Lesona 45: Mataupu Faavae ma Feagaiga 29

Mataupu Faavae ma Feagaiga 29:9–29

O Le Afio Mai Faalua o Iesu Keriso

O le Afio Mai Faalua o Iesu Keriso o le a avea ma se aso tele ma le matautia. O i latou o e teena avefeau ma aoaoga a Iesu Keriso o le a mafatia i taunuuga o a latou filifiliga. O i latou o loo taumafai e mulimuli ia te Ia o le a maua le olioli i le vaai atu i lo latou Togiola ua toe foi mai i le lalolagi. O le a Ia laveaiina i latou mai le amioleaga ma le faanoanoa ma mau faatasi ma i latou mo le afe tausaga. O lenei lesona e mafai ona fesoasoani i tamaiti aoga ia lagona le olioli a o latou faatalitali atu i le toe foi mai o Iesu Keriso i le lalolagi.

Gaoioiga E Ono Mafai Ona Aoao Ai

Fefe po o le olioli?

Mafaufau e fa’aali se ata o le Afio Mai Faalua, e pei o le ata i le amataga o lenei lesona. I talaane o le ata, fai se fua mai le 1 i le 10, ma le 1 e faatusa i le “fefe” ma le 10 e faatusa i le “fiafia.” Fai i ni nai tamaiti aoga e tuu se faailoga i luga o le fua e faatusa i o latou manatu i lagona o le toatele o talavou e uiga i le Afio Mai Faalua o le Faaola. Fai i ai e faamalamalama mai a latou faailoga.

Ona mafaufau lea e valaaulia tamaiti aoga e tali filemu fesili nei i a latou api faamaumau mo suesuega.

• O a ni ou lagona pe a e mafaufau e uiga i le Afio Mai Faalua o Iesu Keriso? Aisea?

• Pe a e mafaufau e uiga i le Afio Mai Faalua, e matele ina e taulai atili atu i le Faaola po o faigata e muamua mai i Lona toe foi mai? E faapefea e lau taulaiga ona aafia ai ou lagona?

Faaalu se taimi talafeagai e fesoasoani ai i tamaiti aoga ia malamalama i le anotusi o le parakalafa lenei.

E moni o le a anoanoai tofotofoga ma le amioleaga tele o le a i ai i aso e gata ai ma o le a auina atu “puapuaga ma le faafanoga” i luga o e amioleaga (tagai i le Mataupu Faavae ma Feagaiga 29:8). E taua foi le iloa o le toe afio mai o le Faaola e le pogai ai tofotofoga ma le amioleaga. O Lona toe foi mai o le a laveaiina ai Ona soo mai tofotofoga ma le amioleaga. O le Afio Mai Faalua o le a sili atu ona matagofie mo Ona soo nai lo le mea e mafai ona tatou mafaufauina! A o e suesue i le aso, vaavaai mo mafuaaga e mafai ai e e faamaoni ona lagona le olioli ma le faamoemoe pe a latou mafaufau e uiga i le toe foi mai o Iesu Keriso.

Olioli i le afio mai o Keriso!

Faitau le Mataupu Faavae ma Feagaiga 29:10–13, ma vaavaai mo upu ma fuaitau e tuuina atu ai ia te oe mafuaaga e olioli ai.

O leMataupu Faavae ma Feagaiga 29:10–11 o se fuaitau o le atamai i aoaoga faavae. Mafaufau e valaaulia tamaiti aoga e faailoga ia fuaitau o le atamai i aoaoga faavae i se auala iloga ina ia faigofie ona latou mauaina.

Valaaulia tamaiti aoga e fai se lisi i luga o le laupapa o upu ma fasifuaitau na latou mauaina. Fesili i ni nai tamaiti aoga pe aisea ua fesoasoani ai mea na latou maua e olioli ai.

A o latou faasoa mai, e mafai ona e fesoasoani ia i latou e faapatino mea na latou maua e ala i le fai atu o fesili tulitatao e pei o nei:

• E mafai faapefea ona faamafanafanaina oe i le iloa pe a afio mai Iesu, o le a i ai faatasi ma le “mana ma le mamalu tele”? (fuaiupu 11).

• E faapefea ona e vaai faalemafaufau i le ese o lou olaga i aso uma pe a afio Keriso “i le amiotonu faatasi ma tagata”? (fuaiupu 11).

• O ai o e pele ia te oe ua maliliu ua sili ona e fiafia e vaai i ai pe a toe faatutu mai e le Faaola e amiotonu i Lona afio mai? (Tagai i le fuaiupu 13.)

• O le a le uiga ia te oe o le “faatasi ma [Keriso], ina ia tasi i tatou”? (fuaiupu 13). Aisea e te manatu ai e manao Iesu ia tasi ma oe?

E mafai ona e fautuaina tamaiti aoga e faailoga le fasifuaitau autu o le mau i le fuaiupu 11: “O le a ou faaali atu a’u lava mai le lagi i le mana ma le mamalu tele … ma mau faatasi ma tagata i le amiotonu i le lalolagi i le afe o tausaga.”

O le vaega o totoe o lenei lesona o loo taulai atu i tulaga matagofie o le a faamanuia ai e le Faaola e amiotonu i le taimi ma le mavae ai o Lona toe afio mai.

A o lei amataina, atonu e te manao e fesoasoani i tamaiti aoga ia malamalama i le fasifuaitau mulimuli o le fuaiupu 11, “e le tutu e amioleaga.” E mafai e tamaiti aoga ona faitau fuaiupu 9, 15, ma le17 e vaai ai i taunuuga o le a puapuagatia ai i latou o e teena Keriso. Afai e te suesueina nei fuaiupu i le vasega, faamanatu i le tamaiti aoga o loo popole i tagata e pele ia i latou o le finagalo ma le mana o le Faaola o le faamagalo atu ma faamalolo i latou uma o e salamo ma o mai ia te Ia.

(Manatua: O lesona i le Mataupu Faavae ma Feagaiga 45 o le a taulai faapitoa atu i faailoga o taimi ma sauniuniga faaletagata lava ia mo le Afio Mai Faalua o Keriso.)

O le a nofo faatasi Keriso ma tagata i le afe tausaga

Valaaulia tamaiti aoga e faasoa mai mea ua latou iloa e uiga i tulaga i le lalolagi i le taimi ma le mulimuli ane i le nofotupu ai o Iesu Keriso i le meleniuma. E mafai foi ona e valaaulia i latou e faasoa mai ni a latou fesili o i ai e faatatau i ai.

Faaalu ni nai minute e saili ai punaoa mamana ua atofaina mo tali i fesili atonu o ia te oe e uiga i le Meleniuma ma mo tulaga fiafia o le a i ai i le taimi ma le mavae ai o le nofotupu o Keriso i le meleniuma. O mea nei e mafai ona fesoasoani i lau suesuega:

Mafaufau e tuu tamaiti aoga i ni vaega toalaiti faatasi ma vaega taitasi e suesue se tasi o punavai nei. Ona valaaulia lea o vaega taitasi e tuuina mai mea sa latou aoaoina i le vasega, pe valaaulia tagata aoga e fai ni vaega fou faatasi ma tamaiti aoga o e sa suesue i punavai eseese ma feauaua’i i le faasoaina atu o mea sa latou aoaoina.

Taiala i Tusitusiga Paia, “Meleniuma,” scriptures.ChurchofJesusChrist.org

Autu o leTalalelei, “Meleniuma,” topics.ChurchofJesusChrist.org

Mataupu Faavae ma Feagaiga 29:23–27

Isaia 65:19–25

Faaaliga 20:1–3

1 Nifae 22:24–28

Ina ia fesoasoani i tamaiti aoga e vaai manino i mafuaaga e olioli ai i tulaga pe a mavae le toe afio mai o le Faaola, e mafai ona e faaiuina le vaega lenei o le lesona i le faasoa atu o le saunoaga a Elder D. Todd Christofferson i le vaega o le “Punaoa Faaopoopo”.

Taulai atu i le Faaola

Ina ia fesoasoani i tamait aoga e vaai faalemafaufau i le Faaola alofa o afio ifo mai le lagi, mafaufau e faaali le vitio “Jesus Christ Appears in the Ancient Americas,” o loo maua i le ChurchofJesusChrist.org, mai le faailotaimi 11:20 i le 16:31. Valaaulia i latou e vaavaai mo mea e tutusa ai le alofa na faaalia i le asiasiga a le Faaola i tagata sa Nifaē ma mea latou te manatu o le a tutupu pe a toe afio mai o Ia.

Mafaufau e moeiini ou mata ma taumafai e vaai faalemafaufau ia Iesu Keriso o afio mai le lagi e laveai, puipuia, ma faamalolo i Ona soo. Gauai atu i uunaiga mai le Agaga Paia e aoao ai i ou lagona e uiga i le toe foi mai o Lona Alo.

• O le a se faaupuga o e vaai faalemafaufau i ai i Ona fofoga a o Ia silasila atu ia i latou o e sa taumafai e mulimuli ia te Ia?

• O le a sou manatu i le mea e fetalai atu ai i e faamaoni ina ua mavae Lona afio ifo i lalo?

• O le a sou manatu i le finagalo o le Faaola ia lagona e Ona soo e uiga i Lona toe foi mai i le lalolagi?

Mafaufau e faasoa atu ou lava lagona a o e faatali fiafia atu i le toe afio mai o Iesu Keriso i le lalolagi. Atonu e te manao e faauma le vasega i se viiga faaiu lea e tautala i le olioli o le afio mai o Keriso ma Lana nofotupu i le meleniuma, e pei o le “O Le Agaga o le Atua”(Viiga, nu. 2), “Ia Fiafia Tatou” (Viiga, nu. 3), po oLe Lalolagi ia Fiafia” (Viiga, nu. 113).

Tauloto

Atonu e te manao foi e fesoasoani i tamait aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma toefaamanatu i lesona i le lumanai. O le fasifuaitau autu o tusitusiga paia o le “O le a ou faaali atu au lava mai le lagi i le mana ma le mamalu tele … ma mau faatasi ma tagata i le amiotonu i luga o le lalolagi i le afe o tausaga.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toefaamanatu o le Atamai i Aoaoga Faavae.”

Punaoa Faaopoopo

Aisea e tatau ai ona tatou patipatia le toe afio mai o Iesu Keriso?

Na saunoa mai Elder D. Todd Christofferson o le Korama a Aposetolo e Toasefululua:

Pe a afio mai o Ia, o faiga saua ma le lē tonu e lē gata o le a faaitiitia; ae o le a faamutaina. …

E lē gata o le a faaitiitia le mativa ma mafatiaga; ae o le a mouese atu. …

E oo lava i le tiga ma le faanoanoa o le oti o le a lē toe i ai. …

… Ia tatou tuuto atili atu i tatou lava ma le filiga i sauniuniga e manaomia mo le aso e iu atoa ai le tiga ma le leaga. (D. Todd Christofferson, “Saunia mo le Toe Afio Mai o le Alii,” Liahona, Me 2019, 81)

Pe o le a tumau ea Iesu i le lalolagi i le taimi atoa o le Meleniuma?

Na faamalamalama mai e le Perofeta o Iosefa Samita (1805–44):

E faapea, o Iesu o le a nofomau i le lalolagi i le afe [tausaga] faatasi ma le Au Paia e le o le tulaga lea, ae o le a nofotupu i le Au Paia ma afio mai i lalo ma aoao. (Aoaoga a Peresitene o le Ekalesia: Iosefa Samita [2007], 258)

Pe o le a puipuia ea e amiotonu mai tofotofoga e muamua mai i le Afio Mai Faalua?

E leai se tali faigofie se tasi i lenei fesili. O le a puipuia e le Alii e faamaoni mai nisi o faamasinoga o le a oo mai, ae o isi tulaga o le a aafia ai e amiotonu ma e amioleaga. E taua le manatua e ui lava i soo se tofotofoga tatou te feagai, o le a laveaiina e le Atua e amiotonu i Lona malo.

Sa aoao mai le Perofeta o Iosefa Samita (1805–44):

“E tusa ai ma le afio mai o le Atalii o le Tagata …; o se manatu sese e faapea o le Au Paia o le a sosola ese mai faamasinoga uma, ae o e amioleaga o le a tigaina; aua o tino uma ua i ai ina ia tigaina, ma o e amiotonu o le a faigata ona sosola ese [tagai i le Mataupu Faavae ma Feagaiga 63:34]; ae o le toatele o le Au Paia o le a sosola, aua o e amiotonu e tatau ona ola i le faatuatua [tagai i le Sapakuka 2:4]; a peitai o le toatele o e amiotonu o le a pauu atu i tulaga o faamai, ma faamai pipisi, ma isi, e mafua ona o le vaivai o le tino, ae peitai e faasaoina i le Malo o le Atua. (Aoaoga a Peresitene o le Ekalesia: Iosefa Samita [2007], 253)

Na aoao mai Elder Spencer V. Jones o le Fitugafulu:

O le toatele o i tatou e popole e uiga i le Afio Mai Faalua. I le mafaufau ai “i le aso tele ma le matautia o le Alii” (MF&F 2:1), atonu tatou te maua se lagona e le amanaia ai le “tele” ae faamamafa le “matautia.”

O nisi o valoaga e mafai ona foliga lofituina. …

O nisi o valoaga e fai lava si matautia, e pei o [le tasi i le Mataupu Faavae ma Feagaiga 29:18–20]. …

E pei o le matautia e pei ona faaleo mai e nei valoaga, tatou vaai iai i se auala malamalama. O nei tulaga fefe o loo i ai se fasifuaitau agavaa e ta’u mai ai ua faamoemoeina i latou e le mo e amiotonu ae mo e amioleaga ma e le salamo. (Spencer V. Jones, “Messages from the Doctrine and Covenants: Finding Hope in the Second Coming,” Ensign, Iuni 2005, 58–59)

Mataupu Faavae ma Feagaiga 29:11. O ai “au uma” o le a o ifo faatasi ma Keriso i Lona Afio Mai Faalua?

O ‘au o e o le a o mai faatasi ma le Faaola i le mamalu i Lona Afio Mai Faalua, o le a aofia ai Au Paia faamaoni o e sa soifua i vaitau uma o taimi i le talafaasolopito o le lalolagi. O e amiotonu o e ua maliliu o le a toetutu, ma o i latou, faatasi ai ma e amiotonu o loo ola pea i le lalolagi, o le a “segia i luga e fetaia’i ma ia” ma “o le a o ifo faatasi ma ia” (tagai Mataupu Faavae ma Feagaiga 88:95–98).

Gaoioiga Faaopoopo e Aoao Ai

Ata Faataitai

Mafaufau e amata le vasega i se ata faataitai e uiga i se talavou amiotonu o loo popole e uiga i le Afio Mai Faalua. Valaaulia tamaiti aoga e faasoa mai pe aisea e ono faapena ai lagona o le talavou i le ata faataitai. Ona valaaulia lea o tamaiti aoga e mafaufau loloto pe o le a so latou manatu pe o le a faapefea ona finagalo le Faaola i Ona soo ia lagona e uiga i Lona toe foi mai a o latou suesueina le lesona i le aso.

I le faaiuga o le lesona, valaaulia tagatatamaiti aoga e tusi se tali i le autalavou i le ata faataitai e faamatala ai mafuaaga e lagona ai le olioli a o tatou faamoemoe i le afio mai o Keriso.

E mafai ona e faaaoga se tasi o faataitaiga o se ata faataitai lea:

I le faaiuga o se vasega seminare, sa faasilasila atu ai e le faiaoga e tatau ona fiafia tamaiti aoga ona o le a latou suesue i le Afio Mai Faalua o Iesu Keriso i le isi a latou lesona. A o tuua e Peteru le fale, na fai mai lana uo o Christopher, “Ou te manatu o le a ou ma’i pepelo taeao. O lesona e uiga i le Afio Mai Faalua e ese mamafa lava ia te au!”

Vaaiga e faavavau

Mafaufau e valaaulia tamaiti aoga e faataitai ona vaai i le Afio Mai Faalua o Iesu Keriso mai se vaaiga e faavavau. Ina ia faia lenei mea, e mafai e le vasega ona faailoa mai nisi o manatu ma le le malamalama e ono mafua ai ona lagona e se soo amiotonu o Keriso le fefe i le Afio Mai Faalua. Ona mafai lea ona latou faataitai le toe faaupuina o na mafaufauga ma lē malamalama i upumoni latou te iloa e uiga i le Tama Faalelagi, Iesu Keriso, ma le ata o le faaolataga. (Afai e manaomia, e mafai e tamaiti aoga ona toefaamanatu le parakalafa 8 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae [2023] e faamanatu ai ia i latou i lenei mataupu faavae.)

Ata o le Afio Mai Faalua

Mafaufau e valaaulia tamaiti aoga e faaali pe faamatala se tasi o ata e sili ona latou fiafia i ai o le Afio Mai Faalua o Iesu Keriso. Fai atu ia i latou e faasoa mai mea ua aoao atu e le ata ia i latou e uiga i le Faaola, e uiga i lena aso, pe aisea e taua ai le tapena mo lena mea.

Mafaufau e faaali atu le ata i le amataga o lenei lesona. Valaaulia tamaiti aoga e faitau le Mataupu Faavae ma Feagaiga 29:10–11, 27–28, ma vaavaai mo upu ma fasifuaitau latou te vaai ai i totonu o le ata. E tusa ai ma nei fuaiupu ma luga o le atavali, e faapefea ona lagona e e amiotonu a o latou faatalitalia le Afio Mai Faalua o Iesu Keriso?

“O ona ‘au uma”

Ina ia fesoasoani i tamaiti aoga ia lagona le olioli ma le fiafia mo le Afio Mai Faalua, mafaufau e faaali atu se ata e pei o lea o loo i lalo o loo faaalia ai agelu o loo o mai faatasi ma le Faaola. Fai atu i tamaiti aoga e sue le fasifuaitau i le Mataupu Faavae ma Feagaiga 29:11 o loo faamatala mai ai agelu i le ata. Faasoa atu le faamatalaga i le vaega o “Punaoa Faaopoopo” e uiga i ‘au uma o le a o mai faatasi ma Keriso. Fesili i tagata aoga po o ai latou te vaai faalemafaufau i ai faatasi ma na ‘au. E mafai ona o mai tamaiti aoga i le laupapa ma, tusi faataamilo i le ata, igoa o tagata e mafai ona i ai faatasi ma na au. O faataitaiga e aofia ai Aperaamo, Ruta, Nifae, Maria, ma isi. E mafai foi ona latou faaopoopo i ai igoa o e amiotonu e pele ia i latou.

Viiga

E mafai e tamaiti aoga ona suesue i le tusipese mo autu “Meleniuma” ma le “Iesu Keriso—Afio Mai Faalua” mo laina e aumaia ai ia i tatou le mafuaaga e olioli ai i le toe afio mai o le Faaola. Atonu e filifili le vasega e usu ni nai fuaiupu mai viiga talafeagai.