“Tokāteline mo e Ngaahi Fuakava 29:9–29: Ko e Hāʻele ʻAnga Ua Mai ʻa Sīsū Kalaisí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 29:9–29,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 45: Tokāteline mo e Ngaahi Fuakava 29
Tokāteline mo e Ngaahi Fuakava 29:9–29
Ko e Hāʻele ʻAnga Ua Mai ʻa Sīsū Kalaisí
ʻE hoko ʻa e Hāʻele ʻAnga Ua Mai ʻa Sīsū Kalaisí ko ha ʻaho lahi mo fakamanavahē. Ko kinautolu ʻoku nau fakasītuʻaʻi ʻa e kau talafekau mo e ngaahi akonaki ʻa Sīsū Kalaisí te nau mamahi ʻi he ngaahi nunuʻa ʻo ʻenau ngaahi filí. Ko kinautolu ʻoku feinga ke muimui kiate Iá te nau maʻu ʻa e fiefia ʻi he mamata ki he toe hāʻele mai honau Huhuʻí ki he māmaní. Te Ne fakahaofi kinautolu mei he faiangahalá mo e mamahí pea nofo mo kinautolu ʻi ha taʻu ʻe tahaafe. ʻE lava ke tokoni ʻa e lēsoni ko ʻení ke ongoʻi fiefia ʻa e kau akó ʻi heʻenau ʻamanaki atu ki he toe hāʻele mai ʻa Sīsū Kalaisi ki he māmaní.
Ngaahi ʻEkitivitī Ako ʻOku Ala Fakahokó
Manavahē pe fiefia?
Fakakaukau ke fakaʻaliʻali ha fakatātā ʻo e Hāʻele ʻAnga Ua Maí, hangē ko ia ʻi he kamataʻanga ʻo e lēsoni ko ʻení. Fokotuʻu ha meʻafua mei he 1 ki he 10 ʻi he tafaʻaki ʻo e fakatātaá, ʻo fakafofongaʻi ʻe he 1 ʻa e “manavaheé” mo e 10 ʻa e “fiefiá.” Kole ki ha kau ako ʻe niʻihi ke nau fokotuʻu ha fakaʻilonga ʻi he meʻafuá ʻokú ne fakafofongaʻi ʻa e anga ʻo ʻenau fakakaukau ki he ongo ʻa e toʻu tupu tokolahi fekauʻaki mo e Hāʻele ʻAnga Ua Mai ʻa e Fakamoʻuí. Kole ange ke fakamatalaʻi ʻenau fakaʻilongá.
Fakakaukau leva ke fakaafeʻi ʻa e kau akó ke tali fakalongolongo ʻa e ngaahi fehuʻi ko ʻení ʻi heʻenau tohinoa akó.
-
ʻOkú ke ongoʻi fēfē nai ʻi he taimi ʻokú ke fakakaukau ai ki he Hāʻele ʻAnga Ua Mai ʻa Sīsū Kalaisí? Ko e hā hono ʻuhingá?
-
ʻI hoʻo fakakaukau ki he Hāʻele ʻAnga Ua Maí, ʻoku nofotaha nai hoʻo tokangá ʻi he Fakamoʻuí pe ʻi he ngaahi faingataʻa ʻe hoko kimuʻa Heʻene toe hāʻele maí? ʻOku liliu fēfē nai ʻe hoʻo tokangá hoʻo ngaahi ongó?
Fakaʻaongaʻi ha taimi feʻunga ke tokoni ke mahino ki he kau akó ʻa e kakano ʻo e palakalafi ko ʻení.
Ko e moʻoni ʻe lahi ha ngaahi ʻahiʻahi mo e faiangahala ʻi he ngaahi ʻaho fakaʻosí pea ʻe fekauʻi atu ʻa e “faingataʻá mo e fakaʻauhá” ki he kau angahalá (vakai, Tokāteline mo e Ngaahi Fuakava 29:8). ʻOku mahuʻinga foki ke ʻiloʻi ʻoku ʻikai fakatupu ʻe he liuaki mai ʻa e Fakamoʻuí ʻa e ngaahi faingataʻá mo e faiangahalá. ʻE fakahaofi ʻe Heʻene toe hāʻele maí ʻa ʻEne kau ākongá mei ai. ʻE maʻongoʻonga ange ʻa e Hāʻele ʻAnga Ua Maí ki Hono kau muimuí ʻi he meʻa ʻoku tau lava ʻo mafakakaukauá! ʻI hoʻo ako ʻi he ʻaho ní, kumi ha ngaahi ʻuhinga ʻe lava ke ongoʻi ai ʻe he kau faivelengá ʻa e fiefiá mo e ʻamanaki leleí ʻi heʻenau fakakaukau ki he toe hāʻele mai ʻa Sīsū Kalaisí.
Fiefia ʻi he hāʻele mai ʻa Kalaisí!
Lau ʻa e Tokāteline mo e Ngaahi Fuakava 29:10–13, ʻo kumi ʻa e ngaahi foʻi lea mo e kupuʻi lea ʻoku nau ʻoatu ha ngaahi ʻuhinga ke ke fiefia aí.
Ko e Tokāteline mo e Ngaahi Fuakava 29:10–11 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.
Fakaafeʻi ʻa e kau akó ke hiki ha lisi ʻi he palakipoé ʻo e ngaahi foʻi lea mo e ngaahi kupuʻi lea naʻa nau maʻú. ʻEke ki ha kau ako ʻe niʻihi ʻa e ʻuhinga naʻe tokoni ai ʻa e meʻa naʻa nau maʻú ke nau fiefiá.
ʻI heʻenau vahevahé, te ke lava ʻo tokoniʻi kinautolu ke liliu ke ʻuhinga kiate kinautolu ʻa e meʻa naʻa nau maʻú ʻaki haʻo ʻeke ange ha ngaahi fehuʻi vakaiʻi hangē ko ʻení:
-
ʻE fakafiemālie fēfē nai kiate koe ʻi hoʻo ʻiloʻi ko e taimi ʻe hā mai ai ʻa Sīsuú, ʻe hoko ia ʻi he “mālohi mo e fuʻu nāunau lahi”? (veesi 11).
-
ʻOku fēfē nai hoʻo fakakaukau atu ki he kehe hoʻo moʻui fakaʻahó ʻi he nofo ʻa Kalaisi “ʻi he māʻoniʻoni fakataha mo e tangatá”? (veesi 11).
-
Ko hai ʻi ho ngaahi ʻofaʻanga kuo pekiá ʻokú ke fiefia taha ke mamata ki ai ʻi he taimi ʻe fokotuʻu ai ʻe he Fakamoʻuí ʻa e kau māʻoniʻoní ʻi Heʻene hāʻele maí? (Vakai, veesi 13.)
-
Ko e hā ʻene ʻuhinga kiate koe ʻa e “ke nau [ʻia Kalaisi], pea ke mau taha peé”? (veesi 13). ʻOkú ke pehē ko e hā ʻoku fie taha ai ʻa Sīsū mo koé?
Te ke lava ʻo fokotuʻu ki he kau akó ke nau fakaʻilongaʻi ʻa e kupuʻi lea fakafolofola mahuʻinga ʻi he veesi 11: “Te u fakahā au ʻe au mei he langí ʻi he mālohi mo e fuʻu nāunau lahi … ʻo nofo ʻi he māʻoniʻoni fakataha mo e tangatá ʻi he māmaní ʻi ha taʻu ʻe taha afe.”
ʻOku nofotaha ʻa e toenga ʻo e lēsoni ko ʻení ʻi he ngaahi tūkunga fakaʻofoʻofa ʻe tāpuekina ai ʻe he Fakamoʻuí ʻa e kau māʻoniʻoní ʻi he lolotonga mo e hili ʻEne toe hāʻele maí.
Kimuʻa peá ke hoko atú, mahalo te ke fie tokoni ke mahino ki he kau akó ʻa e kupuʻi lea fakaʻosi ʻo e veesi 11, “ʻe ʻikai ke tuʻu ʻa e kau angahalá.” ʻE lava ke lau ʻe he kau akó ʻa e veesi 9, 15, mo e 17 ke vakai ki he ngaahi nunuʻa ʻe mamahi ai ʻa kinautolu ʻoku nau fakafisingaʻi ʻa Kalaisí. Kapau te mou ako ʻa e ngaahi veesi ko ʻení ʻi he kalasí, fakamanatu ki he kau ako ʻoku hohaʻa fekauʻaki mo honau ngaahi ʻofaʻangá, ʻoku finangalo pea ʻoku maʻu ʻe he Fakamoʻuí ʻa e mālohi ke fakamolemoleʻi mo fakamoʻui ʻa kinautolu kotoa pē ʻoku fakatomala pea haʻu kiate Iá.
(Fakatokangaʻi ange: ʻE nofotaha ʻa e ngaahi lēsoní ʻi he Tokāteline mo e Ngaahi Fuakava 45 ʻi he ngaahi fakaʻilonga ʻo e ngaahi kuongá mo e teuteu fakataautaha ki he Hāʻele ʻAnga Ua Mai ʻa Kalaisí.)
ʻE nofo ʻa Kalaisi mo e tangatá ʻi ha taʻu ʻe tahaafe
Fakaafeʻi ʻa e kau akó ke vahevahe ʻa e meʻa ʻoku nau ʻilo fekauʻaki mo e ngaahi tūkunga ʻi he māmaní lolotonga mo e hili ʻa e nofotuʻi ʻa Sīsū Kalaisí. Te ke lava foki ʻo fakaafeʻi kinautolu ke vahevahe ha ngaahi fehuʻi fekauʻaki mo ia.
Fakaʻaongaʻi ha ngaahi miniti siʻi ke fekumi ai ki ha ngaahi maʻuʻanga tokoni kuo fokotuʻu fakalangi ki ha ngaahi tali ki he ngaahi fehuʻi te ke ala maʻu fekauʻaki mo e Nofo Tuʻí pea mo e ngaahi tūkunga fakafiefia ʻe hoko lolotonga mo e hili ʻa e pule ʻa Kalaisi ʻi he taʻu ʻe afé. ʻE ala tokoni ʻeni kiate koe ʻi hoʻo akó:
Fakakaukau ke vahevahe ʻa e kau akó ki ha fanga kiʻi kulupu iiki pea ke ako ʻe he kulupu takitaha ha taha ʻo e ngaahi maʻuʻanga tokoni ko ʻení. Hili iá, fakaafeʻi ʻa e kulupu takitaha ke fakamatalaʻi ʻa e meʻa naʻa nau akó ki he kalasí, pe fakaafeʻi ʻa e kau akó ke faʻu ha ngaahi kulupu foʻou mo e kau ako naʻa nau ako ha ngaahi maʻuʻanga tokoni kehé pea taufetongi ʻi hono vahevahe ʻa e meʻa naʻa nau akó.
Fakahinohino ki he Ngaahi Folofolá, “Nofo Tuʻí,” scriptures.ChurchofJesusChrist.org
Ngaahi Tefito ʻo e Ongoongoleleí, “Nofo Tuʻí,” topics.ChurchofJesusChrist.org
Tokāteline mo e Ngaahi Fuakava 29:23–27
Ke tokoni ke vakai lelei ʻa e kau akó ki ha ngaahi ʻuhinga ke nau fiefia ai ʻi he ngaahi tūkunga hili ʻa e toe hāʻele mai ʻa e Fakamoʻuí, te ke lava ʻo fakaʻosi ʻa e konga ko ʻeni ʻo e lēsoní ʻaki hano vahevahe ʻa e lea ʻa ʻEletā D. Toti Kulisitofasoni ʻi he konga “Ngaahi Maʻuʻanga Tokoni Kehé.”
Ko e Tokanga Taha ki he Fakamoʻuí
Ke tokoni ke fakakaukauloto ʻa e kau akó ki he hāʻele hifo ʻa e Fakamoʻui ʻofá mei he langí, fakakaukau ke huluʻi ʻa e foʻi vitiō “Ko e Hā ʻa Sīsū Kalaisi ʻi he Ongo ʻAmelika he Kuonga Muʻá,” ʻoku maʻu ʻi he ChurchofJesusChrist.org, mei he taimi 11:20 ki he 16:31. Fakaafeʻi kinautolu ke kumi ʻa e ngaahi faitatau ʻi he ʻofa naʻe fakahaaʻi ʻe he Fakamoʻuí ʻi Heʻene ʻaʻahi ki he kau Nīfaí pea mo e meʻa ʻoku nau fakakaukau ʻe hoko ʻi Heʻene toe hāʻele maí.
Fakakaukau ke kuikui ho matá pea feinga ke fakakaukauloto ki he hāʻele hifo ʻa Sīsū Kalaisi mei he langí ke fakahaofi, maluʻi, mo fakamoʻui Hono kau muimuí. Tokanga ki he ngaahi ueʻi mei he Laumālie Māʻoniʻoní ke ke ʻilo ʻa e ongo ʻoku finangalo ʻa e Tamai Hēvaní ke ke maʻu ʻi he toe hāʻele mai ʻa Hono ʻAló.
-
Ko e hā ha fakafōtunga ʻokú ke sioloto ki ai ʻi Hono fofongá ʻi Heʻene mamata kiate kinautolu naʻe fāifeinga ke muimui kiate Iá?
-
Ko e hā ʻokú ke fakakaukauloto te Ne folofola ʻaki ki he kau faivelengá hili ʻEne hāʻele hifó?
-
ʻOkú ke pehē ko e hā ʻoku finangalo ʻa e Fakamoʻuí ke ongoʻi ʻe Heʻene kau ākongá fekauʻaki mo ʻEne toe hāʻele mai ki he māmaní?
Fakakaukau ke vahevahe hoʻo ngaahi ongó ʻi hoʻo hanganaki atu ki he toe hāʻele mai ʻa Sīsū Kalaisi ki he māmaní. Mahalo te ke fie fakaʻosi ʻa e kalasí ʻaki ha himi tuku ʻoku fakamatala ki he fakafiefia ʻo e hāʻele mai ʻa Kalaisí mo ʻEne pule ʻi he taʻu ʻe afé, hangē “Ko e Laumālie ʻo e ʻOtuá” (Ngaahi Himí, fika 2), “ʻE Kāinga Tau Loto-fiemālie” (Ngaahi Himí, fika 3), pe “Fiefia ki Māmani” (Ngaahi Himí, fika 110).
Ako Ma‘uloto
Mahalo te ke fie tokoni foki ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea mahuʻinga ʻo e folofolá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea folofola mahuʻingá ko e “Te u fakahā au ʻe au mei he langí ʻi he mālohi mo e fuʻu nāunau lahi … ʻo nofo ʻi he māʻoniʻoni fakataha mo e tangatá ʻi he māmaní ʻi ha taʻu ʻe taha afe.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”