Lesona 61: Mataupu Faavae ma Feagaiga 46–48

Mataupu Faavae ma Feagaiga 46:1–6

“Aua Tou Te Tuli Ese i Fafo … Soo Se Tasi”

I le 1831, ona o sauaga ma mea faalavefau, sa amata ai e nisi o le Au Paia ona faia se faiga o le faatagaina na o tagata o le Ekalesia e auai i sauniga tapuai. I le popole ai i lenei mea ma isi mataupu, sa tatalo Iosefa Samita mo le taitaiga ma maua mai ai le faaaliga o loo tusia i le Mataupu Faavae ma Feagaiga 46. I lenei faaaliga, na poloaiina ai e le Faaola tagata o le Ekalesia e talia i latou uma o e sa “saili ma le faamaoni le malo” (Mataupu Faavae ma Feagaiga 46:5) e auai i sauniga tapuai. O lenei lesona e mafai ona fesoasoani i tamaiti aoga e faaleleia a latou taumafaiga i le fatuina o se siosiomaga faafeiloai i sauniga a le Ekalesia.

Gaoioiga E Ono Mafai Ona Aoao Ai

Faafeiloai atu i tagata uma

Mafaufau e faaali atu se ata o se falesa i le lotoifale faatasi ai ma se faailoga o loo i ai upu “E Talia Tagata Asiasi Mai.” E mafai foi ona e faaaliaina nei upu i luga o le laupapa. O le vitio “Welcome”(1:05) e mafai ona fesoasoani ma saunia ai tamaiti aoga mo le talanoaga i le asō.

Faafeiloai Atu i le ComeUntoChrist.org

Faafeiloai atu mai se alalafaga e taumafai tagata e ola e pei ona aoao mai Iesu. O mai ma vaai i mea matou te talitonu ai i le ComeUntoChrist.org.

Mafaufau pe aisea e te manatu ai o lenei faailoga e masani ona maua i falelotu e anaina e Le Ekalesia a Iesu Keriso o le Au Paia o Aso e Gata Ai.

• E mafai faapefea e le lagonaina o le taliaina i le lotu ona avea ma sao i se aafiaga tapuai a se tagata?

  Mafaufau e faaali atu fesili nei ma valaaulia tamaiti aoga e fua lemu i latou lava i se fua o le 1 (E le taitai lava) i le 5 (Taimi uma lava). E mafai ona tusifaamaumau a latou tali i a latou api faamaumau mo suesuega.

• O le a le taliaina e te lagonaina i lau uarota, paranesi, po o le vasega seminare?

• E faafia ona e taumafai ia masani lelei i isi i faatulagaga faale-ekalesia?

• Pe e te lagona o le a lagona e au uo ma isi tagata i lou pitonuu le taliaina i sauniga tapuai i le lotu?

A o e suesue i le asō, vaavaai mo aoaoga a le Faaola e mafai ona e faaaogaina e fesoasoani ai ia te oe ma isi ia lagona le taliaina i le lotu.

O faatonuga a le Alii e uiga i le taliaina o isi

Faasoa le aotelega lenei e fesoasoani ai i tamaiti aoga ia malamalama i le talaaga mo fuaiupu o le a latou suesueina i le Mataupu Faavae ma Feagaiga 46.

I le 1831, sa i ai se popolega faapea o nisi o tagata o le Ekalesia sa mumusu e faataga tagata e le auai i sauniga tapuai a le Ekalesia. O lenei faiga na oo mai o se taunuuga o le faalavelave o fili o le Ekalesia i sauniga tapuai. Ina ua tatalo Iosefa Samita mo se taitaiga, sa faaali mai e le Alii ia aoaoga taua e uiga i le ala e tatau ona taitai ai e le Au Paia a latou sauniga.

Faitau le Mataupu Faavae ma Feagaiga 46:1–6, ma vaavaai mo faatonuga a le Faaola e faatatau ia i latou o e na mananao e auai i sauniga lotu.

• O le a se mea e mafai ona e aoaoina mai nei fuaiupu, e uiga i le auala ua finagalo le Alii tatou te taulimaina ai isi i totonu o sauniga a le ekalesia?

  Atonu e faailoa mai e tamaiti aoga se upu moni e talitutusa ma lenei: Ua poloaiina i tatou e le Alii e faafeiloai atu [talia] tagata uma i a tatou sauniga lotu.

  Ina ia faamamafa atu le taua o lenei upu moni, e mafai ona fesoasoani le tuu atu i tamaiti aoga e faitau le 3 Nifae 18:22–25. E mafai foi ona e fai atu i tamaiti aoga e faitau le parakalafa i lalo o le ulutala “Taulima tagata uma o se atalii/afafine o le Atua” i le vaega o le “Alofa i le Atua, alofa i lou tuaoi” o le Mo Le Malosi o le Autalavou: O Se Taiala mo le Faia o Filifiliga ([2022], 12).

• Aisea e te manatu ai o le faafeiloai atu [talia] o isi e taua tele i le Faaola i Lana Ekalesia?

• O a nisi o luitau i o tatou aso e ono faigata ai i se tasi ona lagona le taliaina i sauniga lotu?

• O a nisi o mea patino e mafai ona tatou faia e fesoasoani ai i isi ia lagona le taliaina i a tatou sauniga lotu?

I le avea ai o se vaega o le talanoaga o le fesili talu ai, mafaufau e faaali le vitio “Inviting Others to ‘Come and Stay’” (1:39), o loo maua i le ChurchofJesusChrist.org.

Valaauina o Isi ia "O Mai ma Tumau ai"

A lagona e tagata le taliaina i le lotu, o le a latou tumau. O loo faaalia e lenei vitio mo Le Ekalesia a Iesu Keriso o le Au Paia o Aso e Gata Ai ni auala e fesoasoani i tagata asiasi mai ia lagona le talisapaia pe a faatoa o mai i le lotu.

O Iesu Keriso o se faataitaiga o le talia o tagata uma

O le Faaola o le faataitaiga atoatoa lea o le valaauliaina ma le taliaina o tagata uma. Saili se faataitaiga se tasi pe sili atu mai tusitusiga paia o le taliaina ma le alofa o Iesu i tagata uma.

Afai e manaomia e tamaiti aoga se taitaiga faaopoopo, e mafai ona e faasino atu i latou i fuaitau o mau e pei o le Mataio 9:9–13; 19:13–15; Luka 19:1–10; po o le 3 Nifae 11:12–15. Mafaufau e valaaulia tamaiti aoga e faasoa mai mea na latou maua ma talanoa a latou tali i le fesili lenei. E mafai ona e valaaulia tamaiti aoga e fai ni nai faamatalaga i a latou api faamaumau mo suesuega ma ni manatu pe mafai faapefea ona latou mulimuli i le faataitaiga a le Faaola.

Faamamafa atu le faataitaiga a Iesu Keriso: Mo nisi fesoasoaniga e valaaulia ai tamaiti aoga e vaai pe faapefea ona faaalia e le Faaola mea o loo latou aoaoina, tagai i le aoaoga ua faaulutalaina “Faamamafa atu le faataitaiga a Iesu Keriso,” o loo maua i Tomai o le Atinaega o Faiaoga: Taulai atu ia Iesu Keriso.

O fesili nei e mafai ona faaaoga e fesoasoani ai i tamaiti aoga e faasoa mai mea sa latou aoaoina ma lagonaina.

• A o e suesueina le faataitaiga a le Faaola, na faapefea e Lona alofa ona faia se eseesega mo tagata sa Ia mafuta i ai?

• O le a se mea ua e aoaoina e uiga i le Faaola mai mea sa e suesueina e mafai ona e taumafai e faataitai i ai i lou lava olaga?

Mafaufau e valaaulia tamaiti aoga e mafaufau e uiga i ai ma faasoa mai ni aafiaga na latou maua i se mea na latou vaaia ai le lelei lea e mafai ona oo mai mai le fesoasoani atu i isi ia lagona le taliaina i a tatou sauniga lotu. E mafai foi ona e faasoa atu se aafiaga mai i lou lava olaga.

Faaaogaina o aoaoga a le Faaola

Fai se fuafuaga e faaaoga ai le poloaiga a le Faaola e fesoasoani i tagata uma ia lagona le taliaina i sauniga lotu. Faamaumau lau fuafuaga i lau api faamaumau mo suesuega. Mafaufau i fesili nei e fesoasoani ai i lau fuafuaga:

• O a nisi o auala patino e mafai ona e faaaogaina ai le fautuaga a le Faaola sa e suesueina i le asō?

• O le a sau mea e mafai ona e faia e lagona atili ai le taliaina o oe i sauniga lotu?

Mafaufau e valaaulia tamaiti aoga e tuuina atu a latou taumafaiga sili e faatino ai uunaiga atonu na latou maua ma le fuafuaga na latou faia i le aso. Uunaia tamaiti aoga e taumafai ia nofouta i manaoga o i latou o siomia i latou. Atonu e talafeagai le valaaulia o tamaiti aoga e faasoa mai o latou aafiaga i le taliaina o isi i le vasega i le taimi o se lesona e sosoo ai.

Punaoa Faaopoopo

O le a se mea e tatau ona ou faia pe afai ou te le lagonaina le taliaina i sauniga lotu?

Sa aoao mai Peresitene Dallin H. Oaks o le Au Peresitene Sili:

The Need for a Church

President Oaks teaches the blessings of belonging to the Church of Jesus Christ.

E fai mai nisi o le auai i sauniga faale-ekalesia e le o fesoasoani ia i latou. E fai mai nisi, “Ou te le’i a’oa’oina se mea ananei” po o le “E leai ma se tasi na fiauo ia te a’u” po o le “Sa ou tiga.” O ni lē fiafia faaletagata lava ia e lē tatau ai lava ona taofia i tatou mai le mataupu faavae a Keriso, o lē na a’oa’o mai i tatou ia auauna atu, ae le o le auauna mai [tagai i le Iakopo 1:27]. Faatasi ai ma lenei mea i le mafaufau, sa faamatala ai e se isi tagata le taulaiga o lona auai ai i le Ekalesia:

“I le tele o tausaga ua mavae, sa ou suia ai lo’u uiga faaalia e uiga i le alu i le lotu. Ua ou lē toe alu i le lotu mo a’u lava, ae ua ou mafaufau i isi. Ua fai ma au masani, lou faatalofa i tagata e nonofo na o i latou, ma faafeiloai tagata asiasi mai, … ua ou ofo atu lava a’u e faia se tofiga. …

“Pe a faapuupuu ou te alu i le lotu i vaiaso taitasi, ma le faamoemoe ou te toaga, ou te le faatali sei tau mai se mea e fai, ma ua ou faia se eseesega lelei i olaga o tagata.” (Dallin H. Oaks, “O Le Manaomia o se Ekalesia,” Liahona, Nov. 2021, 24–25)

Aisea e tatau ai ona ou taumafai e faia se siosiomaga faafeiloai i le lotu?

Na aoao mai e Sister Bonnie L. Oscarson, o lē sa avea ma Peresitene Aoao o Tamaitai Talavou:

Au uo talavou e, e mafai ona ou faamautinoa atu o le a i ai lava se tasi i sauniga uma a le Ekalesia e te auai ai o loo tuuatoatasi, o loo feagai ma ni luitau ma manaomia se uo, pe o ia lagona e le o faitaulia. Ua ia te oe se mea taua e saofaga atu i sauniga ma gaoioiga uma, ma e finagalo le Alii e te vaavaai solo i lau tupulaga ona auauna atu lea e pei ona Ia faia. …

E moni tatou te auai i a tatou sauniga Lotu i vaiaso taitasi e faatino sauniga, aoao aoaoga faavae, ma ia musuia, ae o le isi mafuaaga taua tele mo le auai o le, i le avea ma se aiga o le uarota ma soo o le Faaola o Iesu Keriso, tatou te vaavaaia le tasi ma le isi, faamalosiau i le tasi, ma saili auala e auauna ma fefaamalosia’i ai le tasi ma le isi. Ua le na o i tatou o ni e taliaina ma ave mea ua ofoina mai i le lotu; e manaomia foi i tatou ina ia avea ma tagata e tuuina atu ma sapalaiina atu. Tamaitai talavou ma alii talavou, o le isi taimi e te i ai i [gaoioiga a le autalavou], nai lo le piki i luga o lau telefoni e vaai po o a mea a au uo o fai, taofi, vaavaai solo, ma fesili ia te oe lava, “O ai o manaomiaina au i le asō?” Atonu o oe o le ki e aapa atu ma pai atu i le olaga o se paaga pe tuuina atu se faamalosiauga i se uo o loo tauivi le leoa.

Ole atu i lou Tama Faalelagi e faaali mai ia te oe i latou o siomia oe o manaomia lau fesoasoani ma uunaia oe i le auala sili e auauna atu ai ia i latou. Ia manatua sa masani lava ona auauna atu le Faaola i se tagata e toatasi i le taimi. (Bonnie L. Oscarson, “O Manaoga i o Tatou Luma,” Liahona, Nov. 2017, 26)

E faapefea ona ou fesoasoani i isi ia lagona lo latou taliaina?

Na aoao mai Elder Gerrit W. Gong o le Korama o Aposetolo e Toasefululua e faapea:

Avanoa i le Faletalimalo

Ua aoao mai Elder Gong e faapea, ua valaaulia i tatou e le Faaola ia avea ma Samaria agalelei o ē e talia tagata uma i Lona faletalimalo (o lona uiga o Lana Ekalesia), lea e mafai ona latou maua ai le lafitaga.

[O le Alii] ua finagalo o Ia ia tatou faia Lana [Ekalesia] o se nofoaga o le agaalofa ma se avanoa, ia e mafai ona faapotopoto ai tagata taitasi, ma maua se avanoa mo tagata uma. I le avea ai o ni soo o Iesu Keriso, e tutusa tagata uma, e leai ni vaega e tulagalua.

E talia tagata uma e auai i sauniga faamanatuga, o isi sauniga i le Aso Sa, ma gaoioiga faaagafesootai. Tatou te tapuai ma le migao i lo tatou Faaola, e mafaufau ma amanaia e le tasi le isi. Tatou te vaai ma aloaia tagata taitasi. Tatou te soisoi, nonofo faatasi ma ē e nonofo na o i latou, aoao ia iloa igoa, e aofia ai tagata faatoa liliu mai, o uso ma tuafafine ua toe foi mai, o tamaitai talavou ma alii talavou, o tamaiti pele taitasi o le Peraimeri.

Manatu faapea o tatou i ai i o latou tulaga, tatou talileleia uo, tagata asiasi mai, tagata faatoa masii mai i o tatou eria, o tagata e pisi i le fetosoa’iina i le mau mea. Tatou te faanoanoa, olioli, ma e tatou te i ai iina mo le tasi ma le isi. Pe a tatou lape i le faatinoga o o tatou tiute ma ua fenatia’i, ua lē mautonu, ua faamasinosino, pe ua faafiasili, tatou te sailia le faamagaloga a le tasi ma le isi ma faia ia sili atu. (Gerrit W. Gong, “Avanoa i le Faletalimalo,” Liahona, Me 2021, 25–26)

Gaoioiga Faaopoopo e Aoao Ai

Faaaogaina o ata faataitai

Ina ia fesoasoani i tamaiti aoga e mafaufau i nisi o lagona e ono i ai i tagata a o latou mauaina i latou lava i tulaga le mautonu i faatulagaga faale-ekalesia, mafaufau e faaaoga se tasi pe sili atu foi o ata nei. E mafai foi e tamaiti aoga ona maua se ata faataitai e ese mai ai.

• Sa aoao Tavita e uiga i le talalelei ma sa valaaulia talu ai nei e faifeautalai e auai i sauniga lotu i Aso Sa ma gaoioiga a le autalavou i vaiaso taitasi.

• Talu ai nei na siitia atu ai Raquel i se eria fou, e le masani ai ma e le iloa se tasi i lana uarota po o le paranesi fou.

• Sa filifili Blake e le auai i le seminare mo ona tausaga muamua e lua ae ua filifili nei ua manao o ia e auai.

A uma ona faamatala le ata faataitai, valaaulia tamaiti aoga e talanoaina fesili nei:

• O a nisi o lagona atonu o feagai ma lenei tagata?

• O le a sou manatu o le a le mea e finagalo le Faaola ia iloa pe faia e lenei tagata?

• O a ni nai faatinoga patino e mafai ona e faia e fesoasoani ai i lenei tagata ia lagona atili le taliaina?

• O a ni faafitauli e ono tulai mai i a tatou taumafaiga? E mafai faapefea ona faatoilaloina na faafitauli?

Auai i le seminare

O lenei lesona e mafai ona maua ai se avanoa lelei e iloilo ai e tamaiti aoga o latou lagona taliainai i le seminare. E mafai ona e valaaulia i latou e tali atu i uunaiga e pei o nei:

• Ou te lagona le pei o se tagata taua o lenei vasega.

• Ou te lagona le toafimalie e faasoa atu o’u manatu ma lagona i le vasega.

• Ou te lagona le mautinoa e i ai au uo i lenei vasega.

E mafai ona e valaaulia tamaiti aoga e faasoa mai se mea o le a fesoasoani latou te lagona ai le taliaina atili i le vasega. O tali e le faalauaiteleina pe le faailoaina e mafai ona fesoasoani ia te oe e faailoa ai mataupu faavae o le avea ma ni ō e mafai ona e faamamafaina e fesoasoani ai i tagata uma o le vasega ia lagona le manaomia ma le taliaina.

Mataupu Faavae ma Feagaiga 46:1–2. E tatau ona faatautaia sauniga e le Agaga Paia

Ina ia faamamafa atu le manaomia ona faatulaga ma taitai sauniga uma a le ekalesia e ala i le Agaga, mafaufau e valaaulia tamaiti aoga e suesue le Mataupu Faavae ma Feagaiga 46:1–2 ma faasoa mai mea na latou maua. Valaaulia tamaiti aoga e mafaufau loloto pe mafai faapefea ona latou valaaulia le Agaga Paia e fesoasoani ia atili anoa sauniga o le ekalesia mo i latou. E mafai ona fesoasoani fesili nei e amata ai se talanoaga:

• O le a se mea e mafai ona tatou faia e faaali atu ai i le Agaga ua tatou naunau ina ia aoaoina?

• E mafai faapefea e le Agaga Paia ona taitaia o tatou mafaufauga ma faatinoga a o tatou auai i sauniga lotu?

• E mafai faapefea ona tatou faatumauina se agaga o le migao ma ia talia isi?

Mataupu Faavae ma Feagaiga 46:5–6. “Saili ma le faamaoni i le malo”

Valaaulia tamaiti aoga e faitau le Mataupu Faavae ma Feagaiga 46:5–6 ma maka le fasituaitau “saili ma le faamaoni.” Ina ia fesoasoani i tamaiti aoga ia malamalama i le taua o le sailia o le Alii i se auala faamaoni (faamaoni pe naunautai), e mafai ona e valaaulia tamaiti aoga e talanoaina fesili e pei o nei:

• O le a le mea e fai pe le faia e se tagata o loo saili atu ma le naunautai i le Alii?

• Aisea o le a taua ai se uiga faaalia o le saili ma le faamaoni e i latou o e auai i sauniga lotu? E mafai faapefea e lena mea ona fesoasoani i se tasi ia lagona le Agaga?