Lēsoni 26: Tokāteline mo e Ngaahi Fuakava 12–17; Siosefa Sāmita—Hisitōlia 1:66–75

Tokāteline mo e Ngaahi Fuakava 17

Ko e Kau Fakamoʻoni ʻe Toko Tolú

Naʻe talaʻofa ʻe he ʻEikí kia Siosefa Sāmita ʻe hoko ha toko tolu kehe ko ha kau fakamoʻoni ki he ʻū lauʻi peleti koulá. Naʻe ui ʻe he ʻOtuá ʻa ʻŌliva Kautele, Tēvita Uitemā, mo Māteni Hālisi ke nau hoko ko e kau fakamoʻoni ko ʻení. Naʻe ʻaʻahi kiate kinautolu ʻa e ʻāngelo ko Molonaí ʻi heʻenau tuí pea nau fanongo ki hono fakahā ʻe he leʻo ʻo e Fakamoʻuí ʻoku moʻoni ʻa e meʻa naʻa nau mamata ki aí. ʻE lava ke tokoni ʻa e lēsoni ko ʻení ki he kau akó ke fakamālohia ʻenau fakamoʻoni ki he Tohi ʻa Molomoná ʻi heʻenau ako ʻa e ngaahi fakamoʻoni ʻa e Kau Fakamoʻoni ʻe Toko Tolú.

Teuteu ʻa e tokotaha akó: Te ke lava ʻo fakaafeʻi ʻa e kau akó ke fekumi ʻi he ChurchofJesusChrist.org, ʻo kumi ha fakamatala fekauʻaki mo e Kau Fakamoʻoni ʻe Toko Tolu ʻo e Tohi ʻa Molomoná, pea omi mateuteu ke vahevahe ʻa e meʻa naʻa nau maʻú.

Ngaahi ʻEkitivitī Ako ʻOku Ala Fakahokó

Kau Fakamoʻoní

Ke fakafeʻiloaki ʻa e fatongia ʻo e kau fakamoʻoní, te ke lava ʻo fakaafeʻi ha kau ako ʻe toko tolu ke hoko ko ha kau fakamoʻoni. Ko e founga ʻe taha ke fakahoko ai ʻení ko hono fufuuʻi ha meʻa ʻi ha kato pea fakaafeʻi ha tokotaha ako ke sio ki ai pea fakamatalaʻi ʻa e meʻa ko iá. ʻEke ki he kalasí pe ʻoku nau tui ki he tokotaha akó. Fakaafeʻi ha kau ako kehe ke nau hoko ko ha fakamoʻoni hono ua mo e tolu. Aleaʻi ʻa e ʻuhinga ʻoku tokoni ai hono maʻu ha kau fakamoʻoni tokolahí.

ʻOku fakahoko ʻe he kau fakamoʻoní ha fatongia mahuʻinga ʻi he palani ʻo e fakamoʻui ʻa e Tamai Hēvaní. Lau ʻa e Tokāteline mo e Ngaahi Fuakava 6:28, ʻo kumi ʻa e meʻa naʻe akoʻi ʻe he ʻEikí fekauʻaki mo e kau fakamoʻoní (vakai foki, 2 Kolinitō 13:1).

• Ko e hā ha ngaahi sīpinga ʻo ha kau fakamoʻoni ʻi he Siasí?

• ʻOkú ke pehē ko e hā ʻoku ʻomi ai ʻe he Fakamoʻuí ha kau fakamoʻoni tokolahi ki Heʻene ngāué?

Ko e Kau Fakamoʻoni ʻe Toko Tolú

Naʻe ʻiloʻi ʻe Siosefa Sāmita ʻi he Tohi ʻa Molomoná mo ha ngaahi fakahā ʻe fakaʻatā ʻe he ʻEikí ha niʻihi fakafoʻituitui kehe ke mamata ki he ʻū lauʻi peleti koulá. Naʻá ne ʻiloʻi ʻe mamata ha toko tolu ʻo e kau fakamoʻoní ki he ʻū lauʻi peletí ʻi he mālohi ʻo e ʻOtuá (vakai, 2 Nīfai 27:12–13; ʻEta 5:2–4; Tokāteline mo e Ngaahi Fuakava 5:11–15). Naʻe maʻu ʻe ʻŌliva Kautele, Tēvita Uitemā, mo Māteni Hālisi ha loto-holi ke nau hoko ko ha taha ʻo e kau fakamoʻoní. Naʻa nau takitaha fakahoko ha fatongia mahuʻinga ʻi hono ʻomi ʻo e Tohi ʻa Molomoná.

Te ke lava ʻo fakaʻaliʻali ʻa e fakatātā ʻo e Kau Fakamoʻoni ʻe Toko Tolú pe hiki honau hingoá ʻi he palakipoé. ʻE lava ke lau ʻe ha tokotaha ako ʻa e ngaahi talí, pea ʻe lava ke lea ʻaki ʻe he kalasí ʻa e tokotaha fakamoʻoni ko iá. Pe te ke ʻoange ki he kau akó ʻa e siví. Ko e ngaahi tali tonú ko e 1. E, 2. F, 3. A.

Fakatauhoa ʻa e Kau Fakamoʻoni ʻe Toko Tolú mo e fakaikiiki totonu mei heʻenau moʻuí.

1. ʻŌliva Kautele

2. Tēvita Uitemā

3. Māteni Hālisi

1. Fakahoko ha tokoni fakapaʻanga ki hono paaki ʻo e Tohi ʻa Molomoná

2. Naʻá ne hoko ko e tangata tohi ʻa Siosefa ʻi he konga lahi ʻo hono liliu ʻo e Tohi ʻa Molomoná

3. Fakaafeʻi ʻa Siosefa Sāmita ke fakakakato hono liliu ʻa e Tohi ʻa Molomoná ʻi hono ʻapi fakafāmilí

Lau ʻa e Tokāteline mo e Ngaahi Fuakava 17:1–2, ʻo kumi ʻa e meʻa naʻe folofola ʻaki ʻe he ʻEikí ʻe mamata ki ai ʻa e Kau Fakamoʻoni ʻe Toko Tolú.

• Ko e hā ʻokú ke ʻilo fekauʻaki mo ha taha ʻo e ngaahi meʻa ko ʻení?

• Ko e hā naʻe fiemaʻu ʻe he ʻEikí mei he kau tangata ko ʻení ka nau mamata ki he ngaahi meʻa ko ʻení?

Lau ʻa e Tokāteline mo e Ngaahi Fuakava 17:3–9, ʻo kumi ʻa e fatongia ʻe maʻu ʻe he Kau Fakamoʻoni ʻe Toko Tolú hili ʻenau mamata ki he ʻū lauʻi peletí.

Ko e hā ha fatongia ʻoku tau maʻu ʻi he taimi ʻoku foaki mai ai ʻe he ʻEikí ha ngaahi fakamoʻoni ki he ngaahi moʻoni fakalangí?

Tokoni ke ʻiloʻi ʻe he kau akó ʻa e tefitoʻi moʻoni: Hili hono tāpuakiʻi kitautolu ʻe he ʻEikí ʻaki ha fakamoʻoni ʻo e moʻoní, ʻoku tau maʻu ha fatongia ke fakamoʻoniʻi ia.

Mahalo te ke fie fakaafeʻi ʻa e kau akó ke fakaʻilongaʻi ʻi he veesi 6 ʻa e founga ʻoku hoko ai ʻa e Fakamoʻuí ko ha sīpinga ʻo e moʻoni ko ʻení.

ʻOkú ke pehē ko e hā ʻoku mahuʻinga ai hono fakahoko ʻe he Fakamoʻuí ʻEne fakamoʻoni ki he Tohi ʻa Molomoná?

“Ko e Fakamoʻoni ʻa e Kau Fakamoʻoni ʻe Toko Tolú”

Lau ʻa e “Ko e Fakamoʻoni ʻa e Kau Fakamoʻoni ʻe Toko Tolú,” ʻoku ʻi he ngaahi peesi talateu ʻo e Tohi ʻa Molomoná, ʻo kumi ʻa e meʻa naʻa nau fakamoʻoni ki aí.

• Ko e hā ʻokú ke ongoʻi ʻoku mahuʻinga ʻi heʻenau fakamoʻoní?

Ke sio ki hano fakatātaaʻi ʻo e aʻusia ʻa e Kau Fakamoʻoni ʻe Toko Tolú, te ke lava ʻo huluʻi ʻa e foʻi vitiō “ChurchofJesusChrist.orgA Day for the Eternities” (23:09; mamataʻi mei he taimi 15:01 ki he 17:55), maʻu atu ʻi he .

Lolotonga hono lau ʻe he kau akó ʻa e “Ko e Fakamoʻoni ʻa e Kau Fakamoʻoni ʻe Toko Tolú,” te ke lava ʻo fakaafeʻi kinautolu ke hiki ʻi he palakipoé ha ngaahi foʻi lea pe ngaahi kupuʻi lea ʻoku nau fakahaaʻi ʻa e moʻoni ʻo e Tohi ʻa Molomoná. Aleaʻi ʻa e meʻa naʻe hiki ʻe he kau akó ʻi he palakipoé. Mahalo ʻe tokoni ke fakamahinoʻi naʻe maʻu ʻe he Kau Fakamoʻoni ʻe Toko Tolú ha ngaahi sīpinga fakalaumālie lahi. Makehe mei he fakamoʻoni ʻa Siosefa Sāmitá, naʻa nau mamata ki he ʻāngelo ko Molonaí mo fanongo ki hono fakahā ʻe he leʻo ʻo e Fakamoʻuí kiate kinautolu ʻoku moʻoni ʻa e ngāué.

• Ko e hā te tau lava ʻo ako mei he Kau Fakamoʻoni ʻe Toko Tolú fekauʻaki mo ʻetau maʻu ʻetau fakamoʻoni ʻoku moʻoni ʻa e Tohi ʻa Molomoná?

Naʻe fakamoʻoni ʻa Palesiteni Henelī B. ʻAealingi ʻo e Kau Palesitenisī ʻUluakí ki he mālohi ʻo ʻenau fakamoʻoní. Lau ʻa e fakamatala ko ʻení pe mamata ʻi he foʻi vitiō “And Enduring Testimony of the Mission of the Prophet Joseph” (17:32; mamata mei he taimi 4:18 ki he 5:43).

ʻE lava ke maʻu ʻe kinautolu ʻokú ke ʻofa aí ha fakamoʻoni ʻoku mahulu ange ʻi he fakamoʻoni fakatuʻasino naʻe maʻu ʻe he kau fakamoʻoni ko iá ʻi he meʻa naʻa nau mamata mo fanongo ki aí. Naʻe maʻu ʻe he Kau Fakamoʻoni ʻe Toko Tolu ko iá ha meʻa lahi ange, ko ha meʻa ʻoku tau fiemaʻu kotoa. Naʻe fakamoʻoniʻi ʻe he Laumālie Māʻoniʻoní ki honau ʻatamaí mo e lotó naʻe moʻoni ʻa e meʻa naʻa nau mamata mo fanongo ki aí. Naʻe fakahā ange ʻe he Laumālié kiate kinautolu ko e ʻāngeló mei he ʻOtuá pea ko e leʻó ko e leʻo ia ʻo e ʻEiki ko Sīsū Kalaisí. Naʻe foaki ʻa e fakamoʻoni ko ia ʻo e Laumālié kiate kinautolu mo ha niʻihi tokolahi naʻe ʻikai ke nau ʻi ai. Ko ha fakamoʻoni ia ʻe lava ke tau maʻu pea nofo mo kitautolu ʻo taʻengata, ʻo kapau te tau feʻunga ke maʻu ʻa e takaua ʻo e Laumālie Māʻoniʻoní.

Naʻe ʻikai teitei fakaʻikaiʻi ʻe he Kau Fakamoʻoni ʻe Toko Tolú ʻenau fakamoʻoni ki he Tohi ʻa Molomoná. Naʻe ʻikai ke nau lava he naʻa nau ʻiloʻi naʻe moʻoni ia. Naʻa nau fakahoko ha ngaahi feilaulau mo fehangahangai mo ha ngaahi faingataʻa ʻo hulu ange ʻi he ngaahi meʻa kuo ʻilo ki ai ʻa e kakai tokolahi. Naʻe fakahoko ʻe ʻŌliva Kautele ʻa e fakamoʻoni tatau fekauʻaki mo e tupuʻanga fakalangi ʻo e Tohi ʻa Molomoná ʻi he ʻamanaki ke ne pekiá. Ka ʻi he ngaahi taimi ʻo e ʻahiʻahí, naʻa nau veiveiua ʻi heʻenau tui naʻe kei hoko pē ʻa Siosefa ko e palōfita ʻa e ʻOtuá pea ko e founga pē ʻe taha ke haʻu ai ki he Fakamoʻuí naʻe fakafou ia ʻi Hono Siasi kuo fakafoki maí. Koeʻuhí naʻe hokohoko atu ʻenau fakapapauʻi ʻa e meʻa naʻa nau mamata mo fanongo ki ai ʻi he aʻusia fakaofo ko iá, lolotonga ha ngaahi vahaʻataimi taimi fuoloa ʻenau mavahe mei he Siasí pea mo Siosefá, ʻoku toe mālohi ange ai ʻenau fakamoʻoní. (Henry B. Eyring, “An Enduring Testimony of the Mission of the Prophet Joseph,” Liahona, Nov. 2003, 90)

• ʻOku tokoni fēfē ʻa e “Ko e Fakamoʻoni ʻa e Kau Fakamoʻoni ʻe Toko Tolú” ki hoʻo fakamoʻoni fakataautaha ki he Tohi ʻa Molomoná? kia Sīsū Kalaisí?

• Ko e hā ha ngaahi founga te tau lava ai ʻo vahevahe ʻetau fakamoʻoni ki he Fakamoʻuí mo e Tohi ʻa Molomoná?

Fakakaukau ke fakaafeʻi ʻa e kau akó ke vahevahe ʻenau fakamoʻoni ki he Fakamoʻuí mo e Tohi ʻa Molomoná. Ko e founga ʻe taha ko hono fakaafeʻi ʻa e kau akó ke hiki ʻa e meʻa te nau lea ʻakí kapau naʻe paaki ʻenau fakamoʻoni kia Sīsū Kalaisí mo e Tohi ʻa Molomoná ki he māmaní. Te ke lava ʻo poupouʻi ʻa e kau akó ke vahevahe ʻenau fakamoʻoní mo e kalasí pe ki ha taha kehe. Te ke lava foki ʻo vahevahe hoʻo fakamoʻoní.

Ngaahi Maʻuʻanga Tokoni Lahi Ange

Ko e fē te u lava ʻo ako lahi ange ai fekauʻaki mo e Kau Fakamoʻoni ʻe Toko Tolú?

• Ngaahi Tefito ʻi he Hisitōlia ʻo e Siasí, “Kau Fakamoʻoni ʻo e Tohi ʻa Molomoná,” ChurchofJesusChrist.org/study/history/topics

• Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, vōliume 1, Ko e Fuka ʻo e Moʻoní, 1815–1846 [2018], 73–75

• Larry E. Morris, “The Experience of the Three Witnesses,” ʻi he Revelations in Context (2016), 25–28

• “Whitmer Farm: A Place of Miracles” (vitiō; mamataʻi mei he taimi 9:20 ki he 11:45), ChurchofJesusChrist.org

Ko e hā ʻoku fuʻu mahuʻinga ai ʻa e fakamoʻoni ʻa e Kau Fakamoʻoni ʻe Toko Tolú?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Naʻe maʻu takitaha ʻe he toko tolú ni ha ʻuhinga lelei mo ha faingamālie ke fakaʻikaiʻi ai ʻenau fakamoʻoní kapau naʻe loi, pe ofeʻi ʻa e ngaahi fakaikiikí kapau naʻe ʻi ai ha meʻa naʻe hala. Hangē ko ia ʻoku ʻiloá, tuʻunga ʻi he taʻe-felotoi pe femehekaʻaki ʻi he kau taki kehe ʻo e Siasí, naʻe tuʻusi takitaha ai ʻa e kau fakamoʻoni ʻe toko tolu ko ʻení mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha taʻu nai ʻe valu hili hono pulusi ʻenau fakamoʻoní. Naʻe takitaha mātuku ʻa e toko tolú, taʻe-ʻi-ai haʻanau fakakaukau ke poupouʻi ha feinga fakamoveuveu. Ka ʻi he toenga ʻo ʻenau moʻuí—taʻu ʻe 12 ki he 50 hili hono tuʻusi kinautolú—naʻe ʻikai pē ke fakaʻikaiʻi ʻe ha taha ʻo e kau fakamoʻoni ko ʻení ʻene fakamoʻoni naʻe pulusí pe lea ʻaki ha meʻa ke fakatupu veiveiua ki hono moʻoní.

ʻIkai ngata aí, naʻe ʻikai ke toe ʻi ai ha kau fakamoʻoni kehe ne nau fakafepakiʻi ʻenau fakamoʻoní. ʻE lava pē ke fakaʻikaiʻi ʻe ha taha, ka ʻe anga fēfē hano fakamatalaʻi ʻe ha taha ha kakai tangata lelei ʻe toko tolu ne nau faaitaha mo vilitaki ʻi heʻenau fakamoʻoni ne pulusí ʻo aʻu ki he ngataʻanga ʻo ʻenau moʻuí neongo ʻa e ngaahi fakatanga lahi mo e palopalema kehe naʻa nau fehangahangai mo iá? Hangē pē ko e Tohi ʻa Molomoná, ʻoku ʻikai ha toe fakamatala ʻe lelei ange ka ko ia ʻoku ʻi he fakamoʻoní, ʻa e fakamatala molumalu ʻa ha kau tangata lelei mo angatonu ne nau fakamatalaʻi ʻa e meʻa naʻa nau mamata ki aí. (Dallin H. Oaks, “The Witness: Martin Harris,” Ensign, May 1999, 36)

Ko e hā ʻa e fakamoʻoni naʻe takitaha fakahoko ʻe he Kau Fakamoʻoni ʻe Toko Tolú ʻi he fakaʻosinga ʻo ʻenau moʻuí?

Naʻe fakamoʻoni ʻa ʻŌliva Kautele (1806–1850) ʻo pehē:

Ko ha tangata au kuó u mei mate, pea ko e hā hano ʻaonga kiate au ke u talaatu ha loi? ʻOku ou ʻilo … ko e Tohi ʻa Molomona ko ʻení naʻe liliu ia ʻi he meʻafoaki mo e mālohi ʻo e ʻOtuá. Naʻe mamata hoku ongo matá, fanongo hoku ongo telingá, pea naʻe fakamaama ʻa e mahino naʻá ku maʻú, pea ʻoku ou ʻilo ko e meʻa naʻá ku fakamoʻoni ki aí ʻoku moʻoni. Naʻe ʻikai ko ha misi, pe mahalo laulaunoa ʻo e ʻatamaí—naʻe moʻoni ia. (Jacob F. Gates, “Testimony of Jacob Gates,” Improvement Era, Mar. 1912, 418–19)

Naʻe fakamoʻoni ʻa Tēvita Uitemā (1805–1888) ʻo pehē:

ʻI he efiafi Sāpaté, ʻi he 5:30 (22 Sānuali 22 1888), naʻe ui ʻe Misa Uitemā hono fāmilí mo ha ngaahi kaungāmeʻa ʻe niʻihi ki hono veʻe mohengá. … Naʻá ne lea leva ki he taha kotoa ʻi hono veʻe mohengá ʻaki ʻa e ngaahi leá ni: “Ko ʻeni kuo pau ke mou tui faivelenga kotoa kia Kalaisi. ʻOku ou fie lea atu kiate kimoutolu kotoa pē, ʻoku moʻoni ʻa e Tohi Tapú mo e lekooti ʻo e kau Nīfaí (Tohi ʻa Molomoná), ko ia te mou lava ke pehē kuo mou fanongo kiate au ki heʻeku fai ʻeku fakamoʻoní ʻi he ofi ke u maté. Mou tui faivelenga kotoa kia Kalaisi, pea ʻe fakatatau ʻa hoʻomou totongí ki hoʻomou ngaahi ngāué. Ke fai tāpuekina kimoutolu kotoa pē ʻe he ʻOtuá. ʻOku ʻia Kalaisi ʻeku falalá ʻo taʻe-ngata, ko e ngaahi maama taʻe-hano-ngataʻanga. ʻĒmeni.” (Richmond Democrat, Feb. 2, 1888, ʻasi ʻi he Andrew Jenson, Latter-day Saint Biographical Encyclopedia, 4 vols. [1901], 1:270)

Naʻe fakamoʻoni ʻa Māteni Hālisi (1783–1875) ʻo pehē:

ʻIo, naʻá ku mamata ki he ʻū lauʻi peleti ʻa ia naʻe hiki ai ʻa e Tohi ʻa Molomoná; naʻá ku mamata ki he ʻāngeló; ne u fanongo ki he leʻo ʻo e ʻOtuá; pea ʻoku ou ʻilo ko Siosefa Sāmitá ko ha Palōfita ia ʻa e ʻOtuá, ʻokú ne maʻu ʻa e ngaahi kī ʻo e Lakanga Fakataulaʻeiki Māʻoniʻoní. (“The Last Testimony of Martin Harris,” naʻe lekooti ʻe William H. Homer ʻi ha fakamatala ʻi muʻa ʻia J. W. Robinson, 9 ʻEpeleli, 1927, naʻe hā ʻi he Francis W. Kirkham, A New Witness for Christ in America, 2 vols. [1960], 1:254)

Tokāteline mo e Ngaahi Fuakava 17:4. Naʻe tāpuekina fēfē nai ʻa Siosefa Sāmita ʻe he fakamoʻoni ʻa e Kau Fakamoʻoni ʻe Toko Tolú?

Hili pē ʻa e aʻusia ʻa e Kau Fakamoʻoni ʻe Toko Tolú mo e ʻāngeló, naʻe foki ʻa Siosefa Sāmita ki he ʻapi ʻo e fāmili Uitemaá ʻo kaila fiefia ki heʻene ongomātuʻá: “Tangataʻeiki, fineʻeiki; ʻoku ʻikai ke mo ʻilo ʻa e fiefia lahi ʻoku ou maʻú; kuo tuku ʻe he ʻEikí ke fakahaaʻi ʻa e ʻū lauʻi peletí ki ha toko tolu kehe makehe meiate au—kuo nau mamata ki ha ʻāngelo, ʻa ia kuó ne fakamoʻoni kiate kinautolu; pea te nau fakamoʻoni ki he moʻoni ʻo e meʻa kuó u lea ʻakí; he kuo nau ʻiloʻi maʻanautolu pē ʻoku ʻikai ke u kākaaʻi ʻa e kakaí. Pea ʻoku ou ongoʻi ʻo hangē kuo huʻi atu ha kavenga mafasia ne mei [fuʻu] mamafa ke u fuesiá; pea ʻoku fiefia ʻa hoku lotó, ʻe ʻikai ke u toe tuenoa toko taha pē ʻi he māmaní.” (“Lucy Mack Smith, History, 1845,” 154, josephsmithpapers.org)

Ngaahi ʻEkitivitī Fakalahi ki he Akó

“Ko e Fakamoʻoni ʻa e Kau Fakamoʻoni ʻe Toko Valú”

Ke tokoniʻi ʻa e kau akó ke ako ʻa e “Ko e Fakamoʻoni ʻa e Kau Fakamoʻoni ʻe Toko Valú,” te ke lava ʻo lau ʻenau fakamoʻoní ʻi he ngaahi peesi talateu ʻo e Tohi ʻa Molomoná. Te ke lava foki ʻo lau ʻa e 2 Nīfai 27:13. ʻOku fakahaaʻi ʻenau aʻusiá ʻi he vitiō “A Day for the Eternities” mei he taimi 18:17 ki he 18:38. Te mou lava ʻo aleaʻi hono mahuʻinga ʻo ʻenau fakamoʻoní mo e founga naʻe kehe ai ʻenau aʻusiá mei he Kau Fakamoʻoni ʻe Toko Tolú.

Ko Mele Uitemaá ko ha fakamoʻoni ia ki he ʻū lauʻi peleti koulá

Fakakaukau ke vahevahe ʻa e aʻusia ʻa Mele Uitemaá:

ʻI he taimi naʻe hiki ai ʻa Siosefa, ʻEma mo ʻŌliva ki he ʻapi ʻo e fāmili Uitemaá, naʻe lahi ange ai ʻa e mafasia ʻa Mele Uitemaá. Naʻá ne ʻosi femoʻuekina pē ʻi he ngaahi fiemaʻu ʻa hono husepānití mo e fānau ʻe toko valu naʻe nofo ʻi hono ʻapí pe ofi maí. Neongo naʻe ʻikai ke lāunga ʻa Mele fekauʻaki mo e toe lahi ange ʻa e ngāué, ka naʻe fakaʻau ke ne ongosia.

“ʻI ha ʻaho ʻe taha, lolotonga ʻene ʻi he fale tauhiʻanga ʻo e fanga monumanú naʻe tatau ai ʻa e fanga pulú, naʻá ne vakai atu ki ha tangata ʻulu hinā naʻá ne afe mai mo ha tangai ʻi hono umá. Naʻá ne ilifia ʻi he fakafokifā pē ʻa e ʻasi ʻa e tangatá ka ʻi heʻene fakaofi angé, naʻá ne lea ange ʻi ha leʻo angaʻofa naʻá ne ongoʻi fiemālie ai.

Naʻá ne talaange, ‘Ko hoku hingoá ko Molonai. Kuó ke fuʻu ongosia ʻi he ngāue makehe ʻoku pau ke ke faí.’ Naʻá ne tukuhifo ʻa e tangaí mei hono umá pea naʻe siofi pē ʻe Mele ʻene kamata ke vetevete hono haʻí.

Naʻá ne hoko atu ʻo pehē, “‘Kuó ke faivelenga ʻaupito mo ngāue mālohi. Ko ia ʻoku totonu ai ke ke mamata tonu kae lava ke fakamālohia hoʻo tuí.’

“Naʻe fakaava hake ʻe Molonai ʻene tangaí peá ne toʻo hake ʻa e ʻū lauʻi peleti koulá. Naʻá ne pukepuke ia ʻi muʻa ʻia Mele ka ne huke hake hono ʻū lauʻi pēsí ke lava e fefiné ʻo sio ki he meʻa naʻe tohi aí. ʻI heʻene aʻu ki he peesi fakaʻosí, naʻá ne tapou kiate ia ke faʻa kātaki pea ke faivelenga ʻi heʻene fuesia ʻa e kavenga makehé ʻo kiʻi fuofuoloa ange. Naʻá ne palōmesi ange ʻe tāpuekina ia heʻene fai iá.

“Naʻe pulia ʻa e tangataʻeikí ʻi ha lau momeniti mei ai, kae toko taha pē ʻa Mele. Naʻe kei toe ha ngāue ke ne fai, ka naʻe ʻikai toe hohaʻa ia ki ai” (Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, vōliume 1, Ko e Fuka ʻo e Moʻoní, 1815–1846 [2018], 70–71).

Te ke lava ʻo huluʻi ʻa e “Mary Whitmer Sees the Gold Plates” (2:26) pe “Whitmer Farm: A Place of Miracles” (15:42; mamata mei he taimi 5:06 ki he 6:09).

Ko ʻetau fakamoʻoni ki he Tohi ʻa Molomoná

Te mou lava foki ʻo aleaʻi ʻa e founga te tau lava ai ʻo maʻu ha fakamoʻoni ki he Tohi ʻa Molomoná. Fakakaukau ke vahevahe ʻa e foʻi vitiō “Book of Mormon Testimonies” (3:46) pea fakaafeʻi ha kau ako te nau loto fiemālie ke vahevahe ha fakamoʻoni ki he Tohi ʻa Molomoná pe ngaahi potufolofola mei he tohí ʻoku ʻuhingamālie kiate kinautolú.