Lesona 19: Mataupu Faavae ma Feagaiga 6-9

Mataupu Faavae ma Feagaiga 8

“O Le Agaga o Faaaliga”

Sa faagaeetia Oliva Kaotui i le tomai o Iosefa Samita e faaliliu le Tusi a Mamona. Sa ia manao e tuuina atu e le Atua ia te ia lea lava meaalofa e tasi. Na folafola e le Alii ia Oliva Kaotui le meaalofa e faaliliu ai, e tusa ai ma lona faatuatua. I lena taimi, na aoao atu ai e Iesu Keriso ia Oliva le tele o mataupu faavae taua e uiga i faaaliga. O lenei lesona e mafai ona fesoasoani i tamaiti aoga ia faateleina ai lo latou tomai e iloa ai pe faapefea ona fetalai mai le Atua ia i latou e ala i le Agaga Paia.

Gaoioiga E Ono Mafai Ona Aoao Ai

Fesili e uiga i faaaliga

Ina ia fesoasoani i tamaiti aoga e amata ona suesue e uiga i faaaliga, mafaufau e faasoa atu mea nei:

E finagalo le Atua e fetalai mai ia i tatou ma e faia lea i ni auala eseese. E ala mai i le Agaga Paia, e saili ai le Atua “e fesoasoani ia i tatou i o tatou manaoga patino, tiutetauave, ma fesili ma fesoasoani ia i tatou e faamalolosia a tatou molimau” (Topics and Questions, “Revelation,” topics.ChurchofJesusChrist.org

• O a nisi o fesili o ia te oe, po o isi e te silafia, e uiga i le iloaina o faaaliga mai le Atua?

  Mafaufau e valaaulia tamaiti aoga e tusi a latou fesili i luga o le laupapa po o se pepa. E mafai ona e valaaulia tamaiti aoga e saili mo tali a o latou suesue i lenei aso. E le o i ai se faamoemoe e taliina uma fesili i le vasega, ae e mafai e tamaiti aoga ona tusi i lalo soo se manatu latou te mauaina. E mafai ona e faaaogaina fesili nei e fesoasoani ai i tamaiti aoga e mafaufau pe aisea e le mautonu ai tagata e uiga i faaaliga.

• Aisea e faigata ai ona iloa le taimi ma pe faapefea ona fesootai mai le Atua ia i tatou?

• Aisea e te manatu ai e taua le faaleleia o lo tatou tomai e iloa ai ma mulimuli i faaaliga mai le Atua?

E mafai ona e fai i tamaiti aoga e amata se itulau i a latou api talaaga mo suesuega pe fai se faamatalaga i le polokalama o le Gospel Library, lea e mafai ona latou faamaumau ai mea ua latou aoaoina e uiga i faaaliga mai le Alii. E mafai ona e tuuina atu se faataitaiga e ala i le faia o lea lava mea e tasi i luga o le laupapa. Mafaufau e amata i se ulutala e pei o le E mafai faapefea ona ou iloa o loo ou mauaina faaaliga mai le Atua?

Ua aoao e le Alii ia Oliva Kaotui e uiga i faaaliga

A o avea Oliva Kaotui o se tusiupu, sa mafai ona ia molimau atu na tuuina atu e le Alii le mana ia Iosefa Samita e faaliliu ai le Tusi a Mamona. Sa manao foi Oliva e faaliliu. Sa finagalo le Alii e tuu atu ia te ia le avanoa (tagai Mataupu Faavae ma Feagaiga 6:25). Ina ia fesoasoani ia faamanuiaina Oliva, na aoao mai ai e le Alii mataupu faavae taua e uiga i le mauaina o faaaliga.

O leMataupu Faavae ma Feagaiga 8:2–3 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala tulaga ese ina ia mafai ona latou mauaina gofie.

Faitau le Mataupu Faavae ma Feagaiga 8:1–3, vaavaai mo mea na aoao atu e le Alii ia Oliva e uiga i le mauaina o faaaliga.

• O le a se mea na e aoaoina mai nei fuaiupu e uiga i auala e mafai ai e le Alii ona fetalai mai ia i tatou e ala i le Agaga Paia?

  Fai i tamaiti aoga e lipoti mai mea na latou mauaina. I le i ai faatasi ma upumoni e mafai ona faailoa mai e tamaiti aoga, fesoasoani ia latou iloa e fesootai mai le Alii i o tatou mafaufau ma loto e ala i le Agaga Paia.

  Taulai atu i upumoni e oo atu ai i le liuaina: Mo nisi aoaoga faaopoopo i fesili e fesoasoani i tamaiti aoga e faailoa ma tau mai mataupu faavae e liua ai, tagai i le aoaoga ua faaautuina “Taulai atu i upumoni e taitai atu ai i le liua ma fausia ai le faatuatua ia Iesu Keriso,” o loo maua i le aoaoga o Tomai o le Atinaega o Faiaoga: Aoao Atu le Aoaoga Faavae.

  Mafaufau e tusi lenei mea moni i lalo o le ulutala o loo i le laupapa. O le tusia o se ata e pei o lea e mafai foi ona fesoasoani i tamaiti aoga e vaai faalemafaufau ai i aoaoga a le Alii i nei fuaiupu.

  

• E tusa ai ma lau suesuega patino ma aafiaga, o a nisi o auala e fesootai mai ai le Alii i o tatou mafaufau? E faapefea ona Ia fesootai mai i o tatou loto?

Na faasoa mai e Elder Richard G. Scott (1928–2015) o le Korama a Aposetolo e Toasefululua nisi o auala e fetalai mai ai le Atua i o tatou mafaufau ma loto e ala i le Agaga Paia:

Ou te molimau atu, e mafai ona fetalai mai le Alii, e ala i le Agaga Paia, i lou mafaufau ma le loto. O nisi taimi o uunaiga ua na o ni lagona masani. O nisi taimi e matuai manino ma e le sese lava le oo mai o le taitaiga, lea e mafai ona tusia i lalo e pei lava o faalau mai ni faatonuga faaleagaga. (Richard G. Scott, “Ia Maua le Taitaiga Faaleagaga,” Liahona, Nov. 2009, 9)

E mafai ona e fesoasoani i tamaiti aoga ia iloa se mamana o fesootaiga i le mafaufau ma le loto i faataitaiga nei e aofia ai Oliva Kaotui: Mataupu Faavae ma Feagaiga 6:22–24; 9:8–9. E mafai e tamaiti aoga ona vaavaai mo upu ma fasifuaitau na faaaoga e le Alii e faamatala ai nisi o auala e fetalai mai ai o Ia i o tatou mafaufau ma loto.

Atonu e fesoasoani le faamalamalama atu o le mu o le loto o loo faamatala mai i le Mataupu Faavae ma Feagaiga 9:8 e mafai ona faasino i “se lagona mafanafana ma le toafimalie” (Dallin H. Oaks, “Aoao Atu ma le Aoaoina Mai e ala i le Agaga,” Ensign, Mat. 1997, 13).

Fesootaiga e ala i le Agaga Paia

Faamatala atu e tele isi aoaoga i tusitusiga paia ma mai taitai o le Ekalesia i ona po nei e fesoasoani tatou te malamalama ai i le ala e fesootai mai ai le Atua ia i tatou e ala mai i le Agaga Paia. Tuu atu i tamaiti aoga se taimi e sue ai, suesue, ma talanoaina nisi o nei aoaoga.

O se tasi o auala e mafai ona e faia ai lenei mea o le valaaulia lea o i latou e faaaoga meafaigaluega e pei o le Taiala i Tusitusiga Paia, le Taiala i Autu, po o le faatinoga o le sailiga i le Gospel Library e sue ai mau po o saunoaga mai taitai o le Ekalesia o loo faamatala ai nisi o auala e mafai ona tatou iloa ai faaaliga e ala i le Agaga Paia.

O le isi filifiliga o le valaaulia lea o tamaiti aoga e suesue mau nei e iloa ai mea e mafai ona latou aoaoina e uiga i faaaliga faaletagata lava ia:

• Ioane 14:26

• Kalatia 5:22–23

• Helamana 5:30

• Mataupu Faavae ma Feagaiga 11:12–13

E mafai foi ona e faaalia i tamaiti aoga le vitio “Patterns of Light: Discerning Light” (2:12). I lenei vitio, sa faasoa mai ai e Elder David A. Bednar o le Korama a Aposetolo e Toasefululua ni manatu e uiga i le ala e mafai ai ona tatou iloa le eseesega i le va o ō tatou lava mafaufauga ma musumusuga mai le Agaga Paia.

A uma ua lava se taimi o tamaiti aoga e suesue ai, mafaufau e valaaulia i latou e faaopoopo mea sa latou aoaoina i le lisi o i luga o le laupapa.

O fesili e pei o nei e mafai ona fesoasoani i tamaiti aoga e talanoaina ai mea na latou aoaoina ma faatagaina ai le Agaga Paia e molimau atu i le vasega.

• O le a se mea na e aoaoina e uiga i auala eseese e fesootai mai ai le Atua ia i tatou e ala i le Agaga Paia?

• O a ni mea ua fesoasoani ai nei a’oa’oga ia te oe e te malamalama ai e uiga i le Tama Faalelagi ma Iesu Keriso?

• O a ni aafiaga ua e maua i le malamalama ai pe faapefea ona fesoota’i mai le Agaga Paia?

Faamanatu i tamaiti aoga fesili na latou aumaia i le amataga o le vasega. Valaaulia tamaiti aoga e faasoa mai mea na latou aoaoina na fesoasoani e tali ai soo se fesili nei. Faaiu le vasega i se valaaulia mo tamaiti aoga e taumafai ia iloa le Alii o fetalai atu i o latou loto ma mafaufau i se tasi pe sili atu foi o le tele o auala ua latou aoaoina ai. Fesoasoani i tamaiti aoga ia malamalama o le iloaina o faaaliga mai le Alii o le a manaomia ai taumafaiga faifai pea i o latou olaga atoa.

Tauloto

Atonu e te manao foi e fesoasoani i tamaiti a’oga e tauloto le mau faasino ma le fuaitau autu o le mau o le Mataupu Faavae ma Feagaiga 8:2–3 ma toe faamanatu i latou i lesona i le lumanai. O le fuaitau autu o le, “O le a Ou ta’u atu ia te oe i lou mafaufau ma lou loto, e ala i le Agaga Paia.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”

Punaoa Faaopoopo

O le a le mea e mafai ona fesoasoani mai le Agaga Paia ia te au ia malamalama ai?

Na aoao mai Elder Quentin L. Cook o le Korama a Aposetolo e Toasefululua:

O faaaliga faaletagata lava ia e fua i upumoni faaleagaga e maua mai le Agaga Paia. O le Agaga Paia o le na te faaali mai ma o le molimau mai i upumoni uma, aemaise le moni o le Faaola. A aunoa ma le Agaga Paia, e le mafai ona tatou iloa moni o Iesu o le Keriso. (Quentin L. Cook, “O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga,” Liahona, Me 2020, 98)

O le a se mea e tatau ona ou faia pe a foliga e le tali mai le Atua ia te a’u?

Na tali e Elder D. Todd Christofferson o le Korama a Aposetolo e Toasefululua le fesili lenei:

Na aoao mai Elder Gerrit W. Gong o le Korama o Aposetolo e Toasefululua e faapea:

E ui ina eseese tulaga, ae a tatou faia mea uma tatou te mafaia, i le mea sili tatou te mafaia, ma ōle atu ma le loto faamaoni ma saili atu i Lana fesoasoani i luga o le ala, o le a taialaina i tatou e le Alii, i Lana lava taimi ma Ana faiga, e ala i le Agaga Paia. (Gerrit W. Gong, “O Le I Ai I Feagaiga,”Liahona, Nov. 2019, 82)

Sa aoao mai Elder Richard G. Scott (1928–2015):

O le a lau mea e fai pe a ua uma ona e saunia ma le faaeteete, na tatalo faatauanau, faatalitali mo se taimi umi mo se tali, ae e te le o lagonaina lava se tali? Atonu e te manao e faaali atu le faafetai pe a tupu lena mea, aua o se faamaoniga lena o le talitonuina [e le Atua]. Afai e te ola agavaa ma o loo ogatusa lau filifiliga ma aoaoga a le Faaola ma e manaomia ona e faatino, ia faia loa ma le faatuatua. … Afai o loo e ola amiotonu ma o loo e faatinoina ma le faatuatua, o le a le tuuina lava oe e le Atua e te alu mamao ese atu e aunoa ma se uunaiga lapatai pe afai ua sese lau faaiuga na fai. (Richard G. Scott, “Faaaogaina o le Meaalofa Faalelagi o le Tatalo,” Liahona, Me 2007, 10)

O le a se mea e mafai ona ou faia ia lelei atili ai i le mauaina ma le iloaina o faaaliga?

Na aoao mai Peresitene Russell M. Nelson:

Tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o fa’anaunauga o lou loto. Ona faalogo lea! Tusi i lalo manatu e oo mai i lou mafaufau. Faamaumau i lalo ou lagona ma tulitatao i faatinoga e uunaia oe e fai. A e fai sooa lenei fa’agasologa i lea aso ma lea aso, masina ma lea masina, tausaga ma lea tausaga, o le a e “ola ai i le mataupu faavae o fa’aaliga” [Aoaoga a Peresitene o le Ekalesia: Iosefa Samita (2007), 132]. …

Ou te uunaia outou ina ia faateleina lou tomai faaleagaga o i ai nei e maua ai faaaliga faaletagata lava ia. …

E leai se mea na te tatalaina le lagi e pei o le tuufaatasiga o le mama a’ia’i faateleina, usiusitai sa’olele, sailiga ma le naunautai, taumafa i aso taitasi i afioga a Keriso i le Tusi a Mamona, ma taimi faisoo e tuuto atu i le galuega o malumalu ma talafaasolopito o aiga. (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 95)

O a nisi o auala e fetalai mai ai le Atua ia i tatou e ala mai i le Agaga Paia?

Na aoao mai Elder David P. Homer o le Fitugafulu:

E talanoa le Agaga i tagata eseese i auala eseese, ma e atonu Na te talanoa i le tagata lava e tasi i ni auala eseese i taimi eseese. O se taunuuga, o le aoaoina o auala e tele e talanoa mai ai o Ia ia i tatou o se sailiga lea o le olaga atoa. O nisi taimi, e fetalai mai o Ia i o tatou “mafaufau ma [o tatou] loto” [Mataupu Faavae ma Feagaiga 8:2] i se leo itiiti, ae mamana, ma e āti “i le totonugalemu o i latou o e na … faalogo i ai” [3 Nifae 11:3]. O nisi taimi, i Ana uunaiga o “i ai …[i le] [o tatou] mafaufau” pe “uunai … i [o tatou] lagona” [Mataupu Faavae ma Feagaiga 128:1]. O nisi taimi o le a “mu i totonu [o o tatou loto]“ [Mataupu Faavae ma Feagaiga 9:8]. O nisi lava taimi Na te faatumulia o tatou agaga i le olioli, faamalamalamaina o tatou mafaufau [tagai Mataupu Faavae ma Feagaiga 6:14–15], pe talanoa mai e uiga i le filemu i o tatou loto mafatia [tagai Mataupu Faavae ma Feagaiga 6:22–23]. (David P. Homer, “Lagonaina o Lona Siufofoga,” Liahona, Me 2019, 42)

Tagai i le faaputuga vitio o le “Faalogo ia te Ia” i le ChurchofJesusChrist.org e sue ai faataitaiga o taitai o le Ekalesia o loo faamatala mai ai ni auala eseese ua latou iloa ai le ala na fetalai atu ai le Atua ia i latou.

Gaoioiga Faaopoopo e Aoao Ai

Faatinoga e valaaulia ai faaaliga

E ono lagona e tamaiti aoga le lē fiafia ona ua le oo mai le faaaliga o loo latou sailia. E mafai ona e fesoasoani ia i latou e aoao mai faatonuga a le Alii ia Oliva Kaotui ina ua le faamanuiaina o ia i le faaliliuga (tagai Au Paia, vol. 1, O Le Tagavai o le Upumoni, 62–64). E mafai e tamaiti aoga ona suesue le Mataupu Faavae ma Feagaiga 9:7–11, ma vaavaai i mea na aoao e le Alii ia Oliva e uiga i sauniuniga e maua ai faaaliga. E mafai foi ona e faaaogaina le upusii mai ia Peresitene Russel M. Nelson i le “Punaoa Faaopoopo” o se vaega o le tou talanoaga.

E mafai ona e fai atu i tamaiti aoga e lisi mea e ono saili ai e tupulaga talavou ni faaaliga. O tali e ono aofia ai le faamalosia o molimau o le talalelei a Iesu Keriso, faiga filifiliga o le olaga, po o le mauaina o tali i fesili. Fesoasoani i tamaiti aoga ia malamalama pe mafai faapefea e le faaaogaina o mea na aoao mai e le Alii i le Mataupu Faavae ma Feagaiga 9:7–11 ona fesoasoani ia i latou.

O le Agaga o faaaliga ma Mose

A uma ona faitau le Mataupu Faavae ma Feagaiga 8:2–3, atonu e lelei le talanoaina o le tala na ta’ua e le Alii i le fuaiupu 3. E mafai ona e faaali atu se ata o Mose ma le fanauga a Isaraelu o loo sopoia le Sami Ulaula. Valaaulia tamaiti aoga e faasoa mai ni nai faamatalaga latou te iloa e uiga i lenei tala o loo tusia i le Esoto 14–15. E mafai ona e fai atu i tamaiti aoga e talanoaina pe faapei mo Mose le mauaina o faaaliga mai le Alii i ona taimi o mafatiaga. E mafai ona e valaaulia tamaiti aoga e o mai ma ni ata faataitai e ono sailia ai e se tasi i o tatou aso ia faaaliga mai le Alii e fesoasoani ai ia i latou.