Lēsoni 37: Tokāteline mo e Ngaahi Fuakava 20–22

Tokāteline mo e Ngaahi Fuakava 21

Ko Hono Tali ʻa e Ngaahi Lea ʻa e Kau Palōfitá ʻi he Kātaki mo e Tui

Naʻe maʻu ʻa e Tokāteline mo e Ngaahi Fuakava 21 ʻi he ʻaho 6 ʻEpeleli 1830, ʻa ia naʻe fokotuʻutuʻu ai ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe fakahinohinoʻi ʻe he Fakamoʻuí ʻa e kāingalotu ʻo Hono Siasí ʻi he fakahā ko ʻení, ke muimui ki he faleʻi ʻa ʻEne palōfitá. ʻE lava ke tokoni ʻa e lēsoni ko ʻení ki he kau akó ke nau muimui ʻi he ngaahi lea ʻa e kau palōfita ʻa e ʻEikí ʻi he faʻa kātaki mo e tui.

Ngaahi ʻEkitivitī Ako ʻOku Ala Fakahokó

Muimui ki he faleʻí

Fakaʻaliʻali ʻa e tūkunga ko ʻení. Te ke lava foki ʻo faʻu ha tūkunga kehe ʻoku felāveʻi mo e ngaahi fiemaʻu mo e tūkunga hoʻo kau akó.

Fakakaukauloto lolotonga hoʻo fanongo ki he konifelenisi lahí, naʻá ke maʻu ʻa e pōpoaki telefoni ko ʻení mei ho kaungāmeʻá: “Naʻá ke fanongo nai ki he meʻa naʻe toki lea ʻaki ʻe he palōfitá? ʻOku ʻikai ke u fakapapauʻi pe ʻoku ou tui ki ai pe ʻikai!”

• ʻOkú ke pehē ko e hā naʻá ke mei ongoʻíkapau naʻá ke maʻu ha pōpoaki peheni?

• Ko e hā ha ngaahi meʻa ʻe niʻihi ʻe mahuʻinga ki ho kaungāmeʻá ke fakakaukau ki ai kimuʻa pea toki fili pe ʻe muimui ki he faleʻi ʻa e palōfitá?

Fakamatalaʻi ange ki he kau akó te nau ako ʻi he ʻahó ni ha niʻihi ʻo e ngaahi akonaki ʻa e ʻEikí fekauʻaki mo ʻEne kau palōfitá. Fakaafeʻi kinautolu ke fakakaukau fakalongolongo ki hono mahuʻinga kiate kinautolu ke muimui ki he faleʻi ʻa e kau palōfitá. Poupouʻi kinautolu ke kumi ha ngaahi moʻoni ʻe lava ʻo tokoni ke fakatupulaki ʻenau loto-vilitakí mo e malava ke muimui ki he kau palōfita ʻa e ʻEikí.

ʻI he kātaki mo e tui kotoa pē

ʻI he ʻaho naʻe fokotuʻutuʻu ai ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻi he 6 ʻo ʻEpeleli 1830, naʻe foaki ʻe he ʻEikí kia Siosefa Sāmita ha fakahā ʻoku maʻu ʻi he Tokāteline mo e Ngaahi Fuakava 21. Naʻe fai ʻe he ʻEikí ha faleʻi mahuʻinga fekauʻaki mo e muimui ki he palōfitá, ko ha konga ʻo e fakahā ko ʻení.

Lau ʻa e Tokāteline mo e Ngaahi Fuakava 21:1–3, ʻo kumi ʻa e ngaahi hingoa naʻe fakaʻaongaʻi ʻe he ʻEikí ki he Palōfita ko Siosefa Sāmitá.

• Makatuʻunga ʻi he ngaahi hingoa ko ʻení, ko e hā ʻe hoko ai ko ha tāpuaki maʻá e kau mēmipa ʻo e Siasi ʻo e ʻEikí naʻe toki fokotuʻutuʻu foʻoú ke maʻu ha palōfita naʻe ui ʻe he ʻOtuá?

Ko e Tokāteline mo e Ngaahi Fuakava 21:4–6 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

Lau ʻa e Tokāteline mo e Ngaahi Fuakava 21:4–5, ʻo kumi ʻa e faleʻi naʻe fai ʻe he ʻEikí ki he Kāingalotú fekauʻaki mo e founga ʻoku totonu ke nau tali ai ʻa e ngaahi lea ʻa e Palōfita ko Siosefa Sāmitá.

ʻE ala ʻaonga ki he kau akó ke mahino kiate kinautolu pe ko hai ʻoku ʻuhinga ki ai ʻa e ngaahi fetongi nauna ʻi he veesi 4–5. Fakakaukau ke hiki ʻa e ngaahi lea mo e ngaahi fakaʻuhinga ko ʻení ʻi he palakipoé: “ke ke” (kāingalotu ʻo e Siasí); “heʻene,” “ne” (Siosefa Sāmita, ko e Palōfitá); “hoku,” “ʻoʻokú” (Sīsū Kalaisi).

• Ko e hā ha ngaahi foʻi lea pe ngaahi kupuʻi lea mei he ongo veesi ko ʻení naʻe makehe kiate koe? Ko e hā hono ʻuhingá?

• Ko e hā naʻá ke ako mei he ongo veesi ko ʻení ʻe lava ʻo tokoni ki ha taha ʻoku momou ke muimui ki he faleʻi ʻa e kau palōfita ʻa e ʻEikí?

Kapau ʻe fiemaʻu, fakamahinoʻi ange ʻa e kupuʻi lea “ʻi he kātaki mo e tui kotoa pē” ʻi he veesi 5. Kimuʻa pea vahevahe ʻa e lea ʻa ʻEletā Niila L. ʻEnitasení, mahalo ʻe tokoni ke fehuʻi ki he kau akó pe ko e hā ʻe fiemaʻu ai ʻi he taimi ʻe niʻihi ʻa e kātakí pe tuí ke tokanga ki he ngaahi lea ʻa e kau palōfita ʻa e ʻEikí.

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga te tau lava ai ʻo fakahaaʻi ʻa e faʻa kātakí mo e tuí ʻi heʻetau feinga ke muimui ki he palōfitá.

ʻOua naʻá ke ofo kapau he ʻikai ʻuluaki fenāpasi kakato hoʻo ngaahi vakai fakatāutahá mo e ngaahi akonaki ʻa e palōfita ʻa e ʻEikí. Ko ha ngaahi faingamālie ʻeni ʻo e ako, mo e loto-fakatōkilalo, ʻi he taimi ʻoku tau lotu aí. ʻOku tau ʻaʻeva atu ʻi he tui, ʻo falala ki he ʻOtuá, mo tui te tau maʻu ha mahino fakalaumālie lahi ange mei heʻetau Tamai Hēvaní. (Neil L. Andersen, “Ko e Palōfita ʻa e ʻOtuá,” Liahona, Mē 2018, 26)

Fakaafeʻi ʻa e kau akó ke fakakaukau ki ha faleʻi mei he kau palōfitá mo e kau ʻaposetoló ʻe ala faingataʻa ke nau muimui ki ai. ʻE lava ke nau fakalaulauloto ki he founga ʻe tokoniʻi ai kinautolu ʻe he fakatupulaki ʻenau kātakí mo e tuí ke muimui ʻi he faleʻi ʻa e palōfitá.

Ngaahi tāpuaki ʻo e muimui ʻi he kau palōfita ʻa e ʻEikí

Lau ʻa e Tokāteline mo e Ngaahi Fuakava 21:6. Feinga ke ʻiloʻi ha tāpuaki ʻe tolu naʻe talaʻofa ʻe he ʻEikí kiate kinautolu ʻoku tali ʻEne folofolá ʻo fakafou ʻi he palōfitá ʻi he kātaki mo e tui.

• Fakatefito ʻi he ngaahi akonaki ʻa e ʻEikí ʻi he veesi 6, te ke fakakakato fēfē nai ʻa e fakamatala ko ʻení? ʻI heʻetau tali ʻa e folofola ʻa e ʻEikí ʻo fakafou ʻi Heʻene kau palōfitá ʻi he kātaki mo e tui …

  ʻE lava ke fakakakato ʻe he kau akó ʻa e fakamatala ʻo hangē ko ʻení: ʻI heʻetau tali ʻa e folofola ʻa e ʻEikí ʻo fakafou ʻi Heʻene kau palōfitá ʻi he kātaki mo e tui, te Ne toʻo atu ʻa e ngaahi mālohi ʻo e fakapoʻulí, te Ne foaki mai ha ngaahi tāpuaki mei he langí, pea ʻe maluʻi kitautolu mei he filí.

• Te ke fakamatalaʻi fakanounou fēfē nai ʻi he lea pē ʻaʻau ʻa e ʻuhinga ʻo e ngaahi talaʻofa ko ʻení?

  ʻE ala ʻaonga ki he kau akó ha mahino kiate kinautolu, ko e ʻuhinga ʻe taha ʻo e ngalulululú ko hono liʻaki pe tukuange ha meʻa mei hono fakamaʻungá pe faʻoʻanga meʻá. Ko e fakaʻuhinga ʻe taha ʻo e vēsí ʻe lava pē ke pehē, ʻoku tukuange mai ʻa e ngaahi tāpuakí mei he langí pea foaki ia kiate kinautolu ʻoku nau tali ʻa e ngaahi lea ʻa e palōfitá.

• Ko e hā ʻoku tokoniʻi ʻe he ngaahi talaʻofa ko ʻení ke mahino kiate koe fekauʻaki mo e ʻEikí?

• ʻE liliu fēfē nai ʻe he ngaahi talaʻofa ko ʻení ʻetau holi ke muimui ki he kau palōfita ʻa e ʻEikí?

Ko e muimui ʻi he kau palōfita ʻa e ʻEikí ʻi he ʻaho ní

ʻE lava ke tokoni ʻa e ʻekitivitī ko ʻení ki he kau akó ke kumi ha faleʻi fakaepalōfita ʻi he kuongá ni te nau lava ʻo feinga ke muimui ki ai ʻi heʻenau moʻuí. Fakaʻaliʻali ʻa e ngaahi fakahinohino ko ʻení pea ʻoange ha taimi feʻunga ki he kau akó ke fakakakato ʻa e ʻekitivitií.

Kumi ha fakaafe ʻoku ʻomi ʻe he kau palōfita mo e kau ʻaposetolo ʻi onopōní ʻokú ke fie feinga ke fakaʻaongaʻi ʻi hoʻo moʻuí. Fakaʻaongaʻi ʻa e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022) pe ko ha lea ʻi he konifelenisi lahi fakamuimuitahá ke maʻu ha faleʻi pe ngaahi fakaafe mahuʻinga.

Hili hono akó, tali ʻa e ngaahi fehuʻi ko ʻení ʻi hoʻo tohinoa akó:

• Ko e hā ʻa e fakaafe pe faleʻi naʻá ke maʻú?

• Te ke fiemaʻu fēfē nai ʻa e kātakí mo e tuí ke talangofua ki he fakaafe fakaepalōfita ko ʻení?

• Ko e hā ha ngaahi tāpuaki mei he ʻOtuá naʻá ke fakatokangaʻi te ke lava ʻo maʻu ʻi hoʻo muimui ki he faleʻi ko ʻení?

• Ko e hā ha ngaahi ngāue pau te ke fai ke muimui ai ki he faleʻi ko ʻení ʻi hoʻo moʻuí?

ʻI he ʻosi e ako ʻa e kau akó, ʻoange ha faingamālie ke vahevahe ʻa e ngaahi tali naʻa nau hiki ʻi heʻenau tohinoa akó. Te ke lava ʻo fakaafeʻi ha niʻihi ʻo e kau akó ko ha konga ʻo e fealēleaʻaki ko ʻení, ke vahevahe ʻa e founga kuo tāpuekina ai kinautolu pe niʻihi kehé ʻi heʻenau talangofua ki he faleʻi ʻa e kau palōfitá ʻa ia ʻoku aleaʻí. Te ke lava foki ʻo vahevahe ha sīpinga mei hoʻo moʻuí.

Poupouʻi ʻa e kau akó ke ngāueʻi ʻa e taumuʻa kuo nau fokotuʻu maʻanautolú pea tokanga ki he founga ʻoku liliu ai ʻe he muimui ki he ngaahi akonaki ʻa e kau palōfitá honau vā fetuʻutaki mo Sīsū Kalaisí. Fakamatalaʻi ange te nau maʻu ha faingamālie ʻi ha lēsoni ʻi he kahaʻú, ke vakaiʻi ʻa e fakalakalaka kuo nau fakahoko ʻi heʻenau taumuʻá.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e fakamoʻoni fakafolofola ki he fakataukei fakatokāteliné mo e kupuʻi lea mahuʻinga ʻo e potufolofolá lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea mahuʻinga ʻi he potufolofolá Tokāteline mo e Ngaahi Fuakava 21:4–6 ko e: “Ke mou tali ʻa e ‘lea ʻa e palōfitá, ʻo hangē ko e lea ia mei hoku ngutu ʻoʻokú.’” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Ko e hā ha ngaahi tāpuaki ʻe niʻihi ʻo e muimui ki he palōfitá?

Naʻe akoʻi ʻe Palesiteni Hāloti B. Lī (1899–1973):

Ko e maluʻi pē ʻoku tau maʻu ko e kāingalotu ʻo e siasí ni ko ʻetau fai pau ki he meʻa naʻe folofola ʻaki ʻe he ʻEikí ki he Siasí ʻi he ʻaho ko ia naʻe fokotuʻutuʻu ai ʻa e Siasí. Kuo pau ke tau ako ke tau tokanga ki he ngaahi folofola pea mo e ngaahi fekau ʻe tuku mai ʻe he ʻEikí ʻo fakafou mai ʻi Heʻene palōfitá, “ʻo ka ne ka maʻu ia, pea ʻaʻeva ʻi he māʻoniʻoni kakato ʻi hoku ʻaó; … ʻo hangē ko e lea ia mei hoku ngutu ʻoʻokú, ʻi he kātaki mo e tui kotoa pē” (T&F 21:4–5). ʻE ʻi ai ʻa e ngaahi meʻa ia ʻe niʻihi ʻe fiemaʻu ki ai ʻa e kātakí mo e tuí. Mahalo he ʻikai te ke saiʻia koe ʻi he meʻa ʻoku ʻomai mei he maʻu mafai ʻo e Siasí. Mahalo ʻe fepaki ia mo hoʻomou ngaahi fakakaukau fakapolitikalé. Mahalo ʻe fepaki ia mo hoʻomou ngaahi fakakaukau fakasōsialé. Mahalo ʻe ʻikai ke lelei ia ki ha niʻihi ʻo e ngaahi meʻa ʻi hoʻomou moʻui fakasōsialé. Ka ʻo kapau te mou fakafanongo ki he ngaahi meʻa ko ʻení ʻi he faʻa kātaki mo e tui ʻo hangē pē ko ha lea ia mei he fofonga ʻo e ʻEikí, ʻoku ʻi ai ʻa e talaʻofa “ʻe ʻikai ke ikuna ʻa kimoutolu ʻe he ngaahi matapā ʻo helí; ʻio, pea ʻe fakamovetevetea atu ʻe he ʻEiki ko e ʻOtuá ʻa e ngaahi mālohi ʻo e fakapoʻulí ki muʻa ʻiate kimoutolu, pea pule ke ngalulululu ʻa e ngaahi langí koeʻuhi ko hoʻomou leleí, pea mo e lāngilangi ʻo hono huafá” (T&F 21:6). (Ngaahi Akonaki ʻa e Kau Palesiteni ʻo e Siasí: Hāloti B. Lī [2000], 100)

Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku fakafiefia ange ʻetau moʻuí mo siʻi ʻa e palopalemá ʻi heʻetau muimui [ki he kau palōfita ʻa e ʻEikí], ʻoku faingofua ange ke fuesia hotau ngaahi faingataʻaʻiá mo e palopalemá, pea ʻoku tau fokotuʻu ha teunga tau fakalaumālie ke ne maluʻi kitautolu mei he ngaahi ʻohofi ʻa e filí ʻi hotau kuongá. (Ulisses Soares, “ʻOku Lea ʻa e Kau Palōfitá ʻi he Mālohi ʻo e Laumālie Māʻoniʻoní,” Liahona, Mē 2018, 99)

ʻOku maʻu fēfē nai ʻe he kau palōfitá ʻa e folofola ʻa e ʻOtuá?

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko hono aofangatukú, kātaki ka mou fiemālie ʻi he ʻilo ʻoku maʻu ha tokoni fakalangi ʻe he kau taki māʻolunga ʻo e Siasí ʻoku nau tokangaʻi ʻa e ngaahi taumuʻa fakalangi ʻo e Siasí. ʻOku maʻu ʻa e fakahinohino ko ʻení mei he Laumālié pea faʻa maʻu fakahangatonu ʻi he taimi ʻe niʻihi mei he Fakamoʻuí. ʻOku foaki mai ʻa e ongo fakahinohino fakalaumālié ni fakatouʻosi. ʻOku ou houngaʻia ʻi heʻeku maʻu ha tokoni pehē. Ka ʻoku foaki mai ʻa e fakahinohinó ʻo fakatatau mo e taimi ʻa e ʻEikí, ʻi he ʻotu lea ki he ʻotu lea mo e akonaki ki he akonaki, ʻi he taimi ʻoku “fili ai ha ʻEiki tokaimaʻananga ke akonakiʻi kitautolu.” Ko ʻEne palōfitá pē taha ʻokú ne maʻu ʻa e fakahinohino maʻá e Siasí fakakātoa. (Quentin L. Cook, “Teuteu ke Feʻiloaki mo e ʻOtuá,” Liahona, Mē 2018, 117)

Ko e hā ʻoku ʻikai faʻa manakoa ai ʻa e ngaahi akonaki mei he kau palōfitá?

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku finangalo ʻetau Tamai Hēvaní ke fili ʻEne fānaú ʻi he ʻiloʻilo pau mo e loto-fiemālie ke hoko ʻo hangē ko Iá pea feʻunga mo e faʻahinga moʻui ʻokú Ne fiefia aí. ʻI hono fai iá, ʻoku fakakakato ai ʻe Heʻene fānaú honau ikuʻanga fakalangí pea hoko ko e kau ʻea-hoko ki he meʻa kotoa ʻokú Ne maʻú. ʻI he ʻuhingá ni, ʻoku ʻikai lava ai ʻa e kau taki ʻo e Siasí ʻo liliu ʻa e ngaahi fekaú pe tokāteline ʻa e ʻOtuá ʻoku fepaki mo Hono finangaló, ke fakafaingamālieʻi pe manakoa. (Dale G. Renlund, “Ko Hotau Tauhisipi Leleí,” Liahona, Mē 2017, 30–31)

Ngaahi ʻEkitivitī Fakalahi ki he Akó

Tangata kikite, liliu lea, palōfita, ʻaposetolo, kaumātuʻa

Fakakaukau ke kumi ʻe he kau akó ʻa e ngaahi hingoa naʻe fakaʻaongaʻi ʻe he Fakamoʻuí ke fakamatalaʻi ʻaki ʻa Siosefa Sāmitá ʻi he Tokāteline mo e Ngaahi Fuakava 21:1. ʻE lava ke fakaʻuhingaʻi ʻa e ngaahi hingoa takitaha ko ʻení ʻaki hono fakaʻaongaʻi ʻa e Fakahinohino ki he Ngaahi Folofolá ʻi he Gospel Library app. (kumi ʻa e “liliu lea” ke ako fekauʻaki mo e “tokotaha liliu leá”)

• ʻOku tokoni fēfē nai ʻa e ngaahi hingoa ko ʻeni naʻe foaki kia Siosefa Sāmitá ke mahino kiate koe hono fatongia mahuʻinga ʻi hono Fakafoki Mai ʻo e ongoongoleleí ko e Palōfita ʻa e ʻEikí?

Ko e ngaahi tāpuaki ʻo e muimui ki he palōfitá

Ke tokoni ke mahino ki he kau akó ʻa e founga ʻe tokoniʻi ai kinautolu ʻe he muimui ki he ngaahi lea ʻa e palōfitá ke moʻui ʻi he māmaní, fakakaukau ke huluʻi ʻa e vitiō “Follow the Prophet” (4:16). ʻI he sio ʻa e kau akó, fakaafeʻi kinautolu ke fakalaulauloto ki he founga ʻe tāpuekina ai ʻenau moʻuí ʻi heʻenau muimui ki he faleʻi ʻa e ʻEikí.

Pōpoaki telefoní

Ke tokoni ke akoako ʻe he kau akó hono fakamatalaʻi ʻa e meʻa ne nau ako ʻi he Tokāteline mo e Ngaahi Fuakava 21, fakakaukau ke vakai ki he tūkungá mei he kamataʻanga ʻo e lēsoní.

ʻOange ha taimi ki he kau akó ke fakaʻaongaʻi ʻa e meʻa ne nau akó ke faʻu ha tali te nau lava ʻo ʻave ko ha pōpoaki telefoni ki honau kaungāmeʻá. Fakaafeʻi ha kau ako ʻe loto-fiemālie ke vahevahe ʻenau ngaahi talí.

ʻOku mahuʻinga ʻa e kau palōfitá ki he Siasi ʻo e Fakamoʻuí

Fakamanatu ki he kau akó naʻe fakahā ʻa e ngaahi akonaki ʻa e ʻEikí mei he Tokāteline mo e Ngaahi Fuakava 21 ʻi he ʻaho naʻe fokotuʻu ai ʻa e Siasí. Ke tokoni ki he kau akó ke fakatokangaʻi lahi ange ʻa e mahuʻinga ʻo e kau palōfita mo e kau ʻaposetolo ʻi he Siasi ʻo e Fakamoʻuí, fakakaukau ke fakaafeʻi kinautolu ke ako ʻa e ʻEfesō 2:19–20; 4:11–14.

ʻE lava ke fakafekauʻaki pe fakafehokotaki ʻe he kau akó ʻa e ngaahi veesi ko ʻení ki he Tokāteline mo e Ngaahi Fuakava 21:4–6. Fakaafeʻi ʻa e kau akó ke aleaʻi ʻa e ʻuhinga ʻoku nau ongoʻi ai ʻoku mahuʻinga ke ʻi ai ha kau palōfita ʻi he Siasi ʻo e Fakamoʻuí.