“Lēsoni 15—Tokāteline mo e Ngaahi Fuakava 5: ʻʻOku ou ʻIloʻi Fakapapau ʻOku Moʻoni Ia,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 5,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 15: Tokāteline mo e Ngaahi Fuakava 3-5
Tokāteline mo e Ngaahi Fuakava 5
“ʻOku Ou ʻIloʻi Fakapapau ʻOku Moʻoni Ia”
Naʻe fakapapauʻi ʻe he ʻEikí kia Māteni Hālisi ʻi heʻene fekumi ki ha toe fakamoʻoni naʻe maʻu ʻe Siosefa Sāmita ʻa e ʻū lauʻi peleti koulá. ʻOku fakataumuʻa ʻa e lēsoni ko ʻení ke tokoni ki he kau akó ke ʻiloʻi ʻa e ngaahi fakamoʻoni kuo ʻomi ʻe he ʻEikí ke tokoniʻi kinautolu ke maʻu ha fakamoʻoni fakataautaha ki he Tohi ʻa Molomoná ko ha fakamoʻoni ʻe taha ʻo Sīsū Kalaisi, pea mo e uiuiʻi ʻo Siosefa Sāmita ko e palōfita ʻa e ʻOtuá.
Ngaahi ʻEkitivitī Ako ʻOku Ala Fakahokó
ko e tūkunga faingataʻa ʻo Māteni Hālisí
ʻOange ha faingamālie ki he kau akó ke vakaiʻi ʻenau fakamoʻoni ki he Tohi ʻa Molomoná mo Siosefa Sāmitá. ʻE lava ke tokoni ʻa e fakalaulauloto ki he tūkunga mo e ngaahi fehuʻi ko ʻení ke nau fakahoko ʻeni. ʻE lava ke vahevahe ʻe he kau akó ha konga ʻo ʻenau ngaahi talí mo e kalasí.
Fakakaukauloto naʻe fakahoko ʻe ha taha ha hopo pe ko e moʻoni nai naʻe maʻu ʻe Siosefa Sāmita ʻa e ʻū lauʻi peleti koulá.
-
Te ke ongoʻi fiemālie fēfē nai ke fakamoʻoni ki he Tohi ʻa Molomoná ko e folofola ia ʻa e ʻOtuá mo Siosefa Sāmita ko e Palōfita ia ʻo hono Fakafoki Mai ʻo e Ongoongoleleí? Ko e hā hono ʻuhingá?
-
Ko e hā haʻo lea ʻe faí?
-
Ko e hā ʻa e meʻa te ke fakamatalaʻí ko ha fakamoʻoni ke poupouʻi hoʻo hopó?
ʻE lava ke tokoni hono vahevahe pe fakamatalaʻi fakanounou ʻa e fakamatala puipuituʻa ko ʻení ke mahino lelei ange ki he kau akó ʻa e founga ke fakaʻaongaʻi ai ʻa e Tokāteline mo e Ngaahi Fuakava 5 ki heʻenau ngaahi tūkunga makehé.
Ka naʻe loto-mamahi ʻa Lusi Hālisi, ko e uaifi ʻo Māteni Hālisí, fekauʻaki mo e taimi mo e paʻanga naʻe foaki ʻe hono husepānití ki hono pulusi ʻo e Tohi ʻa Molomoná. Naʻá ne lāungaʻi fakalao ʻa Siosefa Sāmita pea tānaki mai ha kakai tokolahi naʻa nau loto fiemālie ke fakamoʻoniʻi naʻá ne loi fekauʻaki mo e ʻū lauʻi peletí. Naʻe fakatokanga kia Māteni kapau he ʻikai ke ne kau fakataha mo kinautolu ʻi he fakamoʻoni fakafepaki kia Siosefá, ʻe lava foki ke ʻave ia ki he fale fakapōpulá. Neongo naʻe hoko ʻa Māteni kimuʻa ko ha tangata tohi maʻa Siosefa, ka naʻá ne fakaʻaliʻali ha ngaahi mataʻitohi mei he ʻū lauʻi peletí ki he kau mataotao fakaʻatamaí ke fakapapauʻi hono fakakuongamuʻá, kuo mole ha peesi ʻe 116 ʻo e ʻū peesi totonú, ka naʻá ne kei fekumi pē ki ha fakamoʻoni ʻo hono moʻoni ʻo e ʻū lauʻi peleti koulá. Naʻá ne fononga ki he ʻapi ʻo Siosefá Sāmitá, ʻa ia naʻe fehuʻi ai ʻe Siosefa ki he ʻEikí peá ne maʻu ʻa e fakahā ʻi he Tokāteline mo e Ngaahi Fuakava 5.
ʻI hoʻo ako ʻa e Tokāteline mo e Ngaahi Fuakava 5, fekumi ki he Laumālie Māʻoniʻoní ke tokoni ke fakapapauʻi ʻa e meʻa kuó ke ʻosi ʻilo fekauʻaki mo Siosefa Sāmita mo e Tohi ʻa Molomoná. Fekumi foki ki ha ngaahi founga ke fakamālohia ai hoʻo fakamoʻoni kia Sīsū Kalaisi mo Hono Siasi kuo fakafoki maí.
Lau ʻa e Tokāteline mo e Ngaahi Fuakava 5:1–3, ʻo kumi ʻa e tali ʻa e ʻEikí kia Māteni Hālisí.
-
ʻOkú ke pehē ko e hā ʻoku ʻikai fakamoʻoniʻi ai ʻe he ʻEikí ʻa e moʻoni ʻo e Tohi ʻa Molomoná ʻaki hono fakaʻatā ke fakahā ki māmani e ʻū lauʻi peletí?
Neongo naʻe ʻikai fakangofua ʻa Māteni ke mamata ki he ʻū lauʻi peleti koulá ʻi he taimi ko iá, ka naʻe fakamālohia ia ʻe he fakahā ko ʻení ʻi ha founga naʻá ne lava ai ʻo fai ha fakamoʻoni mālohi ki he Palōfitá. Te ke fakatokangaʻi ʻi he lēsoni ko ʻení, kuo ʻomi ʻe he ʻEikí ha kau fakamoʻoni ke tokoni ke tau takitaha maʻu ha fakamoʻoni kia Siosefa Sāmita ko ha palōfita ʻa e ʻOtuá mo e Tohi ʻa Molomoná ko ha fakamoʻoni ʻe taha ʻo Sīsū Kalaisi.
Fakamoʻoni mei he ʻEikí
Fakakaukau ke vahe tolu ʻa e kalasí pea vahe ki he kulupu takitaha ha “fakamoʻoni” kehekehe ke nau ako ʻiate kinautolu pē ʻo fakaʻaongaʻi ʻa e laʻipepa tufa ʻi laló. Hili ha taimi feʻunga, ʻe lava ke fakafehoanaki mo aleaʻi ʻe he kau akó mo ʻenau kulupú ʻa e meʻa kuo nau akó.
Te ke lava foki ʻo fakahingoa ha sila kehekehe ʻe tolu ko e “Fakamoʻoni #1,” “Fakamoʻoni #2,” mo e “Fakamoʻoni #3.” Fakafonu ʻa e sila takitaha ʻaki ha ngaahi tatau ʻo e konga ʻoku fekauʻaki mo ia ʻi he laʻipepa tufá. Tufa kinautolu ki he kulupu takitaha ke nau ako.
Kau Fakamoʻoní
Fakamoʻoni #1
Ko e ngaahi folofola ʻa e ʻEikí
Naʻe fekauʻi ʻa Siosefa Sāmita ke ʻoua naʻa fakahā ʻa e ʻū lauʻi peleti koulá ki he māmaní (vakai, Tokāteline mo e Ngaahi Fuakava 5:3). Lau ʻa e Tokāteline mo e Ngaahi Fuakava 5:6–10, ʻo kumi ʻa e meʻa naʻe fakangofua ʻa Siosefa ke ne vahevahé.
Mahalo te ke fie fakaʻilongaʻi ha kupuʻi lea ʻoku toutou folofola ʻaki ʻe he ʻEikí ʻi he veesi 5, 6, mo e 7.
-
ʻOkú ke pehē ko e hā ʻoku laka ange ai ʻa e tokanga ʻa e ʻEikí ki heʻetau tui mo tokanga ki Heʻene folofola ʻi he Tohi ʻa Molomoná ʻi Heʻene tokanga fekauʻaki mo ʻetau ʻilo naʻe ʻi ai moʻoni ha ʻū lauʻi peletí?
Naʻe akonaki ʻa Palesiteni Kōtoni B. Hingikelī (1910–2008) kau ki he Tohi ʻa Molomoná ʻo pehē:
Ko e fakamoʻoni ki hono moʻoní, ki hono ʻaonga ʻi ha māmani ʻoku fakahehema ke maʻu ha fakamoʻoní, ʻoku ʻikai ke ʻi he ako ki he ngaahi meʻa fakakuongamuʻá pe faʻahinga ʻo e tangatá, neongo ʻe tokoni ʻa e ngaahi meʻá ni ki ha niʻihi. ʻOku ʻikai maʻu ia ʻi he fakatotolo fekumí pe ʻanalaiso fakahisitōliá, neongo te na ngali fakamoʻoni. … Ko e siviʻi ʻo hono moʻoní ʻoku maʻu ia ʻi hono laú. Ko ha tohi ia ʻa e ʻOtuá. (Gordon B. Hinckley, “Four Cornerstones of Faith,” Ensign, Feb. 2004, 6)
Fakaʻaongaʻi ha ngaahi miniti siʻi ke fakalaulauloto ki hoʻo aʻusia ʻi hono ako mo akoʻi koe mei he Tohi ʻa Molomoná. Fakakaukau ki he founga kuo liliu ai hoʻo moʻuí ʻe hoʻo akó. Mahalo te ke fie hiki ha niʻihi ʻo hoʻo ngaahi fakakaukaú ʻi hoʻo tohinoá.
Fakamoʻoni #2
Ko e fakamoʻoni ʻa e kau tamaioʻeiki ʻe toko tolú
Lau ʻa e Tokāteline mo e Ngaahi Fuakava 5:11–15, ʻo kumi pe ko hai ʻe faifai pea fakangofua ʻe he ʻEikí ke mamata ki he ʻū lauʻi peletí.
-
Ko e hā naʻá ke ʻilo ʻi he ngaahi veesi ko ʻení te ne lava ʻo fakamālohia ʻa e ngaahi fakamoʻoni ʻa e Kau Fakamoʻoni ʻe Toko Tolú?
Naʻe mamata kimui ange ʻa Māteni Hālisi, ʻŌliva Kautele, mo Tēvita Uitemā ki he ʻū lauʻi peleti koulá mo fakamoʻoni ki hono moʻoní. Te ke ako lahi ange fekauʻaki mo e meʻá ni ʻi hoʻo ako ʻa e Tokāteline mo e Ngaahi Fuakava 17.
Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí fekauʻaki mo e Kau Fakamoʻoni ʻe Toko Tolú ʻo pehē:
Naʻe ʻikai ke toe ʻi ai ha kau fakamoʻoni kehe ne nau fakafepakiʻi ʻenau fakamoʻoní. ʻE lava pē ke fakaʻikaiʻi ʻe ha taha, ka ʻe anga fēfē hano fakamatalaʻi ʻe ha taha ha kakai tangata lelei ʻe toko tolu ne nau faaitaha mo vilitaki ʻi heʻenau fakamoʻoni ne pulusí ʻo aʻu ki he ngataʻanga ʻo ʻenau moʻuí neongo ʻa e ngaahi fakatanga lahi mo e palopalema fakataautaha kehe naʻa nau fehangahangai mo iá? Hangē pē ko e Tohi ʻa Molomoná, ʻoku ʻikai ha toe fakamatala ʻe lelei ange ka ko ia ʻoku ʻi he fakamoʻoní, ʻa e fakamatala molumalu ʻa ha kau tangata lelei mo angatonu ne nau fakamatalaʻi ʻa e meʻa naʻa nau mamata ki aí. (Dallin H. Oaks, “The Witness: Martin Harris,” Liahona, May 1999, 36)
Fakakaukau ke lau ʻa e “Ko e Fakamoʻoni ʻa e Kau Fakamoʻoni ʻe Toko Tolú” ʻi he kamataʻanga ʻo e Tohi ʻa Molomoná pe faʻu ha lisi ʻo e kakai kuo nau fakamoʻoniʻi atu kiate koe ʻoku moʻoni ʻa e Tohi ʻa Molomoná. Fakakaukau ki he founga kuo fakamālohia ai ʻe heʻenau fakamoʻoní hoʻo fakamoʻoní.
Fakamoʻoni #3
Ko e Laumālie Māʻoniʻoní
Lau ʻa e Tokāteline mo e Ngaahi Fuakava 5:16 mo e Molonai 10:4–5. Feinga ke ʻiloʻi ʻa e founga ʻoku fakahā ai ʻe he ʻOtuá ʻa e moʻoni ʻo e Tohi ʻa Molomoná ki Heʻene fānaú.
-
Ko e hā ha ngaahi founga ʻe lava ke fakamoʻoniʻi ai ʻe he Laumālié ki ha taha ʻa hono moʻoni ʻo e Tohi ʻa Molomoná?
Naʻe pehē ʻe Keleni L. Peisi, ʻa ia naʻe hoko ko e Pīsope Pulé:
ʻOku ʻikai mo ha toe founga ke maʻu ai ha fakamoʻoni ka ʻi he fakamoʻoni pē ʻa e Laumālie Māʻoniʻoní. He ʻikai lava ke ke falala ki ha toe meʻa kehe. … ʻOku lahi ha ngaahi sīpinga fakafolofola ʻoku tau maʻu ki he maumautaimi hano maʻu ha fakamoʻoni fakatuʻasino kae ʻikai ke kau ai ʻa e fakamoʻoni ʻa e Laumālie Māʻoniʻoní. ʻOku ʻikai hoko ʻa e uluí mei ha ngaahi fakahā fakatuʻasino mei he langí. (Glenn L. Pace, “The Elusive Balance,” New Era, Mar. 1989, 49)
Hiki ha lisi ʻo e ngaahi ʻuhinga ʻokú ke pehē ai ʻoku mahuʻinga ange ha fakamoʻoni mei he Laumālie Māʻoniʻoní, ko ha mēmipa ʻo e Toluʻi ʻOtuá, ʻi ha fakamoʻoni fakatuʻasino ʻoku moʻoni ha meʻa. Fakakaukau ke fakakau ha faʻahinga fakamoʻoni pē ʻokú ke ongoʻi kuó ke maʻu ʻo fakafou ʻi he Laumālie Māʻoniʻoní ʻoku moʻoni ʻa e Tohi ʻa Molomoná.
ʻI he ʻosi hono ako mo aleaʻi ʻe he kau akó ʻenau fakamoʻoni naʻe vahe angé, fakaafeʻi ke nau kumi ha fakafofonga ʻe taha pe lahi ange mei heʻenau kulupú ke fakahoko ʻa e fakamatala ko ʻení ki he kalasí:
-
Fakamatalaʻi ʻa e fakamoʻoni naʻe ʻomi ʻe he ʻEikí naʻá ke ako mo hoʻo kulupú.
-
Vahevahe ha ngaahi sīpinga mei he ngaahi lisi naʻe faʻu ʻe he kau mēmipa hoʻo kulupú.
Te ke lava ʻo fakaafeʻi ʻa e kau akó kotoa ke tānaki atu ʻenau ngaahi fakakaukaú mo e fakamoʻoní ki he meʻa naʻe vahevahe ʻe honau kaungā-akó.
Hili ʻa e fakahā ʻi he Tokāteline mo e Ngaahi Fuakava 5, naʻe fakamoʻoni loto-toʻa ʻa Māteni ʻi he fakamaauʻangá ki he ʻulungaanga ʻo Siosefa Sāmitá pea mo hono moʻoni ʻo e ʻū lauʻi peleti koulá. Hili ʻa e fanongo ʻa e fakamāú ki he fakamoʻoni ʻa Mātení mo e niʻihi kehé, naʻá ne kaniseli ʻa e hopo ʻa Siosefa Sāmitá.
Vahevahe hoʻo ngaahi fakakaukau mo e fakamoʻoni ki he ngaahi moʻoni ʻi he lēsoni ko ʻení.