Lesona 44: Mataupu Faavae ma Feagaiga 29

Mataupu Faavae ma Feagaiga 29:1–8

Faalogo i Lou Togiola

E i ai le alofa tele o le Tama Faalelagi mo Ana fanau. E finagalo o Ia ma Lona Alo ia tatou fiafia i lenei olaga ma ia faatasi ma i Laua i le faapotopotoina o tagata uma i lo La’ua afioaga. O lenei lesona e mafai ona fesoasoani i tamaiti aoga e malamalama atili ai i manaoga o le Tama Faalelagi ma Iesu Keriso mo i latou.

Gaoioiga E Ono Mafai Ona Aoao Ai

O ai e te faatuatuaina?

Mafaufau i ni auala e mafai ona e fesoasoani ai i tamaiti aoga ia iloa o le faatuatuaina o se tasi e faalagolago tele lea i le malamalama i o latou faamoemoega po o manaoga. O se tasi nei o auala e mafai ona e faatinoina ai.

Mafaufau po o ai o le a e naunau e faatuatuaina ai lenei mea ma pe aisea.

1. Ki o lou fale

2. O lau uputatala i se masini po o se faitotoa patino

3. O lau miti po o se sini sili ona patino

• O le a se mea ua e iloa e uiga i lena tagata po o tagata e aafia ai lou naunau e faatuatuaina i latou?

I lau api faamaumau mo suesuega, tusi ai se fuaiupu se tasi pe lua e faamatala ai mea ua e iloa e uiga i faamoemoega ma manaoga o le Tama Faalelagi ma Iesu Keriso. Afai e te iloa se mea e uiga i o Laua faamoemoega po o manaoga, mafaufau pe faapefea e lena mea ona tosina ai lou naunau e faatuatuaina i Laua. Afai e te le iloa tele ni mea e uiga i o La’ua faamoemoega po o manaoga, mafaufau pe aisea ua avea ai le iloaina o lenei laasaga o se laasaga taua i le naunau e faatuatuaina i Laua.

Manaoga o le Tama Faalelagi ma Iesu Keriso

A o lei faia se konafesi a le Ekalesia ia Setema 1830, sa fetalai le Faaola i le Mataupu Faavae ma Feagaiga 29 e uiga i le alofa ma manaoga o loo ia te Ia ma le Tama Faalelagi mo tagata uma.

O le gaoioiga lenei o se tasi lea o auala e fesoasoani ai i tamaiti aoga e suesue le Mataupu Faavae ma Feagaiga 29:1–8. Atonu e manaomia ona fetuunai ina ia fetaui ai le telē po o manaoga o lau vasega.

Tusi le numera tasi e oo i le valu i luga o le laupapa. Ona tuu atu lea i tamaiti aoga faatonuga nei. Tuu atu ia i latou e mulimuli i faatonuga taitasi a o lei tuuina atu ia i latou le isi.

1. Faitau le Mataupu Faavae ma Feagaiga 29:1–8 ma maka mea ua e aoaoina e uiga i manaoga o le Tama Faalelagi ma Iesu Keriso i fuaiupu taitasi.

2. Tusi lou igoa i luga o le laupapa i autafa o le numera o se fuaiupu e i ai se uiga faapitoa ia te oe.

   Faatali mo tamaiti aoga uma e tusi o latou igoa i luga o le laupapa i autafa o se numera o se fuaiupu a o lei agai atu i laasaga e sosoo ai.

3. Afai e mafai, faapotopoto faatasi ma ni tamaiti aoga se toalua pe toatolu o e na tusia o latou igoa i autafa o le numera lava e tasi o le fuaiupu.

   Afai e na o le toatasi le tamaitiiti aoga e tusia o latou igoa i autafa o se numera o le fuaiupu, mafaufau e faataga lena tamaitiiti aoga e filifili e galue toatasi pe auai i se isi vaega.

4. Faasoa atu i lau vaega upu po o fasifuaitau na e makaina i lau fuaiupu ma mea ua latou aoaoina ai oe e uiga i manaoga o le Tama Faalelagi ma Iesu Keriso.

5. I totonu o lau vaega, talanoaina se fesili e mafai ona fesoasoani e faalolotoina ai lou malamalama i manaoga o le Tama Faalelagi ma Iesu Keriso.

Faaali atu pe tuu atu i vaega taitasi se lisi o fesili e mafai ona latou filifilia e talanoaina. E mafai e tamaiti aoga ona filifili se fesili mai le lisi o fesili fautuaina, pe e mafai foi ona latou fatuina ni a latou lava fesili. O loo i lalo ifo nisi o faataitaiga:

• E mafai faapefea i le iloaina o lenei upumoni ona aafia ai le auala e te vaai ai ia te oe lava atoa ma isi?

• O anafea na e molimauina ai le Tama Faalelagi ma Iesu Keriso o faaalia nei manaoga i lou olaga po o olaga o isi?

• O a nisi o mau faaopoopo o loo aoao mai ai se upumoni faapena? (Vaai i fuaitau o le atamai i aoaoga faavae, vaefaamatalaga, po o isi punaoa e sue ai.)

• O a ni mea na aoao mai e perofeta, aposetolo, po o isi taitai o le Ekalesia e lagolago ai lenei upumoni? (Saili mo faamatalaga i le Gospel Library.)

• E mafai faapefea e lenei fuaiupu ona faateleina lo tatou tomai e vaai ai i le olaga mai se vaaiga e faavavau?

• O a ni au fesili e uiga i lenei fuaiupu? O a fesili e mafai ona fesiligia ina ia malamalama atili ai i lenei fuaiupu? (Galulue faatasi e saili ni tali talafeagai.)

• E mafai faapefea e le talitonu po o le ola ai i mataupu faavae o loo aoaoina i lenei fuaiupu ona tosina ai le faiā a se tasi ma le Tama Faalelagi ma Iesu Keriso?

• Aisea e ono faigata ai i nisi tagata ona talitonu pe ola i aoaoga o lenei fuaiupu? O le a se mea e mafai ona fesoasoani ia i latou e faatoilalo ai lena luitau?

Ina ia mafai e vaega ona faalolotoina lo latou malamalama, e mafai ona e fai atu i se isi tamaitiiti aoga e filifili se fesili e ese mai ai ma talanoaina o se vaega. A le toe faasoa mai pe ua faalavelaveina tamaiti aoga, e ono ta’u mai i lenei mea ua oo i le taimi e fetuunai ai le gaoioiga o loo aoao. Afai e manaomia, e mafai e tamaiti aoga ona toe faia le gaoioiga e ala i le filifilia o se fuaiupu fou, fatuina o ni vaega fou, talanoaina le fuaiupu na latou filifilia, ma mulimuli i laasaga o loo lisi atu i luga.

A uma ona galulue tamaiti aoga i ni vaega, valaaulia ni nai tagata e faasoa mai i le vasega mea ua latou aoaoina e uiga i manaoga o le Tama Faalelagi ma Iesu Keriso.

O le finagalo lelei o le Atua

I le i ai faatasi ma le tele o upumoni atonu na maua e tamaiti aoga, o se upumoni se tasi e mafai tatou aoao mai nei fuaiupu o le, e finagalo le Tama Faalelagi ma Iesu Keriso e tuuina mai ia i tatou lo La’ua malo. Atonu e te valaaulia tamaiti aoga e maka le upumoni lea i totonu o le fuaiupu 5. Faasoa atu le faamatalaga lenei ma valaaulia tamaiti aoga e tali mai i fesili e faatatau i ai.

Na faasoa mai e Elder Dale G. Renlund o le Korama Aposetolo e Toasefululua le mea lenei:

E finagalo lo tatou Tama Faalelagi ia avea oe ma Ona suli ma maua mea uma ua ia te Ia. E le mafai ona Ia ofoina atu nisi mea ia te oe. E le mafai ona Ia folafola atu nisi mea ia te oe. E sili atu Lona alofa ia te oe nai lo lou iloa ma e finagalo ia e fiafia i lenei olaga ma i le olaga a sau. (Dale G. Renlund, “O Lou Natura Paia ma le Taunuuga e Faavavau,” Liahona, Me 2022, 76)

• E faapefea e le malamalama i manaoga o le Tama Faalelagi ma Iesu Keriso ona aafia ai ou lagona e uiga ia i Laua?

• E faapefea e le malamalama i o La manaoga ona tosina ai ou lagona e uiga i le fautuaga La te tuuina mai ia i tatou?

Mafaufau e faaiu i le valaaulia o tamaiti aoga e toe tilotilo i tua ia latou tusiga i le api talaaga mai le amataga o le vasega. Valaaulia i latou e mafaufau loloto i upumoni ua latou aoaoina e uiga i manaoga o le Tama Faalelagi ma Iesu Keriso e mafai ona latou faaopoopo i la latou faamatalaga.

Punaoa Faaopoopo

Mataupu Faavae ma Feagaiga 29:6. Aisea e tatau ai ona tatou lotogatasi ma isi i le tatalo?

Afai e te filifili e faasoa atu lenei vaega i lau vasega, mafaufau a le o le matamata i le vitio pe faasoa atu le aotelega ma le faamatalaga o loo mulimuli mai.

A o asiasi atu i Niu Sila, sa fuafua Spencer W. Kimball ma lona faletua, o Camilla, e auai i se faafiafiaga faaleaganuu na saunia e le toatele o le autalavou. O lena afiafi na mama’i ai le au Kimball ma sa le mafai ona auai. Peitai, e tusa o le taimi na tatau ona amata ai le faafiafiaga, sa o se vavega le lagonaina e le au Kimball o le faasolo ina manuia ma faanatinati atu i le faafiafiaga. Ina ua amata le sauniga, sa valaauina se talavou e faia le tatalo amata.

Sa faasoa mai e Peresitene Russell M. Nelson ia faamatalaga nei o le mea na sosoo ai:

O lea sa ia tatalo ai: “O matou e 3,000 tupulaga talavou i Niu Sila. Ua matou potopoto iinei, ua saunia mo le ono masina e pepese ma sisiva mo Lau perofeta. Sei E faamaloloina o ia ma aumai o ia iinei!” Ina ua uma ona fofogaina le “amene”, sa ulufale atu loa le taavale na aveina atu ai Peresitene ma Sister Kimball i le malaetaalo. Sa vave ona faailoa mai, ma na vave lava ona alalaga tagata uma i le olioli! (Russell M. Nelson, “Iesu Keriso—o le Fomai o Fomai,” Liahona, Nov. 2005, 86)

Mataupu Faavae ma Feagaiga 29:8. O fea le “nofoaga e tasi” e finagalo le Alii ia tatou potopoto ai?

E finagalo le Alii i Lana Au Paia ia faapotopoto i Siona. I le popofou o le Ekalesia, sa saili ai le Au Paia e faatu Siona i nofoaga tutotonu e mafai ona faapotopoto i ai tagata uma. A o faateleina le faitau aofai o tagata o le Ekalesia i le lalolagi atoa, ua talosagaina nei tagata o le Ekalesia e faapotopoto i totonu o a latou aulotu i le lotoifale.

Na aoao mai Peresitene Russell M. Nelson:

O le filifiliga e o mai ia Keriso e le o se itu e faatatau i se nofoaga faaletino; o se itu e faatatau i le naunau o le tagata. E mafai ona “aumaia tagata i le malamalama o le Alii” [3 Nifae 20:13] e aunoa ma le tuua o o latou lava atunuu moni. E moni, i popo fou o le Ekalesia, o le uiga o le liliu mai, o le masii atu foi lea e mau i se isi nuu. Peitai, o le taimi nei, o lea lava ua faapotopoto i atunuu taitasi. Ua poloaiina e le Alii le faatuina o Siona [tagai Mataupu Faavae ma Feagaiga 6:6] i atunuu taitasi ua Ia tuuina atu i Lana Au Paia e fananau mai ai ma avea ma o latou tagatanuu. Ua valoia e tusitusiga paia e faapea, o tagata “o le a faapotopotoina i laueleele o o latou tofi, ma faatutumauina i o latou laueleele uma o le folafolaga” [2 Nifae 9:2]. “O atunuu uma o le nofoaga e faapotopoto ai mo ona lava tagata” [Bruce R. McConkie, i le Conference Report, Mexico City Mexico Area Conference 1972, 45]. O le nofoaga e faapotopoto ai le Au Paia i Pasila, o Pasila; o le nofoaga e faapotopoto i ai le Au Paia o Nigeria, o Nigeria; o le nofoaga e faapotopoto i ai le Au Paia i Korea, o Korea; ma faapena ai lava. O Siona o “e ua loto mama” [Mataupu Faavae ma Feagaiga 97:21]. O Siona o soo se mea lava e i ai le Au Paia amiotonu. Ua i ai nei lomiga, o fesootaiga, ma faapotopotoga ua toetoe ai lava o tagata uma o le ekalesia, ua mafai ona maua aoaoga faavae, o ki, o sauniga, ma faamanuiaga o le talalelei, tusa lava po o fea nofoaga o i ai.

O le saogalemu faaleagaga o le a faalagolago e le aunoa i le pe faapefea ona ola se tagata, e le o le o fea e ola ai. E tutusa aia a le Au Paia i nuu uma mo faamanuiaga a le Alii. (Russell M. Nelson, “O Le Faapotopotoina o Isaraelu ua Faataapeapeina,” Liahona,Nov. 2006, 81)

Gaoioiga Faaopoopo e Aoao Ai

Autu a le autalavou

Valaaulia tamaiti aoga e tauloto pe faitau a latou autu o le Perisitua Arona po o Tamaitai Talavou. Fai atu ia i latou e vaavaai mo upumoni latou te aoaoina e uiga i le Tama Faalelagi, Iesu Keriso, ma i latou lava. Valaaulia i latou e suesue le Mataupu Faavae ma Feagaiga 29:1–8 ma vaavaai mo mea e tutusa ai afioga a le Faaola ma autu a le autalavou. Talanoaina pe mafai faapefea e nei fuaiupu ona fesoasoani ia i latou ia talitonu atoatoa atili ma ola i upumoni o loo maua i autu a le autalavou.

“Folafola atu la’u talalelei”

A o faitau e tamaiti aoga le Mataupu Faavae ma Feagaiga 29:4, faamalamalama atu o le upu talalelei o lona uiga o le “tala fiafia.” Valaaulia tamaiti aoga e filifili se upumoni o le talalelei latou te lagona o le “tala fiafia.” Valaaulia i latou e faasoa mai i le vasega “ma le leo o le olioli” (fuaiupu 4).

O se faananau mo le aiga

Mafaufau e matamata le vitio “Migration: A Yearning for Home” (4:15), o loo maua i le ChurchofJesusChrist.org, i le amataga o le vasega. A uma le vitio, valaaulia tamaiti aoga e mafaufau e maka le fasifuaitau “o lona finagalo agalelei le avatu ia te outou o le malo” i le Mataupu Faavae ma Feagaiga 29:5.

I le vitio, o loo fapea mai ai Elder Dieter F. Uchtdorf, “Ou te talitonu o alii, tamaitai, ma tamaiti uma ua lagonaina le valaau a le lagi i se taimi i lona olaga. Ua tuuina mai e lo tatou Tama oi le Lagi pele ia i tatou le malamalama o Keriso, ma ua uunaia i tatou taitoatasi e se uunaiga faalelagi ia liliu atu o tatou mata ma loto ia te Ia.”

• O a ni auala e valaau mai ai le Tama Faalelagi ia i tatou i ni vaega faapitoa i o tatou olaga?

• Aisea e aapa atu ai o Ia i alii, tamaitai, ma tamaiti uma?

Ona valaaulia lea o tamaiti aoga e faitau le Mataupu Faavae ma Feagaiga 29:1–8 ma vaavaai mo tali i fesili e pei o fesili nei:

• O le a se fesoasoani ua tuuina mai e le Atua ia i tatou mo la tatou malaga e toe foi atu ai i Lona malo?

• O a tiutetauave o ia i tatou e fesoasoani ai i isi i la latou faigamalaga?

“O le faapotopotoina o la’u ’au filifilia”

A o faasoa mai e tagata aoga manaoga o le Atua mo Ana fanau uma, e mafai ona e fesili, “E faapefea e le iloaina o lenei mea e uiga i le Tama Faalelagi ona fesoasoani ia te oe e malamalama ai pe aisea ua Ia valaauina ai i tatou e faapotopoto Isaraelu?” Valaaulia tamaiti aoga e faitau le Mataupu Faavae ma Feagaiga 29:7. Afai latou te lei faia, e mafai ona e valaaulia tamaiti aoga e mafaufau e faailoga le finagalo o le Faaola mo i tatou taitoatasi e fesoasoani i le faapotopotoina. E mafai ona e vaavaai mo auala e mafai ona tatou faataunuuina ai lenei tiutetauave e ala i le suesueina o se lauga o le konafesi talu ai nei e uiga i le faapotopotoina o Isaraelu, galuega faafaifeautalai, po o le galuega o talafaasolopito o aiga.