“Tokāteline mo e Ngaahi Fuakava 11:8–30: ‘Kiate Kinautolu Kotoa Pē ʻOku ʻIate Kinautolu ʻa e Ngaahi Holi Leleí,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 11:8–30,” Tokāteline mo e Ngaahi Fuakava – Tohi Lēsoni ʻa e Faiako Seminelí
Tokāteline mo e Ngaahi Fuakava 10–11
Tokāteline mo e Ngaahi Fuakava 11:8–30
“Kiate Kinautolu Kotoa Pē ʻOku ʻIate Kinautolu ʻa e Ngaahi Holi Leleí”
ʻI he kamata ʻa hono Fakafoki Mai ʻo e ongoongolelei ʻo Sīsū Kalaisí, naʻe loto ha kakai tokolahi ke nau ʻiloʻi ʻa e founga ʻe lava ke nau tokoni aí. Naʻe kau heni ha kau mēmipa ʻo e fāmili tonu ʻo Siosefa Sāmitá, ʻo hangē ko hono tokoua ko Hailamé. Naʻe fakahīkihikiʻi ʻe he ʻEikí ʻa Hailame ʻi heʻene ngaahi holi leleí pea akoʻi ia ʻi he founga ke teuteu ai ke tokoni ʻi he ngāué. ʻE lava ke tokoni ʻa e lēsoni ko ʻení ke fekumi ʻa e kau akó ki he tokoni ʻa e ʻEikí ke teuteu ke kau ʻi Heʻene ngāué.
Ngaahi ʻEkitivitī Ako ʻOku Ala Fakahokó
“Hangē ko e meʻa ʻokú ke holi ke ke maʻú”
Fakakaukau ke kole ki he kau akó ke fakakaukau ki ha taimi naʻa nau fie kau ai ʻi ha ʻekitivitī pe ngāue mahuʻinga. ʻE lava ke kau ʻi he ngaahi fakakaukaú hano palani ʻo ha ʻekitivitī ʻa e toʻu tupú, kau ʻi ha ngāue tokoni, pe kau ki ha kalapu pe kulupu ngāue. Fakaafeʻi ʻa e kau akó ke aleaʻi ha ngaahi meʻa naʻe fiemaʻu ke nau tomuʻa teuteu ke fakahoko ai ʻa e ʻekitivitií pe tokoni ki he ngāué.
Fakakaukau ke vahevahe ha fakamatala hangē ko ʻení ke tokoni ke mahino ki he kau akó ʻa e meʻa naʻe fiemaʻu ʻe Hailame Sāmita ke hoko ko ha konga ʻo e fakahā ʻi he Tokāteline mo e Ngaahi Fuakava 11.
ʻI Mē ʻo e 1829, ko e fakaʻamu lahi ʻa Hailame Sāmitá ke kau ʻi hono Fakafoki Mai ʻo e Siasi ʻo e Fakamoʻuí. Naʻá ne fononga ʻi ha maile ʻe 250 tupu mei Palemaila, Niu ʻIoke, ki Hāmoni, Penisilivēnia, ke ʻaʻahi ki hono tehina ko Siosefá pea ako ʻa e meʻa te ne lava ʻo fai ke tokoni aí. Naʻe fakahā ʻe he ʻEikí ʻa e Tokāteline mo e Ngaahi Fuakava 11 koeʻuhí ko e ngaahi holi māʻoniʻoni ʻa Hailamé.
Lau ʻa e Tokāteline mo e Ngaahi Fuakava 11:8, ʻo kumi ʻa e founga ʻe tāpuakiʻi ai ʻe he ʻEikí ʻa Hailame Sāmita koeʻuhí naʻá ne fie tokoni ʻi he ngāué. Hokó, lau ʻa e Tokāteline mo e Ngaahi Fuakava 11:27, ʻo kumi pe ko hai naʻe toe folofola ki ai ʻa e Fakamoʻuí ʻi he fakahā ko ʻení.
Fakaafeʻi ʻa e kau akó ke feinga ke ʻiloʻi ha foʻi moʻoni mei he ngaahi veesi ko ʻení pea fakahaaʻi ia ʻi he lea pē ʻanautolu. ʻE lava ke nau lea ʻaki ha meʻa peheni: Kapau ʻoku tau holi ke tauhi kiate Ia, ʻe lava ke fakahoko ʻe he ʻOtuá ʻEne ngāué ʻo fakafou ʻiate kitautolu.
ʻOange ha faingamālie ki he kau akó ke vakavakaiʻi ʻenau teuteu ke fakahoko ʻa e ngāue ʻa e ʻOtuá. Ko ha founga ʻeni ʻe taha ʻe lava ke nau vakavakaiʻi ʻaki kinautolú.
ʻI hono fakaʻaongaʻi ʻa e meʻafua ko ʻení, fili ʻa e tuʻunga mateuteu ʻokú ke ongoʻi ʻokú ke maʻú ke fakahoko ʻa e ngāue ʻa e ʻOtuá:
-
1 = Taʻe-mateuteu ʻaupito
-
2 = Kiʻi taʻe-mateuteu
-
3 = Kiʻi mateuteu
-
4 = Mateuteu ʻaupito
Fakakaukau ki he meʻa te ke lava ʻo fakahoko ke fakatupulaki hoʻo mateuteú. ʻE lava ke ke lekooti ha niʻihi ʻo hoʻo ngaahi fakakaukaú ʻi hoʻo tohinoa akó.
Ko e teuteu ke ngāué
Fakakaukau ke vahevahe ʻa e kau akó ki ha fanga kiʻi kulupu iiki pea poupouʻi kinautolu ke nau taufetongi hono lau leʻolahi ʻa e ngaahi veesi ko ʻení.
Lau ʻa e Tokāteline mo e Ngaahi Fuakava 11:11–26, ʻo fakaʻilongaʻi ʻa e ngaahi kupuʻi lea pau ʻo e faleʻi naʻe fai ʻe he Fakamoʻuí ke tokoniʻi ʻa Hailame ke teuteu ke ngāue faivelengá. Hili hono ako ʻa e ngaahi veesi ko ʻení, fili ha kupuʻi lea ʻe taha ʻokú ne fokotuʻu mai ʻa e founga ke tau teuteu aí. Fakakaukau ki ha founga pau ʻe ua ki he tolu ʻe lava ke fakaʻaongaʻi ai ʻe ha taha ʻa e faleʻi ko iá ʻi heʻene moʻuí.
Fakakaukau ke fakaafeʻi ʻa e kulupu takitaha ke hiki ʻi he palakipoé ʻa e kupuʻi lea naʻa nau filí pea ke vahevahe mo e kalasí ha ngaahi founga te nau lava ʻo fakaʻaongaʻi ai ia. Te ke lava ʻo ʻeke ha fehuʻi vakaiʻi hangē ko e “ʻE tokoni fēfē nai hono fakaʻaongaʻi ʻo e faleʻi ko iá ʻi he taimi ní ki he tokotaha te ke aʻusia ʻamui ange ʻi he moʻuí?” Fakafanongo fakalelei lolotonga ʻa e vahevahe ʻa e kau akó ke ʻiloʻi pe ko e fē ʻa e ngaahi kupuʻi lea ke tuku ha taimi lahi ange ke aleaʻí. ʻE lava ke fakaʻaongaʻi ʻa e ngaahi konga ʻe tolu ko ʻení ke tokoni ke mahino ki he kau akó, pea nau aleaʻi, mo teuteu ke fakaʻaongaʻi ha ngaahi kupuʻi lea pau.
“Falala ki he Laumālie ko ia ʻoku tākiekina ke faileleí” (veesi 12)
Fakakaukau ki ha ngaahi tūkunga moʻoni ʻo e moʻuí ʻe lava ke fili ai ha toʻu tupu pe te ne falala ki he Laumālié.
-
Ko e hā ʻoku fiemaʻu ai ʻa e tui ki he Fakamoʻuí ke maʻu ha falala kakato ki he Laumālié ʻi he ngaahi tūkunga ko ʻení?
-
Ko e hā te tau lava ʻo fai ke ako ʻa e founga ke maʻu mo ngāue lelei ange ai ʻo fakatatau ki he ueʻi mei he Laumālie Māʻoniʻoní?
ʻE lava ke kau ʻi he ngaahi talí ʻa hono maʻu ʻi he moʻui taau ʻa e sākalamēnití, tohi mo ngāueʻi ʻa e ngaahi ueʻi ʻoku maʻú, pea fakalaulauloto ko ha konga ʻo e lotu fakatāutahá pe ako folofolá. Fakaafeʻi ʻa e kau akó ke vahevahe ha ngaahi aʻusia ʻi he taimi naʻa nau falala ai ki he Laumālié ke fai leleí.
“Tauhi ʻeku ngaahi fekaú, ʻio, ʻaki ho iví, ʻatamaí, mo e mālohí kotoa” (veesi 20)
Fili ha fekau ʻe tolu ki he fā ʻokú ke ongoʻi ʻoku felāveʻi mo e toʻu tupú.
Ki he fekau takitaha, hiki hifo pe ʻe fēfē nai hano tauhi ia ʻe ha kiʻi taʻu hongofulu tupu ʻaki hono iví, ʻatamaí, mo e mālohí kotoa.
-
Ko e hā ʻoku fiemaʻu ai ʻa e fāifeinga ke tauhi ʻa e ngaahi fekau ʻa e ʻEikí, ke lelei ange ʻetau tauhi kiate Iá?
-
Kuo tāpuekina fēfē nai koe pe ko ha taha ʻokú ke ʻiloʻi ʻi hoʻo feinga faivelenga ke tauhi ʻa e ngaahi fekau ʻa e Fakamoʻuí?
“Fuofua feinga ke maʻu ʻeku leá” (veesi 21)
Hiki ha lisi ʻo e ngaahi meʻa ʻe ala fai ʻe ha taha ʻoku fekumi ke “maʻu [ʻa e folofola ʻa e ʻEikí]” kae ʻikai lau pē ʻa e folofolá.
ʻE lava ke kau ʻi he ngaahi talí hono fakaʻilongaʻi ʻa e ngaahi potufolofolá, lekooti ʻa e ngaahi fakakaukau ʻoku maʻú, fekumi ki ha tali ki he ngaahi fehuʻí, mo e lotu lolotonga ʻa e akó.
-
ʻE liliu fēfē nai ʻe he teuteu fakamātoato ke hoko ko ha faifekau, faiako, taki, faiako fakaetauhi, mali, pe mātuʻa lelei ange ʻi ho kahaʻú ʻa e founga ʻokú ke fakahoko ʻaki hoʻo ako ʻa e ongoongoleleí ʻi he taimi ní?
-
Ko e hā ha meʻa pau te ke lava ʻo fai ke fakatupulaki ai ʻa e ola lelei hoʻo ako folofola fakaʻahó? (Mahalo naʻá ke fokotuʻu ha taumuʻa tatau kimuʻa. Mahalo ko ha taimi lelei ʻeni ke toe vakaiʻi ai hoʻo fakalakalaká.)
Fakaʻaongaʻi ʻa e meʻa kuó ke akó
ʻE lava ke tokoni hono maʻu ha mahino ki he fakamatala ʻa e Fakamoʻuí fekauʻaki mo Ia ʻi he vahe 11 ke ongoʻi ʻe he kau akó ha ʻamanaki lelei te Ne tokoniʻi kinautolu ke fakaʻaongaʻi ʻa e ngaahi fakaafe ʻi he konga ko ʻení. Fakaafeʻi ʻa e kau akó ke lau ʻa e veesi 11, 28–30 pea ke aleaʻi ʻa e ngaahi fehuʻi ko ʻení.
-
ʻE lava fēfē nai ke fakamaama ʻe he Fakamoʻuí ho halá ʻi hoʻo feinga ke muimui ki Heʻene faleʻí mo teuteu ke tauhi kiate Iá?
-
Te ke “maʻu” lelei ange fēfē nai ʻa e Fakamoʻuí mo ʻEne faleʻí ki hoʻo moʻuí?
-
ʻOkú ke pehē ʻoku ʻuhinga nai ki he hā ke foaki mai ʻa e mālohi ke hoko ko e ngaahi foha mo e ngaahi ʻofefine ʻo e ʻOtuá?
ʻOange ha kiʻi taimi fakalongolongo maʻá e kau akó ke nau fakalaulauloto ai ki he meʻá ni pea fakaʻaongaʻi ʻa e meʻa kuo nau akó. Kapau ʻoku fiemaʻu tokoni ʻa e kau akó ki ha ngaahi fakakaukau, fakaafeʻi kinautolu ke fili ha kupuʻi lea ʻe taha ʻoku lisi atu ʻi he palakipoé mei he konga kimuʻa ʻo e lēsoní. Fakakaukau ke vahevahe hoʻo ngaahi ongo fekauʻaki mo e founga kuo ʻaonga mo faitāpuekina ai hoʻo moʻuí ʻi hoʻo ngāue maʻá e ʻEikí.
Tuku ha kiʻi taimi ke ke fakakaukauloto ai pe ko e tamaioʻeiki fēfē nai ʻa e ʻEikí te ke fie hokosi ʻi he taimí ni, ʻi ha taʻu ʻe ua, ʻi ha taʻu ʻe 10, pea ʻi he kotoa hoʻo moʻuí. Fili ha kupuʻi lea ʻe taha ʻo ha faleʻi mei hoʻo ako ʻi he ʻaho ní te ke fie tokanga taha ki aí pea faʻu ha palani ke ngāueʻi ia. Ko ha founga ʻe taha ke fakahoko ai ʻení ko hano tā ha kiʻi sitepu faingofua ʻoku ʻi ai ha foʻi sitepu ʻe tolu pe fā. Tohi ʻi he sitepu takitaha ha meʻa te ke lava ʻo fai ke tokoniʻi ai koe ke ke maʻu lelei ange ʻa e folofola ʻa e ʻEikí, tauhi ʻEne ngaahi fekaú, pe fakaʻaongaʻi ʻa e konga ʻo e faleʻi naʻá ke fili ke ke tokanga taha ki aí.