Lēsoni 166: Fakataukei Fakatokāteliné: Kumi e Tali ki Heʻeku Ngaahi Fehuʻí

Ngāue ʻi he Tuí ke Maʻu e Ngaahi Talí

Ko Hono Maʻu ʻo e ʻIlo Fakalaumālié, Konga 2

ʻOku fakaafeʻi kitautolu ʻe Sīsū Kalaisi ke tau hanga kiate Ia pea ngāue ʻi he tui ʻi he toenga ʻo ʻetau moʻuí. ʻOku mahuʻinga ke tau tokanga taha ki he Fakamoʻuí, tautautefito ki he taimi ʻoku ʻikai faingofua ai ke tau maʻu ha tali ki he ngaahi fehuʻí pe tūkungá. ʻE lava ke tokoni ʻa e lēsoni ko ʻení ke mahino ki he kau akó ʻa e founga ke ngāue ai ʻi he tui kia Sīsū Kalaisí ʻi heʻenau fekumi ki ha tali ki heʻenau ngaahi fehuʻí.

Ngaahi ʻEkitivitī Ako ʻOku Ala Fakahokó

Ko e mahuʻinga ʻo e ʻeke fehuʻí

Kimuʻa pea kamata e kalasí, mahalo te ke fie hiki ʻa e fehuʻi ko ʻení meia Palesiteni Tieta F. ʻUkitofa ʻi he palakipoé. ʻI he hū mai ʻa e kau akó, fakaafeʻi kinautolu ke fakalaulauloto ki he founga ʻe lava ke nau tali ʻaki ʻene fehuʻí pea mo e ʻuhinga te nau tali pehē aí. Hili hono maʻu ʻe he kau akó ha taimi ke fakalaulauloto aí, fakaafeʻi kinautolu ke vahevahe ‘enau ngaahi talí.

Naʻe ʻomi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí, ʻa e fehuʻi ko ʻení:

ʻOku sai pē nai ke ʻi ai ha ngaahi fehuʻi fekauʻaki mo e Siasí pe ko hono ngaahi tokāteliné? (Dieter F. Uchtdorf, “The Reflection in the Water” [fakataha lotu ʻa e Potungāue Ako ʻa e Siasí, 1 Nōvema 2009], thechurchnews.com)

• Te ke tali fēfē ʻa e fehuʻi ko ʻení? Ko e hā hono ʻuhinga te ke tali pehē aí?

ʻI hoʻo lau e toenga ʻo e lea ʻa Palesiteni ʻUkitofá, kumi e founga ʻoku tatau ai hoʻo ngaahi talí mo iá.

ʻE hoku ngaahi kaumeʻa ʻofeina, ko ha kakai fehuʻi kitautolu, he ʻoku tau ʻilo ʻoku fakaiku ʻa e fehuʻí ki he moʻoní. Ko e founga ia naʻe kamata ai ʻa e Siasí—mei ha talavou naʻá ne maʻu ha ngaahi fehuʻi. Ko hono moʻoní, ʻoku ʻikai ke u fakapapauʻi pe ʻe ʻilo fēfē ʻe ha taha ʻa e moʻoní taʻe fai ha fehuʻi. …

… ʻOku tupu mei he fehuʻí ʻa e fakamoʻoní. … Ko e fehuʻí ʻoku ʻikai ko ha fakaʻilonga ia ʻo ha vaivai; ka ko ha fakamelomelo ia ʻo e tupulakí. (Dieter F. Uchtdorf, “The Reflection in the Water” [fakataha lotu ʻa e Potungāue Ako ʻa e Siasí, 1 Nōvema 2009], thechurchnews.com)

• Ko e hā ha ngaahi sīpinga kuó ke mamata ai ʻi he folofolá, hisitōlia ʻo e Siasí, pe ʻi hoʻo moʻuí ʻokú ne fakahaaʻi ʻoku finangalo ʻa e Tamai Hēvaní mo Sīsū Kalaisi ke tau fai ha ngaahi fehuʻi?

ʻE lava ke tau maʻu he taimi ʻe niʻihi ha fakamatala foʻou fekauʻaki mo e tokāteliné, ngaahi founga ngāué, pe ko e hisitōlia ʻo e Siasí ʻoku ngali faingataʻa ke mahinó. Mahalo foki te tau maʻu ha ngaahi fehuʻi ʻoku faingataʻa ke tali. ʻOku ʻikai tatau ʻa e maʻu ha ngaahi fehuʻí mo e veiveiuá. ʻE lava ke fakatupulaki ʻe he ʻeke fehuʻi faivelengá ʻa ʻetau mahino mo ʻetau fakamoʻoni kia Sīsū Kalaisí. ʻE lava ke hanga ʻe he veiveiuá ʻo uesia kovi ʻetau tui kiate Iá (vakai, Ngaahi Tefitó mo e Ngaahi Fehuʻí, “Ko Hono Tali e Ngaahi Fehuʻi ʻo e Ongoongoleleí,” topics.ChurchofJesusChrist.org).

Kole ki he kau akó ke nau fakakaukau ki ha ngaahi fehuʻi ʻoku nau maʻu fekauʻaki mo e Siasí pe ko hono tokāteliné ʻoku ʻikai ke nau lava ʻo tali ngofua. Te ke lava ʻo fakaafeʻi e kau akó ke hiki e ngaahi fehuʻi ko ʻení ʻi heʻenau tohinoa akó. Fakaafeʻi kinautolu ke kumi ha ngaahi moʻoni ʻi he lēsoni ko ʻení ʻe lava ʻo tokoni kiate kinautolu ʻi he taimi ʻoku ʻohake ai ha ngaahi fehuʻi faingataʻá.

Ko hono tali ʻo e ngaahi fehuʻi faingataʻá

Ke fakatātaaʻi e mahuʻinga ʻo hono ʻeke ha ngaahi fehuʻí mo fakatātaaʻi e founga ke ngāue ai ʻi he tuí, fakamatalaʻi ha tūkunga ki he kalasí. ChurchofJesusChrist.org

Ko e Maʻu ʻo e ʻIlo Fakalaumālié: Talanoa kia Metisoní

ʻI he taimi ʻoku tau fehangahangai ai mo e ngaahi fehuʻi faingataʻá, ʻe ala tokoni ke fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié.

Mahalo kuo maʻu ʻe ha kau ako ʻe niʻihi ha aʻusia kimuʻa ʻi hono ako e ngaahi tefitoʻi moʻoni ʻo hono maʻu e ʻilo fakalaumālié ʻi he seminelí. Kapau ko ia, kole ki he kau akó pe te nau lava ʻo lau maʻuloto e tefitoʻi moʻoni ʻe tolu ʻo hono maʻu ʻo e ʻilo fakalaumālié. ʻO ka fiemaʻu, fakaafeʻi kinautolu ke lau ʻa e palakalafi 4 ʻo e konga “Ko Hono Maʻu ʻo e ʻIlo Fakalaumālie” ʻo e Fakamatala ki he ʻElito ʻo e Fakataukei Fakatokāteliné (2023). Fakakaukau ke hiki e ngaahi tefitoʻi moʻoni ko ʻení ʻi he palakipoé:

• Ngāue ʻi he tuí.

• Vakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.

• Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Ngāue ʻi he tuí

ʻE fakatefito e aʻusia fakaako ʻo e ʻaho ní ʻi he tefitoʻi moʻoni ʻo e ngāue ʻi he tuí.

Lau ʻa e Tokāteline mo e Ngaahi Fuakava 6:36. Feinga ke ʻiloʻi e founga ʻe lava ke tokoniʻi ai kitautolu ʻe he fakaafe ko ʻeni mei he Fakamoʻuí ke tau ngāue ʻi he tuí.

ʻI hono vahevahe ʻe he kau akó ʻenau ngaahi talí, tokoniʻi kinautolu ke nau ʻiloʻi ʻa e moʻoni ko ʻení: ʻI he taimi ʻoku tau maʻu ai ha ngaahi fehuʻi ʻoku ʻikai hano talí, te tau lava ʻo sio kia Sīsū Kalaisi pea ʻikai veiveiua.

Fakamatalaʻi ange ki he kau akó ʻoku maʻu ʻi he Fakamatala ki he ʻElito ʻo e Fakataukei Fakatokāteliné ha ngaahi sīpinga lahi ʻo e founga ʻe lava ke tau hanga ai kia Sīsū Kalaisí.

Lau ʻa e palakalafi 5–7 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné, ʻo kumi e ngaahi founga te ke lava ai ʻo ngāue ʻi he tuí ʻi he taimi ʻokú ke maʻu ai ha ngaahi fehuʻi fakalaumālié.

• Ko e fē ʻi he ngaahi fakamatala mei he ngaahi palakalafi ko ʻení ʻokú ke ongoʻi ʻe ʻaonga taha ki ha taha ʻokú ne maʻu ha fehuʻi faingataʻa? Ko e hā hono ʻuhingá?

Fakakaukau ke fakaafeʻi e kau akó ke kumi ha ngaahi potufolofola ʻokú ne poupouʻi ʻenau ngaahi talí. Hangē ko ʻení, kapau ʻe lave ʻa e kau akó ki he lotú, te nau lava ʻo vakai ki he 2 Nīfai 32:8–9 pe Sēmisi 1:5–6. Kapau te nau fakamatala ki he ako folofolá, ʻe lava ke nau vakai ki he 2 Nīfai 32:3 pe 2 Tīmote 3:15–17.

Kumi ha ngaahi faingamālie angamaheni ke fakamanatu ai ki he kau akó ʻa e mahuʻinga ʻo hono fai e ngaahi ngāue ko ʻení ʻi he tokanga taha kia Sīsū Kalaisi. Te ke lava ʻo fakaafeʻi e kau akó ke nau fakakaukau ki he founga ʻe lava ke hoko ai e ngaahi tōʻonga ʻoku nau maʻú ko ha sīpinga ʻo e hanga kia Sīsū Kalaisí.

Ngaahi sīpinga ʻo e ngāue ʻi he tuí

Ko e Maʻu ʻo e ʻIlo Fakalaumālié: Talanoa kia Metisoní

Fakakaukau ke fakaafeʻi e kau akó ke fakakaukau mo vahevahe e ngaahi taimi kuo tāpuekina ai kinautolu ʻi heʻenau ngāue ʻi he tuí ʻi he taimi ʻoku nau fehangahangai ai mo e ngaahi fehuʻi faingataʻá. Fakaafeʻi leva e kau akó ke nau fakakaukau ki he meʻa ne nau ako mo ongoʻi he ʻahó ni ʻe lava ʻo tokoni ki honau ngaahi tūkunga mo e fehuʻi fakatāutahá. Fakakaukau ke ʻoange ha taimi ke nau lekooti ai ʻenau ngaahi fakakaukaú mo e ongó ʻi heʻenau tohinoa akó.

Fakaʻosi ʻaki hoʻo fakamoʻoni ki he mahuʻinga ʻo e ngāue ʻi he tuí mo ha tokanga taha kia Sīsū Kalaisi ʻi heʻetau fekumi ki ha tali ki heʻetau ngaahi fehuʻí.

Ngaahi Maʻuʻanga Tokoni Lahi Ange

Te u fakatupulaki fēfē nai ʻeku tui kia Sīsū Kalaisí?

Naʻe akonaki ʻa Palesiteni Lāsolo M. Nalesoni ʻo pehē:

Kuo Toetuʻu ʻa Kalaisi; ʻE Hiki e Ngaahi Moʻungá ʻi he Tui Kiate Iá

Ngāue ʻi he tuí. Ko e hā naʻá ke mei faí kapau naʻá ke maʻu ha tui ʻoku lahi angé? Fakakaukau angé ki aí. Tohi fekauʻaki mo ia. Pea maʻu [leva ha tui] ʻoku lahi angé ʻi hono fai ha meʻa ʻoku fiemaʻu ki ai [ha tui] ʻoku lahi angé. (Russell M. Nelson, “Kuo Toetuʻu ʻa Kalaisi; ʻE Hiki e Ngaahi Moʻungá ʻi he Tui Kiate Iá,” Liahona, Mē 2021, 103)

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

Tukupā Taʻeueʻia kia Sīsū Kalaisi

Ko e founga pē taha ʻoku tupulaki ai e tuí koe ngāue ha taha ʻi he tui. ʻOku faʻa hoko e ngaahi ngāué ni ʻi hano fakahoko ha fakaafe ʻe ha niʻihi kehe, ka he ʻikai ke tau lava ʻo “fakatupulaki” ha tui ʻa ha taha pe fakafalala pē ki he niʻihi kehé ke fakamālohia ʻetau tuí. Ke tupulaki ʻetau tuí, kuo pau ke tau fili ha ngaahi ngāue ʻokú ne langaki e tuí, hangē ko e lotú, ako folofolá, maʻu ʻo e sākalamēnití, tauhi ʻo e ngaahi fekaú, mo hono tokoniʻi ʻo e niʻihi kehé. (Dale G. Renlund, “Tukupā Taʻeueʻia kia Sīsū Kalaisí,” Liahona, Nōvema 2019, 23)

Fēfē kapau ʻoku ʻi ai haʻaku fehuʻi ʻoku hangē ʻoku ʻikai lava ke talí?

Naʻe vahevahe ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni:

Te Mau ʻAlú kia Hai?

Kapau te ke moʻui fuoloa hangē ko aú, te ke ʻilo ʻoku ʻi ai ha founga ʻoku lava pē ke fakaleleiʻi e ngaahi meʻa ʻoku hokó, ʻiate kinautolu pē. ʻE tokoni ha fakakaukau ne tataki fakalaumālie pe ko ha fakahā, ke ne ʻomi ha mahino lahi ange. Manatuʻi ko Hono Fakafoki Mai ʻo e Ongoongoleleí ʻoku ʻikai ko ha meʻa pē naʻe hoko pea ʻosi, ka ʻoku kei hokohoko atu pē.

ʻOua naʻa mou teitei liʻaki e ngaahi moʻoni maʻongoʻonga ne fakahā mai ʻi he Palōfita ko Siosefa Sāmitá. ʻOua naʻa tuku e laukongá, fakalaulaulotó, mo hono fakaʻaongaʻi e tokāteline ʻo Kalaisi ʻoku ʻi he Tohi ʻa Molomoná.

ʻOua naʻa taʻe ʻoange ha taimi feʻunga ki he ʻEikí ʻo feinga mālohi ke mahino e meʻa ne fakahā mai ʻe he ʻEikí. Hangē ko e lau ʻa hoku kaungāmeʻa mamae mo e kaungā ngāue kimuʻa ko ʻEletā Niila A. Mekisuelé, “ʻOku ʻikai totonu ke tau fakaʻapē … ʻo pehē koeʻuhí ʻoku ʻikai ke tau lava ʻo fakamatalaʻi ha meʻa, pea ʻoku ʻikai leva ke lava ia ʻo fakamatalaʻi” [Not My Will, but Thine (1988), 124].

Ko ia, kimuʻa peá ke fai e fili fakamamahi fakalaumālie ko ia ke mavahé, ʻoku ou kole atu ke ke tuʻu hifo ʻo fakakaukau kimuʻa peá ke tukuange e meʻa naʻá ne fuofua ʻoatu kiate koe hoʻo fakamoʻoni ki he Siasi ʻo Sīsū Kalaisi ne toe fakafoki maí. Tuʻu hifo ʻo fakakaukau ki he meʻa ne ke ongoʻí mo e ʻuhinga ne ke ongoʻi ai iá. Fakakaukau ki he ngaahi taimi ne fakamoʻoniʻi atu ai kiate koe ʻe he Laumālie Māʻoniʻoní ha foʻi moʻoni taʻengata. (M. Russell Ballard, “Te Mau ʻAlú kia Hai?,” Liahona, Nōvema 2016, 91)

Ngaahi ʻEkitivitī Fakalahi ki he Akó

Ngaahi tūkunga kehe

ʻE lava ke ke fakaʻaongaʻi ha taha ʻo e ngaahi meʻá ni, ko ha founga ʻe taha ki he tūkunga ʻi he lēsoní:

1. Ngaahi Folofolá: Fakaafeʻi e kau akó ke nau ako ha sīpinga mei he folofolá ʻo ha kakai naʻe ngāue ʻi he tui ʻi he taimi naʻa nau maʻu ai ha ngaahi fehuʻi pe ʻi ha ngaahi tūkunga faingataʻá. ʻE lava ke kau ʻi he ngaahi sīpingá ʻa Siosefa Sāmita (vakai, Siosefa Sāmita—Hisitōlia 1:8–18), Nīfai (vakai, 1 Nīfai 3:31, 4:7), Līhai mo Selaia (vakai, 1 Nīfai 5:1–8), pe Pita mo e Kau ʻAposetoló (vakai, Sione 6:59–69).

2. Hisitōlia ʻo e Siasí: Fakaʻaongaʻi ha sīpinga mei he hisitōlia ʻo e Siasí ʻokú ne fakatātaaʻi e ngaahi tefitoʻi moʻoni ʻo e ngāue ʻi he tuí. ʻE lava ke kau ʻi he fakamatala peheé ʻa e tali ʻa Pilikihami ʻIongi mo hono tokoua ko Siosefá ʻi heʻena fāinga ke mahino kiate kinaua e fakahā ʻa Siosefa Sāmita ʻo e ngaahi nāunau ʻe tolú, ʻa ia ʻoku maʻu he taimí ni ʻi he Tokāteline mo e Ngaahi Fuakava 76. ChurchofJesusChrist.org

3. Tokoni ke ʻilo ʻe he kau akó ʻa e founga te nau lava ai ʻo pikitai ki he ngaahi moʻoni ʻoku nau ʻiló ʻi heʻenau feinga ke mahino ʻa e ngaahi fehuʻi ʻo e ongoongoleleí ʻoku nau maʻú.

   Ngāue ʻi he Tui: Ko e Tangata Tufunga Maká

4. Liahona: Kapau ʻoku maʻu ʻe he kau akó ha ngaahi naunau fakaʻilekitulōnika, fakaafeʻi kinautolu ke nau fili ha makasini Liahona kimuí ni mai pea kumi ʻa e fakamatala ki he “Ngaahi ʻAta ʻo e Tuí.” Fakahinohinoʻi kinautolu ke nau fili ʻa e “Ko e toenga ʻo e talanoá” (fakaʻilekitulōnika pē) ʻi he ngataʻanga ʻo e pēsí pea lau ʻa e talanoá. ʻI he ʻosi ʻa e kau akó, te nau lava ʻo vahevahe ʻa e talanoa naʻa nau maʻú mo ha kaungāʻapi pe ko e kalasí pea feinga ke ʻiloʻi ʻa e faingataʻa naʻe fehangahangai mo e tokotaha fakafoʻituituí pea mo e founga naʻa nau fakaʻaongaʻi ai ʻa e ngaahi tefitoʻi moʻoni ʻo e ngāue ʻi he tuí.