“Lēsoni 163—Ko e Kalaisi Moʻuí, Konga 2: ‘ʻOku Mau Fakahoko Atu Ai ʻEmau Fakamoʻoni ki he Moʻoni ʻo ʻEne Moʻui Taʻemafakatatauá,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Ko e Kalaisi Moʻuí, Konga 2,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 163: Ko e Kalaisi Moʻuí
Ko e Kalaisi Moʻuí, Konga 2
“ʻOku Mau Fakahoko Atu Ai ʻEmau Fakamoʻoni ki he Moʻoni ʻo ʻEne Moʻui Taʻemafakatatauá”
Hangē pē ko e fakamoʻoni ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ki he Kalaisi moʻuí, te tau lava foki mo kitautolu ʻo fakahā ʻoku moʻui ʻa Sīsū Kalaisi! ʻE lava ke tokoni e lēsoni ko ʻení ki he kau akó ke vahevahe mo e niʻihi kehé ʻa ʻenau ngaahi fakakaukau mo e ongo fekauʻaki mo Sīsū Kalaisí.
Ngaahi ʻEkitivitī Ako ʻOku Ala Fakahokó
Ngaahi ʻuhinga ke vahevahé
Ke tokoni ki he kau akó ke nau teuteu ke ako, te ke lava ʻo ʻomi ha meʻa ʻokú ke ʻofa ai mo fie vahevahe mo hoʻo kalasí. ʻE lava pē ko ha laʻitā, aʻusia, pe ko ha meʻakai ʻokú ke manako ai. Fakaafeʻi e kau akó ke fakakaukau ki ha ngaahi meʻa ne nau toki vahevahe kimuí ni pe loto ke vahevahe mo ha taha kehe.
-
Ko e hā naʻá ke loto ke vahevahé?
-
Ko e hā naʻá ke fie vahevahe ai iá?
Hiki ʻi he palakipoé ʻa e ngaahi ʻuhinga naʻe fie vahevahe ai ʻe he kau akó ha meʻá.
-
Ko e fē ʻa e ngaahi ʻuhinga ʻi he lisí ʻe lava ʻo fakaʻaongaʻi ki hono vahevahe ha aʻusia pe fakamoʻoni kia Sīsū Kalaisi ki he niʻihi kehé?
-
Ko e hā te ke lava ʻo tānaki ki ho lisí ko ha ngaahi ʻuhinga pau ke fakamoʻoni ai kia Sīsū Kalaisi?
Fakaafeʻi e kau akó ke fakakaukau ki he ongo ʻoku nau maʻu fekauʻaki mo e talanoa lahi ange mo e niʻihi kehé ʻo kau kia Sīsū Kalaisí pea mo e ʻuhinga ʻoku nau ongoʻi pehē aí.
Teuteu ke fakamoʻoni kia Sīsū Kalaisi
Fakaafeʻi ha tokotaha ako ke ne lau ʻa e fakamatala ko ʻení.
Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku ʻi ai ha tokolahi ʻi he māmaní ʻoku siʻi ʻenau ʻilo kia Sīsū Kalaisí, pea ko e ngaahi feituʻu ʻe niʻihi ʻi māmani ʻa ia kuo talaki ai ʻa Hono huafá ʻo laui senitulí, ʻoku hōloa ai ʻa e tui kia Sīsū Kalaisí. … ʻOku tomuʻa fakahaaʻi ʻe ha fakatotolo [fakaemāmani lahi] ko e ngaahi taʻu lahi ka hoko maí, ʻe laka hake ʻi he liunga uá ʻa e tokolahi te nau mavahe mei he tui faka-Kalisitiané ʻiate kinautolu te nau tali lelei iá. …
… Ka siʻisiʻi ʻa e talanoa ʻa e māmaní fekauʻaki mo Iá, ko hai leva ʻe lahi haʻane talanoa fekauʻaki mo Iá? Ko kitautolu! (Neil L. Andersen, “ʻOku Mau Lea ʻia Kalaisi,” Liahona, Nōvema 2020, 88–89)
-
Ko e hā ha ngaahi fakakaukau pe ongo ʻokú ke maʻu fekauʻaki mo e fakamatala ko ʻeni meia ʻEletā ʻEnitasení?
ʻOku hoko e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko ha faʻifaʻitakiʻanga ʻo e vahevahe fekauʻaki mo Sīsū Kalaisí. Ko e sīpinga ʻe taha ko e fanongonongo “Ko e Kalaisi Moʻuí.” Fakaʻaongaʻi ha ngaahi miniti siʻi ke toe vakaiʻi e fakamatala ko ʻení, ʻo fakalaulauloto ki he ngaahi lelei te tau ala aʻusia koeʻuhí naʻa nau vahevahe ʻenau fakamoʻoni kia Sīsū Kalaisí.
Fakaafeʻi e kau akó ke vahevahe ha faʻahinga lelei ʻoku nau fakakaukau ki ai.
ʻE lava ke kehekehe ʻaupito e ngaahi fakakaukau mo e ongo ʻa e kau akó fekauʻaki mo e talanoa lahi ange kau ki he Fakamoʻuí. ʻE lava ke tokoni hono ʻiloʻi ha tefitoʻi moʻoni mei he ngaahi folofolá, ke mahino kiate kinautolu e founga ʻoku mahuʻinga ai ke fakahoko ʻení. Te ke lava ʻo fakaʻaongaʻi e potufolofola ko ʻení.
Lau ʻa e 2 Nīfai 25:26, ʻo kumi ha toe ʻuhinga kehe ke fakamoʻoni ai kia Sīsū Kalaisi.
-
Ko e hā ha ngaahi moʻoni te tau lava ʻo ako mei he ʻuhinga ʻa Nīfaí?
Ko e taha e ngaahi moʻoni ʻe lava ke ʻilo ʻe he kau akó ʻi heʻetau talanoa mo fiefia ʻia Sīsū Kalaisí, ʻe lava ke ʻiloʻi ʻe he niʻihi kehé te Ne lava ʻo fakahaofi kinautolu mei heʻenau ngaahi angahalá.
-
ʻE lava fēfē ʻe hono ʻiloʻi e meʻa ʻe lava ʻe Sīsū Kalaisi ʻo fakahoko maʻá e niʻihi kehé, ʻo tākiekina hoʻo loto-holi ke fakamoʻoni pe vahevahe ho ngaahi fakakaukau pe ongo fekauʻaki mo Iá?
Toe fakamanatu e ngaahi moʻoni naʻa mou maʻu fekauʻaki mo e Fakamoʻuí ʻi he “Ko e Kalaisi Moʻuí” lolotonga e lēsoni kimuʻá. Te ke lava ʻo fili e meʻa naʻa mou nofotaha ai he lēsoni ko iá pe fili ha meʻa kehe te ke fie vahevahe mo e niʻihi kehé.
Ko e ngaahi sīpinga ʻeni ʻo e ngaahi moʻoni lahi ʻe lava ke ʻiloʻi ʻe he kau akó:
-
Naʻe fakatupu ʻe Sīsū Kalaisi ʻa e māmaní, ʻi he malumalu ʻo e fakahinohino ʻa e Tamaí.
-
Naʻe foaki ʻe Sīsū Kalaisi ʻEne moʻuí ko ha fakalelei ki he ngaahi angahala ʻa e faʻahinga kotoa ʻo e tangatá.
-
Naʻe toetuʻu ʻa Sīsū Kalaisi pea ʻokú Ne moʻui ʻi he ʻahó ni.
-
Ko Sīsū Kalaisi ʻa e maama, mo e moʻui, pea mo e ʻamanaki leleiʻanga ʻo e māmaní.
-
Ko e ʻalunga ʻo Sīsū Kalaisí, ko e hala ia ʻoku fakatau ki he fiefia ʻi he moʻui ko ʻení pea mo e moʻui taʻengata ʻi he maama ka hoko maí.
ʻE lava ʻo fakahoko e ngaahi ʻekitivitī ko ʻení ʻi he toenga ʻo e taimi kalasí pea tokoni ke teuteu e kau akó ke vahevahe. Fili ha ʻekitivitī ʻe taha ʻokú ke ongoʻi ʻe tokoni ki hoʻo kau akó, pe ʻoange e ʻekitivitī takitaha ko ha meʻa ke fili mei ai e kau akó. Ke tokoni ke fili ʻe he kau akó e ʻekitivitī ʻe ʻaonga tahá, te nau lava ʻo fakakaukau ki he tokotaha te nau fie vahevahe mo ia ʻenau fakamoʻoní.
ʻEkitivitī A: Ako maʻuloto
Ko e founga ʻe taha ke teuteu ai ke vahevahe fekauʻaki mo Sīsū Kalaisí ko e maʻuloto ha konga ʻo e “Ko e Kalaisi Moʻuí.”
Fakaʻaongaʻi ha ngaahi miniti siʻi ke ako maʻuloto ai ha konga ʻoku akoʻi ai e moʻoni naʻá ke filí. Te ke lava ʻo tohi ia, toutou lau ia, pe lekooti hoʻo lau iá pea toutou fanongo ki ai. (Te ke lava foki ʻo ako maʻuloto ha ngaahi konga ʻoku toʻo mei he folofolá naʻá ke maʻu ʻi he lēsoni kimuʻá ʻoku fakamoʻoni ki he moʻoni tatau.)
Ke tokoni ke ueʻi e kau akó ke nau ako maʻuloto ha konga ʻo e “Ko e Kalaisi Moʻuí,” te ke lava ʻo huluʻi e “Memorize the Living Christ: Goal Setting Ideas” (2:05).
Tohi leva ʻa e taimi mo e founga te ke ala vahevahe ai mo ha taha kehe ʻa e meʻa naʻá ke ako maʻulotó. Fakakau ʻa e ʻuhinga ʻoku mahuʻingamālie ai kiate koe ʻa e ngaahi kupuʻi lea naʻá ke filí mo e founga ʻokú ke ʻamanaki te nau tokoniʻi ai e niʻihi kehé ke tafoki kia Sīsū Kalaisí.
ʻEkitivitī E: Faʻu ha pousitā, meʻa fakakata (meme), pe ʻīmisi fakaʻilekitulōnika
Ko e founga ʻe taha ke tokoni ke ke vahevahe hoʻo ngaahi fakakaukau mo e ongo fekauʻaki mo Sīsū Kalaisí ko hono faʻu ha pousitā, meʻa fakakata (meme), pe ʻīmisi fakaʻilekitulōnika.
Fakakaukau ke fili ha ngaahi ʻīmisi kehe ʻokú ne fakatātaaʻi e ʻuhinga ʻo e moʻoni naʻá ke filí. Hangē ko ʻení, te ke lava ʻo fili ke vahevahe e moʻoni mo e mahuʻinga ʻo e papitaiso ʻa Sīsū Kalaisí. ʻOku fakatātaaʻi ʻeni ʻi he kupuʻi lea ko ʻeni mei he “Ko e Kalaisi Moʻuí”: “Neongo naʻe ʻikai haʻane angahala, ka naʻe papitaiso Ia ke fakakakato ʻa e māʻoniʻoni kotoa pē.” Mahalo te ke fie fakakau e laine ko ʻení ʻi hoʻo ngāué fakataha mo ha tā ʻokú ke saiʻia ai ʻoku ʻasi ai e papitaiso ʻa e Fakamoʻuí. Te ke lava foki ʻo fakakau ha ngaahi laine mei he folofolá ʻokú ne fakaloloto e mahino ʻokú ke maʻú.
Tānaki leva ki hoʻo fakamatala ʻo e ʻuhinga ʻoku mahuʻinga ai e ʻilo ko ʻení kiate koé.
Kapau ʻe loto e kau akó ke fakahoko ʻeni ʻi heʻenau telefoní, ʻe lava ʻe kinautolu ʻoku nau ʻiloʻi e founga ke fakaʻaongaʻi ai e laipeli mītia ʻa e Siasí, ʻo akoʻi e niʻihi kehé ʻi he founga ke kumi ʻaki e ngaahi ʻīmisí. Kapau ʻoku fie fakahoko ʻe he kau akó ʻenau ngāué ʻi ha laʻipepa, te ke lava ʻo ʻomai e ʻū makasini ʻa e Siasí pea fakaʻatā e kau akó ke nau kosi ʻa e ngaahi ʻīmisí pe ngaahi leá.
ʻEkitivitī F: Teuteuʻi ha lea
Ko e founga ʻe taha ke talanoa ai ki he niʻihi kehé fekauʻaki mo Sīsū Kalaisí ko e fakahoko ha lea.
Fakakaukauloto kuó ke loto-lelei ke lea ʻi he Sāpaté ʻi homou uōtí pe koló. Te ke lava ʻo vahevahe ʻa e meʻa ʻokú ke ako fekauʻaki mo Sīsū Kalaisí mo e ʻuhinga ʻoku mahuʻinga ai kiate koé. Hiki ha ngaahi palakalafi ʻe niʻihi te ke lava ʻo fakaʻaongaʻi ʻi hoʻo leá. Fakapapauʻi ke fakakau ha ngaahi fakamatala mei he “Ko e Kalaisi Moʻuí,” ngaahi potufolofola, pea mo e ʻuhinga ʻoku ʻuhingamālie ai ʻeni kiate koé.
Taimi ke vahevahe
ʻOange ha taimi ki he kau akó ke nau vahevahe ai e meʻa naʻa nau teuteú. Poupouʻi ha kau ako kehekehe ke nau kau ki ai. Fakakaukau ke kiʻi taʻofi ʻi ha ngaahi taimi ke ʻeke e meʻa ʻoku saiʻia pe pehē ʻe he kau akó ʻoku mahuʻinga ʻi he meʻa ʻoku vahevahe ʻe heʻenau kaungāakó. Fakamamafaʻi ange ko e ngaahi fakakaukau ko ʻení ko ha ngaahi tāpuaki ia ʻo e lea mo e fakamoʻoni fekauʻaki mo e Fakamoʻuí.
Poupouʻi e kau akó ke kumi ha ngaahi founga ke vahevahe ai e ngaahi meʻá ni ʻi ha taimi mavahe mei he kalasí. Kapau ʻoku kaunga ki ai, te ke lava ʻo vahevahe e ngaahi tāpuaki kuó ke maʻu mei he talanoa ki he niʻihi kehé ʻo fekauʻaki mo Sīsū Kalaisí. Pe te ke lava ʻo vahevahe ʻa e meʻa kuo fakamoʻoniʻi atu ʻe he niʻihi kehé kiate koé. Fakakaukau ke fakaʻosi e kalasí ʻaki hono fakahoko e fehuʻi ko ʻení ki he kau akó:
-
ʻE fakatupulaki fēfē nai ho vā fetuʻutaki mo Sīsū Kalaisí ʻi hoʻo vahevahe mo e niʻihi kehé ho ngaahi fakakaukau mo e ongo fekauʻaki mo Iá?