“Lēsoni 167—Ko Hono Sivisiviʻi e Ngaahi Tefito mo e Ngaahi Fehuʻi ʻo e Ongoongoleleí ʻaki ha Fakakaukau ʻOku Taʻengatá,” Tokāteline mo e Ngaahi Fuakavá – Tohi Lēsoni ʻa e Faiako Seminelí, (2025)
“Ko Hono Sivisiviʻi ʻo e Ngaahi Tefito mo e Ngaahi Fehuʻi ʻo e Ongoongoleleí ʻaki ha Fakakaukau ʻOku Taʻengatá,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 167: Fakataukei Fakatokāteliné: Kumi e Tali ki Heʻeku Ngaahi Fehuʻí
Ko Hono Sivisiviʻi e Ngaahi Tefito mo e Ngaahi Fehuʻi ʻo e Ongoongoleleí ʻaki ha Fakakaukau ʻOku Taʻengatá
Ko Hono Maʻu ʻo e ʻIlo Fakalaumālié, Konga 3
Ko e taumuʻa ʻe taha ʻo e fakataukei fakatokāteliné ke tokoniʻi e kau akó ke nau maheni mo e ngaahi tefitoʻi moʻoni ʻo hono maʻu ʻo e ʻilo fakalaumālié koeʻuhí ke nau lava ʻo fakaʻaongaʻi kinautolu ʻi he toenga ʻo ʻenau moʻuí. ʻE lava ke tokoni e lēsoni ko ʻení ki he kau akó ke vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá pea vakai kiate kinautolu ʻo hangē ko ia ʻoku fai ʻe he Fakamoʻuí.
Ngaahi ʻEkitivitī Ako ʻOku Ala Fakahokó
Ko e Mata ʻo e Tuí
Fakaʻaliʻali e fakatātā ʻi laló pea fakaafeʻi e kau akó ke nau fakakaukauloto ki he tūkungá.
Fakakaukauloto ʻokú ke hū atu ki ha musiume ʻo sio ki ha fakaʻaliʻali hangē ko ʻení. Te ke fakamatalaʻi fēfē ʻa e meʻa ʻokú ke sio ki aí?
-
Ko e hā haʻo fakakaukau kapau ʻe tala atu ʻe ha taha ʻokú ne sio ki he fakatātā tatau pē, naʻá ne mamata ki he fōtunga ʻo e mata ʻo e tangatá?
Fakamatalaʻi ange ʻoku fakaʻotu mei he tuliki ʻe tahá ʻa e ngaahi foʻi totí ke fakaʻasi ha ʻīmisi ʻo ha mata ʻo e tangatá. Fakaʻaliʻali e fakatātā ko ʻení. Mahalo te ke fie huluʻi foki ʻa e foʻi vitioó, ʻa ia ʻokú ne fakahaaʻi ʻa e liliu ʻi he anga ʻo e vakaí kae ʻoua kuo ʻasi mai ʻa e matá.
-
Ko e hā te tau lava ʻo ako fekauʻaki mo e anga ʻo ʻetau vakaí mei he ngāue fakaʻaati ko ʻení?
-
Ko e hā ha ngaahi lēsoni fakalaumālie ʻe ala tokoni ʻeni ke mahino kiate kitautolu?
Hili hono vahevahe ʻe he kau akó ʻenau ngaahi fakakaukaú, tokoniʻi kinautolu ke nau ako meia ʻEletā Niila L. ʻEnitaseni o e Kōlomu ʻo e Kau ʻAposetolo ʻe Toko Hongofulu Mā Uá.
Sio ki he fakatātā ko ʻeni ʻa Maikolo Mefí. ʻE faingataʻa ke ke tui ko hano tā fakatātaaʻi ia ʻo e fofonga ʻo e tangatá ʻi heʻene tuʻu ko ʻení. Ka neongo ia, kapau te ke sio ki he ngaahi foʻi totí mei ha tafaʻaki ʻe taha, te ke sio ki he fakaʻofoʻofa e fakakaukau ʻa e tokotaha tā fakatātaá.
ʻOku pehē pē ʻetau vakai atu ki he moʻoni fakalaumālie ʻa e ʻOtuá ʻaki e fofonga ʻo e tuí. (Neil L. Andersen, “Ko e Mata ʻo e Tuí,” Liahona, Mē 2019, 35)
-
ʻOkú ke pehē ʻoku ʻuhinga ki he hā ke mamata ki he ngaahi moʻoni fakalaumālié ʻaki ha “mata ʻo e tuí”?
-
Ko e hā te ne lava ʻo ʻai ke faingataʻa he taimi ʻe niʻihi ke tau sio ki he ngaahi moʻoni fakalaumālié ʻi he foungá ni?
Vakai ʻo hangē ko e ʻafio mai ʻa e ʻEikí
ʻI he taimi ʻoku tau fiemaʻu tokoni ai ke vakai ki he tokāteliné, ngaahi fehuʻí, pe ngaahi palopalema fakasōsialé mei ha fakakaukau ʻo e tuí, te tau lava ʻo fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié:
-
Ngāue ʻi he tuí.
-
Vakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.
-
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.
Te tau nofo taha ʻi he lēsoni ko ʻení, ki hono vakaiʻi ʻo e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.
Fakaafeʻi e kau akó ke fakamatalaʻi ʻenau mahino ki he ʻuhinga ʻo e vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.
Lau ʻa e palakalafi 8–10 ʻi he konga “Ko Hono Maʻu ʻo e ʻIlo Fakalaumālie” ʻi he Fakamatala ki he ʻElito ʻo e Fakataukei Fakatokāteliné (2023) ke sio pe ko e hā te tau lava ʻo fai ke maʻu ha fakakaukau ʻoku taʻengatá.
-
Ko e hā naʻá ke ako mei he ngaahi palakalafi ko ʻení fekauʻaki mo e mahuʻinga ʻo hono tauhi ha fakakaukau ʻoku taʻengatá?
-
Ko e hā te ne lava ʻo tokoniʻi koe ke ke maʻu ha fakakaukau ʻoku taʻengatá?
Fakakaukau ke fakaʻilongaʻi e kupuʻi lea ko ʻení ʻi he palakalafi 8: ʻOku tau fekumi ki he tokoni ʻa e Laumālie Māʻoniʻoní kae lava ke tau vakai ki he ngaahi meʻá ʻo hangē ko e ʻafio ki ai ʻa e ʻEikí.
-
ʻOkú ke pehē ko e hā ha ngaahi lelei ʻo e feinga ke vakai ki heʻetau ngaahi fehuʻi fakalaumālié pe hohaʻá ʻi he founga ʻoku ʻafio mai ai e ʻEikí kiate kinautolú?
Kumi ha potufolofola ʻe ua pe tolu ʻe lava ʻo tokoni atu ke mahino kiate koe ʻa e mahuʻinga ʻo e finangalo ʻa e ʻEikí.
Ko ha ngaahi veesi ʻeni ke fakakaukau ki ai:
Ke tokoni ke fakakaukau e kau akó ki he meʻa ne nau laú, kole ange ke nau fakamatalaʻi fakanounou ʻa e meʻa ne nau ako fekauʻaki mo e ʻOtuá. Te ke lava ʻo fakaafeʻi ha niʻihi ʻo e kau akó ke vahevahe ʻa e meʻa ne nau tohí pe kole ki he kau akó ke nau vahevahe mo hanau hoa.
-
Ko e hā ʻoku akoʻi mai ʻe he ngaahi veesi ko ʻení fekauʻaki mo e ʻOtuá te ne ala fakaʻaiʻai kitautolu ke tau vakai ki he ngaahi meʻá mei Heʻene fakakaukaú?
Ngaahi fakakaukau kehekehe
ʻE lava ke tokoni ʻa e ʻekitivitī ko ʻení ki he kau akó ke nau akoako hono fakafehoanaki ha fakakaukau fakamāmani mo ha fakakaukau ʻoku taʻengatá. Fakakaukau ke fakafeʻiloaki ha tūkunga hangē ko ʻení pea tokoniʻi e kau akó ke nau fakakaukau ki he ongo fakakaukaú fakatouʻosi.
Naʻe toki ʻosi ʻa Laieni kimuí ni mei he ako māʻolungá. Kuó ne kamata teiti mo ha kiʻi taʻahine ʻoku ʻikai ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he fakaʻau ke fakamātoato ange hona vā fetuʻutakí, naʻe fokotuʻu ange ʻe he taʻahiné ʻa e foʻi fakakaukau ʻe lava pē ke na nofo fakataha kae ʻikai ke na mali.
Fakaafeʻi e kalasí ke nau aleaʻi e fehuʻi ko ʻení pea hiki e ngaahi talí ʻi he palakipoé ʻi lalo ʻi ha ʻuluʻi tohi ʻoku ui ko e “Fakakaukau fakamāmaní.” Fakakaukau ke fakamanatu ki he kau akó ʻa e ngāue fakaʻaati naʻe fakaʻaliʻali ʻi he kamataʻanga ʻo e lēsoní. Te ke lava ʻo fakaʻaliʻali e vakai fakatafaʻaki ʻo e ngāue fakaʻaati ʻo e matá lolotonga e fealēleaʻaki ko ʻení.
-
Kapau naʻe maʻu ʻe Laieni ha fakakaukau ʻoku fakangatangata pe fakamāmani, ko e hā ka hoko ai ʻeni ko ha fakakaukau lelei kiate iá?
Kapau ʻoku fiemaʻu tokoni ʻa e kau akó ke maʻu ha ngaahi ʻuhinga, te ke lava ʻo vahevahe ʻa e palakalafi ko ʻení.
Kapau naʻe vakai ʻa Laieni ki he fili ko ʻení ʻi ha fakakaukau fakamāmani, mahalo te ne sio ki ha ngaahi lelei ʻo e nofo mo hono kaumeʻá kae ʻikai ke na mali. Mahalo te ne fakakaukau ʻoku ʻikai fakamoleki ai haʻane paʻanga ʻi ha foʻi mama mamafa mo ha mali. Mahalo te ne fakakaukau ʻe siʻisiʻi ai ʻa e loto-mafasia ʻo ha nofo-mali ʻe fiemaʻu ki ai ʻene tukupā kakató. Kapau ʻe lelei ʻa e meʻa kotoa pē, ʻe kei lava pē ke na mali ʻamui ange.
Ko ʻeni kuo vakai ʻa e kau akó ki he tūkunga ko ʻení mo ha fakakaukau fakamāmani, tokoniʻi kinautolu ke nau maʻu ha fakakaukau ʻoku taʻengatá. Kapau naʻá ke fakaʻaliʻali ʻa e konga fakatafaʻaki ʻo e matá lolotonga e fealeaʻaki fakaʻosí, fakaʻaliʻali he taimí ni ʻa e fakatātā ʻoku ʻasi ai ʻa e matá.
Hiki ʻi he palakipoé ʻa e ʻuluʻi tohi “Fakakaukau ʻoku taʻengatá,” pea fakaafeʻi e kau akó ke hiki e ngaahi tali ki he fehuʻi ko ʻení ʻi lalo he ʻuluʻi tohi ko ʻení. Fakakaukau ke tataki e kau akó ki ha ngaahi maʻuʻanga tokoni hangē ko e “Ko e Fāmilí: Ko ha Fanongonongo ki he Māmaní” pe Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022).
-
Kapau ʻoku maʻu ʻe Laieni ha fakakaukau ʻoku taʻengata, ko e hā ka fili ai ke ʻoua ʻe nofo mo hono kaumeʻá?
Kapau ʻoku fiemaʻu tokoni e kau akó ʻi hono tali e fehuʻí, te ke lava ʻo vahevahe e palakalafi ko ʻení. Ko hono moʻoní, ʻe maʻu ʻe he kau akó ʻenau ngaahi talí ʻi heʻenau kau ʻi he fealēleaʻakí.
Kapau naʻe vakai ʻa Laieni ki he fili ko ʻení ʻaki ha fakakaukau ʻoku taʻengatá, mahalo te ne fakakaukau ki ha niʻihi ʻo e ngaahi meʻa ko ʻení: ʻOku maʻu ʻa e fiefiá mei he muimui kia Sīsū Kalaisí mo hono moʻui ʻaki ʻEne ngaahi akonakí. He ʻikai fiemaʻu ʻe Laieni ke “halaia ki he ʻOtuá” (Sēnesi 39:9) ʻaki hono maumauʻi e fono ʻa e ʻEikí ki he angamaʻá, ʻa ia ʻoku kau ai ʻa e fakaʻehiʻehi mei he feohi fakasekisuale kimuʻa he malí. ʻOku toe akoʻi foki ʻe he ongoongolelei ʻo Sīsū Kalaisí ʻoku maʻu ʻe he fānaú ʻa e totonu ke fanauʻi mai kinautolu ki ha fāmili ʻoku mali mo fetauhiʻaki ai ha tamai mo ha faʻē. ʻOku mahino kia Laieni te ne lava ʻo fai ha ngaahi fuakava mo e ʻOtuá ʻi he temipalé ke lava ʻo taʻengata hono ngaahi vā fetuʻutakí.
ʻE lava ke fakatātaaʻi ʻe he foʻi vitiō nounou ko ʻení ʻa e mahino te tau lava ʻo maʻu ʻi hono fai ha ngaahi fili ʻi he taimi ʻoku tau vakai ai ki he ngaahi fehuʻí mo e ngaahi palopalema fakasōsialé mei ha fakakaukau ʻoku taʻengatá.
Koeʻuhí kuo ngāue ʻeni ʻa e kau akó ʻi ha tūkunga, te ke lava ʻo fakaafeʻi kinautolu ke aleaʻi ha ngaahi tūkunga kehe ʻiate kinautolu pē pe ʻi ha fanga kiʻi kulupu iiki. Te nau lava ʻo vakai ki ha fehuʻi kehe pe palopalema fakasōsiale mei he ngaahi fakakaukau fakamāmaní mo e taʻengatá fakatouʻosi.
Ke tokoni ki he kau akó ke aleaʻi e mahuʻinga ʻo hono fakafehoanaki e ngaahi fakakaukau fakamāmaní mo taʻengatá, ʻe lava ke ke ʻeke ange ha ngaahi fehuʻi hangē ko ʻení:
-
Ko e hā naʻá ke ako ʻi hono fakafehoanaki ha fakakaukau fakamāmani mo ha fakakaukau ʻoku taʻengatá?
-
Ko e hā ha ngaahi lelei ʻe lava ke maʻu mei he vakai ki heʻetau ngaahi filí pe ngaahi fehuʻí mei ha fakakaukau ʻoku taʻengatá?
-
Ko e fē ha taimi kuó ke mamata ai ki he ngaahi tāpuaki ʻo e vakai ki he ngaahi meʻá ʻaki ha fakakaukau ʻoku taʻengatá?
Fakamoʻoni ki he ngaahi moʻoni kuo mou aleaʻi he ʻaho ní. Poupouʻi e kau akó ke hokohoko atu ʻenau fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi heʻenau fekumi ki he ngaahi tali ki heʻenau ngaahi fehuʻí.