Lēsoni 44: Tokāteline mo e Ngaahi Fuakava 29

Tokāteline mo e Ngaahi Fuakava 29:1–8

Fanongo ki Ho Huhuʻí

ʻOku maʻu ʻe he Tamai Hēvaní ha ʻofa lahi ki Heʻene fānaú kotoa. ʻOkú Ne finangalo mo Hono ʻAló ke tau fiefia ʻi he moʻuí ni pea ke tau kau fakataha mo Kinaua ʻi hono tānaki fakataha mai ʻo e kakaí kotoa ki Hona ʻaó. ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e finangalo ʻo e Tamai Hēvaní mo Sīsū Kalaisi maʻanautolú.

Ngaahi ʻEkitivitī Ako ʻOku Ala Fakahokó

Ko hai ʻokú ke falala ki aí?

Fakakaukau ki ha ngaahi founga ʻe lava ke ke tokoniʻi ai ʻa e kau akó ke nau vakai ʻoku makatuʻunga lahi ʻete falala ki ha tahá mei he mahino ʻokú te maʻu ki heʻenau ngaahi taumuʻá pe fiemaʻú. Ko ha founga ʻeni ʻe taha te ke lava ʻo fakahoko ai ʻeni.

Fakakaukau pe ko hai te ke loto-fiemālie ke falala ki ai ʻi he ngaahi meʻa ko ʻení pea mo e ʻuhingá.

1. Ko e ngaahi kī ho falé

2. Ko hoʻo lea fufū ki ha meʻangāue pe ʻakauni fakataautaha

3. Ko hoʻo fakaʻānaua pe taumuʻa fakataautaha tahá

• Ko e hā ʻokú ke ʻilo fekauʻaki mo e tokotaha pe kakai ko iá ʻokú ne tākiekina hoʻo loto-fiemālie ke falala kiate kinautolú?

Tohi ʻi hoʻo tohinoa akó ha sētesi ʻe taha pe ua ʻo fakamatalaʻi ʻa e meʻa ʻokú ke ʻilo fekauʻaki mo e ngaahi taumuʻa mo e finangalo ʻo e Tamai Hēvaní mo Sīsū Kalaisí. Kapau ʻokú ke ʻilo ha meʻa fekauʻaki mo ʻEna ngaahi taumuʻá pe finangaló, fakakaukau ki he founga ʻoku tākiekina ai hoʻo loto-fiemālie ke falala kiate Kinauá. Kapau ʻoku ʻikai lahi hoʻo ʻilo ki Heʻena taumuʻá pe finangaló, fakakaukau ki he ʻuhinga ʻoku hoko ai hono ʻiloʻi ʻení ko ha sitepu mahuʻinga ke ke loto-fiemālie ai ke falala kiate Kinauá.

Finangalo ʻo e Tamai Hēvaní mo Sīsū Kalaisí

Kimuʻa ʻi ha konifelenisi ʻa e Siasí ʻi Sepitema ʻo e 1830, naʻe folofola ʻa e Fakamoʻuí ʻi he Tokāteline mo e Ngaahi Fuakava 29 ʻo kau ki he ʻofá mo Hono finangalo mo e Tamai Hēvaní ki he kakai kotoa pē.

Ko e ʻekitivitī ko ʻení ko ha founga ia ʻe taha ke tokoni ki he kau akó ke nau ako ʻa e Tokāteline mo e Ngaahi Fuakava 29:1–8. Mahalo naʻa fiemaʻu ke liliu ke ne feau ʻa e tokolahi pe ngaahi fiemaʻu ʻa hoʻo kalasí.

Hiki ʻa e mataʻifika ʻuluaki ki he valú ʻi he palakipoé. Hili iá pea ʻoange ki he kau akó ʻa e fakahinohino ko ʻení. ʻAi ke nau muimui ki he fakahinohino takitaha kimuʻa pea toki ʻoange ʻa e fakahinohino hokó.

1. Lau ʻa e Tokāteline mo e Ngaahi Fuakava 29:1–8 pea fakaʻilongaʻi ʻa e meʻa ʻokú ke ako fekauʻaki mo e finangalo ʻo e Tamai Hēvaní mo Sīsū Kalaisi ʻi he veesi takitaha.

2. Hiki ho hingoá ʻi he palakipoé ʻi he tafaʻaki ʻo e mataʻifika ʻo ha veesi ʻoku ʻi ai hano ʻuhinga makehe kiate koe.

   Tatali ke hiki ʻe he kau akó kotoa honau hingoá ʻi he palakipoé ʻi he tafaʻaki ʻo e mataʻifika ʻo ha veesi, kimuʻa pea hoko atu ki he ngaahi sitepu hokó.

3. Kapau ʻe lava, tānaki fakataha mo ha kau ako ʻe toko ua pe toko tolu ʻa e tokolahi ʻo e niʻihi naʻe hiki honau hingoá ʻi he tafaʻaki ʻo e veesi tatau.

   Kapau ʻoku ʻi ai ha tokotaha ako ko hono hingoá pē ʻe taha ʻoku hiki ʻi he tafaʻaki ʻo e mataʻifika ʻo ha veesi, fakakaukau ke fakaʻatā ʻa e tokotaha ako ko iá ke ne fili pe ʻe ngāue fakafoʻituitui pe kau ki ha kulupu ʻe taha.

4. Vahevahe mo hoʻo kulupú ʻa e ngaahi foʻi lea pe kupuʻi lea naʻá ke fakaʻilongaʻi ʻi hoʻo vēsí pea mo e meʻa ʻoku nau akoʻi atu fekauʻaki mo e finangalo ʻo e Tamai Hēvaní mo Sīsū Kalaisí.

5. Aleaʻi ʻi hoʻo kulupú ha fehuʻi ʻe lava ʻo tokoni ke fakaloloto ʻa e mahino ʻokú ke maʻu ki he finangalo ʻo e Tamai Hēvaní mo Sīsū Kalaisí.

Fakaʻaliʻali pe ʻoange ki he kulupu takitaha ha lisi ʻo e ngaahi fehuʻi te nau lava ʻo fili ke aleaʻí. ʻE lava ke fili ʻe he kau akó ha fehuʻi mei he lisi ʻo e ngaahi fehuʻi ʻoku fokotuʻu atú, pe te nau faʻu haʻanau fehuʻi pē ʻanautolu. Ko ha ngaahi sīpinga ʻeni ʻe niʻihi:

• ʻE tākiekina fēfē nai ʻa e anga hoʻo vakai kiate koe mo e niʻihi kehé ʻi hono ʻiloʻi ʻa e moʻoni ko ʻení?

• Ko e fē ha taimi kuó ke fakamoʻoniʻi ai hano fakahaaʻi ʻe he Tamai Hēvaní mo Sīsū Kalaisi ʻa e ngaahi fiemaʻu ko ʻení ʻi hoʻo moʻuí pe ʻi he moʻui ʻa e niʻihi kehé?

• Ko e hā ha ngaahi potufolofola kehe ʻokú ne akoʻi ha foʻi moʻoni tatau? (Vakai ki he ngaahi potufolofola fakataukei fakatokāteliné, futinoutí, pe ngaahi maʻuʻanga tokoni kehé ke maʻu ha ngaahi potufolofola.)

• Ko e hā kuo akoʻi ʻe he kau palōfitá, kau ʻaposetoló, pe kau taki kehe ʻo e Siasí ʻokú ne poupouʻi ʻa e foʻi moʻoni ko ʻení? (Fekumi ki ha ngaahi fakamatala ʻi he Gospel Library.)

• ʻE fakatupulaki fēfē nai ʻe he veesi ko ʻení ʻetau malava ke vakai ki he moʻuí mei ha fakakaukau ʻoku taʻengatá?

• Ko e hā ha ngaahi fehuʻi ʻokú ke maʻu fekauʻaki mo e veesi ko ʻení? Ko e hā ha ngaahi fehuʻi ʻe lava ke ʻeke ke mahino lelei ange ai ʻa e veesi ko ʻení? (Ngāue fakataha ke maʻu ha ngaahi tali.)

• ʻE tākiekina fēfē nai ʻe he tuí pe moʻui ʻaki ʻa e ngaahi tefitoʻi moʻoni ʻoku akoʻi ʻi he veesi ko ʻení ʻa e vā fetuʻutaki ʻo ha taha mo e Tamai Hēvaní mo Sīsū Kalaisí?

• Ko e hā nai ka faingataʻa ai ki ha kakai ʻe niʻihi ke tui pe moʻui ʻaki ʻa e ngaahi akonaki ʻo e veesi ko ʻení? Ko e hā ʻe lava ʻo tokoni kiate kinautolu ke nau ikunaʻi ʻa e faingataʻa ko iá?

Ke fakaʻatā ʻa e ngaahi kulupú ke fakaloloto ʻa e mahino ʻoku nau maʻú, ʻe lava ke fili ʻe ha tokotaha ako ʻe taha ha fehuʻi kehe pea aleaʻi fakakulupu ia. ʻI he taimi ʻoku tuʻu ai ʻa e fevahevaheʻaki ʻa e kau akó pe mole ʻenau tokangá, ʻe lava ke ne fakahaaʻi kuo taimi ke liliu ʻa e ʻekitivitī akó. Kapau ʻe fiemaʻu, ʻe lava ke toe fakahoko ʻe he kau akó ʻa e ʻekitivitií ʻaki hono fili ha veesi foʻou, faʻu ha ngaahi kulupu foʻou, aleaʻi ʻa e veesi naʻa nau filí, pea muimui ki he ngaahi sitepu ʻoku hiki atu ʻi ʻolungá.

ʻI he ʻosi ʻa e ngāue fakakulupu ʻa e kau akó, fakaafeʻi ha niʻihi ke vahevahe mo e kalasí ʻa e meʻa kuo nau ako fekauʻaki mo e ngaahi finangalo ʻo e Tamai Hēvaní mo Sīsū Kalaisí.

Ko e finangalo lelei ʻo e ʻOtuá

ʻI he ngaahi moʻoni lahi naʻe ʻilo ʻe he kau akó, ko e moʻoni ʻe taha te tau lava ʻo ako mei he ngaahi veesi ko ʻení ʻoku finangalo ʻa e Tamai Hēvaní mo Sīsū Kalaisi ke foaki mai Hona puleʻangá kiate kitautolu. ʻE lava ke ke fakaafeʻi ʻa e kau akó ke fakaʻilongaʻi ʻa e foʻi moʻoni ko ʻení ʻi he veesi 5. Vahevahe ʻa e fakamatala ko ʻení pea fakaafeʻi ʻa e kau akó ke tali ʻa e ngaahi fehuʻi fekauʻaki mo iá.

Naʻe vahevahe ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni:

ʻOku finangalo ʻetau Tamai Hēvaní ke ke hoko ko Hono ʻea-hokó pea maʻu ʻa e meʻa kotoa ʻokú Ne maʻú. He ʻikai ke Ne lava ʻo foaki atu ha toe meʻa lahi ange. He ʻikai ke Ne lava ʻo talaʻofa atu ha toe meʻa lahi ange. ʻOkú Ne ʻofa ʻiate koe ʻo lahi ange ʻi he meʻa ʻokú ke ʻiloʻí mo Ne finangalo ke ke fiefia ʻi he moʻuí ni pea ʻi he moʻui ka hoko maí. (Dale G. Renlund, “Ko Ho Natula Faka-ʻOtuá mo e Ikuʻanga Taʻengatá,” Liahona, Mē 2022, 76)

• ʻOku liliu fēfē nai ʻe he mahino kau ki he finangalo ʻo e Tamai Hēvaní mo Sīsū Kalaisí hoʻo ongo fekauʻaki mo Kinauá?

• ʻOku tākiekina fēfē nai ʻe he mahino ʻokú ke maʻú kau ki Hona finangaló ʻa e ongo ʻokú ke maʻu fekauʻaki mo e faleʻi ʻokú Na ʻomi kiate kitautolú?

Fakakaukau ke fakaʻosi ʻaki hano fakaafeʻi ʻa e kau akó ke toe vakai ki he fakamatala naʻa nau hiki ʻi heʻenau tohinoá mei he kamataʻanga ʻo e kalasí. Fakaafeʻi kinautolu ke fakalaulauloto ki he ngaahi moʻoni kuo nau ako fekauʻaki mo e finangalo ʻo e Tamai Hēvaní mo Sīsū Kalaisí ʻa ia te nau lava ʻo tānaki ki heʻenau fakamatalá.

Ngaahi Maʻuʻanga Tokoni Kehé

Tokāteline mo e Ngaahi Fuakava 29:6. Ko e hā ʻoku totonu ai ke tau uouangataha mo e niʻihi kehé ʻi he lotú?

Kapau te ke fili ke vahevahe ʻa e konga ko ʻení mo hoʻo kalasí, fakakaukau ke mou mamata ʻi he vitioó pe vahevahe ʻa e fakamatala fakanounou mo e fakamatala ʻoku hoko maí.

Jesus Christ— the Master Healer

Lolotonga ʻa e ʻaʻahi ʻa Palesiteni Sipenisā W. Kimipolo mo hono uaifi ko Kamilá ki Nuʻu Silá, naʻá na palani ke na ʻalu ki ha kātoanga fakafonua naʻe teuteuʻi ʻe ha toʻu tupu tokolahi. Naʻe puke lahi ʻa e ongo Kimipoló ʻi he efiafi ko iá pea ʻikai ke na lava ʻo ʻalu. Ka neongo ia, ʻi he ofi ke kamata ʻa e kātoangá, naʻe fakaofo ʻa e ongoʻi sai ʻa e ongo Kimipoló peá na fakavave atu ki he polokalamá. ʻI he kamata ʻa e fakatahá, naʻe ui ha talavou ke ne fai ʻa e fua lotú.

Naʻe vahevahe ʻe Palesiteni Lāsolo M. Nalesoni ʻa e ngaahi fakaikiiki ko ʻeni ʻo e meʻa naʻe hokó:

Naʻá ne lotu ʻo pehē: “Ko e toʻu tupu kimautolu ʻe toko 3,000 ʻi Nuʻu Sila. ʻOku mau fakataha mai ki heni, kuo mau teuteu ʻi ha māhina ʻe ono ke hiva mo faiva maʻa Hoʻo palōfitá. ʻAloʻofa muʻa ʻo fakamoʻui ia pea fakaaʻu mai ia ki heni!” Hili hono lea ʻaki ʻa e “ʻēmení” naʻe hū atu ʻa e kā naʻe heka ai ʻa Palesiteni mo Sisitā Kimipoló ki he malaʻe vaʻingá. Naʻe ʻiloʻi kinaua ʻi he taimi pē ko iá, pea kaila fiefia ʻa e tokotaha kotoa pē! (Russell M. Nelson, “Jesus Christ—the Master Healer,” Liahona, Nov. 2005, 86)

Tokāteline mo e Ngaahi Fuakava 29:8. Ko e fē ʻa e “potu pē ʻe taha” ʻoku finangalo ʻa e ʻEikí ke tau tānaki fakataha ki aí?

ʻOku finangalo ʻa e ʻEikí ke tānaki fakataha Hono kāingalotú ki Saione. ʻI he ngaahi fuofua ʻaho ʻo e Siasí, naʻe feinga ʻa e Kāingalotú ke fokotuʻu ʻa Saione ʻi ha ngaahi feituʻu tefito ʻe lava ke fakataha ki ai ʻa e kāingalotú kotoa. ʻI he fakaʻau ke tokolahi ange ʻa e kāingalotú ʻi he funga ʻo e māmaní, ʻoku kole ki he kāingalotu ʻo e Siasí he taimí ni ke nau fakataha ʻi honau ngaahi haʻofanga lotu fakalotofonuá.

Naʻe akonaki ʻa Palesiteni Lāsolo M. Nalesoni ʻo pehē:

The Gathering of Scattered Israel

Ko e fili ke haʻu kia Kalaisí ʻoku ʻikai makatuʻunga ia ʻi he feituʻu ʻokú ke nofo aí; [ka] ʻoku makatuʻunga ia ʻi he tukupā fakafoʻituituí. ʻE lava ke “ʻomi [ʻa e kakaí] ki he ʻilo ʻo e ʻEikí” [3 Nīfai 20:13] kae ʻikai ke nau mavahe mei honau fonua tupuʻangá. Ko e moʻoni ʻi he kamakamata mai ʻa e Siasí, naʻe faʻa ʻuhinga ʻa ʻete uluí ke te hikifonua mei he feituʻu ko iá. Ka ʻi he taimi ní ʻoku fakahoko ʻa e tānakí ʻi he fonua kotoa pē. Kuo tuʻutuʻuni ʻe he ʻEikí ke fokotuʻu ʻa Saione [vakai, Tokāteline mo e Ngaahi Fuakava 6:6] ʻi he fonua kotoa pē kuó Ne foaki ai ki Heʻene Kau Maʻoniʻoní honau tupuʻangá. ʻOku tomuʻa fakahā ʻe he folofolá kuo pau ke “tānaki fakataha mai ʻa [e kakaí] ki ʻapi ki he ngaahi fonua ʻo honau tofiʻá, pea toe fokotuʻu ʻa kinautolu ʻi honau ngaahi fonua kotoa pē ʻo e talaʻofá” [2 Nīfai 9:2]. “Ko e puleʻanga kotoa pē ko e feituʻu tānakiʻanga ia ki hono kakaí” [Bruce R. McConkie, in Conference Report, Mexico City Mexico Area Conference 1972, 45]. Ko e feituʻu ke tānaki ki ai ʻa e Kāingalotu Palāsilá ko Palāsila; ko e feituʻu ke tānaki ki ai ʻa e Kāingalotu Naisīliá ko Naisīlia; ko e feituʻu ke tānaki ki ai ʻa e Kāingalotu Kōleá ko Kōlea; ʻo pehē ai pē. Ko Saioné “ko e loto-maʻa” [Tokāteline mo e Ngaahi Fuakava 97:21]. Ko Saioné ko ha feituʻu pē ʻoku ʻi ai ha Kāingalotu angamāʻoniʻoni. ʻOku hoko ʻa e ngaahi nusipepá, fetuʻutakí, mo e fakatahaʻangá ko ha meʻa ia ke lava ai ʻe he kāingalotu kotoa pē ʻo maʻu ʻa e ngaahi tokāteliné, ngaahi kií, ngaahi ouaú mo e tāpuaki ʻo e ongoongoleleí, ʻo tatau ai pē pe ko e fē feituʻu ʻoku nau ʻi aí.

ʻE makatuʻunga maʻu pē ʻa e maluʻi fakalaumālié ʻi he tōʻonga moʻui ʻa ha tokotaha, kae ʻikai ko e feituʻu ʻokú ne nofo aí. ʻOku maʻu tatau ʻe he Kāingalotu ʻi he fonua kotoa pē ha totonu ki he ngaahi tāpuaki ʻa e ʻEikí. (Russell M. Nelson, “The Gathering of Scattered Israel,” Liahona, Nov. 2006, 81)

Ngaahi ʻEkitivitī Fakalahi ki he Akó

Ongo kaveinga ʻa e Toʻu Tupú

Fakaafeʻi ʻa e kau akó ke lau maʻuloto pe lau ʻenau kaveinga takitaha ʻo e Lakanga Taulaʻeiki Faka-ʻĒloné pe Kau Finemuí. Kole ange ke nau kumi ʻa e ngaahi moʻoni ʻoku nau ako fekauʻaki mo e Tamai Hēvaní, Sīsū Kalaisi, mo kinautolu peé. Fakaafeʻi kinautolu ke ako ʻa e Tokāteline mo e Ngaahi Fuakava 29:1–8 pea kumi ha ngaahi faitatau ʻi he ngaahi folofola ʻa e Fakamoʻuí mo e ongo kaveinga ʻa e toʻu tupú. Aleaʻi ʻa e founga ʻe lava ke tokoniʻi ai kinautolu ʻe he ngaahi veesi ko ʻení ke nau tui kakato ange mo moʻui ʻaki ʻa e ngaahi moʻoni ʻoku maʻu ʻi he ongo kaveinga ʻa e toʻu tupú.

“Fakahā ʻa ʻeku ongoongoleleí”

ʻI hono lau ʻe he kau akó ʻa e Tokāteline mo e Ngaahi Fuakava 29:4, fakamatalaʻi ange ʻoku ʻuhinga ʻa e foʻi lea ongoongoleleí ki he “ongoongo lelei.” Fakaafeʻi ʻa e kau akó ke fili ha moʻoni ʻo e ongoongoleleí ʻoku nau ongoʻi ko ha “ongoongo lelei.” Fakaafeʻi kinautolu ke vahevahe ia mo e kalasí ʻi he “leʻo ʻo e fiefia” (veesi 4).

Ko ha fakaʻānaua ki ʻapi

Fakakaukau ke mamata ʻi he foʻi vitiō “Migration: A Yearning for Home” (4:15), maʻu ʻi he ChurchofJesusChrist.org, ʻi he kamata ʻa e kalasí. Hili ʻa e vitioó, fakaafeʻi ʻa e kau akó ke fakakaukau ke fakaʻilongaʻi ʻa e kupuʻi lea “ko hono finangalo leleí ke ʻoatu kiate kimoutolu ʻa e puleʻangá” ʻi he Tokāteline mo e Ngaahi Fuakava 29:5.

ʻOku pehē ʻe ʻEletā Tieta F. ʻUkitofa ʻi he foʻi vitiō ko ʻení, “ʻOku ou tui kuo ongoʻi ʻe he tangata, fefine mo e fānau kotoa pē ha ui mei he langí, ʻi ha taimi ʻi heʻenau moʻuí. Kuo foaki mai ʻe heʻetau Tamai Hēvani ʻofeiná ʻa e maama ʻa Kalaisí, pea ʻoku ueʻi kitautolu takitaha ke tau fakatafoki hotau matá mo e lotó kiate Ia.”

• Ko e hā ha ngaahi founga ʻoku ui ai kitautolu ʻe he Tamai Hēvaní ʻi ha ngaahi taimi pau ʻi heʻetau moʻuí?

• Ko e hā ʻokú Ne feinga mai ai ki he tangata, fefine, mo e fānau kotoa pē?

Hili iá pea fakaafeʻi ʻa e kau akó ke lau ʻa e Tokāteline mo e Ngaahi Fuakava 29:1–8 pea kumi ha tali ki ha ngaahi fehuʻi hangē ko ʻení:

• Ko e hā ha tokoni kuo fakahoko ʻe he ʻOtuá maʻatautolu ʻi heʻetau fononga ke foki ki Hono puleʻangá?

• Ko e hā ha ngaahi fatongia ʻoku tau maʻu ke tokoniʻi ʻa e niʻihi kehé ʻi heʻenau fonongá?

Migration: A Yearning for Home

“[Ko] hono tānaki ʻo hoku kakai kuo filí”

ʻI hono vahevahe ʻe he kau akó ʻa e finangalo ʻo e ʻOtuá maʻa ʻEne fānaú kotoa, te ke lava ʻo fehuʻi ange, “ʻOku tokoni fēfē nai hono ʻiloʻi ʻeni fekauʻaki mo e Tamai Hēvaní ke mahino kiate koe ʻa e ʻuhinga ʻokú Ne ui ai kitautolu ke tānaki fakataha ʻa ʻIsilelí?” Fakaafeʻi ʻa e kau akó ke lau ʻa e Tokāteline mo e Ngaahi Fuakava 29:7. Kapau kuo teʻeki ke fakahoko ia ʻe he kau akó, te ke lava ʻo fakaafeʻi kinautolu ke nau fakakaukau ke fakaʻilongaʻi ʻa e finangalo ʻo e Fakamoʻuí ke tau tokoni kotoa ʻi he tānakí. ʻE lava ke ke kumi ha ngaahi founga te tau lava ai ʻo fakahoko ʻa e fatongiá ni ʻaki haʻatau ako ha lea konifelenisi kimuí ni fekauʻaki mo hono tānaki fakataha ʻo ʻIsilelí, ngāue fakafaifekaú, pe ngāue hisitōlia fakafāmilí.