“Lēsoni 165—Fekumi ki ha Fakahā Fakataautaha ki Heʻeku Ngaahi Fehuʻí,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Fekumi ki ha Fakahā Fakataautaha ki Heʻeku Ngaahi Fehuʻí,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 165: Fakataukei Fakatokāteliné: Kumi e Tali ki Heʻeku Ngaahi Fehuʻí
Fekumi ki ha Fakahā Fakataautaha ki Heʻeku Ngaahi Fehuʻí
Ko Hono Maʻu ʻo e ʻIlo Fakalaumālié, Konga 1
ʻOku ʻofa ʻa e Tamai Hēvaní ʻi Heʻene fānaú pea ʻokú Ne finangalo ke tau hoko ʻo hangē ko Iá. ʻI heʻetau fekumi ke ako fekauʻaki mo Iá, kuo talaʻofa mai ʻe he Tamai Hēvaní ke fakahā ʻa e moʻoní ki hotau ʻatamaí mo e lotó ʻo fakafou ʻi he Laumālie Māʻoniʻoní (vakai, Tokāteline mo e Ngaahi Fuakava 8:2; Molonai 10:5). ʻE lava ke tokoni ʻa e lēsoni ko ʻení ke mahino ki he kau akó ʻa e founga te nau lava ai ʻo maʻu ha fakahinohino mo ha fakahā mei he ʻOtuá ʻo fakafou ʻi he Laumālie Māʻoniʻoní.
Ngaahi ʻEkitivitī Ako ʻOku Ala Fakahokó
Moʻui fakalaumālié
Fakakaukau ke kamata e lēsoní ʻaki hano tā ha fakatātā faingofua ʻi he palakipoé ʻokú ne fakafofongaʻi ha taha taʻu hongofulu tupu. ʻE lava foki ke hiki tatau ʻe he kau akó ʻa e fakatātā ko ʻení ʻi heʻenau tohinoa akó. Mahalo ʻe fiefia e kau akó ke ʻai ha hingoa ʻo e fakatātaá, pea pehē ki ha ngaahi tefitoʻi ʻulungaanga, hangē ko e taʻu motuʻá, ngaahi manakó, mo e meʻatokoni ʻoku saiʻia taha aí.
ʻI hono tali ʻe he kau akó ʻa e ʻuluaki ʻo e ngaahi fehuʻi ko ʻení, hiki ʻenau ngaahi talí ʻi he tafaʻaki ʻo e fakatātā ʻi he palakipoé.
-
Ko e hā te ne lava ʻo fakafaingataʻaʻiaʻi e toʻu tupú ʻi heʻenau moʻui fakalaumālie ʻi he māmani ʻo e ʻaho ní?
-
Ko e hā ʻe lava ʻo tokoni ke tau ikunaʻi ʻa e ngaahi faingataʻa pe ivi tākiekina ko ʻení?
Naʻe vahevahe ʻe Palesteni Lāsolo M. Nalesoni ha founga ʻe taha te tau lava ai ʻo hao fakalaumālie mei he ngaahi faingataʻa mo e ngaahi ivi tākiekina ʻoku tau fehangahangai mo iá:
ʻOku hoko hono maʻu maʻu pē ʻa e mītia fakasōsialé mo e ongoongo houa ʻe 24 ke taulōfuʻu mai ai kiate kitautolu ha ngaahi pōpoaki taʻeʻofa. Kapau ʻoku tau fakaʻamu ke lava ʻo sivisiviʻi e ngaahi leʻo kehekehé mo e fakakaukau ʻa e tangatá ʻokú ne ʻohofi e moʻoní, kuo pau ke tau ako ke maʻu e fakahaá. …
… ʻI he ngaahi ʻaho ka hokó, he ʻikai lava ke tau moʻui fakalaumālie taʻe kau ai ʻa e tataki, fakahinohino mo e ivi fakafiemālie, mo tatau maʻu pē ʻo e Laumālie Māʻoniʻoní.
ʻE hoku kāinga ʻofeina, ʻoku ou kole atu kiate kimoutolu ke fakatupulaki hoʻomou malava fakalaumālie ke maʻu ʻa e fakahaá. (Russell M. Nelson, “Fakahā maʻá e Siasí, Fakahā ki Heʻetau Moʻuí,” Liahona, Mē 2018, 96)
-
Ko e hā ha ngaahi foʻi lea pe kupuʻi lea mei he fakamatalá ni naʻe mātuʻaki mahuʻingamālie kiate koe? Ko e hā hono ʻuhingá?
-
ʻOkú ke pehē ko e hā ʻoku mahuʻinga ai ke tau maʻu fakahā mei he Laumālie Māʻoniʻoní ke moʻui fakalaumālie ʻi he māmani ko ʻení?
Fakaafeʻi e kau akó ke nau fakalaulauloto ki heʻenau fiemaʻu ʻa e fakahaá. Te ke lava ʻo fakaafeʻi kinautolu ke lekooti ʻi heʻenau tohinoá ha ngaahi fehuʻi ʻoku nau maʻu pe ʻuhinga ʻoku nau fiemaʻu ai ha fakahā ʻi he taimí ni ʻi heʻenau moʻuí. Pe te ke lava ʻo ʻai ke vahevahe ʻe he kau akó ha niʻihi ʻo ʻenau ngaahi fehuʻí pe ngaahi faingataʻa ne nau fehangahangai mo ia ʻi heʻenau fekumi ki ha fakahā ʻi he kuohilí.
Poupouʻi kinautolu ʻi heʻenau ako ʻi he ʻaho ní ke kumi ha ngaahi akonaki mo ha ngaahi fakaafe ʻe lava ʻo tokoni kiate kinautolu ke nau teuteu ke maʻu ha fakahā mei he ʻOtuá ki heʻenau moʻuí.
Ko hono maʻu ha fakahinohino mo ha fakahā mei he ʻOtuá
Lau ʻa e Mōsaia 4:9 mo e Tokāteline mo e Ngaahi Fuakava 38:1–3, ʻo kumi e ngaahi ʻulungaanga fekauʻaki mo e ʻOtuá, ʻa ia ʻe lava ʻo tokoni ke tau maʻu ha holi ki Heʻene fakahinohinó.
-
Ko e hā ʻoku akoʻi atu ʻe he ngaahi potufolofola ko ʻení fekauʻaki mo e ʻOtuá?
ʻOange ki ha kau ako ha faingamālie ke tali ʻa e fehuʻi kimuʻá. ʻE lava ke kau ʻi he ngaahi tali lahi ʻe lava ke ʻomi ʻe he kau akó, ha moʻoni hangē ko ʻení: ʻOku maʻu ʻe he ʻOtuá ʻa e poto kotoa pē pea ʻokú Ne ʻafioʻi ʻa e meʻa kotoa pē.
-
ʻE liliu fēfē ʻe hoʻo ʻiloʻi e ngaahi ʻulungaanga ko ʻeni ʻo e ʻOtuá hoʻo holi ke Ne tataki mo akoʻi koé?
Hiki ʻa e ʻuluʻi tohi ko ʻení ʻi he palakipoé: Te u lava fēfē nai ʻo maʻu ha ngaahi tali mei he ʻOtuá?
Ako ʻa e palakalafi 1–3 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023). Laineʻi ʻa e ngaahi foʻi lea pe kupuʻi lea ʻoku nau fakamatalaʻi ʻa e meʻa te ke lava ʻo fai ke maʻu ai e ngaahi tali mei he ʻOtuá ki heʻetau ngaahi fehuʻi fakalaumālié.
Makehe mei he ako mei he Fakamatala ki he ʻElito ʻo e Fakataukei Fakatokāteliné, te ke lava foki ʻo fakaafeʻi e kau akó ke nau fekumi ʻi he folofolá ki ha ngaahi akonaki ʻokú ne fakamatalaʻi ʻa e meʻa te tau lava ʻo fai ke maʻu ai ha ngaahi tali mei he ʻOtuá. ʻOku kau ʻi he sīpinga ʻo e ngaahi folofola ʻe lava ke ke fakaafeʻi e kau akó ke nau akó ʻa e 2 Nīfai 32:3–5; Molonai 10:4–5; Tokāteline mo e Ngaahi Fuakava 9:7–9; 42:61.
-
Ko e hā naʻá ke ako fekauʻaki mo e meʻa te tau lava ʻo fai ke fakatupulaki ai ʻetau malava ke maʻu ha tali ki heʻetau ngaahi fehuʻi mei he ʻOtuá?
Te ke lava ʻo fakaafeʻi e kau akó ke nau hiki ʻi he palakipoé ʻa e meʻa ne nau maʻú.
ʻE lava ke ʻoua te ke ʻeke ʻa e ngaahi fehuʻi ko ʻení, ka ke kole ki ha kau ako kehekehe ke nau fili ha taha ʻo e ngaahi foʻi lea pe kupuʻi lea ʻi he palakipoé ʻoku ngali mahuʻinga makehe kiate kinautolú. Te nau lava leva ʻo fakamatalaʻi ʻa e ʻuhinga ʻoku nau ongoʻi ai ko e foʻi lea pe kupuʻi lea ko iá ko ha founga mahuʻinga ia ke tau teuteu ai ke maʻu ha ngaaahi tali ki heʻetau ngaahi fehuʻí.
-
ʻOkú ke pehē ko e hā ʻoku hoko ai e ngaahi ngāue ko ʻení ko ha ngaahi founga mahuʻinga ke teuteuʻi ai kitautolu ke maʻu ha fakahā ʻo fakafou ʻi he Laumālie Māʻoniʻoní?
-
Ko e hā ha ngaahi aʻusia kuó ke maʻu ʻi hono maʻu ʻo e fakahā fakatāutahá? Ko e hā ha ngaahi ngāue naʻe tokoni ke teuteuʻi koe ke ke maʻu ia?
Tokoni ke mahino ki he kau akó ʻoku ʻikai totonu ke nau vahevahe ha meʻa ʻoku fuʻu fakafoʻituitui pe toputapu. Te ke lava foki ʻo fakakaukau ke vahevahe ha meʻa naʻá ke aʻusia tonu ʻi hoʻo moʻuí.
Ko hono fakaʻaongaʻi ia ki hoʻo moʻuí
Fakaafeʻi e kau akó ke nau fakakaukau ki he meʻa kuo nau ako ʻi he ʻahó ni ʻa ia ʻe lava ʻo tokoni kiate kinautolu ʻi he ngaahi fehuʻi ʻoku nau maʻú. Hili iá pea vahevahe ʻa e meʻa ko ʻení ke tokoni ki he kau akó ke nau fakaʻaongaʻi ʻa e ngaahi akonaki kuo nau ako ʻi he ʻaho ní.
Manatuʻi e faleʻi meia Palesiteni Nalesoni naʻá ke ako ʻi he kamataʻanga ʻo e lēsoní: “ʻOku ou kole atu kiate kimoutolu ke fakatupulaki hoʻomou malava fakalaumālie ke maʻu ʻa e fakahaá” (“Fakahā maʻá e Siasí, Fakahā ki Heʻetau Moʻuí,” 96).
Fakakaukau ki he meʻa kuó ke ako mo ongoʻi ʻi he ʻaho ní ʻa ia ʻe lava ʻo tokoni atu ke ke muimui ʻi he faleʻi ko ʻení. Tohi ʻi hoʻo tohinoa akó fekauʻaki mo e meʻa te ke fakahoko ke fakatupulaki ai hoʻo malava ke maʻu ha fakahā fakataautaha ʻo fakafou ʻi he Laumālie Māʻoniʻoní.
ʻI he ʻosi e tohi ʻa e kau akó ʻi heʻenau tohinoa akó, fakakaukau ke kole ki ha niʻihi ʻe loto fiemālie ke vahevahe ʻenau ngaahi palaní mo e kalasí.
Kapau ʻoku ʻi ai ha taimi feʻunga, mahalo te ke fie ʻai ke ʻilo ʻe he kau akó, te nau ako ʻi he ngaahi lēsoni ʻi he kahaʻú fekauʻaki mo e ngaahi tefitoʻi moʻoni ʻe tolu ki hono maʻu ʻo e ʻilo fakalaumālié, ʻa ia ʻe tokoni foki ke nau maʻu ai ha ngaahi tali ki heʻenau ngaahi fehuʻí. Mahalo kuó ke ʻosi maʻu ha kau ako ʻe niʻihi ʻoku nau ʻiloʻi ʻa e ngaahi tefitoʻi moʻoni ʻe tolu ki hono maʻu ʻo e ʻilo fakalaumālié. Fakakaukau ke kole ange ke nau vahevahe ʻo kapau ʻoku nau ʻiloʻi, pe tuku ke kumi kinautolu ʻe he kau akó ʻi he Fakamatala ki he ʻElito ʻo e Fakataukei Fakatokāteliné. Fakapapauʻi ange te nau maʻu ha ngaahi faingamālie ʻi he seminelí ke fakatupulaki ʻenau malava ke maʻu fakahaá.