Fakataukei Fakatokāteliné: Ko Hono Maʻu ʻa e Ngaahi Tali ki Heʻeku Ngaahi Fehuʻí

Fakataukei Fakatokāteliné: Ko Hono Maʻu ʻa e Ngaahi Tali ki Heʻeku Ngaahi Fehuʻí

Vakai Fakalūkufuá

ʻOku tokoni ʻa e kau ʻi he fakataukei fakatokāteliné ke fakatupulaki ʻe he kau akó honau fakavaʻe fakalaumālié ʻia Sīsū Kalaisi. ʻOku kau ʻi he konga ʻo e fakataukei fakatokāteliné ʻa hono ako mo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié: ngāue ʻi he tuí, vakaiʻi ʻo e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá, mo e fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí. ʻE lava ke tokoni ʻa e ngaahi tefitoʻi moʻoni ko ʻení ke tali ʻe he kau akó ha ngaahi fehuʻi pe hohaʻa ʻi heʻenau moʻuí.

Fokotuʻu ki he vave hono akoʻí: Mahalo ko e lelei tahá ke akoʻi ʻa e ngaahi lēsoni ko ʻení ʻi he kamataʻanga ʻo e taʻu fakaakó. ʻI ha ngaahi feituʻu ʻe niʻihi ʻi he māmaní, ʻoku hoko ʻa e kamataʻanga ʻo e taʻu fakaakó kimui ange ʻi he tohi māhina ʻo e taʻú, hangē ko e faʻahitaʻu fakatōlaú. Kapau ko e meʻa ʻeni ʻoku hoko ʻi homou feituʻú, fakakaukau ke akoʻi ʻa e lēsoni ʻoku ui ko e “Ko Hono Fakamālohia Ho Fakavaʻe Fakalaumālié” ʻi he kamataʻanga ʻo e taʻú. ʻE lava ke tokoni ʻeni ke toe vakaiʻi ʻe he kau akó ʻa e ngaahi fakakaukau mahuʻinga fekauʻaki mo e fakataukei fakatokāteliné ʻi he vaeuaʻanga ʻo ʻenau taʻu fakaakó.

Teuteu ke akoʻí

ʻOku ʻoatu ʻe he fakamatala ko ʻení ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Ko Hono Fakamālohia Ho Fakavaʻe Fakalaumālié

Taumuʻa ʻo e lēsoní: Ke tokoni ke mahino ki he kau akó ʻa e founga ʻe lava ke tāpuekina ai ʻe he fakataukei fakatokāteliné ʻenau moʻuí mo tokoni ke langa honau fakavaʻe fakalaumālié ʻia Sīsū Kalaisi.

• Teuteu ʻa e tokotaha akó: Fakaafeʻi e kau akó ke nau omi mateuteu ke vahevahe ha ngaahi sīpinga ʻo e founga kuo tāpuekina ai ʻe he fakataukei fakatokāteliné ʻenau moʻuí. Kapau ʻoku foʻou ʻa e kau akó ki he fakataukei fakatokāteliné, fakakaukau ke tuku ke nau lau ʻa e “Talateu ki he Fakataukei Fakatokāteliné” ʻi he Fakamatala ki he ʻElito ʻo e Fakataukei Fakatokāteliné (2023).

• Ngaahi ʻīmisí: Ko hono fakaleleiʻi ʻo e Temipale Salt Lake

• Ngaahi vitioó: “President Nelson—Temple Foundation” (2:03); “What Is Doctrinal Mastery?” (3:56)

• Meʻa ke fakaʻaliʻalí: Fakamatala ʻe nima ki hono vakaiʻi pē kitá

Fekumi ki ha Fakahā Fakataautaha ki Heʻeku Ngaahi Fehuʻí

Taumuʻa ʻo e lēsoní: Ke tokoni ke mahino ki he kau akó ʻa e founga te nau lava ai ʻo maʻu ha fakahinohino mo ha fakahā mei he ʻOtuá ʻo fakafou ʻi he Laumālie Māʻoniʻoní.

• Teuteu ʻa e tokotaha akó: Fakaafeʻi ʻa e kau akó ke fakakaukau ki heʻenau ʻilo ki he fakahā fakalaumālié pea ko e hā mo ha toe meʻa te nau fie ʻilo ki ai. Te ke lava foki ʻo fakaafeʻi kinautolu ke kole ki ha mēmipa ʻo e fāmilí pe taki ʻo e toʻu tupú ke vahevahe ha potufolofola pe aʻusia fekauʻaki mo hono maʻu ha fakahā fakataautaha mei he ʻOtuá.

• Vitiō: “Fakahā maʻá e Siasí, Fakahā ki Heʻetau Moʻuí” (20:27; mamata mei he taimi 17:44 ki he 18:53)

Ngāue ʻi he Tuí ke Maʻu e Ngaahi Talí

Taumuʻa ʻo e lēsoní: Ke tokoni ke mahino ki he kau akó ʻa e founga ke ngāue ai ʻi he tui kia Sīsū Kalaisí ʻi heʻenau fekumi ki ha tali ki heʻenau ngaahi fehuʻí.

• Teuteu ʻa e tokotaha akó: Fakaafeʻi ʻa e kau akó ke lau ʻa e Tokāteline mo e Ngaahi Fuakava 6:36 pea ke fakalaulauloto ki hono ʻuhingá. Te nau lava foki ʻo ako maʻuloto ʻa e veesi ko ʻení mo fakakaukau ki he founga ʻe lava ke tokoniʻi ai kinautolu ʻi he taimi ʻoku nau fehangahangai ai mo e ngaahi fehuʻi faingataʻá.

• Vitiō: “Acquiring Spiritual Knowledge: Madison’s Story” (8:35; mamata mei he taimi 0:00 ki he 1:44 mo e 1:44 ki he 8:35)

Ko Hono Sivisiviʻi e Ngaahi Tefito mo e Ngaahi Fehuʻi ʻo e Ongoongoleleí ʻaki ha Fakakaukau ʻOku Taʻengatá

Taumuʻa ʻo e lēsoní: Ke tokoni ki he kau akó ke sivisiviʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá pea vakai kiate kinautolu ʻo hangē ko ia ʻoku fakahoko ʻe Sīsū Kalaisí.

• Teuteu ʻa e tokotaha akó: Fakaafeʻi e kau akó ke lau ʻa e palakalafi 8–10 ʻo e konga “Ko Hono Maʻu ʻo e ʻIlo Fakalaumālié” ‘i he Fakamatala ki he ʻElito ʻo e Fakataukei Fakatokāteliné (2023).

• Ngaahi ʻīmisí: Vakai fakatafaʻaki mo e vakai mei muʻa ʻo e tā valivali ʻo e foʻi mata ʻo e tangatá naʻe tā ʻe Michael Murphy

• Ngaahi vitioó: “Human Eye Artwork” (0:37); “Ko e Mata ʻo e Tuí” (15:15; mamata mei he taimi 4:22 ki he 4:47); “The Family: A Proclamation to the World’ Artwork” (0:22)

Ko e Tafoki ki he Ngaahi Maʻuʻanga Tokoni Kuo Fokotuʻu Fakalangí ke Tokoni ke Maʻu ʻa e Ngaahi Talí

Taumuʻa ʻo e lēsoní: Ke tokoni ke mahino ki he kau akó ʻa e mahuʻinga ʻo e fekumi ki he moʻoní mei he ngaahi maʻuʻanga tokoni kuo foaki mai ʻe he Tamai Hēvaní mo Sīsū Kalaisí.

• Teuteu ʻa e tokotaha akó: Fakaafeʻi e kau akó ke fakakaukau ki he ngaahi maʻuʻanga tokoni kuo nau fekumi mei ai ke maʻu ʻa e ngaahi tali ki he ngaahi fehuʻi fakalaumālié. Poupouʻi kinautolu ke nau omi mateuteu ki he kalasí ke vahevahe ha sīpinga ʻe taha pe lahi ange ʻo ha maʻuʻanga tokoni mo e founga naʻá ne tokoniʻi ai kinautolú.

• Laʻipepa tufá: “Ko Hono Fakapapauʻi ʻo e Moʻoní mei he Halá”