“Lēsoni 164—Ko Hono Fakamālohia Ho Fakavaʻe Fakalaumālié,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Fakamālohia Ho Fakavaʻe Fakalaumālié,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 164: Fakataukei Fakatokāteliné: Ko Hono Maʻu ʻa e Ngaahi Tali ki Heʻeku Ngaahi Fehuʻí
Ko Hono Fakamālohia Ho Fakavaʻe Fakalaumālié
Talateu ki he Fakataukei Fakatokāteliné
ʻI heʻetau hoko ko e kau ākonga ʻa Sīsū Kalaisi ʻi he ngaahi ʻaho fakaʻosí, ʻoku tau fehangahangai mo ha ngaahi fakatuʻutāmaki mo e faingataʻa fakalaumālie lahi. Kuo pau ke tau langa ʻetau moʻuí ʻi he fakavaʻe pau pē ʻe taha ko Sīsū Kalaisí, ka tau tuʻu mālohi ʻo fakafepakiʻi ʻa e ngaahi ivi tākiekina ʻo e filí. ʻE tokoni ʻa e lēsoni ko ʻení ke mahino ki he kau akó ʻa e founga ʻe lava ai ʻe he fakataukei fakatokāteliné ʻo tāpuekina ʻenau moʻuí mo tokoniʻi kinautolu ke langa honau fakavaʻe fakalaumālié ʻia Sīsū Kalaisi.
Ngaahi ʻEkitivitī Ako ʻOku Ala Fakahokó
ʻE lava ke fakaʻaongaʻi ʻa e lēsoni ko ʻení ke fakafeʻiloaki ʻa e kau akó ki he ngaahi taumuʻa ʻo e fakataukei fakatokāteliné. ʻE lava foki ke fakaʻaongaʻi ia ke fakamanatu ki he kau ako ʻoku nau maheni mo e fakataukei fakatokāteliné fekauʻaki mo e mahuʻinga ʻo e konga mahuʻinga ko ʻeni ʻo ʻenau aʻusia ʻi he seminelí. Te ke lava ʻo akoʻi ʻa e lēsoni ko ʻení ʻi he kamataʻanga ʻo ha tohi māhina fakataʻu foʻou, ka te ke lava foki ʻo toe vakaiʻi ia kapau ʻokú ke akoʻi ha kulupu foʻou ʻo e kau akó.
ʻE lava ke hoko ʻa e “Ako ki he Fakataukei Fakatokāteliné” maʻá e kau faiakó ko ha maʻuʻanga tokoni ʻaonga ke mahino kiate kinautolu ʻa e founga ke fakahoko ai ʻa e fakataukei fakatokāteliné ʻi hoʻo faiakó. ʻE lava ke maʻu ʻa e ako ko ʻení ʻi he ChurchofJesusChrist.org.
Ko hotau fakavaʻe fakalaumālié
Tokoni ke mahino ki he kau akó ʻa e mahuʻinga ʻo hono langa honau fakavaʻe fakalaumālié ʻia Sīsū Kalaisí. Te ke lava ʻo fai ʻeni ʻaki hano aleaʻi ʻa e fakaleleiʻi ʻo e Temipale Salt Lake, ʻo fakamamafaʻi ʻa e ngāue naʻe fai ke fakamālohia ʻa e fakavaʻe ki he ngaahi mofuiké mo e ngaahi fakatuʻutāmaki kehe ʻe ala hokó. Mahalo te ke fie fakaʻaliʻali ha ngaahi ʻīmisi. Te ke lava foki ʻo huluʻi ʻa e “President Nelson—Temple Foundation” (2:03).
President Nelson - Temple Foundation
-
ʻOkú ke pehē ko e hā naʻe tuku ai ha taimi mo ha maʻuʻanga tokoni lahi ki hono fakaleleiʻi ʻo e Temipale Salt Lake pea mo fakaleleiʻi hono fakavaʻé?
-
Te tau fakafehoanaki fēfē nai ʻa e meʻa naʻe fai ki he temipalé ki heʻetau moʻui fakatāutahá?
Lau ʻa e Hilamani 5:12, ʻo kumi ʻa e ngaahi moʻoni mo e ngaahi tefitoʻi moʻoni ʻe lava ʻo tokoni ke mahino lelei ange kiate koe ʻa e fiemaʻu ke langa ha fakavaʻe fakalaumālie ʻia Sīsū Kalaisí.
-
Ko e hā naʻe tokoni atu ʻa e veesi ko ʻení ke mahino kiate koe fekauʻaki mo e ʻuhinga ʻoku tau fiemaʻu ai ʻa e mālohi ʻoku maʻu meia Sīsū Kalaisí?
-
Ko e hā ha foʻi moʻoni naʻá ke ako mei he veesi ko ʻení fekauʻaki mo e meʻa ʻe lava ke hoko ʻi he taimi ʻoku fakatefito ai ʻetau moʻuí ʻi he Fakamoʻuí?
Te ke lava ʻo kole ki he kau akó ke nau hiki ʻa e meʻa ne nau akó ʻi ha sētesi pē ʻe taha ʻi he palakipoé. Te ke lava leva ʻo ʻoange ha faingamālie ke nau fakamatalaʻi ai ʻenau ngaahi talí. Mahalo te nau pehē kapau te tau langa hotau fakavaʻe fakalaumālié ʻia Sīsū Kalaisi, he ʻikai ke tau lava ʻo hinga.
-
ʻOkú ke pehē ʻoku ʻuhinga ki he hā ke langa hotau fakavaʻe fakalaumālié ʻia Sīsū Kalaisí?
ʻE lava ke vahevahe ʻe he kau akó ha ngaahi fakakaukau hangē ko hono fakatefito ʻetau moʻuí ʻia Sīsū Kalaisi mo ʻEne ngaahi akonakí, muimui ki Heʻene sīpingá, mo e fakatomala maʻu peé.
Naʻe fakamatalaʻi ʻe Palesiteni Lāsolo M. Nalesoni ʻa e ngaahi ʻuhinga ʻoku fiemaʻu ai ke langa hotau fakavaʻé ʻia Sīsū Kalaisí:
Kuo taimi ke tau takitaha fakahoko ha ngaahi ngāue lalahi ʻi he taimí ni—mahalo ko ha ngaahi ngāue kuo teʻeki ke tau fakahoko kimuʻa—ke fakamālohia hotau ngaahi fakavaʻe fakalaumālie fakafoʻituituí . ʻOku fiemaʻu ʻi he ngaahi taimi makehé ha ngaahi ngāue makehe.
Siʻoku kāinga ʻofeina, ko e ngaahi ʻaho fakaʻosí ʻeni . Kapau ʻe fiemaʻu ke ta matuʻuaki ʻa e ngaahi faingataʻa mo e haʻahaʻa ʻe hokó, ʻoku mahuʻinga ke tau takitaha maʻu ha fakavaʻe fakalaumālie mālohi kuo langa ʻi he maka ʻo hotau Huhuʻi, ko Sīsū Kalaisí. …
Kuo ʻosi folofola ʻa e ʻEikí neongo ʻa e ngaahi faingataʻa makehe ʻo e ʻaho ní, ka ko kinautolu ʻe langa honau fakavaʻé ʻia Sīsū Kalaisí, mo ʻosi ako ki he founga hono fakaʻaongaʻi Hono mālohí, ʻoku ʻikai fiemaʻu ke nau moʻulaloa ki he ʻū meʻa fakahohaʻa makehe ʻo e kuonga ko ʻení. (Russell M. Nelson, “Ko e Temipalé mo Ho Fakavaʻe Fakalaumālié,” Liahona, Nōvema 2021, 93)
-
Ko e hā ʻa e meʻa ʻoku tokoni atu ai ʻa e fakamatala ko ʻení ke mahino kiate koe fekauʻaki mo hoʻo fiemaʻu ha fakavaʻe fakalaumālie ʻoku mālohí?
Fakakaukau ke fakaafeʻi ʻa e kau akó ke fakakaukau ki he meʻa ʻoku nau aʻusia ʻi he moʻuí ʻoku tokoni ke nau fakatokangaʻi ai ʻa e fiemaʻu ke langa honau fakavaʻé ʻi he Fakamoʻuí. Fakaafeʻi leva kinautolu ke vakavakaiʻi ʻa e mālohi ʻo honau fakavaʻe fakalaumālié. Ko e founga ʻe taha ke fai ai ʻení ko hono fakaʻaliʻali ʻa e vakaiʻi fakaekita ko ʻení, ʻa ia ʻoku fekauʻaki mo e ngaahi ola kehekehe ʻo e fakataukei fakatokāteliné ʻa ia ʻe ako ʻe he kau akó ʻi he lēsoni ko ʻení. ʻE lava ke vakaiʻi fakalongolongo pē ʻe he kau akó kinautolu pe hiki ʻenau ngaahi talí ʻi heʻenau tohinoa akó.
ʻI he ngaahi fakamatala takitaha ko ʻení, fakafuofuaʻi koe ʻi ha meʻafua ʻo e 1 (taʻefiemālie ʻaupito) ki he 5 (tui mālohi ki ai).
-
ʻOku ou fakafalala kia Sīsū Kalaisi mo ʻEne ngaahi akonakí ʻi he taimi ʻoku ʻahiʻahiʻi pe tākiekina ai au ʻe he filí.
-
ʻOku ou ʻilo ʻa e founga ke maʻu ai ʻa e ngaahi tali ki heʻeku ngaahi fehuʻi fakatokāteline, fakataautaha, fakasōsiale, pe fakahisitōliá.
-
Te u lava ʻo fakamatalaʻi ʻa e tokāteline ʻa Sīsū Kalaisí ki he niʻihi kehé.
-
Te u lava ʻo maʻu ha ngaahi potufolofola mahuʻinga ʻoku ʻi ai ʻa e tokāteline ʻa Kalaisí.
-
ʻOku ou fakafalala ki he sīpinga mo e ngaahi akonaki ʻa Sīsū Kalaisí ke tokoniʻi au ke fai ʻeku ngaahi fili fakaʻahó.
Fakataukei fakatokāteliné
Fakamatalaʻi ange ko e taha ʻo e ngaahi founga ʻe lava ke langa ai ʻe he kau akó honau fakavaʻé ʻia Sīsū Kalaisi ʻo fakafou ʻi heʻenau aʻusia ʻi he seminelí ʻoku fakafou ia ʻi he fakataukei fakatokāteliné. Kapau ʻoku ʻi ai haʻo kau ako kuo nau kau atu kimuʻa ki he seminelí, fakakaukau ke kole ange ke nau fakamatalaʻi ʻa e meʻa ʻoku nau ʻilo fekauʻaki mo e fakataukei fakatokāteliné. Te ke lava foki ʻo fakafeʻiloaki ʻa e kau akó ki he fakataukei fakatokāteliné ʻaki hono huluʻi ʻa e vitiō “What Is Doctrinal Mastery?” (3:56), ʻoku maʻu ʻi he ChurchofJesusChrist.org.
Ko e hā ʻa e Fakataukei Fakatokāteline?
Lau ʻa e konga “Talateu ki he Fakataukei Fakatokāteliné” ʻi he Fakamatala ki he ʻElito ʻo e Fakataukei Fakatokāteliné (2023). Fakakaukau ki he founga ʻe lava ke tokoniʻi ai koe ʻe he kau ʻi he fakataukei fakatokāteliné ke langa ha fakavaʻe mālohi ʻia Sīsū Kalaisí.
Te ke lava ʻo kole ki he kau akó ke nau lau fakataha ʻi ha fanga kiʻi kulupu iiki. ʻE lava ke tokangaʻi ʻe ha tokotaha ako ʻe taha hono vahe ki he kau ako ʻi he kulupú ke nau lau ha ngaahi palakalafi kehekehé, ʻe lava ke vahe ki ha tokotaha kehe ke ne lisi ʻa e ngaahi meʻa mahuʻinga naʻe maʻú, pea ʻe lava ke lipooti ʻe ha tokotaha kehe ʻa e ngaahi meʻa naʻe maʻu ʻe he kulupú ki he kalasí.
-
Ko e hā ʻa e ongo ola lalahi ʻe ua ʻo e fakataukei fakatokāteliné?
Fakapapauʻi ʻoku mahino ki he kau akó ko e ngaahi ola ko ʻení ko hono (1) ako mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié, pea (2) taukei ʻi he ngaahi potufolofola fakataukei fakatokāteliné mo e tokāteline ʻo e ongoongolelei ʻo Sīsū Kalaisí ʻa ia ʻoku nau akoʻí.
Mahalo ʻe tokoni ke fakamatalaʻi ange ʻe kau ʻa e kau akó ʻi he ngaahi lēsoni ʻi he taʻú kakato ʻa ia ʻe nofotaha ʻi he ongo ola ko ʻení. Te nau maʻu ha ngaahi faingamālie ke fakamatalaʻi ʻa e tokāteliné ʻi he lea pē ʻanautolu, ako maʻuloto ʻa e ngaahi kupuʻi lea mahuʻinga ʻo e ngaahi potufolofola mahuʻinga ʻo e ngaahi potufolofola fakataukei fakatokāteliné, pea fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ke fakaʻaongaʻi ʻa e tokāteliné ki he ngaahi tūkunga moʻoni ʻo e moʻuí.
-
ʻOkú ke pehē ʻe tokoniʻi fēfē koe ʻe he fakataukei tokāteliné ke langa ho fakavaʻé ʻia Sīsū Kalaisi?
-
ʻE maluʻi fēfē koe ʻe he kau ʻi he fakataukei fakatokāteliné mei he ngaahi faingataʻa ʻi he kahaʻú mo e ngaahi ʻohofi ʻa e filí?
Tokoni ke mahino ki he kau akó ʻe lava ke tokoniʻi kinautolu ʻe he feinga ke kau mālohi ʻi he fakataukei fakatokāteliné ke nau tafoki kia Sīsū Kalaisi ʻi he loto-falala lahi ange. Fakakaukau ke kole ki he kau ako ne nau kau kimuʻa ʻi he fakataukei fakatokāteliné ke vahevahe ʻa e founga kuó ne tāpuekina ai ʻenau moʻuí. Fakamoʻoni ange ʻi heʻenau falala kia Sīsū Kalaisí, te nau lava ʻo matuʻuaki ʻa e ngaahi faingataʻa ʻoku nau fehangahangai mo ia ʻi he ʻaho ní pea teuteu ki he ngaahi faingataʻa ʻe hoko mai ʻi he kahaʻú.