Lesona 58: Mataupu Faavae ma Feagaiga 45

Mataupu Faavae ma Feagaiga 45:1–8

“O Le Fautua i le Tama”

I le saunoa atu ai i tagata o le Ekalesia i le taimi o se faama’i pipisi i le lalolagi atoa, na saunoa ai Peresitene Russell M. Nelson, “Ua silafia e lo tatou Tama a siomia i tatou e le lē mautonu ma le fefe, o le mea o le a sili ona fesoasoani ia i tatou o le faalogo lea i Lona Alo” (“Faalogo ia te Ia,” Liahona, Me 2020, 89). Ina ia fesoasoani e faatoafilemu le fefe ma le lē mautonu o le Au Paia i le amataga o le 1831, sa valaaulia i latou e le Alii e faalogo i Lona siufofoga ma talitonu i Lona suafa. O lenei lesona e mafai ona fesoasoani i tamaiti aoga ia malamalama atili ai i le misiona ma uiga o Iesu Keriso a o latou malamalama i nisi o Ona suafa ma faalagiga.

Gaoioiga E Ono Mafai Ona Aoao Ai

O le taua o igoa

Mafaufau e vavae tamaiti aoga i ni vaega toalaiti ma valaaulia i latou e faasoa atu ni faamatalaga e faatatau i le uiga po o le taua o o latou igoa na tuuina atu po o igoa o aiga. Afai e le o mautinoa e tamaiti aoga ni faamatalaga po o ni uiga, e mafai ona latou faamatala mea latou te fiafia i ai e uiga i o latou igoa. A uma ona faasoa atu tamaiti aoga i ni vaega, fai atu i nisi e faasoa mai i le vasega se mea na latou aoaoina e uiga i le igoa o se tagata o le vasega.

Faitau le saunoaga lenei a Jonathan S. Schmitt o le Fitugafulu:

O se tasi ala faigofie tatou te iloa ai se tasi o le aoaoina lea o latou igoa. …

Na silafia e Iesu ma ta’u tagata i o latou igoa. Ia Isaraelu anamua, na fetalai le Alii, “Aua le fefe: aua ua ou faatauina oe, ua ou valaauina oe i lou lava igoa; e faia oe mo’u” [Isaia 43:1; faaopoopo le faamamafa]. …

E pei lava ona silafia e Iesu i tatou taitoatasi i se igoa, o se tasi o auala e mafai ona iloa atili ai Iesu o le aoaoina lea o Ona mau suafa. … O le tele o suafa o Iesu o faalagiga e fesoasoani tatou te malamalama ai i Lana misiona, faamoemoega, amioga, ma uiga. A oo ina tatou iloa le mau suafa o Iesu, o le a sili ona tatou malamalama i Lana misiona paia ma Ana amioga lē faapito’au. O le iloaina o Ona suafa e tele e musuia ai foi i tatou ia avea atili e faapei o Ia. (Jonathan S. Schmitt, “Ina Ia Latou Iloa Oe,” Liahona, Nov. 2022, 104–5)

Valaaulia tamaiti aoga e faasoa mai mea taua na latou maua mai le saunoaga a Elder Johnson.

Mafaufau e lisi i luga o le laupapa tali a tamaiti aoga i le fesili lenei.

• O a nisi o suafa po o faalagiga o Iesu Keriso o loo aoao atili ai oe e uiga i Lona tagata, misiona, ma uiga?

• E mafai faapefea e le malamalama atili e uiga i Ona suafa ma faalagiga ona faateleina lou manao e mulimuli ia te Ia?

A uma se taimi na talanoaina ai e tamaiti aoga le fesili talu ai, faaali atu le upu moni lenei: O le iloaina o suafa ma faalagiga o Iesu Keriso e mafai ona fesoasoani tatou te malamalama atili ai i Lana misiona paia ma uiga le manatu faapito.

Valaaulia tamaiti aoga e iloilo lo latou lava manao e aoao atili e uiga ia Iesu Keriso. Fuafua e faaaoga le manatu lea, pe mafaufau i ai oe lava ia. Fautuaina tamaiti aoga e manatunatu lemu ma tali i a latou api faamaumau mo suesuega.

Faaaoga le faavasegaga lenei e iloilo ai ou manaoga ma taumafaiga e malamalama atili ai e uiga i le Faaola.

1 = seāseā lava; 2 = o nisi taimi; 3 = e masani lava

• Ou te manao ia malamalama atili i le misiona paia a Iesu Keriso.

• A o ou suesue i tusitusiga paia, ou te vaavaai ma le loto i ai mo suafa ma faalagiga o Iesu.

• E taua ia te au le iloa o uiga o Iesu ina ia mafai ai ona ou mulimuli atili ia te Ia.

A o e aoao atili po o ai le Faaola e ala i le suesueina o Ona suafa ma faalagiga, ole atu ma le agaga tatalo i le Tama Faalelagi e fesoasoani e faateleina lou manao e mulimuli i Lona Alo.

O lo tatou Fautua ma le uo

E mafai e tamaiti aoga ona malamalama atili i le misiona ma uiga o Iesu e ala i le suesueina o se tasi o Ona suafa e tele. A uma ona talanoaina Lana matafaioi o lo tatou Fautua i le Tama, o le a maua e tamaiti aoga se avanoa e suesue ai e i latou lava ia suafa ma faalagiga eseese o Iesu.

Mafaufau e faaali atu se ata o Iesu i Ketesemane a o auai tamaiti aoga i le gaoioiga lenei:

Faitau le Mataupu Faavae ma Feagaiga 45:3–5, ma vaavaai mo se faalagiga ma se matafaioi o Iesu Keriso.

Manatunatu i faalagiga o Iesu Keriso: O le gaoioiga lenei e mafai ona fesoasoani i tamaiti aoga e iloa atili ai le Faaola e ala i le malamalama i Lona faalagiga o lo tatou Fautua i le Tama. Mo nisi aoaoga i le auala e fesoasoani ai i tamaiti aoga e taulai atu i faalagiga o Iesu Keriso, tagai i le aoaoga “Aoao Atu e uiga i faalagiga, matafaioi, ma uiga o Iesu Keriso” o loo maua i Tomai o le Atinaega o Faiaoga: Taulai atu ia Iesu Keriso. O lenei aoaoga faamasani e mafai ona fesoasoani i le atinaeina o le tomai o le “Fatuina o ni fesili sailiili e fesoasoani ai i tamaiti aoga e faailoa mai matafaioi, faalagiga, faatusa, uiga paia, ma amioga o Iesu Keriso.”

Mafaufau e fai atu fesili e pei o nei e fesoasoani ai i tamaiti aoga ia loloto lo latou malamalama i le matafaioi a Iesu Keriso i le avea ai ma o tatou Fautua i le Tama. E mafai ona e ta’u atu o se tasi o faauigaga o le upu fautua o se tasi e ofoina atu le lagolago ma lagolagoina le mafuaaga o i latou e manaomia le fesoasoani.

• O le a lou malamalama i le upu fautua?

• E tusa ai ma nei fuaiupu, e faapefea ona faataunuu e Iesu Keriso Lana matafaioi o lo tatou Fautua i le Tama?

• O a mea e mafai ona tatou aoaoina e uiga i amio a le Faaola mai nei fuaiupu?

Mafaufau e faitau ma tamaiti aoga le saunoaga lenei a Peresitene Russell M. Nelson. Valaaulia tamaiti aoga e faasoa mai pe faapefea e nei aoaoga faaopoopo mai ia Peresitene Nelson ona faateleina lo latou alolofa ma le talisapaia o Iesu Keriso.

O Iesu o lo tatou Fautua i le Tama (tagai 1 Ioane 2:1; MF&F 29:5; 32:3; 45:3; 110:4). O le upu fautua e sau mai le pogai faa-Latina o lona uiga o se “leo mo,” po o le “o se e aioi atu mo se tasi.” O isi faaupuga e fesootai i ai o loo faaaoga i tusitusiga paia, e pei o le fautua po o le puluvaga (tagai foi 1 Timoteo 2:5; 2 Nifae 2:28; MF&F 76:69). …

… O le malamalama ia te ia o lo tatou fautua-sooupu-puluvaga ma le Tama ua tatou maua ai le faamautinoaga o lona malamalamaaga le mafaatusalia, faamasinotonu, ma le alofa mutimutivale (tagai i le Alema 7:12). (Russell M. Nelson, “O Iesu o le Keriso—O lo Tatou Matai ma Isi” [Brigham Young University devotional, Feb. 2, 1992], 4, speeches.byu.edu)

Atonu o se manatu lelei lea i le lesona e tuu atu ai i tamaiti aoga se taimi e mafaufau loloto ai i o latou lagona e uiga i le Faaola. Mafaufau e tusi fesili nei i luga o le laupapa, ma valaaulia tamaiti aoga e tusi a latou tali i a latou api faamaumau mo suesuega. E pei ona talafeagai ai, fai atu i nai tamaiti aoga e faasoa mai nisi o latou lagona i le vasega.

• O le a sou lagona a o e taumafai e vaai faalemafaufau i le Faaola o aioi atu ma fautuaina oe?

• E mafai faapefea e le iloaina faapea o Iesu Keriso e fautua mo oe e faamalosia ai lau faaiuga e tumau i luga o le ala o feagaiga?

Aoao e uiga ia Iesu Keriso

A o suesue e tamaiti aoga ia fuaiupu nei, afai latou te manaomia le fesoasoani e faailoa ai se faalagiga o Iesu Keriso i le fuaiupu 1, atonu e manaomia ona e faamalamalama atu sa Ia ta’ua Lana matafaioi paia o le Foafoa o mea uma.

E tele isi suafa ma faalagiga o Iesu Keriso. Faitau le Mataupu Faavae ma Feagaiga 45:1,7, 59, ma vaavaai mo le tele o i latou.

Filifili pe o le a manuia tamaiti aoga mai le galulue faatasi ma isi po o i latou lava mo le gaoioiga lenei.

Fautuaina tamaiti aoga e mafaufau i se auala fatufatua’i e faatulaga ai mea o loo latou aoaoina. Mo se faataitaiga, e mafai e tamaiti aoga ona faia se mamanu ia latou api faamaumau mo suesuega e ala i le tusia o se igoa po o se faalagiga o Keriso i le ogatotonu o se itulau. A o latou mauaina isi mau ma fasifuaitau e fesoasoani ia i latou e malamalama atili ai i lo latou faalagiga filifilia, e mafai ona latou tusia nei mau i itu eseese ma le telē faataamilo i le itulau. Ona mafai lea ona latou tusia ni laina e fesootai ai mau ma fasifuaitau i le igoa po o le faalagiga.

Filifili se igoa po o se faalagiga mai lau suesuega e te manao e aoao atili i ai. Faaaoga punaoa mo suesuega o loo avanoa ia te oe, e pei o le polokalama o le Gospel Library ma fesoasoaniga mo le suesueina o tusitusiga paia, e aoao ai mea o loo aoao mai e le suafa po o le faalagiga e uiga ia Iesu Keriso. E mafai foi ona e suesue i upu a perofeta o aso e gata ai e aoao atili ai. A maea ona e suesue, tali fesili nei:

• O le a se mea na e aoaoina pe lagonaina i le asō na faateleina ai lou alofa ma le manao e mulimuli i le Faaola?

• E mafai faapefea e le faaauau pea ona suesue ma aoao atili e uiga i suafa o Iesu Keriso ona faamanuiaina ai lou olaga?

Mafaufau e valaaulia tamaiti aoga e faasoa mai ni faamatalaga ma ni malamalamaaga anoa mai a latou suesuega. Atonu e i ai ni avanoa i lesona i le lumanai e talanoaina atili ai mea na aoaoina e tamaiti aoga i aso nei e uiga i suafa ma faalagiga o Iesu Keriso.

Punaoa Faaopoopo

O le a se mea e mafai ona aoao mai e le fautua o Iesu Keriso ia i tatou e uiga i le Tama Faalelagi?

Na aoao mai Elder Dale G. Renlund o le Korama a Aposetolo e Toasefululua:

Ia Iesu Keriso, “o ia te i tatou le fautua i luma o le Tama” [1 Ioane 2:1]. Ina ua maea Lana taulaga togiola, na “toe afio ae Iesu i le lagi … e maua mai i le Tama ana aia tatau o le alofa mutimutivale lea ua ia ttuuina atu i luga o le fanauga a tagata.” Ma, i le mauaina ai o aia tatau o le alofa mutimutivale, “ua fautuaina ai e ia le faamoemoe o le fanauga a tagata” [Moronae 7:27, 28].

O le fautua ai o Keriso i le Tama mo tatou e lē o tetee atu i le fuafuaga. O Iesu Keriso, o lē na faatagaina Lona finagalo ia tofatumoanaina i le finagalo o le Tama, e le lagolagoina soo se mea nai lo le finagalo o le Tama talu mai le amataga. E tapuā’ia ma patipatia ma le lē masalosalo e le Tama Faalelagi o tatou tulaga manuia.

O le fautua ai o Keriso, i ni vaega, o le faamanatu mai lea ia i tatou ua Ia totogia a tatou agasala ma e leai se tasi e lē aofia i le alofa mutimutivale o le Atua. (Dale G. Renlund, “Ina Filifili Ia Outou i le Aso Nei,” Liahona, Nov. 2018, 104–5)

Mataupu Faavae ma Feagaiga 45:7. O le a se mea e mafai ona ou aoaoina e uiga ia Iesu mai le faalagiga “Alefa ma le Omeka”?

Na tusia e Elder Jeffrey R. Holland o le Korama a Aposetolo e Toasefululua:

O le Alefa, o le mata’itusi muamua o le pi faitau Eleni, e fautuaina le amataga ma le faavae. “… Sa Ou i ai i le amataga faatasi ma le Tama, …” ua ia faaalia mai i le (MF&F 93:21), ma, i le avea ai ma Ulumatua, e tu o ia i le itu taumatau o le Tama i le aufono a le lagi ma i le galuega o le foafoaga. …

… O le Omeka, o se igoa na aumai i le mataitusi mulimuli o le pi faitau Eleni, o Keriso o le faaiuga, o le faamoemoega i le iuga faapea foi le taunuuga faaiu o le olaga faitino. …

O mataitusi nei mai le faa-Eleni ua ta’u mai ai le matafaioi aoao a Iesu mai le amataga o le lalolagi e oo i lona iuga. Ae e tatau ona avea o ia ma Alefa ma le Omeka i se tulaga faapitoa—lo tatou amataga patino ma lo tatou iuga taitoatasi—o lena faataitaiga lea tatou te mamanu ai la tatou malaga … ma le tulaga tatou te fuaina ai i lona faaiuga.

I filifiliga uma tatou te faia, e tatau ona avea o ia ma o tatou tulaga o le faitauga, o la tatou ala fuafuaina, na o le pau lea o le tatou malutaga i luma atu. E tatau ona avea o Ia mo i tatou taitoatasi ma tagata e i ai o ia mo tagata uma i le tuufaatasiga—o le tapasa o le olaga, o le tapasa o lo tatou avanoa. E le tatau ona tatou se ese mai ia te ia. E le tatau ona tatou mananao e taumafai. O Aʼu o le Alefa ma le Omeka. (Jeffrey R. Holland, “Whom Ye Say Ye That I Am?,” Ensign, Sept. 1974, 6–7)

Mataupu Faavae ma Feagaiga 45:7. E faapefea ona avea Iesu Keriso ma “malamalama e susulu i le pouliuli”?

Na tautino mai e Elder David A. Bednar o le Korama a Aposetolo e Toasefululua e faapea:

I vaitau uma o o tatou olaga, i tulaga uma tatou te ono fetaiai, ma i luitau taitasi atonu tatou te feagai, o Iesu Keriso o le malamalama lea e aveesea ai le fefe, maua ai le faamautinoaga ma le taitaiga, ma faatupuina ai le filemu ma le olioli tumau. (David A. Bednar, “O le Malamalama ma le Ola o le lalolagi,” [Faigalotu o le Kerisimasi a le Au Peresitene Sili, 6 Tes., 2015], broadcasts.ChurchofJesusChrist.org)

Gaoioiga Faaopoopo e Aoao Ai

Mataupu Faavae ma Feagaiga 45:1. “Faalogo maia, outou e tagata o laʼu ekalesia”

O se isi auala e amata ai le lesona, mafaufau e fai atu i tamaiti aoga e mafaufau faapea e i ai sa latou filifiliga taua e fai ae mananao e fautua muamua ma isi. Fai atu i tamaiti aoga e mafaufau po o a uiga e mafai ona latou sailia i tagata a o lei faatuatuaina a latou fautuaga. Faamalamalama atu o le faaaliga o loo tusia i le Mataupu Faavae ma Feagaiga 45 na oo mai i se taimi na faalogo ma faitau ai tagata i savali feteenai e uiga i le Ekalesia. Valaaulia tamaiti aoga e faitau le Mataupu Faavae ma Feagaiga 45:1–8 ma vaavaai mo upu e pei o le faalogo, faalogologo, ma le logona. A o aoao atili tamaiti aoga e uiga i suafa, faalagiga, ma matafaioi a le Faaola, valaaulia i latou e mafaufau pe faapefea ona avea o Ia ma se punavai faatuatuaina o fautuaga mo i latou.

Mataupu Faavae ma Feagaiga 45:8. “O le toatele o i latou o e na talia a’u”

Atonu e manuia tamaiti aoga mai le aoaoina o le uiga o le talia ma le mauaina o le Faaola i o latou olaga. Valaaulia tamaiti aoga e faitau le Mataupu Faavae ma Feagaiga 45:8, ma fesili atu po o le a so latou manatu i le uiga o le fetalaiga a le Faaola ina ua Ia fetalai, “Na ou sau i lo’u lava, ma sa le talia a’u e lo’u nuu.” Valaaulia tamaiti aoga e talanoaina auala e mafai ona latou maua ai Iesu Keriso ma faatotonugalemu o latou olaga ia te Ia. E mafai foi ona e fesili i le vasega po o le a so latou manatu i le uiga o le “avea ma atalii [ma afafine] o le Atua.” A uma ona tali mai tamaiti aoga, valaaulia i latou e faasino i le Mataupu Faavae ma Feagaiga 45:8 ma le Mosaea 5:7–8. Talanoaina pe faapefea e nei fuaiupu ona faateleina lo tatou malamalama ma molimau atu i le taua o le taliaina o le Faaola ma le tauaveina o Lona suafa i o tatou luga.