“Tokāteline mo e Ngaahi Fuakava 27:1–14: ‘Fai Ia ʻaki ʻa e Mata ʻOku Hanga Taha Pē ki Hoku Fakalāngilangiʻí,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 27:1–14,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 41: Tokāteline mo e Ngaahi Fuakava 27–28
Tokāteline mo e Ngaahi Fuakava 27:1–14
“Fai Ia ʻaki ʻa e Mata ʻOku Hanga Taha Pē ki Hoku Fakalāngilangiʻí”
Hili hono fokotuʻu ʻo e Siasí ʻi ʻEpeleli ʻo e 1830, naʻe hoko atu hono fakatangaʻi ʻa e kāingalotu ʻo e Siasí. ʻI he fononga ʻa Siosefa Sāmita ʻi ha ʻaho ʻe taha ke ʻomi ha uaine ke fakaʻaongaʻi ki he sākalamēnití, naʻe taʻofi ia ʻe ha talafekau fakalangi ʻa ia naʻá ne vahevahe ange ha ngaahi moʻoni naʻe fakataumuʻa ke tokoni ki he Kāingalotú. ʻE lava ke tokoni ʻa e lēsoni ko ʻení ki he kau akó ke nau mateuteu lelei ange ke maʻu ʻa e sākalamēnití ʻaki ha mata ʻoku hanga taha pē ki hono fakalāngilangiʻi ʻo e ʻOtuá.
Ngaahi ʻEkitivitī Ako ʻOku Ala Fakahokó
Ko e sākalamēnití
Fakakaukau ke fakaʻaliʻali ʻa e tūkunga ko ʻení. Vahevahe ke tauhoa ʻa e kau akó pea ʻai ha tokotaha ke hoko ko e kaungāmeʻa ʻi he tūkungá. Fakaafeʻi ʻa e kau akó ke fakatātaaʻi nounou ʻa e tūkunga ko ʻení kimuʻa pea mou hoko atú.
Ka ʻikai pea fakaafeʻi ʻa e kau akó ke faʻu ha tūkunga ʻanautolu pē fekauʻaki mo ha taha ʻoku ʻikai mahino pe kuo teʻeki ke ne maʻu ha ngaahi aʻusia lelei ʻi he sākalamēnití.
Naʻe talaatu ʻe hao kaungāmeʻa, “ʻOku pehē ʻe he tokotaha kotoa pē ʻoku fuʻu mahuʻinga ʻa e sākalamēnití, ka ʻoku ʻikai fuʻu ongo mahuʻinga fēfē ia kiate au. Ko e hā ʻa e meʻa ʻoku teʻeki ke u ʻiló?”
-
Ko e hā ha ngaahi fehuʻi ʻe lava ke ke ʻeké?
-
Ko e hā te ke ala vahevahé?
Fakaafeʻi ʻa e kau akó ke nau fakakaukau ki he meʻá ni:
Fakalaulauloto ki hoʻo ngaahi aʻusia kimui ní ʻi hono maʻu ʻo e sākalamēnití. ʻOku ʻuhingamālie nai hoʻo ngaahi aʻusia ʻi he sākalamēnití? Ko e hā hono ʻuhinga ki hoʻo tali ʻio pe ʻikaí?
ʻI hoʻo ako ʻa e Tokāteline mo e Ngaahi Fuakava 27, kumi ha ngaahi moʻoni te nau lava ʻo tataki koe mo e niʻihi kehé ke mou maʻu ha ngaahi aʻusia mahuʻingamālie mo mālohi ange ʻi he sākalamēnití.
Ko e sākalamēnití: ko e meʻa ʻoku mahuʻingá mo ia ʻoku ʻikai mahuʻingá
ʻI ʻAokosi ʻo e 1830, naʻe fononga ai ʻa Niueli mo Seli Naiti mei Kolesivili, Niu ʻIoke, ke ʻaʻahi ki he Palōfita ko Siosefa Sāmitá mo hono uaifi ko ʻEmá, ʻi Hāmoni, Penisilivēnia. Naʻe ʻosi papitaiso fakatouʻosi ʻa ʻEma mo Seli, ka koeʻuhí ko e fakatanga mei ha kau fakatangá, naʻe teʻeki fakamaʻu ai kinaua ko ha mēmipa ʻo e Siasí mo foaki kiate kinaua ʻa e meʻafoaki ʻo e Laumālie Māʻoniʻoní. Kimuʻa pea foki ʻa e ongomātuʻa Naití ki hona ʻapí, naʻe fakakaukau ʻa Siosefa mo hono ngaahi kaungāmeʻá ke nau maʻu fakataha ʻa e sākalamēnití mo fakahoko ʻa e hilifakinimá.
ʻI hoʻo fakakaukau ki he puipuituʻa ko ʻení, lau ʻa e ʻuluʻi fakamatala ki he Tokāteline mo e Ngaahi Fuakava 27 ke vakai ki he founga naʻe maʻu ai ʻa e fakahā ko ʻení.
Fakaafeʻi ʻa e kau akó ke vahevahe ʻa e meʻa naʻa nau maʻu naʻe makehe kiate kinautolú. Fakakaukau ke fakamatalaʻi ange naʻe fakahoko ange ʻe he talafekau fakalangí ha pōpoaki mei he Fakamoʻuí. Kapau ʻe fehuʻi ʻe he kau akó ʻa e ʻuhinga ʻoku tau fakaʻaongaʻi ai ʻa e vaí kae ʻikai ko e uainé ʻi he sākalamēnití, fakaafeʻi kinautolu ke kumi ha tefitoʻi moʻoni naʻe fakahā ʻi he vahe ko ʻení ʻe lava ʻo tokoni ke tali ʻa e fehuʻi ko iá.
Lau ʻa e Tokāteline mo e Ngaahi Fuakava 27:1–2, ʻo kumi ʻa e meʻa naʻe ako ʻe Siosefa fekauʻaki mo e sākalamēnití.
-
Ko e hā naʻe makehe kiate koé? Ko e hā hono ʻuhingá?
Fakaafeʻi ha kau ako ke vahevahe ʻenau ngaahi fakakaukaú. Kumi ha ngaahi founga ke fakahaaʻi ai ʻokú ke houngaʻia ʻi heʻenau ngaahi talí.
Kapau ʻoku ʻikai vahevahe ʻe he kau akó ha ngaahi moʻoni ʻiate kinautolu pē, fakakaukau ke fehuʻi ange, “Ko e hā ʻokú ke ako mei he ngaahi veesi ko ʻení fekauʻaki mo e founga ʻoku totonu ke tau maʻu ai ʻa e sākalamēnití?” ʻI he tali ʻa e kau akó, fakaʻaonga‘i ʻenau ngaahi leá ke hiki ha tefitoʻi mo‘oni ʻi he palakipoé. ʻE lava ke faitatau mo ʻení: ʻoku totonu ke tau maʻu ʻa e sākalamēnití ʻaki ha mata ʻoku hanga taha pē ki hono fakalāngilangiʻi ʻo e ʻOtuá, ʻo manatu kia Sīsū Kalaisi mo ʻEne Fakalelei maʻatautolú.
Kapau ʻe ʻaonga, fakakaukau ke fehuʻi ki he kau akó pe ko e hā ha ngaahi kupuʻi lea mei he ngaahi veesi ko ʻení te nau fie fakalaulauloto ki ai pe fiemaʻu ke mahino lelei ange kiate kinautolu. ʻE lava ke tokoni ʻa e naunau ko ʻení:
-
ʻOkú ke pehē ʻoku ʻuhinga ki he hā ke maʻu ʻa e sākalamēnití ʻaki ha mata ʻoku hanga taha ki hono fakalāngilangiʻi ʻo e ʻOtuá?
ʻOku ʻuhinga ʻa e maʻu ha mata ʻoku hanga taha pē ki hono fakalāngilangiʻi ʻo e ʻOtuá, ke tukutaha ʻa e tokanga fakalaumālié ki he Fakamoʻuí mo ʻEne ngāue huhuʻí kae ʻikai kiate kitautolu pē (vakai, Marlin K. Jensen, “An Eye Single to the Glory of God,” Ensign, Nov. 1989, 27–28). ʻE lava ke lau ʻe he kau akó ʻa e Tokāteline mo e Ngaahi Fuakava 88:67–68 ke vakai ki he ngaahi tāpuaki kuo talaʻofa mai ʻi hono maʻu ha mata ʻoku hanga taha pē ki hono fakalāngilangiʻi ʻo e ʻOtuá. ʻE lava foki ke vahevahe ʻe he kau akó ʻa ʻenau fakakaukau ki he ʻuhinga ʻo e fakafonu ʻaki ʻa e māmá.
Tokoni ki he kau akó ke nau haʻu kia Sīsū Kalaisi: ʻOku fakataumuʻa ʻa e naunau ko ʻení ke tokoni ki he kau akó ke nau haʻu kia Kalaisi ʻi heʻenau vakai ki he sākalamēnití mo e Fakalelei ʻa Kalaisí ko ha meʻaʻofa fakataautaha maʻanautolu. Ki ha ako lahi ange ʻi he founga ke poupouʻi ai ʻa e kau akó ke haʻu kia Sīsū Kalaisí, vakai ki he ako “Ngaahi fakaafe ʻe tokoni ki he kau akó ke nau ʻiloʻi ʻa e ʻofa, mālohi, mo e ʻaloʻofa ʻa e ʻEikí ʻi heʻenau moʻuí.” ʻOku maʻu ʻa e ako ko ʻení ʻi he Fakatupulaki Ngaahi Taukei ʻa e Faiakó.
Naʻe fakahā ʻe he ʻāngeló ʻa e pōpoaki ʻa e Fakamoʻuí ke manatu “naʻe tuku hifo maʻamoutolu” ʻa e sino ʻo e Fakamoʻuí pea “naʻe lilingi” Hono taʻataʻá “ke fakamolemoleʻi ai ʻa hoʻomou ngaahi angahalá” (Tokāteline mo e Ngaahi Fuakava 27:2; tānaki atu hono fakamamafaʻí).
Fakakaukau ke poupouʻi ʻa e kau akó ke fakaʻilongaʻi ʻa e ongo kupuʻi lea “maʻamoutolu” mo “hoʻomou ngaahi angahalá.” Mahalo te nau fie hiki honau hingoá ʻi heʻenau folofolá ʻi he tafaʻaki ʻo e ongo kupuʻi lea ko ʻení ke ʻuhinga ʻa e vēsí kiate kinautolu. ʻE lava foki ke fakaʻilongaʻi ʻe he kau akó ha ngaahi kupuʻi lea faitatau ʻi he Luke 22:19–20, mei he taimi naʻe fakahoko ai ʻe he Fakamoʻuí ʻa e sākalamēnití ki Heʻene kau ʻAposetoló.
-
ʻOkú ke pehē ʻoku ʻuhinga ki he hā ʻa e manatu fakataautaha ki he feilaulau ʻa e Fakamoʻuí “maʻa moutolu” fakatāutahá pea mo “hoʻomou ngaahi angahalá” ʻi hoʻomou maʻu ʻa e sākalamēnití?
Ki ha sīpinga ʻo ha taha naʻá ne fakatokangaʻi ʻa e natula fakataautaha ʻo e feilaulau ʻa e Fakamoʻuí mo e sākalamēnití, mamata ʻi he “Ke u Tohoakiʻi ʻa e Kakai Fulipē Kiate Au” mei he taimi 7:16 ki he 9:14, ʻoku maʻu ʻi he ChurchofJesusChrist.org.
Ko ha kikite mo ha talaʻofa
Ke fakamamafaʻi ʻa e akonaki ʻa e ʻEikí, naʻá Ne kikiteʻi te Ne fakahoko ʻa e sākalamēnití ʻi he kahaʻú. Lau ʻa e Tokāteline mo e Ngaahi Fuakava 27:5 ke vakai ki he kikité. (Vakai foki, Luke 22:18.)
Lau ʻa e Tokāteline mo e Ngaahi Fuakava 27:6–14 ke ʻiloʻi pe ko hai ʻe toe foki maí.
Poupouʻi ʻa e kau akó ke nau fakakaukauloto ki he meʻá ni pea fakalaulauloto ki heʻenau ongo fekauʻaki mo e talaʻofa ʻa e Fakamoʻuí ke toe hāʻele mai ʻo maʻu ʻa e sākalamēnití mo Hono kau muimuí. Kole ange ke nau fakalaulauloto ki he meʻa te nau ongoʻí kapau ʻoku nau ʻi ai. Te ke lava foki ʻo kole ki he kau akó ke vahevahe ʻa e meʻa ʻoku akoʻi ʻe he kikite ko ʻení fekauʻaki mo e mahuʻinga ʻo e sākalamēnití.
Tokanga ke ʻoua naʻá ke fakamahamahalo fekauʻaki mo e fakataha ko ʻení mo e founga ʻe ala hoko aí.
Vakai ki he lea ʻa ʻEletā Pulusi R. Makongikī ʻo e Kōlomu ʻo e Kau ʻAposetolo ʻe Toko Hongofulu Mā Uá (1915–1985) ʻi he “Ngaahi Maʻuʻanga Tokoni Lahi Angé.”
-
ʻE hanga fēfē nai ʻe hoʻo feohi mo e Fakamoʻuí lolotonga hoʻo maʻu ʻa e sākalamēnití ʻo liliu koé?
Fakaʻaongaʻi fakatāutahá
Fakahoko ha ʻekitivitī ʻe ua pe tolu mei he ngaahi ʻekitivitī ko ʻení ke tokoni ke ke teuteu ke maʻu ʻa e sākalamēnití ʻaki ha mata ʻoku hanga taha pē ki hono fakalāngilangiʻi ʻo e ʻOtuá.
-
Lisi ha ngaahi moʻoni fekauʻaki mo e Fakamoʻuí ʻokú ke pehē ʻe mālohi ke ke manatu ki ai lolotonga ʻa e sākalamēnití.
-
Lekooti ʻi hoʻo tohinoá ha ngaahi aʻusia kuo tokoniʻi ai koe ʻe he Fakamoʻuí pe ko ha taha ʻokú ke ʻilo. Fakamatalaʻi ʻa e ʻuhinga ʻe ala tokoni ai ke manatu ki he ngaahi aʻusia pehení lolotonga ʻa e sākalamēnití.
-
Lisi ha ngaahi potufolofola pe himi fekauʻaki mo e Fakamoʻuí mo ʻEne feilaulau maʻaú ʻokú ke ongoʻi ʻe tokoni ke ke fakalaulauloto ki ai lolotonga ʻa e sākalamēnití. Fakakaukau ke fakakau ai ha ngaahi laine pe ngaahi kupuʻi lea pau ʻokú ke pehē ʻoku tautautefito ʻenau tokoni kiate koé pea mo hono ʻuhingá.
-
Fakakaukau ki hoʻo fiemaʻu ʻa e feilaulau ʻa e Fakamoʻuí. ʻE lava ke kau heni ʻa e fakalaulauloto ki hoʻo ngaahi fuakava mo e ʻEikí mo ha faʻahinga angahala ʻo ha fehalaaki (taimi ʻoku tau fai ai ha meʻa ʻoku ʻikai totonu ke tau faí) pe tōnounou (taimi ʻoku ʻikai ke tau fai ai ʻa e meʻa ʻoku totonu ke tau faí) ʻa ia ʻoku fiemaʻu ki ai ʻa e fakatomalá.
-
Lisi ha ngaahi fakahohaʻa ʻe ala hoko ʻoku fiemaʻu ke ke fakaʻehiʻehi mei ai lolotonga ʻa e sākalamēnití pea mo e ʻuhinga ʻokú ke ongoʻi ʻoku totonu ke ke fakaʻehiʻehi ai mei he ngaahi fakahohaʻa ko iá ke maʻu ha aʻusia mahuʻingamālie ange ʻi he sākalamēnití.
-
Lisi ha ngaahi founga kehe te ke lava ai ʻo tokanga taha ki he Fakamoʻuí lolotonga ʻa e sākalamēnití mo e ʻuhinga te nau ala tokoni aí.
Fakaafeʻi ʻa e kau akó ke aleaʻi ʻa e meʻa naʻa nau ako mo ongoʻi ʻi heʻenau fakahoko ʻa e ngaahi ʻekitivitī naʻa nau filí.
Fakaafeʻi kinautolu ke toe fakakaukau ki he ngaahi meʻa naʻa nau aʻusia tonu ʻi he sākalamēnití ʻi heʻenau fakahoko ʻa e ngaahi meʻá ni:
Fili ʻi he faʻa lotu ʻa e meʻa te ke fakahoko ke ke maʻu ai ʻa e sākalamēnití ʻaki ha mata ʻoku hanga taha pē ki hono fakalāngilangiʻi ʻo e ʻOtuá ʻi he Sāpate ka hoko maí. Fokotuʻu ha palani ki he founga ke fakahoko ai ʻa e ngāue ko iá. Fakakaukau ki he founga ʻe tokoniʻi ai koe mo ho vā fetuʻutaki mo e Tamai Hēvaní mo Sīsū Kalaisí ʻi hoʻo fakahoko ʻeni ʻi he ngaahi houalotu sākalamēniti ka hokó. Fekumi ki Heʻena tokoní ʻi hoʻo feinga ke muimuiʻi hoʻo palaní.
Fakamoʻoni ki he mālohi ʻo e Fakamoʻuí ʻe lava ke maʻu ʻi he ouau ʻo e sākalamēnití. Fakakaukau ke vahevahe ha aʻusia kuó ke maʻu ʻi he sākalamēnití. Poupouʻi ʻa e kau akó ke feinga ke maʻu haʻanau aʻusia pē ʻanautolu.