Lesona 63: Mataupu Faavae ma Feagaiga 46–48

Mataupu Faavae ma Feagaiga 46:7–33, Vaega 2

“Ia Outou Saili ma le Faamaoni Meaalofa Silisili”

A o tatou taumafai e avea e faapei o Iesu Keriso, atonu o le a tatou lagonaina le lotovaivai i o tatou vaivaiga. Ona o Iesu Keriso, ua mafai ai ona tatou maua le Agaga Paia ma meaalofa faaleagaga e fesoasoani ia i tatou ia avea atili e faapei o le Faaola. O lenei lesona e mafai ona fesoasoani i tamaiti aoga ia avea atili e faapei o Iesu Keriso a o latou sailia meaalofa a le Agaga.

Gaoioiga E Ono Mafai Ona Aoao Ai

Saili ia avea faapei o le Atua

E mafai ona e amataina le vasega e ala i le valaaulia o tamaiti aoga e mafaufau i vaivaiga po o le lē atoatoa e mafai ona mafua ai le lē fiafia pe faalavelaveina ai i tatou mai le avea e faapei o le Tama Faalelagi ma Iesu Keriso. Valaaulia ni tamaiti aoga se toatele e tusi a latou tali i luga o le laupapa.

Mafaufau faapea ua faailoa mai e se tagata ua ia oo i nisi o vaivaiga ua ta’ua i luga o le laupapa ma mafaufau, “E le mafai ona ou faatoilaloina nei mea. Ona pau lava o a’u ia.”

• O le a se mea ua e iloa e uiga ia Iesu Keriso e mafai ona aoga mo lenei tagata ia malamalama ai?

Meaalofa a le Agaga

O se tasi o auala e mafai ai e le Tama Faalelagi ma Iesu Keriso ona fesoasoani ia i tatou e faatoilalo o tatou vaivaiga o le tuuina mai lea ia i tatou o meaalofa faaleagaga.

• O a mea e te iloa pe manatua e uiga i meaalofa faaleagaga?

Atonu e tali mai tamaiti aoga i upu moni sa latou aoaoina mai le lesona talu ai (“Mataupu Faavae ma Feagaiga 46:7–33, Vaega 1”). Afai e te lei aoaoina atu lenei lesona, e mafai ona e faamasani i ai ina ia mafai ona e fesoasoani i tamaiti aoga ia malamalama i meaalofa faaleagaga pe a manaomia.

Faitau le Mataupu Faavae ma Feagaiga 46:8 ma faamamafa atu le valaaulia a le Faaola e faatatau i meaalofa faaleagaga.

O le a sou manatu i le uiga o le saili i meaalofa faaleagaga?

• E mafai faapefea e le sailia o meaalofa faaleagaga ona fesoasoani ia i tatou i a tatou taumafaiga ia avea faapei o le Atua?

Sa faamalamalama mai e Brother Tad R. Callister, o lē sa avea muamua ma Peresitene Aoao o le Aoga Sa, le ala e fesoasoani ai nei meaalofa faaleagaga ia i tatou ia avea atili e faapei o le Atua:

O Le Togiola a Iesu Keriso

Ua aoao tatou e Brother Callister i le auala e fesoasoani ai le Togiola a Iesu Keriso ia i tatou e faatoilalo faafitauli i lo tatou alualu i luma.

Ona o le Togiola a Keriso, ua tatou agavaa ai e mauaina le meaalofa o le Agaga Paia ma ana meaalofa faaleagaga e o mai faatasi ai. O nei meaalofa o ni uiga paia o le faaleatua o le mea lea, o taimi taitasi tatou te maua ai se meaalofa a le Agaga, e avea atili i tatou e pei o le Atua. E le masalomia o le mafuaaga lena e fautuaina ai lava i tatou e tusitusiga paia i le tele o taimi e saili i nei meaalofa.

Sa aoao mai Peresitene George Q. Cannon: “E leai se tasi e tatau ona faapea mai, ‘Oi, e le mafai ona ou tuua lenei mea; o lo’u a natura lea.’ E le ta’uamiotonuina ai o ia, ona o le mafuaaga ua folafola mai e le Atua e … tuuina mai meaalofa o le a aveesea ai [o tatou vaivaiga]. … Afai e i ai se tasi o i tatou e le atoatoa, o lo tatou tiute le tatalo mo le meaalofa o le a faapea ona tatou atoatoa ai.” (Tad R. Callister, “O le Togiola a Iesu Keriso,” Liahona, Me 2019, 87)

• O le a se mea ua e aoaoina mai lenei faamatalaga e uiga i meaalofa faaleagaga?

  Fesoasoani i tamaiti aoga ia malamalama e valaaulia i tatou e le Tama Faalelagi e saili meaalofa a le Agaga ina ia mafai ai ona tatou avea atili e faapei o Ia.

• O a nisi o meaalofa faaleagaga e mafai e se tagata ona saili e faatoilalo ai vaivaiga na faailoa mai i le amataga o le lesona?

E mafai ona e valaaulia tamaiti aoga e tusi meaalofa faaleagaga i autafa o se vaivaiga talafeagai i luga o le laupapa. Mo se faataitaiga, afai na tusia le ita i luga o le laupapa, atonu e faailoa mai e tamaiti aoga le meaalofa o le onosai. Afai na tusia e tamaiti aoga le e leai se talitonuga, e mafai ona latou sailia le meaalofa o le lototele po o le faatuatua.

Ina ia fesoasoani i tamaiti aoga i lenei gaoioiga, e mafai ona e valaaulia i latou e toe faamanatu ia meaalofa faaleagaga o loo i le Mataupu Faavae ma Feagaiga 46:13–25. E mafai foi ona e faaaogaina le saunoaga a Brother Callister e faamanatu ai i tamaiti aoga o uiga faaKeriso, e pei o na o loo lisiina i le Moronae 7:45 po o le Mataupu Faavae ma Feagaiga 4:5–6, e mafai foi ona mafaufauina o ni meaalofa faaleagaga. Faamanatu i tamaiti aoga o isi meaalofa faaleagaga e le o lisiina i tusitusiga paia.

Mafaufau i au taumafaiga e avea e faapei o le Tama Faalelagi ma Iesu Keriso. Tali fesili nei i totonu o lau api faamaumau mo suesuega:

• O le a se vaivaiga po o se le atoatoa e te manao e faatoilalo?

• O a meaalofa faaleagaga e mafai ona e sailia e faatoilalo ai lena vaivaiga?

E faapefea ona tatou saili i meaalofa faaleagaga?

Fautuaina tamaiti aoga e faaaoga gaoioiga suesue nei e vaavaai ai mo auala e mafai ai e le Tama Faalelagi ma Iesu Keriso ona fesoasoani ia i latou a o latou sailia meaalofa faaleagaga ua latou lisiina ia latou api talaaga.

Faitau le Mataupu Faavae ma Feagaiga 46:7–10, 30-33. Vaavaai mo le taitaiga o le a fesoasoani ia te oe e saili ai meaalofa faaleagaga.

• Aisea e te manatu ai o faatinoga na e faailoa mai e mafai ona fesoasoani ia te oe i au taumafaiga e saili meaalofa faaleagaga?

Atonu e fesoasoani le faamanatu atu i tamaiti aoga o le sailia o meaalofa faaleagaga o se faagasologa umi i le olaga atoa, ma e tuuina mai e le Alii ia i latou e tusa ai ma Lona finagalo ma Lana taimi (tagai Moronae 10:17).

Sa faasoa mai e Elder Mervyn B. Arnold, o lē sa avea muamua ma Fitugafulu, se isi auala e mafai ai ona tatou sailia meaalofa faaleagaga mai le Atua:

A tatou saili ia maua se meaalofa faaleagaga, e mafai ona tatou suesue i faataitaiga ma aoaoga a le Faaola e faatatau i lena meaalofa faapitoa ona taumafai lea e faaaoga na aoaoga i o tatou olaga. (Mervyn B. Arnold, “Messages from the Doctrine and Covenants: Seek Ye the Best Gifts,” Ensign, Mat. 2005, 66)

Ina ia fesoasoani i tamaiti aoga ia saunia e faaaoga le fautuaga mai le saunoaga talu ai, e mafai ona e valaaulia i latou e mafaufau i se meaalofa faaleagaga ma faataitai i aoaoga a Elder Arnold i le vasega. Mo se faataitaiga, afai e filifili e tamaiti aoga le meaalofa o le lototele e mafai ona e fesili:

• Na faapefea ona faaalia e Iesu Keriso le lototele i Lona soifuaga atoa? (Tagai i le Mataio 26:47–56.)

• O le a se mea ua aoao mai e le Faaola i tusitusiga paia ia i tatou e uiga i le lototele? (Tagai Iosua 1:9.)

• O le a se mea e mafai e se tasi ona fai e faataitai ai le faaaogaina o le lototele i o latou olaga?

• O a ni taga e mafai ona faia e se tagata e valaaulia ai le fesoasoani a le Faaola a o latou sailia le meaalofa o le lototele?

A uma lenei talanoaga, faaali atu faatonuga nei ma valaaulia tamaiti aoga e suesue e i latou lava se meaalofa faaleagaga.

Vaai i lau api talaaga i le meaalofa na e tusia e te manao e saili. Faauma laasaga nei:

1. Suesue i tusitusiga paia mo se faataitaiga o le faatinoga e le Faaola o lena meaalofa.

2. Saili fuaitau o mau o loo i ai aoaoga faaopoopo e uiga i lena meaalofa.

3. Lisi ni mea se lua pe tolu e mafai ona e faia e faataitai ai le faaaogaina o lena meaalofa i lou olaga.

4. Tusi se mea o le a e faia e valaaulia ai le fesoasoani a le Faaola a o faaauau pea ona e sailia lena meaalofa. Afai e manaomia, vaai agai i le Mataupu Faavae ma Feagaiga 46:7–10, 30-33.

E mafai ona e faaiu i le valaaulia o tamaiti aoga e faasoa mai le meaalofa o loo latou sailia ma mea sa latou aoaoina mai le faataitaiga a le Faaola. Ia lapatai i latou e aua nei faasoa maia vaivaiga o loo latou taumafai e faatoilaloina o le a patino tele pe a talanoa i ai. Uunaia tamaiti aoga e galulue ma le faamaoni i uunaiga ua latou maua ma ia faaauau pea ona valaaulia le fesoasoani mai le Tama Faalelagi a o latou sailia meaalofa faaleagaga.

Punaoa Faaopoopo

E mafai faapefea ona ou faatino i le faatuatua a o ou saili e atiina ae meaalofa faaleagaga?

Sa aoao mai e Elder Juan Pablo Villar o le Au Fitugafulu:

Faamalolosi o Tatou Maso Faaleagaga

Ua aoao mai Elder Villar e tatau ia i tatou ona faatino lo tatou faatuatua ia Iesu Keriso ae le na o le faitau ma aoao e uiga i le faatuatua.

Faafetai i le Toefuataiga o le talalelei, ua mafai ai ona tatou malamalama i le auala e fesoasoani mai ai lo tatou Tama Faalelagi e atiae a tatou meaalofa faaleagaga. E foliga mai o le a Ia tuuina mai ia i tatou avanoa e atiae ai na meaalofa nai lo le na o le tuuina mai o i latou ia i tatou e aunoa ma se taumafaiga faaleagaga ma faaletino. Afai tatou te ogatusa ma Lona Agaga, o le a tatou aoao ia iloa na avanoa ona galue loa lea i ai.

Afai tatou te saili le onosai atili, atonu tatou te iloa ai e manaomia ona tatou faataitaia a o faatalitali mo se tali. Afai tatou te mananao ia alolofa atili i o tatou tuaoi, e mafai ona tatou faafaileleina e ala i le saofai i autafa o se tagata fou i le lotu. (Juan Pablo Villar, “Faagaoioiina o o Tatou Musele Faaleagaga,” Liahona, Me 2019, 96)

E mafai faapefea e meaalofa faaleagaga ona fesoasoani ia te au i tofotofoga i lo’u olaga?

Na faasoa mai Peresitene Dallin H. Oaks:

E tatau ona tatou saili atu i meaalofa faaleagaga. E mafai ona latou taitai atu i tatou i le Atua. E mafai ona latou puipuia i tatou mai le mana o le fili. E mafai ona latou tauia o tatou le atoatoa ma faaleleia o tatou le atoatoa. …

Sa ou vaaia le faatinoga o lena mataupu faavae i le fale lea sa ou ola ae ai. I le maliu ai o lana tane, sa le mautonu lo’u tina ua maliu lana tane. Oka sa matuai tatalo o ia mo mea na ia manaomia e faataunuu ai lona tiutetauave ia tausia se fanau laiti e toatolu! Na ia saili, na ia agavaa, ma na faamanuiaina o ia! Na taliina ana tatalo i le tele o auala, e aofia ai le mauaina o meaalofa faaleagaga. Na ia maua le tele o meaalofa, ae o meaalofa na tulagaese i lo’u mafaufau o meaalofa o le faatuatua, molimau, ma le malamalama. O ia o se tamaitai malosi i Siona, o se faataitaiga sili o se mau sa fiafia o ia e sii mai—o le folafolaga a Liae i lona atalii o Iakopo e faapea o le Atua “o le a faapaiaina ou puapuaga mo lou manuia” (2 Ni. 2:2). (Dallin H. Oaks, “Meaalofa Faaleagaga,” Ensign, Sete. 1986, 72)

Gaoioiga Faaopoopo e Aoao Ai

Mataupu Faavae ma Feagaiga 46:7, 32. Avatu le faafetai

Atonu e aoga i tamaiti aoga se talanoaga e uiga i le lotofaafetai a o latou suesueina le Mataupu Faavae ma Feagaiga 46. O se tasi o auala e faia ai lenei mea o le valaaulia lea o tamaiti aoga e faitau le Mataupu Faavae ma Feagaiga 46:7, 32, ma vaavaai mo le poloaiga na ta’ua soo.

Talanoaina le taua o le lotofaafetai ma tamaiti aoga. I le avea ai ma se vaega o le talanoaga, e mafai ona tou matamata i le “President Russell M. Nelson on the Healing Power of Gratitude” (11:47) pe valaaulia tamaiti aoga e saili mo se faamatalaga mai taitai o le Ekalesia pe usu se viiga e uiga i le mana o le lotofaafetai.

President Russell M. Nelson on the Healing Power of Gratitude​ - subtitled

In his 96 years, President Russell M. Nelson of The Church of Jesus Christ of Latter-day Saints has seen many trials. But he says there's a simple remedy to help us find joy in hard times—gratitude.

Mataupu Faavae ma Feagaiga 46:33. Faataitai le amio mama ma le paia

Mafaufau e matamata i le “Kalapu a le Au Le Laulauvavale” (4:56). Valaaulia tamaiti aoga e vaavaai pe na faapefea ona faatino e lenei talavou ia meaalofa o le amio mama ma le paia. I se isi itu, e mafai ona e valaaulia tamaiti aoga e faailoa mai ni meaalofa faaleagaga eseese atonu na manaomia e le alii talavou e faatoilalo ai faafitauli ma ausia ai mea sa ia faia.

No Cussing Club

One boy’s crusade to encourage clean language has far-reaching effects.

Mataupu Faavae ma Feagaiga 47. Tausiaina se talafaasolopito masani

Valaaulia tamaiti aoga e mafaufau i se mea e sili ona fiafia i ai mai le talafaasolopito o le Ekalesia po o se tala mai talafaasolopito o latou aiga. Tuu atu ia i latou e faasoa mai i le vasega po o ni vaega toalaiti.

• O le a se taua o le manatuaina o nei mea na tutupu?

Faitau i le Mataupu Faavae ma Feagaiga 47:1–4, ma vaai mo le valaauga na maua e Ioane Uitimera.

• O le a ese faapefea le O Le Ekalesia a Iesu Keriso o le Au Paia o Aso e Gata Ai pe afai e leai se faamaumauga o le talafaasolopito o le Ekalesia?

Atonu e fiafia tamaiti aoga e aoao atili e uiga i le talafaasolopito o le Ekalesia i lou atunuu e ala i le sailia o “Talafaasolopito i le Lalolagi Atoa” i le vaega o le “Talafaasolopito o le Ekalesia” o le Potutusi o le Talalelei. Uunaia tamaiti aoga e faaaoga le tele o punaoa o loo maua e fesoasoani ai ia i latou ia faamasani i le talafaasolopito o le Ekalesia e pei o le vaega o le “Talafaasolopitoo le Ekalesia” o le Gospel Library, history.ChurchofJesusChrist.org, po o le faasologa o tusi o le Au Paia . E mafai foi ona e valaaulia tamaiti aoga e faatu se sini e tausia se api talaaga po o se isi auala e tusifaamaumau ai talafaasolopito patino.

Mataupu Faavae ma Feagaiga 47. Ia faia le finagalo o le Alii

Valaaulia tamaiti aoga e faitau le faaulutala o le vaega o le Mataupu Faavae ma Feagaiga 47 ma vaavaai mo lagona o Ioane Uitimera e uiga i lona valaauga o se tusitalafaasolopito o le Ekalesia. Talanoaina ma tamaiti aoga le avanoa e ono talosagaina ai i latou e faataunuu se tofiga po o se valaauga i le Ekalesia e sili ai ona latou le faia. E mafai ona e faasoa atu lau molimau faapea, a o tatou saili e faia le finagalo o le Alii, o le a Ia fesoasoani mai ia i tatou i nei tofiga.

Ina ua valaauina Elder Neil L. Andersen o le Korama a Aposetolo e Toasefululua o se Fitugafulu, sa ia aoao mai:

Whom the Lord Calls, the Lord Qualifies

Elder Neil L. Andersen delivers a message titled "Whom the Lord Calls, the Lord Qualifies."

Ua ou faalogo ia Peresitene Monson o saunoa mai, “O lē ua valaauina e le Alii, e faaagavaaina e le Alii.” Ou te iloa e moni lenei mea, ma ou te maua ai le faamoemoe e vaavaai i tua atu o o’u lava le atoatoa. Ou te iloa a tatou i ai i le feau a le Alii, o le a faatasi o ia ma i tatou, o le a ia faamalosia i tatou, o le a ia faateleina o tatou gafatia. Ua ou oo i ai. Ua ou lagonaina lona Agaga siitia. I masina ma tausaga o i luma atu, o le a ou matua manaomia lava o ia. (Neil L. Andersen, “Whom the Lord Calls, the Lord Qualifies,” Ensign, May 1993, 82)

E mafai foi ona e faamanatu atu i tamaiti aoga afai e tuuina atu ia i latou mea e foliga mai o se valaauga faigata o le Ekalesia, e mafai ona latou sailia meaalofa a le Agaga o le a fesoasoani ia i latou e faataunuu o latou tofiga.