Tokāteline mo e Ngaahi Fuakavá – Tohi Lēsoni ʻa e Faiako Seminelí

Ngaahi Fakahokohokó
Peesi Talamuʻakí
Talateu ki he Tokāteline mo e Ngaahi Fuakavá – Tohi Lēsoni ʻa e Faiako Seminelí
Ngaahi Lēsoni ʻo e Tokāteline mo e Ngaahi Fuakavá
- Ko e Fanongonongo ʻo e Fakafoki Mai ʻo e Ongoongoleleí
- Tokāteline mo e Ngaahi Fuakava 1
- Siosefa Sāmita—Hisitōlia 1:1–26
- Tokāteline mo e Ngaahi Fuakava 2; Siosefa Sāmita—Hisitōlia 1:27–65
- Tokāteline mo e Ngaahi Fuakava 3–5
- Tokāteline mo e Ngaahi Fuakava 6–9
- Tokāteline mo e Ngaahi Fuakava 10–11
- Tokāteline mo e Ngaahi Fuakava 12–17; Siosefa Sāmita—Hisitōlia 1:66–75
- Tokāteline mo e Ngaahi Fuakava 18
- Tokāteline mo e Ngaahi Fuakava 19
- Tokāteline mo e Ngaahi Fuakava 20–22
- Tokāteline mo e Ngaahi Fuakava 23–26
- Tokāteline mo e Ngaahi Fuakava 27–28
- Tokāteline mo e Ngaahi Fuakava 29
- Tokāteline mo e Ngaahi Fuakava 30–36
- Tokāteline mo e Ngaahi Fuakava 37–40
- Tokāteline mo e Ngaahi Fuakava 41–44
- Tokāteline mo e Ngaahi Fuakava 45
- Tokāteline mo e Ngaahi Fuakava 46–48
- Tokāteline mo e Ngaahi Fuakava 49–50
- Tokāteline mo e Ngaahi Fuakava 51–57
- Tokāteline mo e Ngaahi Fuakava 58–59
- Tokāteline mo e Ngaahi Fuakava 60–63
- Tokāteline mo e Ngaahi Fuakava 64–66
- Tokāteline mo e Ngaahi Fuakava 67–70
- Tokāteline mo e Ngaahi Fuakava 71–75
- Tokāteline mo e Ngaahi Fuakava 76
- Tokāteline mo e Ngaahi Fuakava 77–80
- Tokāteline mo e Ngaahi Fuakava 81–83
- Tokāteline mo e Ngaahi Fuakava 84
- Tokāteline mo e Ngaahi Fuakava 85–87
- Tokāteline mo e Ngaahi Fuakava 88
- Tokāteline mo e Ngaahi Fuakava 89–92
- Tokāteline mo e Ngaahi Fuakava 93
- Tokāteline mo e Ngaahi Fuakava 94–97
- Tokāteline mo e Ngaahi Fuakava 98–101
- Tokāteline mo e Ngaahi Fuakava 102–105
- Tokāteline mo e Ngaahi Fuakava 106–108
- Tokāteline mo e Ngaahi Fuakava 109–110
- Tokāteline mo e Ngaahi Fuakava 111–114
- Tokāteline mo e Ngaahi Fuakava 115–120
- Tokāteline mo e Ngaahi Fuakava 121–123
- Tokāteline mo e Ngaahi Fuakava 124
- Tokāteline mo e Ngaahi Fuakava 125–128
- Tokāteline mo e Ngaahi Fuakava 129–132
- Tokāteline mo e Ngaahi Fuakava 133–134
- Tokāteline mo e Ngaahi Fuakava 135–136
- Tokāteline mo e Ngaahi Fuakava 137–138
- Ko e Ngaahi Tefito ʻo e Tuí mo e Ngaahi Fanongonongo Fakamafaiʻi 1 mo e 2
- Ko e Fāmilí: Ko ha Fanongonongo ki Māmani
- Ko e Kalaisi Moʻuí
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí
- Ko Hono Tanumaki ʻo e Moʻui Fakafalala Pē Kiate Kitá
- Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Ko e Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Lēsoni 49: Tokāteline mo e Ngaahi Fuakava 35: Ko e Liliu ʻe Siosefa Sāmita ʻa e Tohi Tapú

“Tokāteline mo e Ngaahi Fuakava 35: Ko e Liliu ʻe Siosefa Sāmita ʻa e Tohi Tapú,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)

“Tokāteline mo e Ngaahi Fuakava 35,” Tokāteline mo e Ngaahi Fuakava – Tohi Lēsoni ʻa e Faiako Seminelí

Lēsoni 49: Tokāteline mo e Ngaahi Fuakava 30–36

Tokāteline mo e Ngaahi Fuakava 35

Ko e Liliu ʻe Siosefa Sāmita ʻa e Tohi Tapú

ʻI he faʻahitaʻu māfana ʻo e 1830, naʻe kamata ngāue ai ʻa e Palōfita ko Siosefa Sāmitá ki ha liliu ueʻi fakalaumālie, pe liliu, ʻo e Tohi Tapu ʻa Kingi Sēmisí. Naʻá ne lau ʻa e ngāué ni ko ha konga mahuʻinga ʻo hono uiuiʻi ko ha palōfita ʻa e ʻOtuá. ʻE lava ke tokoni ʻa e lēsoni ko ʻení ke ongoʻi houngaʻia ʻa e kau akó ʻi he meʻa kuo fakahā ʻe he ʻEikí ʻo fakafou ʻi he Liliu ʻe Siosefa Sāmita ʻa e Tohi Tapú.

Ngaahi ʻEkitivitī Ako ʻOku Ala Fakahokó

Ko e Liliu ʻe Siosefa Sāmita ʻa e Tohi Tapú

Ke fakafeʻiloaki ʻa e kau akó ki he Liliu ʻe Siosefa Sāmita ʻa e Tohi Tapú, fakakaukau ke ʻoange kiate kinautolu ʻa e ngaahi fakamatala ko ʻení. Fakaafeʻi ʻa e kau akó ke mateʻi pe ʻoku moʻoni pe hala ʻa e fakamatala takitaha.

Hili siʻi pē hono pulusi ʻo e Tohi ʻa Molomoná ʻi he 1830, naʻe fakahinohinoʻi ʻe he ʻEikí ʻa Siosefa Sāmita ke kamata hono liliu ʻo e Tohi Tapú.
Naʻe sio ʻa Siosefa Sāmita ki he ngaahi tohi faka-Hepelū mo faka-Kalisi totonú ke liliu foʻou ʻa e Tohi Tapú ʻi he lea faka-Pilitāniá.
Naʻe fakahā ʻe he ʻEikí ʻa e tohi ʻa Mōsesé mo e Siosefa Sāmita—Mātiú ʻi he Mataʻitofe Mahuʻingá ko ha konga ʻo e Liliu ʻe Siosefa Sāmita ʻa e Tohi Tapú.
Naʻe fakahā ʻe he ʻEikí ha niʻihi ʻo e ngaahi moʻoni fakatokāteline naʻe akoʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní kia Siosefa Sāmita ʻi heʻene liliu ʻa e Tohi Tapú.
Kuo faitāpuekina ʻe he ʻEikí hoʻo moʻuí ʻo fakafou ʻi he Liliu ʻa Siosefa Sāmitá.

Fakaafeʻi ʻa e kau akó ke fekumi ki ha ngaahi tali ki he ngaahi fakamatala ko ʻení pea ki ha ngaahi fehuʻi kehe ʻoku nau maʻu ʻi he kaveingá lolotonga ʻa e lēsoní. ʻAi ke nau fakalaulauloto pe ʻoku moʻoni ʻa e fakamatala hono nimá kiate kinautolu.

Fakakaukau ke fakaafeʻi ʻa e kau akó ke tā ha tohi ʻi heʻenau tohinoa akó pea fakahingoa ia ko e “Liliu ʻa Siosefa Sāmitá.” Poupouʻi ʻa e kau akó ʻi he lolotonga ʻo e lēsoní ke nau tohi takatakai ʻi tuʻa ʻi heʻenau fakatātaá ʻa e ngaahi ʻuhinga ʻoku nau houngaʻia ai ʻi he Liliu ʻe Siosefa Sāmita ʻa e Tohi Tapú pe ngaahi fakakaukau ʻoku nau pehē ʻoku mahuʻingamālié.

Ngaahi Tāpuaki ʻo e Liliu ʻa Siosefa Sāmitá

Hili hono papitaiso ʻo Sitenei Likitoní, ko ha tangata malanga mālōlō, ʻe ʻŌliva Kautele ʻi Ketilani, ʻOhaioó, naʻá ne fononga ki Feieti, Niu ʻIoke ke feʻiloaki mo e Palōfita ko Siosefa Sāmitá. Ko e Tokāteline mo e Ngaahi Fuakava 35 ko ha fakahā ia mei he ʻEikí kia Siosefa Sāmita mo Sitenei Likitoni.

Lau ʻa e ʻuluʻi vahe ʻo e Tokāteline mo e Ngaahi Fuakava 35 mo e veesi 17–20, ʻo kumi ʻa e meʻa te tau lava ʻo ako fekauʻaki mo e Liliu ʻa Siosefa Sāmitá.

Ko e hā naʻá ke ako mei he ngaahi veesi ko ʻení?
Ko e hā ha taumuʻa naʻe ʻomi ʻe he ʻEikí ki he ngaahi liliu ueʻi fakalaumālie ki he Tohi Tapú (vakai, veesi 20)?

Ko e moʻoni ʻe taha naʻe akoʻi ʻe he ʻEikí ʻi he ngaahi veesi ko ʻení naʻe fakahā ʻe Sīsū Kalaisi ha toe ngaahi moʻoni ke tokoni ke tataki kitautolu ki he fakamoʻuí ʻo fakafou ʻi he Liliu ʻe Siosefa Sāmita ʻa e Tohi Tapú. Mahalo te ke fie vahevahe ʻa e fakamatala ko ʻení ki he kau akó ke tokoni ki hono tali ʻa e fehuʻi hono uá.

ʻI he talangofua ʻa Sitenei Likitoni ki he fakahā ko ʻení, naʻá ne kamata hoko ko ha tangata tohi ʻi hono fakahā ʻe he ʻEikí ha ngaahi fakatonutonu mo ha ngaahi fakalahi ueʻi fakalaumālie ki he Tohi Tapú ʻo fakafou ʻi he Palōfita Siosefa Sāmitá. Ko e ngāué naʻe ʻikai ko ha liliu fakahangatonu ia mei ha lea fakafonua ʻe taha ki ha lea fakafonua kehe. Naʻe fakaʻaongaʻi ʻe Siosefa ha tatau ʻo e Tohi Tapu ʻa Kingi Sēmisí ko ha kamataʻanga ʻi heʻene fekumi ki ha fakahā mo tala-kae-tohi ha ngaahi fakatonutonu mo ha ngaahi tānaki naʻe ueʻi fakalaumālie ia ki ai.

Fakaafeʻi ʻa e kau akó ke vahevahe ʻa e meʻa naʻa nau ako mo ongoʻi lolotonga ʻenau akó. ʻO ka fiemaʻu, ʻoange ki he kau akó ʻa e ngaahi tali ki he ʻuluaki fakamatala ʻe fā ʻo e ʻekitivitī kamatá (1. Moʻoni, 2. Hala, 3. Moʻoni, 4. Moʻoni). Fakakaukau ke ʻoange ki he kau akó ha ngaahi miniti siʻi ke nau hiki ʻi heʻenau tohinoa akó ha fakakaukau pē kuo nau maʻu pe ko e ʻuhinga ʻoku nau houngaʻia ai ʻi he Liliu ʻa Siosefa Sāmitá. Fakaafeʻi ha niʻihi ʻe loto-fiemālie ke vahevahe ʻa e meʻa naʻa nau hikí pe ʻuhinga ʻoku moʻoni ai kiate kinautolu ʻa e fakamatala hono nima mei he kamataʻanga ʻo e kalasí. Fakakaukau ke vahevahe hoʻo fakamoʻoni ki he Palōfita ko Siosefa Sāmitá pea mo e founga ʻoku tokoniʻi ai kitautolu ʻe heʻene ngāué ke tau ʻilo ʻa e Tamai Hēvaní mo Sīsū Kalaisí.

Ngaahi Maʻuʻanga Tokoni Kehé

Ko e fē te u lava ʻo ako lahi ange ai fekauʻaki mo e Liliu ʻe Siosefa Sāmita ʻa e Tohi Tapú?

ʻOku ʻoatu ʻe he ngaahi maʻuʻanga tokoni ko ʻení ha toe fakamatala lahi ange fekauʻaki mo e Liliu ʻa Siosefa Sāmitá:

Ngaahi Tefito ʻi he Hisitōlia ʻo e Siasí, “Liliu ʻe Siosefa Sāmita ʻa e Tohi Tapú,” ChurchofJesusChrist.org/study/history/topics

Elizabeth Maki, “Joseph Smith’s Bible Translation,” ʻi he Revelations in Context [2016], 99–104

The Joseph Smith Papers, season 1, episodes 20, “Joseph Smith Translation (JST), Part 1,” ChurchofJesusChrist.org

The Joseph Smith Papers, season 1, episode 21, “Joseph Smith Translation (JST), Part 2,” ChurchofJesusChrist.org

2:3

Naʻe ʻosi koā hono liliu ʻe Siosefa Sāmita ʻa e Tohi Tapú?

ʻI he ʻaho 2 ʻo Siulai, 1833, naʻe pehē ʻi ha tohi mei he Kau Palesitenisī ʻUluakí (Siosefa Sāmita, Sitenei Likitoni, mo Feletiliki G. Uiliamisi) ki he Kāingalotu ʻi Saioné, “Naʻa mau fakaʻosi ʻi he ʻahó ni ʻa hono liliu ʻo e Folofolá ʻa ia naʻa mau fakafoki ai ʻa e fakafetaʻí ki heʻetau tamai faka-hēvaní” (“Letter to Church Leaders in Jackson County, Missouri, 2 July 1833,” Letterbook 1, 51,josephsmithpapers.org).

Naʻe tākiekina fēfē nai ʻe he Liliu ʻa Siosefa Sāmitá ʻa e mahino ʻa e Kāingalotú ʻi he kuonga muʻá fekauʻaki mo Saioné?

Naʻe vahevahe ʻe Lōpeti J. Mātiu, ko ha mēmipa mataotao fakaako ʻo e Siasí, ʻa e meʻá ni:

Naʻe fakafalala ʻaupito ʻa e Siasí ʻi he 1830 ki ha fakahā foʻou kae lava ke nau ʻilo ha meʻa lahi fekauʻaki mo ʻĪnoke, ʻene ngāué, ko e kakai ʻo hono koló (Saione), pe ko ʻenau ngaahi fonó. Ka neongo ia, naʻe ʻamanaki ke fakahā ʻe he ʻEikí ki he Siasí ha meʻa lahi fekauʻaki mo ʻĪnoke pea mo e ngaahi fono fekauʻaki mo e Saione ʻi he kuonga muʻá mo e kahaʻú fakatouʻosi. Ko e fuofua talateu ki he ngaahi meʻá ni naʻe fai ia ʻi Nōvema mo Tīsema ʻo e 1830, lolotonga ʻa e liliu ʻa e Palōfitá meia Sēnesí. Naʻe maʻu ʻi he ngaahi māhina siʻi naʻe hoko maí ʻa e ngaahi fakahā ʻi he Tokāteline mo e Ngaahi Fuakava 42–43, 45–51, mo e 57–59 (Fēpueli–ʻAokosi 1831). ʻOkú ke lava nai ʻo sio ki he fakaofo ʻo e talateu ʻo e kikite ʻa ʻĪnoké ʻi he LSS Sēnesi vahe 7 (Mōsese 7) ʻi hono fakatoka ʻa e fakavaʻe ki he ngaahi fakahā kimui ní? ʻOku fakaofo hono lōloá ʻataʻatā pē. Ko e fakamatala fekauʻaki mo ʻĪnoke mo Saioné, ʻo hangē ko hono fakahā kia Siosefa Sāmitá ʻi Nōvema mo Tīsema ʻo e 1830 lolotonga ʻene liliu ʻa e Tohi Tapú, ʻoku liunga tuʻo hongofulu mā valu hono lōloá ʻi he lōloa ʻo e kotoa ʻo e fakamatala kau kia ʻĪnoké ʻa ia ʻoku ʻi he Pulusinga ʻa Kingi Sēmisí. (Robert J. Matthews, “The Joseph Smith Translation: A Primary Source for the Doctrine and Covenants,” ʻi he Sperry Symposium Classics: The Doctrine and Covenants, ed. Craig K. Manscill [2004], 142–54)

Ngaahi ʻEkitivitī Fakalahi ki he Akó

Ngaahi meʻa mahinongofua mo mahuʻingá

Fakakaukau ke kamata ʻa e kalasí ʻaki hono fakakulupu tautau toko nima ʻa e kau akó pe toko lahi ange. Fakahinohino ʻa e kau mēmipa ʻo e kulupú ke nau tangutu ʻi ha laine. Fakaafeʻi ʻa e tokotaha ako ʻi muʻa ʻi he laine ʻo e kulupu takitaha ke hū mai ki tuʻa mei he loki akó, pea talaange kiate kinautolu ha kupuʻi lea ʻoku ʻikai angamaheni, hangē ko e “ʻoku puna fakalaka ʻa e fōkisi lanu melomelo veʻe omá ʻi ʻolunga ʻi he kulī fakapikopikó pea lea mālō e lelei ki he pusí.” Fakahinohino ʻa e kau ako ko ʻení ke foki ki heʻenau ngaahi kulupú pea fanafana tuʻo taha ʻa e kupuʻi leá ki he tokotaha ako hoko ʻi he lainé. ʻE fanafana leva ʻa e tokotaha ako ko iá ʻa e meʻa naʻá ne fanongo ki aí ki he tokotaha ako hokó pea fai pehē ai pē kae ʻoua kuo aʻu ki he tokotaha ako fakaʻosí ʻi he kulupu takitaha. Fakaafeʻi ʻa e tokotaha ako fakaʻosi ʻi he kulupu takitaha ke vahevahe ʻa e meʻa naʻá ne fanongo ki aí, pea fakafehoanaki ia mo e kupuʻi lea totonú.

Ko e hā ʻa e meʻa naʻá ne fakatupu ke liliu ʻa e pōpoakí lolotonga hono paasi holó?

Naʻe mamata ʻa Nīfai ki ha meʻa-hā-mai ʻo hono ʻomi ʻa e Tohi Tapú. Lau ʻa e 1 Nīfai 13:24–27. Kumi ʻa e founga ʻe lava ke fekauʻaki ai ʻa e ngaahi veesi ko ʻení mo e ʻekitivitií.

Ko e hā naʻe hoko ki he Tohi Tapú ʻi he fakalau ʻa e taimí?
Kuo toe fakafoki fēfē mai nai ʻi he ngaahi ʻaho kimui ní ha niʻihi ʻo e ngaahi moʻoni mahinongofua mo mahuʻinga ko iá?

ʻE lava ke vahevahe ʻe he kau akó ha ngaahi tali ki he fehuʻi hono uá ʻo hangē ko e Tohi ʻa Molomoná pe kau palōfita ʻo onopōní. Fakamatalaʻi ange naʻe fakafoki mai foki ʻe he Liliu ʻe Siosefa Sāmita ʻa e Tohi Tapú ha ngaahi moʻoni lahi naʻe mole ʻi he fakalau ʻa e taimí.

Ko e Fakatupú mo e Hingá

Fakamatalaʻi ange lolotonga hono liliu ʻe Siosefa Sāmita ʻa e tohi ʻa Sēnesí, naʻá ne maʻu mo ha toe ngaahi fakakaukau ki hono Fakatupu ʻo e māmaní pea mo e Hinga ʻa ʻĀtama mo ʻIví (vakai, Mōsese 2–4). Fakafuofua ki he taimi naʻe liliu ai ʻe Siosefa ʻa e fakamatala ko ʻení, naʻá ne maʻu ʻa e fakahā ʻoku maʻu ʻi he taimí ni ʻi he Tokāteline mo e Ngaahi Fuakava 29.

Lau ʻa e Tokāteline mo e Ngaahi Fuakava 29:31–42. Kumi ʻa e meʻa naʻá ke ako fekauʻaki mo hono Fakatupu ʻo e māmaní mo e Hinga ʻa ʻĀtama mo ʻIví.

Ko e hā naʻá ke akó?
ʻE tokoni fēfē nai ʻa hono ʻiloʻi ʻo e ngaahi meʻa ko ʻení ke mahino lelei ange kiate kitautolu ʻa e fiemaʻu ke ʻi ai ha Fakamoʻuí (vakai, veesi 42)?

Fakakaukau ki he founga ʻe lava ai ʻe hono ʻiloʻi ʻa e ngaahi moʻoni ko ʻení ʻo tataki koe ki he ʻEikí mo e fakamoʻuí.