Lesona 10: Mataupu Faavae ma Feagaiga 2; Iosefa Samita— Talafaasolopito 1:27–65

Iosefa Samita—Talafaasolopito 1:27–50

Na Faaali Mai Moronae ia Iosefa Samita

I le aso 21 o Setema, 1823, sa tatalo ai Iosefa Samita i le Atua mo le faamagaloga o ana agasala ma ia iloa lona tulaga i luma o le Atua. I le tali atu i ai, sa faaali mai le perofeta o Moronae ia Iosefa Samita e aoao o ia e uiga i le Tusi a Mamona ma valoaga anamua e uiga i le Toefuataiga o le talalelei. Na vavalo foi Moronae e uiga i le lumanai o Iosefa. O lenei lesona e mafai ona fesoasoani i tagata aooga e lagona ai le taua o le vaalaauga o Iosefa Samita o se perofeta a le Atua.

Gaoioiga E Ono Mafai Ona Aoao Ai

Na faamatala e Iosefa Samita lona talavou

Ina ia saunia tagata aooga e aoao e uiga i aafiaga o Iosefa Samita i lona talavou, mafaufau e valaaulia i latou e faasoa mai upu e faamatala ai le autalavou. O le isi auala o le faaali atu lea o upu ma fasifuaitau i luga o le laupapa o loo faamatala ai Iosefa Samita i lona talavou. Mo se faataitaiga, “Sa masani ona ou lagona le tausalaina ona o ou vaivaiga ma lē atoatoa.” E mafai e tagata aooga ona tuu se togi i talaane o pusa latou te fesootai i ai.

Atonu e te manao e uunaia tagata aooga e sue faauigaga o upu i fuaitau o mau nei latou te le malamalama i ai. O loo maua lenei vaega i le polokalama o le Gospel Library. Valivali se upu ma filifili le filifiliga “faamatala”.

Faitau le Iosefa Samita—Talafaasolopito 1:27–29, ma vaavaai pe na faapefea ona faamatala e Iosefa Samita ona lagona i le tolu tausaga talu ona mavae le Uluai Faaaliga.

• E faapefea ona fesootai le autalavou i o tatou aso ia Iosefa Samita?

Sa i ai le galuega a le Atua mo Iosefa Samita

O le seti e sosoo ai o fuaiupu o se poloka telē atu o le anotusi e faitau. Mafaufau i manaoga ma tomai o au tagata aooga pe a filifili se auala e faitau ai. E mafai ona outou faitau o se vasega (feauauai le aufaitau a tagata aoga), fai i tagata aooga e faitau i paga, pe ta le leo ma valaaulia tagata aooga e mulimuli i le faitauga i a latou tusitusiga paia.

A uma le fesili muamua, atonu e te manao e taofi ma talanoaina mea na maua e tagata aooga e mafai ona fesoasoani ia i latou i o latou aafiaga o se talavou.

Faitau le Iosefa Samita—Talafaasolopito 1:30–35 ma vaavaai pe o a aafiaga na oo ia Iosefa Samita a o ia tatalo.

• O le a se aafiaga o Iosefa atonu na avatu ai ia te ia le faamoemoe?

• O a ni upumoni e mafai ona tatou aoao mai i nei fuaiupu e uiga ia Iosefa Samita?

E mafai e tagata aooga ona faailoa mai ni upumoni eseese, e aofia ai le, na valaauina e le Atua ia Iosefa Samita e faia Lana galuega. E mafai ona e ta’u atu i tagata aooga e ui na lagonaina e Iosefa Samita le tausalaina i ana mea sese ma agasala, ae sa ia sailia ma le faamaoni le faamagaloga, ma sa valaauina o ia e le Atua i Lana galuega.

I le aluga o le po ma le taeao o le aso 21–22 o Setema, 1823, sa faatolu ona faaali mai Moronae ia Iosefa. Sa ia faasoa mai lea lava savali e tasi ma sii mai mau lava e tasi i taimi taitasi (taga’i Iosefa Samita—Talafaasolopito 1:36–50).

Ina ia fesoasoani i tagata aooga ia iloa faataitaiga o le galuega o le a faataunuuina e le Atua e ala ia Iosefa Samita, e mafai ona e vaevae atu i tagata o le vasega ia valoaga nei na sii mai e Moronae. Valaaulia tagata aooga e faitau ia fuaitau, ma vaavaai pe faapefea ona latou fesootai atu i le galuega na valaauina Iosefa e fai.

Faitau fuaiupu nei ma vaavaai pe aisea o le a tuu atu ai e nei valoaga ia Iosefa se malamalama faaopoopo e uiga i le galuega o le a ia faatinoina.

• Malaki 4:1, 5–6

• Isaia 11:11–12

• Galuega 3:22–23

• Ioelu 2:28–29

• E faapefea ona fesootai nei fuaiupu i le galuega na valaauina ai e le Alii ia Iosefa e fai?

• E mafai faapefea e nei valoaga ona faamalosia lau molimau i le valaauga paia o Iosefa?

  A o faitauina nei fuaiupu, atonu e matauina e tagata aooga na valaauina e le Alii ia Iosefa Samita e fesoasoani e saunia Lona nuu mo Lona Afio Mai Faalua e ala i le Toefuataiga o le talalelei, lea e aofia ai le toefuataiga o le mana o faamauga ma sauniga o le malumalu, le faapotopotoina o Isaraelu, ma le liligi mai o isi faamanuiaga faaleagaga.

• Na faapefea e le galuega na faataunuuina e le Atua e ala mai ia Iosefa Samita ona faatosinaina ai mea ua e iloa po o ou lagona e uiga ia Iesu Keriso? (Tagai i le 2 Nifae 3:6–8, 11; Mataupu Faavae ma Feagaiga 135:3.)

O le igoa o Iosefa Samita e i ai mo le lelei ma le leaga

Tatai atu mafaufau o tagata aooga i le valoaga a Moronae e uiga i le igoa o Iosefa Samita i totonu o le Iosefa Samita Talafaasolopito—1:33. Talanoa pe o a ni lagona o Iosefa e uiga i le valoaga ma auala ua faataunuuina ai i aso nei. Fesoasoani i tagata aooga ia iloa o le faataunuuina o le valoaga o le faamaoniga lea o le valaauina o Iosefa Samita o se perofeta a le Atua.

• Aisea e te manatu ai ua tele naua le faasagatau agai i le Perofeta o Iosefa Samita?

Ua aoao mai Elder Neil L. Andersen o le Korama a Aposetolo e Toasefululua:

Aisea e faataga ai e le Alii le tautala leaga e tutupu faatasi ma le lelei? O le tasi mafuaaga o le, tetee i mea a le Atua e auina atu ai ē saili i le upumoni i o latou tulivae mo ni tali. …

O manatu faaalia le lelei e uiga i le Perofeta o Iosefa Samita o le a faateleina a o tatou agai atu i luma i le Afio Mai Faalua o le Faaola. O faamatalaga e le moni atoatoa ma tala pepelo maaleale o le a le faaitiitia. O le a i ai tagata o le aiga ma uo o le a manaomia lau fesoasoani. (Neil L. Andersen, “Iosefa Samita,” Liahona, Nov. 2014, 28, 30)

• E mafai faapefea ona fesoasoani le iloa na valoia e Moronae o le a i ai le au faitio o e o le a tautatala “leaga” ia Iosefa Samita?

• O le a se mea e mafai ona tatou faia e saunia ai e fesoasoani ia i latou o e ono oo i le tetee i lo latou talitonuga ia Iosefa Samita?

Faataunuuina o le valoaga e tautala lelei e faatatau ia Iosefa Samita

Na tuuina mai e Elder Neil L. Andersen o le Korama a Aposetolo e Toasefululua se valaaulia patino i le autalavou o le Ekalesia:

Mo le autalavou o loo faalogologo mai i lenei aso pe o faitauina nei upu i aso o i luma, ou te tuuina atu se lui faapitoa: Ia maua sau oe lava molimau e uiga i le Perofeta o Iosefa Samita. Tuu atu lou leo e fesoasoani i le faataunuuina o upu faavaloaga a Moronae ina ia tautala i upu lelei e uiga i le Perofeta. (Neil L. Andersen, “Iosefa Samita,” Liahona, Nov. 2014, 30)

• O a ni auala e mafai ona e fesoasoani ai e faataunuu le valoaga a Moronae e tautala lelei e faatatau ia Iosefa Samita?

Ina ia fesoasoani i tagata aooga ia iloa faataitaiga o le ala na fetalai lelei ai le Faaola e faatatau ia Iosefa Samita, e mafai ona e vaevaeina mau nei i tagata aooga: Mataupu Faavae ma Feagaiga 1:17; 35:17; 112:15; 136:37–38. Fesili atu i ni nai tagata aooga e faasoa mai mea na fetalai ai le Faaola e faatatau ia Iosefa Samita.

Valaaulia tagata aooga e fai se mea i le vasega e fesoasoani ai e faataunuu upu faaperofeta a Moronae e tautala lelei e faatatau ia Iosefa Samita. Mo se faataitaiga, e mafai ona latou faasoa mai pe na faapefea ona fesoasoani Iosefa ia i latou ia iloa e uiga ia Iesu Keriso po o isi auala a Iosefa Samita na faatosina ai o latou olaga mo le lelei. E mafai foi ona valaaulia tagata aooga e auina atu se savali e ala i feau tusitusi po o upega o faamatalaga i se tasi i fafo atu o le vasega.

Punaoa Faaopoopo

E faapefea ona molimau aafiaga o Iosefa Samita o ia o se perofeta?

Na aoao mai Elder Gerrit W. Gong o le Korama a Aposetolo e Toasefululua e uiga i le valoaga i le Iosefa Samita—Talafaasolopito 1:33–34:

I le 1823, o Iosefa sa o se alii talavou e 17 tausaga sa le’i lauiloa, sa nofo i se nuu e tau le iloa, i se atunuu na fou lona tutoatasi. Vagana e moni, e mafai faapefea ona ia mafaufauina e fai mai o le a avea o ia ma se meafaigaluega i le galuega a le Atua ma faaliliuina e ala i le meaalofa ma le mana o le Atua se tusitusiga paia o le a faapea ona lauiloa i soo se mea?

Ae peitai, ona e moni, e mafai e oe ma a’u ona molimau o lena valoaga ua faataunuuina e pei ona valaauliaina i tatou e fesoasoani ina ia faataunuuina. (Gerrit W. Gong, “Atunuu Uma, Ituaiga, ma Gagana,” Liahona, Nov. 2020, 39)

E mafai faapefea ona tatou mulimuli i faataitaiga a Iosefa Samita mai lona talavou?

Na faasoa mai Sister Susan W. Tanner, o lē sa avea ma Peresitene Aoao o Tamaitai Talavou:

Ina ua faatoa feiloai Iosefa ma Moronae, sa faatoa 17 ona tausaga, o le matuatua lena o le toatele o outou tamaitai talavou. Ua tatou iloa le taimi ma le nofoaga tonu. O le po o le aso 21 o Setema, 1823, i se potumoe i le falealuga a o momoe isi ona uso e toalima. Sa tatalo Iosefa ina ia ona “iloa ai [lona] tulaga i luma [o le Atua]” (IS—T 1:29). Sa lagona e Iosefa lona le atoatoa ma le le agavaa i luma o le Atua. Sa ia fai mai na te le o lagona sona “tausalaina i se agasala mamafa ,” ae sa sese i “manatu faatauvaa ma vaivaiga o tupulaga” (IS—T 1:28), o lea sa ia tatalo ai mo se faamautinoaga. E mafai ona ou malamalama i lagona o Iosefa talavou, ou te iloa foi e toatele outou e mafai. E faafia ona tatou o ifo i o tatou tulivae ma ni lagona o le le atoatoa ma le manaomia o le faamautinoaga mai le lagi?

I se tali atu i le tatalo o le salamo ma le faamaoni o Iosefa, sa faaali mai Moronae, o se avefeau faalelagi, ia te ia. Na tusifaamaumauina e Iosefa e faapea “na ia ta’u mai lo’u igoa, ma fai mai … o i ai i le Atua se galuega mo a’u ou te faia” (IS—T 1:33). Sa maofa Iosefa “i mea na ta’u mai ia te [ia] e le avefeau uiga ese” (IS—T 1:44).

O i tatou foi, e mafai ona maua le faamautinoaga faaleagaga, o se tali i a tatou tatalo. E mafai ona tatou maua se molimau e silafia e lo tatou Tama oi le Lagi i tatou i o tatou igoa ma e i ai Sana misiona i le lalolagi mo i tatou e faataunuu. (Susan W. Tanner, “Tala Fiafia mai Kumora,” Liahona, Me 2005, 104)

na tusia e Iosefa Samita (1805–44):

Ina ua sefulufitu o’u tausaga sa ou toe valaau atu ai i le Alii ma ia faailoa mai ia te a’u se faaaliga vaaia faalelagi aua faauta, sa afio mai se agelu a le Alii ma tu i o’u luma ma o le po ma sa valaau mai o ia i lo’u igoa ma sa ia fetalai mai ua faamagaloina a’u e le Alii i a’u agasala. (Joseph Smith, “ History, circa Summer 1832 ,” The Joseph Smith Papers, 4, https://www.josephsmithpapers.org/paper-summary/history-circa-summer-1832/4)

Gaoioiga Faaopoopo e Aoao Ai

Maimoaga faatekonolosi i le faatoaga a le au Samita

Matamata le vitio “ Sacred Grove Historic Site, Part 2: The Angel Moroni and Joseph Smith ”(8:05) ina ia fesoasoani i tagata aooga ia iloa foliga o le fale o le aiga o Samita ma faalogo i faifeautalai o faasoa mai le tala i le asiasiga a Moronae. Ina ia vaai na o le vaega o le vitio e uiga i asiasiga a Moronae, matamata mai le faailo taimi 1:37 i le 6:28.

Ata o le fale o le au Samita lea na faaali mai ai Moronae

Atonu e fiafia tagata aooga e vaai i ata o le maota o le au Samita na toefauina lea na faaali mai ai Moronae ia Iosefa Samita (tagai Iosefa Samita—Talafaasolopito 1:30–47). Mafaufau e faaali atu ata nei:

Vitio: “Iosefa Samita: O Le Perofeta o le Toefuataiga”

Ina ia faaali atu i tagata aooga se ata vitio o le asiasiga a Moronae ia Iosefa Samita, e mafai ona e faaaogaina le vitio “ Iosefa Samita: Perofeta o le Toefuataiga (Lomiga o le 2002) ” mai le faailo taimi 15:19 i le 16:15.

Fesoasoani i tagata aooga e faamalosia a latou molimau patino i le Perofeta o Iosefa Samita

A uma ona faitau le valaaulia a Elder Andersen ia maua ai se molimau patino i le Perofeta o Iosefa, e mafai e tagata aooga ona tali atu i fesili nei i a latou api talaaga mo suesuega. A uma, e mafai ona faasoa mai e ni volenitia o latou manatunatuga i le vasega. Mafaufau e talanoaina pe aisea e taua ai le i ai o se molimau patino ia Iosefa Samita.

• O le a sou manatu o le a faapefea ona faamanuiaina oe pe afai e te faamalosi i lau molimau patino i le Perofeta o Iosefa Samita?

• O le a se mea e mafai ona fesoasoani ia te oe e maua pe faamalosia ai lau molimau ia Iosefa Samita o se perofeta?

• O a ni aafiaga na fesoasoani ia te oe e talitonu ai o Iosefa Samita o se perofeta?

Faamaoniga o le valaauga o Iosefa Samita o se perofeta

Mafaufau e fesoasoani i tagata aooga ia iloa o le tetee atu ia Iosefa Samita ma lona suafa “sa i ai mo … le leaga i totonu o atunuu uma” o le faamaoniga lea na valaauina o ia e le Atua. E mafai ona e fai mai e tetee e le aunoa Satani i le upumoni. Mafaufau e faaali atu le saunoaga lenei a Elder Lawrence E. Corbridge o le Fitugafulu:

“O le tetee, faitio, ma le ita o soa ia o le upumoni. Soo se taimi lava e faaalia ai se mea moni e faatatau i le faamoemoega ma le taunuuga o tagata, o le a i ai lava pea se vaega e tetee i ai. …

Ia saili mo le Tagata na matua sili ona sauaina ma le le amiotonu nai lo isi uma tagata lea na sili ona faiesea, tofotofoina, ma teenaina, sauaina, tuulafoaiina, ma faasatauroina, o se Tasi na afio ifo, i lalo o mea uma, ma o iina o le a e maua ai le upumoni, o le Alo o le Atua, o le Faaola o tagata uma. Aisea na latou le tuu ai pea ia o Ia?

Aisea? Aua o Ia o le upumoni, ma o le a teena pea lava le upumoni.

Ona saili lea o se tasi o lē sa aumaia se isi molimau ia Iesu Keriso ma isi tusitusiga paia, saili mo se tasi sa avea ma meafaigaluega lea na toefuataiina le atoaga o le talalelei ma le Ekalesia a Iesu Keriso i le fogaeleele, saili mo ia ma faamoemoe e maua ai le tele o mea leaga na faia i ai e tagata. Aisea e le tuu ai pea o ia?

Aisea? Aua sa ia aoao mai le upumoni, ma o le a tetee pea i le upumoni” (Lawrence E. Corbridge, “O le Perofeta Iosefa Samita,” Liahona, Me 2014, 104).