Lēsoni 36: Tokāteline mo e Ngaahi Fuakava 20–22

Tokāteline mo e Ngaahi Fuakava 20:37, 68–79

Ko e Ngaahi Ouau Toputapu ʻo e Papitaisó mo e Sākalamēnití

ʻI ha fakahā ki he Palōfita ko Siosefa Sāmitá ʻoku lekooti ʻi he Tokāteline mo e Ngaahi Fuakava 20, naʻe fakamatalaʻi ai ʻe he ʻEikí ʻa e ngaahi ouau ʻo e papitaisó, hilifakinimá, mo e sākalamēnití. ʻE lava ke tokoni ʻa e lēsoni ko ʻení ke vakaiʻi ʻe he kau akó ʻa e founga ʻoku nau feau ai ʻa e ngaahi fiemaʻu ʻa e ʻEikí ki he kāingalotu ʻo Hono Siasí.

Teuteu ʻa e tokotaha akó: ʻE lava ke lau ʻe he kau akó ʻa e Tokāteline mo e Ngaahi Fuakava 20:37, 68–79. Fakaafeʻi kinautolu ke kumi ʻa e ngaahi fakahinohino naʻe ʻomi ʻe he ʻEikí kiate kinautolu ʻoku maʻu ʻa e loto-holi ke kau ki Hono Siasí mo kinautolu ʻoku kau ki Hono Siasí.

Ngaahi ʻEkitivitī Ako ʻOku Ala Fakahokó

Founga ʻoku kehe ai ʻa e moʻuí hili ʻa e papitaisó

Kimuʻa pea fakaafeʻi ʻa e kau akó ke aleaʻi ʻa e fehuʻi ko ʻení, fakakaukau ke fakaʻaliʻali ha tā ʻo ha taha ʻi hono ʻaho papitaisó, hangē ko ia ʻi he kamataʻanga ʻo e lēsoní.

• Ko e hā ha ngaahi founga ʻe kehe ai ʻa e moʻui ʻa ha taha hili ʻene fili ke papitaisó?

  Te ke lava ʻo fakamatala ki he kau akó fekauʻaki mo ha taha ʻokú ke ʻiloʻi naʻe papitaiso, ko ha konga ʻo e fealēleaʻaki ko ʻení. Te ke lava ʻo fakamatalaʻi ʻa e ngaahi faikehekehe naʻá ke fakatokangaʻi ʻi he tokotaha ko iá kimuʻa pea papitaisó mo e hili hono papitaisó. Te ke lava foki ʻo fakaafeʻi ʻa e kau akó ke nau fakakaukau mo vahevahe ʻa e founga kuo liliu ai ʻenau moʻuí ʻi heʻenau fili ke papitaisó.

• ʻOkú ke pehē ko e hā ʻoku mahuʻinga ai ʻa e ouau ʻo e papitaisó ki he Tamai Hēvaní mo Sīsū Kalaisí?

Vahevahe ʻa e palakalafi ko ʻení ke tokoni ke fakafeʻiloaki ʻa e kau akó ki he meʻa te nau ako ʻi he ʻaho ní:

ʻOku ʻi he Tokāteline mo e Ngaahi Fuakava 20 ha ngaahi fakahinohino fekauʻaki mo hono fokotuʻutuʻu ʻo e Siasi ʻo e Fakamoʻuí. Naʻe vahevahe ʻe he ʻEikí ha ngaahi akonaki mahuʻinga ʻoku tokoni ke mahino kiate kitautolu ʻa e mahuʻinga ʻo e ouau ʻo e papitaisó, ko ha konga ʻo e ngaahi fakahinohino ko ʻení. Naʻá Ne akoʻi foki ha ngaahi moʻoni mahuʻinga fekauʻaki mo e sākalamēnití, ʻa ia ʻoku fekauʻi ke tau maʻu ʻi he uike takitaha hili hono papitaiso kitautolú. ʻI hoʻo ako ʻa e folofola ʻa e Fakamoʻuí, tokanga ki he ngaahi ueʻi ʻa e Laumālié ʻe lava ʻo tokoni atu ke ke fakatokangaʻi hono mahuʻinga ʻo e ngaahi ouau ko ʻení ʻi hoʻo moʻuí.

Ko e ngaahi akonaki ʻa e Fakamoʻuí fekauʻaki mo e papitaisó mo e sākalamēnití

Vahevahe ʻa e kau akó ke tautau toko ua pe ki ha fanga kiʻi kulupu iiki. ʻOange ki he tokotaha ako takitaha ʻa e laʻipepa tufa ʻo e lēsoní pea fakaafeʻi ʻa e kau akó ke nau ngāue fakataha ke fakakakato ʻa e ngaahi ʻekitivitī ako ʻi he laʻipepa tufá. ʻE ala ʻaonga ke vahe ki ha tokotaha ako ʻi he kulupu takitaha ke hoko ko e taki ʻo e fealēleaʻakí.

Ke kehekehé, fakaafeʻi ʻa e kau akó ke kiʻi mālōlō hili ʻenau fakakakato ha konga koeʻuhí ke ke lava ʻo faʻu ha ngaahi hoa pe kulupu kehekehe ki he konga takitaha.

Ngaahi akonaki fekauʻaki mo e Papitaisó mo e Sākalamēnití ʻi he Tokāteline mo e Ngaahi Fuakava 20

Tokāteline mo e Ngaahi Fuakavá – Tohi Lēsoni ʻa e Faiako Seminelí—Tokāteline mo e Ngaahi Fuakava 20:37, 68–79

Konga 1: Ngaahi fiemaʻu ki he papitaisó

Lau ʻa e Tokāteline mo e Ngaahi Fuakava 20:37, ʻo kumi ʻa e meʻa kuo pau ke fai ʻe ha taha ke feʻunga ai ke papitaisó.

Kapau ʻe fiemaʻu, kumi ha ngaahi fakaʻuhinga ki ha ngaahi foʻi lea ʻoku ʻikai mahino kiate koe. Hiki leva ʻa e ngaahi fiemaʻu ki he papitaisó ʻi he feituʻu ʻoku fakaʻatā atu ʻi laló. ʻE lava ke ke toe fakalea kinautolu ʻi he lea pē ʻaʻau.

• Ko e hā ʻoku akoʻi atu ʻe he ngaahi fiemaʻu ko ʻení fekauʻaki mo e ʻEikí mo Hono finangalo maʻatautolú?

• ʻE ʻaonga fēfē nai ke manatuʻi ʻa e ngaahi fiemaʻu ko ʻení naʻa mo e hili ʻetau papitaisó?

Fili ha meʻa ʻe ua pe tolu ʻi he ngaahi fiemaʻu ʻoku lisi ʻi he veesi 37. Aleaʻi ʻa e founga ʻe lava ke tokoniʻi ai koe ʻi hoʻo feinga maʻu pē ke fakakakato kinautolú ke ke hoko ʻo hangē ange ko e Tamai Hēvaní mo Sīsū Kalaisí.

Konga 2: Ngaahi fiemaʻu hili ʻa e papitaisó

Lau ʻa e Tokāteline mo e Ngaahi Fuakava 20:68–69, ʻo kumi ʻa e finangalo ʻo e ʻEikí maʻatautolu hili hono papitaiso kitautolú.

• Ko e hā ʻokú ke ako mei he veesi 69, fekauʻaki mo e founga ʻoku tau fakahaaʻi ai ki he ʻEikí ʻetau moʻui taau hili hono papitaiso kitautolú?

Fakakaukau ke fakaʻilongaʻi ʻa e kupuʻi lea “ʻaʻeva mo e lea ʻi he anga faka-ʻOtuá” ʻi he veesi 69. ʻE lava ke fakahaaʻi ʻe ha taha ʻa e “ʻaʻeva mo e lea ʻi he anga faka-ʻOtuá” ʻi he ngaahi angafaí, tōʻongá, mo e ngaahi lea ʻoku fenāpasi mo e ʻOtuá.

• ʻOkú ke pehē ko e hā ha niʻihi ʻo e ngaahi ʻuhinga ʻoku finangalo ai ʻa e ʻEikí ke fakahaaʻi ʻe he kāingalotu ʻo Hono Siasí ʻa e “ʻaʻeva mo e lea ʻi he anga faka-ʻOtuá” hili hono papitaiso kinautolú?

Aleaʻi ha ngaahi sīpinga pau ʻe tolu ʻo e ngaahi founga te tau lava ai ʻo fakahaaʻi ʻa e “aʻeva mo e lea ʻi he anga faka-ʻOtuá” ʻi heʻetau moʻuí. Te mou lava foki ʻo aleaʻi ha ngaahi sīpinga ʻo e ngaahi founga kuó ke feinga ai ke fakahoko ʻeni ʻi hoʻo moʻuí.

Konga 3: Maʻu ʻo e sākalamēnití

Lau ʻa e Tokāteline mo e Ngaahi Fuakava 20:75, ʻo kumi e ngaahi fakahinohino ʻa e ʻEikí fekauʻaki mo e ouau ʻo e sākalamēnití.

• ʻOkú ke pehē ko e hā ʻoku finangalo ai ʻa e ʻEikí ke tau fakataha ʻi he uike takitaha ke maʻu ʻa e sākalamēnití?

ʻOku ʻi he veesi 77 mo e 79 ʻa e ongo lotu kuo fakahinohinoʻi ʻe he ʻEikí ʻa e kau maʻu lakanga fakataulaʻeikí ke nau fakahoko ʻi hono tāpuakiʻi ʻo e sākalamēnití. ʻOku tau fakafoʻou ʻa e fuakava naʻa tau fakahoko ʻi hono papitaiso kitautolú mo e hilifakinimá ʻo fakafou ʻi he ouau ʻo e sākalamēnití. ʻI heʻetau feinga ke tauhi ʻetau ngaahi fuakavá mo fakatomala fakaʻahó, ʻe lava ke tau aʻusia ʻa e fakamaʻa mo e ngaahi tāpuaki tatau naʻa tau aʻusia ʻi he papitaisó.

Lau ʻa e Tokāteline mo e Ngaahi Fuakava 20:77 mo e 79, ʻo kumi ʻa e palōmesi ʻoku tau fakahokó pea mo e talaʻofa mai ʻa e ʻEikí ʻi heʻetau maʻu ʻa e sākalamēnití. Fakakaukau ke fakaʻilongaʻi ʻa e ngaahi palōmesi mo e talaʻofa ko ʻení ʻi hoʻo folofolá.

• Te tau lava fēfē nai ʻo fakahaaʻi ʻetau loto fiemālie ke toʻo kiate kitautolu ʻa e huafa ʻo Sīsū Kalaisí?

• Ko e hā ha ngaahi founga te tau lava ai ʻo fakahaaʻi ki he Fakamoʻuí ʻoku tau manatu kiate Iá?

ʻOku fakahaaʻi fēfē nai ʻe he ouau ʻo e sākalamēnití ʻa e ʻofa mo e ʻaloʻofa ʻa e Fakamoʻuí kiate kitautolú?

© 2023 by Intellectual Reserve, Inc. All rights reserved.

Ko hono fakaʻaongaʻi ʻo e meʻa kuó ke akó

ʻOange ki ha kau akó ha faingamālie ke vahevahe ʻa e meʻa naʻa nau ako pe ongoʻi mei he ʻekitivitī ako kimuʻá. ʻE lava ke ke ʻeke ange ha taha pe lahi ange ʻo e ngaahi fehuʻi ko ʻení ko ha konga ʻo e fealēleaʻakí ni.

• Ko e hā ha ngaahi fakakaukau pe ongo naʻá ke maʻu ʻi hoʻo ako ʻa e ngaahi veesi ko ʻení?

• Ko e hā naʻá ke ako fekauʻaki mo e Fakamoʻuí ʻi hoʻo ako ʻEne ngaahi akonakí ʻi he vahe ko ʻení?

• Ko e hā kuó ke ako pe ongoʻi ʻi he ʻahó ni fekauʻaki mo e mahuʻinga ʻo e ngaahi ouau ʻo e papitaisó mo e sākalamēnití?

  Fakaafeʻi ʻa e kau akó ke vakaiʻi fakalongolongo ʻa e ongo ʻoku nau maʻu ki he anga ʻo ʻenau moʻui ʻaki ʻa e ngaahi fiemaʻu kuo nau ako ʻi he ʻaho ní. Ko e founga ʻe taha te ke lava ʻo fai ai ʻení ko hano fakaʻaliʻali ʻa e ngaahi fakahinohino ko ʻení pea fakaafeʻi ʻa e kau akó ke lekooti ʻenau ngaahi talí ʻi heʻenau tohinoa akó.

• Kumi ha kupuʻi lea ʻoku lisi ʻi he ngaahi veesi kuó ke ako ʻi he ʻaho ní (Tokāteline mo e Ngaahi Fuakava 20:37, 68–69, 75–79) ʻokú ne fakamatalaʻi ha meʻa ʻokú ke fakahoko lelei. Hiki ʻa e kupuʻi lea ko ʻení ʻi hoʻo tohinoa akó pea fakamatalaʻi ʻa e ʻuhinga ʻokú ke ongoʻi lelei ai ʻi he tafaʻaki ko ʻení.

• Kumi ha kupuʻi lea mei he ngaahi veesi ko ʻení ʻokú ne fakamatalaʻi ha meʻa ʻokú ke fie fakaleleiʻi. Hiki ʻa e kupuʻi lea ko ʻení ʻi hoʻo tohinoa akó pea fakamatalaʻi ʻa e ʻuhinga naʻá ke fili ai iá.

• Fokotuʻu ha taumuʻa pau ke ke fakalakalaka ai ʻi he tafaʻaki naʻá ke filí.

Poupouʻi ʻa e kau akó ke muimuiʻi ʻa e taumuʻa kuo nau fokotuʻu maʻanautolú. Fakamoʻoni ki he ʻofa ʻa e Fakamoʻuí kiate kinautolú pea mo e tokoni te Ne lava ʻo ʻomi ʻi heʻenau feinga ke tauhi ʻa e ngaahi fuakava kuo nau fakahoko mo Iá.

Ngaahi Maʻuʻanga Tokoni Kehé

Tokāteline mo e Ngaahi Fuakava 20:37. ʻOku ʻuhinga ki he hā ke maʻu ha loto-mafesifesi mo ha laumālie fakatomalá?

Naʻe fakamatalaʻi ʻe ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

When Thou Art Converted

Plead with God in the name of Christ to write the gospel in your mind that you may have understanding and in your heart that you may love to do His will.

ʻI hoʻo fekumi ki he tāpuaki ʻo e uluí, te ke lava ʻo foaki ki he ʻEikí ʻa e meʻaʻofa ʻo e loto-mafesimafesi pe fakatomalá pea mo ho laumālie fakatomala pe talangofuá. Ko hono moʻoní, ko e meʻaʻofa ia ʻaʻau—ʻo ho tuʻunga lolotongá pea mo e meʻa te ke aʻusiá. (D. Todd Christofferson, “When Thou Art Converted,” Liahona, May 2004, 12)

Naʻe akonaki ʻa ʻEletā Pulusi D. Pota (1952–2016) ʻo e Kau Fitungofulú ʻo pehē:

A Broken Heart and a Contrite Spirit

Those who have a broken heart and a contrite spirit are willing to do anything and everything that God asks of them.

Ko kinautolu ʻoku nau maʻu ʻa e loto mafesifesí mo e laumālie fakatomalá ʻoku nau fiemālie ke fai ha meʻa pē pea mo e meʻa kotoa pē ʻe kole ʻe he ʻOtuá meiate kinautolú, ʻo ʻikai ha fakafepaki pe tāufehiʻa. ʻOku ʻikai ke tau kei fai ʻa e meʻa kotoa pē ʻi heʻetau founga pē ʻatautolú, ka ʻoku tau ako ke fai ia ʻo fakatatau ki he founga ʻa e ʻOtuá. ʻI heʻetau fakavaivaiʻi peheʻi kitautolú, ʻe ʻaonga leva ʻa e Fakaleleí pea hoko ai mo e fakatomala moʻoní. (Bruce D. Porter, “A Broken Heart and a Contrite Spirit,” Liahona, Nov. 2007, 32)

Tokāteline mo e Ngaahi Fuakava 20:75. Ko e hā ʻoku mahuʻinga ai ke “faʻa fakataha … ke [maʻu ʻa e sākalamēnití]”?

Naʻe akonaki ʻa ʻEletā Melevini J. Pālati (1873–1939) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e meʻa ʻe taha ʻe malu ai ʻa e tangata mo e fefine kotoa pē ko ʻene ʻi he tēpile sākalamēnití ʻi he ʻaho Sāpate kotoa pē. He ʻikai ke tau fuʻu mamaʻo fakalaumālie ʻi ha uike ʻe taha—ʻikai mamaʻo ʻaupito, ke aʻu ki he founga ʻo e vakaiʻi fakatāutahá, ʻoku ʻikai lava ke tau fakaleleiʻi ha ngaahi fehalaaki naʻa tau ala fakahoko. … Ko e hala ki he tēpile sākalamēnití ko e hala ia ʻo e malu maʻá e Kau Māʻoniʻoni ʻi he Ngaahi ʻAho Kimui Ní. (Melvin J. Ballard, “The Sacramental Covenant,” ʻi he Bryant S. Hinckley, Sermons and Missionary Services of Melvin Joseph Ballard [1949], 151)

Tokāteline mo e Ngaahi Fuakava 20:77. ʻOku ʻuhinga ki he hā ʻa e loto-fiemālie ke toʻo kiate au ʻa e huafa ʻo Sīsū Kalaisí?

Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Ke toʻo kiate kitautolu ʻa e huafa ʻo Sīsū Kalaisí, [ʻoku ʻi ai] hano ʻuhinga ʻe tolu pe lahi ange. … ʻUluakí, ʻoku tau fakahaaʻi ʻetau loto-fiemālie ke ui kitautolu ko ha tokotaha tui kia Sīsū Kalaisi pea mo ha mēmipa ʻo e Siasí ʻoku ʻai kiate kitautolu Hono huafá mo malangaʻi ʻEne ongoongoleleí ʻi he funga ʻo e māmaní. Uá, ʻoku fakahaaʻi ʻetau loto-fiemālie ke toʻo kiate kitautolu… [ʻa e] ngāue ʻa e Fakamoʻuí ke fakahoko ʻa e moʻui taʻengata ʻo e fānau ʻa e ʻOtuá. … Tolú, ʻoku tau fakamoʻoniʻi ʻetau tukupā ke feinga ke taau mo e hākeakiʻí ʻi he puleʻanga fakasilesitialé. (Dallin H. Oaks, His Holy Name [1998], 66–67)

Tokāteline mo e Ngaahi Fuakava 20:77. Te u muimui fēfē nai ki he fekau ʻa e Fakamoʻuí ke “manatu maʻu ai pē kiate iá”?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Fakakaukau ki he ʻuhinga [ʻo ʻetau lotú mo e ako folofolá]. … Ko e ngaahi tōʻonga māʻoniʻoni ko ʻení ko e ngaahi founga ia ʻe lava ke tau manatuʻi maʻu pē ai ʻa e Tamai Hēvaní mo Hono ʻAlo ʻOfaʻangá, pea ʻoku tomuʻa fiemaʻu ia kae hokohoko hono maʻu ʻa e takaua ʻo e Laumālie Māʻoniʻoní. (David A. Bednar, “Maʻu ʻa e Laumālie Māʻoniʻoní,” Liahona, Nōvema 2010, 96)

Ngaahi ʻEkitivitī Fakalahi ki he Akó

Hiki ha lea

Te ke lava ʻo fakaafeʻi ʻa e kau akó ke fakakaukauloto naʻe kole ange ke nau fai ha lea fekauʻaki mo e papitaisó ʻi he houalotu sākalamēnití pe ki he ouau papitaiso ʻo ha taha ʻoku nau ʻofa ai. Fakaafeʻi kinautolu ke ako ʻa e Tokāteline mo e Ngaahi Fuakava 20:37, 68–79 pea teuteu ha lea miniti ʻe tolu ki he nima. Te ke lava ʻo fakaʻaliʻali ʻa e ngaahi fehuʻi ko ʻení ke tokoni ki hono tataki ʻa e kau akó ʻi heʻenau teuteú:

• Ko e hā ʻoku totonu ke fai ʻe ha taha ke taau ai ke papitaisó?

• Ko e hā ʻa e founga ʻoku totonu ke fakahoko ai ʻa e papitaisó?

• Ko e hā ʻa e finangalo ʻo e ʻEikí ki ha taha hili ʻa e papitaisó?

• ʻOku fekauʻaki fēfē nai ʻa e ouau ʻo e sākalamēnití mo e papitaisó?

• Kuo tokoniʻi fēfē nai hoʻo moʻuí ʻe he ouau ʻo e papitaisó mo e sākalamēnití?

Te ke lava ʻo ʻoange ha faingamālie ki he kau ako ʻe loto-fiemālie ke vahevahe ʻenau leá mo e kalasí pe ʻi ha fanga kiʻi kulupu iiki.

Tokāteline mo e Ngaahi Fuakava 20:37, 77. Ko hono toʻo kiate kitautolu ʻa e huafa ʻo Sīsū Kalaisí

Fakakaukau ke fakaafeʻi ʻa e kau akó ke kumi ha kupuʻi lea ʻoku toutou ʻasi ʻi he Tokāteline mo e Ngaahi Fuakava 20:37 mo e 77. Kole ki he kau akó ke vahevahe ʻenau fakakaukau ki he ʻuhinga ʻo hono toʻo kiate kitautolu ʻa e huafa ʻo Sīsū Kalaisí. Ke tokoni ke fakaloloto ʻa e mahino ʻoku nau maʻu ki he fakakaukau ko ʻení, ʻe lava ke ke fakaʻaliʻali ha meʻa ʻoku ʻi ai hano hingoa, hangē ko e hingoa ʻo ha kautaha ʻiloa pe hingoa ʻo e tokotaha ʻoku ʻaʻana e koloá. Fakaafeʻi ʻa e kau akó ke fakakaukau ki he meʻa ʻoku talamai ʻe he hingoá fekauʻaki mo e meʻa ko iá. ʻOku fekauʻaki fēfē nai ʻeni mo e fakakaukau ʻo hono toʻo kiate kitautolu ʻa e huafa ʻo Sīsū Kalaisí?

ʻE lava foki ke mou vakai mo e kau akó ki he lea ʻa Palesiteni Tāleni H. ʻOakesí ʻi he “Ngaahi Maʻuʻanga Tokoni Kehé.”

Tokāteline mo e Ngaahi Fuakava 20:77, 79. Fakalea ʻo e ongo lotu tāpuakiʻi ʻo e sākalamēnití

ʻI hono ako ʻe he kau akó ʻa e fakalea ʻo e ongo lotu tāpuakiʻi ʻo e sākalamēnití, te ke lava ʻo fakaafeʻi kinautolu ke vahevahe ha ngaahi foʻi lea pe kupuʻi lea pau ʻoku makehe kiate kinautolu. Te ke lava foki ʻo kole ange ke nau vahevahe ʻa e meʻa ʻoku akoʻi ange ʻe he ngaahi lea ʻi he ongo lotu ko ʻení fekauʻaki mo Sīsū Kalaisí.

Fakakaukau ke fakaʻaliʻali ʻa e ngaahi fakaʻuhinga ko ʻeni ʻo ha niʻihi ʻo e ngaahi foʻi lea mahuʻinga mei he ongo lotu tāpuakiʻi ʻo e sākalamēnití:

• Tāpuakiʻi: fakahōifuaʻi pe ʻai ke toputapu

• Fakamāʻoniʻoniʻí: ʻai ke māʻoniʻoni pe fakatapui

• Laumālie: ko e laumālié mo e sinó

• Fakamoʻoni: fakapapauʻi pe fakamoʻoni

• Loto-fiemālie: holi pe fakapapauʻi

• Mau ai pē: ʻi he taimi kotoa pē

• Manatu: nofo ʻi he ʻatamaí pe toe fakakaukau ki ai

• Tauhi: talangofua

Fakakaukau ke fakaafeʻi ʻa e kau akó ke toe lau ʻa e veesi 77 mo e 79, ʻo fetongi ʻa e ngaahi foʻi lea mahuʻinga ʻoku hiki atu ʻi ʻolungá ʻaki honau fakaʻuhingá. Fehuʻi ange pe ko e hā ha toe mahino ʻoku nau maʻu ʻi hono lau ʻa e ongo lotú ʻi he foungá ni.