Lesona 21: Mataupu Faavae ma Feagaiga 10–11

Mataupu Faavae ma Feagaiga 10

O Le Poto o le Atua

Ina ua mavae le leiloloa o itulau tusitusia e 116, sa aveesea ai mo se taimi le tumau mai ia Iosefa Samita ia papatusi auro, Urima ma le Tumema, ma le mana e faaliliu ai. Sa taliaina e le Alii le salamo faamaoni o Iosefa ma faamalamalama mai le ala na Ia saunia ai se ala mo Lana galuega e faaauau ai e ala i Lona poto ma le mua’i silafia. O lenei lesona e mafai ona fesoasoani i tagata aooga e faateleina ai lo latou mautinoa o le a fesoasoani le Atua ia i latou e faatoilalo fuafuaga faitogafiti a Satani.

Gaoioiga E Ono Mafai Ona Aoao Ai

O le tagata sili ona atamai e te iloa

O le vaega lenei o le lesona ua fuafuaina e fesoasoani i tagata aooga e mafaufau ai e uiga i le poto e le uma o le Atua. Saoloto e fetuunai mataupu fautuaina nei.

• O ai le tagata sili ona poto e te iloa, po o ai na soifua i le lalolagi, i mataupu taitasi nei?

Saienisi, Talafaasolopito, Mataupu Faalelotu, Soifua Maloloina, Tekinolosi

• Afai e te tuufaatasia le poto o tagata uma e te mafaufau i ai, o le a sou manatu o le a le faatusatusaga o lena poto i le poto o le Atua?

Mafaufau e tusi se laina umi mai luga i lalo o le laupapa o le pito i luga e faatusa i le poto o le Atua. Valaaulia ni nai tagata aooga e tuu ni faailoga i luga o le laina latou te manatu o le poto tuufaatasi o tagata sili ona atamamai uma i le lalolagi e faatusa i ai. E mafai ona e fesili i tagata aooga pe mafai faapefea e fuaitau e pei o le Mosaea 4:9 ma le Isaia 55:8–9 ona faaosofia ai le mea latou te tuu ai faailoga i luga o le laina.

O le Atua e le gata ina atamai atu nai lo o se isi o i tatou. Faitau le Mataupu Faavae ma Feagaiga 10:43 e vaai po o le a se isi mea e sili atu ai le poto o le Atua.

• E mafai faapefea ona aoga i se tasi le iloa o le upumoni e faapea, o le poto o le Atua e sili atu nai lo le faitogafiti a le tiapolo?

• O a nisi o faataitaiga i tusitusiga paia pe mai le talafaasolopito lea na faatoilalo ai e le poto o le Atua se fuafuaga faitogafiti a le tiapolo?

O tali i le fesili talu ai e ono aofia ai le ala na saunia ai le Togiola a Keriso e faatoilalo ai aafiaga o le Pa’u, le ala na saunia ai galuega sui o le malumalu e fesoasoani ai ia i latou o e sa ola i le taimi o le Liliuese, po o le auala e mafai ai ona faatoilaloina a tatou agasala e ala i le faatuatua ia Keriso ma le salamo.

A o e suesueina lenei lesona, mafaufau i taumafaiga a Satani e taofia oe mai le alualu i luma faaleagaga ma le faia o le galuega a le Atua. Faalogo mo le Agaga Paia o molimau mai e malamalama atoatoa le Atua i auala a Satani ma ua uma ona saunia se ala mo oe e faatoilalo ai.

“O le faitogafiti poto o le tiapolo”

Mafaufau e valaaulia se volenitia e faamanatu i le vasega mea na tutupu lea na taitai atu ai i le leiloloa o itulau tusitusia muamua e 116 o le Tusi a Mamona. (Faaaoga le lesona “Mataupu Faavae ma Feagaiga 3” po o le parakalafa lenei pe a manaomia.)

Sa i ai se fuafuaga a Satani e faasalaveia le faaliliuga o le Tusi a Mamona ma mafua ai ona masalosalo tagata i le moni o le tusi. Sa tauanau malosi e Matini Harisi ia Iosefa Samita ia faataga o ia e faaali atu itulau tusitusia muamua e 116 o le Tusi a Mamona i lona toalua ma isi. Sa faaauau pea ona ole atu Iosefa i le Atua mo se faatagaga, e ui ina sa ta’u faalua atu e le Atua ia te ia e aua nei faatagaina. Na iu lava ina leiloloa itulau ia Matini. Ona ave lea e le agelu o Moronae papatusi auro ma le Urima ma le Tumema mai ia Iosefa.

• O a ni atugaluga e te manatu na i ai ia Iosefa ina ua leiloa ia tusitusiga?

Ina ua mavae se vaitaimi o le salamo faamaualalo, sa toe maua foi e Iosefa ia papatusi auro ma le Urima ma le Tumema. Sa ta’u atu e Moronae ia te ia ua talia e le Alii lona salamo.

• Aisea na faapitoa ai ona faamafanafanaina le savali a le Alii i totonu o le Mataupu Faavae ma Feagaiga 10:43 mo Iosefa i lena taimi?

I le Mataupu Faavae ma Feagaiga 10, na aoao atu ai e le Alii ia Iosefa e faapea, o i latou na gaoia itulau ua fuafuaina e suia upu o le tusitusiga. Afai e toe faaliliuina e Iosefa lea lava anomea e tasi, semanu latou te faapea mai sa ese lona faaliliuina ma o lea la o ia o se perofeta pepelo (tagai Mataupu Faavae ma Feagaiga 10:10–19).

O fesili nei e mafai ona fesoasoani i tagata aooga e faamatala ai le aafiaga o Iosefa i o latou olaga. Atonu e te manao e tusi nisi o a latou tali i luga o le laupapa.

• O a ni faataitaiga o le galuega ua talosagaina e le Atua le autalavou e faataunuu i aso nei?

• O a fuafuaga faitogafiti e faaaoga e Satani e taumafai ai e taofia i tatou mai le faataunuuina o le galuega a le Atua?

Atonu e ta’ua e tagata aooga faapea o fuafuaga a Satani e aofia ai amioga ua fai ma vaisu, faalavelave, po o le masalosalo o le tagata lava ia. O le isi tali e faapea na te uunaia i tatou ia faatauaina manatu po o ituaiga olaga o isi e sili atu nai lo tulaga faatonuina a le Atua.

Tusi i lau api faamaumau mo suesuega le galuega e te lagona e finagalo le Atua e te vaai agai i ai i le taimi nei ma ausia i lou lumanai. O le mafaufau loloto i lenei mea e mafai ai e le Agaga Paia ona musuia oe i nisi o manatu. O a metotia atonu o loo faaaogaina nei e Satani i lou olaga e taumafai ai e taofia oe mai le faataunuuina o le galuega a le Atua?

O le poto o le Atua

Fesoasoani i tagata aooga ia iloa le atamai ma le mua’i silafia e le Atua e ala i le lolomiina ma le tipiina o ni kopi o le pepa e tufa atu o loo avatu faatasi ai mo tagata aoga taitasi ina ia i ai se fasi paso se tasi. Valaaulia i latou e faitau a latou fuaitau ma faamaumau i tua o a latou fasi paso mea na aoao mai e le Atua pe musuia se tasi e fai.

Ona valaaulia lea o tagata aooga e fai ni vaega taitoafa ma isi e eseese o latou fasi paso. Valaaulia vaega e galulue faatasi e iloa ai pe na faapefea ona saunia e le Atua se auala e faatoilalo ai le leiloloa o itulau e 116. Ona valaaulia lea o vaega e faasoa mai i le vasega pe mafai faapefea e lenei tala ona fesoasoani e faateleina lo tatou faatuatua ma le talitonu i le Atua.

O fesoasoani e fa o loo i lalo e mafai ona faaalia pe tuuina atu pe afai e manaomia e tagata aooga sina taiala laitiiti e malamalama ai i a latou fuaitau.

O Le Poto o le Atua

Fesoasoani:

1. 1 Nifae 19:1–3—Na poloaiina e le Atua Nifae e fai ni seti se lua o papatusi ia na aofia ai le vaitaimi lava lea e tasi.

2. Upu a Mamona 1:3–7—Na musuia e le Atua Mamona e faaaofia ai papatusi laiti a Nifae faatasi ai ma le faapuupuuga o le vaitaimi lava lea na uma ona faia e Mamona mai isi papatusi a Nifae.

3. Mataupu Faavae ma Feagaiga 10:30, 40–42—Na ta’u atu e le Atua ia Iosefa Samita e faaliliu papatusi laiti a Nifae nai lo le toe faaliliuina o mea na leiloloa ia Matini mai le otootoga a Mamona o papatusi tetele.

4. Mataupu Faavae ma Feagaiga 10:43–46—Na faatusatusa e le Atua le anotusi o itulau gaoia (tagai fuaiupu 44) i le mea o le a faaliliu e Iosefa i le agai i luma (tagai fuaiupu 45–46).

O le poto o le Atua i o tatou olaga

Fesoasoani i tagata aooga ia iloa le ala e mafai ai e le poto o le Atua ona faamanuiaina o latou olaga. E mafai ona faia lenei mea e ala i le faia o se talanoaga a le vasega e faaaoga ai fesili e pei o nei:

• Aisea e te manatu ai e finagalo le Atua i tupulaga talavou i aso nei ia iloa mea na Ia a’oa’o atu ia Iosefa Samita i lenei vaega?

• O le a se mea ua saunia e le Atua e fesoasoani ia i tatou e sosola ese ai mai le faitogafiti-poto o Satani ma faaauau ai pea ona faia Lana galuega?

Uunaia tagata aoao e faasoa mai upumoni o loo latou aoaoina: Mo nisi faataitaiga i le auala e faia ai lenei mea, tagai i le aoaoga ua faaautuina “Uunaia tagata aoao e faasoa mai upumoni o loo latou aoaoina” i le Atinaega o Tomai Faafaiaoga. O lenei aoaoga o le a fesoasoani ia te oe e faataitai ai le valaauliaina o tagata aooga e fefaasoaai ma isi ia mea ua latou aoaoina.

Valaaulia tagata aooga e toe tilotilo i tua ia latou tusiga i a latou api talaaga. Fai atu ia i latou e faaopoopo atu i ai e ala i le faamaumauina o le ala na saunia ai e le Atua se ala mo i latou e faatoilalo ai fuafuaga faitogafiti a le tiapolo i o latou olaga. E mafai foi ona latou faaaofia ai mea latou te lagona le fiafia e fai e talitonu atili ai i le atamai o le Atua e faataunuu lelei ai Lana galuega.

Faamautinoa atu i tagata aooga o le poto o le Atua e sili mamao atu i lo le tiapolo. Mafaufau e molimau atu i le mafanafana lea e sau mai le iloaina na muai silafia e le Atua ma saunia se ala mo i latou e i ai le faatuatua ia te Ia e faatoilalo ai fuafuaga faitogafiti uma a Satani.

Punaoa Faaopoopo

Pe na leiloloa aoaoga sa tatou manaomia i le leiloloa o itulau e 116?

Na aoao mai Elder Jeffrey R. Holland o le Korama a Aposetolo e Toasefululua e faapea, o “faamoemoega poto” o le Alii (1 Nifae 9:5; Upu a Mamona 1:7) mo le poloaiina o le tusiaina ma le faasaosaoina o papatusi laiti a Nifae, ua ova atu lona suitulaga mo le leiloloa o itulau e 116 o tusitusiga:

A o faatonu e le Alii ia Iosefa i le faiga o le faaliliuina ma le tuuina o mea mai papatusi laiti i totonu o le mea na amataina o le faaliliuga o le faapuupuuga o papatusi tetele, sa ia fetalai ai, ‘Faauta, e tele mea ua togitogia i luga o papatusi [laiti] a Nifae ua tuuina mai ai ni vaaiga tetele atu e uiga i la’u talalelei’ (ua faaopoopo le faamamafa). …

… E tele atu mea na tatou toe maua mai nai lo o mea na leiloloa. Ma na silafia lava mai i le amataga o le a faapena lava. Sa mo se faamoemoega poto. Tatou te le iloa tonu po o a mea na tatou misia i itulau e 116, ae ua tatou iloa o mea na tatou maua i luga o papatusi laiti o tautinoga patino a molimau maoae e toatolu, o le tolu o siufofoga maoae faale-aoaoga faavae o le Tusi a Mamona, ua molimau mai o Iesu o le Keriso. …

… I le avea ai ma tagata faitau o le Tusi a Mamona, ua i ai Nifae, Iakopo, ma Isaia e talanoa sa’o mai ia i tatou, o ni molimau patino ma vaaitino a le Faaola o le muai olaga. O i latou na mauaina faaaliga ofoofogia e uiga i le soifuaga ma le auaunaga, ma e uiga foi i le sootaga osifeagaiga a le Atua ma le Aiga o Isaraelu, anamua ma aso nei. …

Ou te manatu o le a manaia le manua’e i se aso o itulau e 116 o tusitusiga, ae afai e kiliva atu i latou i lo’u ofisa a taeao, o le a ou le faafesuiaia lava mo mea o loo i papatusi laiti a Nifae, ona o “vaaiga tetele atu” ua tuuina mai e ala i leoleo maoae faaperofeta o e ua tutu i le faitotoa o le tusi. (Jeffrey R. Holland, “A Standard unto My People” [saunoaga i Faiaoga o Aoga a le Ekalesia, Aug. 9, 1994], 7–9)

O a mea sa i itulau e 116 ?

I le faatomuaga i le uluai kopi o le Tusi a Mamona, na faamalamalama mai ai e Iosefa Samita:

Sa ou faaliliuina, e ala i le meaalofa ma le mana o le Atua, ma faia ia tusia, i le selau ma le sefuluono itulau, ia na ou aumai mai le Tusi a Liae, o se tala sa otootoina mai papatusi a Liae, i le lima o Mamona; o se tala lea na fai mai, o nisi tagata po o tagata ua gaoia ma taofia mai ia te a’u, e ui i a’u taumafaiga sili ia toe maua mai. (“Faatomuaga i le Tusi a Mamona, tusa o Aokuso 1829,” iii, josephsmithpapers.org)

Gaoioiga Faaopoopo e Aoao Ai

Togafiti a Satani

Mafaufau e amata le lesona e ala i le fesoasoani i tagata aooga ia iloa o loo faitogafiti ma taumafai Satani e taofi i tatou mai le faia o le galuega a le Atua. E mafai ona e faia se talanoaga a le vasega e ala i le faaali atu o se mailei ma fai atu fesili nei:

• E mafai faapefea e se mailei ona faatusa ai faamoemoega a Satani ia i tatou?

• O a ni mafaufauga ma ni fesili e ono oo atu i le mafaufau o se tasi ina ua uma ona pa’ū atu i se tasi o mailei a Satani?

Faaauau le lesona i le faamanatu atu i tagata aooga o le “mailei” na faataatia e Satani e faatatau i itulau e 116 o tusitusiga.

Ata vitio

Mafaufau e faaali le vitio “The Work of God” (13:35) e fesoasoani ai i tagata aooga e vaai faalemafaufau i mea na tutupu e taitai atu ai i faaaliga na tuuina mai e le Alii i le Mataupu Faavae ma Feagaiga 3 ma le 10. E mafai foi ona fesoasoani latou te malamalama ai i le ala na faaaofia ai e Mamona ia papatusi laiti a Nifae ua faaalia ai le poto o le Atua. Atonu na faaalia se vaega o lenei vitio i le lesona “Mataupu Faavae ma Feagaiga 3.”

The Work of God

(D&C 3,10) Martin Harris tells a young man the story of the lost manuscript, emphasizing that the works, designs and purposes of God cannot be frustrated.

O le faalagolago i le poto o le Atua e mafai ona fesoasoani ia i tatou e usitai ai i Ana faatonuga

E lei malamalama atoatoa Nifae po o Mamona i le manaomia ona foafoaina o papatusi laiti a Nifae pe faaaofia foi i faamaumauga a Mamona (tagai 1 Nifae 9:5–6; Upu a Mamona 1:6–7). Mafaufau e valaaulia tagata aooga e faitau le 1 Nifae 9:5–6 ma Upu a Mamona 1:6–7, ma vaavaai pe aisea o le a usitaia ai e Nifae ma Mamona se poloaiga laua te lei malamalama i ai. A uma ona faasoa mai e tagata aooga mea na latou maua, e mafai ona e fai atu ia i latou e faasoa mai ni mea na poloaiina i tatou e le Atua e fai mo mafuaaga tatou te le malamalama atoatoa i ai. Valaaulia i latou e faasoa mai mea ua latou iloa e uiga i le Atua e fesoasoani ia i latou e usitai ai ia te Ia tusa lava pe lei malamalama pe aisea e tatau ai.

O Faamoemoega o le Tusi a Mamona

E mafai ona e valaaulia tagata aooga e faitau le Mataupu Faavae ma Feagaiga 10:46–50, 57–68, ma vaavaai mo faamoemoega o le Tusi a Mamona. Mo se faataitaiga, ua tatou aoaoina o le Tusi a Mamona ua aumaia ai i le malamalama ia aoaoga faavae moni o le Faaola (tagai i le fuaiupu 62) ma o le Tusi a Mamona ua faatuina ai Lana talalelei “ina ia mafai ona lē i ai o ni finauga e tele” (fuaiupu 63). Valaaulia tagata aooga e faasoa mai taimi na latou vaaia ai le faataunuuina o nisi o nei faamoemoega o le Tusi a Mamona i o latou olaga po o olaga o tagata latou te iloa.

Tatalo e le aunoa

E mafai ona valaaulia tagata aooga e faitau le Mataupu Faavae ma Feagaiga 10:5 ma vaavaai mo faamanuiaga ua ofoina mai e le Alii ia i latou o e tatalo e le aunoa. Valaaulia i latou e faasoa mai pe na faapefea ona fesoasoani le tatalo faifai pea ia i latou e “o ese ai ma le manumalo.” Ona mafai lea e tagata aooga ona saili mo le fasifuaitau “tatalo e le aunoa” i isi tusitusiga paia ma faaopoopo i ai faamanuiaga folafolaina latou te maua i na fuaitau (o faataitaiga e aofia ai le 3 Nifae 18:15–21; Mataupu Faavae ma Feagaiga 19:38; 93:49).