Lesona 11: Iosefa Samita—Talafaasolopito 1:27–65

Iosefa Samita—Talafaasolopito 1:50–65

Ua Maua e Iosefa Samita Papatusi Auro

Na tuuina atu e le Alii ia Iosefa Samita se galuega taua e fai. Sa poloaiina o ia ia mauaina ia papatusi auro mai le Mauga o Kumora, faaliliu le talafaamaumau, ma aumai i luma le Tusi a Mamona. Na saunia e le Alii ia auala e fesoasoani ai ia Iosefa e faataunuu lenei galuega tele. E pei lava ona fesoasoani le Alii ia Iosefa e faataunuu le galuega na tuuina atu ia te ia, e mafai foi e le Alii ona fesoasoani ia i tatou. O lenei lesona e mafai ona fesoasoani i tagata aooga ia malamalama o le a fesoasoani le Alii ia i tatou e faataunuu le galuega ua Ia poloaiina i tatou e fai.

Gaoioiga E Ono Mafai Ona Aoao Ai

Agelu e fesoasoani ia i tatou e faia le galuega a le Atua

Mafaufau e tuu tagata aooga i ni vaega toalaiti e lisi ni faataitaiga se tele latou te mafaia o taimi na faaali mai ai agelu i tagata. O le isi, e mafai ona latou aoteleina pe aisea na faaali mai ai agelu taitasi.

• O le a se mea ua e iloa e uiga i le mafuaaga e auina mai ai e le Atua agelu?

Faitau le saunoaga lenei mai ia Elder Jeffrey R. Holland o le Korama a Aposetolo e Toasefululua; vaai i se mafuaaga e auina mai ai e le Atua agelu.

Mai lava i le amataga seia oo mai i le auga tisipenisione, sa faaaoga lava e le Atua ia agelu e fai ma Ana avefeau e faailoa mai ai Lona alofa ma popolega mo Ana fanau. … Ua ou talanoa i i e uiga i le fesoasoani faalelagi, e uiga i agelu ua auina mai e faamanuia i tatou i taimi e manaomia ai. Peitai, a tatou talanoa e uiga ia i latou o tufugaaao i le Atua, ua faamanatu mai ia te i tatou e le o agelu uma e mai le isi itu o le veli. O nisi o i latou tatou te savavali faatasi ma talanoa faatasi—iinei, i le taimi nei, ma aso uma lava. (Jeffrey R. Holland, “O Le Auaunaga a Agelu,” Liahona, Nov. 2008, 29–30)

A o suesue e tagata aooga lenei lesona, atonu e te manao e fesoasoani ia i latou ia iloa o agelu uma mai le isi itu o le veli ma tagata o le olaga nei na fesoasoani ia Iosefa Samita i le faataunuuina o le galuega a le Atua. Atonu foi e te manao e molimau atu e mafai e agelu ona fesoasoani i au tagata aooga e faataunuu le galuega a le Atua mo i latou.

Na saunia e le Alii auala mo Iosefa Samita e faataunuu ai Lana galuega

Ina ia fesoasoani i tagata aooga ia iloa auala na saunia e le Alii e fesoasoani ai ia Iosefa Samita, mafaufau e faaaoga le siata lenei. E mafai ona e faaalia i luga o le laupapa ma valaaulia tagata aooga e kopi i a latou apitalaaga o suesuega. Faataitai pe faapefea ona faatumu e ala i le faamaeaina o le atulaina muamua o se vasega. A o faauma e tagata aooga le siata, fesoasoani ia i latou e faailoa mai le upumoni e faapea, ua saunia e le Alii auala e fesoasoani ia i tatou e faataunuu ai Lana galuega.

Faasinomaga	O ai na auina mai e le Alii e fesoasoani ia Iosefa? Na faapefea ona latou fesoasoani atu ia Iosefa?
Faasinomaga Iosefa Samita—Talafaasolopito 1:33
Faasinomaga Iosefa Samita—Talafaasolopito 1:35
Faasinomaga Iosefa Samita—Talafaasolopito 1:54
Faasinomaga Iosefa Samita—Talafaasolopito 1:57; Mataupu Faavae ma Feagaiga 25:5–6
Faasinomaga Iosefa Samita—Talafaasolopito 1:61–62

Toe faamanatu le Iosefa Samita—Talafaasolopito 1:33 ma faailoa mai le agelu na auina mai muamua e le Alii e fesoasoani ia Iosefa.

A ta’ua e tagata aooga ia Moronae, fesili atu ia i latou po o le a se mea ua latou iloa e uiga i le ala na ia fesoasoani ai ia Iosefa Samita e faataunuu le galuega na tuuina atu e le Alii ia te ia. Afai e le ta’ua e tagata aooga asiasiga e fa a Moronae i le po o le aso 21 o Setema, 1823, ma mea na ia aoao atu, mafaufau e toe faamanatu lenei mea na tupu faatasi ma i latou (tagai i le lesona ua mavae). O le faaopoopoina o le anotusi lenei i mea e faasoa mai e tagata aooga e mafai foi ona fesoasoani atu.

Mo le isi tolu tausaga na sosoo ai i le aso 22 o Setema, na feiloai ai Iosefa Samita ma Moronae i le nofoaga lava e tasi ma maua ai faatonuga faaopoopo e uiga i le taua o le faamaumauga ma le galuega na aumai e le Atua mo ia e fai (tagai Iosefa Samita—Talafaasolopito 1:33–34). Sa aoao atili foi e Moronae ia Iosefa e uiga “i le mea o le a faia e le Alii, ma pe o le a faapefea” ona tupu (Iosefa Samita—Talafaasolopito 1:54). I le aluga o le taimi lea, sa feiloai ai Iosefa ma faaipoipo atu ia Ema Hale (tagai Iosefa Samita—Talafaasolopito 1:57–58).

I le aso 22 o Setema, 1827, na maua ai e Iosefa papatusi auro mai le agelu o Moronae.

Valaaulia tagata aooga e faasoa mai mea o le a latou faaopoopoina i le atulaina muamua o le siata. E mafai e tagata aooga ona faatumu isi atulaina i le siata e le tagata lava ia po o ni vaega. A uma ona faamaeaina le siata, valaaulia tagata aooga e faasoa mai pe aisea na tatau ai mo Iosefa ona maua lenei fesoasoani.

Lapataiga a Moronae ia Iosefa

Faitau le Iosefa Samita—Talafaasolopito 1:59–60 ma vaavaai mo le lapataiga ma le folafolaga na tuu atu e Moronae ia Iosefa Samita i le po na ia maua ai papatusi.

• Aisea na lapataia ai e Moronae ia Iosefa ia aua nei faatamala i le puipuia o papatusi?

Mafaufau e valaaulia tagata aooga e faasoa mai ni faataitaiga atonu latou te masani ai i ala na taumafai ai tagata e aveese papatusi mai ia Iosefa. E mafai foi ona e fai i tagata aooga e faitau ma talanoaina tala mai le Au Paia, 1:37–43, pe faitau le tusiga o loo i lalo.

Ina ua uma ona maua mai papatusi mai le agelu o Moronae, sa nanā e Iosefa i latou i se ogalaau gaogao ina ia saogalemu ai seia mafai ona ia maua se pusa e loka ai. O le aso na sosoo ai, a o i ai Iosefa Samita i le galuega, sa faalogo atu lona tamā i se vaega o tagata o taupulepule e gaoi papatusi. Sa alu atu Ema e lapatai Iosefa, ma o ia, e ala i le Urima ma le Tumema, sa mafai ona ia vaai ua saogalemu ia papatusi. Sa ia iloa foi ua oo i le taimi e aumai ai papatusi mai le ogalaau ina ia tuu i se mea saogalemu.

“A o faatopetope atu i le mauga, sa maua ai e Iosefa le ogalaau lea sa natia ai papatusi ma afifiina ma le faaeteete i se ofutino. Ona ia oso faananā atu lea i le togavao ma agai atu i le fale, ae sa autilotilo ma le mataalia i se tulaga lamatia. …

“I le tiga ai i le mamafa o papatusi, sa oso atu ai Iosefa i le togavao i le vave na te mafaia ai. Sa punitia e se laau na pa’ū i le auala i ona luma atu, ma a o ia a’e i luga, sa ia lagonaina se mea malo na ta ai o ia mai tua. Ina ua faliu atu, na ia vaaia ai se tamaloa o loo oso atu ia te ia, ma se fana o loo uu pei o se pate.

“O le uumauina o papatusi i le lima e tasi, na tu’i ai e Iosefa le tagata lea ma palasi i lalo ma faatopetope atu i le loloto o le vaomatua. Sa ia tamoe pe tusa ma se afa maila ae oso mai le isi tamaloa mai tua o se laau ma ta o ia i le au o lana fana. Sa tauivi Iosefa ma le tamaloa ma sola ese atu ai, ma le naunau ia vave ona alu ese mai le togavao. Ae a o lei mafai ona mamao tele atu, sa osofaia o ia e le tamaloa lona tolu, sa matua lavea ai lava lea na niniva ai. I le mauaina o lona malosi, sa ia tu’iina ai le tamaloa ma momo’e atu ai i le fale. …

“Ina ua uma ona aumai e Iosefa papatusi auro i le fale, sa taumafai le au saili oa mo le tele o vaiaso e gaoi. Ina ia tausisia le saogalemu o faamaumauga, sa aveesea mai lea nofoaga i lea nofoaga, nanā papatusi i lalo o le magalafu, i lalo o le fola o le faleoloa o lona tamā, ma faaputuga saito. Sa matua le mafai ona ia faavaivaia lana puipuiga.

“… Sa naunau o ia e tausia papatusi, ma faalagolago i le folafolaga a le Alii afai na te faia mea uma na te mafaia, o le a puipuia i latou” (Au Paia: O Le Tala o le Ekalesia a Iesu Keriso o le Au Paia o Aso e Gata Ai, vol. 1, O Le Tagavai o le Upumoni, 1815–1846 [2018], 40-41, 43).

• O a ni auala na tuufaatasia ai taumafaiga a Iosefa ma “le atamai o le Atua” ina ia faasaoina ai papatusi?

• O a ni malamalamaaga e uiga i le Atua e te maua mai lenei tala?

Ua tuuina mai e le Alii ia i tatou le fesoasoani e faataunuu ai le galuega Ua Ia tuuina mai ia i tatou

• O a nisi o faataitaiga i tusitusiga paia o taimi na fesoasoani ai le Alii i tagata e faataunuu le galuega na Ia poloaiina i latou e fai?

  Afai e manaomia, mafaufau e toe faamanatu se tasi pe sili atu o faataitaiga nei:

  • Mose (Esoto 3:15–18; 4:10–17)

  • Nifae (1 Nifae 17:8–13; 18:1–4)

  • O Aposetolo Anamua (Mataio 28:19–20; Galuega 2:1–6, 41)

• O a ni auala e ono fesoasoani ai le Alii ia te oe e faataunuu le galuega ua Ia poloaiina pe o le a talosagaina oe e fai?

• O ai nisi o “agelu”(tagata soifua) i lou olaga e te lagona ua auina mai e le Atua e fesoasoani ia te oe i le galuega a le Alii?

Mafaufau e tuuina atu le molimau o galuega a Iosefa Samita i le aumaia i luma o le Tusi a Mamona. E mafai foi ona e faasoa atu se aafiaga i le auala na fesoasoani ai le Alii ia te oe e faataunuu le galuega ua avatu e te faia. E mafai foi ona e valaaulia tagata aooga naunau e fai ma molimau pe faasoa mai se aafiaga.

Punaoa Faaopoopo

E pei o Iosefa Samita, e i ai ea se galuega a le Atua mo au?

Na aoao mai Peresitene Russell M. Nelson:

Ole atu i lou Tama Faalelagi, i le suafa o Iesu Keriso po o a Ona lagona e uiga ia te oe ma lau misiona iinei i le lalolagi. Afai e te ole atu ma le manatu moni i ai, e oo mai le taimi o le a musumusu mai e le Agaga ia te oe le upumoni e suia ai le olaga. … Ou te folafola atu ia te oe afai o le a amata ona e mauaina tau lava o se vaaiga i le ala e silasila ai le Tama Faalelagi ia te oe ma mea o loo Ia faamoemoe mai ia te oe e faia mo Ia, o le a le toe tutusa lou olaga! (Russell M. Nelson, “Becoming True Millennials” [fagalotu i le lalolagi atoa mo talavou matutua, Ian. 10, 2016], broadcasts.ChurchofJesusChrist.org)

Na aoao mai e Sister Elaine S. Dalton, o lē sa avea ma Peresitene Aoao o Tamaitai Talavou:

O le a se mea o faamoemoe le Alii tatou te faia? Ua Ia faamoemoe ia faia la tatou vaega i vaaiga faaiu a o loma Lona afio mai. Ua Ia faamoemoe ia tatou faamaonia atu lo tatou agavaa e toe foi atu e mau faatasi ma Ia. E faamoemoe o Ia ina ia tatou avea e faapei o Ia. (Elaine S. Dalton, “Na te Silafia Oe i Lou Igoa,” Liahona, Me 2005, 110)

Aisea na tuuaia ai Iosefa Samita o se tagata manao tupe?

Tagai i Autu o le Talafaasolopito o le Ekalesia: Sailiga o Oa

Na faapefea ona faamatalaina papatusi auro?

Sa kava uma papatusi i tusitusiga faaanamua ma sa fusi faatasi i le itu e tasi i ni mama se tolu. O papatusi taitasi pe ā ma le ono inisi le lautele, valu inisi le umi, ma e manifinifi. O se vaega o papatusi sa foliga mai sa faamaufaailogaina ina ia leai se tasi e mafai ona faitauina. (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018], 25–26)

Tagai i Autu o le Talafaasolopito o le Ekalesia: Papatusi Auro

Gaoioiga Faaopoopo e Aoao Ai

O le faatonuga a Moronae ia Iosefa Samita i luga o le Mauga o Kumora

Faaaoga le faamatalaga i le Au Paia, 1:25–30, 34–38 e fesoasoani ai i tagata aooga ia malamalama atili i faamatalaga e uiga i asiasiga a Moronae ma Iosefa Samita i luga o le Mauga o Kumora. E mafai e tagata aooga ona lipoti mai i taumafaiga a Iosefa e toe aumai papatusi auro ma pe na faapefea ona fesoasoani faatalanoaga a Moronae e saunia ai Iosefa e faataunuu le galuega na poloaiina ai o ia e le Alii e fai. E mafai ona outou talanoaina pe aisea na le faamanuiaina ai Iosefa i ana uluai taumafaiga e maua mai papatusi auro ma le ala na tatau ai ona ia saunia o ia lava mo le galuega taua (tagai foi Mamona 8:14–16).

Ua faataunuuina e le Tusi a Mamona valoaga o le Feagaiga Tuai

Fesoasoani i tagata aooga ia iloa pe na faapefea e nisi o mea na tutupu o loo siomia ai le oo mai o le Tusi a Mamona e pei ona valoia e Isaia ma sii mai e Nifae. Valaaulia tagata aooga e suesue le Isaia 29:11–12 ma le 2 Nifae 27:9–10, 15–20 ma faasoa mai pe faapefea ona fesootai nei mau i le mea na tupu i le Iosefa Samita—Talafaasolopito 1:63–65.

Ina ia fesoasoani i tagata aooga e vaai faalemafaufau i le asiasiga a Matini Harisi ia Charles Anthon, faaali le vitio “ A Marvelous Work and a Wonder ” (3:57). E mafai e tagata aooga ona faailoa mai pe na faapefea e lenei asiasiga ona faataunuuina upu a perofeta anamua e faatatau i le Toefuataiga o le talalelei a Iesu Keriso.

Vitio o nofoaga faasolopito o le Ekalesia

E mafai ona e filifili e faaali atu ni vaega o nisi o vitio o maimoaga faatekinolosi o nofoaga faasolopito o le Ekalesia. Mafaufau e faaaoga nei ata pupuu e fesoasoani ai i tagata aooga e vaai faalemafaufau ai ma malamalama i nisi o mea na tutupu na siomia ai aafiaga o Iosefa i le mauaina ma le puipuia o papatusi auro.

O lenei vitio o loo aotele ai le asiasiga muamua a Iosefa i le Mauga o Kumora faatasi ai ma nisi o feiloaiga na sosoo ai ma Moronae a o lei aumaia papatusi:

O lenei ata vitio puupuu o loo aotele ai le fautuaga a Alavini a o lei maliu ia Iosefa e uiga i le faamaumauga paia:

O lenei ata vitio o loo faamatala ai taumafaiga a Iosefa e faasaoina papatusi auro:

O lenei vitio puupuu o loo faamatala ai nisi o tala e faatatau i feiloaiga a Iosefa ma Ema ma le la faigauo mulimuli ane:

Auala na saunia mo Iosefa Samita i le aumaia i luma o le Tusi a Mamona

Ina ia fesoasoani i tagata aooga e aoao atili e uiga i le ala na fesoasoani ai tagata taitoatasi ia Iosefa Samita e faataunuu le galuega o le aumaia i luma o le Tusi a Mamona, mafaufau e faitau nisi o fuaitau nei mai le Au Paia, vol. 1, O le Tagavai o le Upumoni. E mafai ona e tuuina tagata aooga i ni vaega se tolu ma tofi vaega taitasi e faitau se tasi o fuaitau. Ona mafai lea e se tagata a’oga mai vaega taitasi ona aotele mea na latou maua i le vasega.

• Moronae (itulau 25–30)

• Ema Samita (itulau 31–42)

• Matini Harisi (itulau 43–48)

O ata o nofoaga sa natia ai e Iosefa Samita papatusi auro

Atonu e fiafia tagata aooga e vaai i nofoaga sa nanā ai e Iosefa Samita papatusi auro (tagai Iosefa Samita—Talafaasolopito 1:59–60). Mafaufau e faaali atu ata nei: