Lesona 60: Mataupu Faavae ma Feagaiga 45

Mataupu Faavae ma Feagaiga 45:9–75, Vaega 2

Saunia mo le Afio Mai Faalua

O le a toe afio mai Iesu Keriso i le lalolagi “ua faaofuina i le mana ma le mamalu tele” e faataunuu ai folafolaga na Ia faia (Mataupu Faavae ma Feagaiga 45:44; tagai foi fuaiupu 16). I le Mataupu Faavae ma Feagaiga 45, o loo aoao mai ai ma le alofa e le Faaola le ala e mafai ai ona tatou saunia mo Lona Afio Mai Faalua. O le faamoemoega o lenei lesona o le fesoasoani lea i tamaiti aoga e saunia mo le Afio Mai Faalua o Iesu Keriso.

Gaoioiga E Ono Mafai Ona Aoao Ai

Saunia mo mea taua e tutupu

Mafaufau e tusi i luga o le laupapa (po o le faaali atu o ata o) ni nai mea na tutupu e manaomia ai sauniuniga o au tamaiti aoga pe o le a auai ai. O faataitaiga e mafai ona aofia ai suega a le aoga, faauuga, se misiona talai, po o se taaloga. Fesili atu i tamaiti aoga po o le a se mea e tutusa ai nei mea e tutupu.

Mafaufau i mea e tutupu, galuega, po o tiutetauave i lou olaga e manaomia ai sauniuniga. A o e faia, mafaufau i se aafiaga ina ua e lei saunia ma se aafiaga i se taimi na e saunia ai.

• Na faapefea e le tulaga o lau tapenapenaga ona aafia ai ou lagona a o faalatalata atu le gaoioiga? Na faapefea ona aafia ai le taunuuga?

O le Afio Mai Faalua o Iesu Keriso o le a avea ma se mea e tupu e le pei o soo se mea ua tatou oo i ai. O la tatou sauniuniga mo lena mea e tupu e mafai ona iloa ai o tatou lagona a o tatou faamoemoe i Lona toe foi mai, ma o le a fuafua ai le aafiaga o le a tatou maua pe a toe afio mai o Ia.

Mafaufau e valaaulia tamaiti aoga e talanoa fesili nei e lua i ni paga pe i ni vaega toalaiti. (E mafai ona e faamanatu atu ia i latou faailoga sa latou suesueina i le “Mataupu Faavae ma Feagaiga 45:9–75, Vaega 1.”)

• O le a se mea ua e iloa e uiga i mea o le a tutupu e muamua mai i le Afio Mai Faalua o le Faaola?

• Mai mea ua e iloa e uiga i Lona Afio Mai Faalua, aisea o le a e manao e te sauniuni i ai?

A o e faitauina pe faitau e se volenitia le fuaiupu ma le faamatalaga lenei, tuu atu i tamaiti aoga e moeiini o latou mata ma vaaifaalemafaufau pe o le a faape’i le toe afio mai o le Faaola.

Faitau le Mataupu Faavae ma Feagaiga 45:44 ma le saunoaga lenei a Elder Neil L. Andersen o le Korama a Aposetolo e Toasefululua, ma vaavaai pe o le a faape’i le Afio Mai Faalua o le Faaola.

E leai se mea e faaosofia ai lo’u manao e tautala e uiga ia Keriso nai lo le vaai atu faalemafaufau i Lona toe afio mai. E ui tatou te le iloa pe o afea o le a Ia toe afio mai ai, ae o mea e tutupu i Lona toe afio mai o le a ofoofogia! O le a afio mai o Ia i ao o le lagi i le mamalu ma le matagofie faatasi ma Ana agelu paia uma. E le na o nisi o agelu, ae o Ana agelu paia uma lava. (Neil L. Andersen, “Ua Matou Tautalatala e uiga ia Keriso,” Liahona, Nov. 2020, 91)

• E mafai faapefea e le malamalama pe faape’i le Afio Mai Faalua o le Faaola ona fesoasoani e faaosofia ai oe e saunia mo lena mea?

Mafaufau e valaaulia tamaiti aoga e faafesootai le Mataupu Faavae ma Feagaiga 45:44 i le mau faasino o le atamai i aoaoga faavae i le Mataupu Faavae ma Feagaiga 29:10–11.

Atonu e te manao e tusi le fua lenei i luga o le laupapa ma valaaulia tamaiti aoga e tusi ia latou api faamaumau mo suesuega soo se manatu po o lagona e oo mai i o latou mafaufau a o latou mafaufau loloto le leoa pe faapefea ona latou fuaina i latou lava.

Mo ituaiga eseese, mafaufau e sui ia fuainumera i luga o le fua i imoti [emojis] po o isi ata o loo faaalia ai lagona.

I le faaaogaina o lenei fua, o fea o le a e fuaina ai le maualuga o lou talitonuga mo faamatalaga nei?

• Ou te iloa ona sauni mo le Afio Mai Faalua o le Faaola.

• Ua ou lagona le lava saunia mo le Afio Mai Faalua o le Faaola.

Saunia mo le Afio Mai Faalua o Iesu Keriso

Atonu e fesoasoani le faasoa atu i tamaiti aoga o le Mataupu Faavae ma Feagaiga 38:30 o loo aoao mai ai “afai ua outou saunia o le a outou le matatau lava.” O le lesona o lō aso e mafai ona fesoasoani ia i tatou e faatoilalo ai lo tatou fefefe e ala i le taulai atu i ni auala se lua e mafai ona tatou saunia ai i tatou lava mo le Afio Mai Faalua. Mafaufau e tusi le “E mafai ona tatou sauniuni mo le Afio Mai Faalua o Iesu e ala i le ” i luga o le laupapa. A o suesue e tamaiti aoga ia fuaiupu nei, valaaulia i latou e tusi ia fasifuaitau e faauma ai le faamatalaga o i le laupapa.

Faitau le Mataupu Faavae ma Feagaiga 45:9–32 39, 57, 71, ma vaavaai mo auala e valaaulia ai e le Faaola i tatou e sauni mo Lona Afio Mai Faalua.

Atonu e fesoasoani le faasino atu o le taua o le tausia o a tatou feagaiga ma le Faaola i le saunia mo Lona toe afio mai (tagai fuaiupu 9).

E ui o le vaega 45 o loo aofia ai le tele o auala ua valaaulia ai i tatou e le Faaola e saunia mo Lona afio mai, ae o le vaega o totoe o lenei lesona o le a taulai atu i le upu moni faapea, e mafai ona tatou saunia mo le Afio Mai Faalua o Iesu Keriso e ala i le tutu i nofoaga paia ma avea le Agaga Paia mo lo tatou taiala. Ia lagona le saoloto e taulai atu i isi auala e saunia ai e tusa ai ma mea e fiafia i ai ma manaoga o tamaiti aoga.

Tutu i nofoaga paia ma avea le Agaga Paia mo lo tatou taiala

Mafaufau e vaevae tamaiti aoga i ni vaega ma tuu atu i vaega taitoatasi ia pepa e tufa atu. E mafai e vaega ona suesue se tasi po o vaega uma e lua o le pepa e tufa atu. A o galulue vaega, mafaufau e fai atu i nisi o i latou e sauni e faasoa mai mea na latou maua i le vasega pe a uma ona fai e tagata uma.

Saunia mo le Afio Mai Faalua

Tutu i nofoaga paia

Faitau mau faasino ma faamatalaga nei, ma vaavaai mo auala e mafai ona tatou filifili e tutu ai i nofoaga paia.

Salamo 24:3–4; Isaia 58:13; Helamana 5:12; 3 Nifae 18:24; Mataupu Faavae ma Feagaiga 27:15; 115:5–6

Na faamatala mai e Sister Ann M. Dibb o le Au Peresitene Aoao o Tamaitai Talavou:

Sa fautua mai Peresitene Ezra Taft Benson, “O nofoaga paia e aofia ai o tatou malumalu, o tatou falesa, o tatou fale, ma siteki o Siona, e … ‘mo se puipuiga, ma mo se sulufaiga’ [Mataupu Faavae ma Feagaiga 115:6]” [“Prepare Yourself for the Great Day of the Lord,” New Era, Me 1982, 50]. E faaopoopo atu i nei mea, ou te talitonu e mafai ona taitasi i tatou ma sueina nisi mau nofoaga. Atonu e tatau ona tatou mafaufau muamua i le upu nofoaga o se siosiomaga faaletino po o se tulaga faalefaafanua. Peitai, o se nofoaga e mafai ona o “se tulaga iloga, tulaga, po o se tulaga o le mafaufau” [Merriam-Webster Online, “place,” merriam-webster.com/dictionary/place]. O lona uiga o nofoaga paia e mafai foi ona aofia ai minute i taimie molimau mai ai le Agaga Paia ia te i tatou, taimi tatou te lagonaina ai le alofa o le Tama Faalelagi, po o taimi tatou te maua ai se tali i a tatou tatalo. E le gata i lea, ou te talitonu o soo se taimi e te maua ai le lototoa e tu atu mo le mea tonu, aemaise i tulaga e leai se isi e naunau e faia, ua e fatuina lava se nofoaga paia. (Ann M. Dibb, “O O Outou Nofoaga Paia,” Liahona, Me 2013, 115)

Ia Avea le Agaga Paia ma lo tatou taiala

Faitau mau ma faamatalaga nei, ma vaavaai mo auala e mafai ona tatou avea ai le Agaga Paia mo lo tatou taiala.

Faataoto 3:5–6; Salamo 118:8–9; 1 Nifae 4:6; 2 Nifae 32:5; Moronae 10:5; Mataupu Faavae ma Feagaiga 11:12–14

Sa aoao mai Peresitene Dallin H. Oaks o le Au Peresitene Sili:

E faapefea ona tatou avea le Agaga Paia ma o tatou taiala? E tatau ona tatou salamo i vaiaso taitasi ma faafou a tatou feagaiga e ala i le aai ma feinu i le faamanatuga ma lima mama ma se loto e mama, e pei ona poloaiina ai i tatou e fai [tagai Mataupu Faavae ma Feagaiga 59:8–9, 12]. E na o le pau lea o le ala e mafai ai ona tatou maua le folafolaga paia, o le a tatou “maua pea lona Agaga e faatasi ma i [tatou]” [Mataupu Faavae ma Feagaiga 20:77]. …

… E tatau ona tatou faia e le aunoa mea e tatau ai ina ia faatumauina ai lena Agaga. E tatau ona tatou tausia ia poloaiga, tatalo mo le taitaiga, ma auai i le lotu ma aai ma feinu i le faamanatuga i Aso Sa taitasi. Ma e le tatau ona tatou faia soo se mea e tuliese ai lena Agaga. Aemaise lava, e tatau ona tatou aloese mai ata ma tusi mataga, ava malosi, tapaa ma fualaau faasaina, ma ia aloese lava pea mai le solia o le tulafono o le legavia. (Dallin H. Oaks, “Aua Ne’i Faaseseina,” Liahona, Nov. 2004, 46)

• O a ni mafaufauga po o ni uunaiga na tulaga ese ia te oe a o e suesue?

• E mafai faapefea i le faia o nei mea ona saunia i tatou mo le Afio Mai Faalua o Iesu Keriso?

Filifili se tasi o vaega e lua mai le tufaaga. I le pito i tua o le pepa e tufa atu, tusi i lalo ni auala patino se lua pe tolu e mafai ai e le autalavou ona faaaoga aoaoga i lenei vaega i o latou olaga.

Mafaufau e fai atu i vaega e tuu a latou pepa e tufa atu i le potuaoga atoa ma ia faafaō pepa. Valaaulia tamaiti aoga e savavali faataamilo i le potuaoga e faitau ia le faaaogaina o manatu eseese. I se isi itu, e mafai e vaega ona fefaasoaai pepa ma le tasi ma le isi.

Filifili se faatinoga se tasi e te lagona o le a aoga mo oe e faaaoga i lou olaga.

• O le a se mea e mafai ona e faia e faaaoga ai lenei faatinoga i lou olaga?

• E faapefea e le faia o lenei mea ona fesoasoani ia te oe e saunia ai mo le Afio Mai Faalua o le Faaola?

Valaaulia tamaiti aoga e faasoa mai mea na latou aoaoina ma lagona i le taimi o le lesona. Vaalaaulia i latou e faatino o latou manatu ma lagona. Ina ia faaiu, mafaufau e faaali atu le fua o le faavasegaga mai le amataga o le lesona. Valaaulia tamaiti aoga e toe iloilo lo latou talitonu mauai i le saunia mo le Afio Mai Faalua o le Faaola.

Punaoa Faaopoopo

E faapefea ona ou mulimuli lelei atu i le Agaga i lo’u olaga?

Saili mea e siitia ai, musuia, ma valaaulia ai le Agaga. A o e faia filifiliga e uiga i mea e matamata ai, faitau, faalogo i ai, pe auai ai, mafaufau pe o a ni ou lagona. Pe o valaaulia ai ni mafaufauga lelei? Aloese mai soo se mea e tauemu i mea paia po o mea e le mama. Aua e te auai i soo se mea e faanenefu ai lau faamasinoga po o le nofouta i le Agaga, e pei o le faasaua, ava malosi, ma fualaau faasaina. Ia maua le lototele e tape ai se vitio po o se taaloga, savali ese mai se tifaga po o se siva, sui lau musika, pe liliu ese mai soo se mea e le ogatusa ma le Agaga. (Mo Le Malosi o le Autalavou: O Se Taiala mo le Faia o Filifiliga [2022], 18)

E mafai faapefea ona ou vaai atu i le lumanai ma le faamoemoe?

Na aoao mai Peresitene Russell M. Nelson:

Ou te le o fai atu o aso o i luma atu o le a faigofie, ae ou te folafola atu ia te outou o le a mamalu le lumanai mo i latou ua saunia ma ē e faaauau pea ona saunia ina ia avea ma meafaigaluega i aao o le Alii. (Russell M. Nelson, “Fetaiai ma le Lumanai i le Faatuatua,” Liahona, Nov. 2020, 76.)

Gaoioiga Faaopoopo e Aoao Ai

Auala e taitaia ai e le Agaga

Ina ia faapupula atili le ala e avea ai le Agaga ma ou taiala, e mafai ona e matamata i le vitio lenei e faamatala ai le aafiaga o Ensign Blair e uiga i le avea o le Agaga Paia ma ona taiala i le taimi o le Taua a Korea.

A o lei matamataina le vitio, atonu e te manao e faaali atu taiala taua e tolu na tuuina mai e Elder Larry Y. Wilson, o lē sa avea muamua ma Fitugafulu, i le auala e maua soo ai le taitaiga a le Agaga. Valaaulia tamaiti aoga e vaavaai mo faamaoniga o nei taiala i le tala a Ensign Blair.

Muamua, pe a oo mai i faaaliga, e tatau ona tatou ola agavaa e maua musumusuga faalelagi. … Lua, sa lei na ona ōle atu Ensign Blair i le Alii e foia lona faafitauli. Sa ia fesili po o le a le mea e mafai ona ia faia ia avea ai ma se vaega o le vaifofo. … [Lona Tolu,] faamata na mafai ea ona ia tatalo ma se faamautinoaga toafilemu pe ana le maua e ia le taitaiga mai le Agaga i mea na tutupu muamua? O le taunuu ai o se afā fulifaō e le o se taimi lea e faato’a saili ai le meaalofa o le Agaga Paia ae sa le’i ano lava i ai, ma mafaufau pe faapefea ona faaaoga.” (Larry Y. Wilson, “Avea le Agaga Paia ma Ou Taiala,” Liahona, Me 2018, 76)

Mo Le Malosi o le Autalavou

Ta’u i ai o le Mataupu Faavae ma Feagaiga 45:57 o loo lisi atu i le tamaitusi Mo Le Malosi o le Autalavou i le vaega “Fai Filifiliga Musuia” (tagai i itulau 4–5). Mafaufau e vaevae vaega o le Mo Le Malosi o le Autalavou ma atofa atu i tamaiti aoga po o vaega o tamaiti aoga. Fautuaina i latou e faitau a latou vaega ma vaavaai mo valaaulia na tuuina atu. Fai atu ia i latou e talanoaina pe faapefea e le usiusitai i nei valaaulia ona mafai ai e i latou ona avea le Agaga Paia ma o latou taiala ma tutu i nofoaga paia.

Isi amataga: O le faataoto i taupou e toasefulu

Faitau le Mataupu Faavae ma Feagaiga 45:56–57 ma faailoa mai nisi o mea e mafai ona faatusa i ai le suauu i le lamepa. Valaaulia tamaiti aoga e faasoa mai o latou lagona pe ana faapea o i latou o nisi o taupou popoto e toalima ma pe faapefea ona ese na lagona i taupou valea e toalima. Talanoaina pe na faapefea e sauniuniga, po o le leai o ni sauniuniga, o taupou taitasi ona aafia ai le aafiaga na latou maua ina ua sau le faatoafaiava.