Lesona 22: Mataupu Faavae ma Feagaiga 10–11

Mataupu Faavae ma Feagaiga 11:1–7

“Ia Teu … Olataga Tumau e Faavavau i le Malo o le Atua”

O ai tatou te filifili e mulimuli i ai, o mea tatou te sailia, ma le auala tatou te faaaluina ai o tatou taimi e mafai ona aafia tele ai po o ai e i’u ina avea ai i tatou. I le avea ai ma se vaega o le Toefuataiga, na tuuina mai ai e lo tatou Faaola alofa se fautuaga agaalofa i le mea e tatau ona taulai i ai o tatou olaga. O lenei lesona e mafai ona fesoasoani i tamaiti aoga ia lagonaina se manao sili atu e saili i le meaalofa o le ola e faavavau lea ua ofoina mai e Iesu Keriso ia i latou uma o le a mauaina.

Gaoioiga E Ono Mafai Ona Aoao Ai

O savali e taua tele le toe fai soo

Ina ia amata le lesona, e mafai ona e valaaulia tamaiti aoga e mafaufau e uiga i savali o loo ta’ua soo. Atonu latou te ta’ua savali latou te matauina i faasalalauga faalauiloa, musika, po o ata. Valaaulia i latou e mafaufau pe aisea e masani ona ta’u soo ai nisi o nei savali. E mafai ona fesoasoani lenei mea e saunia ai i latou e mafaufau e uiga i savali e masani ona ta’ua soo e le Alii ma pe aisea foi.

• O a nisi o savali patino ua musuia ai e Iesu Keriso Ana perofeta soifua e toe fai soo?

• O a ni savali faifai pea ua e matauina i totonu o lau suesuega o le Mataupu Faavae ma Feagaiga?

• O a ni mea e mafai ona tatou aoaoina e uiga i le Faaola e ala i nei savali faifai pea?

I le 1829, e toatele tagata—e pei o Oliva Kaotui, Ailama Samita, Iosefa Knight le Matua, ma Tavita Uitimera—sa mananao e aoao mea e finagalo Iesu Keriso latou te iloa ma faia. O nisi o tali alofa a le Faaola e aofia ai upumoni faifai pea e finagalo o Ia ia tatou malamalama uma i ai ma ola ai.

Mafaufau e valaaulia tamaiti aoga e fai ni vaega taitoafa ma valaaulia tamaiti aoga taitasi e sue i se tasi o vaega nei. E mafai e se tamaitiiti aoga se toatasi ona faitau leotele ia fuaiupu mai lana vaega. E mafai ona latou malolo pe a uma fuaiupu taitasi mo a latou paga e faasoa mai mea e tutusa ai ma eseesega latou te matauina mai fuaiupu e o faatasi ai i a latou vaega.

Faitau fuaiupu muamua e ono o vaega taitasi nei o le Mataupu Faavae ma Feagaiga: 6; 11; 12; ma le 14. Faatusatusa le savali a le Faaola i savali taitasi.

• Aisea e te manatu ai o le a filifili le Alii e toe fai ia fasifuaitau ma aoaoga patino o loo maua i nei fuaiupu?

“O lē ua ia maua le ola e faavavau, ua mauoa o ia”

Faitau le fuaiupu 7 i vaega 6 ma le 11, ma vaavaai mo le fautuaga a le Faaola ia i latou uma o e mananao e auauna atu ia te Ia.

• O a ni upu po o ni fasifuaitau mai lenei fuaiupu sa tumatila mai ia te oe? Aisea?

• O le a le fesoasoani a lenei fuaiupu ia te oe e te malamalama ai e uiga ia Iesu Keriso ma Lona finagalo mo i tatou?

Atonu e faasoa mai e tamaiti aoga se upumoni e talitutusa ma lenei: E finagalo Iesu Keriso e tuuina mai ia i tatou le ola e faavavau, o le meaalofa aupito sili lea ona taua i meaalofa uma.

Tuu atu i tamaiti aoga se avanoa ia loloto ai lo latou malamalama e faatatau i le uiga o le ola e faavavau ma pe aisea ua avea ai o se meaalofa taua tele mo i tatou le mauaina. E mafai ona e faia lenei mea e ala i le valaaulia o tamaiti aoga e suesue taitoatasi pe i ni vaega nisi o punaoa nei. I se isi itu, e mafai ona e tusia nei mau i ni fasipepa laiti faataamilo i le potu ma tuu atu i tamaiti aoga e savavali faataamilo i le potu ma suesue le leoa, ma tusi ni a latou lava faamatalaga.

• Autu ma Fesili, “Ola e Faavavau,” topics.ChurchofJesusChrist.org

• Ioane 17:3

• Faaaliga 21:3–4

• Mosaea 2:41

• Mataupu Faavae ma Feagaiga 76:69–70

• Mataupu Faavae ma Feagaiga 84:38

• Mataupu Faavae ma Feagaiga 88:107

• Mataupu Faavae ma Feagaiga 130:2

• Mataupu Faavae ma Feagaiga 132:20

Valaaulia tamaiti aoga e faasoa mai mea na latou aoaoina ma lagona i le taimi o le latou suesuega.

Mafaufau i mea na e aoaoina

Faaalu ni nai minute e talanoaina ai ma tamaiti aoga ni mea faalavelave e ono oo i ai i le sailia o le ola e faavavau. Valaaulia i latou e mafaufau loloto ma le filemu pe o le a le lelei o loo saunia ai i latou e a latou faaiuga o i ai nei ina ia maua le ola e faavavau. Mafaufau e fai le gaoioiga lenei e fesoasoani ai i tamaiti aoga ia lagonaina se manao sili atu e saili le ola e faavavau:

Lisi ni mafuaaga se tele i le mafai e gata ai mo le mafuaaga e mauoa ai se tagata e i ai le ola e faavavau (tagai i le Mataupu Faavae ma Feagaiga 11:7).

Mafaufau e valaaulia tamaiti aoga e tusi a latou tali i fesili sa i ai muamua i luga o le laupapa. Valaaulia volenitia e faamatala mai pe aisea e taua ai ia i latou mea na latou tusia. Atonu o se vaega anoa lenei o le lesona. Atonu e lelei le tuu atu i tamaiti aoga le tele o le taimi e tusitusi ai, mafaufau loloto, ma faasoa mai.

Faaiu le lesona i le valaaulia o tamaiti aoga e mafaufau pe mafai faapefea ona aafia o latou olaga i mea sa latou aoaoina ma lagonaina i le aso. O fesili nei e mafai ona tuu atu ai i tamaiti aoga se avanoa e tusifaamaumau ai o latou mafaufauga ma lagona i totonu o latou api talaaga mo suesuega.

• O le a se mea ua e aoaoina i le aso e faateleina ai lou manao ia lagona le latalata atu i le Tama Faalelagi ma Iesu Keriso?

• O a nisi o auala e mafai ona e aloese ai mai le faatagaina o sailiga faalelalolagi e faamuamua i lo le alualu i luma i le ola e faavavau?

Punaoa Faaopoopo

Aisea e sili atu ai le taua o le ola e faavavau nai lo oa faalelalolagi?

Na aoao mai Elder D. Todd Christoffferson o le Korama a Aposetolo e Toasefululua:

O i tatou o fanau a le Atua, ua vaetofia mo le tino ola pea ma le ola e faavavau. …

I le faaiuga, o le faamanuiaga o se sootaga vavalalata ma le mausali ma le Tama ma le Alo tatou te sailia. E faia ai le eseesega uma, ma e taua e faavavau le tau. (D. Todd Christofferson, “O Lo Tatou Sootaga ma le Atua,” Liahona,” Me 2022, 79–80)

E mafai faapefea ona ou iloa atili le Tama Faalelagi?

Sa saunoa mai Elder Jeffrey R. Holland o le Korama a Aposetolo e Toasefululua:

O le tele o faamoemoega maoae na ausia i le soifuaga ma le galuega a le Alii o Iesu Keriso, e tasi le vaega maoae o lena lava misiona e masani ona le amanaiaina. Sa lei malamalama i ai i latou na mulimuli ia te Ia i lena taimi, ma o le toatele o le Au Kerisiano i ona po nei e le malamalama i ai i le taimi nei, ae sa masani ona fetalai soo ma faamamafaina e le Faaola lava Ia. O le aotelega silisili lea o le upumoni na afio mai Iesu e fetalai i ai ma fai, ae maise lava i Lana taulaga togiola ma le puapuagatia, na Ia aoao mai ai ia i tatou po o ai le Atua lo tatou Tama Faavavau, ae pe faapei foi o Ia, Lona tuuto atoatoa i Lana fanau i soo se augatupulaga ma soo se atunuu. Sa taumafai Iesu e ala i upu ma galuega e faaali ma faamanino mai ia i tatou le natura moni o Lona Tama, lo tatou Tama o i le Lagi.

Na Ia faia lenei mea o se vaega ona i le taimi lena ma le taimi nei, e moomia e i tatou uma ona iloa atoatoa le Atua ina ia mafai ai ona loloto atu le alofa ia te Ia ma atoatoa ona usiusitai ia te Ia. (Jeffrey R. Holland, “O Le Silisiliese o le Atua,” Liahona, Nov. 2003, 70)

Mataupu Faavae ma Feagaiga 11:7. O le a le poto tatou te sailia e tau atu i le ola e faavavau?

Na aoao mai Elder Christoffel Golden o le Fitugafulu:

O la tatou sailiga mo le ola e faavavau e leai lava se isi mea nai lo se sailiga ia malamalama po o ai le Atua ma ia toe foi atu e mau faatasi ma Ia. Sa tatalo le Faaola i Lona Tama, “Ma o le ola e faavavau foi lenei ia latou iloa oe le Atua moni e toatasi atoa ma le ua e auina mai o Iesu Keriso lea” [Ioane 17:3]. (Christoffel Golden, “O Le Tama ma le Alo,” Liahona, Me 2013, 99–100)

O le a le taua o le faatusatusaina e le Faaola o Lana afioga i se pelu faataumaai itu?

O le faaaogaina ma le faatusa o se pelu faataumaai itu sa taatele i le lalolagi anamua ma o loo i ai i le Feagaiga Tuai ma le Feagaiga Fou (tagai Faamasino 3:16; Salamo 149:6; Faataoto 5:4; Eperu 4:12; Faaaliga 1:16; 2:12). O se pelu faataumaai itu e mafai ona tipiina ai itu uma e lua ma ofoina atu ai le tele o itu lelei i le taimi o le taua. I lana talafaatusa i le ofutau o le Atua, sa faatusa ai e le Aposetolo o Paulo le pelu a le Agaga i le afioga a le Atua (tagai Efeso 6:17).

I le Eperu 4:12, o loo faapea mai le afioga a le Atua ia “vave, ma mamana, ma sili atu ona maai nai lo soo se pelu faataumaai itu.” Sa faaaoga e le Faaola nei lava upu i o tatou aso ina ua faamatalaina Lana afioga (tagai Mataupu Faavae ma Feagaiga 6:2; 11:2; 12:2; 14:2; 33:1). O le upu Eleni mo le vave o lona uiga o le ola ma olaola. O le upu Eleni mo le mamana o lona uiga o le malosi, toaga, ma le mataalia.

Gaoioiga Faaopoopo e Aoao Ai

“Ia faafofoga mai ai i au upu”

Valaaulia tamaiti aoga e matau pe na faapefea ona faamatala e le Faaola Lana “upu” i le fuaiupu 2 o le Mataupu Faavae ma Feagaiga 6; 11; 12; ma le 14.

Ina ia fesoasoani i tamaiti aoga ia malamalama atili i le mana o le afioga a le Atua, mafaufau e vavae i ni vaega taitoafa ma tofi atu i tamaiti aoga taitasi i le vaega se tasi o fuaitau nei o mau. Valaaulia i latou e suesue a latou fuaitau ma faasoa atu i a latou vaega mea na latou aoaoina e uiga i le afioga a le Atua ma pe na faapefea ona faamanuiaina ai i latou i fuaitau eseese. Fautuaina foi tamaiti aoga e vaavaai mo faatusatusaga na faia i le va o le afioga a le Atua ma se pelu.

• Alema 31:5. Na sauni Alema e aoao atu sa Sorama.

• Helamana 3:29. Na faamatalaina e Mamona le ala na aumaia ai le faitau afe o agaga i le upumoni.

• Iosefa Samita—Talafaasolopito 1:11–12. Sa suesue Iosefa Samita talavou ia tusitusiga paia mo le poto.

• Eperu 4:12. Sa faatonuina e Paulo ia Isaraelu anamua.

Mafaufau e tusi se pelu e tasi le mata ma se pelu faataumaai itu i luga o le laupapa. Valaaulia tamaiti aoga mai vaega eseese e talanoaina soo se itu lelei e ono i ai i se pelu faataumaai itu ma lisi mea na latou aoaoina mai tusitusiga paia i autafa o le ata.

Mo se faataitaiga, atonu e maua e tamaiti aoga mai le Alema 31:5 e faapea o le afioga a le Atua e sili atu ona mamana nai lo se pelu. Mai le Helamana 3:29 atonu latou te vaai ai i le ala e vaeluaina ai le afioga a le Atua ma tuueseese ai le upumoni mai mea sese. Mai mea na tutupu ia Iosefa Samita atonu latou te matauina ai e mafai e le afioga a le Atua ona ulufia o tatou loto ma fesoasoani ia i tatou e faatino i le amiotonu. Mai le Eperu 4:12 atonu e iloa ai e tamaiti aoga o le afioga a le Atua e mafai ona tuia ai o tatou mafaufau ma agaga.

Vitio: “O Le Manaoga Faamaoni o le Agaga”

Afai e mafai ona manuia tamaiti aoga mai le vaai pe mafai faapefea e mea faalavelave ma le tele naua o mea lelei ona aafia ai lo latou alualu i luma i le ola e faavavau, mafaufau e faaali atu se vitio e pei o le “The Soul’s Sincere Desire”(3:28), o loo maua i le ChurchofJesusChrist.org.

The Soul’s Sincere Desire

A o matamata tamaiti aoga, valaaulia i latou e mafaufau i mea e manaomia ona latou faia i aso taitasi ma pe faapefea ona latou filifili e faaalu o latou taimi avanoa. A uma le vitio, e mafai e tamaiti aoga ona fai se lisi o mea uma latou te faia i le taimi o se aso averesi ma faamamafa atu gaoioiga e faalatalata atili atu ai i latou i le Faaola ma aveese soo se mea e mafai ona faataumamao ai i latou mai ia te Ia.