“Lēsoni 14—Tokāteline mo e Ngaahi Fuakava 4: ‘Tokoni hangē ko e ʻEikí,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 4,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 14: Tokāteline mo e Ngaahi Fuakava 3–5
Tokāteline mo e Ngaahi Fuakava 4
Tokoni hangē ko e ʻEikí
Naʻe fie ʻilo ʻe Siosefa Sāmita ko e Lahí ʻa e founga te ne lava ai ʻo tokoni ki he ʻOtuá mo e niʻihi kehé. ʻI he tali ki he fakaʻamu ʻa e tamai ʻa e Palōfita ko Siosefa Sāmitá, naʻá ne lotua peá ne maʻu ai ʻa e ʻuluaki ʻo e ngaahi fakahā naʻe ʻomi ki ha niʻihi fakafoʻituitui naʻa nau fie tokoni ʻi he ngāue ʻa e ʻEikí (vakai foki, Tokāteline mo e Ngaahi Fuakava 11–12; 14–16; 25). ʻE lava ke tokoni ʻa e lēsoni ko ʻení ki he kau akó ke tauhi ki he ʻOtuá mo e niʻihi kehé ʻi ha ngaahi founga faka-Kalaisi.
Ngaahi ʻEkitivitī Ako ʻOku Ala Fakahokó
Tokoni hangē ko e Fakamoʻuí
Fakakaukau ke kamata ʻa e kalasí ʻaki ha ʻekitivitī ʻe tokoni ki he kau akó ke fakalaulauloto ki heʻenau fakakaukau fekauʻaki mo e tauhi ki he ʻOtuá mo e niʻihi kehé ʻi ha ngaahi founga faka-Kalaisí. Ko ha sīpinga ʻeni ʻe taha.
Fakakaukauloto ʻoku fakahoko ʻe ha tokotaha ha taha ʻo e ngaahi ngāue tokoni ko ʻení maʻau:
-
Talanoa mo koe ke vakai pe ʻokú ke fēfē
-
Tokoniʻi koe ʻi ha ngāue kuo pau ke ke fai
-
Lotua koe
ʻE tokoni fēfē nai kiate koe kapau naʻa nau tokoniʻi koe ʻi he ngaahi founga ko ʻení? Ko e hā hono ʻuhingá?
-
Loto kakato ʻaki pe fakakonga pē
-
Faʻa kātaki pe ʻikai faʻa kātaki
-
Fakalotoa ʻe he ʻofa kiate koé pe ʻi ha meʻa kehe
Fakakaukauloto leva ʻoku fakahoko ʻe he Fakamoʻuí ʻa e ngāue ko iá maʻau. Te Ne fakahoko fēfē nai ia pea ko e hā hano ola?
Te ke ako ʻi he lēsoni ko ʻení fekauʻaki mo e ngāue tokoní mo e ngaahi ʻulungaanga faka-Kalaisi ʻoku finangalo ʻa e ʻEikí ke tau fekumi ki ai ʻi heʻetau tokoní. ʻI hoʻo akó, fakalaulauloto ki hoʻo ngaahi holi ke ngāué mo e ʻuhinga te ke fie fāifeinga ai ke maʻu ʻa e ngaahi ʻulungaanga ko ʻení.
Ko hono tali ʻa e fehuʻi ʻa Siosefa Sāmita ko e Lahí
Neongo naʻe teʻeki ke kau ʻa Siosefa Sāmita ko e Lahí ki ha tui fakalotu kuo fokotuʻu, ka naʻá ne tui ki he meʻa naʻe vahevahe ʻe hono fohá fekauʻaki mo ʻene ngaahi mata meʻa-hā-mai fakalangí mo poupouʻi ia ʻi heʻene liliu ʻa e Tohi ʻa Molomoná. Naʻe fiemaʻu ʻe Siosefa ko e Lahí ke tauhi ki he ʻOtuá ka naʻe ʻikai ke ne ʻilo ʻa e meʻa ke faí. ʻI Fēpueli ʻo e 1829, naʻá ne ʻaʻahi ai mo hono uaifí kia Siosefa ko e Siʻí ʻi Hāmoni, Penisilivēnia. Lolotonga ʻa e ʻaʻahi ko iá, naʻe maʻu ai ʻe he Palōfita ko Siosefá ʻa e Tokāteline mo e Ngaahi Fuakava 4 ko e tali ki he fehuʻi ʻa ʻene tamaí.
Lau ʻa e Tokāteline mo e Ngaahi Fuakava 4:1–4, ʻo kumi ʻa e meʻa naʻe akoʻi ʻe he ʻEikí fekauʻaki mo e (1) founga ʻoku totonu ke tau tauhi ai kiate Iá mo e (2) ʻuhinga ʻoku totonu ke tau tauhi ai kiate Iá. Mahalo ʻe tokoni ke ʻiloʻi ʻoku fakafehoanaki ʻe he ʻEikí ʻi he veesi 4, ʻa e uite ʻoku mateuteu ke utú ki he kakai ʻoku mateuteu ke tali ʻa e ongoongoleleí. Ko e hele tuʻusí ko ha meʻangāue ia ki he ututaʻú.
Fakakaukau ke fakaafeʻi ʻa e kau akó ke fakaʻaongaʻi ha ngaahi founga kehekehe ke fakaʻilongaʻi ʻa e founga mo e ʻuhinga ʻoku tau ngāue tokoni aí. Hangē ko ʻení, te nau lava ʻo laineʻi ʻa e founga ke tauhi ai ki he ʻOtuá mo siakaleʻi ʻa e ʻuhinga ʻoku totonu ke tau tauhi ai kiate Iá. Pe te nau fakaʻaongaʻi ha ngaahi lanu kehekehe. ʻE lava leva ke fakafehoanaki ʻe he kau akó ʻa e meʻa ne nau fakaʻilongaʻí mo hanau hoa pe ʻi ha kiʻi kulupu tokosiʻi.
-
Ko e hā naʻá ke maʻú?
Fakakaukau ke tā ha kōlomu ʻe ua ʻi he palakipoé ʻo ui ko e Foungá mo e ʻUhingá. Te ke lava ʻo fakaafeʻi ha kau ako ke tohi ʻi he palakipoé ʻi he kōlomu totonú ʻa e meʻa naʻa nau maʻú. Mahalo te ke fakakaukau ke hiki ʻa e ngaahi foʻi lea loto, ivi, ʻatamai, mo e mālohi ʻi he palakipoé pea fehuʻi ki he kau akó pe ʻoku nau pehē ʻoku fēfē nai ha taha ʻokú ne ngāue “kotoa” ʻaki ʻa e ngaahi meʻá ni takitaha.
-
Ko e hā ha ngaahi tāpuaki ʻoku maʻu ʻi he ngaahi veesi ko ʻení maʻanautolu ʻoku tauhi ki he ʻOtuá ʻaki honau lotó, iví, ʻatamaí, mo e mālohí kotoa?
Hili hono akoʻi ʻa e ngaahi tāpuaki ʻo e tauhi ki he ʻOtuá ʻaki ʻa e kotoa hotau lotó, iví, ʻatamaí, mo e mālohí, naʻe ʻomi ʻe he ʻEikí ha ngaahi ʻulungaanga lahi ʻe lava ʻo tokoni kiate kitautolu ʻi heʻetau ngāué. ʻOku maʻu ʻe Sīsū Kalaisi ʻa e ngaahi ʻulungaanga takitaha ko ʻení mo fakaafeʻi kitautolu ke tau fakatupulaki ia ʻi heʻetau moʻuí. ʻI heʻetau fai iá, ʻoku tau hoko lahi ange ai ʻo hangē ko Iá mo lava ke tokoni ʻo hangē ko ʻEne tokoní.
Lau ʻa e Tokāteline mo e Ngaahi Fuakava 4:5–6, ʻo kumi ʻa e ngaahi ʻulungaanga ʻoku finangalo ʻa e ʻEikí ke tau fakatupulaki ʻi heʻetau tokoní.
Fakamatalaʻi ange ko e ngaahi ʻulungaanga ko ʻení ko e founga ia ʻoku tau tokoni aí pea ʻe lava ke fakaʻilongaʻi tatau ia mo e ngaahi fakakaukau ki he foungá ʻi he veesi 1–4. ʻE lava ke tānaki ʻe he kau akó ʻa e ngaahi ʻulungaanga ko ʻení ki he palakipoé ʻi he kōlomu ʻoku fekauʻaki mo iá.
-
Te ke fakamatalaʻi fakanounou fēfē nai ʻa e ngaahi akonaki ʻi he vahe ko ʻení ki ha sētesi pē ʻe taha?
Ko e tefitoʻi moʻoni ʻe taha ʻe lava ke tau ako mei he vahe ko ʻení ʻi heʻetau tokoni ʻaki ʻa e ngaahi ʻulungaanga faka-Kalaisí, te tau tuʻu taʻe-halaia ʻi he ʻao ʻo e ʻOtuá mo maʻu ha fakamoʻui ki hotau laumālié.
Ko e mahino ʻa e ngaahi ʻulungaanga Faka-Kalaisí
Fakakaukau ke fehuʻi ange pe ko e fē ʻa e ngaahi ʻulungaanga ʻoku ʻikai mahino ki he kau akó. Fakaafeʻi ʻa e kau akó ke kumi ha ngaahi foʻi lea mahuʻinga ʻi he Fakahinohino ki he Ngaahi Folofolá pe ngaahi lea ʻo e konifelenisi lahí. ʻE lava foki ke ʻaonga ha tikisinale pe ko ha fekumi ʻi he Gospel Library app.
Fakaafeʻi ʻa e kau akó ke vahevahe pe ko e fē ʻa e ngaahi ʻulungaanga faka-Kalaisi ʻi he Tokāteline mo e Ngaahi Fuakava 4 ʻoku nau ongoʻi ʻoku angamaheni taha ke maʻu ʻe he toʻu tupú. Fakakaukau ke fehuʻi ange pe ko e fē ʻa e ngaahi ʻulungaanga ʻoku hāhāmolofiá pea ko e hā hono ʻuhingá. (Te ke lava ʻo fehuʻi ange pe ko e fē ʻoku ʻasi tuʻo ua ʻi he vahe 4 pea mo e ʻuhinga ʻoku nau fakakaukau ʻoku pehē aí.) ʻE lava ke vahevahe ʻe he kau akó ʻa e founga kuo nau mamata ai ki he ngaahi ʻulungaanga faka-Kalaisi ko ʻení ʻi honau kaungā-akó. ʻE lava ke fakatupulaki heni ʻa e uouangataha ʻa e kalasí mo poupouʻi ʻa e niʻihi kehé ke nau fakatupulaki ʻa e ngaahi ʻulungaanga faka-Kalaisí.
Fekumi ki he fakahinohino ʻa e Laumālie Māʻoniʻoní ke ke fili ha ʻulungaanga faka-Kalaisi ʻe mahuʻingamālie taha kiate koe ke ke akó. Hiki ia ʻi ʻolunga ʻi ha peesi ʻi hoʻo tohinoa akó. Hiki ʻeni ʻi lalo ʻi he ʻulungaanga naʻá ke filí.
-
Ngaahi Sīpinga: Fakalaulauloto ki he founga naʻe fakafōtunga ai ʻe he Fakamoʻuí ʻa e ʻulungaanga ko ʻení ʻi he kuonga muʻá pe ʻi hoʻo moʻuí ʻi he ʻaho ní. Kapau ʻokú ke fakaʻaongaʻi ha sīpinga mei he folofolá, feinga ke hiki hifo ha talanoa pe fakamoʻoni fakafolofola pau. (ʻE lava ke toe tokoni ʻa e Fakahinohino ki he Ngaahi Folofolá.) Te ke lava foki ʻo hiki ha sīpinga fakaeonopooni ʻo ha taha ʻoku tokoni ʻaki ʻa e ʻulungaanga ko ʻení pea mo e founga naʻá ne fakahoko ai ha liliú.
-
Ko e meʻa te tau lava ʻo fakahokó: Hiki ha sitepu ʻe taha pe ua te ke lava ʻo fakahoko ke fakatupulekina lahi ange ai ʻa e ʻulungaanga ko ʻení ʻi hoʻo moʻuí. Ki ha ngaahi fakakaukau, toe lau ʻa e Tokāteline mo e Ngaahi Fuakava 4:7, kole faleʻi ʻaki haʻo text ʻi he telefoní pe kole ki ha taha ʻokú ke ongoʻi ʻokú ne maʻu ʻa e ʻulungaanga faka-Kalaisi ko ʻení.
Fakaafeʻi ha niʻihi ʻo e kau akó ke vahevahe ʻenau ngaahi fakakaukaú. ʻI heʻenau vahevahé, fakakaukau ke fehuʻi ange pe naʻe fili ʻe ha niʻihi kehe ʻa e ʻulungaanga tatau pea te nau fie vahevahe ʻenau ngaahi fakakaukaú. Vahevahe foki mo hoʻo ngaahi fakakaukaú. ʻE lava ke hoko ʻeni ko ha faingamālie fakaʻofoʻofa ke mahino lelei ange ai ha ngaahi ʻulungaanga faka-Kalaisi kehekehe mo ongoʻi honau mahuʻingá. Fekumi ki ha ngaahi founga ke fakamamafaʻi ai ʻa e sīpinga ʻa e Fakamoʻuí.
Ko Hono Fakatupulaki ʻo e Ngaahi ʻUlungaanga Faka-Kalaisí
Ke fakaʻosi ʻa e lēsoni ko ʻení, faʻu ha palani ki ha sitepu ʻe taha pe ua te ke lava ʻo fakahoko ke fakatupulaki ai ha ʻulungaanga faka-Kalaisi naʻá ke ako ʻi he ʻahó ni. Te ke lava ʻo fakakau ai ha ngaahi founga ke fekumi ki he tokoni ʻa e ʻEikí lolotonga hoʻo fakatupulaki ʻa e ʻulungaanga ko ʻení.
Mahalo ʻe tokoni ke fakaafeʻi ʻa e kau akó ke lekooti ʻenau taumuʻá ʻi heʻenau tohinoa akó pe Fakalakalaka Fakatāutahá: Tohi Fakahinohino ʻa e Toʻu Tupú. ʻI ha lēsoni ʻi he kahaʻú, kole ki he kau akó ke lipooti ʻa e tuʻunga ʻoku nau ʻi aí. Fakakaukau ke fokotuʻu ha taumuʻa fakataautaha pea vahevahe mo hoʻo kau akó ʻa e founga ʻokú ke fekumi ai ki he tokoni ʻa e ʻEikí.