“Lēsoni 10—Siosefa Sāmita—Hisitōlia 1:27–65—Naʻe Hā ʻa Molonai kia Siosefa Sāmita,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Siosefa Sāmita—Hisitōlia 1:27–65,” Tokāteline mo e Ngaahi Fuakavá – Seminelí
Lēsoni 10: Tokāteline mo e Ngaahi Fuakava 2; Siosefa Sāmita—Hisitōlia 1:27-65
Siosefa Sāmita—Hisitōlia 1:27–50
Naʻe Hā ʻa Molonai kia Siosefa Sāmita
ʻI he ʻaho 21 ʻo Sepitema 1823, naʻe lotua ʻe Siosefa Sāmita ki he ʻOtuá ha fakamolemole ʻo ʻene ngaahi angahalá pea ke ne ʻiloʻi ʻa hono tuʻunga ʻi he ʻao ʻo e ʻOtuá. Ko e talí, naʻe hā ʻa e palōfita ko Molonaí kia Siosefa Sāmita ke akoʻi ia fekauʻaki mo e Tohi ʻa Molomoná mo e ngaahi kikite ʻo e kuonga muʻá fekauʻaki mo hono Fakafoki Mai ʻo e ongoongoleleí. Naʻe kikite foki ʻa Molonai fekauʻaki mo e kahaʻu ʻo Siosefá. ʻE lava ke tokoni e lēsoni ko ʻení ke ongoʻi ʻe he kau akó ʻa e mahuʻinga ʻo e uiuiʻi ʻo Siosefa Sāmita ko ha palōfita ʻa e ʻOtuá.
Ngaahi ʻEkitivitī Ako ʻOku Ala Fakahokó
fakamatalaʻi ʻe Siosefa Sāmita ʻene kei talavoú
Ke teuteuʻi e kau akó ke ako fekauʻaki mo e ngaahi aʻusia ʻa Siosefa Sāmita ʻi heʻene kei talavoú, fakakaukau ke fakaafeʻi kinautolu ke vahevahe ha ngaahi lea ʻoku nau fakamatalaʻi e toʻu tupú. Ko ha meʻa ʻe taha ke fili mei ai ko hono fakaʻaliʻali ha ngaahi foʻi lea mo ha ngaahi kupuʻi lea ʻi he palakipoé ʻokú ne fakamatalaʻi ʻa Siosefa Sāmita ʻi heʻene kei talavoú. Hangē ko ʻení, “Naʻá ku faʻa ongoʻi halaia koeʻuhí ko hoku vaivaí mo e tōnounoú.” ʻE lava ke fakaʻilongaʻi ʻe he kau akó ʻa e ngaahi meʻa ʻoku nau fakafelāveʻi mo iá.
Mahalo te ke fie poupouʻi e kau akó ke kumi ʻa e ʻuhinga ʻo e ngaahi foʻi lea ʻi he potufolofola ko ʻení ʻoku ʻikai mahino kiate kinautolú. ʻOku maʻu e feature ko ʻení ʻi he Gospel Library app. Fakaʻilongaʻi ha foʻi lea pea fili ʻa e konga ki he “fakaʻuhingaʻí.”
Lau ʻa e Siosefa Sāmita—Hisitōlia 1:27–29, ʻo kumi e founga naʻe fakamatalaʻi ai ʻe Siosefa Sāmita ʻene ngaahi ongó ʻi he taʻu ʻe tolu hili ʻa e ʻUluaki Mata Meʻa-Hā-Maí.
-
ʻE fakafekauʻaki fēfē nai ʻa e toʻu tupu ʻi hotau kuongá kia Siosefa Sāmita?
Naʻe ʻi ai ha ngāue ʻa e ʻOtuá maʻa Siosefa Sāmita
Ko e ngaahi veesi folofola hokó ko ha konga lahi ange ia ke lau. Fakakaukau ki he ngaahi fiemaʻu mo e ngaahi meʻa ʻoku malava ʻe hoʻo kau akó ʻi he taimi ʻokú ke fili ai ha founga laukongá. Te mou lava ʻo lau ko ha kalasi (ʻo fetongitongi e kau akó), ʻai ke laukonga tautau toko ua e kau akó, pe tā e ongó pea fakaafeʻi e kau akó ke nau muimui ki ai ʻi heʻenau folofolá.
Hili ʻa e fehuʻi ʻuluakí, mahalo te ke fie kiʻi taʻofi pea aleaʻi e meʻa ne maʻu ʻe he kau akó ʻe lava ʻo tokoni kiate kinautolu ʻi heʻenau ngaahi aʻusia ʻi heʻenau kei toʻu tupú.
Lau ʻa e Siosefa Sāmita—Hisitōlia 1:30–35 pea kumi e meʻa naʻe aʻusia ʻe Siosefa Sāmita ʻi heʻene lotú.
-
Ko e hā naʻe aʻusia ʻe Siosefa mahalo naʻá ne maʻu ai ha ʻamanaki lelei?
-
Ko e hā ha ngaahi moʻoni te tau lava ʻo ako mei he ngaahi vēsí ni fekauʻaki mo Siosefa Sāmitá?
ʻE lava ke ʻiloʻi ʻe he kau akó ha ngaahi moʻoni kehekehe, ʻo kau ai hono ui ʻe he ʻOtuá ʻa Siosefa Sāmita ke fai ʻEne ngāué. ʻE lava ke ke fakamahinoʻi ange ki he kau akó, neongo naʻe ongoʻi halaia ʻa Siosefa Sāmita ʻi heʻene ngaahi fehalākí mo e angahalá, ka naʻá ne fekumi fakamātoato ki ha fakamolemole, pea naʻe ui ia ʻe he ʻOtuá ki Heʻene ngāué.
Lolotonga e pō mo e hengihengi ʻo e ʻaho 21–22 ʻo Sepitema 1823, naʻe hā tuʻo tolu ʻa Molonai kia Siosefa. Naʻá ne vahevahe ʻa e pōpoaki tatau mo fakaʻaongaʻi ʻa e ngaahi potufolofola tatau ʻi he taimi kotoa pē (vakai, Siosefa Sāmita—Hisitōlia 1:36–50).
Ke tokoni ke vakai e kau akó ki ha ngaahi sīpinga ʻo e ngāue ʻe fakahoko ʻe he ʻOtuá ʻo fakafou ʻia Siosefa Sāmitá, te ke lava ʻo vahevahe ʻi he kau mēmipa ʻo e kalasí ʻa e ngaahi kikite ko ʻeni naʻe lau ʻe Molonaí. Fakaafeʻi e kau akó ke nau lau e ngaahi potufolofolá, ʻo kumi e founga ʻoku ʻuhingamālie ai kiate kinautolu e ngāue naʻe ui ʻa Siosefa ke ne fakahokó.
Lau e ngaahi veesi ko ʻení ʻo kumi e ʻuhinga ʻe ʻoange ai ʻe he ngaahi kikite ko ʻení ha mahino lahi ange kia Siosefa fekauʻaki mo e ngāue naʻe pau ke ne fakahokó.
-
ʻOku fekauʻaki fēfē ʻa e ngaahi veesi ko ʻení mo e ngāue naʻe ui ʻe he ʻEikí ʻa Siosefa ke ne faí?
-
ʻE fakamālohia fēfē nai ʻe he ngaahi kikite ko ʻení hoʻo fakamoʻoni ki he uiuiʻi fakalangi ʻo Siosefá?
Lolotonga hono lau ʻo e ngaahi veesi ko ʻení, mahalo ʻe fakatokangaʻi ʻe he kau akó naʻe ui ʻe he ʻEikí ʻa Siosefa Sāmita ke tokoni ki hono teuteuʻi Hono kakaí ki Heʻene Hāʻele ʻAnga Ua Maí ʻo fakafou ʻi hono Fakafoki Mai ʻo e ongoongoleleí, ʻa ia ʻoku kau ai ʻa hono fakafoki mai ʻo e mālohi faisilá mo e ngaahi ouau fakatemipalé, ko hono tānaki fakataha ʻo ʻIsilelí, pea mo e taumalingi mai ʻo ha ngaahi tāpuaki fakalaumālie kehe.
-
Kuo takiekina fēfē ʻe he ngāue naʻe fakahoko ʻe he ʻOtuá ʻo fakafou ʻia Siosefa Sāmitá ʻa e meʻa ʻokú ke ʻilo pe ongo ʻokú ke maʻu fekauʻaki mo Sīsū Kalaisí? (Vakai, 2 Nīfai 3:6–8, 11; Tokāteline mo e Ngaahi Fuakava 135:3.)
ʻOku ʻiloa ʻa e hingoa ʻo Siosefa Sāmitá ʻi he leleí mo e koví
Taki e tokanga ʻa e kau akó ki he kikite ʻa Molonai fekauʻaki mo e hingoa ʻo Siosefa Sāmitá ʻi he Siosefa Sāmita Hisitōlia—1:33. Aleaʻi ʻa e ongo naʻe maʻu ʻe Siosefa fekauʻaki mo e kikité mo e ngaahi founga ʻoku fakahoko ai ia he ʻaho ní. Tokoni ke ʻilo ʻe he kau akó ko hono fakahoko ko ia ʻo e kikité ko ha fakamoʻoni ia ʻo e uiuiʻi ʻo Siosefa Sāmita ko ha palōfita ʻa e ʻOtuá.
-
ʻOkú ke pehē ko e hā ʻoku lahi pehē ai ʻa e fakafepaki ki he Palōfita ko Siosefa Sāmitá?
Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ko e hā ʻoku tuku ai ʻe he ʻEikí ʻa e lauʻikoví ke ō fakataha mo e leleí? Ko e ʻuhinga ʻe taha he koeʻuhí ʻoku taki ʻe he fakafepaki ki he ngaahi meʻa ʻa e ʻOtuá ʻa e kau fekumi ki he moʻoní ke nau tūʻulutui ʻo lotua e ngaahi talí. …
ʻE fakautuutu ʻa e lau kovi ki he Palōfita ko Siosefa Sāmitá ʻi heʻetau fakaofi atu ki he Hāʻele ʻAnga Ua Mai ʻa e Fakamoʻuí. He ʻikai hōloa ʻa e ngaahi moʻoni fakakongá mo e olopoto kākaá. ʻE ʻi ai ha kau mēmipa ʻo e fāmilí mo ha ngaahi kaungāmeʻa te nau fie maʻu hoʻo tokoní. (Neil L. Andersen, “Siosefa Sāmita,” Liahona, Nōvema 2014, 28, 30)
-
ʻE tokoni fēfē ke ʻiloʻi naʻe kikiteʻi ʻe Molonai ʻe ʻi ai ha kau fakaanga te nau lea “kovi” kia Siosefa Sāmitá?
-
Ko e hā te tau lava ʻo fai ke mateuteu ai ke tokoniʻi ʻa kinautolu te nau ala aʻusia ha fakafepaki ki heʻenau tui kia Siosefa Sāmitá?
Ko hono fakahoko ʻo e kikite ke fakamatala e lelei ʻa Siosefa Sāmitá
Naʻe fai ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ha fakaafe pau ki he toʻu tupu ʻo e Siasí:
ʻOku ou fai atu ha tukupā ki he toʻu tupu ʻoku fanongo he ʻahó ni pe lau e ngaahi leá ni ʻi he ngaahi ʻaho ka hoko maí: Maʻu haʻo fakamoʻoni fakafoʻituitui ki he Palōfita ko Siosefa Sāmitá. Tuku ke tokoni ho leʻó ki hono fakahoko e ngaahi lea fakapalōfita ʻa Molonaí ke fakamatala e lelei ʻa e Palōfitá. (Neil L. Andersen, “Siosefa Sāmita,” Liahona, Nōvema 2014, 30)
-
Ko e hā ha ngaahi founga te ke lava ai ʻo tokoni ke fakahoko e kikite ʻa Molonaí ke fakamatala e lelei ʻa Siosefa Sāmita?
Ke tokoni ke vakai e kau akó ki ha ngaahi sīpinga ʻo e founga naʻe folofola lelei ai ʻa e Fakamoʻuí fekauʻaki mo Siosefa Sāmitá, te ke lava ʻo vahevahe ʻa e ngaahi potufolofola ko ʻení ki he kau akó: Tokāteline mo e Ngaahi Fuakava 1:17; 35:17; 112:15; 136:37–38. Kole ki ha kau ako ʻe niʻihi ke vahevahe e folofola ʻa e Fakamoʻuí fekauʻaki mo Siosefa Sāmitá.
Fakaafeʻi e kau akó ke nau fai ha meʻa ʻi he kalasí ke tokoni ʻi hono fakahoko e ngaahi lea fakaepalōfita ʻa Molonaí ke fakamatala e lelei ʻa Siosefa Sāmitá. Hangē ko ʻení, te nau lava ʻo vahevahe ʻa e founga kuo tokoniʻi ai kinautolu ʻe Siosefa ke nau ʻilo fekauʻaki mo Sīsū Kalaisi pe ngaahi founga kehe kuo takiekina ai ʻe Siosefa Sāmita ʻenau moʻuí ki he leleí. ʻE lava foki ke fakaafeʻi e kau akó ke ʻave ha pōpoaki ʻo fakafou ʻi he text pe mītia fakasōsialé ki ha taha kehe mei he kalasí.