Lesona 59: Mataupu Faavae ma Feagaiga 45

Mataupu Faavae ma Feagaiga 45:9–75, Vaega 1

Faailoga e Faatomua i le Afio Mai Faalua o Iesu Keriso

O faailoga ua siomia ai i tatou o loo molimau mai ua latalata mai le Afio Mai Faalua o le Faaola. O nisi faailoga e mataina, a o isi e faataumaoia. O lenei lesona ua faamoemoe e fesoasoani i tamaiti aoga ia malamalama atili i le ala e mafai ai ona tatou maua le filemu a o tatou matauina faailoga o le a tomua mai i le Afio Mai Faalua o le Faaola.

Gaoioiga E Ono Mafai Ona Aoao Ai

A o e saunia ma aoao atu lenei lesona, ia manatua o le “Mataupu Faavae ma Feagaiga 45:9–75, Vaega 2” o le a taulai atu i le saunia mo le Afio Mai Faalua. O le a faamamafa ai le tutu i nofoaga paia ma avea le Agaga ma o tatou taiala (tagai fuaiupu 32, 57).

Faailoga

Valaaulia tamaiti aoga e mafaufau i se nofoaga lauiloa e fiafia aiga i la outou eria e asiasi i ai. Fai atu i se volenitia e tusi se faatusa o lena nofoaga i le tasi itu o le laupapa. Fai atu i se isi volenitia e tusi se faatusa o lou nofoaga o le seminare i le isi itu o le laupapa. Valaaulia tamaiti aoga e mafaufau pe faapefea ona latou faatonuina se tasi e le masani i le eria e sau mai le nofoaga o le seminare i le nofoaga lauiloa. Fai atu ia i latou e o mai i le laupapa ma tusi se ata pe lisi ni faailoga faapitoa e mafai e le tagata ona vaavaai i ai a o latou agai atu i le taunuuga.

Ta’u i ai o faailoga uma e iloa e le tagata i luga o le ala o le a latou maua ai se talitonuga mautinoa sili atu o loo latou latalata atili atu i le taunuuga.

• E faapefea ona pei nei faailo o faailoga o le a muamua mai i le Afio Mai Faalua o le Faaola?

  E mafai ona e suia le nofoaga o le seminare i luga o le laupapa i upu “O o tatou aso” ma sui le nofoaga lauiloa i le “O Le Afio Mai Faalua” (pe faaali atu se ata o le Afio Mai Faalua).

  Valaaulia tamaiti aoga e lisi i luga o le laupapa faailoga o le Afio Mai Faalua o le Faaola o loo latou iloa. Faamanatu atu ia i latou e aua nei popole e uiga i le faasologa o faailoga talu ai e lei faaalia atoatoa mai.

• O a ni ou lagona pe a mafaufau i faailoga o le Afio Mai Faalua?

• Aisea e te manatu ai e finagalo le Faaola ia tatou iloa nei faailoga?

A o e suesue i le asō, mafaufau pe mafai faapefea e le iloaina o faailoga o le Afio Mai Faalua o le Faaola ona aumaia le filemu ma le faamoemoe i lou olaga.

Faailoga o taimi

O le tele o le Mataupu Faavae ma Feagaiga 45 o loo faaata mai ai le lauga faaperofeta a le Faaola na tuuina mai e tali ai fesili a Ona soo e uiga i faailoga o le Afio Mai Faalua (tagai Mataio 24; Iosefa Samita—Mataio 1).

Ina ia fesoasoani i tamaiti aoga ia malamalama i nisi o faailoga na aoao mai e le Faaola i le vaega 45, mafaufau e faaali atu le gaoioiga faafetaui lenei pe tufa atu kopi. E mafai ona e valaaulia tamaiti aoga e galulue taitoatasi, i paga, pe i ni vaega toalaiti e faafetaui fuaitau i faailoga o loo latou faamatalaina.

Tali: 1-U, 2-I, 3-E, 4-F, 5-O, 6-A

O Faailoga o le Afio Mai Faalua o le Faaola		O Faailoga o le Afio Mai Faalua o le Faaola
O Faailoga o le Afio Mai Faalua o le Faaola Mataupu Faavae ma Feagaiga 45:24–25	O Faailoga o le Afio Mai Faalua o le Faaola O le a faaali mai e Iesu o Ia lava o le Alo o le Atua i tagata Iutaia i luga o le Mauga o Olive.
O Faailoga o le Afio Mai Faalua o le Faaola Mataupu Faavae ma Feagaiga 45:26–27	O Faailoga o le Afio Mai Faalua o le Faaola O le a toefuatai mai le talalelei ma aumaia le malamalama i le lalolagi.
O Faailoga o le Afio Mai Faalua o le Faaola Mataupu Faavae ma Feagaiga 45:28–29	O Faailoga o le Afio Mai Faalua o le Faaola O le a tele taua, feitagai, ma le amioletonu.
O Faailoga o le Afio Mai Faalua o le Faaola Mataupu Faavae ma Feagaiga 45:31–33	O Faailoga o le Afio Mai Faalua o le Faaola O faailoga ma mea ofoofogia o le a vaaia i le lagi ma i le lalolagi.
O Faailoga o le Afio Mai Faalua o le Faaola Mataupu Faavae ma Feagaiga 45:40–42	O Faailoga o le Afio Mai Faalua o le Faaola O le a faataapeapeina ma faapotopotoina Isaraelu.
O Faailoga o le Afio Mai Faalua o le Faaola Mataupu Faavae ma Feagaiga 45:48–53	O Faailoga o le Afio Mai Faalua o le Faaola O le a i ai faama’i ma mafui’e i le laueleele. O e amioleaga o le a faamaaa o latou loto i le Atua, ae o soo o le a tutu i nofoaga paia.

Ia faaeteete i le faaaluina o le tele o le taimi e talanoa ai e uiga i faailoga po o le taumatemate o o latou uiga po o le faataunuuga. E tele mea e lei faaalia mai lava, ma o le a le molimau mai le Agaga Paia i ni faauigaga sese.

• O fea o nei mea e te lagona e pei o loo tatou vaaia i le asō?

• Aisea e te manatu ai e finagalo le Faaola ia tatou iloa uma faailoga o le faamoemoe ma le popole?

• E mafai faapefea e le iloaina na silafia e Iesu nei faamatalaga e uiga i o tatou aso ona faateleina ai lou faatuatua ia te Ia?

E mafai faapefea ona tatou tali atu i faailoga o le Afio Mai Faalua?

Faitau le Mataupu Faavae ma Feagaiga 45:35 ma Iosefa Samita—Mataio 1:23, 39, ma vaavaai mo mea e finagalo le Faaola i Ona soo ia malamalama ma lagona e uiga i faailoga o Lona afio mai.

• O le a se mea sa e mauaina?

  Afai e manaomia, fesoasoani i tamaiti aoga e faailoa mai le upu moni e faapea a tatou vaai i faailoga o le faataunuuina o le Afio Mai Faalua o le Faaola, e mafai ona tatou iloa ua faataunuuina Ana folafolaga ia i tatou.

• E mafai faapefea e le malamalama i lena upu moni ona fesoasoani ia i tatou ia aua nei atuatuvale i faailoga e muamua mai i le Afio Mai Faalua?

Na aoao mai Elder Dieter F. Uchtdorf o le Korama a Aposetolo e Toasefululua:

Uso ma tuafafine, ua poloaiina i tatou e suesue le afioga a le Atua ma usitai i le siufofoga o le Agaga, ina ia mafai ona tatou “iloa faailoga o taimi, ma faailoga o le afio mai o le Atalii o le Tagata” [Mataupu Faavae ma Feagaiga 68:11].

O le mea lea, e le faapea ua tatou le iloaina luitau o le lalolagi, pe ua tatou le iloa foi faigata o o tatou taimi. Ae e le faapea la e tatau ai ona tatou faamamafatuina i tatou lava po o isi i avega o le fefe faifai pea. Ae nai lo le nopiai ai lava i le loloto o o tatou luitau, e le sili ea le taulai atu i le mana lemafuatia sili, lelei ma atoatoa o lo tatou Atua, faalagolago ia te Ia, ma saunia faatasi ma se loto fiafia mo le toe afio mai o Iesu le Keriso?

I le avea ai ma Ona nuu o le feagaiga, e le manaomia ona faagaseina i tatou e le fefe ona o mea leaga e ono tutupu. Ae, e mafai ona tatou agai i luma i le faatuatua, lototele, naunautai, ma le faalagolago i le Atua a o tatou latalata atu i luitau ma avanoa o i luma atu. (Dieter F. Uchtdorf, “O Le Alofa Atoatoa e Faateaeseina ai le Fefe,” Liahona, Me 2017, 106)

• O le a se mea na tumatila ia te oe mai lenei faamatalaga?

• Faatasi ai ma le gaogaosa uma o loo tupu ma o le a tupu i le lalolagi, o le a se faamaoniga ua e vaaia o loo pulea e Iesu Keriso?

Faitau le faataoto na aoao mai e le Faaola i le Mataupu Faavae ma Feagaiga 45:36–38. Mafaufau pe mafai faapefea e lau o se laau ona fesoasoani ia i tatou e iloa ai po o le a le mamao o le taumafanafana.

Nai lo le faitauina o le faataoto, e mafai ona e faaali atu le vitio “Be Not Troubled” (5:14), o loo maua i le ChurchofJesusChrist.org.

• E faapefea ona pei lau o le laau i lenei faataoto o faailoga o taimi na tuuina mai e le Faaola ia i tatou?

• E mafai faapefea e lenei faataoto ona fesoasoani ia i latou o e ola i aso e gata ai ina ia aua le atuatuvale?

Ina ia fesoasoani i tamaiti aoga e faaalia lo latou malamalama i le mataupu faavae o loo talanoaina i lenei lesona, mafaufau e faaali atu le ata faataitai lenei ma valaaulia i latou e tali mai. I se isi itu, e mafai ona e valaaulia i latou e tuuina atu ni faamatalaga mo le ata faataitai, e pei o le igoa o le uo ma mea patino e tutupu a o lei oo i le Afio Mai Faalua o le Faaola, e toatele tagata talavou o loo popole i ai.

Vaai faalemafaufau e faapea ua iloa e se uo ia faailoga faigata o le a muamua mai i le Afio Mai Faalua o le Faaola. Ona o mafuie talu ai nei na lata ane, ua ia lagona ai o nisi o nei faailoga ua uma ona tutupu ma ua faapopoleina i mea o le a oo mai. E popole o ia pe faapefea e nei mea o le a tutupu ona aafia ai lona lumanai.

Valaaulia tamaiti aoga e tusi ni fautuaga i lenei uo i a latou api talaaga e faavae i mea ua latou aoaoina i le aso. E mafai ona fesoasoani atu ia fesili nei i le tusiga o uunaiga.

I se isi itu, e mafai e tamaiti aoga ona talanoaina tali i le ata faataitai i ni paga po o ni vaega toalaiti.

• O le a se mau e mafai ona fesoasoani i lau uo ia malamalama atili ai i le agalelei o le Faaola ma mea na tutupu a o lumanai Lona afio mai?

  O le a fesoasoani le faaali atu o le saunoaga a Elder Uchtdorf mai le amataga o le lesona a o tali mai tamaiti aoga i le fesili lenei.

• O a ni malamalamaaga mai le saunoaga a Elder Uchtdorf e mafai ona fesoasoani i lau uo? Aisea?

• E mafai faapefea e le taumafai e vaai i faailoga mai se vaaiga e faavavau ona fesoasoani ia te ia?

E mafai ona e faaiu i le valaaulia o tamaiti aoga e faasoa mai le faamoemoe latou te lagonaina e uiga i le Afio Mai Faalua o Iesu Keriso.

Punaoa Faaopoopo

O le a se mea e tatau ona tatou tulimatai atu i ai i le va o le taimi nei ma le Afio Mai Faalua o le Faaola?

Na faasoa mai Peresitene Russell M. Nelson:

O le lagonaina o le alofa [Tama Faalelagi ma Iesu Keriso] e taua, ona e foliga mai tatou te feagai ma lu’itau i aso uma ma talafou faapopole tagata. Atonu ua e oo i ni aso na e moomoo ai na o le fai lava o le ofumoe, moe faapupuu, ma fai i se tasi e fafagu oe i luga pe a mavae atu uma faigata ma tofotofoga.

Ae, o’u uso e ma tuafafine pele, e anoanoa’i mea matagofie o loo i luma atu. I aso a sau, o le a tatou vaai ai i le faailoaga silisili o le mana o le Faaola e le’i vaai muamua lava i ai le lalolagi. I le va o le taimi nei ma le taimi e toe fo’i mai ai o Ia “faatasi ma le mana ma le mamalu silisili” [Iosefa Samita—Mataio 1:36], O le a ia faae’e mai avanoa e le mafaitaulia, faamanuiaga, ma vavega i luga o e faamaoni. (Russell M. Nelson, “Manumalo i le Lalolagi ma Maua le Malologa,” Liahona, Nov. 2022, 95)

Ua aoao mai Elder Neil L. Andersen o le Korama a Aposetolo e Toasefululua:

E leai se mea e faaosofia ai lo’u manao e tautala e uiga ia Keriso nai lo le vaai atu faalemafaufau i Lona toe afio mai. …

Pe mafai ona tatou vaai faalemafaufau ua aveina a’e i tatou e faafetaiai o Ia, a le o i le itu lenei, po o le isi itu o le veli? O Lana folafolaga lena i e amiotonu. O lenei aafiaga ofoofogia o le a faailoga ai o tatou agaga e faavavau. (Neil L. Andersen, “Ua Matou Tautalatala e uiga ia Keriso,” Liahona, Nov. 2020, 91)

E mafai faapefea ona tatou vaai i le luitau o le ola ai i aso e gata ai ma se vaaiga e faavavau?

Sa faia e Elder Dieter F. Uchtdorf le maitauga lenei e uiga i le ola ai i aso e gata ai:

O se tasi o auala e manao Satani tatou te faaseseina ai isi o le nopia’i ai pea ma le soona faamamafaina o mea leaga i le lalolagi.

E mautinoa lava o loo i ai pea le lalolagi ma o le a faaauau pea ona i ai le le atoatoa. Ua anoanoai tele tagata ta’umamaina e mafatia ona o tulaga o le natura faapea ai foi mai uiga le mafaufau o tagata. O mea piopio ma le amioleaga i o tatou aso ua tulagaese ma taufaamata’u.

Ae e ui i nei mea uma, ou te le faafesuia’ia le ola ai i lenei taimi ma se isi lava taimi i le talafaasolopito o le lalolagi. Ua faamanuiaina i tatou ma le le mafuatiaina e ola i se taimi o le manuia, malamalama, ma avanoa lemafaatusalia. Ae o le mea sili o mea uma, ua faamanuiaina i tatou i le mauaina o le atoaga o le talalelei a Iesu Keriso, lea ua tatou maua ai se vaaiga tupito i tulaga lamatia o le lalolagi ma faaali mai ia i tatou le auala e aloese ai pe taulimaina ai foi.

A ou mafaufau i nei faamanuiaga, ou te fia faapa’u i o’u tulivae ma ofo atu viiga i lo tatou Tama Faalelagi mo Lona alofa le muta mo Ana fanau uma. (Dieter F. Uchtdorf, “O Le Alofa Atoatoa e Faateaeseina ai le Fefe,” Liahona, Me 2017, 105–6)

Mataupu Faavae ma Feagaiga 45:25, 28, 30. O a “taimi o Nuuese”?

Afai e aoga, e mafai ona e faamalamalama atu e faapea “o taimi o Nuuese” e faasino i le vaitau e amata i le Toefuataiga (Mataupu Faavae ma Feagaiga 45:28), pe a maua e Nuuese (e le o ni Iutaia) le avanoa e talia ai le talalelei a Iesu Keriso. O le a faaiuina lenei taimi i le tupulaga pe a “liliu ese o latou loto mai [le Alii] ona o mataupu a tagata” (Mataupu Faavae ma Feagaiga 45:29–30).

Gaoioiga Faaopoopo e Aoao Ai

Sailiina o le olioli a o tatou ola ai i aso e gata ai

E mafai ona e faaiuina le lesona e ala i le uunaia o tamaiti aoga ia maua le olioli i le lotolotoi o puapuaga o aso e gata ai. E mafai ona e faasoa atu lenei saunoaga mai ia Russell M. Nelson:

“O le a i ai ni ou aso o le a e matuai lotovaivai ai lava. O lea ia tatalo ai mo le malosi ia aua le fiu! O le mea e faanoanoa ai, o nisi na e manatu o ni au uo o le a faalataina oe. Ma o nisi o mea o le a foliga mai lava e le talafeagai.

“Ae peitai, ou te folafola atu ia te oe ao e mulimuli ia Iesu Keriso, o le a e maua le filemu tumau ma le olioli moni. A e tausia au feagaiga ma le faateleina o le maelega, ma ao e puipuia le Ekalesia ma le malo o le Atua i le lalolagi i le aso, o le a faamanuiaina oe e le Atua i le malosi ma le atamai e faataunuu ai mea na o tagata o le Ekalesia a Iesu Keriso o le Au Paia o Aso e Gata Ai e mafaia.” (Russell M. Nelson, “O Le Lumanai o le Ekalesia: Sauniaina o le Lalolagi mo le Afio Faalua Mai o le Faaola,” Ensign, Ape. 2020, 17)

E mafai ona e valaaulia tamaiti aoga e faasoa mai pe na faapefea ona latou lagonaina le filemu ma le olioli o le mulimuli ia Iesu Keriso i taimi faigata.

O se isi auala e amata ai le lesona

Mafaufau e amata lenei lesona e ala i le faaali atu o ata eseese e tolu o laau: tasi e i ai lanu o le tautoulu, tasi e i ai le kiona ma leai ni laulaau, ma le tasi e i ai laulaau ua amata ona tulioso. E mafai e tamaiti aoga ona faasoa mai pe o le a le mamao o le taumafanafana i ata taitasi. Ona mafai lea ona e faitauina le Mataupu Faavae ma Feagaiga 45:36–38, ma faatusatusa le faataoto a le Faaola i faailoga a o lumanai Lona Afio Mai Faalua. E mafai ona e tusia se laau e leai ni lala i luga o le laupapa ma faaopoopo se lau mo faailoga taitasi e iloa e tamaiti aoga i le taimi o le lesona, tusi le faailoga i le lau.