Mataupu Faavae ma Feagaiga 46–48

Mataupu Faavae ma Feagaiga 46–48

Vaaiga Aoao

E lei leva ona faapotopoto le Au Paia i Katelani, Ohaio, i le 1831, ae amata ona tulai mai ni fesili e uiga i ni faiga patino ma amioga a nisi o tagata o le Ekalesia. O tagata e le o ni tagata o le ekalesia sa taofia i nisi taimi mai le sauniga faamanatuga, ma sa amata ona faaalia e nisi o tagata o le ekalesia ni ituaiga tapuaiga e le masani ai, ma fai mai ua latou mauaina ni meaalofa faaleagaga. Na faaali mai e le Alii upu moni taua i le Perofeta Iosefa Samita e faasa’o ai nei amioga ma faatonu le Au Paia e uiga i meaalofa faaleagaga.

Faamamafa atu le faataitaiga a Iesu Keriso: O se tasi o auala e tuu ai Iesu Keriso i le totonugalemu o le aoao atu ma le aoao mai, o le faamamafa atu lea o Ia o le faataitaiga atoatoa o mataupu faavae uma o le talalelei. E tusa lava pe le o faasino tonu le faataitaiga a le Faaola i se fuaitau o mau, e mafai ona tatou fesoasoani i tagata aoao e faia ni fesootaiga i le va o mea o loo tatou aoaoina i le tala faatusi paia ma le faataitaiga a le Faaola. Mo nisi faamatalaga i le auala e faia ai e le Faaola lenei mea, tagai i le vaega “Faamamafa le faataitaiga a Iesu Keriso.” i le Aoao Atu i le Auala a le Faaola. E mafai foi ona e vaai i se faataitaiga o le auala e faia ai lenei mea i le lesona i lenei vaiaso ua faaulutalaina “Mataupu Faavae ma Feagaiga 46:1–6.”

Ia saunia e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia mo lesona taitasi.

Mataupu Faavae ma Feagaiga 46:1–6

Faamoemoega o le lesona: Ina ia fesoasoani i tamaiti aoga e faaleleia a latou taumafaiga i le fatuina o se siosiomaga faafeiloai i sauniga a le Ekalesia.

• Sauniuniga a le tamaitiiti aoga: Valaaulia tamaiti aoga e mafaufau ma le agaga tatalo e uiga i se tasi i la latou paranesi, uarota, po o le vasega o le Ekalesia e mafai ona faaaogaina la latou fesoasoani e lagona atili ai le taliaina.

• Ata: Faailoga o le “Faafeiloaiga o Tagata Asiasi Mai”

• Vitio: “Susu maia” (1:05); “Valaauliaina o Isi e ‘O Mai ma Nonofo’” (1:39)

Mataupu Faavae ma Feagaiga 46:7–33, Vaega 1

Faamoemoega o le lesona: Ina ia fesoasoani i tamaiti aoga ia lagonaina le alofa o le Tama Faalelagi mo i latou a o latou aoaoina le mafuaaga Na te faamanuiaina ai i tatou i meaalofa faaleagaga.

• Sauniuniga a le tamaitiiti aoga: Valaaulia tamaiti aoga e mafaufau i taimi na musuia ai i latou e le Agaga Paia e mafaufau, fai atu, pe faia se mea na faamanuiaina ai o latou olaga po o olaga o isi. Fai atu ia i latou e mafaufau po o le a se mea na aoao atu e lenei aafiaga ia i latou e uiga i le alofa o le Tama Faalelagi mo Ana fanau.

• Vitio: “E Alofa le Tama Faalelagi ia te Au” (3:37)

• Anotusi e faaali atu: Faauigaga o meaalofa faaleagaga

• Pepa e tufa atu: “O Nei Meaalofa e Mai le Atua”

Mataupu Faavae ma Feagaiga 46:7–33, Vaega 2

Faamoemoega o le lesona: Ina ia fesoasoani i tamaiti aoga ia avea atili e faapei o Iesu Keriso a o latou sailia meaalofa a le Agaga.

• Sauniuniga a le tamaitiiti aoga: Valaaulia tamaiti aoga e taulai atu i a latou taumafaiga ia faapei o Iesu Keriso i le aso atoa a o lumanai ai lenei lesona. Uunaia i latou e faailoa mai malosiaga patino ma vaivaiga latou te matauina i a latou taumafaiga. O le a tuuina atu ia i latou se avanoa e saili ai ni auala e faamalosia ai o latou vaivaiga i lenei lesona.

• Vitio: “O le Togiola a Iesu Keriso” (11:33; matamata mai le faailo taimi 9:44 i le 10:26)

• Anotusi e faaali atu: Lisi o laasaga mo tamaiti aoga e mulimuli ai i le faaiuga o le lesona