Lēsoni 22: Tokāteline mo e Ngaahi Fuakava 10–11

Tokāteline mo e Ngaahi Fuakava 11:1–7

“Tokonaki … ʻa e Fakamoʻui Taʻengatá ʻi he Puleʻanga ʻo e ʻOtuá”

Ko hai ʻoku tau fili ke muimui ki aí, ngaahi meʻa ʻoku tau fekumi ki aí, mo e founga ʻoku tau fakaʻaongaʻi ai hotau taimí ʻo tākiekina lahi ʻa e tuʻunga te tau iku ki aí. Ke hoko ko e konga ʻo hono Fakafoki Mai ʻo e ongoongoleleí, naʻe ʻomi ai ʻe hotau Fakamoʻui ʻofá ha faleʻi angaʻofa kau ki he meʻa ʻoku totonu ke nofotaha ai ʻetau moʻuí. ʻE lava ke tokoni ʻa e lēsoni ko ʻení ke ongoʻi ʻe he kau akó ha holi lahi ange ke fekumi ki he meʻaʻofa ʻo e moʻui taʻengatá ʻa ia ʻoku foaki ʻe Sīsū Kalaisi kiate kinautolu kotoa te nau maʻu iá.

Ngaahi ʻEkitivitī Ako ʻOku Ala Fakahokó

Ngaahi pōpoaki ʻoku taau ke toutou lea ʻakí

Ke kamata ʻa e lēsoní, te ke lava ʻo fakaafeʻi ʻa e kau akó ke fakakaukau ki ha ngaahi pōpoaki ʻoku faʻa toutou lea ʻaki. Mahalo te nau talaatu ha ngaahi pōpoaki ʻoku nau fakatokangaʻi ʻi ha ngaahi tuʻuaki, hiva, pe kupuʻi lea fakaoli. Fakaafeʻi kinautolu ke fakakaukau ki he ʻuhinga ʻoku faʻa toutou lea ʻaki ai ha niʻihi ʻo e ngaahi pōpoaki ko ʻení. ʻE ala tokoni ʻeni ke teuteuʻi kinautolu ke fakakaukau ki he ngaahi pōpoaki ʻoku faʻa toutou folofola mai ʻaki ʻe he ʻEikí mo hono ʻuhingá.

• Ko e hā ha ngaahi pōpoaki pau kuo ueʻi fakalaumālie ʻe Sīsū Kalaisi ʻEne kau palōfita moʻuí ke toutou lea ʻakí?

• Ko e hā ha ngaahi pōpoaki kuó ke fakatokangaʻi ʻoku toutou ʻasi ʻi hoʻo ako mai ʻeni ʻa e Tokāteline mo e Ngaahi Fuakavá?

• Ko e hā te tau lava ʻo ako fekauʻaki mo e Fakamoʻuí ʻo fakafou ʻi he ngaahi pōpoaki ʻoku toutou ʻasi ko ʻení?

ʻI he 1829, naʻe fie ʻilo ha kakai tokolahi—hangē ko ʻŌliva Kautele, Hailame Sāmita, Siosefa Naiti ko e Lahí, mo Tēvita Uitemā—ki he meʻa naʻe finangalo ʻa Sīsū Kalaisi ke nau ʻiloʻi mo fakahokó. ʻOku kau ʻi he niʻihi ʻo e ngaahi tali angaʻofa ʻa e Fakamoʻuí ha ngaahi moʻoni ʻoku toutou ʻasi ʻokú Ne finangalo ke mahino mo moʻui ʻaki ʻe kitautolu kotoa.

Fakakaukau ke fakaafeʻi ʻa e kau akó ke faʻu ha ngaahi kulupu tautau toko fā pea fakaafeʻi ʻa e tokotaha ako takitaha ke sio ki ha taha ʻo e ngaahi vahe ko ʻení. ʻE lava ke lau leʻolahi ʻe ha tokotaha ako ʻa e ngaahi veesi mei heʻene kongá. ʻE lava ke ne kiʻi mālōlō ʻi he ʻosi ʻa e veesi takitaha ke vahevahe ʻe hono hoá ʻa e ngaahi faitatau mo e ngaahi faikehekehe ʻokú ne fakatokangaʻi mei he ngaahi veesi ʻoku fekauʻaki ʻi heʻena ngaahi kongá.

Lau ʻa e ʻuluaki veesi ʻe ono ʻo e ngaahi vahe takitaha ko ʻeni ʻo e Tokāteline mo e Ngaahi Fuakavá: 6; 11; 12; mo e 14. Fakafehoanaki ʻa e folofola ʻa e Fakamoʻuí ʻi he pōpoaki takitaha.

• ʻOkú ke pehē ko e hā ʻe fili ai ʻa e ʻEikí ke toutou folofola ʻaki ʻa e ngaahi kupuʻi lea mo e akonaki pau ʻoku maʻu ʻi he ngaahi veesi ko ʻení?

“Ko ia ʻokú ne maʻu ʻa e moʻui taʻengatá ʻoku koloaʻia ia”

Lau ʻa e veesi 7 ʻi he vahe 6 mo e 11, ʻo kumi ʻa e faleʻi ʻa e Fakamoʻuí kiate kinautolu kotoa pē ʻoku maʻu ʻa e holi ke tauhi kiate Iá.

• Ko e hā ha ngaahi foʻi lea pe ngaahi kupuʻi lea naʻe makehe kiate koe mei he veesi ko ʻení? Ko e hā hono ʻuhingá?

• Ko e hā ʻa e meʻa ʻoku tokoni ai ʻa e veesi ko ʻení ke mahino kiate koe fekauʻaki mo Sīsū Kalaisi mo Hono finangalo maʻatautolú?

ʻE lava ke vahevahe ʻe he kau akó ha moʻoni hangē ko ʻení: ʻOku finangalo ʻa Sīsū Kalaisi ke foaki kiate kitautolu ʻa e moʻui taʻengatá, ʻa ia ko e meʻaʻofa mahuʻinga taha ʻi he ngaahi meʻaʻofa kotoa pē.

ʻOange ha faingamālie ki he kau akó ke fakaloloto ʻa e mahino ʻoku nau maʻú fekauʻaki mo e ʻuhinga ʻo e moʻui taʻengatá pea mo e ʻuhinga ʻoku hoko ai ia ko ha meʻaʻofa mahuʻinga ke tau maʻú. Te ke lava ʻo fai ʻeni ʻaki hano fakaafeʻi ʻa e kau akó ke ako fakafoʻituitui pe fakakulupu ha niʻihi ʻo e ngaahi maʻuʻanga tokoni ko ʻení. Pe, ko haʻo hiki ʻa e ngaahi potufolofola fakamoʻoni ko ʻení ʻi ha fanga kiʻi laʻipepa iiki ʻo tuku takai ʻi he lokí pea fakaʻatā ʻa e kau akó ke nau lue takai ʻi he lokí ʻo ako fakalongolongo kinautolu, mo hiki ha fanga kiʻi fakamatala.

• Ngaahi Tefitó mo e Ngaahi Fehuʻí, “Moʻui Taʻengatá,” topics.ChurchofJesusChrist.org

• Sione 17:3

• Fakahā 21:3–4

• Mōsaia 2:41

• Tokāteline mo e Ngaahi Fuakava 76:69–70

• Tokāteline mo e Ngaahi Fuakava 84:38

• Tokāteline mo e Ngaahi Fuakava 88:107

• Tokāteline mo e Ngaahi Fuakava 130:2

• Tokāteline mo e Ngaahi Fuakava 132:20

Fakaafeʻi ʻa e kau akó ke vahevahe ʻa e meʻa naʻa nau ako pe ongoʻi lolotonga ʻenau akó.

Fakakaukau ki he meʻa naʻá ke akó

Fakaʻaongaʻi ha kiʻi taimi ke aleaʻi ai mo e kau akó ha ngaahi meʻa te nau ala tohoakiʻi ʻenau tokangá mei he fekumi ki he moʻui taʻengatá. Fakaafeʻi kinautolu ke fakalaulauloto fakalongolongo ki he tuʻunga hono teuteuʻi kinautolu ʻe heʻenau ngaahi fili lolotongá ke maʻu ʻa e moʻui taʻengatá. Fakakaukau ke fakahoko ʻa e ʻekitivitī ko ʻení ke tokoni ke ongoʻi ʻe he kau akó ha holi lahi ange ke fekumi ki he moʻui taʻengatá:

Hiki ki he lahi taha te ke lavá ʻa e ʻuhinga ʻoku koloaʻia ai ha taha ʻokú ne maʻu ʻa e moʻui taʻengatá (vakai, Tokāteline mo e Ngaahi Fuakava 11:7).

Fakakaukau ke fakaafeʻi ʻa e kau akó ke hiki ʻenau ngaahi tali ki he fehuʻi kimuʻá ʻi he palakipoé. Fakaafeʻi ha niʻihi ʻe loto fiemālie ke fakamatalaʻi ʻa e ʻuhinga ʻoku mahuʻinga ai kiate kinautolu ʻa e meʻa naʻa nau tohí. ʻE lava ke hoko ʻeni ko ha konga mahuʻingamālie ʻo e lēsoní. Mahalo ʻe fakapotopoto ke tuku ha taimi lahi ki he kau akó ke nau tohi, fakalaulauloto, mo vahevahe ai.

Fakaʻosi ʻa e lēsoní ʻaki hono fakaafeʻi ʻa e kau akó ke fakakaukau ki he founga ʻe lava ke liliu ai ʻenau moʻuí ʻe he meʻa kuo nau ako mo ongoʻi ʻi he ʻaho ní. ʻE lava ke maʻu ʻe he kau akó ha faingamālie mei he ongo fehuʻi ko ʻení ke hiki ʻenau ngaahi fakakaukaú mo e ngaahi ongó ʻi heʻenau tohinoa akó.

• Ko e hā ha meʻa kuó ke ako ʻi he ʻahó ni ʻokú ne fakatupulaki hoʻo loto-holi ke ongoʻi ofi ange ki he Tamai Hēvaní mo Sīsū Kalaisí?

• Ko e hā ha ngaahi founga te ke lava ai ʻo fakaʻehiʻehi mei hono fakamuʻomuʻa ʻa e ngaahi tulifua fakamāmaní ʻi he fakalakalaka ki he moʻui taʻengatá?

Ngaahi Maʻuʻanga Tokoni Lahi Ange

Ko e hā ʻoku mahuʻinga ange ai ʻa e moʻui taʻengatá ʻi he ngaahi koloa fakaemāmaní?

Naʻe akonaki ʻa ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e fānau kitautolu ʻa e ʻOtuá, ʻoku tuku mavahe ki he moʻui taʻe-faʻa-maté mo e moʻui taʻengatá. …

ʻI hono ikuʻangá, ʻoku tau fekumi ki he tāpuaki ʻo ha feohi vāofi mo tuʻuloa mo e Tamaí pea mo e ʻAló. ʻOku hoko ai ʻa e liliu kotoa pē pea ʻoku mahuʻinga taʻengata ʻa hono fakahoko iá. (D. Todd Christofferson, “Ko Hotau Vā Fetuʻutaki mo e ʻOtuá,” Liahona, Mē 2022, 79–80)

ʻE founga fēfē haʻaku ʻiloʻi lelei ange ʻa e Tamai Hēvaní?

Naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

Mei he ngaahi taumuʻa fisifisimuʻa lahi naʻe fakahoko ʻi he moʻui mo e ngāue fakafaifekau ʻa e ʻEiki ko Sīsū Kalaisí, ʻoku ʻikai faʻa fakamanatua ha tafaʻaki mahuʻinga ʻe taha ʻo e ngāue fakafaifekau ko iá. Naʻe ʻikai mahino kakato ia ki Hono kau muimuí ʻi he taimi ko iá, pea ʻoku tokolahi ʻa e kau Kalisitiane ʻi onopooni ʻoku ʻikai ke nau maʻu ia ʻi he taimí ni, ka naʻe toutou folofola ʻaki mo fakamamafaʻi ia ʻe he Fakamoʻuí Tonu pē. Ko e moʻoni maʻongoʻonga ia ko ia ko e ngaahi meʻa kotoa pē naʻe haʻu ʻa Sīsū ke tala mo fakahokó, ʻo kau ai pea tautefito ki Heʻene mamahi mo e feilaulau fakaleleí, naʻá Ne fakahaaʻi mai kiate kitautolu ʻa e ʻOtua ko ʻetau Tamai Taʻengatá mo Hono ʻulungāngá, pea mo ʻEne līʻoa kakato ki Heʻene fānaú ʻi he kuonga mo e puleʻanga kotoa pē. Naʻe feinga ʻa Sīsū ʻi he lea mo e ngāue, ke Ne fakahā mai pea ʻai ke tau ʻilo fakataautaha ʻa e natula totonu ʻo ʻEne Tamaí, ʻa ia ko ʻetau Tamai Hēvaní.

Ko e konga pē ʻo e ʻuhinga naʻá Ne fai ai ʻení koeʻuhí he naʻe fiemaʻu ʻi muʻa pea ʻoku fiemaʻu kotoa kitautolu ʻi he taimí ni, ke tau toe ʻilo kakato ange ki he ʻOtuá kae lava ke tau toe ʻofa lahi mo tau talangofua kakato ange kiate Ia. (Jeffrey R. Holland, “The Grandeur of God,” Liahona, Nov. 2003, 70)

Tokāteline mo e Ngaahi Fuakava 11:7. Ko e hā ʻa e poto ʻoku tau fekumi ki ai ʻoku fakatau ki he moʻui taʻengatá?

Naʻe akoʻi ʻe ʻEletā Kulisitofele Koloteni ʻo e Kau Fitungofulú ʻo pehē:

Ko ʻetau fekumi ki he moʻui taʻengatá ko ʻetau fekumi ia ke mahino kiate kitautolu ʻa e ʻOtuá pea foki ʻo nofo mo Ia. Naʻe lotu ʻa e Fakamoʻuí ki Heʻene Tamaí, “Pea ko ʻeni ʻa e moʻui taʻengatá, ko ʻenau ʻilo koe ko e ʻOtua moʻoni pē taha, mo Sīsū Kalaisi, ʻa ia naʻá ke fekaú” [Sione 17:3]. (Christoffel Golden, “Ko e Tamaí mo e ʻAló,” Liahona, Mē 2013, 99–100)

Ko e hā hono mahuʻinga ʻo hono fakafehoanaki ʻe he Fakamoʻuí ʻEne folofolá ki ha heletā fakatoumata?

Ko hono fakaʻaongaʻi mo hono fakatātā ʻo ha heletā fakatoumatá naʻe angamaheni pē ia ʻi he kuonga muʻá pea ʻoku hā ia ʻi he Fuakava Motuʻá mo e Fuakava Foʻoú fakatouʻosi (vakai, Fakamaau 3:16; Saame 149:6; Lea Fakatātā 5:4; Hepelū 4:12; Fakahā 1:16; 2:12). ʻE lava ke tuʻusi ʻe ha heletā fakatoumata ʻa e ongo tafaʻakí fakatouʻosi pea lelei ange ki he tokotaha ʻokú ne fakaʻaongaʻí lolotonga ʻa e taú. ʻI he talanoa fakatātā ʻo e teunga tau ʻa e ʻOtuá, naʻe fakafehoanaki ʻe he ʻAposetolo ko Paulá ʻa e heletā ʻo e Laumālié ki he folofola ʻa e ʻOtuá (vakai, ʻEfesō 6:17).

ʻOku pehē ʻi he Hepelū 4:12, ko e folofola ʻa e ʻOtuá ʻoku “moʻui, mo mālohi, pea māsila lahi ʻi ha heletā ʻoku fakatoumata.” Naʻe fakaʻaongaʻi ʻe he Fakamoʻuí ʻa e ngaahi lea tatau ko ʻení ʻi hotau kuongá ʻi hono fakamatalaʻi ʻEne folofolá (vakai, Tokāteline mo e Ngaahi Fuakava 6:2; 11:2; 12:2; 14:2; 33:1). ʻOku ʻuhinga ʻa e foʻi lea faka-Kalisi vavé ki he moʻui mo longomoʻui . ʻOku ʻuhinga ʻa e foʻi lea faka-Kalisi ko e mālohí ki he fakaivia, longomoʻui, mo ola lelei.

Ngaahi ʻEkitivitī Fakalahi ki he Akó

“Tokanga ki heʻeku leá”

Fakaafeʻi ʻa e kau akó ke fakatokangaʻi ʻa e founga naʻe fakamatalaʻi ai ʻe he Fakamoʻuí ʻEne “leá” ʻi he veesi 2 ʻo e Tokāteline mo e Ngaahi Fuakava 6; 11; 12; mo e 14.

Ke tokoni ke mahino lelei ange ki he kau akó ʻa e mālohi ʻo e folofola ʻa e ʻOtuá, fakakaukau ke vahevahe kinautolu ki ha ngaahi kulupu tautau toko fā pea vahe ki he tokotaha ako takitaha ʻi he kulupú ha taha ʻo e ngaahi potufolofola ko ʻení. Fakaafeʻi kinautolu ke ako ʻenau potufolofolá pea vahevahe mo ʻenau kulupú ʻa e meʻa ʻoku nau ako fekauʻaki mo e folofola ʻa e ʻOtuá pea mo e founga naʻá ne tāpuekina ai ʻa kinautolu ʻi he ngaahi potufolofolá. Poupouʻi foki ʻa e kau akó ke fekumi ki he ngaahi fakafehoanaki ʻi he vahaʻa ʻo e folofola ʻa e ʻOtuá mo ha heletaá.

• ʻAlamā 31:5. Naʻe teuteu ʻa ʻAlamā ke akoʻi ʻa e kau Sōlamí.

• Hilamani 3:29. Naʻe fakamatalaʻi ʻe Molomona ʻa e founga naʻe ʻomi ai ha ngaahi laumālie ʻe lauiafe ki he moʻoní.

• Siosefa Sāmita—Hisitōlia 1:11–12. Naʻe ako ʻe he talavou ko Siosefa Sāmitá ʻa e folofolá ke maʻu ha poto.

• Hepelū 4:12. Naʻe fakahinohinoʻi ʻe Paula ʻa e kau ʻIsileli ʻo e kuonga muʻá.

Fakakaukau ke tā ha heletā mata taha mo ha heletā fakatoumata ʻi he palakipoé. Fakaafeʻi ha kau ako mei ha ngaahi kulupu kehekehe ke aleaʻi ha faʻahinga lelei pē ʻo ha heletā fakatoumata pea hiki ʻa e meʻa naʻa nau ako mei he ngaahi potufolofola takai ʻi he fakatātaá.

Hangē ko ʻení, ʻe ala ʻilo ʻe he kau akó mei he ʻAlamā 31:5 ʻoku mālohi ange ʻa e folofola ʻa e ʻOtuá ʻi ha heletā. ʻE lava ke nau ʻilo mei he Hilamani 3:29 ki he founga ʻoku fakafaikehekeheʻi mo fakamavaheʻi ai ʻe he folofola ʻa e ʻOtuá ʻa e moʻoní mei he meʻa ʻoku halá. Mahalo te nau ʻiloʻi mei he aʻusia ʻa Siosefa Sāmitá ʻe lava ke ueʻi ʻe he ngaahi folofola ʻa e ʻOtuá hotau lotó pea tokoniʻi kitautolu ke tau ngāue ʻi he māʻoniʻoni. Mahalo ʻe fakatokangaʻi ʻe he kau akó mei he Hepelū 4:12 ʻe lava ke liliu ʻe he folofola ʻa e ʻOtuá hotau ʻatamaí mo e laumālié.

Vitiō: “The Soul’s Sincere Desire”

Kapau ʻe lava ke maʻu ʻe he kau akó ha lelei mei heʻenau sio ki he founga ʻe lava ke uesia ai ʻe he ngaahi meʻa ʻoku nau tohoakiʻi ʻenau tokangá pea naʻa mo e ngaahi meʻa lelei ʻoku nau tulifua ki aí, ʻa ʻenau fakalakalaka ki he moʻui taʻengatá, fakakaukau ke huluʻi ha foʻi vitiō hangē ko e “The Soul’s Sincere Desire”(3:28), ʻoku maʻu ʻi he ChurchofJesusChrist.org.

The Soul’s Sincere Desire

Lolotonga ʻa e mamata ʻa e kau akó, fakaafeʻi kinautolu ke fakakaukau ki he ngaahi meʻa ʻoku fiemaʻu ke nau fakahoko fakaʻahó mo e founga ʻoku nau fili ke fakaʻaongaʻi ai honau taimi ʻataá. Hili ʻa e vitioó, ʻe lava ke hiki ʻe he kau akó ha lisi ʻo e meʻa kotoa pē ʻoku nau fakahoko lolotonga ha ʻaho angamaheni pea fakaʻilongaʻi ʻa e ngaahi ʻekitivitī ʻoku nau ʻomi kinautolu ke ofi ange ki he Fakamoʻuí pea tamateʻi ha faʻahinga meʻa pē te ne lava ʻo fakamamaʻo kinautolu meiate Iá.