Lēsoni 162: Ko e Kalaisi Moʻuí

Ko e Kalaisi Moʻuí, Konga 1

“ʻOku Mau Fakamoʻoni, ʻi Heʻemau Hoko ko ʻEne Kau ʻAposetolo Moʻoni Kuo ʻOsi Fakanofó—Ko Sīsuú ko e Kalaisi Moʻuí Ia”

ʻI he ʻaho 1 ʻo Sānuali 2000, naʻe tuku mai ai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ha fakamatala ʻoku ʻiloa “Ko e Kalaisi Moʻuí: Ko e Fakamoʻoni ʻa e Kau ʻAposetoló.” Naʻe fakamanatu ʻe heʻenau fakamoʻoní ʻa e taʻu ʻe 2,000 hono ʻaloʻi ʻo e Fakamoʻuí. ʻE lava ke tokoni ʻa e lēsoni ko ʻení ke fakaloloto e mahino ʻa e kau akó kia Sīsū Kalaisí.

Ngaahi ʻEkitivitī Ako ʻOku Ala Fakahokó

Ko Sīsū ʻa e Kalaisi moʻuí.

Fakaʻaliʻali ʻa e tā ʻo Sīsū Kalaisi mei he kamataʻanga ʻo e lēsoni ko ʻení pe ko ha laʻitā kehe ʻo e Fakamoʻuí. Fakakaukau ke ʻoange ki ha tokotaha ako ʻi lotomālie ʻi he lokí ha laʻitā ʻo e māmaní. Fakaafeʻi e kalasí ke fakahinohinoʻi e tokotaha ako ko iá ke ʻunu ofi ange pe mamaʻo mei he laʻitā ʻo Sīsū Kalaisí ʻo fakatefito ʻi he ongo ʻokú ne maʻu ki he tuʻunga ʻo e māmaní. Fakaafeʻi ke nau fakamatalaʻi e ʻuhinga ʻoku nau ongoʻi pehē aí.

• Ko e hā ʻoku mahuʻinga ai kapau ʻoku fakaʻau ke ofi ange pe mamaʻo ange ʻa e māmaní mei he ʻEikí?

Tuku ha kiʻi taimi ke ke fakalaulauloto ai ki he ngaahi fehuʻi ko ʻení:

• Ko e hā ʻoku mahuʻinga ai kiate koe kapau ʻokú ke ʻunu ke ofi ange pe mamaʻo ange mei he ʻEikí?

• Ko e hā ha ngaahi founga ʻe lava ai e Fakamoʻuí ʻo tokoniʻi koe ʻi hoʻo moʻuí he taimi ní?

Fakaafeʻi e kau akó ke fakalaulauloto ki he ngaahi fehuʻi ko ʻení ʻi heʻenau ako he ʻaho ní pea fekumi ki ha fakahinohino mei he ʻEikí ke tokoni ke tali kinautolu.

“Ko e Kalaisi Moʻuí”

Tufa ha ngaahi tatau ʻo e “Ko e Kalaisi Moʻuí: Ko e Fakamoʻoni ʻa e Kau ʻAposetoló” (ChurchofJesusChrist.org), pe fakaafeʻi e kau akó ke kumi ia ʻi heʻenau tohinoa akó.

Ke tokoni ke ako lahi ange e kau akó fekauʻaki mo e fakamatala ko ʻení, poupouʻi ke nau tali ha ngaahi fehuʻi hangē ko ʻení: Ko e hā ʻokú ke fakatokangaʻí? Ko e fē taimi naʻe foaki aí? Ko hai naʻe fakamoʻoni hingoa aí? ʻOkú ke ʻiloʻi nai e hingoa ʻo ha taha pē naʻe fakamoʻoni hingoa ai?

Pe, te ke lava ʻo ʻai ke lau ʻe ha tokotaha e palakalafi ko ʻeni ki he puipuituʻá.

ʻI heʻenau hoko ko e kau fakamoʻoni makehe ʻo Kalaisí (vakai, Tokāteline mo e Ngaahi Fuakava 107:23), naʻe tuku mai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ha fanongonongo ʻi he ʻaho 1 ʻo Sānuali 2000. Naʻe fakamanatua ʻe he fanongonongó ni, ʻoku ʻiloa ko e “Ko e Kalaisi Moʻuí: Ko e Fakamoʻoni ʻa e Kau ʻAposetoló,” ʻa e taʻu ʻe 2,000 ʻo e ʻaloʻi ʻa Sīsū Kalaisí.

Lau pe mamata ʻi he fakamatala ko ʻeni ʻa ʻEletā Lōpeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi e ʻuhinga naʻe mahuʻinga ai e fanongonongo ko ʻení:

ʻOku toe vave mo mamaʻo ange e mavahe fakalaumālie ʻa e kakai ʻo e māmaní mei he ʻEikí ʻi ha toe taimi kimuʻa. Kuo fakaʻaongaʻi ʻe he filí hono mālohí mo e ivi tākiekiná ʻi he māmaní. ʻOku tau mamata, fanongo, lau, ako mo vahevahe e ngaahi lea ʻa e kau palōftá ko ha fakatokanga mo ha maluʻanga. Hangē ko ʻení, ne fuoloa hono ʻomi e “Ko e Fāmilí: Ko ha Fanongonongo ki Māmani” kimuʻa pea tau aʻusia e ngaahi faingataʻa ʻoku fehangahangai mo e fāmilí he taimi ní. Naʻe teuteuʻi e “Ko e Kalaisi Moʻuí: Ko e Fakamoʻoni ʻa e Kau ʻAposetoló” kimuʻa ʻi he taimi te tau fiemaʻu lahi taha aí. (Robert D. Hales, “Konifelenisi Lahí: Ko e Fakamālohia ʻo e Tuí mo e Fakamoʻoní,” Liahona, Nōvema 2013, 7)

Fakaafeʻi e kau akó ke vahevahe ʻa e meʻa naʻe makehe kiate kinautolu mei he fakamatalá. ʻEke ange e ʻuhinga ʻoku nau pehē ai ʻe fiemaʻu lahi ai he taimí ni mo e kahaʻú e ngaahi fakamoʻoni ʻa e kau ʻAposetoló ki he Fakamoʻuí ʻo laka ange ia ʻi he taimi ne fakahoko ai e fanongonongó.

Fakamatalaʻi ange ʻe maʻu ʻe he kau akó ha faingamālie ʻi he lēsoni he ʻaho ní ke ʻunu ofi ange ai ki he Fakamoʻuí ʻaki hono fakaloloto e mahino ʻoku nau maʻu kiate Iá ʻo fakafou ʻi he fakamatala fakaepalōfita ko ʻení.

Ako ʻa e “Ko e Kalaisi Moʻuí”

Tokoniʻi e Kau Akó ke nau ʻIlo ʻa Sīsū Kalaisi: ʻOku fakataumuʻa e ʻekitivitī ko ʻení ke tokoni ki he kau akó ke nau ʻiloʻi lelei ange ʻa Kalaisi. Ke ako lahi ange fekauʻaki mo e founga ke fakahoko ai ʻení, vakai ki he ako ko e “Akoʻi fekauʻaki mo e ngaahi huafá, fatongiá, mo e ngaahi ʻulungaanga ʻo Sīsū Kalaisí,” ʻi he Fakatupulaki ʻa e Ngaahi Taukei ʻa e Faiakó: Tokanga Taha kia Sīsū Kalaisi. Fakakaukau ke akoako ʻa e taukei “Faʻu ha ngaahi fehuʻi fekumi ke tokoni ki he kau akó ke nau ʻiloʻi ʻa e ngaahi fatongia, huafa, mo e ngaahi ʻulungaanga ʻo Sīsū Kalaisí.”

Ako e “Ko e Kalaisi Moʻuí: Ko e Fakamoʻoni ʻa e Kau ʻAposetoló,” ʻo kumi e ngaahi moʻoni fekauʻaki mo Sīsū Kalaisí. ʻE lava ke tokoni hono fakamamafaʻi ha taha pe lahi ange ʻi he meʻa ko ʻení:

• Ko e ngaahi huafa kehekehe ʻo Sīsū Kalaisi naʻe fakaʻaongaʻi ʻi he fakamatalá

• Ko e meʻa ʻokú ke ongoʻí ko ha ngaahi kupuʻi lea mahuʻinga ʻi he fakamatalá

• Ngaahi fakamatala ʻoku fakahaaʻi ai e meʻa kuo fai ʻe Sīsū Kalaisi maʻaú

• Ngaahi fatongia mo e ngaahi ʻulungaanga ʻo Sīsū Kalaisí

Fakakaukau ke talanoa fakataautaha mo e kau akó ke fai ha tokoni mo e fakalotolahi lolotonga ʻenau akó.

Kapau ʻe tokoni, ʻe lava e kau akó ʻo muimui ki ai mo fakaʻilongaʻi ʻenau tatau ʻo e “Ko e Kalaisi Moʻuí” lolotonga ʻenau mamata he vitiō ko ʻeni ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻenau lau ha ngaahi konga ne toʻo mei ai. Pe ʻe lava e kau akó ʻo mamata he vitioó hili ʻenau akó ke fakamamafaʻi e meʻa naʻa nau akó pe maʻu ha ngaahi fakakaukau foʻou. ʻOku maʻu e vitiō, “Excerpts from ‘The Living Christ: The Testimony of the Apostles’”(2:45), ʻi he ChurchofJesusChrist.org.

Tuku ha ngaahi miniti siʻi ki he kau akó ke vahevahe e meʻa naʻa nau ʻilo ʻi heʻenau ako e “Ko e Kalaisi Moʻuí.” Poupouʻi e kau akó ke fanongo mo feakoʻaki ʻiate kinautolu. Te nau lava ʻo fakamatalaʻi e ʻuhinga ʻoku nau mahuʻingaʻia ai ʻi ha fakamatala ʻa ha kaungāako pe fai ha fehuʻi ke tokoni ke fakaloloto e mahinó.

ʻOku lahi ha ngaahi moʻoni ʻe lava ke ʻiloʻi ʻe he kau akó. Ko ha ngaahi sīpinga ʻeni ʻe niʻihi:

• Naʻe fakatupu ʻe Sīsū Kalaisi ʻa e māmaní, ʻi he malumalu ʻo e fakahinohino ʻa e Tamaí.

• Naʻe foaki ʻe Sīsū Kalaisi ʻEne moʻuí ko ha fakalelei ki he ngaahi angahala ʻa e faʻahinga kotoa ʻo e tangatá.

• Naʻe toetuʻu ʻa Sīsū Kalaisi pea ʻokú Ne moʻui ʻi he ʻahó ni.

• Ko Sīsū Kalaisi ʻa e maama, mo e moʻui, pea mo e ʻamanaki leleiʻanga ʻo e māmaní.

• Ko e ʻalunga ʻo Sīsū Kalaisí, ko e hala ia ʻoku fakatau ki he fiefia ʻi he moʻui ko ʻení pea mo e moʻui taʻengata ʻi he maama ka hoko maí.

Fili ha taha ʻo e ngaahi moʻoni naʻá ke ʻiloʻi pe ko e niʻihi kehé fekauʻaki mo Sīsū Kalaisí te ke fie ako lahi ange ki aí.

Fakalahi ʻetau mahino ki he ngaahi moʻoní

Te ke lava ʻo lau e fakamatala ko ʻení ke fokotuʻu ange ha founga ʻe taha ke fakaloloto ʻenau mahino ki he ngaahi moʻoni ko ʻení.

Naʻe fakaafeʻi kitautolu ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ke “fakakaukau … ke fekumi ki he folofolá ke fakalahi hoʻo mahino ki he ngaahi moʻoni pau ʻoku maʻu ʻi he ‘Ko e Kalaisi Moʻuí’” (M. Russell Ballard, “Foki ʻo Maʻu,” Liahona, Mē 2017, 65).

Fakaafeʻi e kau akó ke fakaʻaongaʻi ʻenau folofolá ke fakalahi ʻenau mahino ki ha taha ʻo e ngaahi moʻoni fekauʻaki mo Sīsū Kalaisí. Te nau lava ʻo kumi ha ngaahi foʻi lea pe kupuʻi lea mahuʻinga ʻi he Fakahinohino ki he Ngaahi Folofolá. Pe te nau lava ʻo fili ha talanoa ʻo e Fakamoʻuí ʻokú ne fakatātaaʻi e moʻoni naʻa nau filí.

ʻE lava foki e kau akó ʻo fakahoko ʻeni ke fakalahi ʻenau mahinó:

• Fekumi ʻi he himí ʻi he tefitó, ʻo kumi e meʻa ʻoku akoʻi ʻe he ngaahi himí fekauʻaki mo Sīsū Kalaisi mo Hono ngaahi fatongia kehekehé.

• Fakaʻaongaʻi ha tikisinale ke fakamatalaʻi ʻaki e ngaahi foʻi lea faingataʻá.

• Kumi ha ngaahi fakamatala ʻa e kau taki ʻo e Siasí.

Mahalo te ke fie fakaʻaliʻali ʻa e ngaahi fakahinohino ko ʻení ke tataki e kau akó ʻi heʻenau akó.

1. Hiki ha ngaahi potufolofola naʻá ke ako mo ha toe ngaahi fakakaukau ʻokú ne fakalahi hoʻo mahino ki he moʻoni naʻá ke fili fekauʻaki mo Sīsū Kalaisí.

2. Fakalaulauloto ki he ʻuhinga ʻoku mahuʻinga ai ke mahino e moʻoni ko iá fekauʻaki mo Sīsū Kalaisí.

3. Koeʻuhí ʻoku toetuʻu mo moʻui ʻa Sīsū he ʻahó ni, ʻokú Ne kei fakahoko pē ʻa e moʻoni naʻá ke akó. Hiki ʻa e founga ʻokú Ne fakahoko ʻeni ʻi hoʻo moʻuí pe founga ʻe lava ai ke ne fakahoko ha meʻa makehe kiate koé.

ʻE lava e kau akó ʻo tohi e meʻa ʻoku nau maʻú ʻi heʻenau tatau ʻo e “Ko e Kalaisi Moʻuí.”

Fakaafeʻi e kau akó ke vahevahe mo e niʻihi kehé e meʻa kuo nau ako he ʻaho ní. Ko e founga ʻe taha ko ʻenau ʻalu takai ʻi he lokí ke kumi ha taha kuo teʻeki ke nau ngāue fakataha kimuí ni. Te nau lava ʻo vahevahe e meʻa naʻa nau akó mo ʻenau ngaahi fakakaukau ki aí. Te nau lava leva ʻo hiki ki ha tokotaha ako kehe pea toe vahevahe. ʻE lava ke tokoni ʻeni ke nau maheni ai mo ha kau ako tokolahi ange mo fanongo ki ha ngaahi fakakaukau kehekehe.

Fakakaukau ke fakafanongo ki he kau akó ʻi heʻenau vahevahe ʻa e meʻa ne nau maʻú. ʻI hoʻo fakafanongó, mahalo te ke fie kole ange ki ha niʻihi toko siʻi ke nau vahevahe mo e toenga ʻo e kalasí. Te nau maʻu ha faingamālie ke vahevahe lahi ange ʻi he lēsoni hono hokó.

• ʻOkú ke pehē ʻe lava fēfē e ngaahi moʻoni naʻe akoʻi ʻi he “Ko e Kalaisi Moʻuí” ʻo tokoni ke mahino kiate kitautolu pea tau ʻunu ke ofi ange ai kia Sīsū Kalaisí?

• ʻOku tokoniʻi fēfē koe ʻi hoʻo moʻuí ʻi hono maʻu ha mahino lelei ange ki he Fakamoʻuí?

Ngaahi Maʻuʻanga Tokoni Kehé

Ko e hā e ʻuhinga ʻoku tau ako ai kau ki he Fakamoʻuí?

ʻI he hoko ʻa Palesiteni Lāsolo M. Nalesoni ko e taha ʻo e kau fakamoʻoni makehe ko ia ʻe 15 naʻe fakamoʻoni hingoa ʻi he “Ko e Kalaisi Moʻuí,” naʻá ne akoʻi ʻeni:

ʻOku ou tapou atu ʻi homou feinga ke ʻilo lahi ange kia Sīsū Kalaisí, ke mou ako e “Ko e Kalaisi Moʻuí.”

ʻOku tohoakiʻi kitautolu ke tau kau ʻi ha ʻelemēniti ʻe taha ke maʻu Hono mālohí, ʻi he tuku hotau taimí ke ako kau ki he Fakamoʻuí mo ʻEne feilaulau fakaleleí: tau fili ke tui kiate Ia mo muimui ʻiate Ia. (Russell M. Nelson, “Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 40)

Ko e hā e meʻa naʻá ne tataki e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ke nau tuku mai e “Ko e Kalaisi Moʻuí”?

Naʻe akoʻi ʻe Palesiteni Lāsolo M. Nalesoni ʻa e meʻá ni:

Naʻe fakamamafaʻi e mahuʻinga ʻo e misiona ʻa e Fakamoʻuí ʻe he Palōfita ko Siosefa Sāmitá, ʻai a naʻá ne fakamatalaʻi mahino “ko e ngaahi tefitoʻi moʻoni mahuʻinga ʻo ʻetau tui fakalotú ko e fakamoʻoni ʻa e kau ʻAposetoló mo e kau Palōfitá ʻo fekauʻaki mo Sīsū Kalaisí, naʻe pekia, pea telio, pea toe tuʻu ʻi he ʻaho hono tolú, ʻo hāʻele hake ki he langí; pea ko hono toenga ʻo e ngaahi meʻa kehe kotoa pē fekauʻaki mo ʻetau tui fakalotú ko ha ngaahi tānaki atu pē ki ai” [Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 57].

Ko e fakamatala tonu ʻeni ʻa e Palōfitá naʻá ne ʻomi e ʻuhinga ke hanga ai ʻe he kau palōfita, kau tangata kikite, mo e kau tangata maʻu fakahā ʻe toko 15 ʻo tuku mai mo fokotuʻu ʻenau fakamoʻoní ki he fakamanatua e taʻu 2,000 hono ʻaloʻi ʻo e ʻEikí. ʻOku ui e fakamoʻoni fakahisitōlia ko iá “Ko e Kalaisi Moʻuí.” (Russell M. Nelson, “Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 40)

ʻE faitāpuekina fēfē nai au ʻi hono ako ʻo e “Ko e Kalaisi Moʻuí”?

Naʻe vahevahe ʻe Sisitā Sini B. Pingihami, ko e Palesiteni Lahi mālōlō ʻo e Fineʻofá, ʻo pehē:

ʻI heʻeku ako ki he moʻui mo e ngaahi akonaki ʻa Sīsū Kalaisí ʻi he tokanga lahi mo tukupā ange ke ako maʻuloto e “Ko e Kalaisi Moʻuí,” naʻe tupulaki ai ʻeku houngaʻia mo e ʻofa ki hotau Fakamoʻuí. ʻOku ʻi he sētesi takitaha ʻo e tohi fakalaumālie ko iá, ha akonaki pea ʻokú ne fakalahi ʻeku mahino ki Hono ngaahi fatongia fakalangí mo e misiona he māmaní. ʻOku fakapapauʻi ʻi he ngaahi meʻa ne u ako mo ongoʻi ʻi he vahaʻataimi ʻo ʻeku ako mo e fakakaukauloto ki aí, ko Sīsū moʻoni “ʻa e māmá, moʻuí, mo e ʻamanaki leleiʻanga ʻo e māmaní.” (Jean B. Bingham, “Ke Kakato Ai Hoʻomou Fiefiá,” Liahona, Nōvema 2017, 85)

Ngaahi ʻEkitivitī Fakalahi ki he Akó

Founga ako ʻe taha ki he “Ko e Kalaisi Moʻuí”

Ke tokoni ke vakai e kau akó ki he natula taʻengata ʻo Sīsū Kalaisí, fakakaukau ke tā ha kōlomu ʻe tolu ʻi he palakipoé pea fakahingoa ia ko e maama fakalaumālié, moʻui fakamatelié, mo e hili e moʻui fakamatelié. Te ke lava ʻo vahe fakakulupu e kau akó ke tautau toko tolu pe vahe tolu e kalasí, ʻo vahe ki he konga takitaha ha taha ʻo e ngaahi kōlomú. ʻE lava leva e kau akó ʻo ako e “Ko e Kalaisi Moʻuí” ki he ngaahi moʻoni ʻokú ne akoʻi fekauʻaki mo e ngāue ʻa e Fakamoʻuí ʻi he maama fakalaumālié, moʻui fakamatelié, mo e hili e moʻui fakamatelié.

Ko ha vitiō ʻe malava ke mamataʻi

Hili hono ako mo vahevahe ʻe he kau akó e meʻa naʻa nau ako mei he “Ko e Kalaisi Moʻuí,” te ke lava ʻo huluʻi e “Living Apostles Testify of Jesus Christ” (2:16). ʻOku fakaʻaliʻali ʻi he vitiō ko ʻení ha ngaahi fakamoʻoni lahi ange kia Kalaisi mei he kau palōfita moʻuí.

Ko e tā tongitongi ʻo Kalaisí ʻi he Temipale Pālesi Falaniseé

Ke tokoni ke vakai e kau akó ki he mahuʻinga ʻo hono fakatefito ʻetau moʻuí mo e tuí ʻia Sīsū Kalaisí, fakakaukau ke mamata ʻi he “Ko ha Fakamoʻoni Moʻui ʻo e Kalaisi Moʻuí” mei he taimi 0:00 ki he 0:50. ʻI he vitiō ko ʻení, ʻoku vahevahe ʻe Pīsope Sēlati Kōsei, ko e Pīsope Pulé, ʻa e meʻa naʻe hoko ki ha tangata ʻi he taimi ne fokotuʻu ai ha tā tongitongi ʻo Kalaisi ʻi he Temipale Pālesi Falaniseé. ʻE lava ke kumi ʻe he kau akó ʻa e founga naʻe liliu ai e ngaahi ongo ʻa e tangatá ki he Siasí ʻi he mahino lahi ange kiate ia ʻetau nofotaha ʻia Sīsū Kalaisí.

Te mou lava ʻo aleaʻi e founga ʻoku tokoni ai e ngaahi moʻoni ʻi he “Ko e Kalaisi Moʻuí” ke tau fakamatalaʻi ki he niʻihi kehé e meʻa ʻoku tau tui ki ai fekauʻaki mo Sīsū Kalaisí.