Lesona 17: Mataupu Faavae ma Feagaiga 6-9

Mataupu Faavae ma Feagaiga 6

“Vaai mai ia te A’u i Mafaufauga Uma; Aua le Masalosalo, Aua le Fefefe”

I le aso 5 o Aperila, 1829, sa feiloai ai Oliva Kaotui ma Iosefa Samita mo le uluai taimi. I le lua aso mulimuli ane, na avea o ia ma tusiupu a Iosefa mo le faaliliuga o le Tusi a Mamona. O leMataupu Faavae ma Feagaiga 6 o loo aofia ai fautuaga mai le Alii o loo faaalia ai le tele o fesili ma atugaluga na i ai ia Oliva e uiga i le auai i le galuega a le Alii. O lenei lesona ua faamoemoe e fesoasoani i tamaiti aoga e tuu atu lo latou faatuatuaga i le Faaola pe a latou feagai ma masalosaloga ma le fefe.

Gaoioiga E Ono Mafai Ona Aoao Ai

Masalosaloga ma le fefe

Mafaufau e tusi le fesili lenei i luga o le laupapa ma valaaulia tamaiti aoga e tusi a latou tali i lalo ifo. E mafai ona faia lenei mea a o lei amataina le vasega po o le amataga o le lesona.

• O a ni mea atonu o fefefe, masalosalo, pe popole ai tupulaga talavou?

A uma ona talanoaina le fesili na muamua atu, valaaulia tamaiti aoga e mafaufau e uiga i le fefe, masalosaloga, po o popolega e ono i ai i o latou olaga. Faamalamalama atu o le Mataupu Faavae ma Feagaiga 6 o loo i ai upumoni e mafai ona fesoasoani ia i latou i taimi faapena. Valaaulia tamaiti aoga e vaavaai mo nei upumoni, a o latou suesue.

Ua amata ona fesoasoani Oliva Kaotui ia Iosefa Samita

Faamalamalama atu o le Mataupu Faavae ma Feagaiga 6 o loo i ai se faaaliga na tuuina mai ia Oliva Kaotui. Ina ia fesoasoani i tamaiti aoga ia malamalama i le ala na feiloai muamua ai Oliva ma Iosefa Samita, e mafai ona e faaali atu le vitio “Days of Harmony” mai le faailo taimi 3:07 i le 7:18. O loo maua lenei vitio i le ChurchofJesusChrist.org I se isi itu, e mafai e le vasega ona faitau le Au Paia: O Le Tala o le Ekalesia a Iesu Keriso i Aso e Gata Ai,vol. 1, O Le Tagavai o le Upumoni, 1815–1846 (2018), itulau 58–60, pe e mafai foi ona e aoteleina le parakalafa lenei.

O Oliva Kaotui o se faiaoga sa amata ona nofotumau ma matua o Iosefa Samita i le tautoulu o le 1828. A o nonofo ai ma le aiga o Samita, sa iloa ai e Oliva le valaauga paia o Iosefa ma le faaliliuga faifai pea o le Tusi a Mamona. Sa lagona e Oliva le musumusuga e fesili atu pe mafai ona ia fesoasoani ia Iosefa i le faaliliuga. I le tautotogo o le 1829, sa malaga faatasi ai Oliva ma le uso o Iosefa o Samuelu i Haramoni, Penisilevania, e feiloai ma le Perofeta mo le taimi muamua.

• Ana faapea sa e i ai i le tulaga o Oliva Kaotui, o a ni fesili po o ni atugaluga atonu e i ai ia te oe i lea taimi?

E lei leva ona taunuu i Haramoni, ae avea Oliva ma tusiupu a Iosefa Samita. E ui ina sa maua muamua e Oliva se faamaoniga paia o le meaalofa faaperofeta a Iosefa e faaliliu ai, ae sa i ai lava ana fesili e uiga i lona lava auai ai i le galuega a le Alii. Sa maua e Iosefa Samita le faaaliga o loo tusia i le Mataupu Faavae ma Feagaiga 6 i le taimi lea.

Iloaina ma le faatuatuaina o le Faaola

Faitau le Mataupu Faavae ma Feagaiga 6:14–24, 32–37, ma vaavaai mo le fautuaga a le Alii ia Oliva. Ia gauai faapitoa atu i mea na aoao mai e le Alii e uiga ia te Ia lava lea e mafai ona fesoasoani ia i tatou i taimi o le lē mautonu po o le fefe.

E faaopoopo atu i le faitauina o nei fuaiupu, e mafai foi e tamaiti aoga ona matamata i le “Days of Harmony” mai le faailo taimi 15:02 i le 17:49.

Ina ia fesoasoani i tamaiti aoga e teuloto mea o loo latou faitauina, mafaufau e faaali atu se ata o Iesu Keriso i luga o le laupapa. A o faailoa mai e le vasega ia aoaoga a le Faaola mai nei fuaiupu, e mafai ona latou tusia faataamilo ia aoaoga i le ata i luga o le laupapa.

• O le a se mea na e aoaoina e uiga ia Iesu Keriso e mafai ona fesoasoani ia te oe e tuu atu ai lou faatuatuaga ia te Ia pe a e feagai ma le fefe, masalosaloga, po o popolega?

• E mafai faapefea e nei upumoni e uiga i le Faaola ona fesoasoani ia te oe i taimi faapena?

Vaai atu ia Iesu Keriso

O leMataupu Faavae ma Feagaiga 6:36 o se fuaitau o le atamai i aoaoga faavae. Mafaufau e valaaulia tamaiti aoga e faailoga ia fuaitau o le atamai i aoaoga faavae i se auala e iloga ina ia mafai ona e mauaina gofie.

Toe faitau le Mataupu Faavae ma Feagaiga 6:36–37 ma vaavaai mo valaaulia a le Faaola ia Oliva.

• E faapefea ona e aoteleina le upumoni na aoao mai i le fuaiupu 36?

Atonu e te manao e faamamafa faapea a o tatou vaai atu ia Iesu Keriso, e mafai ona tatou faatoilaloina le masalosalo ma le fefe.

O le a sou manatu i le uiga o le vaai atu ia Iesu Keriso i mafaufauga uma?

Ina ia fesoasoani i tamaiti aoga ia iloa le faiā i le va o aoaoga a le Faaola i fuaiupu 36 ma le 37, fuafua e faaali atu le ata mai le amataga o le lesona. Faamalamalama atu o le vaavaai i se mea o lona uiga o le vaai ma maitau. Ona fai atu lea o fesili nei:

• Aisea e te manatu e finagalo ai le Faaola tatou te “vaai” i Ona manu’a? (Mataupu Faavae ma Feagaiga 6:37).

• O le a se aafiaga e mafai e le manatuaina o Lana Togiola ma le Toetu ona i ai ia i tatou?

Ina ia fesoasoani i tamaiti aoga ia malamalama atili pe mafai faapefea ona latou vaai atu ia Iesu Keriso, mafaufau e faaali atu ata faataitai nei. E mafai foi ona e faia isi ata faataitai e talafeagai i tulaga o au tamaiti aoga.

E i ai ni fesili e lei taliina a Ana e uiga i le talalelei. O nisi taimi e lagona ai e ia e pei e le lava le malosi o lana molimau ina ia fesoasoani ai ia te ia e faatoilalo ona masalosaloga.

O loo tauivi Eric ma lagona o le faatauaina o lona tagata. Na te le lagonaina o matauina o ia e se tasi i le aoga.

O loo faigata i matua o Sofia ona tausia lo latou aiga i mea tautupe. Ua popole o ia nei le lava ni tupe a ona matua e taulima ai manaoga uma o lona aiga.

Mafaufau e vavae tamaiti aoga i ni vaega toalaiti ma tofi atu i vaega taitasi se tasi o ata faataitai e taulai i ai a o latou talanoaina fesili nei.

• O a ni auala e le itiiti ifo ma le tolu e mafai e nei tagata ona vaai atu ai ia Keriso i o latou tulaga?

• E mafai faapefea i le faiga o na mea ona faia se eseesega i olaga o nei tagata?

A uma ona talanoaina e tamaiti aoga i a latou vaega, valaaulia i latou e faasoa mai ni a latou tali i le vasega. I le avea ai ma se vaega o lenei talanoaga, atonu e fesoasoani le fesili i tamaiti aoga pe faapefea ona avea faatinoga na latou faailoa mai o ni faataitaiga o le vaavaai atu ia Keriso.

Mafaufau foi e valaaulia tamaiti aoga e faasoa mai ni faataitaiga pe na faapefea ona faamanuiaina i latou a o latou vaavaai atu ia Iesu Keriso i o latou olaga.

Faaaogaina i lou olaga

Ina ia fesoasoani i tamaiti aoga e faaaoga le fautuaga a le Faaola e vaavaai atu ia te Ia, valaaulia i latou e mafaufau e uiga i a latou lava mea e fefefe ai , masalosaloga, po o popolega na latou faailoa mai i le amataga o le lesona. Faaali atu fesili nei ma tuu atu le taimi i tamaiti aoga e tali ai i totonu o a latou api talaaga mo suesuega.

• O le a se mea ua e aoaoina pe lagonaina e uiga ia Iesu Keriso i lenei aso e mafai ona fesoasoani ia te oe i le fefe, masalosaloga, po o popolega o ia te oe?

• O a nisi o auala patino o le a e taumafai ai e faaaoga le fautuaga a le Faaola e “vaai atu ia te [Ia] i mafaufauga uma; aua le masalosalo, aua le fefe”?

Tauloto

Atonu e te manao e fesoasoani i tamaiti a’oga e tauloto le mau faasino ma le fuaitau autu o le mau o le Mataupu Faavae ma Feagaiga 6:36 ma iloilo ma i latou lesona i le lumanai. O le fasifuaitau autu o le mau o le fuaiupu atoa lea: “Vaai mai ia te au i mafaufauga uma; aua le masalosalo, aua le fefefe.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”

Punaoa Faaopoopo

O a ni lagona o le Faaola e uiga ia te a’u e ui lava i ni o’u atugaluga?

Na aoao mai Elder Dieter F. Uchtdorf o le Korama a Aposetolo e Toasefululua:

A’u uo talavou pele, pe ana faapea o loo i ai iinei le Faaola i le taimi nei lava, o le a Sana fetalaiga ia te outou?

Ou te talitonu o le a Ia amata e ala i le faailoa atu o Lona alofa loloto mo outou. Atonu Na te fetalai atu i ni upu, ae o le a tafe atu foi ma le malosi tele—mai le tau na ona i ai o Ia iinei—lea o le a lē mafaaseseina, ae o le a oo atu i le ta’ele o lou loto, ma faatumulia ai lou agaga atoa!

Ae, ona tatou te vaivai uma ma lē atoatoa, atonu o le a tolotolo atu ni popolega i lou mafaufau. Atonu o le a e manatuaina ni mea sese na e faia, o taimi na e lolo atu ai i faaosoosoga, o mea e te moomoo ma’imau pe a na e lē faia—pe moomoo foi sa lelei atu ona e faia.

O le a lagonaina e le Faaola mea na, ma ou te talitonu o le a Ia faamautinoa atu ia te oe i ni upu na Ia fetalaia i tusitusiga paia:

• “Aua le fefe” [Luka 5:10; 8:50; 12:7; Mataupu Faavae ma Feagaiga 38:15; 50:41; 98:1].

• “Aua le masalosalo” [Mataupu Faavae ma Feagaiga 6:36].

• “Ia outou loto tetele” [Mataio 14:27; Ioane 16:33; Mataupu Faavae ma Feagaiga 61:36; 68:6; 78:18].

• “Aua le atuatuvale o outou loto” [Ioane 14:1, 27].

(Dieter F. Uchtdorf, “O Iesu Keriso o le Malosiaga o le Autalavou,” Liahona, Nov. 2022, 9)

E faapefea ona ou vaai atu ia Keriso i mafaufauga uma?

Sa aoao mai Peresitene Henry B. Eyring o le Au Peresitene Sili:

O le ala i le faamoemoe a o tatou agai pea i luma sa tuuina mai e le Alii: “Vaai mai ia te aʼu i mafaufauga uma; aua le masalosalo, aua le fefefe” (MF&F 6:36). Sa ta’u mai e Peresitene Monson ia i tatou le auala e faia ai lena mea. E ao ona tatou mafaufau loloto ma faaaoga le Tusi a Mamona ma upu a perofeta. Tatalo e le aunoa. Ia talitonu. Auauna atu i le Alii ma o tatou loto atoa, manatu, mafaufau, ma le malosi atoa. E ao ona tatou tatalo ma le malosi atoa o o tatou loto mo le meaalofa o le alofa mama, le alofa le pona o Keriso (tagai Moronae 7:47–48). Ma e sili i lo mea uma, e ao ona tatou tumau ma mausali i le mulimulitaia o fautuaga faaperofeta. (Henry B. Eyring, “Aua le Fefe e Fai Mea Lelei,” Liahona, Nov. 2017, 103)

Sa faasoa mai e Elder Ulisses Soares o le Korama o le Toasefululua:

O le saili atu ia Keriso i mafaufauga uma, ma mulimuli ia te Ia ma o tatou loto atoa e manaomia ai lo tatou faaogatasi o ō tatou mafaufau ma manaoga ma Lna finagalo. … O lona uiga ia tatou faatautaia pea lava o tatou olaga ia ogatasi ma le talalelei a Keriso ma taulai atu i aso taitasi i mea uma e lelei. (Ulisses Soares, “Saili Atu ia Keriso i Mafaufauga Uma,” Liahona, Nov. 2020, 82–83)

O le a se mea e mafai ona tupu ia te au pe a ou vaai atu ia Keriso i mafaufauga uma?

Na aoao mai Peresitene Russell M. Nelson:

O la tatou taulaiga e tatau ona tāmau i le Faaola ma Lana talalelei. E faigata faalemafaufau le taumafai malosi e vaai atu ia te Ia i mafaufauga uma . Ae a tatou faia, e sosola ese o tatou masalosaloga ma popolega. (Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 41)

Gaoioiga Faaopoopo e Aoao Ai

Aoao e uiga ia Oliva Kaotui

Ina ia fesoasoani i tamaiti aoga e aoao e uiga i le talaaga o Oliva Kaotui i le amataga o le lesona, mafaufau e tuuina atu upu autu nei e faatatau ia Oliva i ni fasipepa: faiaoga, tusiupu, nofotumau, Haramoni, masalosaloga, filemu, ma le tatalo. Tuu fasi pepa i luga o le laupapa. A uma ona faitau mai le Au Paia, 1:58–60, fai i tamaiti aoga e aotele a latou faitauga e ala i le faatulagaina o fasipepa i le faasologa o taimi na tutupu ai i luga o le laupapa. O le a mafai e tamaiti aoga ona aoteleina mea na latou aoaoina.

E mafai foi e tamaiti aoga ona faitau atili e uiga ia Oliva Kaotui i lalo o le “O Autu o le Talafaasolopito o le Ekalesia” i luga o le polokalama o le Gospel Library.

Mau fefaasinoai ma sootaga

Mafaufau e tuu tamaiti aoga i ni vaega toalaiti ma valaaulia i latou e faaalu se taimi e vaavaai ai mo mau e mafai ona latou faaopoopo i ai o ni mau fefaasinoai po o ni sootaga i le Mataupu Faavae ma Feagaiga 6:36. E mafai ona latou suesue i upu e pei o le faatuatua, masalosalo, ma le fefe i le Taiala i Autu po o le Taiala i Tusitusiga Paia.

E mafai e tamaiti aoga ona faasoa mai mau na latou maua i a latou vaega ma le vasega. E mafai foi ona e fautuaina i latou e faaopoopo ni mau fefaasinoai po o sootaga i a latou mau i fuaitau e faasoa mai e a latou uo i le vasega. I se isi itu, e mafai ona latou lisiina mau fefaasinoai i a latou api talaaga mo suesuega.

Ata faatusi paia o le vaai atu ia Iesu Keriso

Ina ia fesoasoani i tamaiti aoga e vaai i faataitaiga mai tusitusiga paia o loo faapupula mai ai le vaavaai atu ia Iesu Keriso ma faamanuiaga e maua mai i lea faatinoga, mafaufau e valaaulia tamaiti aoga e suesue le Mataio 14:22–32 ma le Numera 21:4–11.

Ina ia fesoasoani i tamaiti aoga e vaai faalemafaufau i le aafiaga o Peteru i le Mataio 14, e mafai ona outou matamata i le “Wherefore Didst Thou Doubt?” (2:06). Ona outou talanoaina lea o le eseesega na aafia ai Peteru ina ua ia vaai atu ia Keriso ma ina ua ia taulai atu i le masalosalo ma le fefe.

“Ola i le Faatuatua, ae Le o le Fefe”

Mafaufau e faaali le vitio “Live by Faith, Not by Fear“ (1:09) e fesoasoani ai i tamaiti aoga ia iloa ma lagona le ala e mafai ai e le faalagolago i le Faaola ona fesoasoani ia i latou e faatoilalo masalosaloga ma le fefe latou te ono feagai i o latou olaga. E mafai ona e valaaulia tamaiti aoga e faasoa mai o latou manatu po o lagona pe a uma ona matamata i le vitio.