“Tokāteline mo e Ngaahi Fuakava 27:15–18: ‘ʻAi Kiate Kimoutolu ʻa Hoku Teunga Tau Kakató,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 27:15–18,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 42: Tokāteline mo e Ngaahi Fuakava 27–28
Tokāteline mo e Ngaahi Fuakava 27:15–18
“ʻAi Kiate Kimoutolu ʻa Hoku Teunga Tau Kakató”
Ko e konga ʻo e pōpoaki naʻe maʻu ʻe Siosefa mei ha ʻāngelo ʻa e ʻOtuá, naʻe akoʻi ia fekauʻaki mo e founga ʻe lava ke fakaafeʻi ai ʻe he Kāingalotú ha maluʻi lahi ange meia Sīsū Kalaisí. ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e founga ʻe lava ke maluʻi ai kitautolu ʻe he Fakamoʻuí mei he ngaahi founga ʻoku feinga ai ʻa Sētane ke ʻahiʻahiʻi mo fakalotosiʻiʻi kitautolú.
Ngaahi ʻEkitivitī Ako ʻOku Ala Fakahokó
Ko e ngaahi ʻohofi ʻa e filí
ʻOange ki he kau akó takitaha ha kiʻi laʻipepa siʻisiʻi. Fakaafeʻi ʻa e kau akó ke hiki ʻi he laʻipepá ha founga ʻe taha ʻoku ʻahiʻahiʻi pe feinga ai ʻa e filí ke fakalotosiʻiʻi ʻa e toʻu tupú. Hili iá pea fakaafeʻi kinautolu ke kukuʻi ʻa e laʻipepá ke faʻu ha foʻi pulu. Fakaafeʻi ha tokotaha ako ke haʻu ki muʻa ʻi he lokí peá ne feinga ke kalo ʻi hono tolo ia ʻe he toenga ʻo e kau akó ʻaki ʻa e foʻi pulu pepá .
Fakaafeʻi ʻa e kau akó ke omi ki muʻa ʻi he lokí, folofolahi hake ʻa e ʻū laʻipepá, pea vahevahe ʻa e meʻa naʻe hiki aí. Kole ki he kalasí ke feinga ke ʻiloʻi ʻa e ngaahi founga ʻoku nau vakai ai ki he ngaahi ʻahiʻahi pe ʻohofi ko ʻení ʻi he ʻaho ní.
-
Ko e hā te ke ala fai ke maluʻi koe mei he ngaahi ʻohofi ko ʻení?
Fekumi ki he fakahinohino ʻa e Laumālie Māʻoniʻoní ʻi hoʻo fakalaulauloto ki he ngaahi ʻahiʻahi mo e ngaahi fakalotosiʻi ʻokú ke fehangahangai mo iá. Fakalaulauloto ki ha ngaahi founga kuo tokoniʻi ai koe ʻe he ʻEikí ke ke ikunaʻi kinautolu. Ko e hā ha ngaahi founga ʻokú ke kei faingataʻaʻia ai pea fiemaʻu ʻa e tokoni ʻa e Fakamoʻuí? ʻI hoʻo ako ʻa e Tokāteline mo e Ngaahi Fuakava 27, fekumi ki ha ngaahi moʻoni mo ha ueʻi fakalaumālie ʻe lava ʻo tokoni atu kiate koe.
Ko e teunga tau kakato ʻa e ʻOtuá
Hili ʻa e folofola ʻa e Fakamoʻuí kia Siosefa Sāmita fekauʻaki mo e sākalamēnití (vakai, Tokāteline mo e Ngaahi Fuakava 27:1–4), naʻá Ne talaʻofa ange te Ne toe hāʻele hifo ki he māmaní pea maʻu ʻa e sākalamēnití mo Hono kau muimuí (vakai, Tokāteline mo e Ngaahi Fuakava 27:5–14). Naʻe akoʻi leva ʻe he Fakamoʻuí ʻa e founga ʻe lava ke maluʻi fakalaumālie ai ʻa e Kāingalotú mei he ngaahi mālohi ʻo Sētané “kae ʻoua ke u haʻu, pea ʻe toʻo hake ʻa kimoutolu, he ko e potu ʻoku ou ʻi aí te mou ʻi ai mo kimoutolu foki” (Tokāteline mo e Ngaahi Fuakava 27:18).
Lau ʻa e Tokāteline mo e Ngaahi Fuakava 27:15–18, ʻo kumi ʻa e founga te ke lava ai ʻo maʻu ʻa e maluʻi ʻa e Fakamoʻuí mei he filí.
Fakaafeʻi ʻa e kau akó ke vahevahe ʻa e meʻa naʻa nau maʻú. Kapau ʻe fiemaʻu, tokoni ke nau ʻiloʻi kapau te tau ʻai kiate kitautolu ʻa e teunga tau kakato ʻo e Fakamoʻuí, ʻe fakamālohia kitautolu ke tau matuʻuaki ʻa e koví. Tokoni ki he kau akó ke nau ʻanalaiso ʻa e foʻi moʻoni ko ʻení. Te ke lava ʻo fai ʻeni ʻaki haʻo ʻeke ha niʻihi ʻo e ngaahi fehuʻi ko ʻení.
-
ʻOkú ke pehē ko e hā ʻoku fakafehoanaki ai ʻe he Fakamoʻuí ʻEne tokoní mo e maluʻí ki ha teunga taú?
-
ʻOkú ke pehē ʻoku ʻuhinga ki he hā ʻa e “tuʻu”? (vakai, veesi 15–16)
-
ʻOkú ke pehē ko e hā ʻoku fakamamafaʻi ai ʻe he ʻEikí ʻa Hono teunga tau “kakató”?
Fakakaukau ke fakaafeʻi ʻa e kau akó ke fakaʻilongaʻi ‘a e kupuʻi lea “ʻa hoku teunga tau kakató” ʻi he veesi 15. ʻE lava ke fakakaukauloto ʻa e kau akó naʻe pau ke nau ʻalu ʻo kau ʻi ha tau kae ʻikai hanau teunga tau. Naʻe ʻoange leva ʻe ha taha kuó ne tau mo lavameʻa ʻi ha ngaahi tau lahi, ha teunga tau ke maluʻi kinautolu pea naʻá ne loto-fiemālie ke tau fakataha mo kinautolu.
-
ʻE fēfē nai hoʻo ongo ki he tokotaha ko ʻení?
-
ʻOku tatau fēfē nai ʻa e tūkunga ko ʻení mo e meʻa ʻoku fakahoko ʻe he Fakamoʻuí maʻatautolú?
Ko e maluʻi mo e tokoni ʻa e Fakamoʻuí
Naʻe tohi ʻe he ʻAposetolo ko Paulá, “Ke ʻai ʻe kimoutolu ʻa e ʻEiki ko Sīsū Kalaisí” (Loma 13:14). ʻE lava ke fakafofongaʻi ʻe he ngaahi konga kehekehe ʻo e teunga tau ʻoku fakamatalaʻi ʻi he Tokāteline mo e Ngaahi Fuakava 27 (vakai foki, ʻEfesō 6:11–18) ʻa e ngaahi founga ʻe lava ke maluʻi ai kitautolu ʻe he Fakamoʻuí mei he kākaá, faiangahalá, moveuveú, mo e veiveiua ʻokú ne ʻākilotoa kitautolú. ʻOkú Ne foaki mai ʻa e maluʻi ko ʻení ʻi heʻetau haʻu kiate Iá.
ʻOange ki he kau akó ʻa e laʻipepa tufá. ʻE lava ke nau fakakakato fakafoʻituitui ia pe ʻi ha fanga kiʻi kulupu iiki. ʻE lava ke fili ʻe he mēmipa takitaha ʻo e kulupú ha ngaahi konga ʻo e teunga taú ke nau tokanga taha ki ai. Ka loto ki ai ʻa e kau akó, ʻe lava ke nau tā ha meʻa ʻokú ne fakafofongaʻi ʻa e teunga taú pe maluʻí, hangē ko ha tatā, sifa-fatafata, pe pā, pea fakahingoa ia ko e “maluʻi mo e tokoni ʻa Sīsū Kalaisí.” Hili iá, ʻe lava ke nau hiki takai ai ʻenau ngaahi talí.
“ʻAi kiate kimoutolu ʻa hoku teunga tau kakató” (Tokāteline mo e Ngaahi Fuakava 27:15)
Ki he konga takitaha ʻo e teunga tau ʻi laló, lau ʻa e ngaahi potufolofolá ʻo kumi ʻa e founga ʻoku hangē ai ʻa e Fakamoʻuí ko e teunga taú. Hili iá pea tali leva ʻa e ongo fehuʻi ko ʻení:
-
Ko e hā ha ngaahi fakakaukau ʻokú ke maʻu fekauʻaki mo e Fakamoʻuí ʻi hoʻo fai ʻa e fakafehoanaki ko ʻení?
-
Ko e hā ka hoko ai ʻeni ko ha fakaʻaiʻai ke ke fie haʻu kiate Ia ke maʻu ha maluʻi ʻi he taimí ni ʻi hoʻo moʻuí?
“Nonoʻo homou kongalotó ʻaki ʻa e moʻoní” (Tokāteline mo e Ngaahi Fuakava 27:16)
“Sifa-fatafata ʻo e māʻoniʻoní” (Tokāteline mo e Ngaahi Fuakava 27:16)
ʻĪsaia 59:16–17 (ʻoku ʻuhinga ʻa e fakalaloá ki ha taha ʻokú ne fai ʻa e meʻa ʻoku ʻikai lava ʻe he niʻihi kehé ʻo fai maʻanautolú)
“Topuvaʻe ʻaki ʻa e teuteu ʻo e ongoongolelei ʻo e melinó” (Tokāteline mo e Ngaahi Fuakava 27:16)
“Pā ʻo e tuí” (Tokāteline mo e Ngaahi Fuakava 27:17)
“Tatā ʻo e fakamoʻuí” (Tokāteline mo e Ngaahi Fuakava 27:18)
“Heletā ʻo [e] Laumālié,” ʻa ia ko e folofola ʻa e ʻOtuá (Tokāteline mo e Ngaahi Fuakava 27:18)
© 2023 by Intellectual Reserve, Inc. All rights reserved.
ʻI he ʻosi ʻa e ngāue ʻa e kau akó, tuku ke vahevahe ʻenau ngaahi fakakaukaú mo e ngaahi aʻusiá ʻi he ngaahi founga kehekehe ʻe lava ke tokoniʻi mo maluʻi ai kinautolu ʻe he Fakamoʻuí. Fakakaukau ke vahevahe foki hoʻo ngaahi fakakaukaú mo e aʻusiá.
Tui Hono teunga tau kakató
Fakakaukau ke fakamanatu ki he kau akó naʻe kamata ʻa e fakahā ko ʻení ʻi hono fakahā ʻe ha talafekau fakalangi ʻa e ngaahi akonaki ʻa e Fakamoʻuí ʻi he sākalamēnití pea mo e talaʻofa ʻa e Fakamoʻuí ke toe hāʻele mai ki he māmaní ʻo maʻu ʻa e sākalamēnití mo Hono kau muimuí (vakai, Tokāteline mo e Ngaahi Fuakava 27:1–14). ʻOku fokotuʻu mai heni ʻe lava ke hoko ʻa e manatu ki he Fakamoʻuí mo hono fakahoko ha ngaahi fuakava mo Ia ʻi he sākalamēnití ko ha founga mālohi kuo teuteuʻi ai ʻe he ʻEikí maʻatautolu ke tau tui hono teunga tau kakató pea ke “faivelenga kae ʻoua ke [Ne hāʻele mai]” (Tokāteline mo e Ngaahi Fuakava 27:18).
-
ʻE lava fēfē nai ke hoko ʻa e sākalamēnití ko ha founga mālohi ke fakaafeʻi ai ʻa e tokoni mo e maluʻi ʻa e Fakamoʻuí (ʻa Hono teunga tau kakató) ki heʻetau moʻuí?
Foki ki he ʻū laʻipepa naʻe fakafuopotopotoʻi pea tolo ʻi he kamataʻanga ʻo e kalasí. Lau hanau niʻihi pea fakaafeʻi ʻa e kau akó ke vahevahe, ʻo makatuʻunga ʻi he meʻa naʻa nau ako ʻi he ʻaho ní, ʻa e founga ʻe lava ke tokoniʻi ai ʻe he Fakamoʻuí ha taha ʻoku fehangahangai mo e ʻahiʻahi pe fakalotosiʻi ko iá. Te nau lava foki ʻo vahevahe ʻa e founga ʻe lava ai ha taha ʻo tafoki ki he ʻEikí ke fakaafeʻi ʻEne tokoní ki heʻenau moʻuí.