“Lēsoni 13—Tokāteline mo e Ngaahi Fuakava 3: ‘Naʻe ʻIkai Totonu Ke Ke Manavahē ki he Tangatá ʻo Lahi Ange ʻi he ʻOtuá,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 3,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 13: Tokāteline mo e Ngaahi Fuakava 3–5
Tokāteline mo e Ngaahi Fuakava 3
“Naʻe ʻIkai Totonu Ke Ke Manavahē ki he Tangatá ʻo Lahi Ange ʻi he ʻOtuá”
ʻE lava ke tau ongoʻi ʻi he taimi ʻe niʻihi ʻoku teke mālohi kitautolu ʻe he niʻihi kehé ke talangataʻa ki he ʻOtuá. Naʻe ongoʻi ʻe Siosefa Sāmita ʻa e teke mālohi tatau ʻi he taimi naʻe kole ange ai ʻe Māteni Hālisi ke ne ʻave ʻa e ʻū lauʻi peesi ʻo e Tohi ʻa Molomoná naʻe ʻosi liliú. Ka neongo ia, naʻe ʻilo ʻe Siosefa ko e ngaahi momeniti ʻeni ʻoku totonu ke tau faivelenga ai ki he ʻOtuá pea ʻoua naʻa tau tukulolo ki he teke mālohi ʻa e niʻihi kehé. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke falala ki he ʻOtuá ʻo lahi ange ʻi he kakai kehé.
Ngaahi ʻEkitivitī Ako ʻOku Ala Fakahokó
Ko e ngaahi teke mālohi ʻo e moʻuí
Kamata ʻa e kalasí ʻaki hano fakaʻaliʻali ki he kau akó ha meʻa molū hangē ko ha kiʻi tamapua pe pilo. Talaange ki he kau akó ʻe lava ke fakafofongaʻi kinautolu ʻe he kiʻi meʻa ko ʻení. ʻI he tali takitaha te nau fakahoko ki he ongo fehuʻi ko ʻení, fakaafeʻi ha tokotaha ako ke ne hili ha tohi pe meʻa mamafa ʻi ʻolunga ʻi he meʻa moluú. ʻI hono tataʻo ʻo e meʻa ko iá, fakaafeʻi ʻa e kau akó ke fakalaulauloto pe kuo nau ʻosi ongoʻi mafasia pehē nai.
-
Ko e hā ha ngaahi teke mālohi ʻoku ongoʻi ʻe he toʻu tupú ʻi heʻenau moʻuí?
-
Ko e hā ʻa e lahi ʻo e ngaahi teke mālohi ko ʻení ʻoku tupu mei he feinga ke fakafiefiaʻi ʻa e niʻihi kehé?
Fakaʻaongaʻi ha kiʻi miniti ke fakakaukau ai ki he lahi ʻo e teke mālohi ʻokú ke ongoʻi ke fakafiefiaʻi ʻa e niʻihi kehé pea mo hono ʻuhingá.
Te ke ako ʻi he lēsoni ko ʻení ki he founga naʻe ongoʻi ai ʻe he Palōfita ko Siosefa Sāmitá ha teke mālohi ke fakafiefiaʻi ʻa Māteni Hālisí mo e meʻa naʻe akoʻi ange ʻe he Fakamoʻuí ʻi he tūkunga ko iá. ʻI hoʻo akó, fekumi ki he fakahinohino ʻa e Laumālie Māʻoniʻoní ke maʻu ʻa e ngaahi moʻoni ʻe lava ʻo tokoni atu ʻi hoʻo ongoʻi ʻa e teke mālohi ko ʻení.
“Kuo mole ʻa e meʻa kotoa pē”
Ko ha ngaahi fakakaukau ʻeni ki hono tokoniʻi ke mahino ki he kau akó ʻa e puipuituʻa fakahisitōlia mahuʻinga ʻi laló:
-
ʻOange ʻa e leá ki ha tokotaha ako kimuʻa ʻi he kalasí, pea fakaafeʻi ke ne fakamatalaʻi fakanounou ia maʻá e tokotaha kotoa pē.
-
Fakaafeʻi ʻa e kau akó ke vahevahe ʻa e meʻa ʻoku nau ʻilo fekauʻaki mo e peesi ʻe 116 naʻe mole mei hono fuofua liliu ʻo e Tohi ʻa Molomoná. Fakamatalaʻi ange ʻa e fakamatala ʻoku ʻikai vahevahe ʻe he kau akó.
-
Fakaʻaliʻali ha konga ʻo e fakamatala ko ʻení kae fakapuliki ha ngaahi foʻi lea mahuʻinga, pea vakai pe ʻe lava ʻe he kau akó ʻo fakakakato ʻa e fakamatalá. Fakafonu ʻa e meʻa ʻoku ʻikai ʻilo ʻe he kau akó.
-
Huluʻi ʻa e foʻi vitiō “The Work of God” (ChurchofJesusChrist.org) mei he taimi 2:25 ki he 8:45. Pe te ke fili ke huluʻi ʻa e foʻi vitiō ko ʻení ʻi hoʻomou ako ʻa e Tokāteline mo e Ngaahi Fuakava 10.
13:34
Ko Māteni Hālisí ko ha tangataʻi fonua ia ʻo Palemaila naʻe fakaʻapaʻapaʻi pea ko ha tangata faama lavameʻa, ʻa ia naʻe kau ʻi he niʻihi tokosiʻi ʻi he feituʻú naʻe tui kia Siosefa Sāmitá. Neongo naʻe mei liunga ua ʻa e taʻu motuʻa ʻo Mātení ʻia Siosefa, ka naʻá ne hoko ko ha kaungāmeʻa ʻo Siosefa peá ne foaki ange ha paʻanga koeʻuhí ke lava [ʻa Siosefa] ʻo hiki ki Hāmoni, Penisilivēnia, ke liliu ʻa e Tohi ʻa Molomoná ʻo ʻikai toe fakahohaʻasi ia. Naʻe feilaulau foki ʻa Māteni ke fononga ki ai ʻiate ia pē pea hoko ko ha tangata tohi.
Naʻe ʻikai poupouʻi ʻe Lusi ko e uaifi ʻo Mātení ki heʻene kau ʻi hono liliu ʻo e Tohi ʻa Molomoná. Naʻe kole ange ʻe Māteni kia Siosefa pe te ne lava ʻo fakaʻaliʻali ʻa e ʻuluaki peesi ʻe 116 ʻo e liliú kia Lusi ko ha fakamoʻoni ʻo ʻena ngāué. Naʻe lotua tuʻo ua ia ʻe Siosefa pea naʻe talaange ʻi he taimi takitaha ke ʻoua naʻa fakangofua ʻa Māteni ke ne ʻave ʻa e ʻū lauʻi pēsí.
Naʻe toe lotu ʻa Siosefa ko hono tuʻo tolú, pea naʻe fakangofua ʻe he ʻEikí ʻi ha ngaahi makatuʻunga pau. Naʻe ʻave ʻe Māteni ʻa e ʻū lauʻi pēsí ki Palemaila ke fakaʻaliʻali kinautolu ki hono uaifí.
-
ʻOkú ke pehē ko e hā naʻe ʻikai muimui ai ʻa Siosefa ki he ongo ʻuluaki tali naʻá ne maʻu mei he ʻEikí?
ʻE lava ke mou toe fakahoko ʻa e ʻekitivitī mei he kamataʻanga ʻo e lēsoní ke fakahaaʻi ʻa e teke mālohi naʻe fepaki mo Siosefá.
ʻI he ʻaho hili ʻa e mavahe ʻa Mātení, naʻe fāʻeleʻi ʻe ʻEma Sāmita ʻa ʻena ʻuluaki tama mo Siosefá, ko ha foha. Kae fakamamahí, naʻe moʻui pē ʻa e pēpē valevalé ʻi ha ngaahi houa siʻi, pea naʻe hangē ʻe mate foki mo ʻEmá. Meʻamālié, naʻe kamata ke fakalakalaka ʻa e moʻui lelei ʻa ʻEmá hili ha ngaahi uike mei ai. Neongo naʻe ʻikai fie mavahe ʻa Siosefa mei he tafaʻaki ʻo ʻEmá, ka naʻe tapou ange ʻa ʻEma ke ne fononga ki Palemaila ʻo ʻeke ʻa e ʻū lauʻi pēsí.
ʻI he aʻu ʻa Siosefa ki he ʻapi ʻo ʻene ongomātuʻá, naʻa nau fakaafeʻi ʻa Māteni ke nau maʻu meʻatokoni pongipongi. Naʻe laka hake ʻi he houa ʻe faá e tōmui ʻa Mātení. ʻI he faifai peá ne aʻu atu ʻo tangutú, naʻá ne tangi mamahi ʻo pehē, “Kuo mole hoku laumālié!” Naʻe ʻikai ke ne muimui ki he ngaahi fakahinohinó pea kuó ne fakamoleki ʻa e ʻū lauʻi pēsí.
“ʻOiauē ʻe hoku ʻOtua, ʻe hoku ʻOtua. “Kuo mole kotoa!” Ko Siosefa ange ia. “Te u foki koā ki hoku uaifí mo ha faʻahinga talanoa peheni? Te u ʻalu fēfē ki he ʻEikí?”
Hili ʻa e foki ʻa Siosefa ki Hāmoní, naʻe hā mai ʻa Molonai ʻo toʻo ʻa e ʻū lauʻi peletí meiate ia. (Vakai, Kau Māʻoniʻoní, 1:50–54.)
-
ʻOkú ke pehē ko e hā naʻe ongoʻi ai ʻe Siosefa kuo mole ʻa e meʻa kotoá?
Hili ha taimi nounou mei he aʻusia ko ʻení, naʻe folofola ʻa e ʻEikí kia Siosefa Sāmita, ʻo valokiʻi ia pea ʻoange ha ngaahi lea fakafiemālie.
Manavahē ki he ʻOtuá ʻo lahi ange ʻi he tangatá
Lau ʻa e Tokāteline mo e Ngaahi Fuakava 3:1–10. Feinga ke ʻiloʻi ʻa e meʻa naʻe finangalo ʻa e ʻEikí ke ako ʻe Siosefa mei he aʻusia ko ʻení.
Poupouʻi ʻa e kau akó ke nau ako māmālie mo tokanga, ʻo kumi ha ngaahi lēsoni lahi.
Fakaafeʻi ʻa e kau akó ke fekumi ki ha ngaahi moʻoni maʻanautolu pē: ʻOku fakataumuʻa ʻa e fehuʻi ko ʻení ke tokoniʻi ʻa e kau akó ke nau ʻiloʻi ʻa e moʻoní ʻiate kinautolu pē. Ki ha ako lahi ange ki he ngaahi fehuʻi ʻoku tokoni ke ʻiloʻi ʻe he kau akó ʻa e tokāteliné mo e ngaahi tefitoʻi moʻoní ʻiate kinautolu peé, vakai ki he ako ʻoku ui ko e “Ako ʻiate koe pē ʻa e tokāteline ʻo Sīsū Kalaisí,” ʻa ia ʻoku maʻu ʻi he Fakatupulaki [ʻo e] Ngaahi Taukei ʻa e Faiakó: Akoʻi ʻa e Tokāteliné
-
Ko e hā ha ngaahi lēsoni naʻá ke maʻu?
Ko ha ngaahi sīpinga ʻeni ʻo e ngaahi tefitoʻi moʻoni ʻe ala maʻu ʻe he kau akó:
-
He ʻikai lava ke taʻofi ʻa e ngaahi ngāue ʻa e ʻOtuá (vakai, Tokāteline mo e Ngaahi Fuakava 3:1). Kapau ʻe ʻiloʻi ʻe he kau akó ʻa e foʻi moʻoni ko ʻení, fakakaukau ke kole ange ke nau vahevahe ʻa e ʻuhinga ʻoku mahuʻinga ai ke mahino ʻení mo e founga naʻá ne fakafiemālieʻi ai ʻa Siosefa Sāmitá.
-
ʻOku ʻaloʻofa ʻa e ʻOtuá (vakai, Tokāteline mo e Ngaahi Fuakava 3:10). ʻOku kau heni ʻa e taimi kuo tau tukulolo ai ki he teke mālohi mei he niʻihi kehé ke talangataʻa kiate Iá. Kapau ʻe ʻiloʻi ʻe he kau akó ʻa e foʻi moʻoni ko ʻení, fakakaukau ke ʻeke ange ha fehuʻi hangē ko ʻení: Naʻe tokoni fēfē nai ki he Palōfita ko Siosefa Sāmitá ʻa hono manatuʻi ʻa e ʻaloʻofa ʻa e Fakamoʻuí ʻi he taimi ko ʻení? ʻE tokoniʻi fēfē nai kitautolu ʻe he mahino ʻo ʻEne ʻaloʻofá ʻi heʻetau fiemaʻu ke liliú?
-
ʻI he taimi ʻoku tau manavahē ai ki he ʻOtuá ʻo lahi ange ʻi he tangatá, te Ne tokoniʻi kitautolu lolotonga ʻa e ngaahi taimi ʻo e faingataʻá (vakai, Tokāteline mo e Ngaahi Fuakava 3:7–8). ʻE nofotaha ʻa e toenga ʻo e lēsoní ʻi he tefitoʻi moʻoni ko ʻení.
Naʻe fakamatalaʻi ʻe ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ʻo e manavahē ki he ʻOtuá ʻo pehē:
ʻOku lahi ha ngaahi feituʻu ʻi he folofolá ʻoku nau faleʻi ʻa e faʻahinga ʻo e tangatá ke manavahē ki he ʻOtuá. ʻI hotau kuongá ni, ʻoku tau angamaheni ʻaki hono fakaʻuhingaʻi ʻa e foʻi lea manavaheé ko e “fakaʻapaʻapa” pe “ʻapasia” pe “ʻofa”; ʻa ia, ʻoku ʻuhinga ʻa e manavahē ki he ʻOtuá ko e ʻofa ki he ʻOtuá pe ko e fakaʻapaʻapa kiate Ia mo ʻEne fonó. …
… ʻOku totonu ke tau ʻofa mo fakaʻapaʻapaʻi Ia ʻo tau manavasiʻi ke fai ha meʻa hala ʻi Hono ʻaó, tatau ai pē pe ko e hā ʻa e fakakaukau pe teke mālohi mei he niʻihi kehé. (D. Todd Christofferson, “A Sense of the Sacred” [faeasaiti ʻa e Potungāue Ako ʻa e Siasí maʻá e kakai lalahi kei talavoú, 7 Nōvema 2004], 6–7, broadcasts.ChurchofJesusChrist.org)
-
Te ke fakamatalaʻi fakanounou fēfē nai ʻi he lea pē ʻaʻau ʻa e meʻa naʻe akoʻi ʻe ʻEletā Kulisitofāsoni fekauʻaki mo e manavahē ki he ʻOtuá?
ʻI he taimi ʻoku tau faivelenga aí, ʻe tokoniʻi kitautolu ʻe he ʻOtuá ʻi he taimi kotoa pē ʻo e faingataʻá
Mahalo te ke fie hiki ʻi he palakipoé ʻa e ʻE lava ke poupouʻi au ʻe he ʻEikí ʻi he ngaahi taimi ʻo e faingataʻá koeʻuhí ʻokú Ne … .
Hiki ʻi hoʻo tohinoa akó ʻa e kupuʻi lea ʻE lava ke poupouʻi au ʻe he ʻEikí ʻi he ngaahi taimi ʻo e faingataʻá koeʻuhí ʻokú Ne … . Fakakakato ʻa e fakamatala ko ʻení ʻaki hano fakahoko ha taha pe lahi ange ʻo e ngaahi meʻa ko ʻení:
-
Faʻu ha lisi ʻo e tokoni mo e poupou ʻe lava ke ʻoatu ʻe Sīsū Kalaisi kiate koe ʻa ia he ʻikai lava ia ʻe he kakai kehé.
-
Hiki ha lisi ʻo e ngaahi taimi ʻi hoʻo moʻuí naʻá ke fili ai ke tauhi faivelenga ki he ʻEikí, naʻa mo e taimi naʻe teke mālohi ai koe ʻe he niʻihi kehé ke talangataʻa kiate Iá, pea naʻá Ne ʻomi ha tokoni kiate koe. Te ke lava foki ʻo fakaʻaongaʻi ha ngaahi sīpinga mei he folofolá.
ʻE lava foki ke lisi ʻe he kau akó ha konga ʻo ʻenau ngaahi talí ʻi he palakipoé. Mahalo ʻe fiemaʻu tokoni ʻa e kau akó ʻi hono kumi ha ngaahi talanoa ʻi he folofolá ʻo hono tokoniʻi ʻe he ʻOtuá ha niʻihi fakafoʻituitui naʻe fehangahangai mo ha fakafepaki ka ne nau kei faivelenga pē kiate Ia. Te ke lava ʻo ʻoange kiate kinautolu ʻa e ngaahi sīpinga ko ʻení: Ko hono maʻu ʻe ʻApinetai ha mālohi mei he ʻOtuá ke fakahoko ʻEne pōpoakí neongo ʻa e ngaahi fakamanamana mei he Tuʻi ko Noá mo ʻene kau taulaʻeikí (vakai, Mōsaia 13:1–3); ko hono fakahaofi ʻe he ʻEikí ʻa Setaleki, Mēsake, mo ʻApitenikō mei he afi kakahá (vakai, Taniela 3:23–25).
-
Ko e hā kuó ke tohi fekauʻaki mo e Fakamoʻuí ʻokú ke ongoʻi ʻe tokoni lahi taha ke ke manatuʻi ʻi he taimi ʻoku ʻahiʻahiʻi ai koe ke ke fakafiefiaʻi ʻa e niʻihi kehé ʻo lahi ange ʻi he ʻOtuá?
ʻI he ʻosi hono valokiʻi ko ʻeni ʻo Siosefá, naʻá ne ako ai ʻe tokoniʻi ia ʻe he ʻOtuá ʻi heʻene fili ke faivelengá. Naʻe laka ki muʻa ʻa Siosefa ʻi he moʻuí, ʻo falala ki he ngaahi fekau mo e fakahinohino ʻa e ʻOtuá, neongo naʻá ne aʻusia ʻa e mamahí, fakatangá, nofo pōpulá, pea naʻa mo e maté (vakai, Tokāteline mo e Ngaahi Fuakava 122; 135).
Fakalaulauloto pea hiki ʻi hoʻo tohinoa akó ʻa e founga ʻoku mahuʻinga ai kiate koe ʻa e meʻa naʻá ke ako ʻi he lēsoni ko ʻení. ʻE lava ke ke fakakau ai ʻa e meʻa ʻokú ke fie manatuʻi pe fakahoko ʻi he taimi ʻokú ke fehangahangai ai mo e teke mālohi ke manavahē ki he niʻihi kehé ʻo lahi ange ʻi he ʻOtuá.
Fakakaukau ke ke fakamoʻoniʻi naʻe tokoniʻi ʻa Siosefa Sāmita ʻe he ngaahi lēsoni naʻá ne ako mei he aʻusia faingataʻa ko ʻení ke ne talangofua ange ki he ʻOtuá ʻi he kotoa ʻo ʻene moʻuí. Te ke lava ʻo fakamoʻoni fekauʻaki mo e tokoni kuó ke maʻu mei he ʻOtuá ʻi hoʻo muimui ki Heʻene faleʻí neongo naʻe faingataʻa ke fakahoko ia.