“Lesona 20—Faataitaiga o le Atamai i Aoaoga Faavae 1: Taulotoina ma le Mauaina o le Malamalama Faaleagaga,” Tusi Lesona a le Faiaoga Seminare o le Mataupu Faavae ma Feagaiga (2025)
“Faataitaiga 1 o le Atamai i Aoaoga Faavae,” Tusi Lesona a le Faiaoga Seminare o le Mataupu Faavae ma Feagaiga
Lesona 20: Mataupu Faavae ma Feagaiga 6-9
Faataitaiga o le Atamai i Aoaoga Faavae 1
Taulotoina ma le Mauaina o le Malamalama Faaleagaga
O le atamai i aoaoga faavae e mafai ona fesoasoani i tamaiti aoga e fausia le faavae mo o latou olaga i luga o Iesu Keriso ma Lana talalelei. O lenei lesona o le a tuuina atu ai i tamaiti aoga ni avanoa e aoao ai fuaitau o le atamai i aoaoga faavae ma upumoni o loo i ai faapea foi ma le aoaoina ma le faaaogaina o mataupu faavae paia mo le mauaina o le malamalama faaleagaga.
Gaoioiga E Ono Mafai Ona Aoao Ai
Iloiloga o le Atamai i Aoaoga Faavae: Tauloto
Atonu ua uma ona e faailoa atu i tamaiti aoga ni nai fuaitau o le atamai i aoaoga faavae i le Mataupu Faavae ma Feagaiga i lenei tausaga. Atonu na aofia ai Iosefa Samita—Talafaasolopito 1:15–20, Mataupu Faavae ma Feagaiga 1:30, ma le Mataupu Faavae ma Feagaiga1:37–38. O le gaoioiga lenei e tuu atu ai i tamaiti aoga se avanoa e toe faamanatu ai na fuaitau e tolu ma faamasani i latou i isi fuaitau o le atamai i aoaoga faavae e iva mai le Iosefa Samita—Talafaasolopito 1:15–20 e oo i le Mataupu Faavae ma Feagaiga 49:15–17. Afai e te lagona o le a sili atu mo au tamaiti aoga, e mafai ona e fetuunaia e tilotilo agai i na o fuaitau o le atamai i aoaoga faavae ua aoaoina e tamaiti aoga i le taimi nei.
O lenei gaoioiga e na o le 10–15 minute le umi ina ia lava ai le taimi mo le faaaogaina o le faataitai o le atamai i aoaoga faavae i se taimi mulimuli ane o le lesona.
Aumai ni meafaigaluega i le vasega e ono iloa e tamaiti aoga ma iloa pe faapefea ona faaaoga. E mafai ona aofia ai se auvili, samala, ma le ’ili.
-
O afea e te faafetai ai i le i ai o se tasi o nei meafaigaluega?
Faataga ni nai tamaiti aoga e faasoa mai. Atonu latou te faasoa mai ni aafiaga patino pe vaai faalemafaufau i tulaga. E mafai ona maua e tamaiti aoga le fiafia ma fatufatua’i ma a latou tali.
-
O a nisi o tulaga o le a e faafetai ai i le taulotoina o se mau?
O fuaitau o le atamai i aoaoga faavae o se filifiliga o mau e mafai ona fesoasoani faapitoa ia te oe ma isi. I le seminare, e te maua ai avanoa e tauloto ai mau faasino ma fasifuaitau autu o fuaitau o le atamai i aoaoga faavae. Atonu foi e te taumafai e tauloto ia fuaiupu uma o nisi o nei fuaitau.
Faitau ma faailoga ia fuaitau nei i au tusitusiga paia. Filifili se tasi pe lua e te lagona e sili ona taua ia te oe.
Faaali atu le siata o loo lisi ai fuaitau o le atamai i aoaoga faavae ma fasifuaitau autu o mau. Tuu atu i tamaiti aoga se taimi ia lava e faailoga ai fuaitau taitasi.
|
Mau faasino o le atamai i aoaoga faavae |
Fasifuaitau autu o le mau |
|---|---|
Mau faasino o le atamai i aoaoga faavae | Fasifuaitau autu o le mau O Iosefa Samita na “vaai i ni Tagata se toalua, o lo laua pupula ma le mamalu e le mafaamatalaina.” |
Mau faasino o le atamai i aoaoga faavae | Fasifuaitau autu o le mau O Le Ekalesia a Iesu Keriso o le “ekalesia moni ma ola e tasi.” |
Mau faasino o le atamai i aoaoga faavae | Fasifuaitau autu o le mau “Pe i lo’u leo po o i le leo o a’u auauna, ua tutusa lava.” |
Mau faasino o le atamai i aoaoga faavae | Fasifuaitau autu o le mau “Vaai mai ia te aʼu i mafaufauga uma; aua le masalosalo, aua le fefefe.” |
Mau faasino o le atamai i aoaoga faavae | Fasifuaitau autu o le mau “O le a Ou taʼu atu ia te oe i lou mafaufau ma lou loto, e ala i le Agaga Paia.” |
Mau faasino o le atamai i aoaoga faavae | Fasifuaitau autu o le mau O le Perisitua Arona e umia ki o auaunaga a agelu, ma o le talalelei o le salamo, ma o le papatisoga.” |
Mau faasino o le atamai i aoaoga faavae | Fasifuaitau autu o le mau “Ua tele lava le taua o agaga i le silafaga a le Atua.” |
Mau faasino o le atamai i aoaoga faavae | Fasifuaitau autu o le mau “E matua tele lo oulua olioli pe afai lua te ʼaumai ni agaga e toatele ia te aʼu!” |
Mau faasino o le atamai i aoaoga faavae | Fasifuaitau autu o le mau “O Au, [Iesu Keriso], na mafatia i nei mea mo tagata uma.” |
Mau faasino o le atamai i aoaoga faavae | Fasifuaitau autu o le mau O “upu a perofeta ia outou talia, e pei lava ua mai i loʼu lava gutu.” |
Mau faasino o le atamai i aoaoga faavae | Fasifuaitau autu o le mau “O le a ou faaali atu au lava mai le lagi i le mana ma le mamalu … ma mau faatasi ma tagata i le amiotonu i luga o le lalolagi i le afe o tausaga.” |
Mau faasino o le atamai i aoaoga faavae | Fasifuaitau autu o le mau “O le faaipoipoga ua faauuina e le Atua.” |
Faaalu sina taimi e taumafai ai e tauloto le mau ma le fasifuaitau autu i se fuaitau se tasi pe lua e sili ona aoga ia te oe. Mafaufau foi i se tulaga o le i ai o le mau ma le fasifuaitau autu ua taulotoina atonu o se faamanuiaga ia te oe po o se isi tagata.
Ia lava se taimi e tuu atu i tamaiti aoga e amata ai ona tauloto ia mau ma fasifuaitau autu o mau na latou filifilia. Atonu e fesoasoani le faailoa atu i tamaiti aoga o le polokalama o le Atamai i Aoaoga Faavae e mafai foi ona fesoasoani ia i latou e tauloto ia fuaitau o le atamai i aoaoga faavae.
A ua lava loa se taimi o tamaiti aoga, valaaulia nisi e faataitai ona faasoa mai fasifuaitau autu o mau ua amata ona latou taulotoina. E mafai foi ona e valaaulia i latou e faamatala mai pe aisea e ono aoga ai mo i latou le taulotoina o nei mau ma fasifuaitau.
Faamalosiau i tamaiti aoga e faaauau le taulotoina o mau fefaasinoai ma fasifuaitau autu o mau i le tausaga atoa. E mafai foi ona latou taulotoina le mau atoa pe afai latou te mananao ai.
Aoao ma faaaoga mataupu faavae o le mauaina o le malamalama faaleagaga
O le vaega o totoe o le lesona e vaai agai i le fesoasoani ai i tamaiti aoga e faaaoga mataupu faavae o le mauaina o le malamalama faaleagaga i se tulaga moni o le olaga. A o lei faitauina le tulaga o i lalo, atonu e aoga le valaaulia muamua o tamaiti aoga e toe faamanatu ia mataupu faavae o le mauaina o le malamalama faaleagaga. O gaoioiga toe faamanatu fautuaina o loo aofia atu i le vaega o le faaopoopoga ua faaautuina “Gaoioiga o le Iloiloga o le Atamai i Aoaoga Faavae.” O loo maua faamatalaga o mataupu faavae i parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2023).
Sa amata ona suesue e Ava ia le Iosefa Samita—Talafaasolopito ma le Mataupu Faavae ma Feagaiga ma na maua se aafiaga lelei. Ae peitai, sa ia maua ni faamatalaga le lelei i luga o ala o faasalalauga tau agafesoota’i e uiga i le Perofeta o Iosefa Samita lea na le mautonu ma popole ai o ia.
Afai e aoga, e mafai ona e fai atu fesili tulitatao e pei o le “Aisea e ono le mautonu ai pe popole o ia?“
Mafaufau e tuu tamaiti aoga i ni vaega toalaiti ma valaaulia i latou e aumai manatu i ni auala e mafai ai e mataupu faavae o le mauaina o le malamalama faaleagaga ona fesoasoani ia Ava i lenei tulaga. Afai e aoga, e mafai ona e faaali atu nisi po o gaoioiga uma nei, ma e mafai ona e fai i kulupu e faamae’a o se vaega o le faaaliga o latou manatu.
Iloilo manatu faavae ma fesili faatasi ma se vaaiga e faavavau
-
Lisi ni perofeta se toatolu mai le taimi ua tuanai lea na mulimuli ai nisi o tagata i le faatuatua a o isi sa lei mulimuli ai i latou ma atonu foi na faitioina e i latou.
-
O a nisi o mafuaaga na mulimuli ai nisi o tagata ae faitio isi?
-
Na faapefea ona faamanuiaina e le Alii i latou o e na mulimuli i Ana perofeta?
-
E mafai faapefea e le mafaufau loloto i nei mea e uiga i perofeta ua mavae ona tuuina mai ia i tatou se vaaiga sili atu e feagai ai ma faamatalaga le lelei e uiga ia Iosefa Samita?
-
Afai e ta’ua e tamaiti aoga se atugaluga taufaasolopito e uiga i le Perofeta, o le faitauina o parakalafa 9–10 i le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2023) e mafai ona aoga.
Saili le malamalama atili e ala i punaoa faalelagi ua filifilia
-
Saili se tasi o punaoa faalelagi filifilia e uiga i le Perofeta o Iosefa Samita e te manatu e mafai ona fesoasoani ia Ava. O mea nei e mafai ona fesoasoani ia te oe e faia ai lenei mea:
-
Sue fuaiupu i le Iosefa Samita—Talafaasolopito po o le Mataupu Faavae ma Feagaiga ua e suesueina e faapupula mai ai mea e mafai ona tatou faia pe a tatou feagai ma se masalosalo po o ni fesili.
-
Sue le “Iosefa Samita” i le Taiala i Tusitusiga Paia po o le Taiala mo Autu. Pe saili le “Iosefa Samita” i le faasino upu o le Liahona o le po o luga o le polokalama o le Gospel Library.
-
Afai e i ai i lou mafaufau se faamatalaga le lelei patino e ono fai mai ai se tasi e uiga i le Perofeta, tagai i autu i le vaega O Autu ma Fesili o le ChurchofJesusChrist.org e vaai pe o i ai ni faamatalaga e ono fesoasoani. Mafaufau foi i se tagata faatuatuaina e mafai ona e fautuaina atu lenei talavou e talanoa i ai.
-
Faatino i le faatuatua
-
E ala mai ia Iosefa Samita, na aumaia ai e le Alii mea nei: o le Tusi a Mamona, o le Toefuataiga o le Ekalesia moni ma le ola i luga o le fogaeleele, o feagaiga ma sauniga e tatau ai mo le faaeaga, ma le tele o le Mataupu Faavae ma Feagaiga. Mafaufau loloto i auala patino ua uma ona faamanuiaina ai lou olaga e le Alii e ala i nei mea ma pe mafai faapefea ona latou fesoasoani e faamalosia lau molimau e uiga i le Perofeta. Mafaufau i mea na e faia ina ia maua ai nei faamanuiaga. Lisi ni auala e mafai ona e fautuaina atu ai Ava e galue i le faatuatua e faaauau ai ona faamalosia lana molimau ia Iosefa Samita o se perofeta a le Atua.
A uma ua lava se taimi o tamaiti aoga e faaali manatu ai ma faia nisi o gaoioiga o loo i luga, valaaulia i latou e faasoa mai mea latou te lagona atonu e sili ona aoga ia Ava. Faamalosiau i le tele o tamaiti aoga e faasoa mai. Atonu foi e te mafaufau e fesili, “O a isi auala e te manatu e mafai ona tatou faaaogaina ai mataupu faavae o le mauaina o le malamalama faaleagaga e fesoasoani ai i se tasi i lenei tulaga?”