea ki he kakai kotoa pē.” (Neil L. Andersen, “Ngaahi Manatu Melie Fakalaumālie Fakangalongataʻá,” Liahona, Mē 2020, 19)

Ko hono maʻu ha fakamoʻoni kia Siosefa Sāmita mo e ʻUluaki Mata Meʻa-Hā-Maí

Ke tokoni ke maʻu ʻe he kau akó ha fakamoʻoni ki he ʻUluaki Mata Meʻa-Hā-Maí, te ke lava ʻo ʻoange ki he tokotaha ako takitaha ha tatau ʻo e lea ko ʻeni ʻa ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakaafeʻi kinautolu ke fakaʻilongaʻi e ngaahi meʻa kuo nau aʻusiá pea tā ha laine ki he tafaʻaki ʻo e laʻipepá ʻa ia te nau lava ʻo hiki ai ha ngaahi fakamatala nounou ʻo ʻenau ngaahi aʻusiá.

ʻE lava pē ke kehekehe [e] founga ʻetau maʻu ha fakamoʻoni ki he Palōfita ko Siosefa Sāmitá. ʻE lava ke maʻu ia ʻi haʻo tūʻulutui ʻo lotu, ʻo kole ke fakapapauʻi mai ʻe he ʻOtuá ko ha palōfita moʻoni ia. ʻE lava ke maʻu ia ʻi hoʻo lau e fakamatala ʻa e Palōfitá ki he ʻUluaki Mata Meʻa-hā-maí. ʻE lava ke taumalingi ki ho laumālié ha fakamoʻoni ʻi hoʻo toutou lau ʻa e Tohi ʻa Molomoná. ʻE lava ke maʻu ia ʻi hoʻo fai hoʻo fakamoʻoni ki he Palōfitá pe ʻi hoʻo tuʻu ʻi he loto temipalé mo ʻiloʻi naʻe fakafoki mai ʻia Siosefa Sāmita ki māmani ʻa e mālohi māʻoniʻoni ke silaʻí. Ka ʻi he tuí mo e loto fakamātoató, ʻe fakamālohia hoʻo fakamoʻoni ki he Palōfita ko Siosefa Sāmitá. ʻE malava ʻe ha lahi ʻo e vaí ʻo ʻai koe ke ke viviku, ka he ʻikai ke ne teitei lava ʻo tāmateʻi ʻa e vela māfana ʻa hoʻo tuí. (Neil L. Andersen, “Siosefa Sāmita,” Liahona, Nōvema 2014, 30)

Te mou lava leva ʻo aleaʻi ha ngaahi fehuʻi hangē ko ʻení: Ko e hā ha ngaahi founga kehekehe te ke lava ʻo maʻu pe fakaloloto ai hoʻo fakamoʻoni kia Siosefa Sāmita mo e ʻUluaki Mata Meʻa-Hā-Maí? Kuo tākiekina fēfē nai hoʻo fakamoʻoni kia Siosefa Sāmitá ʻe ha taha ʻo e ngaahi fokotuʻu ko ʻení?