Lēsoni 21: Tokāteline mo e Ngaahi Fuakava 10–11

Tokāteline mo e Ngaahi Fuakava 10

Ko e Poto ʻo e ʻOtuá

ʻI he hili ʻa e mole ʻa e ʻū lauʻi peesi ʻe 116, naʻe toʻo fakataimi ʻa e ʻū lauʻi peleti koulá, ʻŪlimí mo e Tūmemí, mo e mālohi ke liliú meia Siosefa Sāmita. Naʻe tali ʻe he ʻEikí ʻa e fakatomala fakamātoato ʻa Siosefá mo fakamatalaʻi ange ʻa e founga naʻá Ne ʻosi teuteu ke hokohoko atu ai ʻEne ngāué ʻo fakafou ʻi Hono potó mo e tokaimaʻanangá. ʻE lava ke tokoni ʻa e lēsoni ko ʻení ki he kau akó ke fakatupulaki ʻenau loto-falala ʻe tokoniʻi kinautolu ʻe he ʻOtuá ke ikunaʻi ʻa e ngaahi palani olopoto ʻa Sētané.

Ngaahi ʻEkitivitī Ako ʻOku Ala Fakahokó

Ko e tokotaha poto taha ʻokú ke ʻiló

ʻOku fakataumuʻa ʻa e konga ko ʻeni ʻo e lēsoní ke tokoni ki he kau akó ke fakakaukau ki he poto taʻe-fakangatangata ʻo e ʻOtuá. ʻAi ke ke ongoʻi tauʻatāinapē ke ke liliu ʻa e ngaahi kaveinga ko ʻeni ʻoku fokotuʻu atú.

• Ko hai ʻa e tokotaha poto taha ʻokú ke ʻiloʻí, pe kuo moʻui ʻi he māmaní, ʻi he ngaahi lēsoni takitaha ko ʻení?

Saienisí, Hisitōliá, Tui Fakalotú, Moʻui Leleí, Tekinolosiá

• Kapau te ke fakatahaʻi ʻa e poto ʻo e tokotaha kotoa pē naʻá ke fakakaukau ki aí, ʻokú ke pehē ʻe fēfē nai hono fakafehoanaki ʻa e poto ko iá ki he poto ʻo e ʻOtuá?

Fakakaukau ke tā ha laine vetikale ʻi he palakipoé ʻoku fakafofongaʻi ʻe he konga ki ʻolungá ʻa e poto ʻo e ʻOtuá. Fakaafeʻi ha kau ako ʻe niʻihi ke fokotuʻu ha ngaahi fakaʻilonga ʻi he lainé ʻa ia ʻoku nau pehē ʻoku nau fakafofongaʻi ʻa e poto fakalūkufua ʻo e kakai poto taha ʻi he māmaní. ʻE lava ke ke ʻeke ange ki he kau akó pe ʻe lava fēfē nai ʻe he ngaahi potufolofola hangē ko e Mōsaia 4:9 mo e ʻĪsaia 55:8–9 ʻo tākiekina ʻa e feituʻu ʻoku fokotuʻu ai ʻenau fakaʻilongá.

ʻOku ʻikai ngata pē ʻi he poto ange ʻa e ʻOtuá ʻi ha toe taha ʻiate kitautolú. Lau ʻa e Tokāteline mo e Ngaahi Fuakava 10:43 ke ʻiloʻi pe ko e hā mo ha toe meʻa ʻoku mahulu hake ai ʻa e poto ʻo e ʻOtuá.

• ʻE ʻaonga fēfē nai ki ha taha ke ne ʻiloʻi ʻa e foʻi moʻoni ko ia ʻoku mahulu ange ʻa e poto ʻo e ʻOtuá ʻi he olopoto ʻa e tēvoló?

• Ko e hā ha ngaahi sīpinga ʻi he folofolá pe mei he hisitōliá naʻe ikunaʻi ai ʻe he poto ʻo e ʻOtuá ha palani kākā ʻa e tēvoló?

ʻE lava ke kau ʻi he ngaahi tali ki he fehuʻi kimuʻá ʻa e founga naʻe mateuteu ai ʻa e Fakalelei ʻa Kalaisí ke ikunaʻi ʻa e ngaahi nunuʻa ʻo e Hingá, founga naʻe teuteuʻi ai ʻa e ngāue fakafofonga fakatemipalé ke tokoniʻi ʻa kinautolu naʻe moʻui lolotonga ʻa e Hē mei he Moʻoní, pe founga ʻe lava ke ikunaʻi ai ʻetau ngaahi angahalá ʻi he tui kia Kalaisí mo e fakatomalá.

ʻI hoʻo ako ʻa e lēsoni ko ʻení, fakakaukau ki he ngaahi feinga ʻa Sētane ke taʻofi koe mei hoʻo fakalakalaka fakalaumālié mo hono fakahoko ʻa e ngāue ʻa e ʻOtuá. Fakafanongo ki hono fakamoʻoniʻi ʻe he Laumālie Māʻoniʻoní ʻoku mahino kakato ki he ʻOtuá ʻa e ngaahi founga ʻa Sētané pea kuó Ne ʻosi teuteu ha founga ke ke ikunaʻi ai kinautolu.

“Ko e olopoto ʻa e tēvoló”

Fakakaukau ke fakaafeʻi ha tokotaha ʻe loto fiemālie ke fakamanatu ki he kalasí ʻa e ngaahi meʻa naʻe hoko ʻo iku ai ki he mole ʻa e ʻuluaki peesi ʻe 116 ʻo e Tohi ʻa Molomoná. (Fakaʻaongaʻi ʻa e lēsoni “Tokāteline mo e Ngaahi Fuakava 3” pe ko e palakalafi ko ʻení ʻo ka fiemaʻu.)

Naʻe ʻi ai ha palani ʻa Sētane ke fakameleʻi ʻa hono liliu ʻo e Tohi ʻa Molomoná mo ueʻi ʻa e kakaí ke nau veiveiua ki he moʻoni ʻo e tohí. Naʻe teke mālohi ʻe Māteni Hālisi ʻa Siosefa Sāmita ke tuku ke ne fakaʻaliʻali ki hono uaifí mo ha niʻihi kehe ʻa e ʻuluaki peesi ʻe 116 ʻo e Tohi ʻa Molomoná. Naʻe hokohoko atu hono kole ʻe Siosefa ha ngofua mei he ʻOtuá, neongo naʻe tuʻo ua hono fakahā ange ʻe he ʻOtuá ke ʻoua naʻa fakangofua iá. Naʻe iku ʻo fakamoleki ʻe Māteni ʻa e ʻū lauʻi pēsí. Naʻe ʻave leva ʻe he ʻāngelo ko Molonaí ʻa e ʻū lauʻi peleti koulá mo e ʻŪlimí mo e Tūmemí meia Siosefa.

• ʻOkú ke pehē ko e hā ha ngaahi hohaʻa naʻe maʻu ʻe Siosefa hili ʻa e mole ʻa e ʻū lauʻi pēsí?

Hili ha vahaʻataimi ʻo e fakatomala loto fakatōkilalo ʻa Siosefá, naʻá ne toe maʻu ʻa e ʻū lauʻi peleti koulá mo e ʻŪlimí mo e Tūmemí. Naʻe talaange ʻe Molonai kuo tali ʻe he ʻEikí ʻa ʻene fakatomalá.

• Ko e hā naʻe fakafiemālie makehe ai kia Siosefa ʻi he taimi ko iá ʻa e pōpoaki ʻa e ʻEikí ʻi he Tokāteline mo e Ngaahi Fuakava 10:43?

Naʻe akoʻi ʻe he ʻEikí ʻa Siosefa ʻi he Tokāteline mo e Ngaahi Fuakava 10, naʻe palani ʻa kinautolu naʻa nau kaihaʻasi ʻa e ʻū lauʻi pēsí ke liliu ʻa e fakalea ʻo e ʻū lauʻi pēsí. Kapau naʻe toe liliu ʻe Siosefa ʻa e meʻa tatau, naʻa nau mei lava leva ʻo pehē naʻe kehe ʻene liliú pea ko ha palōfita loi ia (vakai, Tokāteline mo e Ngaahi Fuakava 10:10–19).

ʻE lava ke tokoni ʻa e ongo fehuʻi ko ʻení ki he kau akó ke fakafekauʻaki ʻa e aʻusia ʻa Siosefá mo ʻenau moʻuí. Mahalo te ke fie hiki ha niʻihi ʻo ʻenau ngaahi talí ʻi he palakipoé.

• Ko e hā ha ngaahi sīpinga ʻo e ngāue ʻoku kole ʻe he ʻOtuá ki he toʻu tupú ke nau fakahoko ʻi he ʻahó ni?

• Ko e hā ha ngaahi palani olopoto ʻoku fakaʻaongaʻi ʻe Sētane ke feinga ke taʻofi kitautolu mei hono fakahoko ʻa e ngāue ʻa e ʻOtuá?

ʻE ala talaatu ʻe he kau akó ʻoku kau ʻi he ngaahi palani ʻa Sētané ha ngaahi tōʻonga maʻunimā, fakatuta, pe veiveiua. Ko ha tali ʻe taha ko ʻene teke kitautolu ke tau fakamahuʻingaʻi ʻa e ngaahi fakakaukau pe tōʻonga moʻui ʻa e niʻihi kehé ʻo lahi ange ʻi he ngaahi tuʻunga moʻui ʻa e ʻOtuá.

Lekooti ʻi hoʻo tohinoa akó ʻa e ngāue ʻokú ke ongoʻi ʻoku finangalo ʻa e ʻOtuá ke ke tokanga taha ki ai ʻi he taimí ni mo ikunaʻi ʻi he kahaʻú. ʻE lava ʻe he fakalaulauloto ki hení ʻo fakaʻatā ke ueʻi koe ʻe he Laumālie Māʻoniʻoní ʻaki ha ngaahi fakakaukau. Ko e hā ha ngaahi founga ʻe ala fakaʻaongaʻi ʻe Sētane ʻi he taimí ni ʻi hoʻo moʻuí ke feinga ke taʻofi koe mei hono fakahoko ʻa e ngāue ʻa e ʻOtuá?

Ko e poto ʻo e ʻOtuá

Tokoni ke ʻilo ʻe he kau akó ʻa e poto mo e tokaimaʻananga ʻa e ʻOtuá ʻaki hono paaki mo kosi ha ngaahi tatau feʻunga ʻo e laʻipepa tufá ke maʻu ʻe he tokotaha ako takitaha ha konga pāsolo pē ʻe taha. Fakaafeʻi kinautolu ke lau ʻenau potufolofolá pea lekooti ʻi he tuʻa ʻo ʻenau konga pāsoló ʻa e meʻa naʻe akoʻi ʻe he ʻOtuá pe ueʻi fakalaumālie ha taha ke ne faí.

Fakaafeʻi leva ʻa e kau akó ke faʻu ha ngaahi kulupu tautau toko fā mo ha niʻihi kehe ʻoku nau maʻu ha ngaahi kongokonga kehekehe. Fakaafeʻi ʻa e ngaahi kulupú ke ngāue fakataha ke ʻiloʻi ʻa e angahono teuteuʻi ʻe he ʻOtuá ha founga ke ikunaʻi ai ʻa e mole ʻa e peesi ʻe 116. Fakaafeʻi leva ʻa e ngaahi kulupú ke vahevahe mo e kalasí ʻa e founga ʻe lava ke tokoni ai ʻa e talanoa ko ʻení ke fakatupulaki ʻetau tui mo e falala ki he ʻOtuá.

ʻE lava ke fakaʻaliʻali pe ʻoatu ʻa e ngaahi tokoni ʻe fā ʻi laló kapau ʻe fiemaʻu ʻe he kau akó ha fakahinohino lahi ange ke mahino ʻenau ngaahi potufolofolá.

Ko e Poto ʻo e ʻOtuá

Ngaahi tokoní:

1. 1 Nīfai 19:1–3—Naʻe fekau ʻe he ʻOtuá kia Nīfai ke ngaohi ha seti peleti ʻe ua ʻa ia naʻe lekooti ai ha vahaʻataimi tatau.

2. Ngaahi Lea ʻa Molomona 1:3–7—Naʻe ueʻi fakalaumālie ʻe he ʻOtuá ʻa Molomona ke fakakau ʻa e ʻū lauʻi peleti iiki ʻa Nīfaí fakataha mo e fakanounou ʻo e vahaʻataimi tatau naʻe ʻosi tohi ʻe Molomona mei he ʻū lauʻi peleti kehe ʻa Nīfaí.

3. Tokāteline mo e Ngaahi Fuakava 10:30, 40–42—Naʻe folofola ʻa e ʻOtuá kia Siosefa Sāmita ke liliu ʻa e ʻū lauʻi peleti iiki ʻa Nīfaí kae ʻoua ʻe toe liliu ʻa e meʻa naʻe fakamoleki ʻe Māteni mei hono fakanounouʻi ʻe Molomona ʻa e ʻū lauʻi peleti lalahí.

4. Tokāteline mo e Ngaahi Fuakava 10:43–46—Naʻe fakafehoanaki ʻe he ʻOtuá ʻa e kanotohi ʻo e ʻū lauʻi peesi naʻe kaihaʻasí (vakai, veesi 44) ki he meʻa ʻe hokohoko atu hono liliu ʻe Siosefá (vakai, veesi 45–46).

Ko e poto ʻo e ʻOtuá ʻi heʻetau moʻuí

Tokoni ki he kau akó ke vakai ki he founga ʻe lava ai ʻe he poto ʻo e ʻOtuá ʻo faitāpuekina ʻenau moʻuí. ʻE lava ke fakahoko ʻeni ʻaki hano faʻu ha fealēleaʻaki fakakalasi ʻo fakaʻaongaʻi ha fehuʻi hangē ko ʻení:

• ʻOkú ke pehē ko e hā ʻoku finangalo ai ʻa e ʻOtuá ke ʻiloʻi ʻe he toʻu tupu ʻo e ʻaho ní ʻa e meʻa naʻá Ne akoʻi kia Siosefa Sāmita ʻi he konga ko ʻení?

• Ko e hā ʻa e meʻa kuo teuteuʻi ʻe he ʻOtuá ke tokoniʻi kitautolu ke tau hao mei he olopoto ʻa Sētané pea hokohoko atu hono fai ʻEne ngāué?

Poupouʻi ʻa e kau akó ke vahevahe ʻa e ngaahi moʻoni ʻoku nau akó: Ke akoako lahi ange ki he founga hono fakahoko ʻení, vakai ki he ako ʻoku ui ko e “Poupouʻi ʻa e kau akó ke vahevahe ʻa e ngaahi moʻoni ʻoku nau akó” ʻi he Fakatupulaki ʻa e Ngaahi Taukei ʻa e Faiakó: Fakaafeʻi ʻa e Ako Fakamātoató. ʻE tokoni ʻa e ako ko ʻení ke ke akoako fakaafeʻi ʻa e kau akó ke fevahevaheʻaki ʻa e meʻa ʻoku nau akó.

Fakaafeʻi ʻa e kau akó ke toe vakai ki heʻenau tohinoá. ʻAi ke nau tānaki atu ki ai ʻaki hono lekooti ʻa e founga kuo teuteuʻi ai ʻe he ʻOtuá ha founga maʻanautolu ke ikunaʻi ʻa e ngaahi palani olopoto ʻa e tēvoló ʻi heʻenau moʻuí. ʻE lava foki ke nau fakakau ai ʻa e meʻa ʻoku nau ongoʻi ʻoku ueʻi kinautolu ke fakahoko ke falala lahi ange ai ki he poto ʻo e ʻOtuá ke ikunaʻi lelei ange ʻEne ngāué.

Fakapapauʻi ki he kau akó ʻoku mahulu hake ʻa e poto ʻo e ʻOtuá ʻi he poto ʻo e tēvoló. Fakakaukau ke fakamoʻoni ki he fakafiemālie ʻoku maʻu mei hono ʻiloʻi kuo tomuʻa ʻafioʻi mo teuteuʻi ʻe he ʻOtuá ha founga maʻanautolu ʻoku tui kiate Iá ke ikunaʻi ʻa e ngaahi palani olopoto kotoa ʻa Sētané.

Ngaahi Maʻuʻanga Tokoni Lahi Ange

Naʻe mole nai ha ngaahi akonaki naʻa tau fiemaʻu ʻi he mole ʻa e ʻū lauʻi peesi ʻe 116?

Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ko e “taumuʻa fakapotopoto” ʻa e ʻEikí (vakai, 1 Nīfai 9:5; Ngaahi Lea ʻa Molomona 1:7) ki hono hiki mo fakatolonga ʻo e ʻū lauʻi peleti iiki ʻa Nīfaí, naʻe mahulu atu ia ʻi hono fetongi ʻo e lauʻi peesi ʻe 116 naʻe molé:

Hangē ko ia naʻe fakahinohinoʻi ʻe he ʻEikí kia Siosefa ʻi he founga ngāue ki hono liliu mo fakahū ʻa e fakamatala mei he ʻū lauʻi peleti īkí ki he liliu ʻo e ʻū lauʻi peleti lalahi naʻe fakanounoú, ʻokú Ne folofola ʻo pehē, “Vakai, ʻoku lahi ʻa e ngaahi meʻa kuo tongitongi ki he ʻū lauʻi peleti [iiki] ʻa Nīfaí ʻa ia ʻoku fakahā ʻa e ʻilo lahi ange ki heʻeku ongoongoleleí” (naʻe tānaki atu ʻa e fakamamafá). …

… Naʻa tau maʻu mai ha meʻa lahi ange ʻi he meʻa naʻe mole meiate kitautolú. Pea naʻe ʻiloʻi pē mei he kamataʻangá ʻe pehē. Naʻe hoko ia koeʻuhí ko ha taumuʻa fakapotopoto ange. ʻOku ʻikai ke tau ʻilo pau ʻa e meʻa naʻe mole meiate kitautolu ʻi he peesi ʻe 116, ka ʻoku tau ʻiloʻi ko e meʻa naʻa tau maʻu ʻi he ʻū lauʻi peleti īkí ko hono talaki fakataautaha ʻo ha ngaahi fakamoʻoni maʻongoʻonga ʻe tolu, ko ha ngaahi leʻo fakatokāteline maʻongoʻonga ʻe tolu ʻo e Tohi ʻa Molomoná ʻoku nau fakamoʻoniʻi ko Sīsū ʻa e Kalaisí. …

… ʻI heʻetau hoko ko e kau laukonga ʻo e Tohi ʻa Molomoná, ʻoku lea fakahangatonu mai ʻa Nīfai, Sēkope, mo ʻĪsaia kiate kitautolu ko ha kau fakamoʻoni tonu ki he Fakamoʻuí ʻi he maama fakalaumālié. ʻOku nau maʻu ha ngaahi fakahā fakaofo fekauʻaki mo ʻEne moʻuí mo ʻEne ngāué pea mo e vā fetuʻutaki fakafuakava ʻa e ʻOtuá mo e Fale ʻo ʻIsilelí, ʻi he kuonga muʻá mo onopōní. …

ʻOku ou tui ʻe fakafiefia kapau ʻe ʻi ai ha ʻaho kuo fakafoki mai ai ʻa e peesi ʻe 116, ka ʻo kapau ʻe ʻomi ia ki hoku ʻōfisí ʻapongipongi, he ʻikai te u fakafetongi ʻaki ia ʻa e ngaahi meʻa ʻoku ʻi he lauʻi peleti iiki ʻa Nīfaí, ʻa e “ʻilo lahi ange” kuo ʻomi ʻo fakafou ʻi he kau leʻo fakapalōfita maʻongoʻonga ʻoku ʻi he kamataʻanga ʻo e tohí. (Jeffrey R. Holland, “A Standard unto My People” [address to Church Educational System religious educators, Aug. 9, 1994], 7–9)

Ko e hā naʻe ʻi he ʻū lauʻi peesi ʻe 116?

ʻI he talamuʻaki ki he ʻuluaki pulusinga ʻo e Tohi ʻa Molomoná, naʻe fakamatala ai ʻa Siosefa Sāmita ʻo pehē:

Naʻá ku liliu ʻaki ʻa e meʻafoaki mo e māfimafi ʻo e ʻOtuá, peá u fekau ke tohi ʻa e peesi ʻe teau hongofulu mā ono, ʻa ia naʻá ku toʻo mei he Tohi ʻa Līhaí, ʻa ia ko ha fakamatala fakanounou ia mei he ʻū lauʻi peleti ʻa Līhaí naʻe tohi ʻe Molomoná; ko e fakamatala ia kuo kaihaʻasi mo fufū meiate au ʻe ha tokotaha pe niʻihi, neongo ʻeku fāifeinga fakamātoato taha ke toe maʻu iá. (“Preface to Book of Mormon, circa August 1829,” iii, josephsmithpapers.org)

Ngaahi ʻEkitivitī Fakalahi ki he Akó

Olopoto ʻa Sētané

Fakakaukau ke kamata ʻa e lēsoní ʻaki hono tokoniʻi ʻa e kau akó ke nau ʻiloʻi ʻoku olopoto ʻa Sētane pea ʻokú ne feinga ke taʻofi kitautolu mei hono fakahoko ʻa e ngāue ʻa e ʻOtuá. Te ke lava ʻo kamataʻi ha fealēleaʻaki fakakalasi ʻaki hano fakaʻaliʻali ha tauhele pea ʻeke ʻa e ngaahi fehuʻi ko ʻení:

• ʻE lava fēfē nai ʻe ha tauhele ʻo fakafofongaʻi ʻa e ngaahi taumuʻa ʻa Sētane kiate kitautolú?

• Ko e hā ha ngaahi fakakaukau mo ha ngaahi fehuʻi ʻe ala fakakaukau ki ai ha taha hili haʻane tō ki ha taha ʻo e ngaahi tauhele ʻa Sētané?

Hoko atu ʻa e lēsoní ʻaki hono fakamanatu ki he kau akó ʻa e “tauhele” naʻe fokotuʻutuʻu ʻe Sētane ki he ʻū lauʻi peesi ʻe 116.

Fakamatala fakavitiō

Fakakaukau ke huluʻi ʻa e foʻi vitiō “The Work of God” (13:35) ke tokoni ke fakakaukauloto ʻa e kau akó ki he ngaahi meʻa naʻe hoko ʻo fakaiku ki he ongo fakahā naʻe ʻomi ʻe he ʻEikí ʻi he Tokāteline mo e Ngaahi Fuakava 3 mo e 10. ʻE lava foki ʻo tokoni ke mahino kiate kinautolu ʻa e founga ʻoku fakahaaʻi ai ʻa e poto ʻo e ʻOtuá ʻi hono fakakau ʻe Molomona ʻa e ʻū lauʻi peleti iiki ʻa Nīfaí. Mahalo naʻe huluʻi ha konga ʻo e vitiō ko ʻení ʻi he lēsoni “Tokāteline mo e Ngaahi Fuakava 3.”

ʻE lava ke tokoniʻi kitautolu ʻe he falala ki he poto ʻo e ʻOtuá ke tau talangofua ki Heʻene ngaahi fakahinohinó

Naʻe ʻikai mahino kakato kia Nīfai pe ko Molomona ʻa e fiemaʻu ke faʻu pe fakakau ʻa e ʻū lauʻi peleti iiki ʻa Nīfaí ʻi he lekooti ʻa Molomoná (vakai, 1 Nīfai 9:5–6; Ngaahi Lea ʻa Molomona 1:6–7). Fakakaukau ke fakaafeʻi ʻa e kau akó ke lau ʻa e 1 Nīfai 9:5–6 mo e Ngaahi Lea ʻa Molomona 1:6–7, ʻo kumi ʻa e ʻuhinga naʻe talangofua ai ʻa Nīfai mo Molomona ki ha fekau naʻe ʻikai mahino kiate kinauá. Hili hono vahevahe ʻe he kau akó ʻa e meʻa naʻa nau maʻú, ʻe lava ke ke kole ange ke nau vahevahe ha ngaahi meʻa kuo kole mai ʻe he ʻOtuá ke tau fakahoko ki ha ngaahi ʻuhinga ʻoku ʻikai mahino kakato kiate kitautolu. Fakaafeʻi kinautolu ke vahevahe ʻa e meʻa ʻoku nau ʻilo fekauʻaki mo e ʻOtuá ʻoku tokoni ke nau talangofua kiate Iá, naʻa mo e kimuʻa pea mahino ʻa e ʻuhinga ʻoku totonu ke nau talangofua aí.

Ngaahi taumuʻa ʻo e Tohi ʻa Molomoná

Te ke lava ʻo fakaafeʻi ʻa e kau akó ke lau ʻa e Tokāteline mo e Ngaahi Fuakava 10:46–50, 57–68, ʻo kumi ʻa e ngaahi taumuʻa ʻo e Tohi ʻa Molomoná. Hangē ko ʻení, ʻoku tau ako ʻoku ʻomi ʻe he Tohi ʻa Molomoná ʻa e tokāteline moʻoni ʻa e Fakamoʻuí (vakai, veesi 62) pea mo fokotuʻu ʻEne ongoongoleleí “ke ʻoua naʻa ʻi ai [ha] fakakikihi lahi” ((veesi 63). Fakaafeʻi ʻa e kau akó ke vahevahe ha taimi kuo nau mamata ai ki hano fakahoko ha niʻihi ʻo e ngaahi taumuʻa ʻo e Tohi ʻa Molomoná ʻi heʻenau moʻuí pe ʻi he moʻui ʻa e kakai ʻoku nau ʻiló.

Lotu maʻu ai pē

ʻE lava ke fakaafeʻi ʻa e kau akó ke lau ʻa e Tokāteline mo e Ngaahi Fuakava 10:5 ʻo kumi ʻa e ngaahi tāpuaki ʻoku foaki ʻe he ʻEikí kiate kinautolu ʻoku lotu maʻu peé. Fakaafeʻi kinautolu ke vahevahe ʻa e founga kuo tokoniʻi ai kinautolu ʻe he lotu maʻu peé ke nau “ikuná.” ʻE lava leva ke kumi ʻe he kau akó ʻa e kupuʻi lea “lotu maʻu ai pē” ʻi he ngaahi folofola kehé pea tānaki atu ʻa e ngaahi tāpuaki kuo talaʻofa mai te nau maʻu ʻi he ngaahi potufolofola ko iá (ʻoku kau ʻi he ngaahi sīpingá ʻa e 3 Nīfai 18:15–21; Tokāteline mo e Ngaahi Fuakava 19:38; 93:49).