Lēsoni 43: Tokāteline mo e Ngaahi Fuakava 27–28

Tokāteline mo e Ngaahi Fuakava 28

Fakahā ʻi he Siasí

ʻI he 1830, naʻe tala ai ʻe Hailame Peisi ʻokú ne maʻu ha ngaahi fakahā ki he Siasí ʻo fakafou ʻi ha maka makehe. Naʻe tui ki ai ha niʻihi ʻo e kāingalotu ʻo e Siasí, kau ai ʻa ʻŌliva Kautele. ʻI he tali ki he tūkunga ko ʻení, naʻe fakahā ai ʻe he ʻEikí ʻa e ngaahi moʻoni fekauʻaki mo e founga maau ʻo e fakahaá ʻi he Siasí. ʻE lava ke tokoni ʻa e lēsoni ko ʻení ke mahino ki he kau akó ʻa e founga maau mo e fokotuʻutuʻu ʻoku fakaʻaongaʻi ʻe he Fakamoʻuí ke fakahā ʻaki Hono finangaló ʻi Hono Siasí.

Ngaahi ʻEkitivitī Ako ʻOku Ala Fakahokó

ngaahi fakafōtunga loi ʻa Sētané

Fakakaukau ke tohiʻi ʻa e meʻa loi mo e meʻa moʻoni ʻi he palakipoé. Fakaʻaliʻali ki he kau akó ha ngaahi meʻa pea fakaafeʻi kinautolu ke vahevahe pe ʻoku moʻoni nai pe loi. ʻE lava ke kau ʻi he ngaahi sīpingá ha telefoni moʻoni pe telefoni vaʻinga, paʻanga moʻoni pe paʻanga vaʻinga, fuaʻiʻakau moʻoni pe fuaʻiʻakau pelesitiki, mo ha ʻīmeili moʻoni mei ha pangikē pe ʻīmeili loi mei ha taha ʻoku fakangalingali ke pehē ko ha pangikē.

• Te ke lava fēfē nai ʻo tala ʻa e meʻa loí mo e meʻa moʻoní?

• Ko e hā ka fakatuʻutāmaki ai ke maʻu hala ha meʻa loi ʻo pehē ko ha meʻa moʻoni?

• ʻE kaunga fēfē nai ʻeni ki ha taha ʻoku feinga ke muimui ki he Fakamoʻuí ʻi heʻene moʻuí?

Lau ʻa e talateu ki he Tokāteline mo e Ngaahi Fuakava 28 pea kumi ha tūkunga naʻe faingataʻa ai ki he kau mēmipa ʻo e Siasi naʻe toki fokotuʻu foʻoú ke ʻiloʻi ʻa e meʻa naʻe moʻoní pea mo e meʻa naʻe loí.

Mahalo ʻe tokoni ke ʻiloʻi ko Hailame Peisí ko ha tangata ia naʻá ne tali ʻa e ongoongoleleí pea papitaiso ʻi he māhina tatau pē naʻe fokotuʻu ai ʻa e Siasí. Naʻe fili foki ia ko e taha ʻo e Kau Fakamoʻoni ʻe Toko Valu ki he Tohi ʻa Molomoná pea naʻá ne tauhi moʻoni maʻu pē ki heʻene fakamoʻoni ki aí.

• ʻOkú ke pehē ko e hā ʻoku lava ai ke kākaaʻi ha kakai lelei hangē ko Hailame Peisi mo ʻŌliva Kautelé ʻe he ngaahi fakafōtunga loi ʻa Sētané?

Toʻo ha kiʻi taimi ke fakalaulauloto ai ki he ngaahi meʻá ni:

• ʻE founga fēfē nai ha feinga ʻa Sētane ke kākaaʻi koe mo e niʻihi kehe ʻokú ke ʻiló?

• Ko e hā ha fakahinohino mo ha tokoni ʻoku ʻomi ʻe he ʻEikí ke tau fakaʻehiʻehi ai mei hano kākaaʻi kitautolú?

ʻI he hoko atu hoʻo akó, kumi ha tali ki he ngaahi fehuʻi ko ʻení.

Ko e tali ʻa e ʻEikí

ʻI he loto-hohaʻa ʻa Siosefa Sāmita ki he meʻa ke fai ʻi he tūkunga ko ʻení, naʻá ne lotu ai ʻi ha pō kakato peá ne maʻu ha tali mei he ʻEikí. ʻOku lekooti ʻa e fakahā naʻá ne maʻú ko e Tokāteline mo e Ngaahi Fuakava 28 pea naʻe fakataumuʻa ia kia ʻŌliva Kautele.

Lau ʻa e Tokāteline mo e Ngaahi Fuakava 28:1–8, 11–13, pea kumi ha ngaahi moʻoni naʻe akoʻi ʻe he ʻEikí kia ʻŌliva fekauʻaki mo e fakahaá.

Poupouʻi ʻa e kau akó ke vahevahe ha ngaahi moʻoni kehekehe fekauʻaki mo e fakahaá. Fakakaukau ke hiki ʻi he palakipoé ʻa e ngaahi meʻa ʻoku nau vahevahé.

Kapau ʻokú ke pehē ʻe ʻaonga pe fakamānako ange ki he kau akó, fakakaukau ke hiki ʻa e ngaahi moʻoni ko ʻení ʻi he palakipoé pea fakaafeʻi ʻa e kau akó ke nau lau pea fakatauhoa ʻa e ngaahi moʻoní ki he ngaahi veesi ʻokú ne akoʻi kinautolú.

ʻE foaki ʻe he ʻEikí ha fakahā maʻá e Siasí fakakātoa ʻo fakafou ʻi he Palesiteni pē ʻo e Siasí (vakai, veesi 2).

ʻOku ʻikai foaki ʻe he ʻEikí ki ha niʻihi fakafoʻituitui ha fakahā ke fakahinohino ha tokotaha ʻokú ne tokangaʻi kinautolu (vakai, veesi 6–7).

ʻE lava ke foaki mai ʻe he ʻEikí ha fakahā ke ʻaonga kiate kitautolu pea ke tokoniʻi kitautolu ʻi hotau ngaahi uiuiʻí mo e ngaahi fatongiá (vakai, veesi 8).

ʻE lava ke feinga ʻa Sētane ke kākaaʻi kitautolu ʻo fakafou ʻi ha fakahā loi (vakai, veesi 11).

ʻOku fakaafeʻi ʻe he ʻEikí ʻEne kau takí ke tokoni ke fakatonutonu kitautolu ʻi he taimi kuo kākaaʻi ai kitautolú (vakai, veesi 11).

Fakakaukau ke kole ki he kau akó ke vahevahe ʻa e meʻa naʻa nau ako fekauʻaki mo e ʻEikí mei he vahe ko ʻení. ʻE lava ke nau vahevahe ha tefitoʻi moʻoni kehe hangē ko ʻení: ʻOku tataki ʻe he ʻEikí ʻa Hono Siasí mo Hono kakaí ʻi ha founga maau.

• ʻOkú ke pehē ko e hā ʻoku ʻomi maʻu ai pē ʻe he ʻEikí ʻa e fakahaá ʻo fakatatau ki he ngaahi tefitoʻi moʻoni ko ʻení?

• ʻE tokoni fēfē nai hono ʻiloʻi ʻo e ngaahi moʻoni ko ʻení ke tau fakaʻehiʻehi ai mei hono kākaaʻi kitautolú?

Naʻe vahevahe ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene lea “Ko ha Founga Ngāue ki he Fakahā Fakafoʻituituí,” ha ngaahi fakakaukau fekauʻaki mo e founga ʻo e maʻu fakahaá:

1. “ʻOku tau maʻu ʻa e fakahā fakafoʻituituí maʻatautolu pē mo hotau fatongia fakaetauhí [pe kakai ʻoku tau tokangaʻí], kae ʻikai maʻá ha [totonu ʻa ha] niʻihi kehe. …”

2. “Ko e totonu ia ʻa e palōfita moʻuí ko hono ʻomi ʻa e tokāteline, ngaahi fekau, mo e ngaahi fakahā maʻá e Siasí, ʻa ia ʻokú ne maʻu ia mei he ʻEiki ko Sīsū Kalaisí [vakai, Tokāteline mo e Ngaahi Fuakava 21:4–5]. …”

3. “ʻE fenāpasi ʻa e fakahā fakafoʻituituí mo e ngaahi fekau ʻa e ʻOtuá mo e ngaahi fuakava kuo tau fakahoko mo Iá. …”

4. “ʻI he taimi ʻoku tau kole ai ha fakahā ki ha meʻa kuo ʻosi ʻomi ʻe he ʻOtuá ha fakahinohino mahino ki aí, ʻoku tau fakaʻatā leva kitautolu ki hano fakaʻuhingaʻi hala ʻetau ongó mo fanongo pē ki he meʻa ʻoku tau fie fanongo ki aí” (Liahona, Nōvema 2022, 16–17).

Ngaahi Sīpingá

Ke tokoni ki he kau akó ke vakavakaiʻi ʻa e meʻa kuo nau akó, fakamatalaʻi ange ʻa e ngaahi tūkunga ko ʻení pea fakaafeʻi ʻa e kau akó ke nau fakahoko fakakalasi pe fakakulupu iiki ʻeni. Ongoʻi tauʻatāina ke toʻo pe liliu ha taha ʻo e ngaahi tūkungá ke toe mahuʻingamālie ange ai ʻa e ʻekitivitī ko ʻení ki hoʻo kau akó.

Lau ʻa e ngaahi tūkunga ko ʻení pea kumi ha veesi pe kupuʻi lea mei he folofola ʻa e ʻEikí naʻá ke ako ʻi he Tokāteline mo e Ngaahi Fuakava 28 ʻoku akoʻi ai pe te nau lava ʻo hoko ko ha ngaahi fakahā moʻoni.

• ʻOku poupouʻi ʻe he palōfitá ʻa e Siasí fakakātoa ke nau ʻalu ki he temipalé.

• ʻOku akoʻi loto-toʻa ʻe ha kulupu ʻo ha kāingalotu loto-hohaʻa ʻoku finangalo ʻa e ʻOtuá ke fai ʻe he Siasí ha ngaahi liliu ki he tokāteliné pe ke liliu ha tuʻutuʻuni fekauʻaki mo ha palopalema faingataʻa.

• ʻOku tui ha mēmipa kuo fakahā kiate ia ʻe he ʻEikí ʻa e meʻa ʻoku totonu ke fai ʻe he pīsopé ʻi honau uōtí.

• ʻOku talaange ʻe ha faʻē ʻa ha finemui ʻoku ʻikai ke ne ongoʻi fiemālie ki ha fili ʻoku fai ʻe he finemuí.

• Lolotonga ʻa e teiti ʻa ha taautaha kei talavou ʻi he ʻunivēsití, ʻokú ne pehē kuó ne maʻu ha fakahā ʻoku ʻi ai ha finemui pau ʻoku totonu ke mali mo ia.

  ʻE ala mahuʻinga ke fakamatalaʻi ange ʻoku lelei ke vahevahe ʻi he ʻofa ʻa e ngaahi hohaʻá pe fakakaukaú mo kinautolu ʻoku nau tokangaʻi kitautolú pe ko ha taha kehe mei hotau lakanga tauhí, ka kuo pau ke tau ʻiloʻi ʻi he loto-fakaʻapaʻapa ʻa ʻenau totonu ki ha fakahā fekauʻaki mo e meʻa ko iá. Hangē ko ʻení, ʻe lava ke ongoʻi ʻe ha talavou ʻoku hōifua ʻa e ʻEikí ke ne kole ki ha finemui ke mali mo ia, ka ʻoku ʻi ai pē ʻa e totonu ʻa e finemuí ki ha fakahā pē ʻaʻana fekauʻaki mo e meʻa ʻoku lelei taha maʻaná.

  Ki ha sīpinga moʻoni ʻo ha taha naʻá ne pehē naʻá ne maʻu ha fakahā makehe mei he ngaahi tefitoʻi moʻoni ko ʻení, sio ʻi he vitiō “Ko ha Founga Ngāue ki he Fakahā Fakafoʻituituí” mei he taimi 4:14 ki he 5:07, ʻoku maʻu ʻi he ChurchofJesusChrist.org.

• ʻE founga fēfē nai hono tohoakiʻi kitautolu mei he Fakamoʻuí ʻi he tui ki he ngaahi faʻifaʻitaki loi ʻa Sētané ʻi ha taha pē ʻo e ngaahi tūkunga hala ʻi ʻolungá?

  Ke tokoni ke ongoʻi ʻe he kau akó ʻa e mahuʻinga ʻo e fakahā kuo foaki ʻe he ʻEikí ʻi Heʻene foungá mo ʻEne fokotuʻutuʻú, fakaafeʻi kinautolu ke tali ha fehuʻi ʻe ua pe lahi ange mei he ngaahi fehuʻi ko ʻení ʻi heʻenau tohinoa akó:

• ʻE founga fēfē nai ha hoko ʻa e mahino ʻokú ke maʻu ki he maau ʻoku fakaʻaongaʻi ʻe he ʻEikí ki Heʻene ngaahi fakahaá ko ha tāpuaki kiate koe?

• Ko e fē ha taimi kuo tāpuekina ai koe pe ko ha taha ʻokú ke ʻiloʻi ʻe he ʻEikí ʻo fakafou ʻi ha fakahā ki ha palōfita, taki fakasiteiki pe fakauooti, pe mātuʻá?

• Ko e fē ha taimi kuó ke maʻu ai pe ko ha taha ʻokú ke ʻiloʻi ha fakahā mei he ʻEikí ke tāpuekina ʻa kinautolu naʻe ui koe ke ke ngāue fakaetauhi ki ai pe tokoniʻí?

• Ko e fē ha taimi kuo tāpuekina ai koe ʻi ha fakahā mei he ʻEikí maʻau pē?

Fakakaukau ke kole ki he kau akó ke fili ha tali ʻoku nau ongoʻi fiemālie ke vahevahé. ʻE lava ke fevahevaheʻaki ʻa e kau akó ko ha kalasi, pe ke kiʻi kehe angé, ʻe lava ke kumi ʻe he kau akó ha taha kuo teʻeki ke nau fevahevaheʻaki mo ia kimuí ni mai ʻo vahevahe ki ai ʻenau sīpingá. ʻE lava foki ke vahevahe ʻa e tokotaha ʻoku nau filí. Kapau ʻe feʻunga ʻa e taimí, fakakaukau ke tuku ki he kau akó ha faingamālie ke vahevahe mo e kau ako kehé. Hili iá pea fakaafeʻi ha kau ako ʻe niʻihi ke vahevahe ʻa e meʻa naʻa nau fanongo ai mei he niʻihi kehé naʻe mahuʻingamālié. ʻI heʻenau fai iá, kumi ha ngaahi founga ke fakamamafaʻi ai ʻa e angalelei mo e ʻaloʻofa ʻa e ʻEikí ʻi hono fakahā mai ʻa e ngaahi moʻoní kiate kitautolú. Te ke lava foki ʻo fakaʻilongaʻi ʻa ʻEne finangalo lelei ke tokoni ke mahino kiate kitautolu ʻa e founga maau mo e fokotuʻutuʻu ʻokú Ne fakaʻaongaʻí.

Naʻe tali ʻe ʻŌliva Kautele ʻa e fakahaá, pea hili ha fakalotoa lahi, naʻe fakaʻikaiʻi ʻe Hailame Peisi mo ha niʻihi kehe ʻa e ngaahi fakahā halá.

Ke fakaʻosí, fakakaukau ke vahevahe hoʻo fakamoʻoní.

Ngaahi Maʻuʻanga Tokoni Kehé

Naʻe fekauʻaki ʻa e ngaahi fakahā ʻa Hailame Peisí mo e hā?

Naʻe lekooti ʻe he Palōfita ko Siosefa Sāmitá (1805–44):

Ko e meʻa naʻe fakafiemālie tahá, … he naʻe vave ʻema fakatokangaʻi naʻe toka tataʻo ʻa Sētane ke kākā, mo kumi ʻa kinautolu ke ne fakaʻauhá. Naʻe maʻu ʻe Misa Hailame Peisi ha foʻi maka, ʻa ia naʻá ne maʻu ai ha faʻahinga “fakahā” fekauʻaki mo hono langa hake ʻo Saioné, ki he founga ʻo e Siasí, mo e alā meʻa pehē, pea naʻe kehe ʻaupito kotoa ʻeni mei he founga ʻo e fale ʻo e ʻOtuá, ʻo hangē ko ia ʻoku fakamatalaʻi ʻi he Fuakava Foʻoú, pea pehē mo ia ʻoku ʻi heʻetau ngaahi fakahā kimui ní. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 225)

Ko e hā ʻoku tau ʻilo fekauʻaki mo ʻŌliva Kautele ʻi he taimi ko ʻení?

Naʻe lahi fau ʻa e ivi tākiekina ʻo ʻŌliva Kautelé ʻi he ngaahi ʻaho kamakamata ʻo e Siasí. Naʻá ne hoko ko ha tangata tohi maʻa Siosefa Sāmita ʻi hono liliu ʻe Siosefa ʻa e Tohi ʻa Molomoná, naʻá ne ʻi ai ʻi hono fakafoki mai ʻe Sione Papitaiso ʻa e Lakanga Taulaʻeiki Faka-ʻĒloné, pea naʻá ne ʻi ai ʻi hono fakafoki mai ʻe Pita, Sēmisi, mo Sione ʻa e Lakanga Taulaʻeiki Faka-Melekisētekí. Naʻá ne hoko ko ha taha ʻo e Kau Fakamoʻoni ʻe Toko Tolu ki he Tohi ʻa Molomoná. Naʻe ui ia ʻe he ʻEikí ko e “kaumātuʻa hono ua” ʻo e Siasí (Tokāteline mo e Ngaahi Fuakava 20:3) mo e “ʻuluaki tangata malanga” ki he Siasí (Tokāteline mo e Ngaahi Fuakava 21:12). Mahalo naʻe ʻi ai ha puputuʻu fekauʻaki mo e fatongia ʻo ʻŌliva ʻi he Siasí ʻa ia naʻe fakamahinoʻi ʻi he fakahā ko ʻení. Naʻe pau ke ne “lea pe akonaki” ki he kāingalotu ʻo e Siasí, ka ʻe maʻu ʻe Siosefa ʻa e fakahā maʻá e Siasí (Tokāteline mo e Ngaahi Fuakava 28:4; vakai foki, veesi 2). Naʻe hangē ʻa ʻŌliva ko ʻĒloné, kae hangē ʻa Siosefa ko Mōsesé (vakai, Tokāteline mo e Ngaahi Fuakava 28:2–3).

Ko e hā mo ha toe meʻa kuo akoʻi ʻe he kau palōfitá mo e kau ʻaposetoló fekauʻaki mo e founga mo e tuʻunga maau ʻo e fakahaá?

Vakai, Dallin H. Oaks, “Ongo Founga ʻo e Fetuʻutakí,” Liahona, Nōvema 2010, 83–86.

Ngaahi ʻEkitivitī Fakalahi ki he Akó

Fakaʻaongaʻi ha talanoa fakatātā ʻa ha ʻAposetolo

Fakakaukau ke fakaʻaliʻali ki he kau akó ha fakatātā ʻo ha vakapuna pea fehuʻi ange pe ʻoku ʻilo fēfē nai ʻe he kau pailaté ʻa e taimi ke nau mavahe aí mo e founga ke aʻu ai ki he feituʻu ʻoku nau fakataumuʻa ki aí. Hili iá pea vahevahe ʻa e lea ko ʻeni ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku puna ʻa e kau pailate vakapuna taukeí ʻo fakatatau ki he ivi malava ʻo ʻenau vakapuná pea muimui ki he fakahinohino mei he kau ngāue ʻi he tauá ʻoku nau fakahinohino ki he leleʻanga vakapuná mo e hala fononga ʻo e vakapuná. Ko hono ʻai mahinó, ʻoku ngāue ʻa e kau pailaté ʻo fakatatau ki ha founga ngāue. Neongo pe ko e hā ʻa e lahi honau potó pe taukeí, ka ʻoku toki lava pē ʻa e pailaté ʻo tuku atu ʻa e fuʻu ivi mālohi ʻo ha vakapuna ke puna ʻi he vavaá ʻo fakahoko ai hono taumuʻa makehe naʻe fakataumuʻa ki aí ʻi heʻenau fai pau ki he founga ngāue ko ʻení.

ʻOku tau maʻu ʻi he founga tatau ha fakahā fakataautaha ʻi he muimui ki ha founga ngāue. …

… ʻI heʻetau ngāue ʻo fakatatau ki he founga ngāué, ʻoku lava ʻa e Laumālie Māʻoniʻoní ʻo tukuange mai ha fakakaukau, fakahinohino, mo e fiemālie ʻoku fakaofo. ʻOku tatau ai pē pe ko e hā ʻa e lahi hotau potó pe talēnití, ʻe lava pē ke kākaaʻi pea fakatupu loto-mamahi mo fakafaingataʻaʻia, ʻi he ʻikai ke tau ngāue ʻo fakatatau ki he founga ngāue ko ʻení. (Dale G. Renlund, “Ko ha Founga Ngāue ki he Fakahā Fakafoʻituituí,” Liahona, Nōvema 2022, 16)

Fakaafeʻi ʻa e kau akó ke ako ʻa e Tokāteline mo e Ngaahi Fuakava 28 pea pehē ki he ngaahi konga kehe ʻo e lea ʻa ʻEletā Lenilaní ke ʻiloʻi ʻa e founga ngāue ko ʻení. ʻE lava ke tā ʻe he kau akó ha vakapuna pea hiki takatakai ai ʻa e ngaahi tefitoʻi meʻa mahuʻinga ki he founga ngāue ko ʻeni ʻo e fakahaá. ʻE lava ke nau vahevahe ha ngaahi sīpinga mei he lea ʻa ʻEletā Lenilaní pe faʻu haʻanau sīpinga pē ʻanautolu ʻokú ne fakatātaaʻi ʻa kinautolu ʻoku mahino pe ʻikai mahino kiate kinautolu ʻa e ngaahi ʻelemēniti kehekehe ʻo e founga ngāué.

Ko e ngāue fakafaifekau ʻa ʻŌliva Kautele ki he kau Leimaná

Kapau ʻokú ke ongoʻi ʻe ʻaonga ke akoʻi ʻa e ngāue fakafaifekau ʻa ʻŌliva Kautele ki he kau Leimaná, fakakaukau ke fakaafeʻi ʻa e kau akó ke lau ʻa e Tokāteline mo e Ngaahi Fuakava 28:8–10 pea vakai ki he feituʻu naʻe uiuiʻi ʻa ʻŌliva ke ngāue ki aí. ʻE lava ke lau ʻe he kau akó ʻa e ngaahi veesi ko ʻení ke ʻiloʻi ʻa e ʻuhinga naʻe mahuʻinga ai ʻa e uiuiʻi ko ʻení: 1 Nīfai 13:34–41; ʻĪnosi 1:11–18; Hilamani 15:12–13.

Naʻe ʻomi ʻe he ngāue fakafaifekau ko ʻení ha ngaahi laumālie ʻe laungeau ki he Siasí, ʻa ia ko e tokolahi taha ʻo kinautolú naʻe nofo ʻi he feituʻu Ketilani, ʻOhaioó, ʻa ia naʻe afe ai ʻa ʻŌliva mo hono ngaahi hoa [ngāue fakafaifekaú] ʻi heʻenau fononga ki honau misioná. Naʻe kau ʻi he niʻihi ko ʻení ʻa Sitenei Likitoni, ʻEtuate Pātilisi, mo Niueli mo ʻAna Uitenī. ʻE lava ke fili ʻe he kau akó ha taha ʻi he niʻihi fakafoʻituitui ko ʻení pea fakaʻaongaʻi ʻa e ngaahi tokoni ki he akó pe Gospel Library ke ako lahi ange fekauʻaki mo kinautolu mo ʻenau uluí.

ʻE lava ke tokoni ʻa e vahe ko ʻení ki he kau akó ke nau ako lahi ange fekauʻaki mo e kau papi ului ʻi Ketilaní pea pehē ki he kau ʻInitia ʻAmelika naʻa nau tali lelei ʻa e pōpoakí pea mo e ʻuhinga naʻe ʻikai lava ke toe hoko atu ai ʻa e ngāué ʻi he feituʻu ko iá. ʻE lava ke vahevahe ʻe he kau akó ʻa e meʻa ʻoku akoʻi ange ʻe he misiona ko ʻení fekauʻaki mo e ʻEikí mo ʻEne ngāué.