“Tokāteline mo e Ngaahi Fuakava 23–24: ‘ʻOku ou Lea Kiate Koe,’” Tokāteline mo e Ngaahi Fuakavá – Tohi Lēsoni ʻa e Faiako Seminelí, (2025)
“Tokāteline mo e Ngaahi Fuakava 23–24,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 38: Tokāteline mo e Ngaahi Fuakava 23–26
Tokāteline mo e Ngaahi Fuakava 23–24
“ʻOku ou Lea Kiate Koe”
Hili hono fokotuʻutuʻu ʻo e Siasí ʻi ʻEpeleli 1830, naʻe fehangahangai leva ʻa e Kāingalotú mo ha fakatanga lahi. Neongo ʻa e ngaahi faingataʻa ko ʻení, ka naʻe kei hokohoko atu pē hono fakamālohia ʻe he Fakamoʻuí ʻa e Siasí mo fai ha faleʻi fakataautaha kiate kinautolu naʻe holi fakamātoato ke ʻilo Hono finangaló. ʻE lava ke tokoni ʻa e lēsoni ko ʻení ke ongoʻi ʻe he kau akó ʻoku ʻafioʻi kinautolu ʻe he Tamai Hēvaní mo Sīsū Kalaisi pea te Na ʻomi ha fakahinohino ki heʻenau moʻui fakatāutahá.
Ngaahi ʻEkitivitī Ako ʻOku Ala Fakahokó
Ko e Kole ha fakahinohino
Fakakaukau ke hiki ʻa e ngaahi fehuʻi ko ʻení ʻi he palakipoé pea fakaafeʻi ʻa e kau akó ke fakakaukau fakalongolongo ki heʻenau ngaahi talí. Hili ha taimi feʻunga, poupouʻi ʻa e kau akó ke fakakaukau ki ha faleʻi mahuʻinga kuo nau maʻu mei he tokotaha ko ʻení pea fakaafeʻi ha niʻihi ʻo e kau akó ke nau vahevahe.
-
Ko hai ʻokú ne ʻiloʻi lelei taha koé?
-
Ko e hā ʻoku nau ʻilo fekauʻaki mo koé?
-
Ko e hā ʻoku ʻikai ke nau ʻilo fekauʻaki mo koé?
Neongo ʻe maʻu ʻe he kau akó ha faleʻi mahuʻinga mei ha ngaahi maʻuʻanga tokoni falalaʻanga lahi, kae fakaafeʻi kinautolu ke fakalaulauloto ki he ʻuhinga ʻoku hoko ai ʻa e Tamai Hēvaní mo Sīsū Kalaisi ko e maʻuʻanga faleʻi lelei tahá. Kole ki he kau akó ke fakakaukau ki heʻenau feinga lolotonga ke kumi faleʻi mei he Tamai Hēvaní mo Sīsū Kalaisí. ʻOku nau ongoʻi nai ʻoku feʻunga ʻenau ngaahi feingá, pe ʻoku nau ongoʻi nai ʻoku fiemaʻu ke fakahoko ha ngaahi liliu? Fakaafeʻi ʻa e kau akó ke fakakaukau ʻi he faʻa lotu ki he ngaahi fehuʻi ko ʻení lolotonga ʻa e lēsoní.
ʻOku ʻafioʻi koe ʻe he ʻEikí
Naʻe fekumi ʻa Siosefa Sāmita mo ha niʻihi kehe ki he fakahinohino ʻa e Tamai Hēvaní mo Sīsū Kalaisi fekauʻaki mo honau ngaahi fatongia ʻi he Siasi foʻou naʻe fakafoki maí. ʻOku ʻi he Tokāteline mo e Ngaahi Fuakava 23–24 ʻa e tali ʻa e Fakamoʻuí ki heʻenau holi fakamātoato ke maʻu ha fakahinohino fakalangí.
Fakakaukau ke hiki ʻa e foʻi moʻoni ko ʻení ʻi he palakipoé: ʻOku ʻafioʻi kitautolu takitaha ʻe he Tamai Hēvaní mo Sīsū Kalaisi pea te Na ʻomi ha faleʻi ʻo fakatatau ki he ngaahi holi hotau lotó mo e tūkungá.
ʻI hono aleaʻi ʻe he kau akó ʻa e tefitoʻi moʻoni ko ʻení, te ke lava ʻo fakamahinoʻi ange te tau lava ʻo maʻu ha faleʻi mei he ʻOtuá ʻo fakafou ʻi he lotú, ngaahi folofolá, ngaahi lea ʻa e kau palōfitá, mātuʻá, kau taki kakai lalahi falalaʻangá, mo e alā meʻa peheé.
Lau ʻa e Tokāteline mo e Ngaahi Fuakava 23:1–6, ʻo kumi ha fakamoʻoni ki he foʻi moʻoni ko ʻení.
-
Ko e hā ʻa e fakamoʻoni naʻá ke maʻú?
-
ʻOku liliu fēfē nai ʻe he fakamoʻoni ko ʻení ʻa e mahino ʻokú ke maʻu kau ki he Tamai Hēvaní mo Sīsū Kalaisí?
Naʻe akoʻi ʻe Sisitā Kilisitina B. Falangikō, naʻe hoko ko e Tokoni Ua ʻi he Kau Palesitenisī Lahi ʻo e Palaimelí ʻo pehē:
ʻOku toe ʻafioʻi foki koe ʻe he Tamai Hēvaní. ʻOkú Ne ʻafioʻi ʻa e feituʻu ʻokú ke ʻi aí pea ko hai koe mo e meʻa ʻokú ke fiemaʻú. ʻOkú Ne fanongo mo tali hoʻo ngaahi lotú. Tatau ai pē pe ko e hā hoʻo ongoʻi taʻelatá, ʻokú Ne ʻi ai maʻu pē. ʻOku ʻikai te ke teitei tuenoa. ʻE lava ke ke tafoki maʻu ai pē kiate Ia. (Cristina B. Franco, “ʻOku ʻAfioʻi Koe ʻe he Tamai Hēvaní,” Liahona, Sune 2018, 75)
-
Ko e hā ha ngaahi founga ʻoku ʻomi ai ʻe he ʻOtuá ha faleʻi ʻo fakatatau ki heʻetau ngaahi holí mo e tūkungá?
Te nau lava ʻo tataki ʻeku moʻuí
ʻE lava ke tokoni ʻa e laʻipepa tufa ko ʻení ke mahino ki he kau akó ʻa e founga ʻe lava ke ʻoange ai ʻe he Tamai Hēvaní mo Sīsū Kalaisi ha fakahinohino ʻo fakatatau ki honau ngaahi tūkunga fakatāutahá. Fakakaukau ke vahevahe ʻa e kau akó ke nau tauhoa pe ki ha fanga kiʻi kulupu iiki pea ʻoange kiate kinautolu takitaha ha tatau ʻo e laʻipepa tufá. Tuku ke fili ʻe he kau akó pe ko hai te nau ako ki aí. Hili ha taimi feʻunga, fakaafeʻi kinautolu ke vahevahe ʻa e meʻa ne nau akó mo e kalasí.
Te ke lava foki ʻo fakakaukau ke vahe ki he kulupu takitaha ha toko taha pe toko ua ke nau ako ki ai.
Tokāteline mo e Ngaahi Fuakava 23–24: Faleʻi mei he ʻEikí
Tokāteline mo e Ngaahi Fuakavá – Tohi Lēsoni ʻa e Faiako Seminelí—Tokāteline mo e Ngaahi Fuakava 23-24
Fili ha toko ua ʻo e kakai ko ʻení ke ke laukonga ai. Kumi ha ngaahi kupuʻi lea ʻi he ʻū vēsí ʻoku fekauʻaki mo e fakamatala fakahisitōliá. ʻE ala tokoni ʻeni ke ke vakai ai ki ha fakamoʻoni naʻe ʻafioʻi ʻe he Tamai Hēvaní mo Sīsū Kalaisi ʻa e tokotaha kotoa pē mo fakahoko ha faleʻi ki heʻenau moʻui fakatāutahá.
ʻŌliva Kautele
Naʻe hoko ʻa ʻŌliva ko ha faiako. Naʻá ne hoko ko ha tangata tohi maʻa Siosefa Sāmita ko e Siʻí ʻi hono liliu ʻa e Tohi ʻa Molomoná. Ko e taha ia ʻo e Kau Fakamoʻoni ʻe Toko Tolu ʻo e Tohi ʻa Molomoná pea ko e kaumātuʻa hono ua ia ʻo e Siasi kuo fakafoki maí. Naʻá ne vahevahe ʻa e ongoongoleleí mo e fāmili Uitemaá mo hono ngaahi kaungāmeʻa kehe ʻi Feieti, Niu ʻIoké. Naʻe ʻi ai ha ngaahi taimi naʻe fakahaaʻi ai ʻene hīkisiá, ʻo kau ai haʻane tohi kia Siosefa Sāmita ko e Siʻí, fekauʻaki mo ha konga ʻo ha fakahā ʻa ia naʻe ʻikai ke ne fiemālie ki ai. Naʻe tupu mei heʻene hīkisiá ʻene mavahe mei he Siasí ʻi ha vahaʻataimi ʻi he vahaʻa ʻo e 1838 mo e 1847.
Hailame Sāmita
Ko Hailamé ko ha taʻokete ia ʻo e Palōfita ko Siosefa Sāmitá. Naʻá ne tokoni ki hono pulusi ʻo e Tohi ʻa Molomoná ʻaki ʻene fengāueʻaki hangatonu mo e tokotaha faipākí. Naʻá ne maʻu ha loto-holi lahi ke malanga ʻaki ʻa e ongoongolelei kuo fakafoki maí, ka naʻe kole ange ke ne tatali mo teuteu ʻaki ʻene ako ʻa e folofola ʻa e ʻOtuá (vakai, Tokāteline mo e Ngaahi Fuakava 11:21–22). Naʻá ne hoko ko e palesiteni ʻo e fuofua kolo ʻo e Siasí ʻi Kolesivili, ʻi Niu ʻIoké. Naʻe fakahoko ʻe Hailame hono fatongia ki he Siasí pea naʻá ne faivelenga ki he ʻEikí ʻi he kotoa ʻo ʻene moʻuí.
Siosefa Naiti ko e Lahí
Ko Siosefa Naiti ko e Lahí ko ha kaungāmeʻa ofi ia ʻo Siosefa Sāmita ko e Siʻí pea naʻá ne fakahā kiate ia (Siosefa) ha angaʻofa lahi. Naʻá ne foaki ki he Palōfitá ʻa e ngaahi naunau lolotonga ʻene ngāue ki hono liliu ʻo e Tohi ʻa Molomoná. Naʻá ne ongoʻi ha loto-holi ke papitaiso fakataha mo e niʻihi kehé ʻi he ʻaho naʻe fokotuʻutuʻu ai ʻa e Siasí, ka naʻá ne toe tatali he naʻá ne fie ako lahi ange ʻa e Tohi ʻa Molomoná. Hili pē hono maʻu ʻe Siosefa Naiti ko e Lahí ʻa e faleʻi ʻa e ʻEikí ʻi he Tokāteline mo e Ngaahi Fuakava 23, naʻá ne fili ke papitaiso. Naʻá ne hoko ko ha mēmipa faivelenga ʻo e Siasí ʻi he kotoa ʻo ʻene moʻuí.
Siosefa Sāmita ko e Siʻí
Naʻe hoko ʻa Siosefa Sāmita ko e Siʻí ko e Palōfita ʻa e ʻEikí. ʻI ʻEpeleli ʻo e 1830, naʻe fokotuʻutuʻu ai ʻe Siosefa ʻa e Siasi kuo fakafoki maí. ʻI he taimi pē ko iá, naʻe fehangahangai ʻa e Siasi foʻoú mo e fakatangá. Naʻe puke pōpula ʻa Siosefa ʻi ha ngaahi tukuakiʻi loi pea tukuange. Naʻá ne maʻu ʻa e fatongia ke tokonaki maʻa hono fāmilí mo tataki ʻa e Siasí ʻi he taimi tatau. “Neongo ʻene femoʻuekina ʻi he siasi foʻoú, ka naʻe pau ke ne tō leva ʻene ngoué kapau naʻá ne fiemaʻu ha ututaʻu lelei ʻi he faʻahitaʻu fakatōlaú. Naʻe ʻosi tōmui ʻene totongi ʻa e fāmá ki he tamai ʻa ʻEmá, pea kapau he ʻikai ola lelei ʻene ngoué, kuo pau ke ne kumi ha founga kehe ke totongi ʻaki hono moʻuá” (Kau Māʻoniʻoní, 1:90).
© 2023 by Intellectual Reserve, Inc. All rights reserved.
Hili hono fakakakato ʻe he kau akó ʻenau akó, fakaafeʻi kinautolu ke vahevahe ʻa e fakamoʻoni naʻa nau maʻu naʻe ʻafioʻi ʻe he ʻEikí ʻa e niʻihi fakafoʻituitui ko ʻení.
Te ke lava ʻo huluʻi ʻa e foʻi vitiō “Heavenly Father Knows Me” (3:18) ke tokoni ki he kau akó ke nau teuteu ke fakakaukau mo vahevahe ʻenau ngaahi aʻusiá.
Heavenly Father Knows Me
After a trial of her faith, a young woman receives a witness that Heavenly Father truly does answer prayers.
ʻE lava ke tokoni ʻa e ngaahi fehuʻi ko ʻení ki he kau akó ke fakaloloto ʻa e mahino ʻoku nau maʻú mo e ngaahi ongo fekauʻaki mo hono ʻafioʻi kinautolu ʻe he ʻEikí. Fakakaukau ke ʻoange ha taimi ki he kau akó ke hiki ʻenau ngaahi talí ʻi heʻenau tohinoa akó. Mahalo ʻe ongoʻi ʻe ha kau ako ʻe niʻihi ʻoku ʻikai ʻafioʻi kinautolu ʻe he ʻEikí. Fakapapauʻi ki he tokotaha ako takitaha ʻokú Ne ʻafioʻi ia, pea poupouʻi kinautolu ke hokohoko atu ʻenau fekumi ki he tokoni mo e fakahinohino ʻa e ʻEikí.
-
Ko e hā ha fakamoʻoni kuó ke mamata ai ʻoku ʻafioʻi koe ʻe he Tamai Hēvaní mo Sīsū Kalaisi?
-
Kuo takiekina fēfē nai ʻe he fakamoʻoni ko ʻení ho vā fetuʻutaki mo Kinauá?
-
ʻOkú ke pehē ko e hā ha faleʻi ʻe ʻoatu ʻe he Tamai Hēvaní mo Sīsū Kalaisi ʻi ho ngaahi tūkunga lolotongá?
Fakaafeʻi ʻa e kau ako ʻe loto-fiemālié ke vahevahe ha ngaahi aʻusia kuo nau maʻu pe ko ha niʻihi kehe ʻoku nau ʻilo, ʻa ia naʻe tokoni ke nau ʻiloʻi ʻoku ʻafioʻi kinautolu ʻe he Tamai Hēvaní mo Sīsū Kalaisi. Fakamanatu ki he kau akó ke ʻoua te nau vahevahe ha meʻa ʻoku fuʻu fakataautaha pe toputapu.
Fakakaukau ke fai ha fakamoʻoni fakataautaha pe vahevahe ha aʻusia ʻokú ne fakahaaʻi ʻa e founga ʻoku ʻafioʻi ai kitautolu takitaha ʻe he Tamai Hēvaní mo Sīsū Kalaisi pea te Na ʻomi ha faleʻi ʻo fakatatau mo e ngaahi holi hotau lotó mo e tūkungá.