“Lēsoni 11—Siosefa Sāmita—Hisitōlia 1:50–65—Naʻe Maʻu ʻe Siosefa Sāmita ʻa e ʻŪ Lauʻi Peleti Koulá,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Siosefa Sāmita—Hisitōlia 1:50–65,” Tokāteline mo e Ngaahi Fuakavá – Seminelí
Lēsoni 11: Siosefa Sāmita—Hisitōlia 1:27–65
Siosefa Sāmita—Hisitōlia 1:50–65
Naʻe Maʻu ʻe Siosefa Sāmita ʻa e ʻŪ Lauʻi Peleti Koulá
Naʻe foaki ʻe he ʻEikí kia Siosefa Sāmita ha ngāue mahuʻinga ke ne fai. Naʻe fekauʻi ia ke ne ʻomi ʻa e ʻū lauʻi peleti koulá mei he Moʻunga ko Komolá, liliu ʻa e lekōtí, pea ʻomi ʻa e Tohi ʻa Molomoná. Naʻe ʻomi ʻe he ʻEikí ha ngaahi founga ke tokoni kia Siosefa ke fakahoko ʻa e ngāue maʻongoʻongá ni. Hangē pē ko hono tokoniʻi ʻe he ʻEikí ʻa Siosefa ke ne lavaʻi e ngāue naʻe ʻoangé, ʻe lava foki ke tokoniʻi kitautolu ʻe he ʻEikí. ʻE lava ke tokoni ʻa e lēsoni ko ʻení ke mahino ki he kau akó ʻe tokoniʻi kitautolu ʻe he ʻEikí ke tau ikunaʻi ʻa e ngāue kuó Ne fekau mai ke tau fakahokó.
Ngaahi ʻEkitivitī Ako ʻOku Ala Fakahokó
Kau ʻāngelo ke tokoniʻi kitautolu ke fakahoko e ngāue ʻa e ʻOtuá
Fakakaukau ke vahe ʻa e kau akó ki ha fanga kiʻi kulupu iiki ke nau lisi ki he lahi taha te nau lavá ʻa e taimi naʻe hā ai ha kau ʻāngelo ki he kakaí. Hokó, te nau lava ʻo fakamatalaʻi fakanounou ʻa e ʻuhinga naʻe hā mai ai ʻa e ʻāngelo takitaha.
-
Ko e hā ʻokú ke ʻilo fekauʻaki mo e ʻuhinga ʻoku fekauʻi mai ai ʻe he ʻOtuá ha kau ʻāngeló?
Lau e lea ko ʻeni meia ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi ha ʻuhinga ʻoku fekauʻi mai ai ʻe he ʻOtuá ha kau ʻāngeló.
Talu mei he kamataʻangá ʻo fai mai ʻi he ngaahi kuonga fakakosipelí mo hono ngāue ʻaki ʻe he ʻOtuá ha kau ʻāngelo ko hono kau fakafofonga ke fakahā ki Heʻene fānaú ʻa ʻEne ʻofá mo e tokangá. … Kuó u lea heni ʻo kau ki he tokoni fakalangí pea ki he kau ʻāngelo kuo tuku mai ke faitāpuekina kitautolu ʻi he taimi ʻo e faingataʻá. Ka ʻi heʻetau lea fekauʻaki mo kinautolu ʻoku hoko ko e meʻangāue ʻi he toʻukupu ʻo e ʻOtuá, ʻoku fakamanatu mai ai ʻoku ʻikai haʻu e kau ʻāngeló kotoa mei he tafaʻaki ʻe taha ʻo e veilí. ʻOku tau lue holo mo talanoa mo ha niʻihi ʻo kinautolu—ʻi heni, ʻi he taimí ni pea ʻi he ʻaho kotoa pē. (Jeffrey R. Holland, “Ko e Tauhi Mai ʻa e Kau ʻĀngeló,” Liahona, Nōvema 2008, 29–30)
ʻI hono ako ʻe he kau akó e lēsoni ko ʻení, mahalo te ke fie tokoniʻi kinautolu ke nau ʻiloʻi naʻe tokoniʻi ʻe he kau ʻāngelo mei he tafaʻaki ʻe taha ʻo e veilí mo e niʻihi fakafoʻituitui fakamatelié ʻa Siosefa Sāmita ʻi hono fakahoko e ngāue ʻa e ʻOtuá. Mahalo te ke fie fakamoʻoni foki ʻe lava ke tokoniʻi ʻe he kau ʻāngeló hoʻo kau akó ke fakahoko e ngāue ʻa e ʻOtuá maʻanautolú.
Naʻe ʻomi ʻe he ʻEikí kia Siosefa Sāmita ha founga ke fakahoko ʻaki ʻEne ngāué
Ke tokoni ke vakai e kau akó ki ha ngaahi founga naʻe ʻomi ai ʻe he ʻEikí ha tokoni kia Siosefa Sāmitá, fakakaukau ke fakaʻaongaʻi e saati ko ʻení. ʻE lava ke ke fakaʻaliʻali ia ʻi he palakipoé pea fakaafeʻi e kau akó ke hiki tatau ia ʻi heʻenau tohinoa akó. Fakatātaaʻi ʻa e founga ke fakafonu ai iá ʻaki hono fakakakato ʻa e ʻotu ʻuluakí mo e kalasí. ʻI hono fakakakato ʻe he kau akó ʻa e sātí, tokoni ke nau ʻiloʻi ʻa e moʻoni ʻoku ʻomi ʻe he ʻEikí ha ngaahi founga ke tokoniʻi kitautolu ke fakahoko ʻEne ngāué.
|
Maʻuʻanga Fakamatalá |
Ko hai naʻe fekauʻi mai ʻe he ʻEikí ke tokoni kia Siosefá? |
|---|---|
Maʻuʻanga Fakamatalá | |
Maʻuʻanga Fakamatalá | |
Maʻuʻanga Fakamatalá | |
Maʻuʻanga Fakamatalá Siosefa Sāmita—Hisitōlia 1:57; Tokāteline mo e Ngaahi Fuakava 25:5–6 | |
Maʻuʻanga Fakamatalá |
Toe vakaiʻi ʻa e Siosefa Sāmita—Hisitōlia 1:33 pea feinga ke ʻiloʻi ʻa e ʻāngelo naʻe ʻuluaki fekauʻi mai ʻe he ʻEikí ke tokoni kia Siosefá.
ʻI he taimi ʻe lave ai e kau akó kia Molonaí, fehuʻi ange pe ko e hā e meʻa ʻoku nau ʻilo kau ki he founga naʻá ne tokoniʻi ai ʻa Siosefa Sāmita ke fakahoko e ngāue naʻe tuku ange ʻe he ʻEikí kiate iá. Kapau he ʻikai talaatu ʻe he kau akó e ʻaʻahi ʻe fā ʻa Molonai lolotonga e poʻuli ʻo e ʻaho 21 ʻo Sepitema 1823, pea mo e meʻa naʻá ne akoʻí, fakakaukau ke toe fakamanatu e meʻa ko ʻení mo kinautolu (vakai ki he lēsoni kimuʻá). ʻE ala tokoni foki hono tānaki atu e ngaahi meʻa ko ʻení ki he meʻa ʻoku vahevahe ʻe he kau akó.
ʻI he taʻu ʻe tolu hono hokó, ʻi he ʻaho 22 ʻo Sepitemá, naʻe fetaulaki ai ʻa Siosefa Sāmita mo Molonai ʻi he feituʻu tatau peá ne maʻu mo ha fakahinohino lahi ange fekauʻaki mo e mahuʻinga ʻo e lekōtí pea mo e ngāue naʻe finangalo ʻa e ʻOtuá ke ne fakahokó (vakai, Siosefa Sāmita—Hisitōlia 1:33–34). Naʻe akoʻi foki ʻe Molonai kia Siosefa ha meʻa lahi ange fekauʻaki mo e “meʻa ʻe fai ʻe he ʻEikí, mo e founga” ʻe hoko aí (Siosefa Sāmita—Hisitōlia 1:54). Lolotonga e taimi ko ʻení, naʻe fetaulaki ai ʻa Siosefa pea mali mo ʻEma Heili (vakai, Siosefa Sāmita—Hisitōlia 1:57–58).
ʻI he ʻaho 22 ʻo Sepitema 1827, naʻe maʻu ai ʻe Siosefa ʻa e ʻū lauʻi peleti koulá mei he ʻāngelo ko Molonaí.
Fakaafeʻi e kau akó ke vahevahe ʻa e meʻa te nau tānaki ki he ʻotu ʻuluaki ʻo e sātí. ʻE lava ke fakafonu fakafoʻituitui pe fakakulupu ʻe he kau akó ʻa e ngaahi ʻotu kehe ʻi he sātí. Hili hono fakakakato e sātí, fakaafeʻi e kau akó ke vahevahe ʻa e ʻuhinga naʻe fiemaʻu ai ke maʻu ʻe Siosefa e tokoni ko ʻení.
Fakatokanga ʻa Molonai kia Siosefá
Lau ʻa e Siosefa Sāmita—Hisitōlia 1:59–60 pea kumi ʻa e fakatokanga mo e talaʻofa naʻe fai ʻe Molonai kia Siosefa Sāmita ʻi he pō naʻá ne maʻu ai ʻa e ʻū lauʻi peletí.
-
Ko e hā naʻe fakatokanga ai ʻa Molonai kia Siosefa ke ʻoua naʻá ne taʻetokanga ki hono maluʻi ʻo e ʻū lauʻi peletí?
Fakakaukau ke fakaafeʻi e kau akó ke nau vahevahe ha ngaahi sīpinga ʻoku nau maheni mo ia ʻo e founga naʻe feinga ai e kakaí ke toʻo ʻa e ʻū lauʻi peletí meia Siosefá. Te ke lava foki ʻo kole ki he kau akó ke nau lau mo aleaʻi ʻa e ngaahi fakamatala mei he Kau Māʻoniʻoní, 1:37–43, pe lau ʻa e fakamatala ʻi laló.
Hili hono maʻu ʻe Siosefa ʻa e ʻū lauʻi peletí mei he ʻāngelo ko Molonaí, naʻá ne fufuuʻi ia ʻi ha kupuʻi ʻakau naʻe ava ʻa loto ke malu ai, kae ʻoua kuó ne maʻu ha puha ke lokaʻi ai. ʻI he ʻaho hono hokó, lolotonga e ngāue ʻa Siosefa Sāmitá, naʻe fanongo ʻene tamaí ki ha kau tangata naʻa nau alēlea ke kaihaʻasi ʻa e ʻū lauʻi peletí. Naʻe ʻalu ʻa ʻEma ʻo fakatokanga kia Siosefa, pea naʻá ne lava ʻo ʻilo ʻi he ʻŪlimí mo e Tūmemí, naʻe malu pē ʻa e ʻū lauʻi peletí. Naʻá ne ʻiloʻi foki kuo taimi ke ʻomi ʻa e ʻū lauʻi peletí mei he kupuʻi ʻakaú ke maluʻi kinautolu.
“Naʻe ʻalu fakatovave ʻa Siosefa ki he moʻungá ʻo maʻu e fuʻu ʻakau naʻe fufuuʻi ai e ʻū lauʻi peletí ʻo ne takatakaiʻi fakalelei ʻaki ia ha sote. Naʻá ne hū leva ki he vaoʻakaú, ʻo ne fononga ki ʻapi, kae tokanga pē hono matá ki ha fakatamaki. …
Naʻe kiʻi mamafa ʻa e lekōtí ko ia ne fononga ʻa Siosefa he loto vaoʻakaú ʻi he vave taha naʻá ne lavá. Naʻe ʻi ai ha fuʻu ʻakau naʻe tō ʻi muʻa hono halá pea ʻi heʻene puna aí, naʻá ne ongoʻi naʻe taaʻi ia mei hono tuʻá. Naʻá ne tafoki ʻo sio ki ha tangata naʻe ʻoho ange ki ai, naʻá ne puke ha meʻafana ʻo hangē ha pōvaí.
Naʻe puke maʻu ʻe Siosefa ʻa e ʻū lauʻi peletí he nima ʻe taha, ka ne tekeʻi e tangatá ʻo tō ki he kelekelé kae lele ʻo puli ki he vaoʻakaú. Naʻá ne lele ʻi ha vauea maile nai, ka naʻe toe ʻohofi ia ʻe ha tangata mei ha fuʻu ʻakau ʻo ne taaʻi ʻaki ia e kau ʻo ʻene meʻafaná. Naʻe fuhu ʻa Siosefa mo e tangatá ʻo ne hola meiate ia, ʻo ne vilitaki ke mavahe mei he vaoʻakaú. Ka naʻe ʻikai fuoloa ʻene lelé, kuo ʻohofi ia ʻe ha tangata fika tolu, ʻo ne tukiʻi ia ʻo sīfā. Naʻe tānaki ʻe Siosefa hono iví, ʻo ne taaʻi lahi e tangatá peá ne lele ʻo aʻu ki honau ʻapí. …
“Hili hono ʻomi ʻe Siosefa ʻa e ʻū lauʻi peleti koulá ki ʻapí, naʻe feinga ʻa e kau kumi koloá ʻi ha ngaahi uike lahi ke kaihaʻasi ia. Ke maluʻi e lekōtí, naʻe pau ke ne fūfuuʻi holo ʻa e ʻū lauʻi peletí ʻi ha ngaahi feituʻu kehekehe, pea fufuuʻi ʻi he lalo tofunangá, lalo falengāue ʻene tamaí pea mo e loto kēlení. Naʻe ʻikai teitei lava ke ne matavalea.
“… Naʻá ne fakapapau ke tokangaʻi ʻa e ʻū lauʻi peletí, ʻo falala ki he talaʻofa ʻa e ʻEikí kapau te ne fai e meʻa kotoa te ne lavá, ʻe maluʻi kinautolu” (Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 40-41, 43).
-
Ko e hā ha ngaahi founga naʻe fakatahaʻi ai e ngaahi feinga ʻa Siosefá mo e “poto ʻo e ʻOtuá” ke tauhi ʻa e ʻū lauʻi peletí?
-
Ko e hā ha ngaahi fakakaukau fekauʻaki mo e ʻOtuá ʻokú ke maʻu mei he fakamatala ko ʻení?
ʻOku foaki mai ʻe he ʻEikí kiate kitautolu ha tokoni ke tau ikunaʻi ʻa e ngāue ʻokú Ne tuku mai kiate kitautolú
-
Ko e hā ha ngaahi sīpinga ʻe niʻihi ʻi he folofolá ʻo e ngaahi taimi naʻe tokoniʻi ai ʻe he ʻEikí ʻa e kakaí ke fakahoko ʻa e ngāue naʻá Ne fekauʻi ke nau faí?
Kapau ʻe fiemaʻu, fakaafeʻi e kau akó ke ako ha sīpinga ʻe taha pe lahi ange mei he ngaahi sīpinga ko ʻení:
-
Mōsese (ʻEkesōtosi 3:15–18; 4:10–17)
-
Nīfai (1 Nīfai 17:8–13; 18:1–4)
-
Ko e Kau ʻAposetolo ʻo e Kuonga Muʻá (Mātiu 28:19–20; Ngāue 2:1–6, 41)
-
-
Ko e hā ha ngaahi founga ʻe ala tokoniʻi ai koe ʻe he ʻEikí ke ke fakahoko ʻa e ngāue kuó Ne kole atu pe te Ne kole atu ke ke fakahokó?
-
Ko hai ha “kau ʻāngelo” (niʻihi fakafoʻituitui fakamatelie) ʻi hoʻo moʻuí ʻokú ke ongoʻi kuo fekauʻi mai ʻe he ʻOtuá ke tokoniʻi koe ʻi he ngāue ʻa e ʻEikí?
Fakakaukau ke fakahoko hoʻo fakamoʻoni ki he ngāue ʻa Siosefa Sāmita ke ʻomi ʻa e Tohi ʻa Molomoná. Te ke lava foki ʻo vahevahe ha aʻusia ʻo e founga kuo tokoniʻi ai koe ʻe he ʻEikí ke fakahoko e ngāue kuó Ne tuku kiate koé. Te ke lava foki ʻo fakaafeʻi ha kau ako te nau loto fiemālie ke fakamoʻoniʻi pe vahevahe haʻanau aʻusia.