Mataupu Faavae ma Feagaiga 10–11

Mataupu Faavae ma Feagaiga 10–11

Vaaiga Aoao

Sa faamalamalama mai e le Alii le mea na tupu i itulau tusitusia e 116 na leiloloa o le Tusi a Mamona ma le ala e tatau ona faaauau ai le galuega o le faaliliuga. Sa manao Ailama Samita e fesoasoani i le Toefuataiga o le Ekalesia a le Alii ma sa tuuina atu i ai le fautuaga i le auala e saunia ai o ia e auauna atu.

Faamalosiau i tagata aoao e faasoa mai upumoni o loo latou aoaoina: O le tuuina atu i tamaiti aoga o se avanoa e faaleo mai ai mafaufauga ma lagona e mafai ona fesoasoani latou te lagona ai le aoao atu o le Agaga Paia pe molimau mai i le upumoni. Saili ni taimi i le lesona e mafai ai ona e valaaulia tamaiti aoga e mafaufau loloto i mea ua latou aoaoina ma faasoa mai. Mo nisi faamatalaga i le ala na faia ai e le Faaola lenei mea, tagai i le vaega “Na Faamalosi le Faaola i Isi e Faasoa atu Mea Moni o loo latou Aoaoina” i le Aoao atu i le Ala a le Faaola. E mafai foi ona e vaai i se faataitaiga o le auala e faia ai lenei mea i le lesona i lenei vaiaso ua faaulutalaina “Mataupu Faavae ma Feagaiga 10.”

Saunia e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia mo lesona taitasi.

Mataupu Faavae ma Feagaiga 10

Faamoemoega o le lesona: Ina ia fesoasoani i tamaiti aoga ia faateleina lo latou talitonuga o le a fesoasoani le Atua ia i latou e faatoilalo fuafuaga faitogafiti a Satani

• Sauniuniga a le tamaititi aoga: Mafaufau e valaaulia tamaiti aoga e faitau le Au Paia, 1:51–53 e fesoasoani ia i latou e manatua ai mea na tutupu i le leiloloa o itulau e 116 o tusitusiga ma lagona faanoanoa na lagonaina e Iosefa ma lona aiga i lena taimi.

• Pepa e tufa atu: “O Le Poto o le Atua”

Mataupu Faavae ma Feagaiga 11:1–7

Faamoemoega o le lesona: Ina ia fesoasoani i tamaiti aoga ia lagona se manao sili atu e saili i le meaalofa o le ola e faavavau lea ua ofo mai e Iesu Keriso ia i latou uma o e o le a mauaina

• Sauniuniga a le tamaititi aoga: Valaaulia tamaiti aoga e faitau le Mataupu Faavae ma Feagaiga 11:7 ma faatusatusa le faauigaga e le lalolagi o le mauoa i le faauigaga e le Alii. Valaaulia i latou e mafaufau loloto pe aisea e eseese ai faauigaga.

• Anomea: O mau fefaasinoai ma punaoa o loo tusia i luga o fasipepa e tuu faataamilo i le potu

Mataupu Faavae ma Feagaiga 11:8–30

Faamoemoega o le lesona: Ina ia fesoasoani i tamaiti aoga e saili le fesoasoani a le Alii e saunia ai e auai i Lana galuega

• Sauniuniga a le tamaititi aoga: Valaaulia tamaiti aoga e mafaufau loloto pe aisea e taua ai o tatou manaoga i le Alii ma mafaufau i auala e mafai ona latou faamalosia ai lo latou manao e auauna atu ia te Ia ma le faamaoni faateleina.