“Tokāteline mo e Ngaahi Fuakava 25, Konga 1: ‘ʻEma Sāmita, Ko Hoku ʻOfefine,’” Tokāteline mo e Ngaahi Fuakavá – Tohi Lēsoni ʻa e Faiako Seminelí, (2025)
“Tokāteline mo e Ngaahi Fuakava 25, Konga 1,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 39: Tokāteline mo e Ngaahi Fuakava 23–26
Tokāteline mo e Ngaahi Fuakava 25, Konga 1
“ʻEma Sāmita, Ko Hoku ʻOfefine”
ʻI he Tokāteline mo e Ngaahi Fuakava 25, naʻe faleʻi ʻe he Fakamoʻuí ʻa ʻEma Sāmita ʻi he founga ke fakahoko ai hono misiona fakalangí ke hoko ʻo hangē ko Iá. ʻE lava ke tokoni ʻa e lēsoni ko ʻení ke mahino ki he kau akó ʻa e ngaahi founga te nau lava ai ʻo hangē ko e Fakamoʻuí.
Ngaahi ʻEkitivitī Ako ʻOku Ala Fakahokó
“Ko e fefine koe kuo fili, ʻa ia kuó u uí”
Te ke lava ʻo fakaʻaliʻali ha tā ʻo ʻEma Sāmita pea ʻeke ki he kau akó pe ko e hā ʻoku nau ʻilo fekauʻaki mo iá.
Fakakaukau ke vahevahe ha niʻihi ʻo e ngaahi taimi ko ʻení mei he moʻui ʻa ʻEma Sāmitá. Fakaafeʻi ʻa e kau akó ke aleaʻi pe naʻe fēfē nai ʻa e aʻusia ko ʻení kia ʻEmá.
Fakakaukauloto angé pe naʻá ke mei ongoʻi fēfē nai ʻi haʻo aʻusia ʻa e ngaahi meʻa ko ʻeni naʻe hoko ʻi he moʻui ʻa ʻEma Sāmitá. (ʻE lava ke maʻu ʻa e ngaahi fakamatala ko ʻení ʻi he Kau Māʻoniʻoní, vōliume 1, Ko e Fuka ʻo e Moʻoní, 1815–1846 [2018], 39–40, 49, 55, 102–104.)
-
Naʻe tatali ʻa ʻEma ʻi he salioté ʻi he veʻe Moʻunga ko Komolá lolotonga hono maʻu ʻe Siosefa ha fakahinohino fakaʻosi pea mo e ʻū lauʻi peleti koulá meia Molonaí.
-
Naʻe hoko ʻa ʻEma ko e fuofua fefine tohi ʻa Siosefa ki hono liliu ʻo e Tohi ʻa Molomoná, pea naʻe mole kimui ange ʻa e ʻū lauʻi peesi ko ia naʻe ʻosi liliú.
-
Naʻe moʻui ʻa e fuofua pēpē ʻa ʻEma mo Siosefá ʻi ha ngaahi houa siʻi pē, pea naʻe puke lahi ʻa ʻEma ʻo meimei mate ai.
-
Naʻe fou ʻa ʻEma ʻi he vai ʻo e papitaisó lolotonga ia ʻa e ngaahi fakamanamana fakamamahi ʻa e kau fakatangá. ʻI he efiafi ko iá, naʻe puke pōpula ai ʻa Siosefa ʻi ha ngaahi tukuakiʻi loi, ʻo fakatoloi ai ʻa e hilifakinima ʻo ʻEmá.
Ke tokoni ke mahino ki he kau akó ʻa e puipuituʻa fakahisitōlia ʻo e Tokāteline mo e Ngaahi Fuakava 25, fakakaukau ke vahevahe ʻa e palakalafi ko ʻení.
Naʻe fakahā ʻe he Fakamoʻuí ʻi he Tokāteline mo e Ngaahi Fuakava 24, naʻe fiemaʻu ʻa Siosefa Sāmita ke “fai [ʻene] ngāue kotoa pē ki Saioné” (veesi 7). Naʻe fakatupu ʻe he fakahā ko ʻení ha ongoʻi taʻepauʻia ʻi he moʻui ʻa ʻEma Sāmitá koeʻuhí he naʻe mahino ai he ʻikai maʻu ʻe Siosefa ha taimi feʻunga ke ngāue mo tokonaki fakatuʻasino maʻa hona fāmilí (vakai, Kau Māʻoniʻoní, 1:104). Naʻe fakahā ʻe he ʻEikí ʻa e Tokāteline mo e Ngaahi Fuakava 25 ʻi Heʻene ʻafioʻi ʻa e loto ʻa ʻEma ke maʻu ha fakahinohinó. ʻE lava ke fakaʻaongaʻi ʻa e faleʻi ko ʻeni mei he Fakamoʻuí ki he kakai kotoa pē (vakai, Tokāteline mo e Ngaahi Fuakava 25:16).
Ako ʻiate koe pē ʻa e tokāteline ʻo Sīsū Kalaisí: Ki ha ako lahi ange ʻi he founga ke poupouʻi ai ʻa e kau akó ke fakahoko ʻení, vakai ki he ako ʻoku ui ko e “Ako ʻiate koe pē ʻa e tokāteline ʻo Sīsū Kalaisí (2022)” ʻoku maʻu ʻi he ako Fakatupulaki Ngaahi Taukei ʻa e Faiakó. ʻE tokoniʻi koe ʻe he ako ko ʻení ke ke ʻahiʻahi faʻu ha ngaahi fehuʻi fekumi ʻoku ʻikai hano tali pau ke tokoni ke ʻiloʻi ʻe he kau akó ʻa e moʻoní ʻiate kinautolu pē.
Lau ʻa e Tokāteline mo e Ngaahi Fuakava 25:1–3 ʻo kumi ʻa e ongo naʻe maʻu ʻe he Fakamoʻuí kia ʻEmá.
-
Ko e hā naʻe ako ʻe ʻEma fekauʻaki mo hono vā fetuʻutaki mo e ʻEikí?
-
Ko e hā ʻoku folofola ʻaki ʻe he Fakamoʻuí ʻoku fiemaʻu ke hoko ko ha foha pe ʻofefine ʻi Hono puleʻangá?
Tokoni ke ʻiloʻi ʻe he kau akó ʻa e moʻoní: ʻI heʻetau maʻu ʻa e ongoongolelei ʻa e Fakamoʻuí, ʻoku tau hoko ai ko e ngaahi foha mo e ngaahi ʻofefine ʻi Hono puleʻangá pea ʻoku ui kitautolu ki Heʻene ngāué. ʻI heʻetau fakahoko ha ngaahi fuakavá, ʻoku tau hoko ai ko e ngaahi foha mo e ngaahi ʻofefine ʻo e Fakamoʻuí ʻi Hono puleʻangá. Kapau ʻe ʻaonga ki he kau akó haʻanau vakai ki he moʻoni ko ʻení, te mou lava ʻo lau ʻa e Mōsaia 5:7.
Ke tokoni ke mahino lelei ange ki he kau akó ʻa e tefitoʻi moʻoni ko ʻení, fakakaukau ke fili mei he ngaahi fehuʻi ko ʻení.
-
ʻOkú ke pehē naʻe ongo fēfē nai kia ʻEma ʻene maʻu ʻa e faleʻi ko ʻení?
-
Kuo tokoniʻi fēfē nai koe ʻi hono maʻu e ongoongolelei ʻa e Fakamoʻuí ke ke ongoʻi ofi ange ai kiate Ia ko Hono ʻofefine pe fohá?
Lau ʻa e Tokāteline mo e Ngaahi Fuakava 25:4–9 pea kumi ʻa e meʻa naʻe ui ʻe he ʻEikí ʻa ʻEma ke ne faí.
Fakakaukau ke fakaafeʻi ʻa e kau akó ke hiki ha lisi ʻi he palakipoé ʻo e meʻa naʻe ui ʻe he Fakamoʻuí ʻa ʻEma ke ne faí. Tokoni ke mahino ki he kau akó ʻoku ʻuhinga ʻa e “fakanofó” ʻi he veesi 7, ke vaheʻi ko ha uiuiʻi. Te ke lava foki ʻo fakamahinoʻi ange ʻoku ʻuhinga ʻa e “fakamatalaʻí” ke fakamahinoʻi pe fakaʻuhingaʻi, pea ʻoku ʻuhinga ʻa e “ekinakí” ke poupouʻi, fakafiefiaʻi, pe faleʻi.
-
Ko e hā ʻa e meʻa naʻá ke ʻiló?
-
ʻE tokoni fēfē nai hono fakahoko faivelenga ʻe ʻEma hono ngaahi uiuiʻí ke ne hoko ʻo hangē ange ko e Fakamoʻuí?
Ko hono fakaʻaongaʻi e faleʻi ʻa e Fakamoʻuí
Ke tokoni ke mahino ki he kau akó ʻa e founga ʻoku toe ʻaonga ai kiate kinautolu ʻa e ngaahi fakahinohino ʻa e ʻEikí kia ʻEmá, fakakaukau ke fokotuʻutuʻu ʻa e kalasí ki ha fanga kiʻi kulupu ako iiki. Fokotuʻu ha feituʻu faiʻanga ako ʻe tolu, ʻa ia ʻe lava ke fokotuʻu takatakai ʻi he lokí. ʻOku kau ʻi he konga ako takitaha ha fakamatala mei he moʻui ʻa ʻEma Sāmitá, ko ha fakaafe ke kumi ha sīpinga fakafolofola mei he moʻui ʻa Sīsū Kalaisí, mo ha ngaahi fehuʻi ke aleaʻi pe ko ha ʻekitivitī.
Kapau ʻe fiemaʻu, ʻe lava ke maʻu ha ʻekitivitī ko hono fā ʻi he konga Ngaahi ʻEkitivitī Fakalahi ki he Akó.
Pe, ko hoʻo fakaʻaongaʻi ʻa e ngaahi talanoa kuo fakahokohoko fakamotuʻalea ʻi he “Sāmita, ʻEma Heili” ʻi he Kau Māʻoniʻoní, 1:695 ke ako ha ngaahi talanoa kehe mei he moʻui ʻa ʻEmá. Fakaafeʻi ʻa e kau akó ke vakai ki he founga naʻe talangofua ai ʻa ʻEma ki he faleʻi naʻá ne maʻu ʻi he Tokāteline mo e Ngaahi Fuakava 25.
“ʻOua Te ke Lāunga” (Tokāteline mo e Ngaahi Fuakava 25:4)
Mei he Moʻui ʻa ʻEma Sāmitá
Naʻe aʻusia ʻe Siosefa Sāmita ha ngaahi mata meʻa-hā-mai fakalangi, ʻaʻahi mai ʻa e kau ʻāngeló, mo hono liliu ʻo e Tohi ʻa Molomoná, Tohi Tapú, mo ha ngaahi tohi toputapu kehe. Naʻe feilaulau lahi ʻa ʻEma Sāmita koeʻuhí ko ʻene moʻui mo Siosefá, ka naʻe ʻi ai ha ngaahi meʻa naʻe ʻosi mamata ki ai ʻa Siosefa naʻe teʻeki mamata ki ai ʻa ʻEma ia.
Mei he moʻui ʻa e Fakamoʻuí
Vahevahe ha taimi mei he moʻui ʻa Sīsū Kalaisí naʻá Ne fakafisi ai ke lāungá (ki ha ngaahi sīpinga, vakai, ʻĪsaia 53:7; Mātiu 27:12).
ʻE tokoni fēfē nai ʻetau fakaʻehiʻehi mei he lāungá ke tau hangē ai ko Sīsū Kalaisí?
-
ʻOkú ke pehē ko e hā ʻoku fekauʻi ai kitautolu ʻe he Fakamoʻuí ke ʻoua te tau lāunga fekauʻaki mo e ngaahi meʻa ʻoku teʻeki mahino kiate kitautolú?
-
ʻE lava fēfē nai ke ngāue ha taha ʻi he tui ʻi he taimi ʻoku ʻikai mahino ai kiate ia ʻa e finangalo mo e taimi ʻa e ʻEikí?
“Hoko ko e Fakafiemālie” (Tokāteline mo e Ngaahi Fuakava 25:5)
Mei he Moʻui ʻa ʻEma Sāmitá
Neongo naʻe faʻa faingataʻa ʻa e moʻui ʻa ʻEma mo Siosefá, ka naʻá ne ʻofa mo poupouʻi ia ʻi he faingataʻa kotoa pē. ʻI he 1835, naʻe ʻohofi ʻe ha kau fakatanga ʻita ʻa e ʻapi naʻe nofo ai ʻa Siosefa mo ʻEmá, ʻo toho ʻa Siosefa ki he fakapoʻulí. Naʻe foki ʻa Siosefa ʻi he pō ko iá ki ʻapi. Naʻá ne moʻui ka naʻe lahi hono tā, valitaaʻi, mo fakapipiki ai ʻa e fulufuluʻi moá. Naʻe nofo ʻa ʻEma ʻi he pō ko iá ʻo fohi mo toʻo ʻa e valitaá mei he sino ʻo Siosefá. Naʻe mālōlō ha taha ʻo e ongo māhanga valevale ʻa Siosefa mo ʻEmá mei heʻene puke hili ʻa e pō fakamamahi ko iá (vakai, Kau Māʻoniʻoní, 1:164–67).
Mei he moʻui ʻa e Fakamoʻuí
Fakakaukau ki ha taimi naʻe hoko ai ʻa Sīsū Kalaisi ko ha fakafiemālie kiate kinautolu ne nau feohí (ki ha ngaahi sīpinga, vakai, Mātiu 9:20–22; Sione 14:18, 27; 3 Nīfai 17:5–7).
Te tau fakafiemālieʻi fēfē nai ʻa e niʻihi kehé pea hoko ʻo hangē ko Sīsū Kalaisí?
-
Vahevahe ha meʻa kuo fai ʻe ha taha ke fakafiemālieʻi koe lolotonga ha taimi faingataʻa.
-
Fakalaulauloto ki ha meʻa te ke lava ʻo fai ke ke hoko ai ko ha fakafiemālie ki hao kaungāmeʻa pe mēmipa ʻo e fāmilí. Te ke tokoni fēfē nai ke nau ongoʻi e ʻofa ʻa e Fakamoʻuí?
-
Fai ha kiʻi tohi pe ko ha fakamatala te ne lava ʻo langaki hake ʻa e laumālie ʻo ha mēmipa ʻo e fāmilí pe kaungāmeʻa pea tokoniʻi kinautolu ke nau ongoʻi e ʻofa ʻa e Fakamoʻuí.
“Fakamatalaʻi ʻa e Ngaahi Folofolá, pea … Ekinaki ki he Siasí” (Tokāteline mo e Ngaahi Fuakava 25:7)
Mei he Moʻui ʻa ʻEma Sāmitá
ʻI he 1842, naʻe hikinimaʻi ai ʻa ʻEma ko e fuofua palesiteni ʻo e Fineʻofá. Naʻe mahuʻinga ʻa e tuʻunga fakatakimuʻa ʻo ʻEmá ʻi hono fakalele ʻo e houalotú. Naʻe fakahaaʻi ʻe ʻEma ʻene ʻofá mo ʻene ongoʻi ʻa e mahino fakalaumālié ʻaki ʻene poupouʻi mo akoʻi ʻa e Kāingalotú. Naʻe fakaafeʻi ʻe ʻEma ʻa e kau fafine ʻo e Fineʻofá ke akoako fakahoko ʻa e ʻofá, tokoni ʻi ha ngaahi founga makehe, fefakamālohiaʻaki, fakatomala, pea mo faʻa fakamolemole (vakai, Kau Māʻoniʻoní, 1:496–99).
Mei he moʻui ʻa e Fakamoʻuí
Vahevahe ha sīpinga mei he folofolá ʻo hono fakamatalaʻi ʻe he Fakamoʻuí ʻa e folofolá pe akoʻi ʻa kinautolu naʻe muimui kiate Iá (ki ha ngaahi sīpinga, vakai, Mātiu 5:21–25; 3 Nīfai 23:1–3; Siosefa Sāmita—Hisitōlia 1:19).
Akoako hono fakamatalaʻi ʻo e folofolá
-
Fili ha potufolofola kuó ne tokoniʻi koe ke fakatupulaki hoʻo fehokotaki mo e Fakamoʻuí pe hoko ʻo hangē ange ko Iá.
-
Vahevahe ʻa e potufolofola naʻá ke filí pea fakamatalaʻi hono ʻuhinga kiate koé.
-
Aleaʻi ʻa e founga ʻe lava ke tokoniʻi ai kitautolu ʻe he mahino ʻoku tau maʻú mo hono akoʻi ʻo e folofolá ke tau hoko ʻo hangē ange ko Sīsū Kalaisí.
Hili hono fakakakato ʻe he kau akó ʻa e ʻekitivitií, te ke lava ʻo fakaafeʻi kinautolu ke vahevahe mo e kalasí ʻa e meʻa naʻe makehe kiate kinautolu mei he meʻa ne nau akó. Ke fakaʻosi ʻa e kalasí, fakakaukau ke vahevahe hoʻo fakamoʻoní, ko e tokotaha ako takitaha ko ha ʻofefine pe foha ia “kuo fili” ʻi he puleʻanga ʻo e Fakamoʻuí. Fakamamafaʻi ange te nau maʻu ha ngaahi faingamālie lahi ke tokoni mo faitāpuekina ʻa e niʻihi kehé pea hoko ʻo hangē ko Sīsū Kalaisí.