“Tokāteline mo e Ngaahi Fuakava 29:36–50: Fili Maʻanautolu Pē,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 29:36–50,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 46: Tokāteline mo e Ngaahi Fuakava 29
Tokāteline mo e Ngaahi Fuakava 29:36–50
Fili Maʻanautolu Pē
Naʻe akoʻi ʻe he ʻEikí ʻa Siosefa Sāmita fekauʻaki mo e Hinga ʻa ʻĀtama mo ʻIví pea mo e tauʻatāina ke filí lolotonga ʻene ngāue ki he liliu fakalaumālie ʻo e Tohi Tapú. Naʻe akoʻi ʻe he ʻEikí ʻi he Tokāteline mo e Ngaahi Fuakava 29, ʻa e huhuʻi mei he Hinga ʻa ʻĀtama mo ʻIví ʻo fakafou ʻi he Fakalelei ʻa Sīsū Kalaisí. Ko e taumuʻa ʻo e lēsoni ko ʻení ke tokoni ke mahino lelei ange ki he kau akó ʻa ʻetau tauʻatāina ke filí ʻa ia naʻe foaki mai ʻe he ʻOtuá pea mo e huhuʻi naʻe fakahoko ʻe Sīsū Kalaisí.
Ngaahi ʻEkitivitī Ako ʻOku Ala Fakahokó
Ko hono fakahoko ʻo ha ngaahi filí
Fakaafeʻi ʻa e kau akó ke fakakaukau ki ha ngaahi fili kuo nau fai ʻi he houa ʻe 24 kuohilí ʻi heʻenau lau ʻa e lea ko ʻeni meia Palesiteni Tōmasi S. Monisoni (1927–2018).
ʻOku tau fakahoko ʻi he houa kotoa pē ʻo e ʻahó ha ngaahi fili ki ha meʻa ke fai pe ʻikai ke fai. ʻOku ʻi ai ʻa e niʻihi ʻoku ʻikai ke mahuʻinga, pea niʻihi ʻoku fuʻu mahuʻinga ange. He ʻikai mahuʻinga ʻa e niʻihi ki he taʻengatá, ka ʻe fuʻu mahuʻinga ʻaupito ʻa e niʻihi. (Thomas S. Monson, “Ko e Konga ʻe Tolu ʻo e Filí,” Liahona, Nōvema 2010, 67)
Fakakaukau ke hiki ʻa e ʻikai mahuʻingá mo e taukakapá ʻi he palakipoé. Fakaafeʻi ʻa e kau akó ke hiki ha ngaahi fili angamaheni ʻoku fai ʻe he kakaí ʻi lalo ʻi he ʻuluʻi tohi takitaha. Fakaafeʻi leva kinautolu ke aleaʻi pe ko e ngaahi fili fē ʻoku mahuʻinga taha ke tau vakai ki ai mei ha fakakaukau ʻoku taʻengatá kimuʻa pea tau toki fakahoko kinautolú.
-
Ko e hā ha ngaahi fili taukakapa kuó ke fai, pe te ke fai, ʻe lava ke ne liliu lahi ho vā fetuʻutaki mo e Tamai Hēvaní?
Ko ʻetau tauʻatāina ke filí
Lau ʻa e Tokāteline mo e Ngaahi Fuakava 29:36–38, ʻo kumi ha fili taukakapa naʻe pau ke fai ʻe he fānau kotoa ʻa e ʻOtuá kimuʻa ʻi he moʻui ko ʻení.
-
Ko e hā ha fili naʻa tau fakahoko kotoa kimuʻa ʻi he moʻui ko ʻení?
Naʻe fakamatalaʻi ‘e ‘Eletā Lōpeti•D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa e ngaahi ola taukakapa ʻo e fili naʻa tau fai ʻi he maama fakalaumālié.
Koeʻuhí ko e angatuʻu ʻa Lusifaá, naʻe tupu ai ha fefusiaki fakalaumālie. Naʻe lava ʻa e fānau ʻa e Tamai Hēvaní ke fakaʻaongaʻi ʻa e tauʻatāina naʻe foaki ʻe he Tamai Hēvaní maʻanautolú. Naʻa tau fili ke tui ki he Fakamoʻui ko Sīsū Kalaisí—ke haʻu kiate Ia, muimui ʻiate Ia, pea tali ʻa e palani ʻa e Tamai Hēvaní naʻe ʻomi maʻatautolú. Ka ko e vahe tolu ʻe taha ʻo e fānau ʻa e Tamai Hēvaní naʻe ʻikai tui ke muimui ki he Fakamoʻuí ka naʻa nau fili ke muimui kia Lusifā, pe ko Sētane.
Pea naʻe folofola ʻa e ʻOtuá, “Ko ia, ko e meʻa ʻi he angatuʻu ʻa Sētane kiate aú, ʻo ne feinga ke fakaʻauha ʻa e tauʻatāina ke fili ʻa e tangatá, ʻa ia ko au ko e ʻEiki ko e ʻOtuá, kuó u foaki kiate iá, … pea naʻá ku pule ke kapusi hifo ia ki lalo” [Mōsese 4:3]. (Robert D. Hales, “Tauʻatāina ke Filí: Mahuʻinga ki he Palani ʻo e Moʻuí,” Liahona, Nōvema 2010, 24)
Fakaʻilongaʻi ʻa e kupuʻi lea tauʻatāina ke filí ʻi he veesi 36.
-
Te ke fakamatalaʻi fēfē nai ʻa e ʻuhinga ʻo e kupuʻi lea tauʻatāina ke filí?
Kapau ʻoku fiemaʻu tokoni ʻa e kau akó ki hono fakaʻuhingaʻi ʻo e tauʻatāina ke filí, fakakaukau ke fakaafeʻi kinautolu ke vakai ki he Fakahinohino ki he Ngaahi Folofolá ki ha tokoni.
Ko e foʻi moʻoni ʻe taha ʻe lava ke tau ako mei he ngaahi veesi ko ʻení koeʻuhí kuo foaki mai ʻe he ʻOtuá kiate kitautolu ʻa e tauʻatāina ke filí, te tau lava ʻo fili ke muimui pe fakafisingaʻi Ia.
-
ʻOku fakahaaʻi fēfē nai ʻe hono ʻomi ʻe he ʻOtuá ʻa e malava ke tau filí ʻa ʻEne ʻofa kiate kitautolú?
Ko e Hingá mo ʻetau tauʻatāina ke filí
Fakakaukau ke fakaafeʻi ʻa e kau akó ke faʻu ha kiʻi kulupu tokosiʻi, ʻoange ki he kulupu takitaha ha konga ʻo e laʻipepa tufa ko ʻení. Fakaafeʻi kinautolu ke lau fakataha ʻa e ngaahi potufolofola ʻoku fokotuʻu atú pea aleaʻi fakataha ʻa e ngaahi fehuʻí. Talaange kiate kinautolu ʻoku fakamatala fakahangatonu ha niʻihi ʻo e ngaahi potufolofolá kau ki he Hinga ʻa ʻĀtama mo ʻIví, ka ʻe lava ke tokoniʻi kinautolu ʻe he Laumālié ke nau vakai ki he founga ʻoku ʻaonga ai ʻa e ngaahi aʻusia ʻa ʻĀtama mo ʻIví ki heʻetau moʻuí ʻi he ʻaho ní.
Tauʻatāina ke Filí mo e Huhuʻi ʻo fakafou ʻia Sīsū Kalaisí
Ko e ngaahi ʻahiʻahi ʻa e tēvoló
Lau ʻa e Tokāteline mo e Ngaahi Fuakava 29:39 mo e 2 Nīfai 2:16–18, pea aleaʻi ʻa e ngaahi fehuʻi ko ʻení:
-
ʻI heʻetau ʻiloʻi naʻa tau fili ke muimui ki he palani ʻa e Tamai Hēvaní kimuʻa ʻi he moʻui ko ʻení, ko e hā ʻoku faingataʻa ai ke tau fili maʻu pē ke muimui kiate Ia ʻi he māmaní?
-
Ko e hā ʻa e ngaahi founga lelei taha ʻa Sētane ke ʻai ʻa e kakai ʻi he māmaní ke nau fili ke ʻoua te nau muimui ki he faleʻi ʻa e ʻOtuá?
-
Ko e hā ha ngaahi tāpuaki kuo foaki mai ʻe he ʻOtuá ke tau ikunaʻi ʻaki ʻa e ngaahi ʻahiʻahi ʻa Sētané?
Ngaahi ola ʻo ʻetau ngaahi filí
Lau ʻa e Tokāteline mo e Ngaahi Fuakava 29:40–41 mo e ʻAlamā 41:10–11; 42:9, 14, pea aleaʻi ʻa e ngaahi fehuʻi ko ʻení:
-
Ko e hā ha ngaahi founga ʻoku tau moʻulaloa ai ki he fiemaʻu ʻa e tēvoló ʻi he taimi ʻoku tau fili ai ke angatuʻu ki he ʻOtuá?
-
ʻOkú ke pehē ko e hā ʻoku hoko ai ʻa e foʻi lea “mate fakalaumālié” ko ha fakamatala lelei ʻo e mavahe mei he Tamai Hēvaní?
-
Te ke fakamatalaʻi fēfē nai ʻa e ngaahi ongo ʻoku tau aʻusia hili ʻetau fakaʻaongaʻi ʻetau tauʻatāina ke filí ke fakafepakiʻi ʻa e finangalo ʻo e Tamai Hēvaní?
Huhuʻi ʻo fakafou ʻi he ʻAlo Tofu Pē Taha ʻo e ʻOtuá Naʻe Fakatupú
Lau ʻa e Tokāteline mo e Ngaahi Fuakava 29:42–43 mo e 2 Nīfai 2:6–9, pea aleaʻi ʻa e ngaahi fehuʻi ko ʻení:
-
Ko e hā kuo fai ʻe Sīsū Kalaisi ke malava ai ʻa e huhuʻí naʻa mo e hili ʻetau fai ha ngaahi fili taʻe-fakapotopotó?
-
Ko e hā te ke vahevahe fekauʻaki mo e Tamai Hēvaní mo Sīsū Kalaisi te ne lava ʻo ʻoange ha ʻamanaki lelei ki ha taha ʻokú ne ongoʻi kuó ne fuʻu hē atu?
-
Ko e hā ha ngaahi sīpinga te ke lava ʻo vahevahe ke fakahaaʻi ʻaki ʻa e natula huhuʻi mo faʻa fakamolemole ʻo e Tamai Hēvaní mo Sīsū Kalaisí?
© 2023 by Intellectual Reserve, Inc. All rights reserved.
Hili hono maʻu ʻe he kau akó ha taimi ke aleaʻi ai ʻa e ngaahi fehuʻí ʻi heʻenau ngaahi kulupú, fakaafeʻi kinautolu ke faʻu ha ngaahi kulupu foʻou mo e kau ako naʻa nau ako ʻa e ngaahi konga kehe ʻo e laʻipepa tufá pea ke taufetongi ʻi hono vahevahe ʻa e meʻa naʻa nau akó.
ʻI he ʻosi ʻa e vahevahe ʻa e kau akó, fakakaukau ke mou lau fakakalasi ʻa e 2 Nīfai 2:26–29. Fakaafeʻi ʻa e kau akó ke kumi mo vahevahe ha ngaahi kupuʻi lea ʻoku nau fakapapauʻi pe tānaki atu ki he meʻa naʻa nau ako ʻi he ʻekitivitī kimuʻá.
Ko hono fili ʻo e huhuʻí ʻo fakafou ʻia Sīsū Kalaisí
Mahalo ʻe ongoʻi ʻe ha kau ako ʻe niʻihi kuo hanga ʻe heʻenau ngaahi filí ʻo ʻai kinautolu ke nau mamaʻo ʻaupito mei he ʻOtuá. Ke ʻoange ha faingamālie ke nau tokanga taha ai ki he huhuʻi ʻa Kalaisí, fakakaukau ke fakaʻaliʻali ha tūkunga hangē ko ʻení. Fakaafeʻi ʻa e kau akó ke tānaki ki ai ha ngaahi fakaikiiki ʻoku nau ongoʻi ʻoku moʻoni ki he toʻu tupu ʻo e ʻaho ní.
Kuo fai ʻe ha finemui ko Malia ha ngaahi fili ʻokú ne ʻiloʻi ʻoku hala. ʻOkú ne ongoʻi fakaʻiseʻisa mo mamaʻo mei he ʻOtuá mo fifili pe ʻoku ʻi ai ha ʻamanaki lelei maʻana.
ʻI hono fakaʻaongaʻi ʻo e meʻa naʻá ke ako ʻi he ʻahó ni fekauʻaki mo e tauʻatāina ke filí mo e huhuʻi ʻo fakafou ʻia Kalaisí, hiki ha tali te ke lava ʻo vahevahe mo Malia ʻa ia ʻokú ne poupouʻi ia ke ngāue ʻi he ʻamanaki lelei mo e tui neongo naʻá ne fakahoko ha ngaahi fili hala ʻi hono kuohilí.
Fakakaukau ke fakaafeʻi ha kau ako ʻe niʻihi ke vahevahe ʻenau ngaahi talí mo e kalasí. ʻI he fanongo ʻa e kau akó ki he tali ʻa honau kaungāakó, poupouʻi kinautolu ke fakakaukauloto ki he meʻa ʻe ala ongoʻi ʻe Malia ʻi heʻene fanongo kiate kinautolú.
Lau ʻa e lea ko ʻeni meia Palesiteni Tōmasi S. Monisoni (1927–2018), ʻo kumi ʻa e fili te ke lava ʻo poupouʻi ʻa Malia ke ne faí.
ʻI heʻetau fakalaulauloto ki he ngaahi fili ʻoku tau fai fakaʻaho ʻi heʻetau moʻuí—tatau ai pē pe ko e fili ko ʻení pe ko e fili ko ʻeé—kapau te tau fili ʻa Kalaisi, ta kuo tonu ʻetau filí. (Thomas S. Monson, “Ngaahi Filí,” Liahona, ʻEpeleli 2016, 86)
Te ke lava ʻo fakaʻosi ʻa e kalasí ʻaki hono fakaafeʻi ʻa e kau akó ke hiki ʻenau tali ki he sētesi fakaʻaiʻai ko ʻení ʻi heʻenau tohinoa akó pe ʻi ha feituʻu te nau toutou sio ki ai ʻi he lolotonga ʻo e uiké.
Fakaafeʻi ʻa e kau akó ke vahevahe: Ko ha sīpinga ʻeni ʻo hono fakaʻaongaʻi ha ueʻi ke tokoni ki he kau akó ke vahevahe ʻenau ngaahi fakakaukau ki ha ngaahi founga lahi ange ke faʻu ai ha ngaahi sētesi fakaʻaiʻai ʻe tokoni ke vahevahe ʻe he kau akó ʻenau ngaahi fakakaukaú, vakai ki he ako “Faʻu ha ngaahi sētesi fakaʻaiʻai ʻe tokoni ke fakamatalaʻi ʻe he kau akó ʻenau ngaahi ongó, aʻusiá, mo e fakamoʻoní.” ʻOku maʻu ʻa e ako ko ʻení ʻi he Fakatupulaki Ngaahi Taukei ʻa e Faiakó.
Te u fakaʻaongaʻi ʻi he uiké ni ʻa ʻeku tauʻatāina ke filí, ke fili ʻa Kalaisi ʻaki …